უკრაინის საზღვრებთან ბირთვული გამოცდის ჩატარებით ვლადიმერ პუტინი აპირებს, აჩვენოს მსოფლიოს, რომ მზადაა მასობრივი განადგურების იარაღის გამოსაყენებლად – წერს ბრიტანული The Times-ი.
გამოცემა აღნიშნავს, რომ ბირთვული გამოცდის საფრთხის შესახებ NATO-მ თავისი წევრები უკვე გააფრთხილა.
„კრემლი გზავნის სიგნალებს, რომ მზადაა მნიშვნელოვანი ესკალაციისთვის, რადგან რუსეთი ბრძოლის ველზე პოზიციებს კარგავს. შიში, რომ პუტინმა მართლაც შეიძლება მიმართოს ამგვარ ტაქტიკას განსაკუთრებით გაძლიერდა გუშინ, როდესაც გაჩნდა ინფორმაცია, რომ უკრაინისკენ დაიძრა მატარებელი საიდუმლო ბირთვული განყოფილებით,“ – წერს გამოცემა.
როგორც პოლონელი სამხედრო ანალიტიკოსი კონრად მუზიკა ამტკიცებს, სამხედრო ტექნიკით დატვირთული მატარებელი, რომელიც რუსეთის ცენტრალურ ნაწილში შენიშნეს, რუსეთის თავდაცვის სამინისტროს მე-12 მთავარ სამმართველოსთანაა დაკავშირებული. სწორედ ეს სამმართველოა „პასუხისმგებელი ბირთვულ მასალებზე, მათ შენახვაზე, ტექნიკურ მომსახურებასა და ტრანსპორტირებაზე.“
გამოცემას ერთ-ერთი თავდაცვის მაღალჩინოსანი ეუბნება, რომ თუ პუტინი ბირთვულ გამოცდას გადაწყვეტს, დიდი ალბათობით, ის ამას შავ ზღვაში გააკეთებს. ექსპერტები მიიჩნევენ, რომ ამგვარი დემონსტრაცია უკრაინის საზღვართან რუსეთისთვისაც უდიდეს რისკს წარმოადგენს, რადგან შესაძლოა, „შემთხვევით საზღვართან მდებარე რომელიმე რუსულ ქალაქს მოარტყან, მაგალითად, ბელგოროდს.“
ბირთვული მატარებელი, რომელიც უკრაინის საზღვრისკენ მიემართება/ფოტო გაავრცელა ტელეგრამარხმა Rybar-მა
ვლადიმერ პუტინმა ბირთვული იარაღის გამოყენებაზე ნაწილობრივი მობილიზაციის გამოცხადების შემდეგ, 21 სექტემბერს ილაპარაკა. მან რუსეთის მიმართ დასავლეთის აგრესიულ პოლიტიკას გაუსვა ხაზი, დასავლეთი ბირთვულ შანტაჟში დაადანაშაულა და გაფრთხილებაც გაუგზავნა – „რუსეთს NATO-ზე თანამედროვე იარაღიც აქვს“ და „საკუთარი ქვეყნის დასაცავად ყველა საშუალებას გამოიყენებს“.
„ჩვენი ქვეყნის ტერიტორიული მთლიანობის, ჩვენი ქვეყნისა და ჩვენი ხალხის დასაცავად, რასაკვირველია, ჩვენს ხელთ არსებულ ყველა შესაძლებლობას გამოვიყენებთ. ეს ბლეფი არაა,“ – თქვა რუსეთის პრეზიდენტმა და დასძინა. – „მათ, ვინც ბირთვული საფრთხით ჩვენს დაშანტაჟებას ცდილობს, უნდა იცოდნენ, რომ ქარების ვარდი შეიძლება მათკენაც შებრუნდეს.“
