Batumelebi

შპს „გონიო 2020“ უკვე დამტკიცებულ განაშენიანების დეტალურ გეგმაში ცვლილებას ითხოვს.

ამ ცვლილების მიხედვით, კომპანიას კ2-ის გაზრდისთვის დამატებითი, მაკომპენსირებელი ვალდებულებების აღება აღარ დასჭირდება, რადგან, მერიის განმარტებით, პროექტი კ2-ის გაზრდას აღარ ითვალისწინებს.

ამ წინადადებაზე ბათუმის საკრებულომ 2025 წლის პირველ დეკემბერს სხდომაზე უნდა იმსჯელოს.

მოქმედი შეთანხმებით, განაშენიანების ინტენსივობის კოეფიციენტის [კ2] გადამეტების, მაკომპენსირებელი ღონისძიების სახით კომპანიას მუნიციპალიტეტისთვის უნდა გადაეცა საცხოვრებელი აპარტამენტები, კ2 კოეფიციენტის გაზრდით ნამატი ფართობის 10 პროცენტის ოდენობით ან ამ აპარტამენტების [უკვე თეთრი კარკასების ] გაყიდვის შემდეგ ღირებულების 4%  ბიუჯეტში უნდა შეეტანა.

როგორც ჩანს, კომპანიამ გადაიფიქრა და კოეფიციენტის გაზრდას აღარ ითხოვს, შესაბამისად შეუძლია უარი თქვას მაკომპენსირებელ ღონისძიებაზეც.

შპს „გონიო 2020“  გონიოში, ანდრია პირველწოდებულის I ჩიხში, ზღვის სანაპიროსთან, კომპლექსის მშენებლობას გეგმავს.

ის, რომ კომპანია კოეფიციენტის გადამეტებას არ ითხოვს, არ ნიშნავს, რომ პროექტი მასშტაბური არ არის. 12 799 კვ. მეტრ ტერიტორიაზე 3 ბლოკის მშენებლობაა დაგეგმილი, შენობაში უნდა განთავსდეს სასტუმრო აპარტამენტები და კომერციული ობიექტები.

შპს „გონიო 2020“ „ალიანსის“ დამფუძნებლის შვილის, თემურ ბიწაძის კომპანიაა. თემურ ბიწაძე „ოცნების“ მხარდამჭერი და შემწირველია, ისევე როგორც „ალიანს ჯგუფში“ შემავალი კომპანიების სხვა დირექტორები და მენეჯერები.

სასტუმრო-აპარტამენტების პროექტი ამავე კომპანიის კიდევ ერთი მშენებარე პროექტის, ე.წ. ელიტური ვილების მომიჯნავედ არის დაგეგმილი, რომელიც გონიოში, ზღვისპირას „დაბალ განაშენიანებას“ და „სასტუმრო ვილების“ მშენებლობას ითვალისწინებს.

ე.წ. „სასტუმრო ელიტური ვილების პროექტი“, რომელიც ჯერ მერიას შემდეგ კი საკრებულოს შპს „გონიო 2020“-მა წარუდგინა, სანაპიროზე ორსართულიანი, მსუბუქი კონსტრუქციის მქონე სახლებით გაშენებული უბნის მშენებლობას ითვალისწინებდა.

მოგვიანებით გაირკვა, რომ სასტუმრო-ელიტური ვილების პროექტი „ოცნების“ მხარდამჭერი ინვესტორის და მისი კომპანიების დირექტორების, კიდევ რამდენიმე ბიზნესმენის და სხვების სახლების პროექტი იყო. სწორედ ამ ვილების გაგრძელებაზე, ზღვიდან 240 მეტრში სურს კომპანიას სასტუმრო აპარტამენტების მშენებლობა.

განაშენიანების დეტალური გეგმაში, რომელიც მერიაშია წარდგენილი, დიდი ადგილი ეთმობა პროექტის ავტოსადგომების სათანადო ინფრასტრუქტურის, შიდა გზების და გამწვანების მოწყობის საკითხებს. განაშენიანების დეტალური გეგმის მიხედვით პროექტის ავტორები სასტუმრო აპარტამენტების მშენებლობის პირობებში აუცილებლობად მიიჩნევენ ცალკე პარკინგის მოწყობას:

„საქართველოში ავტომანქანების რაოდენობის მატების ტენდენციის შესაბამისად, სასტუმრო აპარტამენტების მშენებლობის პირობებში, აუცილებელია მობინადრე ავტომფლობელთათვის გათვალისწინებული იქნეს საპარგინგე სივრცის მოწყობა, რადგან წინააღმდეგ შემთხვევაში შესაძლოა გრძელვადიან პერსპექტივაში, ავტომანქანების სიმრავლემ საკვლევი ობიექტის მიმდებარე ქუჩებზე გამოიწვიოს ავტომანქანების ნაკადების მოძრაობის შეფერხება.

აქედან გამომდინარე აუცილებლობას წარმოადგენს საკვლევ ობიექტს გააჩნდეს ინდივიდუალური მიწისქვეშა და/ან მიწისზედა ავტოპარკი. პროექტით გათვალისწინებულია 190 ავტოსადგომი, მიწისზედა და მიწისქვეშა, მათ შორის მექანიზირებული, ორიარუსიანი“.

მიწის ნაკვეთის განაშენიანების დეტალურ გეგმაში არამხოლოდ ავტომანქანით გადაადგილების, არამედ ქვეითად გადაადგილების საკითხიც არის განხილული,

„… საკვლევი ობიექტის შესასვლელ არეალში ქვეითად მოსიარულეთა უსაფრთხოების მიზნით მოეწყოს შესაბამისი საგზაო ინფრასტრუქტურა, საჭიროა მკაცრი საგზაო რეგულაციების დაწესება, რომელსაც ითვალისწინებს საქართველოს კანონი „საგზაო მოძრაობის შესახებ“.  კერძოდ, ობიექტის შესასვლელთან, დასამონტაჟებელია შესაბამისი საგზაო გამაფრთხილებელი და მიმთითებელი ნიშნები“ – ვკითხულობთ განაშენიანების გეგმაში.

„იგლ ჰილსის“ პროექტი ხორციელდება ქართული კანონმდებლობის ქვეშ, საქართველოში. თუ წარმოიშვა დავა ორ მხარეს შორის – საქართველოს სახელმწიფოსა და კომპანია „იგლ ჰილსს“ შორის, ამ შემთხვევაში მოქმედებს ბრიტანული სამართალი. კონკრეტულად ციურიხის არბიტრაჟის მიერ განიხილება შესაძლო ნებისმიერი დავა. ეს არის გათვალისწინებული ამ ხელშეკრულებით“, – თქვა „ქართული ოცნების“ პრემიერ-მინისტრმა ირაკლი კობახიძემ პარლამენტში, ინტერპელაციის წესით მოსმენისას 26 ნოემბერს.

ირაკლი კობახიძე, ერთი მხრივ, დასავლეთს მტრად მიიჩნევს, დიფსთეიტს ებრძვის, მეორე მხრივ კი, როდესაც ხელისუფლებისთვის ყველაზე მნიშვნელოვან პროექტზე საუბრობს, ამბობს, რომ ყველა შესაძლო სადავო საკითხი დასავლეთში გადაწყდება.

ბოლო პერიოდში გვაქვს მაგალითები, რომ „ქართული ოცნების“ მაღალჩინოსნები თანამდებობაზე ყოფნის დროს აგინებენ დასავლეთს, ევროკავშირს, განსაკუთრებით ერჩიან ევროკავშირის წევრ ქვეყანას – გერმანიას, თუმცა როცა მათ ცხოვრებაში კრიზისი დგება და ქვეყნიდან წასვლა უწევთ სხვადასხვა მიზეზით – თავშესაფრისთვის, მკურნალობისთვის, სწავლისთვის, მაინც დასავლეთის ქვეყნებს ირჩევენ.

„ბათუმელები“ ორ პოლიტიკოსს ესაუბრა აჭარაში – აზა გაბუნიას, პარტია „თავისუფლების მოედნის“ რეგიონულ ხელმძღვანელს და თემურ გორგაძეს – „გირჩი – მეტი თავისუფლების“ რეგიონულ ხელმძღვანელსა და პოლიტსაბჭოს წევრს და მათ ჰკითხა:

როგორ ხდება, რომ დიფსთეიტთან მებრძოლები თავის გადასარჩენად „დიფსთეიტს“ აფარებენ თავს?

„სანამ „ქართული ოცნების“ მაღალჩინოსნები არიან თანამდებობებზე და სჭირდებათ ამომრჩევლის მობილიზება, მათი რიტორიკა არის მტრების ძებნა და „დიფსთეიტზე“ საუბარი, რომელიც მათი მტკიცებით არის ევროპაში, დასავლეთში…

ამით ისინი, ერთი მხრივ, აზიანებენ ქვეყნის ევროპულ მომავალს, ქმნიან მტრის ხატს, აზიანებენ პოლიტიკურ და დიპლომატიურ ურთიერთობებს ევროპასთან.

მაგრამ, მეორე მხრივ, რა ხდება რეალურად? – როდესაც „ქართული ოცნების“ წარმომადგენლებს სისტემა ზურგს აქცევს, ან როდესაც პირად უსაფრთხოებას ექმნება საფრთხე და ამის ნათელი მაგალითი აჭარის მთავრობის ყოფილი თავმჯდომარე, თორნიკე რიჟვაძეა, ისინი თავს აფარებენ ზუსტად იმ ქვეყნებს, იმ ევროპულ სახელმწიფოებს, რომლებსაც მანამდე „დიფსთეიტს“ უწოდებდნენ.

ისინი გარბიან გერმანიაში, როგორც გაიქცა თორნიკე რიჟვაძე და არა აღმოსავლეთში, რომელსაც მოიაზრებენ თავიანთ პარტნიორებად“, – ამბობს აზა გაბუნია.

ის ამბობს, რომ „ქართული ოცნების“ მაღალჩინოსანთა ქცევა არის პოლიტიკური ცინიზმი.

„აქ ჩანს სწორედ ის, რომ მათი ანტიევროპული რიტორიკა იყო მხოლოდ ფარისევლობა, ძალაუფლების შენარჩუნების იარაღი, რუსეთის დაკვეთა და არა რეალური რწმენა, რომ ნამდვილად ევროპა არის „დიფსთეიტი“ ან იქ ვინმე ჩვენი მტერია.

ასევე ჩანს კანონის და სისტემის უნდობლობა კრიზისის მომენტში. ისევ აჭარის მთავრობის ყოფილი თავმჯდომარის მაგალითი რომ ავიღოთ, სად წავიდა როდესაც პირადად მისი და მისი ოჯახის უსაფრთხოების გარანტიები დადგა საფრთხის ქვეშ? ვის ენდო?

თორნიკე რიჟვაძე არ ენდო იმ სისტემას, რომელიც თვითონ შექმნა და მთელი შვიდი წელი კვება „ქართული ოცნების“ რიტორიკა. იგი თავის ამომრჩეველს უმტკიცებდა, რომ „დიფსთეიტი“ და ევროპა არის მტერი, რომ ისინი გვებრძვიან და ჩვენი სუვერენიტეტის გაქრობა უნდათ, ქართველობის წართმევა უნდათ. დაეხმარა „ქართულ ოცნებას“ ამ სისტემის შენებაში… მაგრამ რომ გაუჭირდა, სად წავიდა? წავიდა ევროპაში. რატომ? – იმიტომ, რომ გადასარევად იცის, ევროპაში არის სამართლის და კანონის უზენაესობა და უსაფრთხოების მაღალი ხარისხი,“- ამბობს აზა გაბუნია.

აზა გაბუნია ამბობს, რომ „ოცნების“ წარმომადგენლები მოქმედებენ ორმაგი სტანდარტით. ევროპა საკმარისად კარგია მათთვის, მათი ჯანმრთელობის უსაფრთხოებისთვის, მათი ოჯახებისთვის, განათლების მიღებისთვის, თავშესაფრისთვის… მაგრამ არ არის საკმარისად კარგი ქართველი ხალხისთვის.

„რა არის ეს? ეს არის „ქართული ოცნების“ მმართველობის სახე: ორმაგი თამაში და საკუთარი რიტორიკის ღალატი, როცა პირადი ინტერესების და უსაფრთხოება დგება დღის წესრიგში. აი, ამის ილუსტრაციას ახდენს „ქართული ოცნება“ ყოველთვის, ყველა ჯერზე, როცა მათი მაღალჩინოსნები, სხვადასხვა თანამდებობაზე მყოფი ადამიანები ტოვებენ საქართველოს, ერთი-მეორეს მიყოლებით.

ეს ლუსტრაციაა იმისა, თუ როგორ იქცევიან „ქართული ოცნების“ მაღალჩინოსნები, სინამდვილეში რას ფიქრობენ და რას აჯერებენ თავიანთ ამომრჩეველს. თავიანთ ამომრჩეველს აჯერებენ იმას, რომ ევროპა არის ჩვენი მტერი… ევროპაში ზის „დიფსთეიტი“, ევროპა არ გვჭირდება და გვჭირდება სუვერენიტეტი. სინამდვილეში, სუვერენიტეტი ნიშნავს იმას, როდესაც ხარ ძლიერი, როდესაც გყავს ევროპული პარტნიორები, გაქვს უსაფრთხოების სტანდარტები ქვეყანაში და გაქვს კანონის უზენაესობა,“ – ამბობს აზა გაბუნია.

თემურ გორგაძე, „გირჩი – მეტი თავისუფლებას“ რეგიონული ხელმძღვანელი ამბობს, რომ დიქტატურას სჭირდება მტრის სახე და ხატი.

„დიქტატურას ახასიათებს, სჭირდება, რომ ადამიანები რაღაცის გავლენის ქვეშ მოაქციოს, დარაზმოს, ამას სჭირდება საერთო მტრის არსებობა. ახლა გააჩინეს ეს „დიფსთეიტი“. როგორც მათ მესიჯბოქსში ჩანს, მარტო დასავლეთი არ არის, რაღაც ან ვიღაცა არის, რომელიც დასავლეთსაც მართავს, აღმოსავლეთსაც, დედამიწასაც, პლანეტასაც, ოღონდ აი, კობახიძეს ვერ ერევა მარტო.

ვინც დასავლეთში გაიქცა, ვინც მომავალში გაიქცევა „ქართული ოცნებიდან“, ყველამ იცის, რომ არანაირი „დიფსთეიტი“ არ არსებობს, ყველამ იცის, რომ დასავლეთი კარგია. უბრალოდ დიქტატურის დასამყარებლად და შემდეგ შესანარჩუნებლად სჭირდებათ საერთო მტრის ხატი.

რიჟვაძემ ან სხვებმა განა არ იცოდნენ, დასავლეთი რომ კარგია? მაგრამ მაშინ ისე სჭირდებოდათ, ძალაუფლების შენარჩუნებისთვის ეს მესიჯბოქსი იყო დასალაგებელი და ასე დაალაგეს.

ეს ის ხალხია, ვინც დასავლეთში მიიღო განათლება, დასავლეთში გააჩინეს შვილები, რომ იქაური მოქალაქეობა ჰქონდეთ, დასავლეთში აქვთ ბიზნესები ან ბიზნესპარტნიორებს ეძებენ დასავლეთში.

რისი თქმა მინდა – ყველამ იცის, რომ დასავლეთი კარგია. ჯანდაცვა, განათლება და უსაფრთხოება რომ გვერდით გადავდოთ, ლამის მანიკიურზე იქ დადიან. ამ ხალხისთვის სარგებლის მიღება უფრო მნიშვნელოვანია, ვიდრე სამშობლო,“ – ამბობს თემურ გორგაძე.

რა შეიძლება ისწავლოს „ქართული ოცნების“ ამომრჩეველმა ყოფილი მაღალჩინოსნების თავსდატრიალებული ამბებით? 

აზა გაბუნია ამბობს, რომ ეს მარტივი მაგალითებია საქართველოს მოქალაქეებისთვის:

„ძალაუფლების შესანარჩუნებლად, ამომრჩევლის გულის მოსაგებად ამბობს „ოცნება“, რომ დასავლეთი მტერია, მაგრამ, როგორც კი კრიზისი უდგება, მირბის ევროპაში.

ეს უნდა იყოს „ოცნების“ ამომრჩევლისთვის და, ზოგადად, მოქალაქეებისთვის, მაგალითი. უნდა მიხვდნენ, რომ მთელი ეს დრო ატყუებდა „ოცნება“. ტყუილზე აშენებდა „ქართული ოცნება“ თავის რეჟიმს, თავის სისტემას.

უნდა დაუსვას „ოცნებას“ კითხვა ამომრჩეველმა – თუ დასავლეთი, ევროპა, ამერიკა მტერია, მაშინ რატომ გარბიხართ დასავლეთში, როდესაც გიჭირთ? რატომ სწავლობენ თქვენი შვილები ევროპაში? რატომ მიდიხართ და რატომ აჩენთ შვილებს ევროპის ქვეყნებში? რატომ მიდიხართ სამკურნალოდ, მაგალითად, ევროპის ქვეყნებში და რატომ არ რჩებით საქართველოში? რატომ უკრძალავთ ქართველ ხალხს, რომ ევროპული სიკეთეები მიიღონ და ევროპულ გზაზე იარონ?

ჩვენთვის ნათელია ამ კითხვებზე პასუხი – იმიტომ, რომ ევროპაში არის კარგი განათლება, კარგი ჯანდაცვა და უსაფრთხოება“, –  ამბობს აზა გაბუნია.

თემურ გორგაძის თქმით, კი „ქართულ ოცნებას“ აღარ ჰყავს კლასიკური გაგებით ამომრჩეველი – ანუ ხალხი, ვინც გააზრებულად, საარჩევნო პროგრამაზე დაყრდნობით აძლევს ხმას პარტიას.

„ჩემი გადმოსახედიდან ამომრჩეველი არის ის ადამიანი, ვისაც მოსწონს კონკრეტული პარტიის ხედვა ან ხედვების დიდი ნაწილი, პროგრამა და ამის მიხედვით აძლევს ხმას. მე არ ვიცი არც ერთი ქოცი, რომელმაც იცის რა ხედვა აქვს რომელიმე კონკრეტულ საკითხზე „ქართულ ოცნებას“.

ამიტომ, ჩემი ტერმინოლოგიით, „ქართულ ოცნებას“ ამომრჩეველი არ ჰყავს – მე ჯერ არ შემხვედრია ადამიანი, ვინც იმიტომ მისცა „ქართულ ოცნებას“ ხმა, რომ მოსწონდა მისი განათლების რეფორმა, ეკონომიკური ხედვა ან საერთოდ რამე პროგრამა.

„ქართული ოცნება“ დგას სამ ძირითად საყრდენზე: პროპაგანდაზე, სადაც უნდა ვაღიაროთ, რომ გვიგებენ. მეორე საყრდენი არის სოფლებში არსებული აქტივი, რომლის მხარდაჭერა დგას სარგებელზე: ზოგი აგიტატორია, ზოგი კოორდინატორი, მიბმული ჰყავს. მესამე საყრდენია ძალადობა, შიში.

ხალხის ერთი ნაწილი გამოთაყვანებულია და სჯერა, „ქართული ოცნება“ რომ არა „კაცებს გაათხოვებენ“. ამიტომ არ ვფიქრობ, რომ ეს ხალხი რამე დასკვნას გამოიტანს ყოფილი მაღალჩინოსნების მაგალითებით. როგორც კი უწყებ საუბარს, ისეა პროპაგანდის ზეგავლენის ქვეშ მოქცეული, ავტომატურად ავი ხარ, არ გენდობა. „ოცნების“ პროპაგანდა, სამწუხაროდ, ძალიან კარგად მუშაობს,“ – ამბობს თემურ გორგაძე.

ბათუმის მერია ითხოვს ცვლილებას დადგენილებაში, რომელიც მერის სათათბირო საბჭოს საქმიანობას განსაზღვრავს. ეს დადგენილება [#15] სამშენებლო კოდექსის იმ ნაწილს ეყრდნობა, რომელიც ბათუმის ტერიტორიაზე სივრცის დაგეგმარებასა და სამშენებლო საქმიანობას არეგულირებს.

სათათბირო საბჭო ავარიული სახლების პროგრამის ფარგლებში მერიაში შესულ განცხადებებს განიხილავს და მერს რეკომენდაციას აძლევს – აკმაყოფილებს თუ არა განაცხადი [პროექტი] პროგრამის პირობებს.

№15 დადგენილება არეგულირებს ავარიული შენობების ჩანაცვლების, დაუმთავრებელი მშენებლობების დასრულების და კოოპერატიული ბინათმშენებლობით დაზარალებულთა დაკმაყოფილების საკითხებს. გარდა ამისა, განიხილავს სამშენებლო კოდექსით გათვალისწინებული საკომპენსაციო ღონისძიების გამოყენების პირობებს, განსაკუთრებული სახელმწიფოებრივი ან მუნიციპალური მნიშვნელობის პროექტების შემთხვევაში.

მერიის ქალაქგანვითარებისა და ურბანული პოლიტიკის სამსახურის განმარტებით, განაცხადების განხილვის ეტაპზე გამოიკვეთა რამდენიმე პრობლემური საკითხი, რომლებსაც სამართლებრივი დაკონკრეტება სჭირდება, მათ შორის არის წარმოსადგენ დოკუმენტთა ნუსხის დაზუსტება. აზუსტებენ ხელშემწყობი ღონისძიებების გამოყენების წინაპირობებსაც.

პროექტის მიხედვით, იცვლება და ზუსტდება ავარიული სახლის და მასზე დამაგრებული მიწის ნაკვეთის ცნება და ხელშემწყობი ღონისძიების გამოყენების პირობები.

მაგალითად,  შენობა-ნაგებობის მდგომარეობასთან დაკავშირებული განსაზღვრება „ავარიულობის ხარისხი“ – იცვლება „ავარიულობის დაზიანების ხარისხით“, რადგან სამხარაულის ექსპერტიზის ეროვნული ბიუროს ან სხვა აკრედიტებული ექსპერტიზის გაცემულ დასკვნებში უპირატესად გამოიყენება ტერმინი „დაზიანების ხარისხი“.

ზუსტდება ბარაკებთან დაკავშირებული ჩანაწერი: „იმ შემთხვევაში, თუ ბარაკი დააკმაყოფილებს მრავალბინიანი ავარიული სახლის კრიტერიუმს, ისედაც ხვდება პროგრამაში და მხოლოდ იმის გამო, რომ ბარაკია, მიზანშეწონილია ცალკე არ იყოს გამოყოფილი.“

საბანკო გარანტიის წარდგენის ვალდებულების ნაცვლად შესაძლებელი გახდება იმავე ღირებულების, ავარიული სახლის ადგილას შეთანხმებული სამშენებლო პროექტის სრული საინვესტიციო ღირებულების არანაკლებ 20% ოდენობის, ან სხვა უძრავი ქონების, ოღონდ არა მშენებარე ობიექტში, მერიის სასარგებლოდ იპოთეკით დატვირთვა. მათ შორის, შესაძლებელია ეს იყოს იპოთეკით დატვირთული უძრავი ქონება, მერიის თანხმობის გარეშე გასხვისების აკრძალვის პირობით.

• დადგენილი მაჩვენებლების გადამეტება

დადგენილებას ემატება პუნქტები, რომლებიც ხელშემწყობი ღონისძიებების – განაშენიანების მაქსიმალური კოეფიციენტის ზღვრული მაჩვენებლების გადამეტების, გამწვანების რეგულაციების, ავტოსადგომების რაოდენობასთან დაკავშირებული რეგულაციების კანონმდებლობით დადგენილი მოთხოვნებისგან განსხვავებული პირობებით დამტკიცების დასაშვებობას ითვალისწინებს, იმ შემთხვევაში თუ ავარიული სახლი შედგება 10 და მეტი დამოუკიდებელი საკუთრების საგნისაგან.

ცვლილების მიხედვით, დაინტერესებულმა პირმა მერიას უნდა წარუდგინოს დამატებითი ინფორმაცია: მომიჯნავე შენობა-ნაგებობებზე ზეგავლენის კვლევის დოკუმენტი, გაცემული აკრედიტებული ინსპექტირების ორგანოს მიერ.

ასევე სატრანსპორტო მოძრაობის ორგანიზების და პარკირების სქემა.

დაინტერესებულმა პირმა მერიას უნდა წარუდგინოს პროექტის განხორციელების ფინანსური დათვლა [ე.წ. კალკულაცია], მესაკუთრის ნოტარიული თანხმობის დოკუმენტი, დეველოპერის მიერ ავარიულ საცხოვრებელ სახლში საკუთრების ათვისების სანაცვლოდ ნაკისრი ვალდებულებების ჩვენებით, მესაკუთრეებთან გაფორმებული ნოტარიული ან  საჯარო რეესტრში რეგისტრირებული ხელშეკრულებები, ავარიული სახლის ადგილას ახალი ობიექტის მშენებლობისა და ექსპლუატაციაში შეყვანისათვის საჭირო სახარჯთაღრიცხვო დოკუმენტაციის და სხვა საჭირო დოკუმენტების დართვით.

ცვლილების მიხედვით, დაუშვებელია ავარიული სახლების ჩანაცვლების საფუძვლით ერთდროულად ავარიული სახლის ადგილას და სხვა ტერიტორიაზე ამ წესით დადგენილი შეღავათების გამოყენება, გარდა იმ შემთხვევისა, როდესაც ხელშემწყობი ღონისძიების გამოყენება ხდება ერთდროულად ავარიულ სახლზე დამაგრებულ მიწის ნაკვეთზე და ამ მიწის ნაკვეთთან გასაერთიანებელ მიწის ნაკვეთზე. [როცა მათ ავარიული სახლის ჩანაცვლებისთვის აერთიანებენ].

თუ ერთმანეთს ემიჯნება ორი ან მეტი ავარიული სახლი, ავარიული სახლების ადგილად მიიჩნევა ამ სახლებზე დამაგრებული მიწის ნაკვეთები და ამ მიწის ნაკვეთთან გასაერთიანებელი მიწის ნაკვეთი/ნაკვეთები, რომელთა კვადრატულობა ჯამში არ უნდა აღემატებოდეს ავარიულ სახლებზე დამაგრებული მიწის ნაკვეთების ჯამის ერთ მეორედს. ეს ნაკვეთები, ავარიული სახლის ჩანაცვლების მიზნით, ერთიანი პროექტის განხორციელებისთვის უნდა გაერთიანდეს.

ბათუმის მერიამ შესაბამისი ცვლილების პროექტი საკრებულოში უკვე გადააგზავნა. მის დამტკიცებაზე საკრებულომ პირველ დეკემბერს სხდომაზე უნდა იმსჯელოს. „ბათუმელებს“ არაერთმა მშენებელმა დაუდასტურა, რომ მოსალოდნელი ცვლილებების შესახებ სამშენებლო კომპანიების მფლობელებმა უკვე იცოდნენ და ამისთვის თადარიგის დაჭერასაც კი ცდილობდნენ: „ყველა ცდილობდა მოესწრო ნებართვის მიღება არსებული წესით, რადგან რთულდება, რაც არავის უნდა“.

დადგენილების ცვლილების პროექტში წერია, რომ „ამ დადგენილების მოქმედება არ ვრცელდება იმ ადმინისტრაციულ წარმობებზე, რომელზედაც საბჭოს მიერ მიღებულია დადებითი გადაწყვეტილება.“

გასულ წელს ნებართვებზე განსაკუთრებული მოთხოვნა რომ იყო ეს ციფრებშიც გამოჩნდა, ბათუმის 2025 წლის ბიუჯეტში, 10 თვეში, სამშენებლო ნებართვების მოსაკრებელმა 5 მილიონს გადააჭარბა. ნებართვების გაცემიდან. ერთ წელში, აქამდე, ყველაზე მეტი ბიუჯეტში 3 მილიონამდე ლარია შესული.

ბათუმის მერიის ცნობით, გიორგი ცაბაძის ქუჩაზე (ყოფილი გოგოლის ქუჩა) საგზაო ინფრასტრუქტურის სარეაბილიტაციო სამუშაოების გამო, 27 ნოემბრიდან 20 დეკემბრის ჩათვლით, სატრანსპორტო მოძრაობა შეიზღუდება სევერიანე აჭარელის ქუჩიდან იოსებ ნონეშვილის ქუჩამდე მონაკვეთში.

შეზღუდვის პერიოდში შეიცვლება მუნიციპალური ტრანსპორტის მოძრაობის სქემა:

• №1 სამარშრუტო ხაზი – ბარათაშვილის ქუჩა, ჭავჭავაძის ქუჩა, ბაქოს ქუჩა, ნონეშვილის ქუჩა, სვიშევსკის ქუჩა. უკუმიმართულება – სვიშევსკის ქუჩა, ნონეშვილის ქუჩა, ბაქოს ქუჩა, შავშეთის ქუჩა, წერეთლის ქუჩა.
• №8 სამარშრუტო ხაზი – წერეთლის ქუჩა, შავშეთის ქუჩა, ბაქოს ქუჩა, ოდისეი დიმიტრიადის ქუჩა. უკუმიმართულება – ოდისეი დიმიტრიადის ქუჩა, ბაქოს ქუჩა, ჭავჭავაძის ქუჩა.
• №15 სამარშრუტო ხაზი – ბარათაშვილის ქუჩა, ჭავჭავაძის ქუჩა, ბაქოს ქუჩა, ნონეშვილის ქუჩა, ქათამაძის ქუჩა. უკუმიმართულება იგივე.
• №19 სამარშრუტო ხაზი – წერეთლის ქუჩა, შავშეთის ქუჩა, ბაქოს ქუჩა, ოდისეი დიმიტრიადის ქუჩა. უკუმიმართულება იგივე.

„შშმ ქალთა ალიანსი“ საპროტესტო აქციაზე დაკავებული ევა შაშიაშვილის გათავისუფლების მოთხოვნით, გენერალურ პროკურატურას მიმართავს.

ტექსტში, რომელიც დღეს, 26 ნოემბერს გავრცელდა, ჩამოთვლილია ის ძირითადი მოთხოვნები, რომელთა საფუძველზეც უნდა გათავისუფლდეს პატიმრობიდან ევა შაშიაშვილი.

„ქალბატონი ევა შაშიაშვილი უკვე მეორე თვეა, რაც იმყოფება წინასწარ პატიმრობაში მიმდინარე სისხლის სამართლის საქმის ფარგლებში.

გვსურს ხაზგასმით აღვნიშნოთ, რომ ევა შაშიაშვილი არის ონკოლოგიური პაციენტი და ერთადერთი პირი, რომელიც უზრუნველყოფს შეზღუდული შესაძლებლობის მქონე შვილის მეურვეობასა და მხარდაჭერას.

სწორედ იმის გამო, რომ დედა იმყოფება წინასწარ პატიმრობაში და სხვა მზრუნველი მას არ ჰყავს, ეს პირი ,,ირიბი იძულებით“ ამჟამად მკურნალობს შესაბამის სამედიცინო დაწესებულებაში, რადგან სხვაგან წასასვლელი უბრალოდ არ აქვს და დედის არყოფნის შემთხვევაში, მისი ჯანმრთელობა და სიცოცხლე სერიოზული რისკის წინაშე დადგება.

საქართველოს კონსტიტუციის მე-14 მუხლის მე-4 პუნქტის თანახმად: „სახელმწიფო ქმნის განსაკუთრებულ პირობებს შეზღუდული შესაძლებლობის მქონე პირთა უფლებებისა და ინტერესების რეალიზებისათვის“.

ეს კონსტიტუციური ვალდებულება სხვადასხვა ღონისძიებასთან ერთად გულისხმობს სამართალდამცავი ორგანოების მხრიდან საქმის მსვლელობის პროცესში შშმ პირების ინტერესების გათვალისწინებას, მიუხედავად იმისა, შშმ პირი საქმეში არის თუ არა მხარე, მოწმე თუ რამე სხვა სტატუსის მატარებელი, სახელმწიფო მაინც ვალდებულია საქმის გამოძიების დროს გაითვალისწინოს მისი ქმედებების ყველა გვერდითი ,,ეფექტი“, რამაც შეიძლება შშმ პირი დააზიანოს პირდაპირ.

გარდა ზემოაღნიშნულისა, კონსტიტუციის მე-15 მუხლი უზრუნველყოფს ადამიანის სიცოცხლისა და ჯანმრთელობის უფლებას, ხოლო 36-ე მუხლი ოჯახის დაცვას.

გარდა კონსტიტუციისა, საქართველოს „შეზღუდული შესაძლებლობის მქონე პირთა უფლებების შესახებ“ კანონის მე-2 მუხლი უზრუნველყოფს თანაბარ უფლებებს, სიცოცხლისა და ჯანმრთელობის დაცვას, ხოლო მე-4 მუხლი აღიარებს სახელმწიფოს ვალდებულებას, უზრუნველყოს ყველა საჭირო მხარდაჭერა ოჯახური კავშირებისა და შშმ პირების ინტერესების დაცვის მიზნით.

გარდა ადგილობრივი კანონმდებლობისა, ამ საქმეზე გასათვალისწინებელია შეზღუდული შესაძლებლობის მქონე პირთა უფლებების კონვენციის (CRPD) შემდეგი მუხლები:

მუხლი 10 – სიცოცხლის უფლება: სახელმწიფო უზრუნველყოფს შეზღუდული შესაძლებლობის მქონე პირთა სიცოცხლის დაცვას;

მუხლი 19 – დამოუკიდებლად ცხოვრება და საზოგადოების ჩართულობა: სახელმწიფო უზრუნველყოფს შშმ პირებისთვის საჭირო მხარდაჭერას, მათ შორის ოჯახის წევრების დახმარებით, რათა შეძლონ დამოუკიდებლად ცხოვრება და საზოგადოებაში სრულფასოვანი მონაწილეობა;

მუხლი 23 – ოჯახის პატივისცემა და დაცვა: სახელმწიფო ხელს უწყობს შშმ პირების ოჯახის შენარჩუნებას, მათ შორის მშობლებთან და შვილებთან რეგულარულ ურთიერთობას.

ჩვენი შეფასებით, ევა შაშიაშვილის წინასწარი პატიმრობა წარმოადგენს არაპროპორციულ და უსაფუძვლო შეზღუდვას მისი ძირითადი უფლებების – სიცოცხლის, ჯანმრთელობის, ოჯახის და შეზღუდული შესაძლებლობის მქონე პირის უფლებების განხორციელებაზე“, – ნათქვამია „შშმ ქალთა ალიანსის განცხადებაში.

ამავე ტექსტში ხაზგასმულია ევა შაშიაშვილის გათავისუფლების მოთხოვნები:

• ევა შაშიაშვილი დაუყოვნებლივ გათავისუფლდეს წინასწარი პატიმრობიდან;
• სახელმწიფომ უზრუნველყოს მისი ჯანმრთელობის მდგომარეობისა და შვილის უსაფრთხოების დაცვა და საჭირო სამედიცინო-სოციალური მხარდაჭერის მიწოდება.

დამატებითი მტკიცებულებები:

ექიმის ცნობა ონკოლოგიური დაავადების შესახებ (წარდგენილია სასამართლოში და დევს საქმეში).

შვილის მკურნალობის დაწესებულების ცნობა (წარდგენილია სასამართლოში და დევს საქმეში).

ევა შაშიაშვილი 4 ოქტომბრის საპროტესტო აქციის საქმეზე 6 ოქტომბერს დააკავეს.

შინაგან საქმეთა სამინისტროს ინფორმაციით, ქვემო ქართლში ბავშვებზე ძალადობის ბრალდებით ქალი დააკავეს.

„გამოძიებით დადგინდა, რომ ბრალდებულმა 2012 და 2016 წელს დაბადებულ არასრულწლოვან შვილებზე ფიზიკურად იძალადა.

არასრულწლოვანებს ძალადობის შედეგად სხეულზე მრავლობითი დაზიანება აღენიშნებათ“ – წერს შსს.

შს სამინისტროს ინფორმაციით,  გამოძიება სისხლის სამართლის კოდექსის 126-ე პრიმა მუხლის მე-2 ნაწილის „ა“ ქვეპუნქტით მიმდინარეობს. დანაშაული 3 წლამდე ვადით თავისუფლების აღკვეთას ითვალისწინებს.

აჭარის კულტურის სამინისტროს წარმომადგენლები 2025 წლის ოქტომბერში საბერძნეთში, ქალაქ ათენში იმყოფებოდნენ.

სამინისტროს გვერდზე განთავსებული ინფორმაციის მიხედვით, ათენში, მარია კალასის საკონცერტო დარბაზში, კონცერტი გამართა ბათუმის სახელმწიფო მუსიკალურმა ცენტრმა.  „მუსიკალური ბათუმი ათენში“ – ასე ერქვა კონცერტს, რომელიც ოდისეი დიმიტრიადის ხსოვნას მიეძღვნა. პროექტი განხორციელდა აჭარის კულტურის სამინისტროს ორგანიზებით, საბერძნეთში საქართველოს საელჩოსა და ათენის კულტურის, სპორტისა და ახალგაზრდობის ორგანიზაციის, „ოპანდას“ მხარდაჭერით.

ფოტოების მიხედვით, რომლებიც სამინისტროს ფეისბუქის გვერდზე განთავსდა, ათენში იმყოფებოდნენ „ქართული ოცნების“ პარლამენტის წევრი არჩილ ბერიძე, ბათუმის საკრებულოს წევრი „ქართული ოცნებიდან“ არჩილ გოგიტიძე და ასევე, ბათუმის ვიცე-მერი, სოფო ხალვაში.

ეს საჯარო მოხელეები თავად მონაწილეობდნენ სახელმწიფოს მიერ დაფინანსებულ კონცერტში, როგორც შემსრულებლები.

„ბათუმელებმა“ აჭარის კულტურის სამინისტროს ოფიციალურად მოსთხოვა ინფორმაცია იმის შესახებ, თუ რამდენი ლარი იყო გამოყოფილი ბიუჯეტიდან ამ ღონისძიების გასამართად.

ასევე, მოვითხოვეთ იმ პირთა ზუსტი ჩამონათვალი, ვინც ამ ღონისძიების ფარგლებში ათენში იმყოფებოდა. ვინ რა სტატუსით ესწრებოდა აღნიშნულ ღონისძიებას და იყო თუ არა ბიუჯეტიდან დაფინანსებული, მაგალითად, „ოცნების“ დეპუტატების, ასევე ვიცე-მერის მგზავრობისა და სასტუმროს ხარჯები. აიღეს თუ არა რაიმე ჰონორარი კონცერტში მონაწილეობისთვის „ოცნების“ დეპუტატმა არჩილ ბერიძემ და საკრებულოს წევრმა არჩილ გოგიტიძემ?

საჯარო ინფორმაციის მოწოდებისთვის გათვალისწინებული ვადები აჭარის კულტურის სამინისტრომ დაარღვია. სამინისტროდან საჯარო ინფორმაცია არც სატელეფონო კომუნიკაციის შემდეგ მოგვაწოდეს.

რატომ მალავს ღონისძიების ხარჯებს აჭარის კულტურის სამინისტრო და რატომ არ აწვდის საზოგადოებას ამ ინფორმაციას? – უკვე მეორედ დავუსვით ეს კითხვა „ოცნების“ კულტურის მინისტრის, ელისო ბოლქვაძის პრესსამსახურს, თუმცა მათი პასუხი უცვლელია – „გასაგებია. კარგი, დაგიბრუნდებით“.

ამ ხარჯებთან დაკავშირებით, ერთადერთი დოკუმენტი რაც იძებნება, ორი ცალი სუფრის შესყიდვის საფასურია, რომლებიც ასკაციანმა დელეგაციამ საჩუქრად ჩაუტანა მასპინძლებს ათენში.

ესაა ორი ერთეული სუფრა ქართული ელემენტებით, რომელთა საერთო ღირებულება 140 ლარია.

„ოცნების“ ხელისუფლება, რომელმაც სამოქალაქო სექტორის წინააღმდეგ არაერთი რეპრესიული (რუსული) კანონი მიიღო, თითქოსდა „გამჭვირვალობის“ მიზნით, თავად არ გრძნობს ანგარიშვალდებულებას საზოგადოების წინაშე და არ ასაჯაროებს ინფორმაციას ბიუჯეტიდან გახარჯული თანხის შესახებ.

___________________

მთავარ ფოტოზე: არჩილ ბერიძე და სოფო ხალვაში, კონცერტზე ათენში.

„მტკიცებულებები უკვე გადმოგვცა პროკურატურამ, მაგრამ არანაირი მტკიცებულება არაა წარმოდგენილი, რაც დაადასტურებდა ზურაბ ჭავჭანიძის მიერ დანაშაულის ჩადენას“, – ამბობს „ბათუმელებთან“ ზურაბ ჭავჭანიძის ადვოკატი ნინო ლომინაძე.

ბათუმელი მედროშის, ზურაბ ჭავჭანიძის წინასასამართლო პროცესი თბილისის საქალაქო სასამართლოში ზეგ, 27 ნოემბერს გაიმართება. ამ პროცესზე სასამართლომ უნდა გადაწყვიტოს დაცვის და ბრალდების მხარეების მიერ წარდგენილი მტკიცებულებების დასაშვებობის და სადავოობის საკითხი, ასევე, ეს საქმე გადაეცემა თუ არა სასამართლოს არსებითად განსახილველად.

27 ნოემბრის სხდომაზე სასამართლო იმსჯელებს ზურაბ ჭავჭანიძისთვის აღკვეთის ღონისძიების შეცვლის საკითხზეც. ზურაბ ჭავჭანიძის ადვოკატი ბათუმელი მედროშის გათავისუფლებას მოითხოვს გირაოს სანაცვლოდ.

„ოცნების“ პროკურატურა ზურაბ ჭავჭანიძეს ედავება სისხლის სამართლის კოდექსის 19-222-ე მუხლის მეორე ნაწილის ა ქვეპუნქტით, რაც გულისხმობს სტრატეგიული და განსაკუთრებული მნიშვნელობის ობიექტის ხელში ჩაგდების მცდელობას და სსკ-ის 225-ე მუხლის მეორე ნაწილით, რაც გულისხმობს ჯგუფურ ძალადობაში მონაწილეობას. სასჯელის სახით ეს მუხლი 6 წლამდე თავისუფლების აღკვეთას ითვალისწინებს.

თავდაპირველად დაპატიმრებულ ზურაბ ჭავჭანიძეს პროკურორმა აჩვენა ვიდეო, როგორც დანაშაულის ჩადენის დამადასტურებელი მტკიცებულება. ამ ვიდეოში ჩანს, როგორ გადაადგილდება პრეზიდენტის ადმინისტრაციის შენობის ეზოში ბათუმელი მედროშე დროშით ხელში.

რა მტკიცებულებები გაჩნდა „ზურაბ ჭავჭანიძის საქმეში“ ამჯერად?

„კვლავინდებურად ვიდეომტკიცებულებებია, თუმცაღა ძალადობის შემცველი არცერთი მტკიცებულება არ გვაქვს საქმეში. ზურაბ ჭავჭანიძეს ასევე ედავებიან სტრატეგიული ობიექტის ბლოკირებას მისი ხელში ჩაგდების მიზნით, თუმცა წარმოდგენილ ვიდეოებში ჩანს, რომ ზურაბ ჭავჭანიძე შედის ეზოში და ბორდიურზე ჩამოჯდება. რამდენად ჰქონდა მას სტრატეგიული ობიექტის ხელში ჩაგდების განზრახვა – ეს არის სამართლებრივი დავის და შეფასების საგანი და სწორედ ეს არის სადავო ჩვენი მხრიდან, რამდენად სახეზე გვაქვს შემადგენლობა ამ მუხლის.

რაც შეეხება ჯგუფურ ძალადობას, არანაირი მტკიცებულება არ არსებობს ჯგუფურ ძალადობაში მონაწილეობის, თუნდაც მცდელობასთან დაკავშირებით. პროკურატურის პოზიცია არის მხოლოდ და მხოლოდ ვარაუდი და უსაფუძვლო ბრალდება… ზურაბ ჭავჭანიძის ქმედება არ შეიცავს სისხლის სამართლის კოდექსით გათვალისწინებულ დანაშაულის ნიშნებს,“ – გვიყვება ადვოკატი ნინო ლომინაძე.

რით ადასტურებს პროკურატურა იმას, რომ ბათუმელი მედროშე ძალადობდა?

„პროკურატურის ვერსიაა, რომ იმ დროს შესაძლოა სხვა ჩადიოდა ჯგუფურ ძალადობას და თითქოსდა ერთიანი განზრახვით მოქმედებდნენ. მერე რა, რომ ქმედება მას არ განუხორციელებია? დაახლოებით ასეთი მოცემულობაა,“ – განმარტავს ნინო ლომინაძე.

„ზურაბ ჭავჭანიძის საქმეზე“ ისევ შეუძლია პროკურატურას ახალი მტკიცებულებების წარდგენა, მაგალითად, ელოდებიან ექსპერტიზის დასკვნას. ამ საქმეზე მტკიცებულებების ძირითადი ნაწილი უკვე წარმოდგენილია.

ნინო ლომინაძეს ზურაბ ჭავჭანიძე საკანშიც უნახავს:

„ჯანმრთელობის მდგომარეობა ნორმალური აქვს, ნორმალური იმ პირობებში, სადაც იმყოფება.

მისი გზავნილი არის, რომ კატეგორიულად არ ეთანხმება ბრალდებას. ანუ გამორიცხავს ყოველგვარ ძალადობას, ან რაიმე სტრატეგიული ობიექტის ხელში ჩაგდებას რაიმე ფორმით.

ზურაბ ჭავჭანიძესთან მიმართებით ბრალდება საკმაოდ სუსტია. არ დასტურდება უტყუარად არც ერთი გარემოება, რომლის მიხედვითაც შესაძლოა წარდგენილ ბრალში ზურაბ ჭავჭანიძე გამტყუნდეს.

ამიტომაც, ზურაბ ჭავჭანიძის პატიმრობაში ყოფნაც არის უკანონო მისთვის, ვინაიდან არც მიმალვის საფრთხე არსებობს და არც რაიმე გარემოება, რომელიც საფრთხის შემცველად შეიძლება იქნეს მიჩნეული,“ – აღნიშნა ნინო ლომინაძემ, ზურაბ ჭავჭანიძის ინტერესების დამცველმა.

ამ თემაზე:

„ქართული ოცნება“ აპირებს, ქართველ ემიგრანტებს არ გაუხსნას საარჩევნო უბნები უცხოეთში და ამით მათ წაართვას საპარლამენტო არჩევნებში ხმის მიცემის შესაძლებლობა.

გარდა საკანონმდებლო რეპრესიებისა, „ქართული ოცნება“ პროპაგანდისტული მედიებით ცდილობს ემიგრანტების ღირსებისშემლახავი კამპანია აწარმოოს. მათი ეთერიდან ისმის, რომ თურმე „ემიგრანტებს აღარაფერი აკავშირებთ სამშობლოსთან“, რომ „მათ საქართველო მხოლოდ იმიტომ უნდათ, რომ გარდაცვალების შემდეგ აქ დაიკრძალონ“ და რომ მათგან „ამ ქვეყანას რაიმე სიკეთე არ აქვს“.

„ოცნების“ პროპაგანდისტები აღნიშნავენ იმ ფაქტსაც, რომ მოლდოვაში პროდასავლურმა მაია სანდუმ არჩევნები ემიგრანტების ხმებით მოიგო. 

საგარეო საქმეთა სამინისტროს 2025 წლის მარტის ინფორმაციით, საზღვარგარეთ 1.5 მილიონზე მეტი ქართველი ცხოვრობს. სწორედ ამდენი მოქალაქისთვის აპირებენ ხმის წართმევას არჩევნებზე.

რას ფიქრობენ თავად ემიგრანტები „ოცნების“ ანტიკონსტიტუციურ ინიციატივაზე და როგორი იქნება მათი პასუხი? – „ბათუმელებმა“ ამ კითხვით უცხოეთში მცხოვრებ საქართველოს მოქალაქეებს მიმართა.

მუსიკოსი ეკა კაჭარავა, იტალიაში ცხოვრობს. ემიგრაციაში წასვლის მიზეზი ქვეყანაში შექმნილი მძიმე სოციალურ-პოლიტიკური მდგომარეობა იყო. „რაც უფრო მძიმდება საქართველოში მდგომარეობა, მით უფრო მეტად ვხვდები, თუ როგორ მიყვარს ჩემი ქვეყანა“, – გვეუბნება ეკა კაჭარავა.

„აქ იტალიელებისგან გუნდი შევქმენი და მათ ვასწავლი ქართულ სიმღერას. დირიჟორი ვარ. ვაკეთებთ ერთსაათიან კონცერტებს და ამაში შედის საგალობლებიც, ხალხური სიმღერებიც, ქართველი კომპოზიტორების შემოქმედებაც და ისე უყვართ, გიჟდებიან ქართულ სიმღერაზე.

რას ვითხოვ მე ჩემი ქვეყნისგან? – მინდა, რომ ჩემი ქვეყნის მომავალი, ჩემი დისშვილების, ნათესავების მომავალი, არ შებრუნდეს იმ ჯოჯოხეთში, საიდანაც ძლივს დავაღწიეთ თავი.

სხვა რომ ვერაფერი მოიფიქრეს, მეძახიან, რომ მე ვარ „ნაცი“. არადა, საქართველო შევარდნაძის დროს დავტოვე, ჩაბნელებული და გაუბედურებული საქართველო.

სხვას რას ვითხოვ, გარდა იმისა, რომ უკეთესი მომავალი ჰქონდეს ჩემს ქვეყანას.

აქაც, როცა ქართველები ჩამოდიან, გიდობას ვუწევ და ვაცნობ საოცარ რომს, რომელიც ასევე ძალიან მიყვარს. ეს ურთიერთობები ძალიან მავსებს და ხალხთან ურთიერთობით ვიკლავ სამშობლოს მონატრების შიმშილს“, – ამბობს ეკა კაჭარავა.

ის გვიყვება ემიგრაციის მძიმე წლებზე, თუ როგორ განიცდიდა 25 წლის ასაკში სამშობლოს იძულებით დატოვებას და უცხო ქვეყანაში წასვლას. „თვალზე ცრემლი მდიოდა, როცა სულ მარტოდ ვგრძნობდი თავს სამშობლოსგან შორს. რისთვის წამოვედი? იქ არ დამედგომებოდა, რადგან ცხოვრების პერსპექტივა არ იყო.

აქ უნივერსიტეტშიც ჩავაბარე და მოვახერხე საკუთარი თავის რეალიზება. როგორც მუსიკოსი ვდირიჟორობ კათოლიკური ეკლესიის გუნდს და ძალიან დიდ პატივს მცემენ, რადგან აქ იციან პროფესიონალიზმის დაფასება. ქართული ეკლესიის გახსნა რომ მოინდომეს და სასულიერო პირი გამოუშვეს, მე დავხვდი აქ და ვთხოვდი ხან ერთ ეკლესიას, ხან მეორეს, რომ წირვისთვის ადგილი დაეთმოთ. მერე ნელ-ნელა საელჩოც ჩაერთო და მოგვცეს ეკლესია უსასყიდლოდ რომში.

იმ ეკლესიაში 10 წელი რეგენტი ვიყავი. მერე გავაკეთე ქართული სამრევლო სკოლა, ჩემი შვილისა და სხვისი შვილებისთვისაც, ხომ?! თუმცა, შემდეგ ისე ცუდად მომექცა ამ ეკლესიის მოძღვარი, რომ საერთოდ გამომაგდო ეკლესიიდან მხოლოდ იმიტომ, რომ არ უნდოდა დამოუკიდებლად მეკეთებინა რაიმე“, – ამბობს ეკა კაჭარავა.

22 ნოემბერს, როცა გორის ქალთა გუნდი ჩავიდა რომში, კონცერტზე ეკაც მივიდა პატარა პლაკატით, სადაც ეწერა – „ნუ გამრიყავ, მეც ქართველი ვარ“. კონცერტს ესწრებოდა „ოცნების“ კულტურის მინისტრი თინათინ რუხაძეც.

„როცა კობახიძე ჩამოვიდა 24 ნოემბერს ვატიკანში, იქაც ვიყავი მისული. როგორც ჩანს, გაფრთხილებული ჰყავდათ დაცვა და უსაფრთხოების სამსახურმა საბუთების შემოწმება დაიწყო. ვატიკანთან კონტრაქტი მაქვს, ვგალობ იმ ტაძარში და ვაჩვენე თანამშრომლის ბარათი, მაგრამ მაინც მოითხოვეს დამატებითი საბუთების წარდგენა. გამომკითხეს ყველაფერი და როცა გაიგეს, თუ როგორი მაღალი დონის საზოგადოებასთან ვთანამშრომლობდი რომში, მითხრეს, რომ დარწმუნებული არიან ჩემს კეთილსინდისიერებაში, მაგრამ მაინც მკითხეს, ხომ არაფერს ვაპროტესტებდი?!

რა თქმა უნდა, ვუთხარი, რომ კი. მთელი წელია ვაპროტესტებ, დემონსტრაციებშიც ვმონაწილეობ და ყველაფერი კანონის ფარგლებში ხდება-მეთქი. მერე გავიგე, რომ თურმე ჩემზე ინფორმაცია მიუწოდებია ვატიკანში საქართველოს ელჩს და ამის გამო იყო ეს ყველაფერი. აღმოჩნდა, რომ მათთვის არასასურველი ემიგრანტების სიაში ვარ შეყვანილი“ – გვეუბნება ეკა კაჭარავა.

მისი თქმით, „ოცნების“ მტრული პოლიტიკის გამო ემიგრანტები არა მარტო ქვეყანას, არამედ ახლობლებს და მეგობრებსაც კარგავენ საქართველოში.

„გორის ქალთა გუნდის ხელმძღვანელი თეონა ცირამუა ჩემი მეგობარია. ძალიან მიყვარს და როცა დაქორწინდა, მაშინაც ჩემთან იყო ჩამოსული მეუღლესთან ერთად. ძალიან ბევრი ბედნიერი და ლამაზი დრო გვაქვს ერთად გატარებული. იმ დღეს, როცა თბილისში სასტიკად დაარბიეს ადამიანები და წაქცეულ ბიჭს სახეში ფეხი ამოარტყეს, თეონა ფეისბუქზე კონცერტს განიხილავდა. მხოლოდ ეს მივწერე, თეონა, რა დროს კონცერტია, ვერ უყურებ რუსთაველზე ხალხს რას უშვრებიან-მეთქი? ამის გამო დამბლოკა და არც შემდეგ შემხმიანებია, როცა შვილების შეძენა მივულოცე“, – ამბობს ეკა.

„ოცნების“ პროპაგანდას, რომ ემიგრანტებისთვის საქართველო დაკარგულია, ეკა კაჭარავა ასე პასუხობს:

„როგორ არის დაკარგული, თუ არც ერთი დღე კი არა და არც ერთი საათი, საქართველოზე ფიქრის გარეშე არ გამიტარებია. საქართველო ჩემშია, ჩემს დარდებში, ჩემს ფიქრებში და ვიცი, რომ საქართველო, აუცილებლად უნდა გადარჩეს“.

ვაჟა გაფრინდაშვილი 16 წელია პოლონეთში ცხოვრობს, თუმცა როგორც ეკა კაჭარავა, ისიც მიიჩნევს, რომ საქართველო, როგორც სამშობლო, მისთვის დაკარგული არ არის.

„მიუხედავად იმისა, რომ შემეძლო 10 წლის წინ ამეღო ევროკავშირის მოქალაქეობა და მეცხოვრა მშვენივრად და წყნარად, სხვა ქვეყნის მოქალაქეობა არ ამიღია.

რა სარგებელი აქვს საქართველოს ჩვენგან? თუ ასე უნდათ საკითხის დაყენება მაინცდამაინც, შეგვიძლია ვთქვათ, რომ საქართველოს რა სავალუტო რეზერვებიც გააჩნია, ეს სწორედ ემიგრანტების დამსახურებაა. ამიტომ, იმდენს ნუ იზამენ, ის გავაკეთოთ. რაც ერიტრეაში ან ეთიოპიაში გააკეთეს ემიგრანტებმა, როცა უბრალოდ შეწყვიტეს გადარიცხვები.

ჩვენ, ჯერჯერობით, სხვანაირად ვართ განწყობილი ჩვენი ქვეყნის მიმართ, ვცდილობთ დავეხმაროთ საქართველოს ბიუჯეტს და მოსახლეობასაც. დაკავებულებს და აქციის მონაწილეებს დავეხმაროთ და ამ ფორმით ვცდილობთ ვიდგეთ საქართველოს სამსახურში.

გაცილებით მეტი ვიცით და აქაც გვაქვს ინფორმაცია, თუ რა ხდება ქვეყანაში.

არც მესამე ძალის გავლენის ქვეშ ვართ და არც არანაირი პროპაგანდის. ერთადერთი, რაც გვამოძრავებს, ის არის, რომ ჩვენი ქვეყანა იყოს წარმატებული და იმ ქვეყნების მსგავსი, სადაც ემიგრანტები ვცხოვრობთ. რომ ჩვენს ქვეყანაშიც იყოს ადამიანის უფლებები ისე დაცული, როგორც ევროპაში“, – ამბობს ვაჟა გაფრინდაშვილი.

ის პოლონეთში ერთ-ერთ კომპანიაში მენეჯერად მუშაობს და აქვს რაგბის კლუბიც. ასევე, აქტიურადაა ჩართული ემიგრანტების მიერ დაარსებულ ორგანიზაციაში, რომელიც სხვადასხვა ქვეყანაში მცხოვრებ საქართველოს მოქალაქეებს აერთიანებს.

„საქართველოშიც მაქვს ჩემი პატარა კომპანია და ვიხდი გადასახადებს. წელიწადში მინიმუმ ერთხელ მაინც ჩამოვდივარ საქართველოში. ხანდახან ორჯერ, სამჯერაც. ამიტომ, „ოცნება“ თავისი პროპაგანდით, რომ თურმე ჩვენ, ემიგრანტებს არანაირი კავშირი არ გვაქვს სამშობლოსთან, თავის გადარჩენას ცდილობს, რადგან მათ წასასვლელი არსად აღარ აქვთ და ეს კარგად იციან. ყველა გზა აქვთ მოჭრილი, სადმე როსტოვში თუ წავლენ ან არაბეთის ქვეყნებში ეს არის, ამიტომ ბოლომდე იბრძვიან ისინიც, რომ შეინარჩუნონ ძალაუფლება. თუმცა არ უნდა მივცეთ ამის საშუალება“, – ამბობს ვაჟა გაფრინდაშვილი.

მისი თქმით, თუ „ოცნება“ მაინც გააკეთებს იმას, რომ მილიონ-ნახევარ საქართველოს მოქალაქეს გამოთიშავს არჩევნებიდან, „მაშინ გამოდის, რომ აღარც ოპოზიციის არსებობას ექნება აზრი“.

„ემიგრანტების უმრავლესობა ოპოზიციურადაა განწყობილი და ამ ხმების მთლიანად გაქრობა უნდათ.

ვფიქრობ, ანტიკონსტიტუციური კანონებისთვის ემიგრანტებმა უნდა ვუჩივლოთ „ქართულ ოცნებას“. ჯერ საქართველოში და შემდეგ სტრასბურგშიც შევიტანთ საჩივარს, რადგან საქართველოს ყველა მოქალაქეს აქვს უფლება 18 წლიდან მიიღოს არჩევნებში მონაწილეობა. ამიტომ ეს ანტიკონსტიტუციური კანონები უნდა გაუქმდეს“, – ამბობს ვაჟა გაფრინდაშვილი.

„ბათუმელები“ კიდევ ერთ ემიგრანტს ესაუბრა. რუსუდან ქოროღლიშვილი-ბრაუნი გერმანიაში ცხოვრობს.

მისი თქმით, „ოცნების“ მცდელობა, რომ წაართვას ემიგრანტებს საარჩევნო ხმის უფლება, მხოლოდ იმაზე მიუთითებს, რომ მათ ემიგრანტების ეშინიათ.

„აქაც არიან ემიგრანტები, ვისაც საერთოდ არ აინტერესებთ არჩევნები და ესენი ძირითადად არიან „ოცნების“ მხარდამჭერები. ხოლო იმ ადამიანებს, ვინც აქტიურად მონაწილეობს არჩევნებში, ბევრს ხმის მიცემის საშუალებაც არ მისცეს და არ დაარეგისტრირეს.

ახლა, როცა საერთოდ ხმის წართმევას გვიპირებენ, უფრო გამოფხიზლდნენ ემიგრანტები, რადგან ძალიან შეურაცხყოფილია ამით ემიგრაცია.

ჩემი შვილი 20 წლისაა და აქ აიდგა ენა, მაგრამ არ მოწყვეტილა საქართველოს. ჩვენ ისე ხშირად დავდივართ, რომ ყველაზე საუკეთესო მეგობრები, საქართველოში ჰყავს.

არც ქონება გაგვიყიდია, რომ აქ შეგვეძინა რაიმე, იმიტომ, რომ ჩვენ მომავალს ვხედავთ საქართველოში. ერთი წელი იმაზე ფიქრობდა, რა პროფესიას უნდა დაეუფლოს, რომ საქართველოში გამოადგეს.

ამ დროს, „უსამშობლოებს“ გვეძახიან იმ ადამიანებს, რომლებიც ძალისხმევას არ ვიშურებთ იმისთვის, რომ მათ შვილებს და შვილიშვილებსაც უკეთესი ქვეყანა ჰქონდეთ. თვითონ კი მოსისხლე მტრისკენ მიაქანებენ ქვეყანას.

ჯერ ერთი, „ოცნების“ მიერ ჩატარებულ არჩევნებში მონაწილეობას არც მივიღებ, დავდგები და გავაპროტესტებ“, – ამბობს რუსუდან ქოროღლიშვილი-ბრაუნი.

მისი თქმით, ემიგრანტები მხოლოდ საკუთარი ოჯახების სარჩენად არ არიან წასული და ბევრი „ნაცნობის თუ უცნობის გაჭირვება გაუზიარებიათ“.

„მე, პირადად, ოჯახი შევქმენი აქ და ამიტომ ვცხოვრობ გერმანიაში. თუმცა ჩაფიქრებული მქონდა, რომ ჩემი მეუღლეც საქართველოში გადმოსულიყო და არა პირიქით. მაგრამ არაერთი საინტერესო პროექტის მიუხედავად, საქართველოდან არავინ გამოგვეხმაურა. გერმანიაში კი რიგითი თანამშრომელი ვიყავი და ძალიან მოკლე დროში, დაწესებულების ხელმძღვანელობა შემომთავაზეს. სოციალური თერაპევტი ვარ.

მიუხედავად იმისა, რომ მხოლოდ საქართველოს მოქალაქე ვარ და არ მიმიღია გერმანიის მოქალაქეობა, აქ ყველაფერი გიფასდება და არც ქართველობა წაურთმევია არავის. არც ამის გამო დავუჩაგრივარ ვინმეს“, – ამბობს რუსუდან ქოროღლიშვილი-ბრაუნი.

პაპუაშვილის განცხადებას, რომ ემიგრანტებზე უცხო ქვეყნის სახელმწიფოები ახდენენ გავლენებს და ამის გამო აძლევენ ოპოზიციას ხმას, ის მტკნარ სიცრუეს უწოდებს.

„მე ვარ ასოციაცია „თამარიელის“ წევრი, ასევე პლატფორმა „ერთობის“ წევრიც, სადაც მსოფლიოს სხვადასხვა ქვეყანაში მცხოვრები ემიგრანტები ვართ გაერთიანებული, არავის, არასოდეს უთქვამს მსგავსი რამ, რომ რომელიმე ქვეყნის ხელისუფლებას რაიმე ზემოქმედება მოეხდინოს ჩვენს არჩევანზე. ეს არის მტკნარი სიცრუე, რაზეც „ოცნება“ საუბრობს.

არ მესმის იმ ადამიანების, ვისაც ამის სჯერა.

„ოცნებას“ უნდა მეტი უვიცი და ადვილად სამართავი ჰყავდეთ ქვეყანაში და დაგვიმყარონ ერთპარტიული დიქტატურა. შესაძლოა ვიღაცას უნდა კიდეც, მის მაგივრად პარტიამ რომ იფიქროს და ილაპარაკოს, როგორც ადრე იყო, საბჭოთა კავშირში. დაიწყოს ყავის დაფქვით სამსახურში დღე და დამთავრდეს ყავის დაფქვით, თვითონ არაფერზე შეწუხდეს. მაგრამ ჩვენ აღარ ვართ არც მე-20 საუკუნის დასაწყისში და არც მეოცეს ბოლოს, როცა არ ვიცოდით სად ვიყავით“, – ამბობს რუსუდან ქოროღლიშვილი-ბრაუნი.

„ქართული ოცნების“ წარმომადგენლები ამბობენ, რომ თუ ემიგრანტებს უყვართ სამშობლო, მაშინ ერთი დღე უნდა გამონახონ და ჩამოვიდნენ ქვეყანაში ხმის მისაცემად. რა შეგიძლიათ თქვათ, მსგავს განცხადებაზე? – ვკითხეთ რუსუდანს.

მისი თქმით, 4 წელიწადში კი არა, ძალიან ბევრი ემიგრანტი ყოველ წელს ჩამოდის საქართველოში, „თუმცა იმ ადამიანების მიმართ მსგავსი აგდებული დამოკიდებულება, რომლებიც მოხუცებს უვლიან და მძიმე პირობებში უწევთ შრომა, მიუღებელია“, – ამბობს რუსუდანი.

„ვინ წავიდოდა ქვეყნიდან, აქ რომ ხალხს სამუშაო პირობები ჰქონდეთ? ემიგრანტები კვდებიან აქ საქართველოს სიყვარულით. არ ვიცი რამდენი უძილო ღამე გვქონდა ბევრ ჩვენგანს და ბევრად დრამატულია ეს განცდები, ვიდრე ასე ჩანს, საუბრებში.

ჩვენ ადამიანებს ვკარგავთ, ახლობლებს, მეგობრებს, მხოლოდ იმიტომ, რომ ამ პროპაგანდის გამო, ისინიც „უსამშობლოებად“ მოგვიხსენიებენ. 90-იან წლებში, რომ ერთმანეთი გაგვიტანია, ასეთი ხალხიც კი იმეორებს მსგავს პროპაგანდას.

ჩვენ გვიღალატეს იმ ადამიანებმა, ვინც არ აპროტესტებს ამ გადაწყვეტილებას. მათაც ხომ ჰყავთ ემიგრაციაში შვილები, დები, ძმები, ამაზე არ ფიქრობენ?!

ამ დროს, პირადად ვიცნობ ადამიანებს, რომლებიც „ოცნებას“ უჭერენ მხარს, მაგრამ ამბობენ, რომ არასდროს დაბრუნდებიან საქართველოში. ჩვენ კი ვკვდებით ამ სიშორის გამო და სულ ნოსტალგია გვაქვს. ვზრუნავთ იმაზე, რომ ჩვენმა შვილებმა არ დაივიწყონ ქართული ენა, რომ სამშობლო უყვარდეთ. ამიტომ, არავინ გაბედოს ჩვენი დადანაშაულება იმაში, რომ ჩვენი ქვეყანა არ გვიყვარს. საკუთარი ხალხის წინააღმდეგ ბრძოლა არავის მოუგია ჯერ.

ხელისუფლებას, რომელსაც თავი გამარჯვებულად მიაჩნია, არ სჭირდება ამდენი სისულელის ჩადენა. ემიგრაციას როცა ებრძვიან, საქართველოში საკუთარ მოსახლეობას როცა ებრძვიან, უნდა ესმოდეთ, რომ ამ ბრძოლაშია ჩართული ჩვენი ინტელექტუალური და ფიზიკური რესურსიც. მათ ვინ ჰყავთ გვერდით? ალბათ რუსეთი, მაგრამ ბევრი ბრძოლისთვის გაგვიძლია და ამ ქოციანობასაც გავუძლებთ“, – ამბობს რუსუდან ქოროღლიშვილი-ბრაუნი.

მისი თქმით, თუ ადამიანები არ გამოფხიზლდებიან, შეიძლება დადგნენ იმ რეალობის წინაშე, როცა ემიგრანტები თანხებს აღარ გადმორიცხავენ საქართველოში „და მაშინ ხომ გამოფხიზლდებიან?“ – ამბობს რუსუდანი.

„სახელმწიფოც ჩვენ ხარჯზე უნდა არსებობდეს, კერძო პირებიც და მაინც ჩვენ ვართ უსამშობლოები?!“ – ასეთი შეკითხვა აქვს მას. 

მარი კაიშაური საფრანგეთში, სტრასბურგში ცხოვრობს. ის ამბობს, რომ „ოცნების“ პროპაგანდამ ემიგრანტების წინააღმდეგ კი არ დაასუსტა ისინი, არამედ უფრო მეტად გააერთიანა ემიგრაცია.

„ემიგრაცია რომ არ ყოფილიყო, საქართველო დღეს არ იარსებებდა. ემიგრანტებმა თავიანთი მძიმე შრომით საქართველო გადაარჩინეს. სამწუხაროდ, არ გვაქვს ისეთი სახელმწიფო, სადაც ადამიანები თავის გატანა შეძლებენ.

ადრე – მით უმეტეს. სად გვქონდა ქართველებს იმის შესაძლებლობა, რომ ხარისხიანი ჯანდაცვა ან განათლება მიგვეღო, ფეხზე ისევ ამერიკამ და ევროპამ დაგვაყენა, ამ ქვეყნებმა შეგვიფარეს და თავი გავიტანეთ, წლობით უნახავი შვილების და შვილიშვილების მონატრების ფასად. ფაქტობრივად, გადასახლების მომენტი გაქვს იმისთვის, რომ შენი ოჯახი არჩინო.

ევროპასთან უვიზო მიმოსვლის შემდეგ კი ოჯახის წევრებმა ერთმანეთი ნახეს, უამრავი ადამიანი სიკვდილს გადაურჩა მხოლოდ იმიტომ, რომ საფრანგეთში ჩამოვიდა სამკურნალოდ, უამრავმა ახალგაზრდამ ევროპული განათლება მიიღო და ამის წართმევაც უნდათ ახლა.

თუ არ მოსწონთ ევროპა და ამერიკა, თავად რატომ ისწავლეს ევროპაში, რატომ ჰყავთ აქ შვილები, რატომ არ წავიდნენ რუსეთში, ესწავლათ იქ. თუ ჩვენთვის უნდათ რუსეთი და მათთვის ევროპა?

უნდათ საერთოდ მოწყვიტონ ემიგრაცია ყველაფერს, ჩახსნან და აგენტებად გამოაცხადონ, რომ აი, „დიფ სთეითები“ გვიზის სახლში და ასე შემდეგ, რადგან მათ ძალიან კარგად იციან, რომ ემიგრაციაში ვერ გააყალბებენ ხმებს და ვერ მოგვახვევენ თავზე პროპაგანდას, ამიტომ კანონმდებლობით დაგვიწყეს ახლა ბრძოლა“, – ამბობს მარი კაიშაური.

მისი თქმით, უცხოეთში არსებული საქართველოს საელჩოები იმას ნიშნავს, რომ ემიგრანტები ფაქტობრივად „საქართველოს ტერიტორიაზე“ აძლევენ ხმას.

„რას ამბობენ ამით, რომ ეს საელჩოები და საკონსულოები, სადაც ვრეგისტრირდებით საქართველოს მოქალაქეები ხმის მისაცემად, არალეგიტიმურია?! ამ შენობებში შემოსვლით ხომ ისედაც საქართველოს ტერიტორიაზე ვაძლევთ ჩვენ ხმას. მაშინ რა აუცილებელია, რომ თვითმფრინავის ბილეთი მეჭიროს ხელში. აქ ხომ გვიდგას დიპლომატიური შენობები?“ – ამბობს მარი კაიშაური.

მისი თქმით, „ოცნების“ რეპრესიულ კანონზე ემიგრანტების პასუხი იქნება ძალიან მტკივნეული.

„ემიგრანტები გაჩერებას არ ვაპირებთ. პირიქით, თუ ადრე რაღაც საკითხებში პასიურები ვიყავით, ახლა ამ ყველაფერმა უფრო გაგვაერთიანა. ვერ გაგვაჩუმებენ, რადგან ემიგრაცია იმაზე ძლიერია, ვიდრე მათ ჰგონიათ. ძალიან კარგია, რომ ეშინიათ ემიგრანტების და დაელოდონ შედეგებს. პასუხი იქნება მათთვის მტკივნეული“, – ამბობს მარი კაიშაური.

დღეს ბათუმში საფრანგეთის საელჩოს ორგანიზებით რეგიონული სამინისტროთაშორისი სემინარი იმართება,  სახელწოდებით „პორტების უსაფრთხოება და ნარკოტიკებით ვაჭრობის წინააღმდეგ ბრძოლა შავი ზღვიდან ევროკავშირამდე“.

სემინარში მონაწილეობენ სამართალდამცავი ორგანოების თანამშრომლები ევროპის 13 ქვეყნიდან, ასევე საბაჟო სამსახურებისა და კერძო სექტორის წარმომადგენლები.

საფრანგეთის საელჩოს ინფორმაციით, ევროკავშირის საგარეო ვაჭრობის დაახლოებით 75%-ის და შიდა ვაჭრობის 31%-ის დამუშავებით, პორტები ხელს უწყობენ კეთილდღეობას ევროკავშირსა და მესამე ქვეყნებთან, თუმცა ასევე განსაკუთრებით დაუცველები არიან კრიმინალური საფრთხეების მიმართ.

საზღვაო ტრანსპორტი კი ორგანიზებული დანაშაულებრივი ჯგუფების მიერ გამოყენებული ვექტორია, განსაკუთრებით ნარკოტიკებით ვაჭრობის სფეროში.

სემინარის გამართვის აუცილებლობაზე ისაუბრა საქართველოში საფრანგეთის ელჩმა ოლივიე კურტომ.

„ბათუმში იმართება ნარკოტრაფიკთან ბრძოლის შესახებ სემინარი.

ეს არის უმნიშვნელოვანესი, პრიორიტეტული საკითხი ფრანგული მთავრობისთვის. პრეზიდენტმა ემანუელ მაკრონმა და საგარეო საქმეთა მინისტრმა ჟან-ნოელ ბარომ ამ თემას მიანიჭეს უმაღლესი მნიშვნელობა.

უნდა გვესმოდეს, რამდენად დიდ საფრთხეს წარმოადგენს ეს ჩვენი საზოგადოებებისთვის, ჩვენი დემოკრატიისა და სამართლებრივი სახელმწიფოსთვის. ნაღდი ფულის უზარმაზარი ოდენობა, ნარკოტიკების უზარმაზარი ნაკადი აღწევს ჩვენს საზოგადოებებში და ანგრევს ჩვენს ახალგაზრდობას. სწორედ ამიტომ დავაყენეთ ეს საკითხი ყველაფერზე წინ.

ეს არის გლობალური ინიციატივა, რომელსაც ორი მნიშვნელოვანი განზომილება აქვს. პირველი განზომილება: ეს არის გუნდური საქმე. ვერც ერთი ქვეყანა ვერ გაართმევს ამას თავს მარტო. ამიტომაც არის უკიდურესად მნიშვნელოვანი, რომ მოქმედება იყოს კოლექტიური და გაიმართოს ამგვარი სემინარები და კონფერენციები რეგიონული უსაფრთხოების ძალების პროფესიონალების მონაწილეობით.

მეორე – ეს არის სპეციფიკური ზონა, ძალიან მნიშვნელოვანი ზონა. და საქმე მხოლოდ ნარკოტიკებს არ ეხება.

სამხრეთ კავკასია ყოველთვის იყო ცივილიზაციათა გზაჯვარედინი – საუკეთესო თვალსაზრისითაც და უარესითაც. და ჩვენთვის ძალიან მნიშვნელოვანია, რომ ყველა რეგიონული აქტორის ჩართულობა შენარჩუნდეს ამ ზონაში ნარკოტრაფიკის წინააღმდეგ ბრძოლაში.

ვმსჯელობთ შავ ზღვაზე, უზარმაზარ და მზარდ კავშირგაბმულობაზე სამხრეთ კავკასიით და იმ აუცილებლობაზე, რომ წინასწარ ვივარაუდოთ ევროპაში ნარკოტიკების შემოსვლა.

როგორც ვიცე-მინისტრმა აღნიშნა, საქართველო არ არის ნარკოტიკების მწარმოებელი ადგილი, არამედ სატრანზიტო ქვეყანაა. სწორედ ამიტომ ვაფასებთ ამ სფეროში თანამშრომლობას,“ – თქვა ოლივიე კურტომ, საფრანგეთის ელჩმა საქართველოში.

როგორც საქართველოში საფრანგეთის საელჩოს მიერ გავრცელებულ რელიზშია ნათქვამი, სემინარი „საქართველოს ხელისუფლების მხარდაჭერით“ გაიმართა.

სემინარს „ქართული ოცნების“ შს მინისტრის მოადგილე ალექსანდრე დარახველიძე და შემოსავლების სამსახურის საბაჟო დეპარტამენტის დირექტორი, მიხეილ ჩოკოშვილი ესწრებოდნენ.

„რატომ არ ასაჯაროვებენ ხელშეკრულებას, ეს ხომ სამხედრო საკითხი არ არის?“ – ეს ერთ-ერთი მოქალაქის შეკითხვეაა „ოცნების“ მთავრობასთან, რომელიც არაბულ კომპანიასთან გაფორმებულ კონტრაქტს არა ასაჯაროვებს.

რას ფიქრობს ხალხი არაბულ ინვეტსუციებზე საქართველოში – ნახეთ ქუჩის გამოკითხვა ბათუმში: