Batumelebi

ევროკავშირის საბჭოში შეთანხმდნენ, რომ ევროკავშირმა არ უნდა აღიაროს უკრაინისა და საქართველოს ოკუპირებულ ტერიტორიებზე გაცემული რუსული პასპორტები და მათ მფლობელებზე ვიზები არ უნდა გასცეს.

„რუსეთმა უკრაინის ოლქების უკანონო ანექსიით კიდევ ერთხელ დაადასტურა, რომ უგულებელყოფს საერთაშორისო წესრიგს. ჩვენ არასოდეს ვაღიარებთ უკრაინისა და საქართველოს დამოუკიდებლობის, სუვერენიტეტისა და ტერიტორიული მთლიანობის უფლების დარღვევას,“ – განაცხადა ჩეხეთის რესპუბლიკის შინაგან საქმეთა მინისტრმა, რომლის ქვეყანაც წელს საბჭოს პრეზიდენტია.

როგორც საბჭოს ვებგვერდზე გამოქვეყნებულ რელიზშია ნათქვამი, მისმა მუდმივმა წარმომადგენლებმა ევროპის პარლამენტთან მოლაპარაკების მანდატი შეათანხმეს, რათა პარლამენტმა უკრაინისა და საქართველოს ოკუპირებულ ტერიტორიებზე გაცემული პასპორტების არაღიარების გადაწყვეტილება მიიღოს. მანდატის საფუძველზე, საბჭო პარლამენტთან დისკუსიას დაიწყებს.

„ეს გადაწყვეტილება არის პასუხი რუსეთის არაპროვოცირებულ და გაუმართლებელ სამხედრო აგრესიაზე უკრაინაში და რუსეთის პრაქტიკაზე, გასცეს რუსული საერთაშორისო პასპორტები ოკუპირებულ ტერიტორიაზე მცხოვრები მოქალაქეებისთვის. ეს ასევე ეხება რუსეთის 2008 წლის ერთპიროვნულ გადაწყვეტილებას, აღიაროს საქართველოს ტერიტორიების – აფხაზეთისა და სამხრეთ ოსეთის დამოუკიდებლობა,“ – ნათქვამია განცხადებაში

თუ ევროპის პარლამენტი საბჭოს მიერ წარდგენილ წინადადებას დაამტკიცებს, უკრაინისა და საქართველოს ოკუპირებული რეგიონების მცხოვრებლები რუსული პასპორტებით ვერ მიიღებენ შენგენის ვიზებს და ვერ გადაკვეთენ საზღვრებს შენგენის ზონაში.

საბჭო იქვე აღნიშნავს, რომ ამ დოკუმენტებს უკვე არ აღიარებს ევროკავშირის ზოგიერთი ქვეყანა, ზოგი კი გადაწყვეტილების მიღების პროცესშია, თუმცა პარლამენტის მხრიდან ასეთი გადაწყვეტილება მიმართული იქნება იმისკენ, რომ შეიქმნას საერთო მიდგომა, რომელიც ერთობლივ სავიზო პოლიტიკას და ევროკავშირის ქვეყნების უსაფრთხოების გამოწვევებს უპასუხებს.

უკრაინის ოთხი ოლქის ანექსიის შესახებ ვლადიმერ პუტინმა 30 სექტემბერს გამოაცხადა, 5 ოქტომბერს კი ხელი მოაწერა შესაბამის კანონს ამ ოლქების რუსეთთან შეერთებაზე.

სახელმწიფო დეპარტამენტმა „პოზიორობა“ უწოდა რუსეთის საგარეო საქმეთა მინისტრის განცხადებას იმის შესახებ, რომ მოსკოვი მზადაა დასავლეთთან მოლაპარაკებებისა და „დიდი ოცეულის“ მომავალ სამიტზე პუტინისა და ბაიდენის შეხვედრისთვის.

„დრო ძალიან მნიშვნელოვანია, რადგან ეს განცხადება გაკეთდა რამდენიმე საათში მას შემდეგ, რაც რუსულმა რაკეტებმა დაარტყეს უკრაინის დედაქალაქს, დაარტყეს სხვა უკრაინულ ქალაქებს, საბავშვო მოედნებსა და სკოლებს, საცხოვრებელ სახლებს, გზებს, ხიდებს, ენერგოინფრასტრუქტურას. როდესაც ამ კომენტარებს ვაფასებთ, კონტექსტიც უნდა გავითვალისწინოთ და ჩემი აზრით, კონტექსტი ამ შემთხვევაში გვეუბნება ყველაფერს, რისი ცოდნაც გვჭირდება რუსეთის პოზიციისა და რუსეთის პოზიორობის შესახებ.

ჩვენ ამას პოზიორობად ვხედავთ. ჩვენ არ ვხედავთ ამას, როგორც დიალოგში ჩართვისა და დიპლომატიის კონსტრუქციულ, ლეგიტიმურ შეთავაზებას,“ – ასე უპასუხა დეპარტამენტის სპიკერმა ნედ პრაისმა ბრიფინგზე ჟურნალისტების შეკითხვას.

აქ წაიკითხეთ: სერგეი ლავროვის თქმით, რუსეთი მზად იყო მოესმინა ნებისმიერი წინადადება სამშვიდობო მოლაპარაკებაზე

ნედ პრაისმა დასძინა, რომ რეალური დიალოგისა და დიპლომატიის მომხრეა ყველა, მათ შორის პრეზიდენტი ზელენსკიც, რომელმაც ამის შესახებ ღიად განაცხადა „დიდი შვიდეულის“ სამიტზე ჩართვისას.

„შეერთებული შტატები მზადაა, მხარი დაუჭიროს უკრაინას, რადგან, როგორც ყოველთვის ვამბობდით, არაფერი უკრაინის შესახებ უკრაინის გარეშე. ჩვენ ვიქნებით უკრაინის გვერდით მაშინაც, როდესაც მოლაპარაკებების მაგიდა გამოჩნდება. ვიდრე ეს მოხდება, ჩვენი პირველადი ამოცანაა, დავეხმაროთ უკრაინას ყველაფრით, რაც მას სჭირდება უსაფრთხოებისთვის, ეკონომიკისთვის, ჰუმანიტარული საკითხებისთვის და ამის კეთებას გავაგრძელებთ.“

სახელმწიფო დეპარტამენტის პრესსპიკერის თქმით, თუ რუსეთს რეალურად სურს დიალოგი, მან საამისო ნიშანი არა დაბომბვებით, არამედ სხვა გზით უნდა გაუგზავნოს დასავლეთს.

„თუ რუსეთს სურს მოგვცეს ნიშანი, რომ სერიოზულად სურს დიალოგი და დიპლომატია, პირველი ნაბიჯი იქნებოდა, შეეწყვიტა ეს მხეცური თავდასხმები,“ – აღნიშნა პრაისმა.

CNN-ის კითხვაზე, შეხვდება თუ არა პუტინს მომავალ თვეში G20-ის სამიტზე ინდონეზიაში, შეერთებული შტატების პრეზიდენტმა, ჯო ბაიდენმა უპასუხა, რომ მასთან ლაპარაკის მიზეზს ვერ ხედავს.

„ეს დამოკიდებული იქნებოდა იმაზე, რაზე საუბარი ენდომებოდა მას“, – ამბობს პრეზიდენტი და დასძენს, რომ თუ პუტინი ამერიკელი კალათბურთელის, ბრიტნი გრინერის საქმეზე ლაპარაკს მოისურვებს, მაშინ მასთან სასაუბროდ მზად იქნება. – „მაგრამ ის მხეცურად მოიქცა, მხეცურად მოიქცა. ვფიქრობ, მან ომის დანაშაულები ჩაიდინა და, შესაბამისად, ვერ ვხედავ რაიმე რაციონალურ მიზეზს, მას ახლა შევხვდე.“

გუშინ, რუსეთის სახელმწიფო ტელევიზიის Россия 1-ის გადაცემა 60 минут-თან ინტერვიუს დროს რუსეთის საგარეო საქმეთა მინისტრმა სერგეი ლავროვმა თქვა, რომ მოსკოვი ღიაა უკრაინასთან დაკავშირებით დასავლეთთან სასაუბროდ, თუმცა ამ დრომდე ელოდება „სერიოზულ შეთავაზებას“ მოსალაპარაკებლად.

მან ასევე აღნიშნა, რომ მოსკოვი უარს არ იტყოდა შემდეგ თვეში, G20-ის სამიტზე, ვლადიმერ პუტინისა და ჯო ბაიდენის შეხვედრაზე.

დიდი ოცეულის სამიტი ინდონეზიაში, ბალიზე, 15-16 ნოემბერს გაიმართება. კრემლმა უკვე დაადასტურა, რომ მიწვევა მიიღო და რომ რუსეთის პრეზიდენტი სამიტზე დასწრებას აპირებს.

კრემლის პრესსპიკერმა, დიმიტრი პესკოვმა, 12 ოქტომბერს, ყოველდღიური ბრიფინგის დროს განაცხადა, რომ NATO-ს გენერალური მდივნის, იენს სტოლტენბერგის განცხადება შეიძლება ჩაითვალოს, როგორც იმის დადასტურება, რომ ნატო უკრაინის ომში იბრძვის კიევის მხარეს რუსეთის წინააღმდეგ.

ინფორმაციას ბრიტანული გამოცემა „გარდიანი“ ავრცელებს.

Европейская правда 11 ოქტომბერს წერდა, რომ სტოლტენბერგმა რუსეთ-უკრაინის ომზე ალიანსის მინისტრების შეხვედრამდე გამართულ პრესკონფერენციაზე ისაუბრა და თქვა, რომ „თუ პუტინი გაიმარჯვებს, ეს, უბრალოდ, უკრაინის დიდი დამარცხება კი არ იქნება, არამედ იქნება ჩვენი დამარცხებაც“.

„გარდიანის“ ცნობით, პესკოვმა ასევე განაცხადა, რომ დასავლელი ლიდერების რიტორიკა ბირთვული იარაღის გამოყენების შესაძლებლობაზე იყო საზიანო და პროვოკაციული.

„ჩვენს ყოველდღიურ მწუხარებას გამოვხატავთ, რომ დასავლელი სახელმწიფო ლიდერები ყოველ დღე  ერთვებიან ბირთვულ რიტორიკაში“, – თქვა პესკოვმა და დაამატა, რომ მსგავსი პრაქტიკა „პროვოკაციულია“.

ამერიკის შეერთებული შტატების პრეზიდენტი ჯო ბაიდენი მიიჩნევს, რომ ვლადიმერ პუტინმა უკრაინის ოკუპაციის პერსპექტივა სრულიად არასწორად გათვალა.

რუსეთ-უკრაინის ომზე ბაიდენმა CNN-თან ინტერვიუში ილაპარაკა.

„მე ვფიქრობ… იმედი ჰქონდა, რომ ხელგაშლილები შეხვდებოდნენ უკრაინაში, რომ კიევი ეს დედა-რუსეთის სახლია და მას იქ მიიღებდნენ. ვფიქრობ, სრულიად არასწორად გათვალა… ვფიქრობ, ის რაციონალური მოთამაშეა, რომელიც ძალიან შეცდა,“ – ამბობს აშშ-ის პრეზიდენტი.

კითხვაზე, შეხვდება თუ არა პუტინს მომავალ თვეში G20-ის სამიტზე ინდონეზიაში, ბაიდენი ამბობს, რომ მასთან ლაპარაკის მიზეზს ვერ ხედავს.

„ეს დამოკიდებული იქნებოდა იმაზე, რაზე საუბარი ენდომებოდა მას“, – ამბობს პრეზიდენტი და დასძენს, რომ თუ პუტინი ამერიკელი კალათბურთელის, ბრიტნი გრინერის საქმეზე ლაპარაკს მოისურვებს, მაშინ მასთან სასაუბროდ მზად იქნება. – „მაგრამ ის მხეცურად მოიქცა, მხეცურად მოიქცა. ვფიქრობ, მან ომის დანაშაულები ჩაიდინა და, შესაბამისად, ვერ ვხედავ რაიმე რაციონალურ მიზეზს, მას ახლა შევხვდე.“

„არ ვფიქრობ, რომ ამას გააკეთებს“, – უპასუხა ბაიდენმა შეკითხვას, გამოიყენებს თუ არა პუტინი ტაქტიკურ ბირთვულ იარაღს. – „მისგან ამაზე ლაპარაკი უპასუხისმგებლობაა, მსოფლიო ლიდერისგან, რომელიც ფლობს ერთ-ერთ უდიდეს ბირთვულ ძალას მსოფლიოში, იმის თქმა, რომ ის უკრაინაში ტაქტიკურ ბირთვულ იარაღს გამოიყენებს.“

დიდი ოცეულის სამიტი ინდონეზიაში, ბალიზე, 15-16 ნოემბერს გაიმართება. კრემლმა უკვე დაადასტურა, რომ მიწვევა მიიღო და რომ რუსეთის პრეზიდენტი სამიტზე დასწრებას აპირებს.

___

კრემლისტური მედიის ცნობით, ყირიმის ხიდის აფეთქების საქმეზე ФСБ-მ 8 ადამიანი დააკავა – 5 რუსეთის მოქალაქე, 3 – უკრაინისა და სომხეთის, „ტერაქტის“ ორგანიზატორად კი უკრაინის სამხედრო დაზვერვის უფროსი კირილო ბუდანოვი დაასახელა.

„ყირიმის ხიდზე ტერაქტის ორგანიზატორი იყო უკრაინის სამხედრო დაზვერვა, მისი ხელმძღვანელი კირილო ბუდანოვი, მისი თანამშრომლები და აგენტურა. ასაფეთქებელი მოწყობილობა შენიღბული იყო რულონებში სამშენებლო პოლიეთილენის ფენით 22 პალეტად, საერთო წონა 22 770 კილოგრამი,“ – ნათქვამია ФСБ-ს საზოგადოებასთან ურთიერთობის სამსახურის პრესრელიზში, რომელსაც რუსული მედია ავრცელებს.

რუსეთის სპეცსამსახურები ამტკიცებენ, რომ აგვისტოს დასაწყისში ტვირთი ოდესის პორტიდან ჯერ ბულგარეთში გადაიტანეს, იქიდან საქართველოში, ფოთის პორტში, საიდანაც ის სომხეთში მოხვდა. გადატანის პროცესში მონაწილეობდნენ უკრაინის მოქალაქეები – მიხაილ ციურკალო, დენის კოვაჩი, რომან სოლომკო, საქართველოს მოქალაქეები – სანდრო ინოსარიძე, ბროკერი მეტსახელად „ლევანი“ და სომხეთის მოქალაქე არტურ ტერჩანიანი.

ეფესბეს რელიზში ნათქვამია, რომ 29 სექტემბრიდან 3 ოქტომბრამდე ერევნის ტერმინალ „ტრანსალიანსში“ ტვირთი განაბაჟეს და დოკუმენტები შეცვალეს. გამგზავნად მიუთითეს შპს „გუ-არ-ჯი გრუპი“ (სომხეთი, ქ. ალავერდი), ხოლო მიმღებად – შპს „ლიდერი“ (მოსკოვი).

„საქართველოში დარეგისტრირებულ სატვირთო მანქანით ტვირთმა 4 ოქტომბერს გადაკვეთა რუსეთ-საქართველოს საზღვარი ზედა ლარსის გამშვებ პუნქტზე, ორი დღის შემდეგ ის მიიტანეს და გადმოტვირთეს არმავირის ბაზაზე,“ – წერს კრემლისტური მედია.

რუსეთის სპეცსამსახურების ინფორმაციით, 7 ოქტომბერს სოლომკოს, უკრაინის მოქალაქე ვლადიმერ ზლობასა და რუსეთის 5 მოქალაქის დახმარებით ტვირთის დოკუმენტები ისევ შეიცვალა. გამგზავნად ჩაიწერა შპს „ტეკ 34“ ულიანოვკიდან, ხოლო მიმღებად არარსებული ფირმა ყირიმში.

„ამავე დღეს პალეტები ჩატვირთეს 1971 წელს დაბადებული რუსეთის მოქალაქის მახირ იუსუბოვის მანქანაში, რომელიც შევიდა სიმფეროპოლში, 8 ოქტომბერს კი 06.03 წუთზე ყირიმის ხიდზე აფეთქდა,“ – წერს ეფეესბე.

რუსეთის სპეცსამსახურების ცნობით, ტვირთის გადატანას მთელ მარშრუტზე აკონტროლებდა უკრაინის სამხედრო დაზვერვის თანამშრომელი, რომელიც ამ სქემის მონაწილეებს „ივან ივანოვიჩად“ გაეცნო. მოქმედებების კოორდინაციისთვის ის ვირტუალურ ანონიმურ ნომერს იყენებდა, ასევე ტელეფონს, რომელიც დარეგისტრირებული იყო კრემენჩუგის მცხოვრების სერგეი ანდრეიჩენკოს სახელზე.

კრემლისტური მედია წერს, რომ 8 ოქტომბერს, დილით, ყირიმის ხიდზე აფეთქდა სატვირთო ავტომანქანა, რის შემდეგაც ცეცხლი გაუჩნდა მიმავალ მატარებელში საწვავით სავსე შვიდ ცისტერნას. ნაწილობრივ ჩამოიშალა ორი საავტომობილო მონაკვეთი, დაიღუპა ოთხი ადამიანი.

ამ ინფორმაციასთან დაკავშირებით „ბათუმელები“ შს სამინისტროს დაუკავშირდება კომენტარისთვის და მას მიღებისთანავე გამოვაქვეყნებთ.

ახალდანიშნული მეთაურის, სერგეი სუროვიკინის ომის წარმოების სტილი ვერ ახსნის 10-11 ოქტომბრის მასირებული სარაკეტო დარტყმების ტალღას და სავარაუდოდ, რუსეთის ოპერაციებში სერიოზულ ცვლილებებსაც ვერ გამოიწვევს – მიიჩნევენ ომის კვლევის ამერიკული ინსტიტუტის (ISW) ანალიტიკოსები.

ინსტიტუტის ინფორმაციით, რომელიც უკრაინის დაზვერვის ცნობებს ეყრდნობა, სარაკეტო დარტყმებს რუსეთი ჯერ კიდევ 2 ოქტომბრიდან ამზადებდა, ხოლო სუროვიკინი უკრაინაში რუსული ძალების მეთაურად 8 ოქტომბერს დაინიშნა.

„სავარაუდოდ, სუროვიკინის დანიშვნა და სარაკეტო დარტყმები უკრაინის კრიტიკულად მნიშვნელოვან ინფრასტრუქტურაზე რუსმა ჩინოვნიკებმა ერთმანეთს დაამთხვიეს, რათა რუსეთის თავდაცვის რეპუტაცია გაეუმჯობესებინათ. ისინი აშკარად დაინტერესებულნი არიან საკუთარი საზოგადოებრივი იმიჯის აღდგენით. სარაკეტო დარტყმების საინფორმაციო ეფექტი და რუსეთის ნაციონალისტური საინფორმაციო სივრცის გმირის, სუროვიკინის დანიშვნა, დიდი ალბათობით, მიმართულია სწორედ იმისკენ, რომ ამ სივრცის ყველაზე ხმამაღალი მოთხოვნები დააკმაყოფილოს,“ – წერენ ინსტიტუტის ექსპერტები.

ინსტიტუტის ცნობით, უკრაინაში რუსეთის ძალების ყველა მეთაური ერთხელ მაინც ხელმძღვანელობდა ოპერაციებს სირიაში. შესაბამისად, ყველა მათგანი და მათ შორის, სუროვიკინიც მოქალაქეების მიმართ განსაკუთრებული სისასტიკით გამოირჩევიან.

ISW-ი მიიჩნევს, რომ სუროვიკინის დანიშვნა ვერ გამოიწვევს უკრაინაში რუსეთის ოპერაციების „სირიიზაციას“, რადგან უკრაინის საბრძოლო სივრცე პრინციპულად განსხვავდება სირიის საბრძოლო სივრცისგან. რუსეთი და უკრაინა აწყდებიან სრულიად განსხვავებულ პრობლემებს და სუროვიკინის სირიის გამოცდილების გადმოტანა უკრაინაზე შეუძლებელია.

„რუსეთმა ამ დრომდე ვერ მიაღწია საჰაერო უპირატესობას უკრაინაში, რის გამოც მას არ შეუძლია ისეთივე მასირებული დაბომბვის კამპანიების განხორციელება უკრაინაში, როგორც ამას სირიაში აკეთებდა. თუ გავითვალისწინებთ იმასაც, რომ დასავლეთი კვლავაც განაგრძობს ჰაერსაწინააღმდეგო თავდაცვის სისტემებით კიევის მომარაგებას, სუროვიკინის დანიშვნა რუსეთს საჰაერო უპირატესობას ვერ მოაპოვებინებს,“ – წერს ინსტიტუტი.

ISW-ი დასძენს, რომ სირიის მსგავსად, უკრაინაში ომის წარმოების რუსეთისეული სტილი გამოირჩევა საერთაშორისო სამართლის უგულებელყოფით და სამოქალაქო პირებისადმი სასტიკი დამოკიდებულებით.

გენერალი სერგეი სუროვიკინი უკრაინაში რუსეთის გაერთიანებული ძალების მთავარსარდლად 8 ოქტომბერს დაინიშნა. სუროვიკინი მანამდე რუსეთის კოსმოსურ-საჰაერო ძალებს და უკრაინაში სამხრეთის მიმართულებას ხელმძღვანელობდა, უფრო ადრე –  საჰაერო ძალებს სირიაში. მონაწილეობდა ტაჯიკეთის შეიარაღებულ კონფლიქტში და ჩეჩნეთის მეორე ომში.

დიდი ბრიტანეთის დაზვერვა უკრაინაში რუსეთის საჰაერო პოტენციალს აფასებს. უწყების ცნობით, ირანული წარმოების ლეტალურ უპილოტო საფრენ აპარატებს რუსეთის ბრძოლის ველზე აგვისტოს შემდეგ იყენებს, მათ შორისაა ერთი მიმართულებით დამრტყმელი „შაჰედ 136“.

„რუსეთმა დარტყმების საერთო ტალღაში „შაჰედები“ 10 ოქტომბერსაც ჩართო. მანამდე უკრაინის გენშტაბი იუწყებოდა, რომ საერთო ჯამში, რუსეთმა უკრაინაში გაუშვა 86 „შაჰედ 136“, რომელთა 60 % უკრაინის არმიამ ჰაერშივე გაანადგურა,“ – წერს დაზვერვა 12 სექტემბრის რელიზში.

უწყების შეფასებით, ეს უპილოტო საფრენი აპარატები ნელია და დაბალ სიმაღლეზე დაფრინავს, რაც მათ ჩვეულებრივი ჰაერსაწინააღმდეგო თავდაცვის საშუალებებისთვისაც კი იოლ სამიზნეებად აქცევს.

დაზვერვა ვარაუდობს, რომ რუსეთმა მხოლოდ რამდენიმე დრონით ერთდროული შეტევისას შეძლო გარკვეული წარმატების მიღწევა.

„გამოცხადებული მანძილის, 2 500 კილომეტრის მიუხედავად, „შაჰედ 136-ს“ მცირე ტვირთამწეობა აქვს, რის გამოც, სავარაუდოდ, ვერ ასრულებს იმ მისიას, რომელსაც მას რუსეთი აკისრებს.

იმ ფონზე, როდესაც რუსული ტაქტიკური სამხედრო თვითმფრინავები უკრაინის ტერიტორიაზე მხოლოდ შეზღუდულ ეფექტს აღწევენ, ოპერაციულ დონეზე საიმედო და ზუსტი დარტყმითი პოტენციალის არქონა, რუსეთის სამხედრო შესაძლებლობებში მნიშვნელოვანი ჩავარდნაა,“ – ასკვნის უწყება.

გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება „სპეციალური სამხედრო ოპერაციის“ ხელმძღვანელად გენერალ სერგეი სუროვიკინის დანიშვნას გამოეხმაურა. დაზვერვის შეფასებით, სუროვიკინის დანიშვნა მიუთითებს, რომ რუსეთს უკრაინაში საკუთარი ოპერაციის „გაუმჯობესება“ სურს.

NATO-ს გენერალური მდივანი, იენს სტოლტენბერგი მიიჩნევს, რომ რომ უკრაინის დამარცხება რუსეთთან სრულმასშტაბიან ომში NATO-ს დამარცხებასაც ნიშნავს. როგორც Европейская правда წერს, სტოლტენბერგმა რუსეთ-უკრაინის ომზე ალიანსის მინისტრების შეხვედრამდე გამართულ პრესკონფერენციაზე ისაუბრა.

„ჩვენთვის ყველასთვის მნიშვნელოვანია, რომ უკრაინამ გაიმარჯვოს ბრძოლაში, ომში რუსეთის ჯარებთან, რომლებიც მის ტერიტორიაზე შეიჭრნენ. რადგან თუ პუტინი გაიმარჯვებს, ეს, უბრალოდ, უკრაინის დიდი დამარცხება კი არ იქნება, არამედ იქნება ჩვენი დამარცხებაც და საშიში ჩვენთვის ყველასთვის, რადგან სამყარო ნაკლებად უსაფრთხო გახდება, ჩვენ კი – რუსეთის მომდევნო აგრესიისგან დაუცველები“, – განაცხადა სტოლტენბერგმა.

მან ხაზი გაუსვა, რომ ჩრდილოატლანტიკური ალიანსი კონფლიქტში მხარე არ არის, თუმცა მისი „მხარდაჭერა გადამწყვეტ როლს თამაშობს“, ამიტომაც განსაკუთრებით მნიშვნელოვანია „შეიარაღების მარაგების დროულად შევსება“.

„ვფიქრობ, ის, რაც ჩვენ გუშინ ვნახეთ, სისუსტის ცხადი ნიშანია, რადგან ისინი ბრძოლის ველზე წარმატებას ვერ აღწევენ. რუსეთი ბრძოლაში აგებს“, – ასე გამოეხმაურა NATO-ს გენერალური მდივანი 10 ოქტომბრის მასირებულ სარაკეტო შეტევას უკრაინაზე.

იენს სტოლტენბერგმა დასძინა, რომ ეს ომი უკრაინაში შეჭრით პუტინმა დაიწყო და რუსეთის პრეზიდენტს ამ ომის დამთავრებაც შეუძლია, თუ რუსეთის ჯარებს უკრაინიდან გაიყვანს.

რუსეთის საგარეო საქმეთა მინისტრმა, სერგეი ლავროვმა, განაცხადა, რომ მოსკოვი უარს არ იტყოდა შემდეგ თვეში, G20-ის სამიტზე, ვლადიმერ პუტინისა და ჯო ბაიდენის შეხვედრაზე.

რუსეთის სახელმწიფო ტელევიზიის Россия 1-ის გადაცემა 60 минут-თან ინტერვიუს დროს ლავროვმა თქვა, რომ მოსკოვი ღიაა უკრაინასთან დაკავშირებით დასავლეთთან სასაუბროდ, თუმცა ამ დრომდე ელოდება „სერიოზულ შეთავაზებას“ მოსალაპარაკებლად.

რუსეთის საგარეო საქმეთა მინისტრმა ასევე განაცხადა, რომ აშშ-ის ოფიციალურმა პირებმა, მათ შორის, თეთრი სახლის ეროვნული უსაფრთხოების პრესსპიკერმა, ჯონ კირბიმ, თქვა, რომ აშშ-ს სურდა საუბრებში ჩართვა, მაგრამ რუსეთი უარს ამბობდა.

ლავროვის თქმით, ეს „ტყუილია“.

„ეს სიცრუეა. ჩვენ ამ დრომდე არ მიგვიღია რაიმე სერიოზული შეთავაზება. იყო რამდენიმე არც მთლად სერიოზული შემოთავაზება, რომლებსაც ჩვენ ვპასუხობდით არა ნეგატიურად, არამედ ვთავაზობდით კონკრეტული წინადადებების ფორმულირებას, რითაც ვიღაც ადამიანები ჩვენთან არაპირდაპირ კავშირებზე გამოსვლას ცდილობდნენ.“

სერგეი ლავროვმა მიუთითა, რომ რუსეთი მზად იყო მოესმინა ნებისმიერი წინადადება სამშვიდობო მოლაპარაკებაზე:

„კვლავ ვიმეორებთ – არასდროს გვითქვამს უარი შეხვედრებზე. თუ იქნება შემოთავაზე, ჩვენ მას განვიხილავთ“.

დასავალეთსა და რუსეთს შორის შესაძლო მოლაპარაკებასა და ამ პროცესში თურქეთის მასპინძლობის შესაძლებლობაზე საუბრისას, ლავროვმა თქვა, რომ მოსკოვი მოისმენს ნებისმიერ წინადადებას.

მისი თქმით, თურქეთის პრეზიდენტ, რეჯეფ თაიფ ერდოღანს ამ კვირაში, ყაზახეთში ვიზიტისას, შეეძლება ეს შეთავაზება იქ მყოფ ვლადიმერ პუტინს წარუდგინოს.

ლავროვმა, ასევე, გაიმეორა ბრალდება, რომ აშშ დიდი ხანია ჩართულია ომში უკრაინაში, რომელიც მისი თქმით, „ანგლოსაქსების მიერ კონტროლდება“.

G20-ის სამიტი 15-16 ნოემბერს ინდონეზიაში, კუნძულ ბალიზე გაიმართება.

უკრაინის თავდაცვის მინისტრის, ოლექსი რეზნიკოვის ბლოგი

წყარო: Новое Время

რუსეთის მასირებულ შეტევას უკრაინის მშვიდობიან ქალაქებსა და სამოქალაქო ობიექტებზე ისტორიაში უკვე კარგად გამოცდილი განმარტება აქვს: ეს დანაშაულზე უარესია – ეს შეცდომაა.

ეს შეცდომაა, რომელსაც კრემლმა ჩვენი მებრძოლების წარმატების გამო მიმართა.

ყველა, ვინც რაკეტებითა და დრონებით დარტყმებზე დანაშაულებრივ ბრძანებებს გასცემდა, აუცილებლად დაისჯება. მინდა, თქვენი ყურადღება შემდეგ ასპექტს მივაპყრო.

რუსები, როგორც ადრე, ახლაც ისევ უკრაინის ენერგეტიკულ ინფრასტრუქტურას, საცხოვრებელ სახლებს, სკოლებსა და საავადმყოფოებს ურტყამდნენ, თუმცა 10 ოქტომბრის მასირებული შეტევა ძალიან ნათლად მეტყველებს მათ დაბნეულობასა და შიშზე. ის ხომ კონტრპროდუქტიულია და რუსეთისთვის დამანგრეველ შედეგებს გამოიწვევს.

პირველი – მოსკოვმა ვერცერთ ახალ სამხედრო მიზანს ვერ მიაღწია. ვერცერთს. პირიქით, ჩვენმა დამცველებმა დამატებითი მოტივაცია შეიძინეს – რაც შეიძლება სწრაფად განდევნონ მტერი, რომელიც მათი ახლობლებით დასახლებულ ქალაქებს ბომბავს.

მეორე – ახლა აღარაა საჭირო დამატებითი არგუმენტები იმის დასამტკიცებლად, რომ რუსეთი – ეს ტერორისტი-სახელმწიფოა, ტერორიზმის სპონსორი. ყველა, ვინც ამის შემდეგ ეცდება, რუსეთთან ითანამშრომლოს და მოსკოვის რეჟიმის ტერორისტულ არსი უარყოს, მიიღებს დამატებით პრობლემებს შესაბამისი განმარტებებით.

მეტიც, ყველა რუსი ლოიალისტი, დასავლეთში გავლენის ღია თუ „ჰიბრიდული“ აგენტი, ახლა გზაჯვარედინზე მოხვდება: მათ ან უნდა დაგმონ კრემლის კაციჭამიური ქმედებები, ან მხარი დაუჭირონ მათ. ცხადი პოზიციისგან თავის არიდება – ეს დანაშაულების მხარდაჭერაა.

იგივეა საზოგადოების წარმომადგენლებისთვისაც, რომლებიც ამ დანაშაულებს არ ამართლებენ. მათ ძალიან ცოტა დრო დარჩათ, რათა თავიანთი უთანხმოება გამოხატონ და საჯაროდ გაემიჯნონ, რადგან შემდეგ პასუხისმგებლობის გაზიარება მოუწევთ.

მესამე – თუ უკანასკნელ თვეებში პარტნიორებთან საუბრებში ჩვენ გვჭირდებოდა გზების ძებნა, რომ უკრაინით არ „დაღლილიყვნენ“, ახლა რუსებმა ყველაფერი ჩვენ ნაცვლად გააკეთეს. მათ დემონსტრაციულად აჩვენეს, რომ გაცნობიერებულად აწყობენ ჰუმანიტარულ კრიზისს, რომელიც არამხოლოდ უკრაინას, არამედ მთელ ევროპას დაარტყამს.

სასიცოცხლოდ მნიშვნელოვანი ინფრასტრუქტურის განადგურებამ შესაძლოა ლტოლვილთა ახალი ტალღა გააჩინოს. ევროპიდან დაბრუნებული ასობით ათასი უკრაინელი იძულებული გახდეს, ისევ იქ ეძებოს გადარჩენა. მათ მილიონები შეუერთდებიან. ენერგოსისტემის განადგურება – ეს მხოლოდ გათბობის საკითხი არაა. ესაა საკვები და წყალი, კანალიზაცია, დაავადებები და ყველა თანმდევი შედეგი.

ამ ფონზე გაცილებით იოლია იმის ახსნა, რატომ გვჭირდება ასე სასწრაფოდ დამატებითი შეიარაღება, განსაკუთრებით კი რაკეტსაწინააღმდეგო და ჰაერსაწინააღმდეგო თავდაცვის საშუალებები. ჩვენმა სპეციალისტებმა საკუთარი ოსტატობა უკვე დაამტკიცეს, რაკეტებისა და კამიკაძე-დრონების თითქმის ნახევარი ჩამოყარეს. თუ უკრაინის თავდაცვის ძალებს მეტი საშუალებები ექნებათ, ჰაერიდან საფრთხის შემცირებაც შესაძლებელი გახდება.

უახლოეს დღეებში „რამშტაინის“ ფორმატისა და NATO-ს შტაბ-ბინაში შეხვედრებზე ნაკლები ლაპარაკი დაგვჭირდება. რუსები თვითონ აკეთებენ იმას, რომ რისკების ნეიტრალიზებისთვის კანონიერი სამიზნეები მაქსიმალურად გაფართოვდეს.

P.S. მთავარი. ადამიანური.

გული ამიჩუყა სხვადასხვა ქვეყნებიდან კოლეგებისა და პარტნიორების შეტყობინებებმა, უპირობო მხარდაჭერას რომ გამოხატავდნენ უკრაინისადმი და კრემლის მოქმედებებს გმობდნენ. ეს გულწრფელი რეაქციაა ადამიანებისა, რომლებსაც ცხადი წარმოდგენა აქვთ კეთილსა და ბოროტზე, ღირსებაზე, სინდისზე, წესიერებაზე.

მათ ვალდებულებები აკისრიათ და საკუთარ ქვეყნებზე ზრუნავენ, მაგრამ ბევრი მათგანი ცხადად აცნობიერებს, რომ კრემლის ახლანდელ რეჟიმს არ შეიძლება რაიმე საერთო ჰქონდეს ცივილიზებულ სამყაროსთან.

დანაკარგი ძალიან მტკივნეულია – უკრაინელები დაიღუპნენ. ამით განვსხვავდებით რუსებისგან.

გამარჯვება არ მოვა ხვალ, მაგრამ ის ნამდვილად უფრო ახლოსაა. ჩვენ უფრო მტკიცედ უნდა დავდგეთ, რომ ეს რაც შეიძლება მალე მოხდეს.

თარგმნა: თამარ რუხაძემ

აშშ-ის ომის კვლევის ინსტიტუტის (ISW) ვარაუდით, პუტინმა უკრაინაზე სარაკეტო თავდასხმით ომის მომხრე ნაციონალისტებს ასიამოვნა. ბელარუსში თავმოყრილ ძალებს კი კრემლი გამოიყენებს, რათა უკრაინის არმია კიევში შეაკავოს და მას ქვეყნის სხვა რაიონებში კონტრშეტევის ოპერაციებში მონაწილეობის საშუალება არ მისცეს.

ბელარუსის ტერიტორიაზე რუსეთის ჯარების კონცენტრირება და 10 ოქტომბრის სარაკეტო თავდასხმები უკრაინაზე ISW-ის უახლესი ანგარიშის მთავარი თემებია.

რუსეთის ჯარებმა 10 ოქტომბერს მასობრივი სარაკეტო იერიში მიიტანეს უკრაინის 20-ზე მეტ ქალაქზე, მათ შორის კიევზე. რუსეთის პრეზიდენტმა, ვლადიმერ პუტინმა განაცხადა, რომ „უკრაინის ინფრასტრუქტურაზე დარტყმა ყირიმის ხიდზე ჩადენილი ტერაქტის პასუხი იყო“.

ISW-ის ანალიტიკოსების შეფასებით, ამ გადაწყვეტილებით პუტინმა ასიამოვნა ომის მომხრეთა ნაციონალისტურ ბანაკს, რომელიც მისგან ამგვარ შურისძიებას მოითხოვდა.

ექსპერტები ხაზს უსვამენ, რომ შეხვედრას, რომელზეც პუტინმა ამის შესახებ გამოაცხადა, თავდაცვის მინისტრი სერგეი შოიგუც ესწრებოდა:

„იმ ხმების მიუხედავად, რომ თითქოს პუტინი მის მოხსნას აპირებდა. ეს შესაძლოა მეტყველებდეს იმაზე, რომ პუტინი ჯერჯერობით ომის მომხრე საზოგადოების მხოლოდ ერთი მოთხოვნის დაკმაყოფილებით შემოიფარგლა“.

როგორც ISW-ი აღნიშნავს, რუსეთისა და ბელარუსის ჯარების ერთობლივი თავდასხმა უკრაინაზე ბელარუსის ტერიტორიიდან ნაკლებად სავარაუდოა.

ინსტიტუტის ანალიტიკოსები უფრო მეტად უშვებენ იმ ალბათობას, რომ კრემლი თავის ძალებს ბელარუსში გამოიყენებს, რათა უკრაინის არმია კიევში შეაკავოს და მას ქვეყნის სხვა რაიონებში კონტრშეტევის ოპერაციებში მონაწილეობის საშუალება არ მისცეს.

ISW-ის ანგარიში ძირითადი დასკვნები 10 ოქტომბრის მდგომარეობით:

• რუსეთის ჯარებმა მასობრივი სარაკეტო იერიში მიიტანეს უკრაინის 20-ზე მეტ ქალაქზე;
• პრეზიდენტმა პუტინმა განაცხადა, რომ სარაკეტო დარტყმები იყო პასუხი ყირიმის ხიდის აფეთქებაზე და ამით ნაციონალისტურ ბანაკს ასიამოვნა;
• ნაკლებსავარაუდოა, რომ რუსეთისა და ბელარუსის სახმელეთო ჯარები უკრაინას ბელარუსიდან დაესხმიან თავს;
• 10 ოქტომბრის მდგომარეობით, უკრაინის არმიამ, სავარაუდოდ, ლუგანსკის ოლქის დასავლეთში 200 კმ2 ტერიტორია გაათავისუფლა;
• რუსეთის ძალები განაგრძობდნენ წარუმატებელ მცდელობებს ხერსონის ოლქის ჩრდილო-დასავლეთით ცოტა ხნის წინ „დაკარგული“ ტერიტორიების დასაბრუნებლად;
• რუსეთის ძალები განაგრძობდნენ სახმელეთო თავდასხმებს დონეცკის ოლქში;
• რუსეთის წარმომადგენლები და საოკუპაციო ადმინისტრაციები ქმნიან პირობებს 40 ათასი მოსახლის ხერსონიდან ყირიმში ან რუსეთში გადასაყვანად;
• რუსეთის არმია კვლავაც ვერ ახერხებს მობილიზებული სამხედროების უზრუნველყოფას.

დიდი ბრიტანეთის დაზვერვა თავისი უახლესი რელიზით „სპეციალური სამხედრო ოპერაციის“ ხელმძღვანელად გენერალ სერგეი სუროვიკინის დანიშვნას ეხმაურება.

რუსეთის თავდაცვის სამინისტრომ 8 ოქტომბერს, იმ დღეს, როდესაც ყირიმში ქერჩის ხიდზე აფეთქება მოხდა, გამოაცხადა, რომ უკრაინაში რუსეთის ძალების მთავარსარდლად და „სპეციალურ სამხედრო ოპერაციის“ მეთაურად სერგეი სუროვიკინი დაინიშნა.

სუროვიკინი ხელმძღვანელობდა რუსეთის სამხედრო ძალებს სირიაში, შემდეგ რუსეთის საჰაერო ძალებს, ბოლო რამდენიმე თვის განმავლობაში კი იგი უკრაინაში „სამხრეთის ძალების“ ხელმძღვანელი იყო.

„თავისი ოპერაციის განმავლობაში რუსეთს ერთი სრულუფლებიანი მეთაური, ფაქტობრივად, არ ჰყოლია. ამ თანამდებობას აპრილიდან აგვისტომდე გენერალი ალექსანდრ დვორნიკოვი იკავებდა, თუმცა გაურკვეველია, შეეძლო თუ არა მას ერთმანეთისგან განსხვავებული და კონკურენციაში მყოფი რუსული დანაყოფების ეფექტიანი კონტროლი,“ – წერს დიდი ბრიტანეთის დაზვერვა.

უწყების შეფასებით, სუროვიკინის დანიშვნა მიუთითებს, რომ რუსეთს უკრაინაში საკუთარი ოპერაციის „გაუმჯობესება“ სურს.

„თუმცა მას სავარაუდოდ მოუწევს კონკურენცია გაუწიოს კიდევ უფრო მეტად გახლეჩილ რუსეთის თავდაცვას, რომელსაც მისთვის დასახული მიზნების მისაღწევად სულ უფრო მცირე რესურსი აქვს,“ – ასკვნის უწყება.

აშშ-ის ომის კვლევის ინსტიტუტის (ISW) ინფორმაციით, სუროვიკინის დანიშვნას ომის მომხრე ნაციონალისტები და სამხედრო ბლოგერები ენთუზიაზმით შეხვდნენ და იმედი გამოთქვეს, რომ თავისი სისასტიკით ცნობილი სუროვიკინი საკმარისი იქნება ომის ტრაექტორიის შესაცვლელად.

მის დანიშვნას გამოეხმაურა რუსული სამხედრო კომპანია „ვაგნერის“ დამფუძნებელი ევგენი პრიგოჟინიც, რომელმაც განაცხადა, რომ „სუროვიკინი ყველაზე საქმიანი სამხედრო მეთაურია რუსეთის არმიაში“.

მთავარ ფოტოზე: გენერალი სუროვიკინი ვლადიმერ პუტინთან შეხვედრისას

„პირველი ეპიზოდი ნათამაშებია. იქნება სხვებიც“, – უკრაინული ქალაქების დაბომბვას ასე გამოეხმაურა რუსეთის უშიშროების საბჭოს მდივნის მოადგილე დიმიტრი მედვედევი. – „უკრაინული სახელმწიფო ახლანდელი კონფიგურაციით ნაცისტური პოლიტიკური რეჟიმით ყოველთვის პირდაპირი და აშკარა საფრთხე იქნება რუსეთისთვის. ამიტომაც, ჩვენი ხალხისა და საზღვრების დაცვის გარდა, ჩვენი მომავალი მოქმედებების სამიზნე, ჩემი აზრით, უკრაინის პოლიტიკური რეჟიმის სრული დემონტაჟიც უნდა იყოს“.

მედვედევის განცხადებამდე, რუსეთის პრეზიდენტმა ვლადიმერ პუტინმა აღიარა, რომ დღევანდელი შეტევა ყირიმის ხიდის აფეთქებაზე პასუხი იყო.

„მიზანი მიღწეულია“, – დაწერა უკრაინაში აფეთქებების შემდეგ რუსეთის თავდაცვის უწყებამ.

„ყოველ დარტყმას მკაცრი პასუხი გაეცემა. თქვენ პასუხს აგებთ ყოველი სიკვდილისა და ტანჯვისთვის. და არა მხოლოდ თქვენ. რუსების მთელ თაობებს მოუწევთ ამაზე პასუხისგება. ჩვენ მაინც წინ ვივლით. ჩვენ კვლავაც გავანადგურებთ ყველას, ვინც უკრაინაში იარაღით მოვა. ეს დარტყმები ჩვენ უფრო გვაბრაზებს. ეს დარტყმები მხოლოდ და მხოლოდ აჩქარებს ჩვენ წინსვლას. ჩვენ არ გვეშინია. ჩვენ მხოლოდ უფრო ბრაზიანები და ზუსტები ვხდებით,“ – გამოეხმაურა რუსეთის მხრიდან უკრაინის დასახლებული პუნქტებისა და ენერგოობიექტების დაბომბვას უკრაინის პრეზიდენტის ოფისის ხელმძღვანელი ანდრეი ერმაკი.

უკრაინის უსაფრთხოებისა და თავდაცვის საბჭოს მდივანმა, ოლექსი დანილოვმა კი განცხადა, რომ ამ დაბომბვებით რუსეთს მხოლოდ საკუთარი ცხვრების დაშინება შეუძლია, ხოლო უკრაინელებში ის მხოლოდ ზიზღსა და რისხვას იწვევს.

„კრემლი და რუსული ბანდა! თქვენი დაბომბვებით მხოლოდ რისხვასა და ზიზღს იწვევთ ჩვენში!. არა შიში, არა რამეზე შეთანხმების სურვილი. თქვენ აღვიძებთ ჩვენს სურვილს, გაგანადგუროთ თქვენ – ტერორისტები – ყველგან, სადაც უნდა იყოთ – ქუჩებსა და ბუნკერებში, ზღვაში თუ ხმელეთზე,“ – წერს დანილოვი.

პოლიტიკოსების განცხადებების პარალელურად, უკრაინაში კამიკაძე-დრონებისთვის ფულის შეგროვება დაიწყეს. აქციის ორგანიზატორები ტელეწამყვანი სერგეი პრიტულა და აქტივისტი სერგეი სტერნენკო არიან, მოგროვილი ფულით ისინი უკრაინის არმიისთვის კამიკაძე-დრონების RAM II UAV-ების შეძენას აპირებენ.

აქციის შესახებ სერგეი პრიტულამ ტელეგრამარხზე გამოაცხადა: „მეგობრებო, ვაგროვებთ ფულს შურის საძიებლად! სერგეი სტერნენკოსთან ერთად ამ აქციის დაწყებას 12 ოქტომბერს ვგეგმავდით, მაგრამ ბუნკერის არამზადამ ჩვენს გეგმაში კორექტივები შეიტანა. უკვე ვიწყებთ!“

დღეს დილით სარაკეტო თავდასხმა განხორციელდა კიევზე, ლვოვზე, ხარკოვზე, ხმელნიცკსა და სხვა ქალაქებზე. უკრაინული მედიის ცნობით, შუადღის მონაცემებით, დაღუპულია 10 და დაჭრილია 60-ზე მეტი ადამიანი.

უკრაინის თავდაცვის სამინისტროს ინფორმაციით, 10 ოქტომბერს უკრაინაში რუსეთმა 83 რაკეტა ისროლა, მათგან 43 ჰაერსაწინააღმდეგო თავდაცვის სისტემებმა ჩამოაგდეს.

უკრაინის ქალაქებზე რუსეთის სარაკეტო თავდასხმებზე ვოლოდიმირ ზელენსკის გამოხმაურების შემდეგ, უკრაინის პრეზიდენტს ჩეჩნეთის მეთაური რამზან კადიროვი მიმართავს.

კადიროვი აცხადებს, რომ ის დღეს სავსებით კმაყოფილია „სპეციალური სამხედრო ოპერაციის“ მიმდინარეობით.

„ზელენსკი წუწუნებს, რომ კიევისა და სხვა ქალაქების თავზე რაკეტები დაფრინავს. აბა, რა გეგონა ზელენსკი-დოყლაპიავ: შენთვის შეიძლებოდა და სხვებისთვის არა?“ – წერს კადიროვი ტელეგრამზე და უკრაინის პრეზიდენტს „8 წელი მშვიდობიანი ხალხის დაბომბვას“, „ლუგანსკის ინფრასტრუქტურის განადგურებას“ და „ხიდების აფეთქებას“ ახსენებს.

„ზელენსკი, ჩვენ შენ გაფრთხილებდით, რომ რუსეთს სინამდვილეში ჯერ არ დაუწყია, ასე, რომ საკმარისია ეგ იაფფასიანი წუწუნი, მაგას აჯობებს, სანამ კიდევ არ მოფრენილა, გაიქცე. გაიქეცი, ზელენსკი, გაიქეცი, უკან დასავლეთისკენ არც გაიხედო, ისე.“

სარაკეტო თავდასხმა მთელი უკრაინის მასშტაბით დღეს დილიდან დაიწყო. რამდენიმე აფეთქება მოხდა დედაქალაქში, კიევში, სადაც მედიის ცნობით, წინასწარი ინფორმაციით, 8 ადამიანი დაიღუპა და 24 დაშავდა.

სარაკეტო თავდასხმებისა და აფეთქებების შესახებ იუწყებიან ნიკოლაევში, ლვოვში, ჟიტომირში, დნეპრში, ტერნოპოლსა და ხმელნიცკში.

უკრაინის პრეზიდენტი ვოლოდიმირ ზელენსკი კიევსა და უკრაინის სხვა ქალაქებზე სარაკეტო თავდასხმას დილითვე ფეისბუქზე გამოეხმაურა, ზელენსკიმ კიევის ქუჩიდან მიმართვაც დადო და აფეთქებების ამსახველი ვიდეოც და  გამოაქვეყნა.

„სრულმასშტაბიანი ომის 229-ე დღე. 229 დღეა, რაც ჩვენ განადგურებას და მიწასთან გასწორებას ცდილობენ. მთლიანად. ცდილობენ, გაანადგურონ ჩვენი ხალხი, რომელსაც სძინავს საკუთარ სახლებში ზაპოროჟიეში. დახოცონ ადამიანები, რომლებიც დნეპრსა თუ კიევში სამსახურებში მიდიან“, – დაწერა ვოლოდიმირ ზელენსკიმ.

როგორც „უნიანი“ აღნიშნავს, 8 ოქტომბერს ხერსონის [ყირიმის] ხიდის აფეთქების შემდეგ, ზოგიერთი რუსი პროპაგანდისტი უკრაინის მისამართით, უმაღლეს რადაზე თავდასხმით და ბირთვული იარაღის გამოყენებით იმუქრებოდა.

ვლადიმერ პუტინმა ყირიმის ხიდის აფეთქებაში რუსეთის სპეცსამსახურები დაადანაშაულა და მომხდარს „ტერაქტი“ უწოდა, დიმიტრი მედვედევმა კი დასძინა, რომ პასუხი ტერაქტზე ერთადერთი შეიძლება იყოს – „ტერორისტების სრული განადგურება“.