26 აპრილიდან B და BE კატეგორიების სატრანსპორტო საშუალების მართვის უფლების მისაღები პრაქტიკული გამოცდა ორეტაპიანი გახდა – პრაქტიკული გამოცდის პირველი ეტაპი ჩატარდება დახურულ მოედანზე, ხოლო მეორე ეტაპი – რეალური საგზაო მოძრაობის პირობებში.
ამ კატეგორიებში შედის მსუბუქი და მსუბუქმისაბმელიანი ავტომანქანები.
პრაქტიკული გამოცდის მეორე ეტაპისთვის საგამოცდო მარშრუტები შინაგან საქმეთა მინისტრმა 19 აპრილს დაამტკიცა.
ბათუმის საგამოცდო სამსახურისთვის ქალაქში ორი საგამოცდო მარშრუტია დამტკიცებული.
ამავე ბრძანებაში აღნიშნულია, რომ „პრაქტიკული გამოცდის მეორე ეტაპზე პირი დაიშვება [პირველადი გასვლა] რიგის ჯავშნით განსაზღვრულ დროს, მაგრამ პრაქტიკული გამოცდის პირველი ეტაპის წარმატებით ჩაბარებიდან არაუადრეს 15 კალენდარული დღისა.“
ბათუმში საგამოცდო მარშრუტი N1 იწყება ორბელიანის ქუჩაზე – მომსახურების სააგენტოს ტერიტორიიდან და გრძელდება შემდეგ ქუჩებზე: სულხან-საბა ორბელიანის ქუჩა – გენერალ ასლან აბაშიძის ქუჩა – ჟიული შარტავას გამზირი – პუშკინის ქუჩა – ლუკა ასათიანის ქუჩა – ჭავჭავაძის ქუჩა – ჟიული შარტავას გამზირი – გენერალ ასლან აბაშიძის ქუჩა – სულხან-საბა ორბელიანის ქუჩა [მომსახურების სააგენტოს ტერიტორია].
საგამოცდო მარშრუტი N1 / ბათუმი / წყარო: შს მინისტრის ბრძანება
ბათუმში საგამოცდო მარშრუტი N2 იწყება ორბელიანის ქუჩაზე – მომსახურების სააგენტოს ტერიტორიიდან და გრძელდება შემდეგ ქუჩებზე: სულხან-საბა ორბელიანის ქუჩა – გენერალ ასლან აბაშიძის ქუჩა – ჟიული შარტავას გამზირი – შერიფ ხიმშიაშვილის ქუჩა – ლეხ და მარია კაჩინსკების ქუჩა [ადლიისა და ზღვისპირის ქუჩების მიმდებარე წრიულამდე], აქედან კი, უკან ისევ – ლეხ და მარია კაჩინსკების ქუჩით – შერიფ ხიმშიაშვილის ქუჩა – ჟიული შარტავას გამზირი – გენერალ ასლან აბაშიძის ქუჩა – სულხან-საბა ორბელიანის ქუჩა [მომსახურების სააგენტოს ტერიტორია].
საგამოცდო მარშრუტი N2 / ბათუმი / წყარო: შს მინისტრის ბრძანება
შსს-ს ცნობით, ამ ეტაპზე მომსახურების სააგენტოს ზუგდიდის სამსახურში, ქალაქში გზებზე მიმდინარე მასშტაბური სარეაბილიტაციო სამუშაოების გამო, კანდიდატები ვერ შეძლებენ მართვის უფლების მისაღები გამოცდის მეორე ეტაპის ჩაბარებას შესაბამისი სამუშაოების დასრულებამდე.
სამინისტროს ინფორმაციით, სატრანსპორტო საშუალების მართვის უფლების მიღების მსურველები პრაქტიკული გამოცდის ახალი სტანდარტით ჩაბარებას შსს-ს მომსახურების სააგენტოს 9 სტრუქტურულ ერთეულში [ბათუმის ჩათვლით] შეძლებენ.
როგორია საგამოცდო მარშრუტები რუსთავში, თელავში, გორში, ახალციხეში, საჩხერეში, ქუთაისში, ოზურგეთსა და ფოთში, შეგეძლოთ გენახათ მინისტრის ბრძანების დანართში ამ ბმულზე. თუმცა, ბრძანებაში 22 ივნისს შევიდა ცვლილება და ახალი მარშრუტები შეგიძლიათ ნახოთ ამ ბმულზე.
