ვინ იშენებს ვილებს გონიოში, ზღვის სანაპიროზე – როგორ იქცა სასტუმროების პროექტი კერძო სახლებად

ბათუმში ბევრს უნდა ახსოვდეს ე.წ. „ელიტური ვილების“ პროექტი, რომელიც გონიოში, ზღვის პირას „დაბალ განაშენიანებას“ და „სასტუმრო ვილების“ მშენებლობას ითვალისწინებდა. ამ პროექტის კონცეფციის დამტკიცებისას „ოცნების“ უმრავლესობის წევრებმა, კენჭისყრამდე, მათ გასაგონად, ვინც ბათუმის ურბანულ პოლიტიკას აპროტესტებს და ქაოსურს უწოდებს, ნიშნისმოგებით განაცხადეს, რა გვაქვს საწინააღმდეგო ბათუმში დაბალ განაშენიანებას ითხოვდნენ და აი, დაბალი განაშენიანებაო.

იმით, რომ მერიას ზღვისპირა ზოლში დაბალი ინტენსივობის განაშენიანება შესთავაზა, თავს კომპანიაც იწონებდა.

ამონარიდი კონცეფციიდან:

„შპს „გონიო 2020“ – მა გამოიჩინა ინიციატივა, მის საკუთრებაში და დაინტერესებაში არსებული გეგმარებითი ერთეულის განვითარების მიზნად დასახა დაბალი ინტენსივობის სასტუმრო ფუნქციის მქონე ელიტური ვილების მშენებლობა, რის საფუძველზეც საჭირო გახდა ქალაქმშენებლობითი პარამეტრების ცვლილება, რაც არსებითად არ შეცვლის დადგენილი ზონის მოთხოვნებს“. 

სამშენებლო ტერიტორიას კონცეფციაში, შემდეგ კი გდგ-ში, კომპანია სამშენებლო ტერიტორიას ასე აღწერს:

„საპროექტო გეგმარებითი ერთეული საერთო ფართით 20 469 კვ.მ მდებარეობს ბათუმში, წმინდა ანდრია პირველწოდებულის პირველი ჩიხი, N18 გონიოს დასახლებაში, შავი ზღვის სანაპირო ზოლში განლაგებულ ტერიტორიაზე, რომელიც ბათუმის ცენტრიდან დაშორებულია 12 კმ-ით.

საპროექტო ტერიტორიას დასავლეთის მხრიდან ესაზღვრება ზღვის სანაპირო და შავი ზღვა, ჩრდილოეთის, ჩრდილო-აღმოსავლეთის მხრიდან 300 მეტრის რადიუსში – თავისუფალი ტერიტორიები. აღმოსავლეთის მხრიდან 230 მეტრის მანძილზე თავისუფალი ტერიტორიები და შემდეგ დაბალი ინტენსივობის განაშენიანება, ხოლო ნაწილობრივ სამხრეთისა და სამხრეთ-აღმოსავლეთის მხრიდან 300 მეტრის რადიუსში დაბალი ინტენსივობის კერძო განაშენიანება“.

სქრინი კონცეფციიდან

ე.წ. „სასტუმრო ელიტური ვილების პროექტი“, რომელიც ჯერ მერიას შემდეგ კი საკრებულოს შპს „გონიო 2020“-მა წარუდგინა, გონიოში, ზღვის პირას, ორსართულიანი, მსუბუქი კონსტრუქციის მქონე სახლებით გაშენებული უბნის მშენებლობას ითვალისწინებდა. კონცეფციაში ზოგ შემთხვევაში სიტყვა კოტეჯებიც კი იყო გამოყენებული.

„ბათუმელების“ მიერ მოპოვებული დოკუმენტებით ირკვევა, რომ სასტუმრო-ელიტური ვილების პროექტი „ოცნების“ მხარდამჭერი ინვესტორის და მისი კომპანიების დირექტორების, კიდევ რამდენიმე ბიზნესმენის და სხვების სახლების პროექტია.

„ბათუმელებმა“ გამოარკვია, რომ სინამდვილეში, დაბალსართულიან სახლებში, ზღვის პირას, სასტუმრო „ელიტურ ვილებს“კი არ აშენებენ, არამედ ამ ვილებში ინვესტორი, მისი კომპანიების დირექტორიები და სხვა პირები აპირებენ ცხოვრებას. განაშენიანების დეტალური გეგმის დამტკიცების შემდეგ მათ მერიას ამ ნაკვეთზე ინდივიდუალური სახლების მშენებლობის პროექტებით მიმართეს და მშენებლობის ნებართვებიც მიიღეს.

ზღვის პირას ინდივიდუალურ საცხოვრებელ სახლს იშენებს მედეა ბოჭორიშვილი, სამშენებლო კომპანია „ალიანსის“ დამფუძნებლის მეუღლე და კომპანიის ოფიციალური მფლობელი. სახლის მშენებლობას მედეა ბოჭორიშვილი 2 777 კვ.მეტრ ფართობზე გეგმავს, სამშენებლო ფართი კი 4 504 კვ.მეტრია. ფართი გათვალისწინებულია ასევე აუზის მოსაწყობად.

მედეა ბოჭორიშვილის სახლის პროექტის რენდერი

მერის მიერ გამოცემულ ბრძანებაში, რომლითაც მან მშენებლობის ნებართვაზე მოთხოვნა დააკმაყოფილა, პირდაპირ წერია, რომ საუბარი ეხება ინდივიდუალურ საცხოვრებელ სახლს.

ამონარიდი ბათუმის მერის ბრძანებიდან:

„დაკმაყოფილდეს და ქალაქ ბათუმში, დასახლება გონიოში მდებარე 2 777 კვ.მ. არასასოფლო სამეურნეო დანიშნულების მიწის ნაკვეთზე (ინდივიდუალური საცხ. სახლის მშენებლობის (II კლასის შენობა) მიზნით მედეა ბოჭორიშვილის სახელზე შეთანხმდეს პროექტი და გაიცეს მშენებლობის ნებართვა“. ამ პროექტთან დაკავშირებულ დოკუმენტებში ასევე ვკითხულობთ.

ამონარიდი განმარტებითი ბარათიდან

ნაკვეთები უკვე დარეგისტრირებული აქვთ და აქ ინდივიდუალური სახლების მშენებლობას გეგმავენ „ალიანსის“ დირექტორები: დავით ბალაძე [აჭარის ყოფილი ფინანსთა მინისტრი], აკაკი სონგულია და სხვები.

აკაკი სონგულიას მშენებლობის ნებართვა უკვე მიღებული აქვს, ხოლო დავით ბალაძის პროექტთან დაკავშირებით ადმინისტრაციული წარმოება შეწყვეტილია, სავარაუდოდ იმის გამო, რომ მან ამ სახლის მშენებლობა უკვე დაასრულა.

პროექტის რენდერი

მერიაში წარდგენილი დოკუმენტების მიხედვით, რამდენიმე სახლის მშენებლობა უკვე დაწყებულია და კარკასი – დასრულებული

საკრებულოს მიერ განხილული და დამტკიცებული კონცეფციის მიხედვით, სასტუმრო ტიპის ვილები და მასთან დაკავშირებული ინფრასტრუქტურა სამ საკადასტრო ერთეულზე – 20 485 კვ.მ-ზე უნდა გაშენდეს. მერიის ინფორმაციით, პროექტი 6 832 კვ.მეტრ ტერიტორიაზე სარეკრეაციო სივრცის, ხოლო 3 000 კვ.მ-ზე პარკინგის მოწყობასაც ითვალისწინებს. მერიისთვის წარდგენილ განაშენიანების კონცეფციაში არსებული რენდერების მიხედვით, კომპანია ოცდაათამდე ვილის აშენებას გეგმავს.

„ბათუმელები“ მერიისგან მეორე დღეა ელოდება პასუხს, შეიცვალა თუ არა ვილების პროექტის ფუნქციური დანიშნულება მერიის თანხმობით და შეთანხმდა თუ არა ეს საკრებულოსთან, თუმცა პასუხი ვერ მივიღეთ. ეს კითხვა დღეს, 31 მაისს, საკრებულოს სხდომაზე არქიტექტურისა და ურბანული პოლიტიკის სამსახურის უფროსსაც დავუსვით, თუმცა უშედეგოდ, მან პასუხი არ გაგვცა.

დღეს, 31 მაისს დამტკიცებული კონცეფციის მიხედვით, ელიტური ვილების უკან, სამანქანო გზის მხარეს შპს „გონიო 2020“-ს სამი კორპუსის მშენებლობა სურს. ამ კორპუსების მშენებლობისთვის ნებართვის მოსაპოვებლად მიწის ნაკვეთის განაშენიანების გეგმის კონცეფცია უკვე წარუდგინა კომპანიამ მერიას, მერიამ კი – საკრებულოს.

ვილების პროექტის გაგრძელებაზე, ზღვიდან 240 მეტრში სამი კორპუსის მშენებლობის კონცეფცია ბათუმის საკრებულომ 31 მაისის სხდომაზე განიხილა. მერიას ამ პროექტზე გეგმარებითი დავალება 2024 წლის 13 მარტს გაუცია, რაც იმას ნიშნავს, რომ კომპანიას დავალება მისცეს ჯერ მიწის ნაკვეთის განაშენიანების კონცეფცია, შემდეგ კი დეტალური გეგმა წარადგინოს.

სამშენებლო ტერიტორია გონიოში ანდრია პირველწოდებულის I ჩიხში #16ა-ში მდებარეობს. ფართობი 12 799 კვ.მეტრია. კონცეფციის მიხედვით, შპს „გონიო 2020“ ვილების მიმდებარედ დაგეგმილ 3 კორპუსში სასტუმრო-აპარტამენტების მოწყობას გეგმავს.

კომპანიამ პროექტისთვის დადგენილზე მაღალი სიმაღლის შეთანხმება მოითხოვა:

„გეგმარებით ერთეულში მოქცეული მიწის ნაკვეთების სამშენებლოდ განვითარებისათვის დაგეგმილია ქალაქმშენებლობის პარამეტრების ცვლილება, მათ შორის განაშენიანების მაქსიმალური სიმაღლის გაზრდა დადგენილი 15 მ-დან 50 მ-მდე, ასევე განაშენიანების რეგულირების სხვა პარამეტრების და პირობების განსაზღვრა“ – ვკითხულობთ კონცეფციაში.

შპს „გონიო 2020“ „ალიანსის“ დამფუძნებლის შვილის, თემურ ბიწაძის კომპანიაა.