გონიოს ყოფილ პოლიგონზე დაჭაობებულ ადგილებს გეორადიოლოკაციური მეთოდით განსაზღვრავენ. აჭარის ფინანსთა და ეკონომიკის სამინისტრომ დაჭაობებული ტერიტორიის მოცულობების განსაზღვრაზე ტენდერი გამოაცხადა. სატენდერო თანხა 19 300 ლარია.
„გონიოს დასახლებაში მდებარე დაჭაობებული ტერიტორიის სიღრმე უნდა განისაზღვროს გეორადიოლოკაციური მეთოდით, ხოლო მოცულობების შესახებ ინფორმაცია მოწოდებულ უნდა იქნას ცალ-ცალკე საკადასტრო კოდების მითითებით. დაჭაობებული ტერიტორიის სავარაუდო ფართობი შეადგენს 9,9 ჰექტარს“, – აღნიშნულია სატენდერო განცხადებაში.
სამინისტროს მონაცემებით, დაჭაობებული ტერიტორია [ლურჯი ფერით] გონიოს ყოფილ პოლიგონზე დაახლოებით 9,9 ჰექტარია – რუკაზე ეს ტერიტორია შემოსაზღვრულია წითელი ხაზით
„საინვესტიციო ტერიტორიაა და დასაზუსტებელია რა მოცულობისაა დაჭაობებული ტერიტორია. ეს საჭიროა, რათა დადგინდეს მიწის საბაზრო ღირებულება“, – უთხრეს „ბათუმელებს“ სამინისტროში.
სპეციალისტის განმარტებით, გეორადიოლოკაციური მეთოდი, ეს არის გეოფიზიკური მეთოდებით კვლევა, რათა დადგინდეს, მაგალითად, ტბის სიღრმე, რამდენადაა დაჭაობებული ტერიტორია, როგორია [არის თუ არა] რადიაციის დონე და სხვა. ეს მეთოდი იძლევა დიდი სიზუსტით მონაცემებს ობიექტის ზომებზე და მის მახასიათებლებზე.
ტენდერში წინადადებების მიღება 2022 წლის 14 ოქტომბერს დაიწყება და 17 ოქტომბერს დასრულდება. მომსახურების შესრულების ვადა კი, ტენდერში გამარჯვებულს, ხელშეკრულების გაფორმებიდან 20 დღე აქვს.
ბათუმი / გონიოს ყოფილი პოლიგონის ტერიტორია
გონიოს ყოფილი პოლიგონის ტერიტორია მთლიანობაში 300-ზე მეტი ჰექტარია. ხელისუფლებამ აქ პოტენციური ინვესტორების მიყვანა წლების წინ დაიწყო.
საქართველოს ეკონომიკის სამინისტროს დაკვეთით, ჯერ კიდევ 2017 წელს მომზადდა აღნიშნული ტერიტორიის განვითარების კონცეფცია და ტექნიკურ-ეკონომიკური კვლევა. თუმცა ეს კვლევა მთავრობას არაფერში გამოუყენებია.
აჭარის ფინანსთა და ეკონომიკის სამინისტროში კი 2019 წელს „ბათუმელებს“ უთხრეს, რომ ეს იყო „ერთი კერძო კომპანიის მოსაზრება და არა სახელმწიფო მიდგომა“. შესაბამისად, ე.წ. „გონიოს პოლიგონის“ და მიმდებარე ტერიტორიის განვითარების კონცეფციაზე თავად მუშაობდნენ.
ყოფილი პოლიგონის ტერიტორიის განვითარების გეგმა-კონცეფცია არც 2021 წელს არსებობდა:
იმავე, 2021 წელს, წინასაარჩევნოდ, პრემიერმა ღარიბაშვილმა კიდევ ერთხელ დააანონსა, რომ „გონიოში აშენდება ახალი ქალაქი კაზინოებითა და ბანკებით.“
ამ თემაზე:
გონიოს ყოფილ პოლიგონზე მთავრობამ საინვესტიციო კონცეფცია მოამზადა
