Batumelebi

2025 წელს შექმნილი სსიპ-ის, სახელმწიფო გრანტის მართვის სააგენტოს თანამშრომლებს ფულად ჯილდოს გადასცემენ – „ოცნების“ პრემიერმა ირაკლი კობახიძემ შესაბამის განკარგულებას ხელი 25 დეკემბერს მოაწერა.

„მიეცეს თანხმობა სსიპ სახელმწიფო გრანტის მართვის სააგენტოს, სააგენტოს თანამშრომლებზე დაკისრებული უფლება-მოვალეობების კეთილსინდისიერი შესრულებისა და მათი შრომის სათანადო დაფასებისთვის, გასცეს ფულადი ჯილდო – საშტატო ნუსხის მიხედვით დასაქმებულ სამ თანამშრომელზე 21 3316 ლარის ოდენობით, ხოლო არასაშტატო ნუსხის მიხედვით დასაქმებულ 6 თანამშრომელზე – 17 458 ლარის ოდენობით (თითოეულ თანამშრომელზე ერთი თვის თანამდებობრივი სარგოს 80%-ის ოდენობით)“ – წერია „ოცნების“ მთავრობის განკარგულებაში, რომელსაც ხელს კობახიძე აწერს.

საჯარო სამართლის იურიდიული პირი − სახელმწიფო გრანტის მართვის სააგენტო წელს შეიქმნა. მისი დებულება „ოცნების“ მთავრობამ 2025 წლის 15 აპრილს დაამტკიცა.

მთავრობის მიერ არასამთავრობოების დაფინანსების იდეა ირაკლი კობახიძემ პირველად 2024 წლის 9 სექტემბერს გაახმიანა. მან თქვა, რომ სამთავრობო საგრანტო ფონდით მხოლოდ ის ორგანიზაციები ისარგებლებენ, რომლებიც რუსულ კანონს დაემორჩილებიან და „უცხოური ინტერესების გავლენის გამტარებად“ დარეგისტრირდებიან.

სააგენტოს თავმჯდომარის ხელფასი თვეში 10 ათას 585 ლარია; მოადგილის – 8 ათას 760 ლარი, ხოლო დეპარტამენტის უფროსის – 7 ათას 300 ლარი.

გრანტის მართვის სააგენტოს თავმჯდომარე თამარ ზოდელავაა.

2025 წლის წელს [8 თვე] სააგენტოს ამ სამი თანამშრომლის ხელფასებისთვის ჯამში 253 ათასზე მეტი იხარჯება.

პროკურატურამ ბაჩანა [ბაჩო] ახალაიას ბრალდება წარუდგინა.

პროკურატურა ბაჩო ახალიას ბრალს დებს საქართველოს სისხლის სამართლის კოდექსის 225-ე მუხლის პირველი ნაწილით – ჯგუფური ძალადობის ორგანიზება და ხელმძღვანელობა, რაც სასჯელის სახედ და ზომად 9 წლამდე თავისუფლების აღკვეთას ითვალისწინებს.

პროკურატურის ვერსიით:

„სახელმწიფო უსაფრთხოების სამსახურში და შინაგან საქმეთა სამინისტროში მიმდინარე გამოძიებით დადგენილია, რომ ბრალდებულმა ბაჩანა ახალაიამ, ტექნიკური მობილური საკომუნიკაციო საშუალებების გამოყენებით, დააორგანიზა და პირადად ხელმძღვანელობდა პაატა ბურჭულაძის, მურთაზ ზოდელავას, ირაკლი ნადირაძის, პაატა მანჯგალაძის, ლაშა ბერიძის და სხვა პირების დანაშაულებრივ ქმედებებს. კერძოდ, მათი მხრიდან ჯგუფური ძალადობრივი ქმედებების ორგანიზების, საქართველოს კონსტიტუციური წყობილების ძალადობით შეცვლის და სახელმწიფო ხელისუფლების დამხობისკენ მოწოდებების გაკეთების და სტრატეგიული და განსაკუთრებული მნიშვნელობის ობიექტის ხელში ჩაგდების მცდელობის პროცესს.

პაატა ბურჭულაძემ, მურთაზ ზოდელავამ და ირაკლი ნადირაძემ, ბაჩანა ახალაიას უშუალო ხელმძღვანელობით და ორგანიზებით, ხელისუფლების მიმართ აგრესიულად განწყობილი მოქალაქეების მობილიზების, მათი თავშეყრის და ძალადობრივ მოქმედებებში ჩართვის მიზნით, თვითმმართველობის არჩევნებამდე რამდენიმე დღით ადრე, საქართველოს კონსტიტუციური წყობილების ძალადობით შეცვლის და სახელმწიფო ხელისუფლების დამხობის შესახებ საჯარო მოწოდებები გააკეთეს. ბრალდებულები საზოგადოებას მოუწოდებდნენ რევოლუციის საჭიროებისაკენ, რომელშიც მონაწილეობა უნდა მიეღოთ აგრესიულად განწყობილ მოქალაქეებს. მათივე განცხადებებით, ისინი ერთობლივად დაამხობდნენ სახელმწიფო ხელისუფლებას, რისთვისაც საზოგადოების გარკვეული ჯგუფების მასობრივი ჩაბმის და გაერთიანების აუცილებლობაზე საუბრობდნენ.

ადგილობრივი თვითმმართველობის არჩევნების დღეს, 4 ოქტომბერს, ბრალდებულებმა და სხვა პირებმა ჯგუფური ძალადობრივი მოქმედებების დაორგანიზება გადაწყვიტეს, რასაც ხელმძღვანელობდა და ორგანიზებას უწევდა ბაჩანა ახალაია. იმავე დღეს, თავისუფლების მოედანზე გამართულ საპროტესტო აქციაზე შეკრებილ მოქალაქეებს პაატა ბურჭულაძემ მათ მიერ შემუშავებული სამოქმედო გეგმა გააცნო, რომლის მიხედვითაც მყისიერად უნდა დაეკავებინათ ხელისუფლების ცალკეული წარმომადგენლები და განეხორციელებინათ სხვადასხვა ძალადობრივი ქმედებები.

პროკურატურა დაკავებული ბრალდებულისათვის აღკვეთის ღონისძიების სახით პატიმრობის გამოყენების შუამდგომლობით, სასამართლოს კანონით დადგენილ ვადაში მიმართავს“ – წერს პროკურატურა.

• რა ხდება?

ყოფილი მაღალჩინოსანი, მიხეილ სააკაშვილის მმართველობის პერიოდში ერთ-ერთ ყველაზე გავლენიანი პოლიტიკური ფიგურა, ბაჩო ახალაია, რომელმაც „ქართული ოცნების“ პირობებში 9-წლიანი პატიმრობა მოიხადა, 25 დეკემბერს კვლავ დააკავეს. „ოცნება“ მას 4 ოქტომბრის მოვლენების „მთავარ ორგანიზატორად“ მოიაზრებს.

სუს-ის ბრიფინგის თანახმად, ბაჩო ახალაიას საცხოვრებელ სახლში არსებული IP მისამართიდან გარკვეული პირი (ან პირები) სისტემატურად უკავშირდებოდნენ იმ ადამიანებს, ვისაც გამოძიება 4 ოქტომბრის პროცესების ორგანიზატორებად მიიჩნევს: პაატა მანჯგალაძეს, მურთაზ ზოდელავას, ლაშა ბერიძეს, ირაკლი ნადირაძესა და პაატა ბურჭულაძეს.

სუს-ში აცხადებენ, რომ ეს კონტაქტი ინტერნეტ აპლიკაციების მეშვეობით უშუალოდ 4 ოქტომბერსაც ხორციელდებოდა იმ მომენტებში, როდესაც მომიტინგეებს სცენიდან გააცნეს პრეზიდენტის სასახლესთან დაკავშირებული გეგმა, ასევე – სასახლესთან მიმდინარე პროცესების დროსაც.

რის შესახებ მიმდინარეობდა საუბარი ინტერნეტით კავშირის დროს? – სუს-ს ამ კავშირების შინაარსის შესახებ დღეს არაფერი უთქვამს.

სუს-მა ასევე დააკავა ახალიას ცოლი ანი ნადარეიშვილიც, თუმცა გაათავისუფლეს და მის მიმართ სამართლებრივ დევნას, როგორც ჩანს, ჯერჯერობით არ აპირებენ.

ბაჩო ახალიამ, არსებული ინფორმაციით, ჩვენების მიცემაზე უარი თქვა.

ამავე თემაზე: 

დღეს, 26 დეკემბერს, უსახლკარო, მარტოხელა დედამ, მზია მეგრელიშვილმა აჭარის მთავრობის სახლის წინ მორიგი საპროტესტო აქცია გამართა.

მზია მეგრელიშვილი აჭარის არალეგიტიმური მთავრობის თავმჯდომარესთან, სულხან თამაზაშვილთან შეხვედრას ითხოვდა.

მზია ორი კვირის წინ გაათავისუფლეს სამსახურიდან, ხელვაჩაურის მერიის მუნიციპალური ინსპექციიდან. ხელვაჩაურის მერიამ იგი არჩევნებამდე ცოტა ხნით ადრე დაასაქმა ინსპექციაში კონტროლიორად.

„8 დეკემბერს დამიბარეს და მითხრეს, რომ ვეღარ გააგრძელებდნენ ჩემთან ხელშეკრულებას. მიზეზად მოიყვანეს ჩემი ჯანმრთელობის მდგომარეობა. უსახლკარო ვარ, მარტოხელა დედა, შაქრიანი დიაბეტით. როცა მასაქმებდნენ ძალიან კარგად იცოდნენ ჩემი მდგომარეობა. მაგრამ არჩევნები იყო, არ უნდოდათ ხმაური და მომცეს სამსახური. ახლა გაინაღდეს არჩევნები და მოგვატყუეს.

ერთი საყვედურიც კი არ მიმიღია სამი თვის განმავლობაში. ზედმიწევნით კარგად ვასრულებდი ჩემზე დაკისრებულ მოვალეობას, მაგრამ 8 დეკემბერს დამიბარეს და მითხრეს, ვეღარ გავაგრძელებთ შენთან ხელშეკრულებასო,“ – უთხრა „ბათუმელებს“ მზია მეგრელიშვილმა.

მისი თქმით, ის მერიის წინ დახვდა ხელვაჩაურის მერს, ზაზა დიასამიძესაც, რომელსაც ჰკითხა, რატომ გაათავისუფლეს სამსახურიდან. მზიას თქმით, მერმა მიზეზი არ უთხრა. მან გვითხრა, რომ დღემდე არ ჩაჰბარებია გათავისუფლების ოფიციალური ბრძანება.

„მე არ ვითხოვ მოწყალებას, მუშაობა მინდა. 1200 ლარი მქონდა ხელფასი. მარტო ვზრდი ჩემს 14 წლის შვილს, ბევრი არაა ეს თანხა, მაგრამ რაღაცნაირად მყოფნიდა. ახლა წინასაახალწლოდ სრულიად უსახსროდ დამტოვეს.

სამსახური მინდა. ამიტომ მოვედი მთავრობის სახლთან და ვითხოვ შეხვედრას სულხან თამაზაშვილთან. შემხვდეს, რატომ არ მხვდება? ყოველდღე მოვალ აქ, სანამ არ შემხვდება,“- ამბობს მზია მეგრელიშვილი.

მზია მეგრელიშვილის საქმეზე „ბათუმელებს“ წერილობითი განმარტება მოაწოდეს ხელვაჩაურის მუნიციპალიტეტის მერიის სახელით.

„მზია მეგრელიშვილი დასაქმებული იყო ხელვაჩაურის მერიის მუნიციპალურ ინსპექციაში, მგზავრთა ნაკადების ზედამხედველობის განყოფილებაში უფროს სპეციალისტად, გამოსაცდელი ვადით.  გამოსაცდელი ვადის დასრულების შემდეგ, გარკვეული კრიტერიუმების ვერ დაკმაყოფილების გამო, აღარ გაუგრძელეს ხელშეკრულება და ხელვაჩაურის მერიის წარმომადგენლებმა შესთავაზეს სხვა სამსახური.

ამასთან, აღსანიშნავია, რომ მოქალაქეს ბოლო წლებში, მიღებული აქვს არა ერთი ფინანსური დახმარება, როგორც აჭარის მთავრობის სარეზერვო ფონდიდან, ასევე ხელვაჩაურის მუნიციპალიტეტიდან.

გარდა ამისა, იგი სარგებლობს მედიკამენტების ვაუჩერით და არაერთხელ უსარგებლია ჯანდაცვის სამინისტროს მოქმედი პროგრამებით,“ – განმარტავენ ხელვაჩაურის მერიაში.

ამავე წერილში არ არის დაზუსტებული, კონკრეტულად რა კრიტერიუმები ვერ დააკმაყოფილა მზია მეგრელიშვილმა.

ამავე თემაზე:

ოფიციალური მონაცემებით, საქართველოში ბევრი მაღალჩინოსანი დაწინაურების პარალელურად გამდიდრდა. მაღალჩინოსნებმა შეიძინეს უძრავი ქონება, ძვირადღირებული ავტომანქანები, ძვირფასი ნივთები, მოგზაურობენ უცხოეთში და შვილებს ძვირადღირებულ სკოლებში ასწავლიან.

მათ შორის ბევრი მაღალჩინოსანი საყოფაცხოვრებო ნივთების შესაძენად ბევრად მეტს ხარჯავს, ვიდრე ერთი პენსიონერის მთელი წლის პენსიაა.

ძვირადღირებული ქონების შეძენასთან ერთად, „ოცნების“ დეპუტატები და მაღალჩინოსნები საკუთარი საცხოვრებელი სახლებისთვის ადგილს ირჩევენ მშენებლობებითა და საცობებით გადატვირთული დასახლებებისგან მოშორებით, სადაც ჰაერში მავნე ნივთიერებების მაღალი მაჩვენებელი არ ფიქსირდება.

ხშირად ირჩევენ ნაძვნარს, ფიჭვნარს, მთისა და წყალსაცავების ხედებს;

ფეშენებელურ სახლებს იშენებენ ქალაქგარეთ, გამწვანებულ ზოლში ან საერთოდაც ტყესთან ახლოს, დიდი და მდიდრული ეზოებით, დამხმარე ნაგებობებით და გასართობი სივრცით. ამ სახლების ფართობები მეტწილად 600 კვ.მეტრამდეა და კიდევ უფრო მეტი.

საცხოვრებელი სახლების სამშენებლოდ კი ისინი ირჩევენ ძვირადღირებულ, ენერგოეფექტურ მასალებს და არანაკლებ ძვირადღირებულ ავეჯს, სახლების მოსაწყობად.

ზოგიერთი მათგანის დეკლარაციაში წლიდან წლამდე ასობით ათასი ლარია მითითებული სამშენებლო-სარემონტო ხარჯებში. ხშირად ეს ხარჯები ჯამურად მილიონს და ზოგჯერ მეტსაც აღწევს – ეს ამ მაღალჩინოსნების სახლების აშენება-გარემონტების ხარჯებია.

არიან ისეთები, ვინც საჯარო სამსახურში მისვლამდე გამდიდრდა და ხელფასი, რასაც საკანონმდებლო ორგანოში იღებენ, მათთვის „ზღვაში წვეთია“, მაგრამ პოლიტიკაში მაინც მოვიდნენ. ამ კატეგორიას მეტწილად საქართველოს პარლამენტში შეხვდებით. მათგან საკანონმდებლო ინიციატივები ნაკლებად გვახსოვს.

მაშ, რისთვის მოვიდნენ ისინი პოლიტიკაში? – ბოლო წლებში საქართველოში არაერთი კვლევა გამოქვეყნდა პარლამენტიდან ბიზნესის ლობირების წარმატებულ პრაქტიკაზე – არაერთი დადასტურებული შემთხვევაა, როდესაც პოლიტიკაში მოსვლის შემდეგ ბიზნესმენი კიდევ უფრო გამდიდრდა.

„ბათუმელებმა“ ამჯერად დათვალა დანახარჯები, რაც მაღალჩინოსნებმა საკუთარი სახლ-კარის მშენებლობა-რემონტზე დახარჯეს.

• „ოცნების“ ფრაქციის თავმჯდომარის სახლები

„ოცნების“ ფრაქციის თავმჯდომარის თანამდებობა ირაკლი კირცხალიას მას შემდეგ ჩააბარეს, რაც მამუკა მდინარაძე პარლამენტიდან სუს-ში გადავიდა.

დეპუტატი ქონებრივ დეკლარაციაში წერს, რომ თბილისში, ჯაფარიძის ქუჩაზე სახლი აჩუქეს. მისივე ინფორმაციით, ნაჩუქარი სახლი მოიცავს 2 საცხოვრებელ ფართობს, ჯამში 95,2 კვ.მეტრს და ტექნიკურ სათავსოს – 37,6 კვ.მეტრს.

ზუსტად იმავე მისამართზე, იმავე შენობაში, ირაკლი კირცხალიას კიდევ შეუსყიდია რამდენიმე ქონება – საერთო ჯამში აქ დეპუტატი 588.12 კვ მეტრამდე ფართობს ფლობს, მათ შორის ღია ტერასას: შემაღლებაზე ახალაშენებული კორპუსი აერთიანებს ბინებს ქალაქის ხედით და ღია ტერასებით. ამ ქონებაში ირაკლი კირცხალიას 700 000-ზე მეტი ლარი აქვს გადახდილი.

ამ სახლთან ახლოს, დეპუტატს სხვა საცხოვრებელი სახლიც აქვს – დეკლარაციაში მიწის ნაკვეთის შესახებ მიუთითა და იქვე ჩაწერა, რომ ამ მიწის ნაკვეთზე შენობა-ნაგებობაც დგას, რომლის საერთო ფართობი 524.1 კვ.მეტრია. დეპუტატი აქვე ფლობს კიდევ ერთ შენობა-ნაგებობას, რომლის საერთო ფართობი 427.9 კვ.მეტრია, ეს ქონებაც უჩუქებიათ. 

დეპუტატს საჩუქრად მიუღია ასევე მიწის ნაკვეთები მცხეთაში, სოფელ ქსოვრისში. 2021 წელს კირცხალიას 6 მიწის ნაკვეთი – ჯამში 4 ჰექტარზე მეტი აჩუქეს. ერთ-ერთ მიწის ნაკვეთზე რვა შენობა დგას, საერთო ჯამში 1000 კვ.მეტრზე მეტია, მათ შორის არის საცხოვრებელი და დამხმარე ფართობები.

• 112-ის დირექტორის სახლი

საქართველოს შინაგან საქმეთა სამინისტროს სსიპ-ის საზოგადოებრივი უსაფრთხოების მართვის ცენტრის „112“-ის დირექტორი გიორგი არსოშვილი, ქონებრივ დეკლარაციაში წერს, რომ 2021 წელს მემკვიდრეობით მიიღო მიწის ნაკვეთი თბილისში, რუსუდან მიქელაძის ქუჩაზე. მან თანამესაკუთრედ მარინა ჯაყელი მიუთითა.

ის დეკლარაციაში ასევე უთითებს, რომ ამ მიწის ნაკვეთზე შენობა დგას, რომლის ფართობიც 700 კვ.მეტრზე მეტია.

2020-2021 წლებში ამ მიწის ნაკვეთთან დაკავშირებით [მაშინ დოესის ქუჩა ერქვა] არსოშვილი წერდა, რომ მემკვიდრეობით მიღებულ მიწის ნაკვეთზე იყო 521 კვ.მეტრი სახლი.

„ბათუმელებმა“ მოიპოვა დოკუმენტები, რომლითაც ირკვევა, რომ არსოშვილმა 2020 წელს ამ ნაკვეთზე სახლის რეკონსტრუქციის ნებართვა მიიღო. რეკონსტრუქციის პროექტი ითვალისწინებდა შენობის მოცულობის გაზრდას, ფასადის მაღალი ხარისხით ლესვა-ღებვას, ე.წ. შინგლით გადახურვას, ლითონის მოაჯირისა და ალუმინის ვიტრაჟის მოწყობას.

საჯარო რეესტრის 2021 წლის ამონაწერის მიხედვით, შენობა 771.4 კვ.მეტრია, რომელიც მოიცავს საცხოვრებელ ფართობს – 545 კვ.მეტრი, საზაფხულო ფართობს – 99 კვ.მეტრი, სარდაფს – 28 კვ.მეტრი, კიბის უჯრედისა და სადარბაზოს ფართობი – 16 კვ.მეტრი, დამხმარე ფართობი – 10 კვ.მეტრი, ავტოსადგომის ფართობი – 72 კვ.მეტრი.

არც ერთ დეკლარაციაში არსოშვილმა არ მიუთითა, რამდენი ლარი დახარჯა სახლის რეკონსტრუქციაზე.

• პარლამენტარ შოთა ბერეკაშვილის სახლი

პარლამენტარი შოთა ბერეკაშვილი მათ შორისაა, ვინც პარლამენტში ბიზნესიდან მივიდა.

მისივე ქონებრივი დეკლარაციის მიხედვით, ბერეკაშვილის მეუღლე, მაკა კვიციანი თბილისში, ხახულის ქუჩის N2-ში ფლობს 1196 კვ.მეტრ მიწის ნაკვეთს, რაშიც მას 300 000 დოლარი გადაუხდია 2019 წელს. ამ ნაკვეთის გვერდით მაკა კვიციანი კიდევ ერთ მიწის ნაკვეთს ფლობს, რომელიც 2016 წელს არის შეძენილი, აქვეა ფეშენებელური სახლი.

შოთა ბერეკაშვილმა დეკლარაციაში მიუთითა, რომ ეს ქონება 900 000 დოლარად შეისყიდა 2o16 წელს.

ამ სახლზე დაიბეჭდა ჟურნალებში, რომლებიც თანამედროვე ინტერიერის ტენდენციებით ინტერესდებიან.

საჯარო რეესტრის მონაცემებით, ამ სახლის საერთო ფართობი 708.8 კვ.მეტრია, მათ შორის საცხოვრებელი ფართობი 168 კვ.მეტრია, დამხმარე ფართობი – 120.8 კვ.მეტრი, სარდაფი – 235.9 კვ.მეტრი, საზაფხულო ფართობი – 135.4 კვ.მ, ავტოსადგომი კი – 48.6 კვ.მეტრი. სახლს ჯერ კიდევ მშენებარეს სტატუსი აქვს.

• დავით ნარმანიას სახლი

ენერგეტიკისა და წყალმომარაგების მარეგულირებელი კომისიის [სემეკი] თავმჯდომარემ, დავით ნარმანიამ თბილისის პრესტიჟულ უბანში ფეშენებელური სახლის მშენებლობა დაასრულა. ოფიციალური დეკლარირებული ინფორმაციით, დავით ნარმანიას ამ სახლზე დახარჯული აქვს მინიმუმ 1.1 მილიონზე მეტი ლარი, ამაში შედის სამშენებლოდ შესყიდული მიწის ნაკვეთის ფასი, რაშიც 180 000 დოლარი გადაუხდია.

• ეროვნული ბანკის პრეზიდენტის მშენებარე სახლები

საქართველოს ეროვნული ბანკის პრეზიდენტის, ნათია თურნავას ოჯახმა თბილისის პრესტიჟულ უბანში, ვაკეში ფეშენებელური სახლის მშენებლობა 2019 წელს დაიწყო, მაშინ თურნავა  ეკონომიკის მინისტრის მოადგილედ მუშაობდა, შემდეგ მინისტრი გახდა.

2025 წელს შევსებულ დეკლარაციაში მითითებულია, რომ მიწის ნაკვეთი, 380 კვ.მეტრი სამშენებლოდ ეროვნული ბანკის პრეზიდენტის მეუღლემ 2015 წელს 100 000 დოლარად შეისყიდა. 2020 წელს დავით ვეშაპიძეს აქ კიდევ 207 კვ.მეტრი ფართობი და ძველი შენობები შეუსყიდია 75 000 დოლარად.

გასულ წელს ამ ნაკვეთთან ერთ კოდზე გააერთიანეს კიდევ 2 მცირე ზომის მიწის ნაკვეთი, რომელიც თურნავას მეუღლეს 2024 წელს თბილისის მერიის ქონების მართვის სააგენტოს ელექტრონულ აუქციონზე შეუსყიდია 18 582 ლარად.

2019 წელს შევსებული დეკლარაციის მიხედვით, სახლის მშენებლობისთვის ეროვნული ბანკის პრეზიდენტის მეუღლემ 239 746 ლარი დახარჯა. იდენტური თანხაა მითითებული 2021-2023 წლებში შევსებულ დეკლარაციებშიც, როგორც დაუმთავრებელი მშენებლობის ხარჯი. ამ დროს შენობა შავი კარკასის მდგომარეობაშია.

2024 წლის დეკლარაციაში ნათია თურნავამ დაუმთავრებელი მშენებლობის ხარჯის სახით 350 000 ლარი მიუთითა, რაც დიდი ალბათობით იმას უნდა ნიშნავდეს, რომ მშენებლობა გააგრძელეს. ამავე დეკლარაციაში ის კიდევ ერთ სამშენებლო ხარჯზე წერს – საჩხერეში, სოფელ საირხეში, სახლის დაუმთავრებელი მშენებლობისთვის მის მეუღლეს 92 000 ლარი დაუხარჯავს.

2023 წლის დეკლარაციაში ნათია თურნავამ მშენებლობის ხარჯის სახით 239 746 ლარი მიუთითა და დააკონკრეტა, რომ ეს არის დაუმთავრებელი მშენებლობის ხარჯი. 2025 წელს შევსებულ დეკლარაციაში თურნავა ასევე წერს, რომ მან და მეუღლემ, დავით ვეშაპიძემ სარემონტო ხარჯის სახით 262 000 ლარი დახარჯეს.

დოკუმენტების მიხედვით, რომელიც ნათია თურნავას მეუღლის, დავით ვეშაპიძის სახელზეა გაცემული, მშენებარე საცხოვრებელ სახლს აქვს დიდი ღია ტერასა, საზაფხულო ფართობი, მცირე ზომის აუზი ეზოში და ასე შემდეგ. პროექტის მიხედვით, სახლის საერთო ფართობი დამხმარე ნაგებობებით 561,8 კვადრატული მეტრია. აქედან 462 კვადრატული მეტრი უშუალოდ საცხოვრებელი ფართობია.

ამ პროექტისთვის მინისტრის მეუღლემ დადგენილი კ2 კოეფიციენტის გაზრდა ითხოვა და თანხმობაც მიიღო.

ნათია თურნავას დეკლარაციაში კიდევ ორი მშენებარე სახლის შესახებ წერია. ეროვნული ბანკის პრეზიდენტმა დეკლარაციაში ჩაწერა, რომ 2024 წელს, 200 კვ.მეტრამდე სახლი იყიდა ბაკურიანში 123 710 ლარად. სახლზე მიმაგრებულია 600 კვ. მეტრ მიწის ნაკვეთი და ნათია თურნავა ამ ქონებას იყოფს შვილთან – ირაკლი ვეშაპიძესთან.

დეკლარაციაში ჩანაწერი ქმნის შთაბეჭდილებას, თითქოს უკვე აშენებული სახლი შეისყიდა ეროვნული ბანკის პრეზიდენტმა. თუმცა დოკუმენტებით დგინდება, რომ ბორჯომის მუნიციპალიტეტის მერიას სახლის მშენებლობის ნებართვის მოსაპოვებლად ირაკლი ვეშაპიძემ მიმართა, პროექტის საინფორმაციო ბანერზე კი დამკვეთად ნათია თურნავაა მითითებული.

პროექტის მიხედვით, სახლი ორსართულიანია – მიწისზედა ერთი სართული და მანსარდა.

როგორც დეკლარაციაშია მითითებული, კიდევ ერთ სახლს ეროვნული ბანკის პრეზიდენტი და მისი მეუღლე სოფელ არაშენდაში აშენებენ.

• მოსამართლე გიორგი მიქაუტაძის სახლი

თავისი მასშტაბით, დიზაინითა და მდებარეობით, შეიძლება ითქვას, რომ მოსამართლე გიორგი მიქაუტაძისა და მისი მეუღლის სახლი ერთ-ერთი ყველაზე გამორჩეულია, რასაც მიწის ნაკვეთის დამრეცი ფორმაც უწყობს ხელს. ტერასული სახლი დიდი ვიტრაჟებით, საცურაო აუზით და გამწვანებული ეზოთი მოსამართლეს თბილისთან ახლოს, ნეგოს ტყის ქუჩაზე აუშენებია.

2500 კვ.მეტრი მიწის ნაკვეთი სამშენებლოდ მოსამართლეს 2020 წელს შეუსყიდია 90 000 დოლარად. მან ასევე დეკლარაციაში მიუთითა, რომ აქ სარემონტო სამუშაოები მიმდინარეობს. როგორც მოსამართლე ბოლო სამი წლის დეკლარაციაში წერს, ამ სახლის მშენებლობისთვის 765 000 ლარი დახარჯა. ამას მიწის ნაკვეთის შესაძენად გადახდილ თანხასაც თუ დავუმატებთ, მილიონზე მეტი ლარი გამოვა.

დაასრულა თუ არა მოსამართლემ სახლის რემონტი საბოლოოდ, უცნობია.

სამშენებლო დოკუმენტების მიხედვით, პროექტი ითვალისწინებდა ალუმინის ვიტრაჟების მოწყობას, ფასადი ხის პანელებითა და ბეკონის ეფექტის ფილებით შეფუთვას, სამშენებლო მასალები კი ენერგოეფექტური უნდა ყოფილიყო.

• შს მინისტრის სახლი

ქონებრივი დეკლარაციის მიხედვით,  შს ახალი მინისტრის ოჯახის საკუთრებაშია ორი საცხოვრებელი სახლი, ჯამში 700 კვ.მეტრზე მეტი; 4 მიწის ნაკვეთი; 5 ბინა; 2 კომერციული ფართობი და სამი ავტოფარეხი.

სოლიდურია გეკა გელაძის ყოველწლიური დანახარჯებიც, თუმცა ბევრად სოლიდური უნდა იყოს სამშენებლო ხარჯები, რაზეც გეკა გელაძე დეკლარაციებში არ უთითებს.

2024 წელს შევსებული დეკლარაციის თანახმად, გეკა გელაძის მეუღლემ 2017 წელს იყიდა მიწის ნაკვეთი კოჯორში, რომელშიც 11 000 ლარი გადაიხადა. ფართობი მითითებული არ არის, თუმცა ამ ნაკვეთთან დაკავშირებით გეკა გელაძე დეკლარაციაში შენიშვნის სახით უთითებს, რომ აქ 2 ნაკვეთი შეისყიდეს 2012 წელს და სახლის მშენებლობის შემდეგ გააერთიანეს. მინისტრმა დეკლარაციაში მიუთითა ასევე შენობის მასშტაბზე, თუმცა მშენებლობის ხარჯებზე არაფერი ჩაწერა.

დეკლარაციის მიხედვით, ამ სახლის საერთო ფართობია 403.3 კვ.მეტრი. მათ შორის, საცხოვრებელი ფართობი 195.7 კვ.მეტრია, საზაფხულო ფართობი – 93.1 კვ.მეტრი, სარდაფი – 72 კვ.მეტრი; კიბის უჯრედი და სადარბაზოს – 13.5 კვ.მეტრი; მიწის ნაკვეთი 817 კვ.მეტრია.

8 მილიონ 267 ათას 400 ლარია გათვალისწინებული აჭარის რეგიონის პოპულარიზაციისთვის 2026 წლის ბიუჯეტში. აჭარის ტურიზმის დეპარტამენტი ამ თანხას ტენდერის გარეშე, გამარტივებული წესით დახარჯავს.

გამარტივებულ შესყიდვებზე თანხმობის მისაღებად აჭარის ტურიზმის დეპარტამენტმა სახელმწიფო შესყიდვების სააგენტოს უკვე მიმართა.

დეპარტამენტის განაცხადის მიხედვით, 2026 წლის იანვრიდან 2026 წლის 31 დეკემბრის ჩათვლით პერიოდში სარეკლამო მომსახურებაში იგულისხმება აჭარის რეგიონის „პოპულარიზაცია საერთაშორისო ან/და სამიზნე ქვეყნებში სხვადასხვა სარეკლამო აქტივობებით [მათ შორის სატელევიზიო რეკლამის, ონლაინ რეკლამის, გარე რეკლამის, ბეჭდური მედიისა და სხვა სარეკლამო საშუალებებით].“

„მარკეტინგული კამპანიების წარმოება მიმდინარეობს დაახლოებით 25 ქვეყანაში… ამასთან, შიდა ტურიზმის განვითარებას აჭარის ტურიზმის დეპარტამენტი სეზონურობის დაძლევის ერთ-ერთ უმნიშვნელოვანეს სტრატეგიად მიიჩნევს, შესაბამისად შიდა ტურიზმის პოპულარიზაცია, მხარდაჭერა და განსხვავებული კამპანიების გრძელვადიან რეჟიმში გაგრძელება მიზანშეწონილად მიგვაჩნია 2026 წლისთვისაც“ – წერს დეპარტამენტი.

როგორ აქვს გადანაწილებული 8 267 400 ლარი დეპარტამენტს? – შესყიდვების პორტალის მიხედვით:

• „რეგიონის პოპულარიზაცია საერთაშორისო ან/და სამიზნე ქვეყნებში სხვადასხვა სარეკლამო აქტივობებით [მათ შორის სატელევიზიო რეკლამის, ონლაინ რეკლამის, გარე რეკლამის, ბეჭდური მედიისა და სხვა სარეკლამო საშუალებებით] – ბიუჯეტი 4 200 000 ლარი.
• სხვადასხვა სარეკლამო საშუალებით რეგიონის ტურისტული პოტენციალის რეკლამირება და ტურიზმის სტიმულირება – 896 400 ლარი.
• საერთაშორისო ღონისძიებებში მონაწილეობა და საერთაშორისო ღონისძიებების ორგანიზება საქართველოში ან საზღვარგარეთ საერთაშორისო ტურისტულ ან/და ტურიზმთან დაკავშირებული დარგების გამოფენებში, კონფერენციებში, სემინარებში, ფორუმებში, ფესტივალებში, ღონისძიებებსა და სამუშაო შეხვედრებში მონაწილეობა, ასევე აჭარის რეგიონის ტურისტული შესაძლებლობების წარმოჩენის მიზნით პრეზენტაციების, კონფერენციების, ფორუმების, ფესტივალის, სამუშაო შეხვედრების, სხვადასხვა ღონისძიების და პიარაქტივობის ორგანიზება – 251 000 ლარი.
• სხვადასხვა ღონისძიების, წარმოდგენის, შოუების, ინსტალაციების, ფესტივალებისა და სხვა პიარაქტივობების ორგანიზება შიდა ტურიზმის სტიმულირების, ტურისტული პროდუქტების, ტრადიციების, კულტურის პოპულარიზაციისა და მოგზაურობის წახალისების მიზნით – 700 000 ლარი.
• ღონისძიებების, მასტერკლასების, ექსპედიციების და სხვადასხვა აქტივობის ორგანიზება მომსახურების ხარისხის ამაღლების მიზნით – 400 000 ლარი.
• ტურიზმის ინდუსტრიაში წლის საუკეთესო ტურისტული სერვისების მიმწოდებელი ობიექტების დაჯილდოების ღონისძიების ორგანიზება – 200 000 ლარი.
• რეგიონში ტურიზმის პოპულარიზაციისთვის სარეკლამო-საპრეზენტაციო ფოტო მასალის დამზადება/შექმნა; ფოტომომსახურებები – 300 000 ლარი.
• საერთაშორისო ღონისძიებების ორგანიზებასთან, საერთაშორისო ტურისტულ ან/და ტურიზმთან დაკავშირებული დარგების გამოფენებში, კონფერენციებში, სემინარებში, ფორუმებში, ფესტივალებში, ღონისძიებებსა და სამუშაო შეხვედრებში მონაწილეობა – 660 000 ლარი.
• რეგიონში ტურიზმის პოპულარიზაციისათვის სარეკლამო – საპრეზენტაციო ვიდეორგოლის დამზადება – 500 000 ლარი.
• საინფორმაციო ბროშურებისა [მათ შორის, სახელმძღვანელოების, გაიდების, გზამკვლევების] და სხვა მასალების მომზადება-ბეჭდვა – 100 000 ლარი.
• საერთაშორისო დაჯავშნების პლატფორმებზე [Airbnb, Booking, Vrbo, Tripadvisor] აჭარის რეგიონიდან რეგისტრირებული განთავსების არარეგისტრირებული ობიექტების [კერძო პირები, რომლებიც აქირავებენ კერძო სახლებს, ბინებს და ოთახებს] სტატისტიკური მონაცემების, ტენდენციების, დატვირთვის კოეფიციენტის კვლევა – 60 000 ლარი“.

აჭარის 2026 წლის ბიუჯეტის მიხედვით ტურიზმისა და კურორტების დეპარტამენტისთვის ჯამში 21 მილიონ 215 ათასი ლარია გამოყოფილი. 2025 წელს გამოყოფლილი იყო 20 მილიონ 494 ათასი ლარი, ხოლო 2024 წელს – 13 მილიონ 966 ათას 900 ლარი.

ბიუჯეტის კანონის მიხედვით დეპარტამენტში 2026 წელს, ისევე როგორც მიმდინარე წელს, კვლავ 52 ადამიანი იქნება დასაქმებული [2024 წელს დასაქმებული იყო 47 ადამიანი].

აჭარის ტურიზმის დეპარტამენტში დასაქმებულთა ხელფასებისთვის კი, 2024 წელს 1 413 000 ლარი დაიხარჯა, 2025 წელს – 1 987 000 ლარი, ხოლო 2026 წელს – 2 176 200 ლარი დაიხარჯება.

ბათუმის საპროტესტო აქციების მედროშემ თავის თანამებრძოლებს, ბათუმის აქციების მონაწილეებს ციხიდან წერილი გამოუგზავნა. ზურა ჭავჭანიძე ამ წერილით ამხნევებს მათ და სწერს ასევე, რომ მიუხედავად იმისა, რომ შიმშილობს, თავს კარგად გრძნობს.

ზურა ჭავჭანიძე განსაკუთრებულ მადლობას უხდის მათ, ვინც წერილებს უგზავნის. ამბობს, რომ ეს წერილები მას აძლიერებს.

„ხალხო, ძალიან მიყვარხართ. მომენატრეთ, თქვენი სიყვარული და თანადგომა მაძლიერებს აქ, ციხეში. ვიცი, რომ ღელავთ ჩემზე, უკვე 25 დღეა ვშიმშილობ [ზურა ჭავჭანიძე დღეს, 26 დეკემბერს, უკვე 41-ე დღეა შიმშილობს – რედ]. მე როგორც ვთქვი, თავი გადადებული მაქვს ჩემი სამშობლოსთვის და ჯერჯერობით ვუძლებ, სანერვიულო არაფერი მჭირს, მუდმივად ექიმების კონტროლის ქვეშ ვიმყოფები. ჯერჯერობით კოსმონავტის წნევა მაქვს, როგორც ექიმები მეუბნებიან. აქამდე საერთოდ არ ვიცოდი, რამდენი იყო ჩემი წნევა. ასე შინაურულად იმიტომ ვწერ, რომ ყველას ჩემს შინაურებად აღგიქვამთ.

მე თუ ვშიმშილობ მხოლოდ იმისთვის, რომ ყველას ყურამდე და გულამდე მივაწვდინო, რა კატასტროფის წინაშე ვდგავართ. მიყვარხართ გეხვევით“.

ზურა ჭავჭანიძე ბათუმის პროევროპული საპროტესტო აქციების მედროშეა. პროკურატურა  მას ედავება სისხლის სამართლის კოდექსის 19-222-ე მუხლის მეორე ნაწილის ა ქვეპუნქტით, რაც სტრატეგიული და განსაკუთრებული მნიშვნელობის ობიექტის ხელში ჩაგდების მცდელობას გულისხმობს ჯგუფურად. მას ასევე ედავებიან სსკ-ის 225-ე მუხლის მეორე ნაწილით, რაც გულისხმობს ჯგუფურ ძალადობაში მონაწილეობას. ეს მუხლი სასჯელის სახით 6 წლამდე თავისუფლების აღკვეთას ითვალისწინებს.

ადვოკატის თქმით, ზურა ჭავჭანიძის საქმეში მხოლოდ ერთი ვიდეოკადრია, რომელზეც ზურაბ ჭავჭანიძე ჩანს დროშით ხელში.

9 დეკემბერს თბილისის საქალაქო სასამართლოში გამართულ პროცესზე ზურაბ ჭავჭანიძემ მოსამართლეს მიმართა:

„მე ვარ სოხუმელი და 15 ვაჟკაცი სოხუმში დამეღუპა საქართველოსთვის ბრძოლაში, იმისთვის, რომ ყველამ ვიცხოვროთ კარგ საქართველოში. ვილაპარაკებ ფაქტებით: რას ნიშნავს რუსული მმართველობა? მილიონამდე ქართველი მოკლეს, ყველა რუსი მმართველის ოცნებაა „საქართველო ქართველების გარეშე“.

მიუხედავად იმისა, ვინ ვართ და ვის ვემხრობით, მიმდინარეობს მიზანმიმართული გენოციდი, საქართველოს გაქრობა, გადაშენება, ან გადაჯიშება. ამის მაგალითებს ვხედავთ. „მე თუ კარგად ვარ, ცხოვრება აწყობილიაო“, – ფიქრობენ ადამიანები. ყველას გვემუქრება ხიფათი.

ნებისმიერი ძალადობის წინააღმდეგი ვარ მთელი ცხოვრებაა. „ღმერთი სიყვარულია, გიყვარდეთ“ – დიდ კედელზე მაქვს დაწერილი. სიკეთე, სიყვარული, პატიოსნება და კანონმორჩილება მამოძრავებს.

სუსის თანამშრომელი მოვიდა სახლში და მითხრა თვითონვე, ყველაფერი ვიცით შენზე და კარგი კაცი ხარო. ერთადერთი ჩემი მოწოდება არის სიკეთე და სიყვარული, „მე მოსისხლე მტერიც მიყვარს და თუ მიყვარს, მართლა მიყვარს“ – ესაა ქართული სულის გამოძახილი. პატიოსნებისა და სიყვარულის მეტი მე არაფერი გამაჩნია“, – თქვა სასამართლო სხდომაზე ზურაბ ჭავჭანიძემ.

გარემოს ეროვნული სააგენტოს ცნობით, 27-31 დეკემბერს საქართველოში მოსალოდნელია ცივი და ნოტიო ჰაერის მასების გავრცელება, დროგამოშვებით ნალექი, ზოგან ძლიერი, უმეტესად თოვლის სახით.

„შესაძლებელია ქარის გაძლიერება, მთიან რაიონებში – ნისლი, ქარბუქი, გზებზე ლიპყინული. 29-30 დეკემბერს სანაპირო რაიონებში შესაძლებელია ელჭექი, ზღვაზე 4-6 ბალამდე შტორმი, ქვეყნის მაღალმთიან რაიონებში – ზვავსაშიშროება“ – წერს სააგენტო.

უწყების ცნობით, დიდთოვლობის, ხილვადობის გაუარესების, ქარბუქის, ლიპყინულისა და ზვავსაშიშროების გამო საავტომობილო გზების ცალკეულ მონაკვეთებზე შესაძლებელია შეიზღუდოს ტრანსპორტის მოძრაობა.

სააგენტო ასევე აღნიშნავს, რომ მოსალოდნელმა ნალექმა დასავლეთ საქართველოს მდინარეებზე შესაძლებელია წყლის დონის მნიშვნელოვანი მატება გამოიწვიოს და საფრთხის დონეს აფასებს, როგორც „საშუალოს“.

დღეს, 26 დეკემბერს, თბილისში პოლიტიკოსმა ქალებმა 4 ოქტომბრის საქმეზე დაკავებული ევა შაშიაშვილის გათავისუფლების მოთხოვნით მიმართეს პროკურატურას.

„ჩვენ, ქალი პოლიტიკოსები, ვდგავართ ერთად და მხარდაჭერას და სოლიდარობას ვუცხადებთ წინასწარ პატიმრობაში მყოფ ქალს, ევა შაშიაშვილს, ქვრივს, მარტოხელა დედას, რომელსაც ჰყავს შეზღუდული შესაძლებლობის მქონე შვილი. მას დედის გარდა სხვა მზრუნველი არ გააჩნია.

ჩვენ, როგორც ქალები, დედები და პოლიტიკოსები, ვიაზრებთ დედა-შვილის მდგომარეობას და მოვითხოვთ ევა შაშიაშვილს აღკვეთი ღონისძიების სახით შეფარდებული პატიმრობა შეეცვალოს გირაოთი.

ამიტომ მოვითხოვთ გენერალურ პროკურორთან გიორგი გვარაკიძესთან და მის მოადგილეებთან ზურაბ ბელთაძესთან, გიგა ძნელაძესთან, ავთანდილ კოჭლამაზაშვილთან და ამირან გულუაშვილთან შეხვედრას.

ჩვენ ვრჩებით დღეს 18 საათამდე პროკურატურაში და ველოდებით პასუხს.

აქვე მოვუწოდებთ ევას და მისი შვილის გულშემატკივრებს, მოვიდნენ საქართველოს პროკურატურასთან ორთაჭალაში და გამოხატონ სოლიდარობა და მხარდაჭერა, შეუერთდნენ ჩვენს მოთხოვნას“  – აცხადებენ პოლიტიკოსი ქალები.

ისინი დღეს, 26 დეკემბრის დილიდან პროკურატურაში იმყოფებიან და ითხოვენ შეხვედრას გადაწყვეტილების მიმღებ პირებთან.

ევა შაშიაშვილი 4 ოქტომბრის საქმეზეა დაკავებული და მის გათავისუფლებას ასევე მოითხოვს შშმ პირთა ალიანსიც.

ევა შაშიაშვილი მეორე თვეა წინასწარ პატიმრობაში იმყოფება. არის ონკოლოგიური პაციენტი და ერთადერთი პირი, რომელიც უზრუნველყოფს შეზღუდული შესაძლებლობის მქონე შვილის მეურვეობასა და მხარდაჭერას.

აქტივისტი როსტო ზარანდია ზუგდიდის მერიამ გეოგლიფის გამო 2 ათასი ლარით დააჯარიმა.

380 მეტრი სიგრძის გეოგლიფი – „მეგობარი აქტი“, 13 ნოემბერს გამოჩნდა ანაკლიის სანაპიროსთან.

„აღნიშნულმა პირმა სოფ. დიდინეძში მიწათსარგებლობის უფლების გარეშე ისარგებლა სახელმწიფო საკუთრების მიწის ნაკვეთით“ – ამ მიზეზით უჩივლა აქტივისტს ზუგდიდის მერიამ.

„სოფლის საძოვარზე აკაწრული ტექსტის გამო დამაჯარიმა მერიამ“ – წერს ფეისბუქზე როსტო ზარანდია.

„მეგობარი აქტის“ „ამოკაწვრით“ როსტო ზარანდიამ „ქართული ოცნების“ ანტიდასავლური პოლიტიკა გააპროტესტა, რომელიც აქტივისტის აზრით ზიანს აყენებს საქართველოს სახელმწიფო ინტერესებს.

„გამოხატვის ფორმად გამოვიყენეთ ეს ფორმა – აგროარტი, რათა ჩვენი მოლოდინი დაგვეფიქსირებინა „მეგობარი აქტის“ მიღების პროცესთან დაკავშირებით და მადლიერება გამოვხატეთ გაწეული შრომისთვის.

ასევე, გვინდოდა გვეჩვენებინა ქართველ ხალხსა და რუსულ მთავრობას შორის პოზიციათა განსხვავება დასავლელი პარტნიორების მიმართ.

ფაქტია, საქართველოში დემოკრატიის ზრდაში აქამდე დასავლეთი დიდ შრომას დებდა და არც მომავალში უნდა ვიყოთ რუს მტერთან პირისპირ, მოკავშირეების გარეშე.

არაფერი დამიზიანებია, არაფერი მიმიტაცებია. ჩემი ქვეყანაა და მინდა გავივლი მინდორში, მინდა არა.

ვერავინ დამასანქცირებს ამის გამო. კანონი არ დამირღვევია, ბუნებისთვის ზიანი არ მიმიყენებია, პირიქით“- ამბობს „ბათუმელებთან“ როსტო ზარანდია და ამ გადაწყვეტილების გასაჩივრებას აპირებს.

გეოგლიფისთვის როსტო ზარანდიას მერიის გარდა, გარემოს და სოფლის მეურნეობის სამინისტროც უჩივის, – „ნიადაგის ნაყოფიერი ფენის მოხსნა-გადაადგილების“ მოტივით.  სასამართლო ხვალ, 26 დეკემბერსაა დანიშნული.

საქართველოს სახალხო დამცველი ამბობს, რომ „ქართული ოცნების“ მიერ მიღებულ საკანონმდებლო ცვლილებებს, რომელიც თავისუფლად შეკრებასა და მანიფესტაციებს შეეხება, საკონსტიტუციო სასამართლოში გაასაჩივრებს.

ეს განცხადება მან საზოგადოებრივ მაუწყებელზე გადაცემა „დღის თემაში“ სტუმრობისას გააკეთა.

ჟურნალისტმა სახალხო დამცველს კითხვა დაუსვა 2025 წელს საქართველოში ადამიანის უფლებების მდგომარეობასთან დაკავშირებით და გამკაცრებულ კანონებზე, რომელიც ოცნებამ ბოლო ერთ წელიწადში მიიღო. მათ შორის ერთ-ერთი ბოლო ცვლილება ეხებოდა ტროტუარზე დგომის აკრძალვას.

ლევან იოსელიანის თქმით, კანონმდებლობაში შეტანილ ცვლილების შესახებ მან პირადად მოითხოვა დასკვნა ეუთო-ოდირისგან. ვინაიდან ცვლილებები კანონმდებლობაში ორ ეტაპად განხორციელდა, სახალხო დამცველმა ორივე შემთხვევაში გაგზავნა ცვლილებების პაკეტი გაიგზავნა ეუთო-ოდირში.

ლევან იოსელიანის თქმით, ეუთო-ოდირის მიერ „კანონმდებლობაში შეტანილი ეს ცვლილებები შეფასდა ნეგატიურად“.

„მთელი რიგი დასაბუთება არის, თუ რატომ ზღუდავს ეს ცვლილებები ადამიანის უფლებებს ცალკეული მიმართულებებით. რაც შეეხება გაფრთხილებას [შსს-ს გაფრთხილება სანამ აქციას ჩაატარებ], გაფრთხილების შესახებ ჩანაწერი არსებობს კონსტიტუციაში, ეს არ არის სიახლე, ეს ყოველთვის ასე იყო, თუმცა მნიშვნელოვანია რომ ეს გაფრთხილება თავისი შინაარსით არ გახდეს რაღაც სავალდებულო ნებართვის აღებისმაგვარი, რაც თავისთავად კონსტიტუციასთან წინააღმდეგობაში მოდის.

მეორე მხრივ ამაზე არსებობს საკონსტიტუციო სასამართლოს გადაწყვეტილებაც, რომ ასეთი ტიპის გაფრთხილება არ უნდა გულისხმობდეს რაღაც სანებართვო ვალდებულებას აქციის მონაწილეების მიმართ, რომლებიც ვთქვათ სპონტანურად მართავენ აქციას. მინდა იცოდეს საზოგადოებამ, რომ ჩვენ ძალიან საფუძვლიანად ვმუშაობთ ამ ცვლილებების მიმართულებით – დაწყებული ნიღბების ბლანკეტური აკრძალვიდან, დამთავრებული სხვა ტიპის ცვლილებებით, რომლებიც არის კანონმდებლობაში შესული,“ – თქვა ლევან იოსელიანმა.

ლევან იოსელიანის თქმით, იმ უფლებებს, რაც კონსტიტუციით არის გარანტირებული, წესით ვერაფერი ვერ უნდა შეეხოს. მან ასევე ისაუბრა აქციაზე ნიღბების ტარების აკრძალვაზე და თქვა, რომ არ მიაჩნია სწორად.

„ბლანკეტურად ნიღბების აკრძალვა ეს არ მიმაჩნია სწორად. როდესაც კანონმდებლობამ ბლანკეტურად ყველანაირი ნიღბის გამოყენება აკრძალა მშვიდობიანი შეკრების პირობებში, რაც გულისხმობს იმას, რომ ჩვენ თუ ვმონაწილეობთ მშვიდობიან შეკრებაში და არ გვინდა რომ დავავადდეთ რაღაც გადამდები დაავადებით და ამისთვის გავიკეთოთ ნიღაბი, ამ ნიღბის გაკეთება კანონმდებლობით არის აკრძალული. რაც მე ვფიქრობ, არათანაზომიერი სანქციაა  შეკრებასთან მიმართებაში.

ზოგადად ლოგიკური არ არის. როგორ შეიძლება ადამიანს აუკრძალო ნიღბის გაკეთება თუ მას ეს ესაჭიროება. მარტო ჯანმრთელობის ნაწილი არ არის? არსებობს ნიღაბი, რომელიც რაღაც რელიგიური ატრიბუტი არის ვიღაცისთვის და ასე შემდეგ,“- თქვა ლევან იოსელიანმა.

ჟურნალისტმა სახალხო დამცველს შეახსენა ხელისუფლების არგუმენტი, რომლის მიხედვითაც, როდესა პირი აქციაზე ნიღბითაა და ძალადობს, საგამოძიებო პროცესში ჭირს იდენტიფიცირება პირების.

„მესმის, მაგრამ თუ პროტესტი სცდება მშვიდობიან ფორმას და გადადის ძალადობრივში, იქ ნიღაბი საერთოდ არაფერ შუაში არ არის, ხომ? ჩვენ ვსაუბრობთ მშვიდობიან შეკრებაზე. მშვიდობიანი შეკრების პირობებში მაგალითად, სამედიცინო ნიღაბი, რასაც ძალიან ხშირად ვხმარობთ ხოლმე, ამ ნიღბის აკრძალვა არ მიმაჩნია გამართლებულად. ის რომ ვიღაცამ მერე გადაწყვიტოს კანონის დარღვევა და ამიტომ საგამოძიებო ორგანოს უნდა რომ გაიადვილოს   თავისი ამოცანა და ამით უფრო დიდი სიკეთე დააზიანოს, ეს ვერ იქნება არგუმენტი.

სწორედ აქედან გამომდინარე, არა მარტო ეს, არამედ სხვა ცვლილებებზეც მიმდინარეობს დღეს მუშაობა და სავარაუდოდ წელს ალბათ ვერ მოესწრება, ან თუ მოესწრება შეიძლება წელსაც, წარვადგენთ საკონსტიტუციო სარჩელს, რომლითაც მთელი რიგი მუხლები, რომელიც ბოლო წელს იქნა მიღებული პარლამენტის მიერ, იქნება გასაჩივრებული,“ – თქვა ლევან იოსელიანმა.

საქართველოს სახალხო დამცველის თქმით, სახალხო დამცველი საკონსტიტუციოში გაასაჩივრებს კანონმდებლობაში ჯარიმების ოდენობაზე და უალტერნატივო პატიმრობებზე შეტანილ ცვლილებებსაც.

„პროპორციულობის და თანაზომიერების პრობლემას ვხედავთ ჩვენ. უალტერნატივოდ პატიმრობის გამოყენება, შემდგომში პირდაპირ სისხლის სამართლებრივი სასჯელის შემოღება… ამიტომ ვთვლით, რომ ეს ის ნაწილია, რომელიც უნდა გასაჩივრდეს საქართველოს საკონსტიტუციო სასამართლოში და ვფიქრობ რომ საქართველოს საკონსტიტუციო სასამართლომ უნდა იმსჯელოს ამ სასჯელების თანაზომიერების შესახებ.

მე იმედი მაქვს რომ ეს ძალიან საინტერესო განხილვა იქნება და ჩვენ მაქსიმალურად ყველაფერს გავაკეთებთ იმისთვის, რომ ეს ცვლილებები მოვიდეს შესაბამისობაში იმ საერთაშორისო სტანდარტებთან, რაც დღეს არსებობს,“- განმარტა ლევან იოსელიანმა.

სახალხო დამცველი ზუსტ დროს ვერ აკონკრეტებს, თუმცა პირობას დებს, რომ საკონსტიტუციო სასამართლოში სარჩელი მალე შევა – მიმდინარე წლის ბოლოს ან მომავალი წლის დასაწყისში.

საკონსტიტუციო სარჩელი შეეხება ცვლილებათა პაკეტს და მის თანმდევ კანონებს, რაც შეკრებისა და მანიფესტაციების შესახებ კანონში განხორციელებულმა ცვლილებებმა გამოიწვია

საქართველოს ეროვნული ბანკის პრეზიდენტის, ნათია თურნავას ხელზე ასაღები ხელფასი, 2024 წელს, თვეში 29 000 ლარი იყო. შესაბამისად, თურნავამ დეკლარაციაში ჩაწერა, რომ 2024 წელს ხელფასის სახით 349 039 ლარი მიიღო. თუმცა, ნათია თურნავას სრული, ანუ დასაბეგრი ხელფასი თვეში 37 729 ლარი ყოფილა, რაც წელიწადში 452 748 ლარია.

შესაბამისად, ნათია თურნავას ბიუჯეტიდან, ერთ წელში ზუსტად იმდენი თანხა ერიცხებოდა ხელფასის სახით, რაც ქალაქად მცხოვრები 1293 პენსიონერის ერთი თვის პენსიაა.

70 წლამდე ქალაქად მცხოვრები ერთი პენსიონერი, წლის განმავლობაში, პენსიის სახით იღებს 4200 ლარს. აქედან გამომდინარე, იმ თანხას, რაც თურნავამ 2024 წლის განმავლობაში ხელფასის სახით აიღო, 107 პენსიონერი ერთი წლის განმავლობაში მიიღებდა.

შრომის ანაზრაურების შესახებ კანონით, საჯარო მოხელეების ხელფასი ყოველწლიურად 10%-ით იზრდება.

ეს იმას ნიშნავს, რომ 2025 წელს ნათია თურნავა თვეში მინიმუმ 3700 ლარით მეტს მიიღებდა, ვიდრე შარშან. თუმცა ზუსტი მონაცემი მას შემდეგ გახდება ცნობილი, როცა ნათია თურნავა მიმდინარე წლის ქონებრივ დეკლარაციას შეავსებს.

ნიშანდობლივია ისიც, რომ ნათია თურნავა ახალი წლიდან კიდევ 10 %-ით მეტ ხელფასს მიიღებს, ვიდრე 2025 წელს იღებდა.

ეროვნული ბანკის ვალდებულებაა, ფასების სტაბილურობის უზრუნველყოფა და ეფექტიანი მონეტარული პოლიტიკის განხორციელება სტაბილურობის მისაღწევად, ქვეყნის ეკონომიკის გრძელვადიანი ზრდის ხელშეწყობა.

სწორი მოლოდინის ჩამოყალიბება იმისთვის, რომ საზოგადოებამ მიიღოს ეკონომიკურად გამართლებული გადაწყვეტილებები.

„ოცნების“ მთავრობა თანახმაა სუს-მა ხელფასებისთვის გამოყოფილი თანხის ოდენობა წლის ბოლომდე კიდევ 5 მილიონი ლარით გაიზარდოს.

2025 წლის ბიუჯეტის კონსოლიდირებული ვერსიით, სუს-ში მომუშავეთა ხელფასებისთვის, ჯამში, 138 მილიონ 690 ათასი ლარია გამოყოფილი. მთლიანად სუსის დაფინანსებისთვის კი – 271 მილიონ 500 ათასი ლარი.

მომავალ წელს, 2026 წლის ბიუჯეტის მიხედვით, სუს-ი მთლიანობაში 380 მილიონი ლარით დაფინანსდება, ხელფასებისთვის კი ჯამში 205 მილიონ 370 ათასი ლარია გათვალისწინებული.

„საქართველოს სახელმწიფო უსაფრთხოების სამსახურს მიეცეს თანხმობა მისთვის წლიური საბიუჯეტო კანონით გათვალისწინებული ხარჯების ეკონომიკური კლასიფიკაციის „შრომის ანაზღაურების“ მუხლით დამტკიცებული ასიგნებების არაუმეტეს 5 000 000 ლარით გაზრდაზე, აღნიშნული კანონით მისთვის გამოყოფილი ასიგნებების ფარგლებში“, – წერია მთავრობის 2025 წლის 22 დეკემბრის განკარგულებაში, რომელსაც ხელს ირაკლი კობახიძე აწერს.

მთავრობის განკარგულებაში სუს-ში ხელფასებისთვის საჭირო თანხის გაზრდის საფუძვლად 2025 წლის სახელმწიფო ბიუჯეტის შესახებ საქართველოს კანონის 24-ე მუხლის მე-4 პუნქტია მითითებული.

ბიუჯეტის შესახებ კანონის აღნიშნულ პუნქტში კი წერია, რომ „2025 წლის განმავლობაში საქართველოს სახელმწიფო ბიუჯეტის დაფინანსებაზე მყოფი მხარჯავი დაწესებულებების მიერ მათთვის ხარჯების ეკონომიკური კლასიფიკაციის „შრომის ანაზღაურების“ მუხლით დამტკიცებული ასიგნებების გაზრდა შესაძლებელია მხოლოდ საქართველოს მთავრობის თანხმობით, არაუმეტეს იმავე მუხლით დამტკიცებული ასიგნების 1/12-ისა.“

„ოცნების“ მთავრობის 2025 წლის 10 ოქტომბრის დადგენილებით სახელმწიფო უსაფრთხოების სამსახურში [სუს] მთელ რიგ თანამდებობებზე ხელფასები პირველი ოქტომბრიდანაც გაიზარდა. გაიზარდა წოდებრივი სარგოების ყოველთვიური განაკვეთებიც.

რაც შეეხება უშუალოდ სუს-ის უფროსის ხელფასს [თანამდებობრივ სარგოს], შარშანდელთან შედარებით 1 235 ლარით არის გაზრდილი და დღეს 13 580 ლარია წოდების მქონე მოსამსახურისთვის [წოდების არმქონე უფროსის ხელფასი კი 12 410 ლარითაა განსაზღვრული].

ირაკლი კობახიძემ, 2025 წლის 3 სექტემბრის ბრძანებით, სუს-ის მოქმედ უფროსს, „პოლიციის ლეიტენანტ, მამუკა მდინარაძეს „სახელმწიფო უსაფრთხოების ლეიტენანტის“ წოდება მიანიჭა. 23 ოქტომბრის განკარგულებით კი, მდინარაძე „სახელმწიფო უსაფრთხოების სამსახურის ლეიტენანტის“ წოდებიდან „უფროსი ლეიტენანტის“ წოდებაზე დააწინაურა.

განახლება: ირაკლი კობახიძემ მამუკა მდინარაძეს 25 ოქტომბრის ბრძანებით „სახელმწიფო უსაფრთხოების კაპიტნის“ წოდება, ხოლო მეორე დღეს, 26 ოქტომბერს კი ვადამდე მიანიჭა სახელმწიფო უსაფრთხოების მაიორის წოდება.

მაიორის წოდებით მდინარაძემ სახელმწიფო უსაფრთხოების სისტემაში არსებული საშუალო სპეციალური წოდებიდან უფროს სპეციალურ წოდებაზე გადაინაცვლა.

სუსში ხელფასთან ერთად წოდებრივ სარგოებსაც იღებენ, რომლის ოდენობებიც მიმდინარე წლის ოქტომბერში გაზარდეს. მაგალითად, მაიორის ყოველთვიური სარგო 205 ლარია, უფროსი ლეიტენანტის კი – 100 ლარი:

___

ამავე თემაზე:

მზია ამაღლობელის ადვოკატებმა საქართველოს უზენაეს სასამართლოს საკასაციო საჩივრით მიმართეს.

ადვოკატები ასაჩივრებენ ქუთაისის სააპელაციო სასამართლოს გადაწყვეტილებას, რომლითაც ბათუმის საქალაქო სასამართლოს მიერ მზია ამაღლობელისათვის გამოტანილი 2-წლიანი სასჯელი ძალაში დატოვეს.

მზია ამაღლობელი აცხადებს, რომ მისი დაპატიმრება პოლიტიკური გადაწყვეტილება იყო და გათავისუფლებაც უნდა იყოს პოლიტიკური გადაწყვეტილება. ამიტომ არ აპირებს რაიმე ფორმის, მათ შორის შეწყალების, თხოვნით მიმართოს სადავო ხელისუფების რომელიმე სტრუქტურას.

შესაბამისად, საკასაციო სარჩელით ადვოკატები ითხოვენ, ქუთაისის სააპელაციო სასამართლოს სისხლის სამართლის საქმეთა პალატის მიერ მზია ამაღლობელის მიმართ 2025 წლის 18 ნოემბერს გამოტანილი გამამტყუნებელი განაჩენის გაუქმებას და მის ნაცვლად გამამართლებელი განაჩენის დადგენას.

ადვოკატები მიმართავენ სასამართლოს, რომ საკასაციო საჩივარი განიხილოს ზეპირი მოსმენით და მზია ამაღლობელს მისცენ სასამართლო პროცესში მონაწილეობის საშუალება.

„სააპელაციო სასამართლომ მზია ამაღლობელის განაჩენი ძალაში დატოვა არა მხოლოდ სასჯელის ნაწილში, არამედ კვალიფიკაციის ნაწილშიც პრაქტიკულად ხელუხლებელია. არ უმსჯელია არც ერთ გარემოებაზე, რასაც ჩვენ ვუთითებდით სააპელაციო საჩივარში.

ქუთაისის სააპელაციო სასამართლოს განაჩენი კანონიერების თვალსაზრისით, კიდევ უფრო უარესია, ვიდრე პირველი ინსტანციის განაჩენი. სამართლებრივად არაღირებული დოკუმენტია სააპელაციო სასამართლოს განაჩენი, იმ ზომით უკანონო და დაუსაბუთებელია.

შემიძლია გითხრათ, რომ მზია ამაღლობელს, ორი ინსტანციის სასამართლოს გავლის შემდეგ, არასოდეს უსარგებლია სამართლიანი პროცესის უფლებით: არც გამოძიების ეტაპზე (იმიტომ, რომ სამართლიანი პროცესი მოიცავს გამოძიების ეტაპსაც), არც ბათუმის საქალაქო სასამართლოში და არც ქუთაისის სააპელაციო სასამართლოში. მზია ამაღლობელს ქართულმა სასამართლოებმა ჩამოართვეს უფლება დასაბუთებულ გადაწყვეტილებაზე – რომ დაასაბუთონ გადაწყვეტილება მის წინააღმდეგ,“ – უთხრა მზია ამაღლობელის ადვოკატმა მაია მწარიაშვილმა „ბათუმელებს“.

ადვოკატები საკასაციო საჩივარში უთითებენ, რომ სასამართლომ დაარღვია მზია ამაღლობელის უდანაშაულობის პრეზუმფცია.

„არავინ არ არის ვალდებული ამტკიცოს თავისი უდანაშაულობა და ბრალდების მტკიცების ტვირთი ეკისრება ბრალმდებელს. სასამართლომ, ასევე, თავად იკისრა ბრალმდებლის ფუნქცია, მტკიცებულებათა შეფასებისას არც ერთი ეჭვი, არც ერთი წინააღმდეგობა არ გადაწყვიტა მზია ამაღლობელის სასარგებლოდ”.

ადვოკატები ხაზს უსვამენ იმ გარემოებას, რომ მზია ამაღლობელი არც გამოძიების და არც სასამართლოს ეტაპზე არ იყო უზრუნველყოფილი სამართლიანი პროცესით.

„სასამართლომ არ იმსჯელა და არ შეაფასა დაცვის მხარის მიერ მითითებული არც ერთი გარემოება და არგუმენტი.

როგორც პირველი, ისე სააპელაციო ინსტანციის განაჩენი არ ასახავს სასამართლო განხილვის შედეგებს, არ პასუხობს დაცვის მხარის და სააპელაციო საჩივრის არც ერთ არგუმენტს, არ აფასებს დაცვის მხარის მიერ წარმოდგენილ და გამოკვლეულ არც ერთ მტკიცებულებას, სახელდებით არ მიუთითებს ბრალდების არც ერთ მტკიცებულებას, არ მიუთითებს რომელიმე მოწმის ჩვენებაში მითითებულ რომელიმე მონაკვეთზე, რასაც დააყრდნო მსჯელობა მზია ამაღლობელის დამნაშავეობის შესახებ;

შესაბამისად, სასამართლოს მსჯელობა მზია ამაღლობელის ბრალეულობის თაობაზე არ ეყრდნობა კონკრეტულ მტკიცებულებებს, რომელთან შედავებასაც საგნობრივად შეძლებდა დაცვის მხარე. სასამართლოს ორივე განაჩენი ტოვებს განცდას, რომ სასამართლო გულისხმიერად არ გასცნობია საქმის მასალებს,“ – წერენ ადვოკატები საკასაციო საჩივარში.

ადვოკატები ხაზს უსვამენ იმ გარემოებას, რომ სააპელაციო სასამართლომ, ისევე როგორც პირველი ინსტანციის სასამართლომ, განაჩენში არ მიუთითა და არც შეაფასა ის გარემოება, რომ მზია ამაღლობელის მხედველობა სასჯელაღსრულების დაწესებულებაში ყოფნისას დრამატულად გაუარესდა. სასამართლომ არ მიუთითა, რომ მას მხედველობა აქვს მხოლოდ 1 თვალში, დაახლოებით 10%.

„სასამართლომ დაარღვია განაჩენის მიმართ წაყენებული ყველა საპროცესო მოთხოვნა, რომ განაჩენი უნდა იყოს კანონიერი, დასაბუთებული და სამართლიანი.

განაჩენის დადგენისას სასამართლომ დაარღვია საქართველოს კონსტიტუციის, ადამიანის უფლებათა ევროპული კონვენციის და სსსკ-ით დადგენილი მოთხოვნები.

სასამართლო განაჩენი დაუსაბუთებელია, ვინაიდან ის არ ეყრდნობა სასამართლოში გამოკვლეულ და გონივრული ეჭვის გამომრიცხავ მტკიცებულებათა ერთობლიობას. სასამართლოს არც ერთი დასკვნა დასაბუთებული არ არის და განაჩენი არ პასუხობს დაცვის მხარის არც ერთ არგუმენტს, შედავებას და სამართლებრივ პოზიციას,“ – ნათქვამია საკასაციო საჩივარში.

საკასაციო საჩივარში ნათქვამია, რომ ქუთაისის სააპელაციო სასამართლოს გადაწყვეტილება წინააღმდეგობაში მოდის ადამიანის უფლებათა და თავისუფლებათა დაცვის კონვენციასთან; ტოვებს განცდას, რომ სასამართლო გულისყურით არ გასცნობია საქმის მასალებს; რომ სააპელაციო სასამართლომ არ უპასუხა დაცვის მხარის სააპელაციო საჩივრის არცერთ არგუმენტს; სასამართლომ არ იმსჯელა სააპელაციო საჩივრის და დაცვის მხარის პოზიციაზე.

საკასაციო საჩივარში ასევე აქცენტი გაკეთებულია იმაზე, რომ სასამართლომ არ უპასუხა სააპელაციო საჩივრის პოზიციას, რომ პირველი ინსტანციის გასაჩივრებული განაჩენი ეყრდნობა მხოლოდ ცრუმოწმე პოლიციელების ჩვენებებს და, ამასთან, სასამართლო არ მსჯელობს მოწმე პოლიციელთა ჩვენებების სანდოობის საკონსტიტუციო სტანდარტზე, ამ სტანდარტის დაცულობაზე განსახილველ საქმეში.

სააპელაციო სასამართლომ არც ბრალდების მოწმეთა ცრუ ჩვენებები შეაფასა შინაარსობრივად. ამასთან, სააპელაციო სასამართლომ არ დაადგინა ქმედების სსკ-ის 353-ე მუხლით კვალიფიკაციისათვის საჭირო მაკვალიფიცირებელი გარემოებები და არ უპასუხა დაცვის არცერთ არგუმენტს იმასთან დაკავშრებით, რომ მზია ამაღლობელის ქმედება ვერ დაკვალიფიცირდება სსკ-ის 353-ე მუხლით.

უზენაეს სასამართლოს 6 თვე აქვს იმისათვის, რომ მზია ამაღლობელის ადვოკატების საჩივარი განიხილოს.

უკრაინაში მებრძოლი ქართული ლეგიონის მეთაური, მამუკა მამულაშვილი ფეისბუქზე წერს, რომ კიევის მერიის გადაწყვეტილებით, ერთ-ერთ სკვერს ქართული ეროვნული ლეგიონის სახელი მიენიჭა.

„დღეს ჩვენ მივიღეთ ქალაქ კიევის გადაწყვეტილება, რომლის მიხედვითაც სკვერს მიენიჭა სახელწოდება ქართული ეროვნული ლეგიონის Georgian Legion – Грузинський Легіон ქართული ლეგიონი – მოხალისეთა ფორმირების – პატივსაცემად.

მსურს გულწრფელად მადლობა გადავუხადო ქალაქ კიევის მერს, ვიტალი კლიჩკოს, ასევე კიევის საქალაქო საბჭოს დეპუტატებს, რადგან ეს გადაწყვეტილება ერთხმად იქნა მიღებული – „წინააღმდეგ“ არც ერთი ხმა არ ყოფილა.

ასევე მადლობას ვუხდი ყველას, ვინც ამ ინიციატივაში მონაწილეობდა და ყველას, ვინც პატივი მიაგო ქართველი ლეგიონის მებრძოლებს.

ძალიან სიმბოლურია ისიც, რომ ეს სკვერი მდებარეობს ვახტანგ კიკაბიძის სახელობის ქუჩაზე – ადამიანის, რომელსაც გულწრფელად უყვარდა უკრაინა.

ეს ისტორიული მომენტია. იგი დარჩება უკრაინის ისტორიის ფურცლებზე. ეს არის აღიარება იმისა, რომ შევძელით  და დავწერეთ საკუთარი – თუნდაც პატარა, მაგრამ მნიშვნელოვანი გვერდი უკრაინის ისტორიაში და ჩვენი ხალხების მეგობრობის ისტორიაში.

ქართველი  მებრძოლები დარჩებიან უკრაინელთა თაობების მეხსიერებაში, როგორც ადამიანები, რომლებიც ყველაზე რთულ დროს უკრაინელი ხალხის გვერდით იდგნენ“, – წერს მამუკა მამულაშვილი ფეისბუქზე.

პოსტი დღეს, 24 დეკემბერს გამოქვეყნდა.

მას შემდეგ, რაც რუსეთმა უკრაინაში ფართომასშტაბიანი ომი დაიწყო, არაერთი ქართველი მებრძოლი იბრძვის უკრაინის მხარეს, რუსული ოკუპაციის წინააღმდეგ.

ქართველი მებრძოლების თქმით, ისინი უკრაინაში საქართველოს ინტერესებს იცავენ, რადგან რუსეთი, უკრაინისა და საქართველოს საერთო მტერია.

უკრაინაში ომის დაწყების შემდეგ 80-ზე მეტი ქართველი მებრძოლი დაიღუპა.

რუსეთის საგამოძიებო კომიტეტმა უკრაინის შეიარაღებულ ძალებში სამსახურისთვის 70-ზე მეტი ქართველი ჯარისკაცი დაუსწრებლად ცნო დამნაშავედ. მათ შორისაა „ქართული ლეგიონის“ დამაარსებელი მამუკა მამულაშვილი.