სოფლის განვითარების სააგენტოს ინფორმაციით, აგრობარათებით ფერმერებმა ჯამში 31,5 მილიონზე მეტი ლარის სასოფლო-სამეურნეო საქონელი შეიძინეს. როგორც სააგენტოში „ბათუმელებს“ უთხრეს, მაისიდან დღემდე პერიოდში აგრობარათებით 280 ათასზე მეტმა ფერმერმა ისარგებლა.
სასოფლო-სამეურნეო დანიშნულების მიწის ნაკვეთების მესაკუთრეთა ხელშეწყობის სახელმწიფო პროგრამა 2022 წელს 35 მილიონი ლარითაა დაფინანსებული.
იმ ფერმერებს, რომლებსაც აგრობარათებზე დარიცხული ქულებით ჯერ არ უსარგებლიათ, უფლება აქვთ, აგრობარათებზე დარიცხული ქულები 2022 წლის 30 ნოემბრის ჩათვლით გამოიყენონ.
პროგრამის ფარგლებში, სუბსიდიას იღებენ 0.25 ჰა-დან 1.25 ჰა-ის ჩათვლით მიწის მესაკუთრეები და თანამესაკუთრეები, 1 ჰა-ზე 300 ლარის გაანგარიშებით.
„აგროქულების განაღდება ამ ეტაპზე საქართველოს მასშტაბით 500-ზე მეტ სპეციალიზებულ მაღაზიაშია შესაძლებელი. აგრობარათის გასააქტიურებლად ან ახალი ბარათის ასაღებად ლიბერთი ბანკში ვიზიტამდე ქულების დარიცხვის შესახებ ინფორმაციის გადამოწმება შესაძლებელია ბანკის ვებგვერდზე“, – აცხადებს სოფლის განვითარების სააგენტო.
ამავე თემაზე:
https://batumelebi.netgazeti.ge/news/409991/
