ნეტგაზეთი • RU
putini

„ეს ბლეფი არაა“ – პუტინი დასავლეთს ბირთვული იარაღით ემუქრება

დღევანდელ გამოსვლაში, ნაწილობრივი მობილიზაციის გამოცხადების შემდეგ, პუტინმა რუსეთის მიმართ დასავლეთის აგრესიულ პოლიტიკაზე ილაპარაკა, დასავლეთი ბირთვულ შანტაჟში დაადანაშაულა და გაფრთხილება გაუგზავნა – „რუსეთს NATO-ზე თანამედროვე იარაღიც აქვს“ და „საკუთარი ქვეყნის დასაცავად ყველა საშუალებას გამოიყენებს“.

„თავის აგრესიულ ანტირუსულ პოლიტიკაში, დასავლეთი უკვე ყველა ზღვარს გადავიდა. ჩვენ მუდმივად გვესმის მუქარები ჩვენი ქვეყნისა და ხალხის მისამართით. ზოგიერთი უპასუხისმგებლო პოლიტიკოსი დასავლეთში, არამხოლოდ ლაპარაკობს იმაზე, რომ უკრაინას უნდა მიაწოდონ შორსმოქმედი შეიარაღება, სისტემები, რომლებიც საშუალებას მისცემენ დაარტყან ყირიმს, რუსეთის სხვა რეგიონებს – ასეთი ტერორისტული დარტყმები უკვე ხორციელდება ბელგოროდისა და კურსკის ოლქების სასაზღვრო დასახლებულ პუნქტებზე,“ – განაცხადა პუტინმა.

მისი მტკიცებით, NATO რუსეთის სამხრეთში დაზვერვას აწარმოებს, „ვაშინგტონში, ლონდონსა და ბრიუსელში კი პირდაპირ აქეზებენ კიევს, საბრძოლო მოქმედებები რუსეთის ტერიტორიაზე გადაიტანოს“, რადგან „რუსეთი ყველა საშუალებით უნდა განადგურდეს“  და „ყოველგვარი სუვერენიტეტი უნდა დაკარგოს“.

„ბირთვული შანტაჟიც დაიწყეს. ლაპარაკია არამხოლოდ ზაპოროჟიეს ატომური ელექტროსადგურისთვის ცეცხლის გახსნაზე, რაც დასავლეთის მიერაა წაქეზებული და რაც ატომური კატასტროფის საფრთხეს ქმნის, არამედ NATO-ს ქვეყნების მაღალჩინოსნების განცხადებებზე, რომ რუსეთის წინააღმდეგ მასობრივი განადგურების ბირთვული იარაღის გამოყენება შესაძლებელი და დასაშვებია.

მათ, ვინც რუსეთთან მიმართებაში ასეთი განცხადებების უფლებას აძლევს თავს, მინდა შევახსენო, რომ ჩვენი ქვეყანაც ფლობს განადგურების სხვადასხვა საშუალებას, ცალკეულ კომპონენტებში კი – უფრო თანამედროვესაც კი, ვიდრე NATO-ს ქვეყნები.

ჩვენი ქვეყნის ტერიტორიულ მთლიანობის, ჩვენი ქვეყნისა და ჩვენი ხალხის დასაცავად, რასაკვირველია, ჩვენს ხელთ არსებულ ყველა შესაძლებლობას გამოვიყენებთ. ეს ბლეფი არაა,“ – თქვა რუსეთის პრეზიდენტმა და დასძინა. –  „ხოლო მათ, ვინც ბირთვული საფრთხით ჩვენს დაშანტაჟებას ცდილობს, უნდა იცოდნენ, რომ ქარის ვარდი შეიძლება მათკენაც შებრუნდეს.“

პუტინის თქმით, „ისტორიული ტრადიციის თანახმად“ რუსეთი ყოველთვის „შეაჩერებს მათ, ვინც მსოფლიო მასშტაბის სახელმწიფოს ებრძვის“, ვინც მას „დანაწევრებით“ ემუქრება და „ახლა რუსეთი სწორედ ამას აკეთებს.“

რუსეთის პრეზიდენტმა დღეს გამოაცხადა ნაწილობრივი სამხედრო მობილიზაცია, რომელიც დღეიდან დაიწყება. გაწვევა ეხება მხოლოდ იმ მოქალაქეებს, ვინც რეზერვში იმყოფება, ვისაც უმსახურია შეიარაღებულ ძალებში და აქვს კონკრეტული სამხედრო სპეციალობა და შესაბამისი გამოცდილება.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.