ნეტგაზეთი • RU

ბათუმის ცენტრალურ პარკში ქვის სკამები დაამტვრიეს – რას ამბობენ მერიაში

ბათუმის ცენტრალურ პარკში რამდენიმე თვის წინ ახალი ქვის სკამები დაამონტაჟეს. ამ სკამებიდან ერთ-ერთი სკამი უკვე დააზიანეს. ქვის სკამის ერთი მხარე მთლიანად ჩამომტვრეულია. ამ ერთ სკამში ბათუმის მერიას 4500 ლარი აქვს გადახდილი. სულ შეიძინეს 50 ცალი.

„ბათუმელები“ ბათუმის მერიას დაუკავშირდა და ჰკითხა, თუ დაიწყო მოკვლევა ფაქტზე.

თავდაპირველად მერიაში გვითხრეს, რომ ინფორმაციას დააზუსტებდნენ, მოგვიანებით კი ასეთი განცხადება გაავრცელეს:

„ბათუმში ბოლო პერიოდის განმავლობაში გახშირდა პარკებსა თუ სკვერებში მუნიციპალური ინფრასტრუქტურის დაზიანების ფაქტები. დღეს, ცენტრალურ პარკში მიზანმიმართულად დაამტვრიეს ახლად განთავსებული სკამები. ასევე ხშირია სანაგვე ურნების დაწვისა და საბავშვო ატრაქციონების დაზიანების შემთხვევები“.

მერია მოსახლეობას მოუწოდებს, რომ გამოიჩინონ მაღალი მოქალაქეობრივი პასუხისმგებლობა და მაქსიმალურად გაუფრთხილდნენ ქალაქის ინფრასტრუქტურას.

__

ცენტრალური პარკის განახლებულ ინფრასტრუქტურასთან დაკავშირებით საზოგადოებას არაერთგვაროვანი პოზიცია აქვს. ყველაზე მეტი კრიტიკა ქვის სკამებმა გამოიწვია, რადგან საზოგადოების ნაწილი მიიჩნევს, რომ დასასვენებელ პარკში ქვის სკამები არაკომფორტულია.

ახალი ქვის სკამების შესაძენად ბათუმის ბიუჯეტიდან 1 მილიონამდე ლარი დაიხარჯა. ქვის სკამების გარდა პარკში დამონტაჟებულია ქვის მაგიდებიც. ადრე აქ ხის ინვენტარი იყო განთავსებული, ახლა კი ხე ქვით ჩაანაცვლეს.

___

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com