ბათუმის მერია ფარნავაზ მეფის ქუჩის ფიროსმანის ქუჩამდე გაგრძელებას გეგმავს. მერიის გეგმას ქალაქის საკრებულოც დაეთანხმა. თუმცა გეგმის განსახორციელებლად, საჭირო იქნება ქუჩის გაგრძელების არეალში მოქცეული კერძო საკუთრების გამოსყიდვა.
თუ მერია რომელიმე მესაკუთრეს ქონების გამოსყიდვაზე ვერ შეუთანხმდება, ასეთ შემთხვევაში მესაკუთრეს საკუთრებას ექპროპრიაციის წესით ჩამოართმევენ.
შესაბამის დოკუმენტებში აღნიშნულია, რომ “საქალაქო ინფრასტრუქტურისა და კეთილმოწყობის სამმართველო“-ს მიერ მომზადებულია მოსაწყობი ქუჩის წინასწარი პროექტი.
„პროექტი მოიცავს კერძო საკუთრებაში რეგისტრირებულ 9 უძრავ ქონებას და სახელმწიფო საკუთრებაში არსებულ 2 უძრავ ქონებას, მათგან 6-ზე განთავსებულია შენობები. ასათვისებელია მიწის ნაკვეთების 3 502 კვადრატული მეტრი ფართობი და მესაკუთრეების შენობა-ნაგებობები.“ – აღნიშნულია მერიის დოკუმენტში.
ამავე დოკუმენტის მიხედვით, პროექტი ითვალისწინებს ფარნავაზ მეფის ქუჩის გაგრძელებას [გრიბოედოვის ქუჩის გადაკვეთით] და მის შეერთებას ფიროსმანის ქუჩასთან [ჯავახიშვილის ქუჩის გადაკვეთით].
ფარნავაზ მეფის ქუჩის გაგრძელება ფიროსმანის ქუჩამდე / საპროექტო ტერიტორია მოქცეულია გრიბოედოვისა და ჯავახიშვილის ქუჩებს შორის / ფოტო მერიის დოკუმენტებიდან
ფარნავაზ მეფის ქუჩის გაგრძელება ფიროსმანის ქუჩამდე / საპროექტო ტერიტორია [მონიშნულია წითელი ხაზებით] გრიბოედოვისა და ჯავახიშვილის ქუჩებს შორის
- „აღნიშნული პროექტი ითვალისწინებს ქუჩის მოწყობის არეალში მოქცეულ, კერძო და იურიდიული პირების საკუთრებაში არსებული უძრავი ქონებების ათვისებას [მიწის ნაკვეთი, შენობა-ნაგებობა], რაც უნდა განხორციელდეს მესაკუთრეებთან შესაბამისი შეთანხმების საფუძველზე.
- ასათვისებელი, უძრავი ქონების მესაკუთრეებს კომპენსაციის სახით უნდა აუნაზღაურდეთ მათი საბაზრო ღირებულება, ან გადაეცეს საცხოვრებელი ფართობი [ტოლფასოვნად], „საქართველოს კონსტიტუციის“ და „აუცილებელი საზოგადოებრივი საჭიროებისათვის საკუთრების ჩამორთმევის წესის შესახებ“ საქართველოს კანონის და „ადგილობრივი თვითმმართველობის შესახებ“ საქართველოს ორგანული კანონით განსაზღვრული ღონისძიებების ფარგლებში.“ – აღნიშნულია მერიის დოკუმენტში.
რა თანხაა გამოყოფილი აღნიშნული პროექტისთვის, მერიას საკრებულოსთვის ინფორმაცია ამ ეტაპზე არ გადაუგზავნია.
