Batumelebi

ბათუმის ცენტრალურ პარკში ქვის სკამები გასულ წელს დადგეს. ქვის სკამებს ქვედა ნაწილში დამონტაჟებული აქვს განათება. შესაბამისად, მას მიეწოდება დენის წყაროს.

დღეს, 14 ოქტომბერს, „ბათუმელებმა“ ცენტრალურ პარკში გადაიღო ფოტოები, სადაც ჩანს, რომ სკამების ქვეშ დამონტაჟებული განათებები დაზიანებულია, დენის კაბელები კი – გაშიშვლებული.

პარკის მარცხენა სანაპიროზე, ზოოკუთხის გასწვრივ, დაახლოებით 20 ქვის სკამია განთავსებული. უმრავლეს შემთხვევაში დენის წყარო დაზიანებულია, კაბელები კი ღიაა.

ქვის სკამების პარკში განთავსება თავის დროზე მოსახლეობამ გააპროტესტა, რადგან ცივია და ზამთრის სეზონზე არაკომფორტული. ქვის სკამებც რამდენჯერმე დაამტვრიეს კიდეც პარკში, თუმცა მერიამ დამტვრეული სკამები ახლით ჩაანაცვლა.

ამის მიუხედავად, სკამებზე დამონტაჟებული განათებები მაინც დაზიანებულია და უსაფრთხოების ნორმები არ არის დაცული.

სკამზე, სადაც დენის კაბელები დაუცველ მდგომარეობაშია, პატარა ბავშვი და ხანდაზმული ადამიანი სხედან. სკამის ქვეშ კი დენის გაშიშვლებული სადენია.

ბათუმელი ნინა მასალკინა არასრულწოვან შვილებთან ერთად ბათუმის ცენტრალურ პარკში ხშირად სეირნობს. გასულ წელს ჰქონდა შემთხვევა, როცა პარკში სეირნობის დროს ტბასთან დამონტაჟებულ მოაჯირს შეეხო და დენმა დაარტყა.

„პარკში, ნავმისადგომი სადაც არის, მანდ არის რკინის მოაჯირები, ბავშვი რომ არ გადავარდეს წყალში. იმ დღეს ცოტა გაწვიმდა, მაგრამ მე და ჩემი შვილები წვიმაში ვსეირნობთ ხოლმე და გავაგრძელეთ თამაში.

როცა დავრბოდი, ბალახი გადავირბინე და ხელი მოვკიდე მოაჯირს, რომელმაც დენი გაატარა. შიშისგან ტირილი დავიწყე და ბავშვებს ვუყვირე, რომ ახლოს არ მოსულიყვნენ. ძლივს გავუშვი ხელი ამ მოაჯირს და მაშინვე წამოვედით სახლში შეშინებული“, – გვეუბნება ნინა.

ნინა ამბობს, რომ იმ წუთში არ დაურეკავს შესაბამისი სამსახურებისთვის, თუმცა მოგვიანებით ეს ამბავი ფეისბუქზე დაწერა და ბათუმის მერია მონიშნა პოსტზე.

„დაახლოებით ერთ საათში დამირეკა მერმა (არჩილ ჩიქოვანი მაშინ ახალდანიშნული იყო, როგორც მახსოვს), ბოდიში მომიხადა და მითხრა, გამოვასწორებთო. მეორე დღეს რომ მივედი, ბუნებრივია, აღარ მომიკიდია ხელი, ისეთი შეშინებული ვიყავი. ის კონკრეტული  მოაჯირი შესაძლოა გააკეთეს კიდეც, მაგრამ იმის შემდეგ ძალიან ბევრჯერ შემინიშნავს, რომ ყველა ლამპიონისა და განათების ქვეშ დენის კაბელები ღია იყო, რაც საშიშია როგორც ბავშვებისთვის, ასევე ცხოველებისთვის. ამაზე ხშირად ვწერდი სოციალურ ქსელში, მაგრამ მაინც არაფერი იცვლებოდა“, – გვეუბნება ნინა.

ნინა ამბობს, რომ ქვის სკამების გამო პარკში ძირითადად თბილი პლედით დადიან, „როცა ვსხდებით ხოლმე მოლზე, იქედანაც კარგად ჩანს ეს ღია დენის კაბელები, მაგრამ არაფერს ცვლიან“, – გვეუბნება ნინა მასალკინა.

„ბათუმელები“ მთელი დღის განმავლობაში ცდილობდა მერიის შესაბამისი სამსახურებიდან პასუხი მიეღო კითხვაზე, თუ რატომ არის ასეთ მდგომარეობაში სკამების განათებისთვის დამომტაჟებული დენის კაბელები და რამდენად საფრთხის შემცველია ეს მოქალაქეებისთვის, მათ შორის, რამდენად არის ბავშვების უსაფრთხოება დაცული?

თუმცა ბათუმის მერიაში სატელეფონო ზარებს და სმს შეტყობინებებს არ უპასუხეს. სმს-ეს შეტყობინება გავუგზავნეთ ქალაქის მერს არჩილ ჩიქოვანსაც, თუმცა კითხვაზე არც მერმა გვიპასუხა.

„ბათუმელები“, ორშაბათს [დღეს არასამუშაო დღეა საქართველოში] შეეცდება ჰკითხოს მერს ან მერიის სხვა მოხელეებს, რატომ არის ამდენი შიშველი კაბელი ცენტრალურ პარკში, არის თუ არა ამ კაბელებში დენი, არის თუ არა პერიმეტრზე [მიწაში] სხვა კაბელები, რომლებიც მიერთებულია ქალაქის ელექტროსისტემას.

ვიდეო:

___

გუშინ, 13 ოქტომბერს, თბილისში, ვაკის პარკში, შადრევანში 3 ბავშვს დენმა დაარტყა, რის შედეგადაც 13 წლის მოზარდი დაიღუპა, ორი კი – დაშავდა. ერთი მათგანი ხეჩინაშვილის კლინიკაში, მეორე იაშვილის სახელობის ბავშვთა საავადმყოფოში გადაიყვანეს. იაშვილის კლინიკაში მყოფ მესამე ბავშვს სიცოცხლესთან შეუსაბამო ტრავმები არ ჰქონდა და მისი ჯანმრთელობის მდგომარეობა დამაკმაყოფილებელია.

თვითმხილველები ამბობდნენ, რომ ბავშვებს შადრევანში ბურთი ჩაუვარდათ, რის შემდეგაც ერთ მათგანს ბურთის ამოღებისას დენმა დაარტყა და წყალში ჩავარდა. ორი არასრულწლოვანი კი მის დასახმარებლად ჩავიდა წყალში, რომელთაც ასევე დენმა დაარტყა.

„მე აპრილიდან მოვდივარ ფეხით იტალიიდან, ვაპირებ 15 ქვეყანა გავიარო და 2025 წელს ჩავიდე პეკინში,“ – ლაღი და გადამდები ემოციით გვეცნობა 72 წლის ვენა კამაროტა, რომელსაც მოგზაურობაზე სალაპარაკოდ ბათუმის ერთი პატარა კაფე შეურჩევია, ტროტუარის მოაჯირთან მიდგმულ მაგიდაზე გაუშლია მარკო პოლოს ისტორიული რუკა. ისტორიულ რუკაზე შავი წყვეტილითაა აღნიშნული პოლოს გზა ვენეციიდან პეკინამდე.

ცნობილი მოგზაურის მარკო პოლოს ისტორიული გზა საქართველოზეც გადის. „ეს აბრეშუმის ისტორიული სავაჭრო გზაა, ყველა ქვეყანა ძალიან საინტერესოა, სადაც ვიყავი და სადაც კიდევ აღმოვჩნდები,“ – რუკას თვალს არ აშორებს ვენა კამაროტა, თითქოს პირველად ხედავსო.

ახლა ვენა კამაროტა ბათუმშია და ამბობს, რომ უბრალო ადამიანების ცხოვრება აინტერესებს, ყოველდღიურობა, განსხვავება კულტურებს შორის.

ვენასთვის გვერდითი სუფრიდან უკვე შეუთავაზებიათ ჭიქა შავი ღვინო. ქართული არ მესმის, მაგრამ თქვენ მოსვლამდეც გვერდით სუფრასთან მსხდომების ქართულად საუბრის ჟღერადობას ვაკვირდებოდიო, გვიზიარებს ვენა და შემდეგ მარკო პოლოს ჩანაწერს გვიკითხავს საქართველოს შესახებ:

„ქართველები მამაცი მებრძოლები არიან, კარგი მეომრები ბრძოლის ველზე… კარგი მშვილდოსნები არიან, მოკლე თმას ატარებენ“, – კითხულობს კამაროტა წიგნიდან გამოთქმით და ემოციით ინტერესდება: ვის როგორ მოსწონს მარკო პოლოს ნათქვამი ქართველებზე.

„გავიგე, რაც მითხრეს, სახლში დამზადებული ღვინოაო,“ – დასძენს ვენა ღვინოზე და ისევ გაშლილ, გრძელ რუკას უბრუნდება, მაგიდაზე რომ ვეღარ ეტევა, რუკის ერთი ნაწილი ტროტუარს ეფინება.

„მარკო პოლო ვენეციიდან გემით პირდაპირ თურქეთში ჩავიდა, მე კი ცოტა შევცვალე ეს მარშრუტი,“ – ვენა რუკაზე გვაჩვენებს, რომ პოლო თურქეთიდან სომხეთში გადავიდა და ისე განაგრძო გზა ჩინეთისკენ.

„მარკომ უკან გზაზე ნახა საქართველო, მე კი უკვე ვნახე,“ – იღიმის ვენა და განმარტავს, ბალკანეთის ქვეყნები მაინტერესებდა და ამიტომაც გადავუხვიე მარკო პოლოს გზასო. „ამიტომაც მე გემით არ წავედი და იტალიიდან სლოვენიაში გადავედი, ვიყავი ხორვატიაში, სერბეთში, ბულგარეთში და ისე ჩავედი თურქეთში,“ – თითებით ითვლის ვენა ქვეყნებს, რომლებიც ფეხით მოიარა და ხელახლა შლის თითებს, რომ გვაჩვენოს, რამდენი ქვეყანა დარჩა გასავლელი ჩინეთამდე.

„აქედან წავალ აზერბაიჯანში, მერე ირანი, თურქმენეთი, უზბეკეთი, ყირგიზეთი, ყაზახეთი, მონღოლეთი და პეკინში ჩავალ… მთავარია, ადამიანების ცხოვრების და ემოციის გაგება, კულტურა, განსხვავება ადამიანებს შორის, რომელიც პოზიტივით გავსებს,“ – გვიყვება ვენა.

„მართლა სულ ფეხით დადის?“ – კითხულობს ლია ეჭვიანი სახით, ნამცხვრებიან დახლთან დგას მდუმარედ და თან ჩიტებს პურის ნამცეცებს უყრის.

„ძირითადად ფეხით დავდივარ, ზოგჯერ ვიყენებ მხოლოდ ავტობუსს,“ – კაფეს მზარეულს გაჰყურებს ვენა და პაუზის შემდეგ ამატებს:

„როცა ფეხით ბევრს დადიხარ, სხვანაირად გრძნობ თავისუფლებას, სუნთქვაც სხვანაირი ხდება, სხეულს გრძნობ… ფეხით სიარულს ყველაზე დიდი, პოზიტიური გავლენა აქვს ტვინზე.

მთავარია, კარგი ფეხსაცმელი გქონდეს, ხილის ჩირი და თხილეული,“ – სიცილით ასრულებს თხრობას მოგზაური.

ვენა კამაროტა ამბობს, რომ მარკო პოლოს გზის გაცოცხლება მას შემდე გადაწყვიტა, როცა უკრაინაში რუსეთმა ომი დაიწყო.

„ვინც ომს იწყებს, ყველა დამარცხებულია, ესაა ჩემი მოგზაურობის გზავნილი,“ – განაწყენება ეტყობა ვენა კამაროტას რუსეთის გამო, რუკას ისევ გრაგნილის ფორმით კეცავს და ვიდრე ჩანთაში დააბრუნებს, ამატებს, აპრილის 24-ში წამოვიწყე ეს მრავალწლიანი მოგზაურობაო.

„იცით, ბათუმში ყველაზე მეტად „ალი და ნინოს“ ქანდაკება მომეწონა. ეს ქანდაკებაც მშვიდობის სიმბოლოა, რომ ნებისმიერ მტრობაზე ძლიერი სიყვარულია,“ – აღნიშნავს ვენა.

მოგზაური ქალის თქმით, ქალაქებში ჰოსტელებში ჩერდება, სოფლებში კი – ოჯახების სტუმარია.

„კარავი არ მაქვს, არ მინდა მარტოობა, მირჩევნია, ადამიანები ვნახო, როგორ არიან… მთავარია არა ფული, არამედ კულტურა, როგორ ცხოვრობენ ადამიანები, როგორია სტუმარმასპინძლობა, მაგალითად, ანატოლიაში განსაკუთრებულად უყვართ სტუმარი,“ – გვიყვება ვენა კამაროტა, მარკო პოლოს გადაშლილ წიგნში რამდენიმე გვერდს ფურცლავს და ამატებს:

„ყველაზე რთული ჩემთვის ის კი არ არის, როგორ ვიღლები გზაში, მომშივდა თუ შემცივდა, არამედ ენის ბარიერი: ძალიან რთულია, როცა არ გესმის ადამიანების, ვუღიმი, ისინიც მიღიმიან. ვაკვირდები ადამიანებს, მათ ემოციებს, ეს მაბედნიერებს… განსაკუთრებით მაინტერესებს კულტურული მემკვიდრეობა, არქიტექტურა, ბუნება.

სამზარეულო ნაკლებად მაინტერესებს. ბათუმში ხარჩო მომეწონა. ასევე მინდა აღვნიშნო, რომ ბათუმი გამორჩეულად სუფთა ქალაქია,“ – ისევ გვიღიმის ვენა კამაროტა.

„მუხლში ისეთი ჯანი მისცეს ღმერთმა, მარკო პოლოს გზა კი არა, მთელი მსოფლიო მოევლოს,“ – გვერდით სუფრიდან საუბარში გვერთვება კაცი. მეორე კაცი კი, ჩუმად წუწუნებს, არ უთარგმნოთ, მაგრამ რა ჯანი აქვთ ისე ამ ევროპელებს, ჩვენ ბულვარში ძლივს გამოვდივართო.

და ვენას ისევ უსხამენ ღვინოს. ვენას სათქმელი აქვს:

„სხვები ყიდულობენ ოქროს, ჩვენ ვყიდულობთ ღვინოს, მგონი, იტალიაში და საქართველოშიც ასეა,“ – იცინის მოგზაური და კაცებს მიმართავს, მრავალწლიანი მოგზაურობის დაწყებამდე ტიბეტშიც რომ მოგზაურობდა, პალესტინაში იყო, ისრაელსა და მადაგასკარზე.

„კიდევ ნიჩბოსნობა მიყვარს მდინარეზე ძალიან,“ – სიცილით ამატებს ვენა კამაროტა. ვენასთან მეეზოვე მიდის, ჯიბის დანით ვაშლს ოსტატურად აცლის კანს და ქალს აწვდის: „მოგზაური ყოფილა, დაღლილი იქნება, მოეწონება ჩვენებური ვაშლი,“ – მეეზოვე კმაყოფილია, სტუმარი მის მიერ მიწოდებულ ვაშლს რომ აგემოვნებს.

„დღეში რამდენ კილომეტრს გადის?“ – ინტერესდება მეეზოვე.

„დაახლოებით 15 – 20 კილომეტრი შემიძლია ვიარო ფეხით,“ – ამბობს ვენა და შემდეგ გვიყვება, რომ სამხრეთ იტალიაში წლობით ტურიზმის სექტორში მუშაობდა, იყო გიდიც.

„მყავს ოჯახი. ჩემი სამი შვილიშვილი მომენატრა ახლა ყველაზე მეტად,“ – დასძენს მოგზაური.

ჯამში ვენა კამაროტას გასავლელი გზა დაახლოებით 22 ათასი კილომეტრია. ვენა გზადაგზა იღებს ვიდეოებს, ფოტოებს, წერს დღიურებს.

„…საქართველოზეც დავწერ, ვაპირებ, რომ წიგნად გამოვცე ჩემი მოგზაურობის ამბავი. ჯერ ვერ გეტყვით, რას დავწერ საქართველოზე,“ – ამბობს ვენა კამაროტა, მარკო პოლოს წიგნს ხურავს, ჩანთაში აბრუნებს და გზას განაგრძობს.

ბათუმში, შავშეთის ქუჩაზე მდებარე ავტობუსის მოსაცდელთან, პოლიციამ ახალგაზრდა კაცი პოლიციის კანონიერი მოთხოვნისადმი დაუმორჩილებლობის ბრალდებით დააკავა. დაკავებას წინ უძღოდა ავტობუსში მომხდარი დაპირისპირება კონტროლიორსა და მგზავრს შორის.

შემთხვევა დღეს, 13 ოქტომბერს, დაახლოებით 15:30 საათზე მოხდა.

თვითმხილველების თქმით, კონფლიქტი უბილეთოდ მგზავრობის გამო დაიწყო, რა დროსაც ახალგაზრდა კაცმა კონტროლიორს არ მისცა [პირადობა] იდენტიფიცირების საშუალება, რაც ჯარიმის გამოწერისთვის არის საჭირო. სწორედ ამის გამო კონტროლიორებმა გამოიძახეს პოლიცია.

სამართალდამცველების ადგილზე მისვლის შემდეგ ბიჭმა გაქცევა სცადა, მაგრამ პოლიციამ ის დააკავა.

შს სამინისტროში ადასტურებენ, რომ ახალგაზრდა დააკავეს ადმინისტრაციული წესით, კერძოდ „პოლიციის კანონიერი მოთხოვნისადმი დაუმორჩილებლობისთვის“.

აშშ-ს აქვს მოლოდინი, რომ უკრაინის შეიარაღებული ძალები კონტრშეტევას გააგრძელებენ მთელი ზამთრის განმავლობაში. ამის შესახებ ბრიფინგზე აშშ-ის თავდაცვის მდივანმა, ლოიდ ოსტინმა განაცხადა 12 ოქტომბერს.

მან აღნიშნა, რომ სიტუაცია ბრძოლის ველზე დინამიკური რჩება და მსოფლიო ხედავს, რამდენად ეფექტურად მუშაობენ უკრაინელი ჯარისკაცები აღმოსავლეთსა და სამხრეთში, ამიტომ, პენტაგონი იმედოვნებს, რომ წარმატებული კონტრშეტევა გაგრძელდება ზამთარშიც.

ლოიდ ოსტინმა ხაზგასმით აღნიშნა, რომ ზამთარი ყოველთვის რთული გამოწვევაა:

„იმედი მაქვს, რომ უკრაინა ზამთარში ყველაფერს გააკეთებს, რათა დაიბრუნოს თავისი ტერიტორია და იყოს ეფექტური ბრძოლის ველზე. ჩვენ ყველაფერს გავაკეთებთ იმისათვის, რომ მათ ჰქონდეთ ყველაფერი, რაც ეფექტურობისთვის სჭირდებათ,“ – განაცხადა ოსტინმა.

ბათუმის პორტში, სარკინიგზო ლიანდაგზე, კომპანია „გაზპრომის“ აღნიშვნით ვაგონები დგას. „საქართველოს რკინიგზის“ ინფორმაციით, ამ ვაგონებით სანქცირებული პროდუქტი არ შემოუტანიათ.

„საქართველოს რკინიგზის მხრიდან რაიმე სახის სანქცირებული ტვირთის, მით უფრო სანქცირებული პირების კუთვნილი ტვირთის გატარება ჩვენს დერეფანში არ ხდება.

ბათუმში განთავსებული სატვირთო ვაგონები არ არის საქართველოს რკინიგზის საკუთრებაში არსებული სატვირთო ვაგონები. ეს არის ყაზახური კომპანიის ტვირთი [მაზუთი], რომელიც ჩატვირთულია საკუთარ ვაგონებში. „საკუთარი“ ვაგონი ნიშნავს, რომელიმე კერძო კომპანიის საკუთრებაში რეგისტრირებულ ვაგონს. ხშირ შემთხვევაში, ასეთ ვაგონებს სწორედ ყაზახეთი, ასევე ცენტრალური აზიის სხვა ქვეყნები: უზბეკეთი, თურქმენეთი, აზერბაიჯანი და სხვები იყენებენ, რომელიც ტვირთს აგზავნის ევროპის მიმართულებით, საქართველო კი არის სატრანზიტო ქვეყანა,“ – მოგვწერეს „საქართველოს რკინიგზიდან“.

რუსეთ-უკრაინის ომის შემდეგ სანქციები დაუწესეს რუსეთს. 26 ივნისს ბათუმში სანქცირებული „როსნეფტის“ ნავთობპროდუქტები შემოიტანეს.

„ბათუმელები“ ცდილობს ბათუმის პორტთან დაკავშირებას.

საქართველოს პროკურატურა იუწყება,  რომ დაბა გომისმთაში სახელმწიფოს კუთვნილი მიწების თაღლითურად დაუფლების სამი ფაქტი გამოავლინა.

„გამოძიებით დადგინდა, რომ 2021 წელს ბრალდებულები, ყალბი დოკუმენტების გამოყენებით, თაღლითურად დაეუფლნენ ოზურგეთის მუნიციპალიტეტის დაბა გომისმთაში მდებარე მიწის ნაკვეთებს, რითაც სახელმწიფოს 133 692 ლარის ქონებრივი ზიანი მიაყენეს.

სამივე ბრალდებულმა ითანამშრომლა გამოძიებასთან და აღიარა ჩადენილი დანაშაული. სასამართლოს გამამტყუნებელი განაჩენით, მათ ჩამოერთვათ თაღლითურად დაუფლებული მიწის ნაკვეთები, რომელიც დაუბრუნდა სახელმწიფოს,“ – წერს პროკურატურა.

პროკურატურა ასევე იუწყება, რომ აქტიურად აგრძელებს გამოძიებას როგორც დაბა გომისმთაში, ასევე დაბა ბახმაროში ანალოგიური დანაშაულის ჩამდენი პირების გამოვლენისა და მხილების მიზნით.

პროკურატურის ცნობით, დაბა გომისმთაში და დაბა ბახმაროში სახელმწიფოს კუთვნილი მიწების თაღლითურად დაუფლების ფაქტებზე სისხლისსამართლებრივი დევნა დაწყებულია 38 პირის მიმართ და სახელმწიფოს 1 120 041 ლარის ღირებულების უძრავი ქონება დაუბრუნდა.

ფინანსთა სამინისტროს საგამოძიებო სამსახურის ინფორმაციით, უკანონო სამეწარმეო საქმიანობის, განსაკუთრებით დიდი ოდენობით უკანონო შემოსავლის ლეგალიზაციისა და განსაკუთრებით დიდი ოდენობით გადასახადისათვის განზრახ თავის არიდების ფაქტზე აჭარაში ერთი პირი დააკავეს.

„გამოძიებით დადგინდა, რომ ბრალდებულმა, მის მფლობელობაში არსებული კომპანიის მეშვეოებით, შესაბამისი ლიცენზიის გარეშე, უკანონოდ მოიპოვა ჯამში 177 501 კუბური მეტრი ქვიშა-ხრეში,  რომლის რეალიზაციის შედეგად, მიიღო 1 325 938 ლარის ოდენობის უკანონო შემოსავალი.

მანვე, ყალბი საგადასახადო ანგარიშფაქტურების დამზადება-გამოყენების გზით, შეიქმნა 87 463 ლარის ოდენობის ყალბი დღგ-ის აქტივი, რაც შემდგომ გამოიყენა კომპანიის მიმდინარე საგადასახადო ვალდებულებების დასაფარად.

გარდა აღნიშნულისა ბრალდებული,  საგადასახადო კანონმდებლობის დარღვევით, სისტემატურად  ახდენდა კუთვნილი კომპანიის შემოსავლების არასწორ დეკლარირებას, რა გზითაც მან თავი აარიდა სახელმწიფო ბიუჯეტის სასარგებლოდ ჯამში 534 418 ლარის გადახდას,“ – აცხადებს საგამოძიებო სამსახური.

გამოძიება მიმდინარეობს საქართველოს სისხლის სამართლის კოდექსის 192-ე, 185-ე, 194-ე  და 218-ე მუხლებით, რაც სასჯელის სახით ითვალისწინებს თავისუფლების აღკვეთას 9-დან 12 წლამდე ვადით.

„მდიდარი არასამთავრობოების კლანი“ – ასე ჰქვია ერთ-ერთ სიუჟეტს, რომელიც გადაცემა „იმედის კვირაში“ 9 ოქტომბერს გავიდა. სიუჟეტში ჟურნალისტი დადის ქუჩაში, ხელთ აქვს ავტორიტეტული არასამთავრობო ორგანიზაციების – „საიას“, „საერთაშორისო გამჭვირვალობა-საქართველოს“, „ღია საზოგადოების ფონდის“ და სხვა NGO-ის ხელმძღვანელების ფოტოები და მოქალაქეებს ეკითხება, იცნობენ თუ არა ამ ადამიანებს.

ეს არ იყო ერთადერთი სიუჟეტი, რაც „იმედის“ ეთერში გავიდა არასამთავრობო ორგანიზაციების წინააღმდეგ. სიუჟეტების ციკლი იმაზე მოგვითხრობს, რომ ამ ორგანიზაციებს აქვთ ბევრი ფული.

„ისინი იბრძვიან კგბ-ეს მეთოდებით, ებრძვიან კრიტიკულად განწყობილ ადამიანებს, კრიტიკულად განწყობილ ორგანიზაციებს“, – ამბობს „ბათუმელებთან“ თავდაცვის ყოფილი მინისტრი, იურისტი თინათინ ხიდაშელი. მისი შეფასებით, ამ სიუჟეტების უკან „ქართული ოცნება“ მოიაზრება, რომელმაც აირჩია არა დასავლეთის, არამედ რუსეთის გზა.

„ჩვენ მივიღეთ ხელისუფლება, რომელმაც თავის უმთავრეს დანიშნულებად აირჩია, საქართველოში ებრძოლოს დასავლეთს და არა რუსეთს, ებრძოლოს ლიბერალურ დემოკრატიას და არა ავტორიტარიზმისა და დიქტატურის მცდელობებს.

შესაბამისად, ყველაფერი და ყველა, ვინც ამ გზაზე წინაღობას ქმნის, დისკრედიტაციის მანქანაში შეიძლება გაატარონ.

ტიპური კგბ-ს მეთოდებით ებრძვიან ისინი კრიტიკულად განწყობილ ადამიანებს, კრიტიკულად განწყობილ ორგანიზაციებს. ერთი ტიპური, სტანდარტული კლასიკური სახელმძღვანელოს შესაბამისად, რომელიც თავის დროზე კგბ-ში მუშავდებოდა ხოლმე“, – ამბობს თინა ხიდაშელი.

კგბ-ს სახელმძღვანელო პრინციპია კონკრეტულ ადამიანებზე შეურაცყოფის მიყენებით, მათ შესახებ პირადი მონაცემების გამომზეურებით, მანიპულაციებით ამ ადამიანების დისკრედიტაცია.

„ეს, რა თქმა უნდა, ძალიან მძიმედ საყურებელია, მაგრამ ამასობაში, ჩვენს ყოველდღიურობად იქცა ეს ყველაფერი და ვფიქრობ, რომ პასუხს და რეაქციას იმსახურებს“, – ამბობს ხიდაშელი.

რისი შიში აქვს ხელისუფლებას, რომ არასამთავრობო სექტორის წარმომადგენლების წინააღმდეგ ასეთ კამპანიას იწყებს? – ხიდაშელს თქმით, არასამთავრობო სექტორი გარკვეულ გავლენას ახდენს საზოგადოებრივი აზრის ფორმირებაზე და სწორედ ამ პროცესში ხედავს ხელისუფლება მთავარ პრობლემას. „აი, ამას ებრძვიან“, – ამბობს თინა ხიდაშელი.

მისი აზრით, აქ არ დგას საკითხი მაინც და მაინც ასე, რომ ხელისუფლება, ვთქვათ, კონკურენტებად მოიაზრებს არასამთავრობო სექტორის წარმომადგენლებს და ამიტომ ებრძვის მათ: საკმარისია ისიც, რომ მათ შეუძლიათ საზოგადოებრივი აზრის ცვლილება და „ეს საკმარისია, რომ ისინი მტრად გამოაცხადონ“.

მისი თქმით, ბრძოლის ეს მეთოდი დამახასიათებელია ამ ტიპის რეჟიმებისთვის და საქართველოს ხელისუფლება არ არის პირველი, რომელიც ამ მეთოდს მიმართავს კრიტიკული ორგანიზაციების დისკრედიტაციისთვის.

„ამის კლასიკური მაგალითები აქვს შექმნილი ვლადიმერ პუტინს და ესენიც, როგორც მისი გზის გამგრძელებლები, იმავე გზაზე დგანან და იმავე საქმიანობით არიან დაკავებული.

მთავარი პრობლემა, რის გამოც ეს გააფთრებული კამპანია დაიწყო დასავლეთის, დასავლური ღირებულებებისა და იდეალების წინააღმდეგ, არის იმის განცდა, რომ ამ ტიპის ძალაუფლების მატარებელი ადამიანების ადგილი, როგორიც არის საქართველოს ხელისუფლება, ევროპულ დემოკრატიაში არ არის. თუ საქართველოს ეს შანსი გაუჩნდა, მაშინ უფრო და უფრო შემცირდება ავტორიტარიზმისკენ გადახრილი მმართველობების როლი და ადგილი ჩვენს ქვეყანაში“, – ამბობს თინა ხიდაშელი.

მისი შეფასებით, სწორედ ამ პროცესის შეფერხებას ემსახურება არასამთავრობოების წინააღმდეგ მომზადებული გადაცემები, რადგან „მათ ეშინიათ ევროპის, ეშინიათ იმ სტანდარტების, დემოკრატიულობის, რასაც ევროკავშირი ითხოვს“.

„შესაბამისად, ებრძვიან ყველა საშუალებით და ცდილობენ ამ პროცესის მნიშვნელობის შესუსტებას“, – გვითხრა ხიდაშელმა. ის დარწმუნებულია, რომ თუკი „ქართული ოცნება“ 2024 წელს ისევ დარჩება ხელისუფლებაში, აუცილებლად მიიღებს იმ ტიპის კანონს, რომელიც მიიღო თავის დროზე პუტინმა არასამთავრობო სექტორისა და კრიტიკული მედიის წინააღმდეგ.

არასამთავრობოებისგან მტრის ხატს ქმნიან. სინამდვილეში კი, ეს ორგანიზაციები რიგით მოქალაქეებს ეხმარებიან. მაგალითად, საია წელიწადში „50 ათასამდე მოქალაქეს უწევს უფასო იურიდიულ კონსულტაციას, ათეულობით ადამიანს იცავენ სასამართლოსა და სხვა სახელმწიფო ორგანოების წინაშე მათი დარღვეული უფლებების აღსადგენად“.

დაარსების დღიდან 2018 წლამდე „ღია საზოგადოების ფონდის“ დაფინანსება საქართველოში 100 მილიონ აშშ დოლარს აღემატება, მათ შორის ფონდის სტიპენდიით დასავლეთის უნივერსიტეტებში არაერთმა ახალგაზრდამ მიიღო განათლება. ფონდი აფინანსებდა ჯანდაცვას, კულტურული მემკვიდრეობას, მედიას. ამ ფონდის დამსახურებაა Microsoft-ისთვის ქართული ანბანის პირველი შრიფტის შექმნა.

რუსეთმა თავისუფალი მედია და არასამთავრობო ორგანიზაციები ოფიციალურად „უცხო ქვეყნის აგენტებად“ გამოაცხადა.

„ამაში ეჭვი არ მეპარება, რომ პროცესი მიდის აქეთკენ. უბრალოდ, ახლა ხელისუფლების პრობლემა იმაშია, რომ მათ ამ ტიპის ლეგიტიმაცია არ აქვთ.“

„ახალგაზრდა იურისტთა ასოციაციის“ ხელმძღვანელი ნიკა სიმონიშვილი, რომელიც „იმედის“ სიუჟეტების ერთ-ერთი „გმირია“, მიიჩნევს, რომ ამ სიუჟეტების ციკლი ცალსახად ემსახურება ორ მიზანს – ერთი, ეს არის თავდასხმა არასამთავრობო სექტორზე და მეორე, ეს არის თავდასხმა საერთაშორისო პარტნიორებზე.

„ამ სიუჟეტებში ხაზგასმული იყო ის, რომ თითქოს ეს ორგანიზაციები საქართველოს საწინააღმდეგო საქმისთვის გვაძლევენ დაფინანსებას.

ეს არის ანტიდასავლური პროპაგანდა, „იმედის“ სიუჟეტები ცალსახად პრორუსული ნარატივების შემცველია. სამწუხაროდ, ეს ტელევიზია უკვე ყველანაირ ეთიკურ და სამართლებრივ ზღვარს გადავიდა, – მანიპულირებადი და უკანონოდ მოპოვებული ინფორმაციის გავრცელებით ცდილობენ არასამთავრობო სექტორისა და ჩვენი პარტნიორების დისკრედიტაციას,“ – ამბობს სიმონიშვილი.

მისი აზრით, ხელისუფლება პროპაგანდის მექანიზმებით დაადგა რუსეთის გზას და ცდილობს შეზღუდოს NGO სექტორის სამოქმედო არეალი. „ცდილობს, ჩვენს დასკვნებსა და შეფასებებს ძალა დაუკარგოს საზოგადოებაში და საზოგადოება განაწყოს არა მარტო ჩვენი, არამედ დასავლეთის წინააღმდეგ,“ – ამბობს ნიკა სიმონიშვილი.

„საქართველოს დემოკრატიული ინიციატივას“ ხელმძღვანელი გიორგი მშვენიერაძე, რომელიც ასევე გახდა „იმედის“ სამიზნე, იზიარებს სიმონიშვილისა და ხიდაშელის მოსაზრებას იმის შესახებ, რომ ხელისუფლება მსგავსი სიუჟეტების მომზადებით ნიადაგს ქმნის არასამთავრობო სექტორის წინააღმდეგ რეგულაციების შემოსაღებად.

გიორგი მშვენიერაძის თქმით, ბევრ არადემოკრატიულ ქვეყანაში, მათ შორის, რუსეთში სწორედ ასეთი რიტორიკის შემდეგ გაჩნდა შემზღუდავი საკანონმდებლო რეგულაციები, ბევრ ადამიანს შეუქმნეს სამართლებრივი პრობლემები, არაერთი ადამიანი დააკავეს კიდეც და იყო ფიზიკური ანგარიშსწორების შემთხვევები და მკვლელობებიც კი.

„ამიტომ გახშირდა თავდასხმები ადამიანებზე, ვინც დემოკრატიისთვის იბრძვის ამ ქვეყანაში. ბუნებრივია, ორგანიზაციებს, რომლებიც ხარჯავენ საკუთარ ენერგიას, რესურსს და მონდომებას არ აკლებენ დემოკრატიის გაძლიერებას ქვეყანაში, ავტორიტარული ხელისუფლებები განიხილავენ როგორც საფრთხეს.

საქართველოშიც, რაც უფრო მეტად ცდილობს საზოგადოება კონსოლიდაციას, მით უფრო ცდილობს ხელისუფლება გააქროს თავისუფლების ყველა ის კუნძული, საიდანაც შესაძლებელია საფრთხე ემუქრებოდეს,“ – გვითხრა გიორგი მშვენიერაძემ.

მისი თქმით, საქართველოში არასამთავრობო ორგანიზაციების ბიუჯეტი ყველაზე ღარიბი საჯარო ორგანიზაციის ბიუჯეტსაც კი არ აღემატება. „იმაზე აპელირება, რომ თურმე ძალიან მდიდარია არასამთავრობო სექტორი საქართველოში, არის ანტიპიარისთვის გათვლილი, რომ საზოგადოების აგრესია გამოიწვიოს.

ჩვენი უბედურება არის ის, რომ არც ეს ორგანიზაციები არიან მდიდრები და ხალხიც ძალიან ღარიბია, რადგან ხელისუფლება ვერ უზრუნველყოფს საკუთარი მოქალაქეების უკეთეს ცხოვრებას,“ – მიიჩნევს გიორგი მშვენიერაძე.

მისი თქმით, ამგვარი სიუჟეტების მომზადებით, ხელისუფლება ცდილობს დემოკრატიას შეუქმნას პრობლემები ქვეყანაში, რადგან „ეს სჭირდება ივანიშვილის ოლიგარქიულ კეთილდღეობას და მასთან დაახლოებული პირების კეთილდღეობას“.

ჟურნალისტი ზვიად ქორიძე საუბრობს იმაზე, თუ რატომ აზიანებს მსგავსი სიუჟეტები, როგორც მედიაგარემოს ქვეყანაში, ასევე დემოკრატიას.

„ის, რასაც „იმედი“ აკეთებს, მოკლედ რომ ვთქვათ, არის მანიპულაცია. ასეთი ტიპის გაშუქებით ჟურნალისტები ცდილობენ, საგანგებოდ მოიგონონ რაღაც სქემები, ტყუილები, რომ დაარწმუნონ საზოგადოება იმაში, რასაც ამბობენ“.

ზვიად ქორიძის შეფასებით, მანიპულაცია ყველაზე ცუდი და მიუღებელი პროფესიული „დანაშაულია“, რადგან მანიპულაციის დროს ჟურნალისტი განგებ ამახინჯებს სინამდვილეს და ქმნის იმ ტიპის სინამდვილეს, რომელიც მისი ან სხვა ვიღაცის ინტერესებშია და არანაირად არ შედის მოქალაქის ინტერესში, რომელიც უფლებამოსილია, მიიღოს ზუსტი ინფორმაცია.

„მანიპულაცია პროპაგანდის ერთ-ერთი ხერხია. პროპაგანდა ზუსტადაც ნიშნავს იმას, რომ შენ გაქვს რაღაც კონკრეტული მიზანი, ამოცანა და ამისთვის ამახინჯებ უტყუარ ინფორმაციას, რომ მიაღწიო სასურველ მიზანს.

ნებისმიერ შემთხვევაში პროპაგანდა ეფუძნება მანიპულაციურ ხერხებს და ამ შემთხვევაში, მანიპულაციური სიუჟეტები მზადდება არა მხოლოდ არასამთავრობოების წინააღმდეგ, ასევე რაღაც ჰიპოთეტურ საომარ მზადყოფნასა და ომის გაჩაღებაზე, მეორე ფრონტის შექმნაზე ქვეყანაში. მანიპულაციურია საუბარი ევროკავშირის რეკომენდაციებთან დაკავშირებითაც.

როცა ასეთ სიუჟეტებს აკეთებს ჟურნალისტი და ატყუებს საზოგადოებას, ეს შესაძლოა შედიოდეს იმ პოლიტიკური ჯგუფების ინტერესებში, რომლებიც აი ამ მოსაზრებებზე აგებენ საკუთარ პოლიტიკურ ხედვას და ამიტომაცაა, რომ ამ სიუჟეტების და მმართველი პარტიის პოლიტიკოსების ნარატივი ემთხვევა ერთმანეთს.

ეს პირდაპირ აჩვენებს, რომ ერთმანეთთან დაკავშირებული პოლიტიკური დღის წესრიგი აქვს ორივეს და ამისთვის სჭირდებათ პროპაგანდისტული მექანიზმების გამოყენება,“ – ამბობს ზვიად ქორიძე.

მისი თქმით, როცა ჟურნალისტი დადის ქუჩებში და მოქალაქეებს აჩვენებს თუნდაც  საჯარო პირების ფოტოებს და კითხვას სვამს – „ვინ არიან ეს ადამიანები?“, პასუხის მიუხედავად კი იწყებ მათ ლანძღვას, ეს ნიშნავს, რომ ჟურნალისტის მიზანი არ არის სიმართლის დადგენა, არამედ ვირტუალური სინამდვილის, რომ დააჯეროს მაყურებელი აი, ამ ადამიანების შესახებ არავინ არაფერი იცის, ანუ არ არიან მნიშვნელოვანი პერსონები.

თუ ეს ხალხი არაფრით საინტერესო არ არის, თუ მათ არავინ იცნობს, მაშინ რატომ დადიხარ მათი პორტრეტებით ქუჩაში?

სინამდვილეში იმიტომ დადის, რომ ზუსტად იცის, რომ ეს ადამიანები არიან აქტიური მოქალაქეები, არიან ჩართული ქვეყნის განვითარების პროცესში, სწორედ იმ ამოცანებით და ბერკეტებით, რაც გააჩნია არასამთავრობო სექტორს და ეხმარებიან საზოგადოებას, რომ ჩვენი სახელმწიფო გახდეს უფრო თანამედროვე, ძლიერი.

ეს ძალიან კარგად იციან იმ ჟურნალისტებმა და წამყვანებმაც, რომლებიც ასეთ მანიპულირებულ სიუჟეტებს აკეთებენ, მაგრამ ისინი მაინც თანხმდებიან ამ მანიპულირებას,“- ამბობს ზვიად ქორიძე.

რატომ არის „იმედის“ სიუჟეტები რუსული მოდელი? ზვიად ქორიძის თქმით, ეს მხოლოდ რუსული მოდელი არ არის, არამედ ტოტალიტარული მოდელია, რომელიც მუშაობდა საბჭოთა კავშირში, კუბაში, მუშაობს ირანში, ჩინეთში, კორეაში და ყველა იმ ქვეყნებში, სადაც არის ტოტალიტარიზმი, სადაც სრულიად იგნორირებულია ადამიანის უფლებები.

„მტრების ძებნა გჭირდება იმისთვის, რომ მათ დააბრალო შენი უსუსურობა, შენი უმაქნისობა, შენი უპასუხისმგებლო დამოკიდებულება სახელმწიფოს მიმართ. ამიტომ ეძებ მტრებს.

მაშინ, როცა ძალიან კარგად იცი, რომ არასამთავრობო სექტორი მხოლოდ და მხოლოდ იმისთვის არის გამეცადინებული, რომ საქართველოს დასავლური განვითარების ვექტორი არ დაზიანდეს, ზუსტად იმისთვის მუშაობს, რომ საქართველო გახდეს თანამედროვე, სამართლებრივად ძლიერი სახელმწიფო, სადაც ყველა ინსტიტუცია მუშაობს იმისათვის, რომ სახელმწიფო იყოს ძლიერი და მოქალაქე იყოს დაცული.

ეს ძალიან კარგად იციან პოლიტიკოსებმაც და იმ ჟურნალისტებმაც, რომლებიც ასეთი ტიპის დაკვეთილ სიუჟეტებს აკეთებენ,“ – ამბობს ზვიად ქორიძე.

მისი აზრით, ხელისუფლებამ იცის, რომ მას არ უნდა ევროინტეგრაცია, არ უნდა ევროკავშირის რეკომენდაციების შესრულება, რომ გახდეს საქართველო წევრობის კანდიდატი ქვეყანა და ამით უკვე უჩენს ძალიან დიდ რისკებს საქართველოს. იჭერს თადარიგს – მისი მთავარი ამოცანაა, რომ ამ პროცესში ჯოხი გადატეხოს არასამთავრობო სექტორზე.

„ამ სიუჟეტების ერთ-ერთი მთავარი ამოცანაც ხომ ეს არის, რომ აუდიტორიას მიაწოდოს ტყუილი იმის თაობაზე, რომ თურმე არასამთავრობო სექტორი უტეხს სახელს ევროპაში საქართველოს და ამით აზიანებს საქართველოს ინტერესებს, მაშინ, როცა პირიქითაა.

არასამთავრობო სექტორი ცდილობს დაეხმაროს ხელისუფლებას, რომ მიიღოს სწორი გადაწყვეტილება, მაგრამ ხელისუფლებას არ უნდა სწორი გადაწყვეტილების მიღება. ამიტომ ცდილობს იპოვოს გზა, არასამთავრობო სექტორი საზოგადოებას მიუგდოს საჯიჯგნად, მათ დააბრალოს, მაგალითად ის, რომ საქართველო ვერ მიიღებს კანდიდატის სტატუსს“.

ზვიად ქორიძის თქმით, ხელისუფლება ამ ტიპის პროპაგანდისტული სიუჟეტებით ცდილობს ნიადაგი მოამზადოს იმისთვის, რომ მის მიმართ კრიტიკულად განწყობილი ორგანიზაციები თუ მედია, უცხო ქვეყნის აგენტებად გამოაცხადოს, ისევე, როგორც ეს გააკეთა რუსეთში პუტინმა.

„ეს ორგანიზაციები საგრანტო დაფინანსებას იღებენ დასავლური ფონდებიდან, ამიტომ კეთდება ამდენი აქცენტი ამაზე, რომ შემდეგ თქვან, ამ ქვეყნების აგენტები არიან და ასრულებენ აგენტურულ დავალებას საქართველოს დასაზიანებლად.

მაშინ, როცა ევროპისა და აშშ-ს ინტერესი არ არის საქართველოს ევროინტეგრაციის დაზიანება. პირიქით, ევროკავშირს უნდა საქართველოს ინტეგრაცია, აშშ-საც და ჩვენც, მოქალაქეებსაც გვინდა ევროინტეგრაცია და ეს ძალიან კარგად გამოჩნდა 20 ივნისს მიტინგზე თბილისში.

აი, ამ გზაზე ყველა წინაღობის დაძლევა უნდა ხელისუფლებას, მთელი პრობლემა სწორედ ამაში მდგომარეობს,“ – გვითხრა ზვიად ქორიძემ.

მისი თქმით, სწორედ ასე წარმოუდგენია ხელისუფლებას ეს პროცესი, ამიტომ ჩართო მანიპულაციური მანქანა და მთავარი როლი ამ პროცესში იმ ჟურნალისტებს მიანიჭა, რომლებიც ატყუებენ საზოგადოებას.

ზვიად ქორიძის აზრით, საზოგადოებამ არა მარტო უნდა უყუროს ამ პროცესს, „არამედ უნდა მიანიშნოს, რომ ასე ჩალით არ არის ქვეყანა დახურული“ და თუ უნდა ხელისუფლებას, რომ საქართველომ წარმატებას მიაღწიოს ევროინტეგრაციის გზაზე, „ასეთი ვირეშმაკული ხერხებით ვერ გამოძვრება სიტუაციიდან.“

ზვიად ქორიძის აზრით, თუ „ქართული ოცნება“ თავისი ქმედებებით  საქართველოს დაუკარგავს ევროინტეგრაციის შანსს, საზოგადოებას აუცილებლად ეყოფა იმის რესურსი, რომ პასუხი გასცეს მას.

ოჯახში ძალადობისთვის გასამართლებული კაცების უმრავლესობა არ სარგებლობს პროგრამით, რაც ძალადობრივი ქცევის შეცვლას ითვალისწინებს – ეს ირკვევა პარლამენტის თემატური მოკვლევის ანგარიშით, სადაც განხილულია, როგორ ასრულებს საქართველო „სტამბოლის კონვენციით“ ნაკისრ ვალდებულებებს.

„სტამბოლის კონვენცია“ ითვალისწინებს ქალთა მიმართ ძალადობის და ოჯახში ძალადობის პრევენციისა და აღკვეთის მიმართულებით კონკრეტული ნაბიჯების გადადგმას. მათ შორისაა მოძალადე კაცებისთვის სარეაბილიტაციო პროგრამების არსებობა, რაც საქართველოში 2019 წლიდან ამოქმედდა.

პარლამენტის თემატური ანგარიშის მიხედვით, ამ მიმართულების პროგრამები რომ ეფექტური არ არის, ამაზე პარლამენტიც კი, ღიად საუბრობს და ასევე იუსტიციის სამინისტრო, რომელიც პროგრამების განხორციელებაზეა პასუხისმგებელი.

როცა ძალადობრივი ქცევის შეცვლისკენ მიმართული პირველი საპილოტე პროგრამა ამოქმედდა 2019 წელს, მასში 10 კაცი მონაწილეობდა, შემდეგ წლებში კი, პროგრამა კოვიდრეგულაციებმა შეაფერხა. იუსტიციის სამინისტროდან პარლამენტისთვის მიწერილი წერილებიდან ირკვევა, რომ ოჯახში ძალადობისთვის გასამართლებული კაცების უმრავლესობა ამ პროგრამებით სარგებლობაზე უარს ამბობს.

აქ არ არის მოცემული კონკრეტული სტატისტიკა, თუმცა წერია, რომ „ოჯახში ძალადობაში მსჯავრდებულ პირთა უმრავლესობა ამ პროგრამით ვერ სარგებლობს“.

პარლამენტის თემატური ჯგუფის ანგარიშის მიხედვით, პატიმრებისთვის ქცევის კორექციის პროგრამა გათვალისწინებულია ძალადობის განმეორების მაღალი რისკის მქონე მსჯავრდებულებისთვის. „თუმცა სპეციალური პენიტენციური სამსახურის განმარტებით, მოძალადეთა ქცევის კორექციის ჯგუფის დაკომპლექტებისას პროგრამის შეთავაზება ხდება ყველა მეუღლეზე/პარტნიორზე მოძალადე პირისთვის,“ – აღნიშნულია ანგარიშში.

„..სპეციალურ პენიტენციურ დაწესებულებებში განთავსებული მსჯავრდებულების კურსებში ჩართვა ნებაყოფლობითია, რაც არის ერთ-ერთი დამაბრკოლებელი გარემოება, რადგან მსჯავრდებულები თავს იკავებენ აღნიშნულ პროგრამებში მონაწილეობისგან, ამ გამოწვევის აღმოსაფხვრელად, მიმდინარეობს მუშაობა მოძალადეთა ქცევის კორექციის ღონისძიებებში მსჯავრდებულთა სავალდებულო მონაწილეობის აღსრულების წესის დასამტკიცებლად,“ – მიუწერია პარლამენტისთვის იუსტიციის სამინისტროს.

პარლამენტის თემატური ჯგუფი რეკომენდაციით მიმართავს იუსტიციის სამინისტროს: 2022 წლის 31 დეკემბრამდე პარლამენტს წარუდგინოს გეგმა იმის თაობაზე, რომ მოძალადეთა ქცევის კორექციის პროგრამები გავრცელდეს ქალთა მიმართ და ოჯახში ძალადობის ჩამდენ ყველა პირზე, როგორც პენიტენციურ, ისე პრობაციის სისტემაში.

ძალადობრივი ქცევის კორექციისკენ მიმართული პროგრამები ხორციელდება, როგორც საპატიმრო დაწესებულებებში, ისე პრობაციაში ჩართული პირებისთვის, მაგალითად, კაცისთვის, ვისაც პირობითი მსჯავრი აქვს.

„ძალადობრივი დამოკიდებულებებისა და ქცევის შეცვლაზე ორიენტირებული სასწავლო კურსი“ აქვს პრობაციის სამსახურს, რაშიც, ოფიციალური სტატისტიკით, 2018 წელს 212 ბენეფიციარი მონაწილეობდა, 2019 წელს – 151, ხოლო 2020 წელს – 99 პირი. თუმცა არ არის შეფასებული, რამდენად ეფექტურია ეს სწავლება.

„შეაფასოს მოძალადეთა ქცევის კორექციის არსებული პროგრამების ეფექტიანობა, რომელიც საფუძვლად დაედება არსებული პროგრამების გადახედვასა და დახვეწას და უზრუნველყოს მისი საჯაროდ ხელმისაწვდომობა [2023 წლის 28 თებერვალი]“, – ეს პარლამენტის თემატური ჯგუფის კიდევ ერთი რეკომენდაციაა.

ამ თემაზე: