ბათუმში 2021 წელს სადარბაზოს ჩამონგრევის შედეგად მომხდარ ტრაგედიასთან დაკავშირებით, მემორიალს მოაწყობენ. ჯერ არ არის გადაწყვეტილი, მემორიალი რა სახის [ქანდაკება, დაფა, ობელისკი] იქნება და კონკრეტულად რა ადგილზე განთავსდება. თუმცა მერიის სამმართველოს პროექტზე კონკურსი უკვე გამოცხადებული აქვს.
„2021 წლის 8 ოქტომბერს ბათუმში, 26 მაისი N13-ში მომხდარ ტრაგიკულ შემთხვევასთან დაკავშირებით მონუმენტური სახვითი ხელოვნების ძეგლის [ქანდაკების], ობელისკის, მემორიალური დაფისა ან სხვა მემორიალური ობიექტის საპროექტო-სახარჯთაღრიცხვო დოკუმენტაციის შედგენაზე“ ტენდერი მერიის საქალაქო ინფრასტრუქტურისა და კეთილმოწყობის სამმართველომ გამოაცხადა.
საკონკურსო თანხა 15 ათასი ლარია. წინადადებების მიღება 2022 წლის 19 ოქტომბერს დაიწყება და 24 ოქტომბერს დასრულდება.
კონკურსში გამარჯვებულმა მემორიალის პროექტი და ხარჯთაღრიცხვა ხელშეკრულების გაფორმებიდან 20 დღეში უნდა მოამზადოს.
პროექტი და ხარჯთაღრიცხვა უნდა შეიცავდეს:
- „განმარტებით ბარათს;
- არსებული სიტუაციის ამსახველ ფოტომასალას;
- ესკიზს, რომელიც შესაძლებელია შესრულდეს ნებისმიერი სახვითი საშუალებით [3D ვიზუალიზაცია, ფანქარი, გუაში, შერეული ტექნიკა – შესაძლებელია იყოს სხვადასხვა კომპიუტერულ პროგრამაში აგებული და სხვა];
- გამოსაყენებელი სამშენებლო მასალების სპეციფიკაციებს;
- ინფორმაციას ადგილმდებარეობისა და ობიექტის პარამეტრების შესახებ;
- სხვა საჭირო დოკუმენტაციებს.“
—
ბათუმში 2021 წლის 8 ოქტომბერს სადარბაზოს ჩამონგრევის შედეგად 9 ადამიანი დაიღუპა, მათ შორის, სამი ბავშვი. ნანგრევებიდან გადარჩა მხოლოდ ერთი ადამიანი.
