Batumelebi

დღეს, 30 დეკემბერს, საღამოს, ბათუმში ქუჩების ნაწილს გაზის მიწოდება შეუწყდა.

„ბათუმელებს“ კომპანია „სოკარში“ უთხრეს, რომ ამ დროისთვის ქალაქში გაზი არ მიეწოდება დაახლოებით 18 000 აბონენტს.

„სოკარში“ ასევე გვითხრეს, რომ გათიშულია ჯავახიშვილის, გიორგი ბრწყინვალეს ქუჩების, აეროპორტის, ადლიისა და ანგისის დასახლებების არეალები.

გაზის გათიშვის მიზეზი ავარიული დაზიანებაა.

„სოკარში“ ამბობენ, რომ აბონენტებს ბუნებრივი აირის მიწოდება აღუდგებათ ხვალიდან, 31 დეკემბრის დილის 9 საათიდან, ეტაპობრივად.

„ბათუმის დინამოს“ გასხვისების პროცესი ოფიციალურად დასრულდა.

საფეხბურთო კლუბის 100%-იანი წილი სააქციო საზოგადოება „დ.ბ 1923-მა“ შეიძინა.

სააქციო საზოგადოებამ დინამო ბათუმის 100%-იანი წილი 30-მილიონიანი ვალდებულებისა და კლუბის გრძელვადიანი სტრატეგიული განვითარების საფუძველზე მიიღო.

„დინამო ბათუმის შესყიდვა დამტკიცებულია აჭარის ფინანსთა და ეკონომიკის სამინისტროს მიერ.

სააქციო საზოგადოება „დ.ბ 1923“, ბიზნესმენ თემურ მიქელაძის ხელმძღვანელობით კლუბზე სრულ კონტროლს 2025 წლის 29 დეკემბრიდან იღებს.

ახალი ინვესტორის მოსვლასთან ერთად, კლუბში იწყება განვითარების ახალი ეტაპი, რომელიც არსებული პრობლემების მოგვარებას, კლუბში მასშტაბურ ინვესტირებასა და მართვის თანამედროვე სტანდარტების დანერგვას გულისხმობს,“ – ნათქვამია „დინამო ბათუმის“ ვებგვერდზე გამოქვეყნებულ ინფორმაციაში.

„ბათუმის დინამოს“ პრესცენტრის ცნობით, საფეხბურთო კლუბის ახალი მესაკუთრისთვის გადაცემის პროცესზე და მისი განვითარების სამომავლო სტრატეგიაზე საკონსულტაციო კომპანია Sports Orient მუშაობს.

„სამუშაო ჯგუფი რომელიც აუდიტორული, იურიდიული, ფინანსური და სპორტის მართვის ქართული და საერთაშორისო საპარტნიორო ორგანიზაციების სპეციალისტებისგან შედგება დეკემბერ-იანვარში კლუბის სრულ და ობიექტურ შეფასებას მოახდენს – ორგანიზაციული, ფინანსური, ფუნქციური და საოპერაციო მიმართულებებით.

ამჟამად ბათუმის დინამოს ფეხბურთელებისა და სხვა პირების მიმართ არსებული ფინანსური ვალდებულებების გამო ფიფასგან სატრანსფერო შეზღუდვა აქვს დაწესებული, რომელიც 2026 წლის ზაფხულამდე ვრცელდება.

ახალი მენეჯმენტის მიზანია, რომ ყველა კრიტიკული დავალიანება უმოკლეს დროში იქნეს გასტუმრებული, რათა კლუბმა შეუფერხებელი ოპერირება და ტრანსფერების განხორციელება შეძლოს,“ – ნათქვამია „დინამო ბათუმის“ მიერ გავრცელებულ ინფორმაციაში.

სს „დ.ბ 1923-ის“ დამფუძნებელი ბიზნესმენი თემურ მიქელაძეა.

თემურ მიქელაძე სამშენებლო კომპანია „მეტროპოლისა“ და „კროკობეთის“ თანადამფუძნებელია.

„ჩვენი მიზანია ფინანსურად მდგრადი კლუბის შექმნა, რომელიც გრძელვადიან წარმატებას მიაღწევს, როგორც მოედანზე, ასევე მის მიღმა. სწორედ ამიტომ ბათუმის დინამო სააქციო საზოგადოებად გარდაიქმნა.

ეს მოდელი ნებისმიერ მსურველს საშუალებას აძლევს შეიძინოს კლუბის აქციები და ამ ფორმით ჩაერთოს მის განვითარებაში. ეს ეხებათ, როგორც ადგილობრივ ბიზნესმენებს, ასევე გულშემატკივართა ჯგუფებს და ნებისმიერ დაინტერესებულ ჯგუფს, ვისაც სურვილი ექნება, რომ კლუბი ჩვენთან ერთად განავითაროს.

ვთვლი, რომ ეს ძალიან მნიშვნელოვანი ინიციატივაა და უამრავ ადამიანს ექნება სურვილი ჩვენი პროექტის მონაწილე გახდეს ამ ფორმით. ამიტომ გარდამავალი პერიოდის დასრულებისთანავე, ჩვენ აქტიურად დავიწყებთ კლუბის აქციების გასხვისების პროცესს,“ – ამბობს თემურ მიქელაძე.

საფეხბურთო კლუბის ახალი მფლობელის კომენტარს „დინამო ბათუმის“ პრესცენტრი ავრცელებს.

მთავარი ფოტო: თემურ მიქელაძე, დინამო ბათუმის ახალი მფლობელი

ამავე თემაზე:

სინდისის პატიმარი ზურაბ ჭავჭანიძე 45-ე დღეა ციხეში, პროტესტის ნიშნად შიმშილობს.

„ბათუმელები“ დღეს, 30 დეკემბერს, ზურაბ ჭავჭანიძის მეუღლეს, მარინა გორჯელაძეს ესაუბრა.

მისი თქმით, ზურაბი, მიუხედავად იმისა, რომ ამდენი დღეა შიმშილობს, ამბობს, რომ მაინც მხნედ გრძნობს თავს.

„როცა მესაუბრება, ამბობს, მხნედ ვარო. სვამს მხოლოდ წყალს და იღებს გლუკოზას.

როგორც მითხრა, ექიმი დღეში ორჯერ ნახულობს, დილით და საღამოს და წნევას უსინჯავს“ – ამბობს მარინა გორჯელაძე.

ზურაბ ჭავჭანიძე, ბათუმის პროევროპული საპროტესტო აქციის მედროშე, 4 ოქტომბრის საპროტესტო აქციის საქმეზე დააკავეს.

მას პროკურატურა ედავება სისხლის სამართლის კოდექსის 19-222-ე მუხლის მეორე ნაწილის ა ქვეპუნქტით, რაც გულისხმობს სტრატეგიული და განსაკუთრებული მნიშვნელობის ობიექტის ხელში ჩაგდების მცდელობას ჯგუფურად და სსკ-ის 225-ე მუხლის მეორე ნაწილით, რაც გულისხმობს ჯგუფურ ძალადობაში მონაწილეობას.

სასჯელის სახით ეს მუხლი 6 წლამდე თავისუფლების აღკვეთას ითვალისწინებს. ადვოკატის თქმით, ზურაბ ჭავჭანიძის საქმეში მხოლოდ ერთი ვიდეოკადრია, რომელზეც ზურაბ ჭავჭანიძე ჩანს დროშით ხელში.

ზურაბ ჭავჭანიძე სოხუმელია. დევნილობის შემდეგ იგი ბათუმში ცხოვრობს.

9 დეკემბრის სასამართლო სხდომაზე მან ისაუბრა რუსულ ოკუპაციაზე. „რას ნიშნავს რუსული მმართველობა? მილიონამდე ქართველი მოკლეს, ყველა რუსი მმართველის ოცნებაა „საქართველო ქართველების გარეშე. საქართველოს გაქრობა, გადაშენება, ან გადაჯიშება უნდათ“- თქვა მან.

ორგანიზაცია „სისხლის უანგარო დონორები“ მუშაობას აჩერებენ. ამის შესახებ ორგანიზაციამ დღეს, 30 დეკემბერს გაავრცელა ინფორმაცია ფეისბუქზე.

ორგანიზაცია 2021 წელს დაარსდა და ამ დროის განმავლობაში უსასყიდლოდ გასცემდა სისხლს.

„ორგანიზაცია აერთიანებდა 6 000-ზე მეტ პოტენციურ დონორს, უანგაროდ სისხლგაღებულ 4000-ზე მეტ ადამიანს და რაც მთავარია, 3 500-ზე მეტ გადარჩენილ სიცოცხლეს.

ამ ყველაფრის უკან, წლების განმავლობაში, სხვადასხვა ადამიანები იდგნენ დიდი სიყვარულით და სიმტკიცით, ერთგულად – სიცოცხლის სადარაჯოზე.

თუმცა, ყველაფერს აქვს დასაწყისი და დასასრული. გვჯერა, ეს პატარა გაჩერებაა.

როდემდე? ზუსტად არ ვიცით. იმედია ცოტა ხნით.

რატომ? – ამ კითხვის პასუხი ძალიან გრძელია. მოკლედ კი, ეს საქმე მოითხოვს სახელმწიფოსთან მჭიდრო თანამშრომლობას და სხვანაირად ჩვენ, არა ძალგვიძს.

ჩვენი არჩევანი, ისევე როგორც ქართველი ხალხის, ევროპაა“- წერენ „სისხლის უანგარო დონორები“ ფეისბუქზე.

ნინო ბალავაძე, დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულ სააგენტოში საზოგადოებასთან ურთიერთობის დეპარტამენტის დირექტორის მოადგილეა.

ამ თანამდებობაზე ის 2024 წლის ივლისში დაინიშნა, მანამდე კი საქართველოს პარლამენტში მუშაობდა უფროს სპეციალისტად. ორივე თანამდებობაზე მუშაობის დროს, მან გასულ წელს, ხელფასის სახით, 32 ათას ლარზე მეტი მიიღო.

ამავე პერიოდში, ანუ საჯარო სამსახურებში მუშაობის პარალელურად, ის კერძო სექტორშიც იყო დასაქმებული, კონკრეტულად კი შპს „დინ-გრუპში“ მუშაობდა ტრენერ-კონსულტანტად, სადაც მისი წლიური ანაზღაურება 56 403 ლარი იყო.

ნინო ბალავაძეს 2016 წელს, დაფუძნებული აქვს „ქართულ-ამერიკული საბავშვო ბაღი“, სადაც 50%-ნი წილის მფლობელია. წილის მეორე ნახევარს კი ეკა მანიჟაშვილი ფლობს.

ნინო ბალავაძის მეუღლე, გიორგი არსოშვილი, საზოგადოებრივი უსაფრთხოების მართვის ცენტრის – 112-ის დირექტორია.

ის, რომ ნინო ბალავაძე საჯარო სამსახურში მუშაობის პარალელურად ბიზნესსაც ფლობს, ამის შესახებ გიორგი არსოშვილის მიერ 2025 წელს შევსებული ქონებრივი დეკლარაციიდანაც ირკვევა.

თუმცა მის ქონებრივ დეკლარაციაში არაფერი წერია ამ საბავშვო ბაღიდან მიღებულ შემოსავლებზე, მიუხედავად იმისა, რომ „ქართულ-ამერიკული საბავშვო ბაღი“ ფუნქციონირებს და აღსაზრდელებსაც იღებს წლინახევრის ასაკიდან.

როგორც „ბათუმელებმა“ გაარკვია, საბავშვო ბაღში სწავლის საფასური თვეში 600 ლარია.

ნინო ბალავაძეს თავისი ბიზნესსაქმიანობისთვის შენობა იჯარით აქვს აღებული. მოიჯარე დავით ქირიკაშვილია, ყაზბეგის მუნიციპალიტეტის საკრებულოს ყოფილი თავმჯდომარე „ქართული ოცნებიდან“.

შენობა, სადაც „ქართულ-ამერიკული საბავშვო ბაღი“ ფუნქციონირებს, თბილისში, დელისის მე-3 ქუჩაზე (იგივე, რაც გაზაფხულის ქუჩა) მდებარეობს. შენობა ორსართულიანია, აქვს სარდაფი და ეზო. შენობის ფართობი მთლიანობაში 336 კვ. მეტრია სარდაფის ჩათვლით. ხოლო მთლიანი მიწის ფართობი, 535 კვ.მეტრია.

დავით ქირიკაშვილს, 2025 წელს გამოქვეყნებული ქონებრივი დეკლარაციის მიხედვით, შენობა თვეში 1300 დოლარად აქვს იჯარით გაცემული. დეკლარაციაში ასახული აქვს იჯარიდან მიღებული შემოსავალიც – წლიური 42 ათასი ლარი.

შესაბამისად, 112-ის შეფს, გიორგი არსოშვილს ქონებრივი დეკლარაცია ან არაზუსტად აქვს შევსებული, ან შემოსავლებს მალავს. თუმცა ნინო ბალავაძე სატელეფონო საუბარში აცხადებს, რომ შემოსავლებს ვერ იღებს და ამიტომაც არაფერი უწერია მისი მეუღლეს ქონებრივ დეკლარაციაში.

„ბაღის დამფუძნებელი ვარ, მაგრამ რეალურად, ბაღი ახლა ისეთ მდგომარეობაშია, რომ არ ამიღია არანაირი დივიდენდი, თუმცა ბაღი ისტუმრებს ხელფასებს, იჯარას იხდის და გააქვს თავი“, – ამბობს ნინო ბალავაძე.

რადგან ბაღს ამერიკული დაარქვით, ხომ არ გიქმნით „ქართული ოცნების“ ანტიდასავლური პოლიტიკა დისკომფორტს, რადგან საჯარო მოხელე ხართ, თან აწარმოებთ ბიზნესს? – ვკითხეთ ნინო ბალავაძეს.

მისი თქმით, საბავშვო ბაღს „ამერიკული“ იმიტომ ჰქვია, რომ გაძლიერებულად ასწავლიან ინგლისურ ენას. „უცხოელი მასწავლებლები ნაკლებად გვყავს, ძირითადად ქართველი პედაგოგები არიან დასაქმებული“, – ამბობს ნინო ბალავაძე. თუმცა დასძენს, რომ პოლიტიკურ პოზიციაზე საუბარი არ სურს.

„არ გვინდა არანაირ პოზიციებზე და ამ თემებზე საუბარი.

სიმართლე გითხრათ, მე არ მქონია არანაირი კვეთა რაიმე პრობლემასთან. ეს ბაღი მშვიდად, წყნარად მუშაობს, თავის თავს ინახავს და რა ვიცი აბა, რა გითხრათ“, – გვეუბნება ის.

დეკლარაციის მიხედვით, ნინო ბალავაძე საჯარო უწყების გარდა, კერძო სექტორშიც მუშაობს.

ამიტომ მას ვკითხეთ, „ქართული ოცნების“ პარლამენტის მიერ „კორუფციის წინააღმდეგ კანონში“ შეტანილი ცვლილება, რომელიც მეორე სამსახურში დასაქმებისას უფროსის ნებართვას ითხოვს, ხომ არ უქმნის რაიმე პრობლემას?

ნინო ბალავაძე ამბობს, რომ არა.

„არ შემიქმნის, რადგან არსებობს ჩამონათვალი (სამსახურების), რომელიც არ უქმნის დასაქმებულს პრობლემას.

არც ბიზნესის წარმოებაში მიშლის ხელს, რადგან ბიზნესის წარმოება მესმის, როცა რეალურად შემოსავალს იღებ ამ ბიზნესიდან. შესაბამისად, თუ მომავალში რამე ცვლილებები მექნება და ჩემს სამსახურს შეუშლის ხელს, ან ერთ სამსახურს დავანებებ თავს და ან მეორეს. მაქსიმალურად ვეცდები, რომ არ შევიქმნა არანაირი პრობლემა ამ კუთხით“, – ამბობს ნინო ბალავაძე.

ნინო ბალავაძის პროფილი სოციალურ ქსელებში ხელმისაწვდომი არ არის. თუმცა მისი ბიზნესპარტნიორის ფეისბუქის გვერდით თუ ვიმსჯელებთ, ბევრს მოგზაურობს ევროპასა და ამერიკაში.

არსოშვილის ქონებრივ დეკლარაციაში, მეუღლის მოგზაურობის ხარჯებზეც არაფერია მითითებული.

ნინო ბალავაძე წინანდალში 1801 კვ/მეტრი მიწის ნაკვეთსაც ფლობს, რომელიც 2023 წელს შეიძინა 8000 დოლარად და ჰყავს ორი მეწილე.

ამავე წელს, ასევე 8000 დოლარად შეუძენია მიწა მცხეთაში.

უფრო ადრე კი, 2020 წელს, 75 კვ. მეტრი ბინაც შეუძენია ბათუმში, თამარ მეფის გამზირზე, ზღვასთან ახლოს, 76 627 ლარად.

არსოშვილების ოჯახი თბილისში, რუსუდან მიქელაძის ქუჩაზე ცხოვრობს სახლში, რომლის ფართობიც 700 კვ.მეტრზე მეტია.

„ქართული ოცნების“ ხელისუფლება ბოლო ორი წელია ღიად აწარმოებს ანტიდასავლურ კამპანიას. 2024 წლის ნოემბერში, ევროინტეგრაციის პროცესიც ოფიციალურად შეაჩერეს 2028 წლამდე. „ოცნების“ ხელისუფლების მიერ ღიად კონსტიტუციის ხელყოფა, მხოლოდ საჯარო მოსამსახურეების ნაწილმა გააპროტესტა, რომელთა უმრავლესობა სამსახურებიდან ე.წ „რეორგანიზაციის“ საფუძველზე გაუშვეს.

„ოცნების“ მაღალჩინოსნები „დიფსტეტად“ მოიხსენიებენ საქართველოს დასავლელ მეგობრებსა და პარტნიორი ქვეყნების წარმომადგენლებს. რუსული კანონების მეშვეობით კი, ფაქტობრივად, მტრად გამოაცხადეს ყველა, ვინც დასავლური ფონდებიდან იღებდა ფინანსურ მხარდაჭერას.

თუმცა, დასავლურ სკოლებსა და უნივერსიტეტებში ასწავლიან თავიანთ შვილებს. უარეს შემთხვევაში, საქართველოში დაარსებულ ამერიკულ თუ ევროპულ სკოლებსა და საბავშვო ბაღებში დაჰყავთ შვილები, ან თავად ცდილობენ დააარსონ დასავლურთან აფელირებული საგანმანათლებლო დაწესებულებები.

ისევე, როგორც ეს გააკეთა ნინო ბალავაძემ, რომლის მეუღლეც იმ უწყებას წარმოადგენს, რომელიც საქართველოს მოქალაქეებს ტროტუარზე დგომის გამო ციხეში უშვებს.

____

„ოცნების“ ხელისუფლებამ თავისუფალი მედიის წინააღმდეგ შემოიღო რუსული კანონები, მათ შორის ე.წ. ფარა, რომელიც „მტრულ საქმიანობად“ აცხადებს დასავლურ ფონდებთან თანამშრომლობას, რომელიც რეალურად, ქვეყანაში დემოკრატიისა და სამოქალაქო საზოგადოების გაძლიერებას ემსახურებოდა. ცდილობენ დაასუსტონ ან სრულად გააქრონ ქვეყანაში სამოქალაქო ორგანიზაციები.

იწყებენ განათლების რეფორმას, რომელიც ასევე ქართული საგანმანათლებლო სისტემის იზოლაციას იწვევს და ხერგავს გზებს დასავლეთთან.

„ქართული ოცნების“ მაღალჩინოსნების მხრიდან თითქმის ყოველდღიურად ისმის სიძულვილის ენა, როგორც ამ ქვეყნის მოქალაქეების, ასევე ევროპული ღირებულებების მიმართ. ამ ყველაფრის მიუხედავად, „ქართული ოცნების“ სამსახურში მყოფი მაღალჩინოსნები უარს არ ამბობენ ევროპულ სიკეთეებზე.

„სინათლე” ახლა ყველაფერს აკეთებს იმისთვის, რომ კრიტიკულ სიტუაციაში ადამიანები დადგნენ ჟურნალისტების გვერდით“, – ამბობს „სინათლე მედიას“ ერთ-ერთი დამფუძნებელი ქეთევან ქავთარაძე.

„სინათლე მედია“ რამდენიმე თვის წინ შეიქმნა და ცდილობს საზოგადოების მობილიზებას თავისუფალი მედიის გადასარჩენად.

როგორ მუშაობს „სინათლე“, რომელიც დამოუკიდებელი ონლაინ მედიის გადასარჩენად შეიქმნა? – „ბათუმელები“ სწორედ ამ თემაზე ესაუბრა ქეთევან ქავთარაძეს.

• ქეთევან, რამდენიმე დღის წინ „სინათლე მედიამ“ გააკეთა ფლიმარკეტი თავისუფალი მედიის დასახმარებლად. შეგიძლია მოგვიყვეთ, რა ხდებოდა, როგორი იყო იმ ადამიანების ემოციები, ვინც საკუთარი ნივთები გამოიტანა ამ დღისთვის? როგორც ვიცი, ძალიან ბევრი ცნობილი ადამიანი იყო მოსული და ყიდდა თავიანთ ნივთებს მედიის დასახმარებლად. 

ჩვენ წინასწარ გამოვაქვეყნეთ კითხვარი და მოვუწოდეთ ადამიანებს, თავიანთი ნივთები მოეტანათ და გაეყიდათ ფლიმარკეტზე – „სინათლისთვის“.

„სინათლისთვის“ – ასე ერქვა ამ ღონისძიებას და ყველგან ამ სიტყვას ვიყენებდით – „გაყიდე სინათლისთვის“, „იყიდე სინათლისთვის“, „ფლიმარკეტი სინათლისთვის“ და ასე შემდეგ.

დაახლოებით 45 ადამიანი იყო, რომლებმაც მოიტანეს თავიანთი ნივთები ფლიმარკეტზე – ტანსაცმელი, აქსესუარები, ჩანთები, შარფები ასევე, სამკაულები, წიგნები, ალბომები, ვინილები. შორის იყო სასრიალო ატრიბუტიკა და ველოსიპედებიც კი გვქონდა.

გვქონდა სარაგბო ატრიბუტიკა. სარაგბო კლუბი „სოხუმი“ იცით ალბათ, რადგან ერთადერთი სამოყვარულო გუნდია, რომელიც ყველა თამაშის შემდეგ „თავისუფლება რეჟიმის ტყვეებს“ – ბანერს შლის და ლევან ჯობავაა მისი დამფუძნებელი.

ფლიმარკეტზე წარმოდგენილი იყო კერამიკა და ფანტასტიკური ქვაზე ნამუშევრები.

ცალკე გვქონდა კომიქსების კუთხე. „სინათლე მედიების“ ფოტოჟურნალისტების პოსტერები ცალკე გვქონდა წარმოდგენილი და იქვე, ფოტოჟურნალისტები ხელს უწერდნენ ამ პოსტერების შემძენებს.

თბილისის პროტესტის ფოტოები იყო უფრო მეტად წარმოდგენილი. ასევე იყო „ინდიგოს“, „ჩაიხანას“ და სხვა მედიების კუთხეებიც.

გამოფენაზე ასევე გვქონდა მრავალფეროვანი ხელნაკეთი ნივთები და დედაჩემის გამორჩეული ფელამუშიც. პატარა კუთხე იყო, სადაც ტკბილეული იყო წარმოდგენილი. თამარ მშვენიერაძემ გამოაცხო ასევე თავისი საფირმო ნამცხვრები, ღვეზელი და ასე შემდეგ.

ჩვენი მასპინძელი იყო რესტორანი „ეზო“, რომელიც უზრუნველყოფდა კვების და ბარის საკითხს ამ დღეს.

ადამიანები, რომლებმაც თავიანთი პირადი ნივთები მოიტანეს „სინათლე მედიისთვის“, ვფიქრობ, უბედნიერესები იყვნენ, რადგან გვიზიარებდნენ თავიანთ ემოციებს. მწერალმა ნენე კვინიკაძემ მოიტანა თავისი ნივთები, ნინო ლეჟავამ, ანუკა ტოკლიკიშვილმა, ნათია მიქელაძემ, სალომე ჯაშმა…. ფანტასტიკური ადამიანები, ვისაც საზოგადოება კარგად იცნობს და არიან ამ წინააღმდეგობის, პროტესტის გამორჩეული მებრძოლები, იყვნენ წარმოდგენილი ამ დღეს და ყიდდნენ თავიანთ ნივთებს.

13 დახლი გვქონდა და დაახლოებით 33 ათას ლარამდე შეაგროვეს ამ ადამიანებმა.

დავანთეთ ცეცხლი, ნაძვის ხეც ავაწყვეთ და ყველაფერი, რაც იქ ხდებოდა, იყო დიდი სახალხო სოლიდარობის მაგალითი.

• რომ გვითხრათ, როგორ გაჩნდა „სინათლე მედიის“ დაფუძნების იდეა და რამდენად რთულია გადაარჩინო ავტოკრატიული რეჟიმის პირობებში თავისუფალი მედია?

„სინათლე მედიის“ დაფუძნების იდეა პირველად გაუჩნდა ჩემ დას, თეო ქავთარაძეს, ერთ-ერთ მედიაკონფერენციაზე იყო გერმანიაში და იქ ნახა, როგორ მუშაობს მსგავსი პროექტები მედიის განვითარებისთვის.

ეს ის პერიოდი დაახლოებით, როცა „ქართულმა ოცნებამ“ ე.წ. ფარა (აგენტების კანონი) მიიღო. მაშინ დაიწყო საუბარი იმაზე, რომ რაღაც უნდა გაკეთებულიყო თავისუფალი მედიის გადასარჩენად.

თეო ამბობდა, მარტო ჩვენი ძალებით ვერ გავაკეთებთო და მთხოვა დახმარება. მე მაქვს გამოცდილება მედიასფეროში მუშაობის, ამასთან, მთელი წელია პროტესტში ვარ და კარგად ვხედავ ამ ბრძოლაში თავისუფალი მედიის როლს, იმ გამოწვევებს, რის წინაშეც დადგა მედია რუსული კანონების პირობებში. ამიტომ, ეს ღირებულებითი და ემოციური გამოწვევები ჩემთვისაც ახლოა.

თავიდან სამმა ადამიანმა – მე, თეო ქავთარაძემ და ირმა მოსულიშვილმა დავიწყეთ ამ პროექტზე მუშაობა, რომელიც ფაქტობრივად, პირველივე დღიდან ჩართული იყო ამ პროცესებში როგორც მენეჯერი.

• რომელი იყო პირველი კამპანია მედიის დასახმარებლად?

პირველი გამოწვევა იყო ის, რომ მედია, ფაქტობრივად, დარჩა ჰაერში, რადგან გრანტების აკრძალვის შემდეგ სრულად გადაეკეტა დაფინანსების წყაროები. შესაბამისად, დავიწყეთ ზრუნვა იმაზე, რომ ადამიანებს დაეწყოთ მედიის დონაცია და აქ დაიბადა იდეა – „სინათლე არ უნდა ჩაქრეს“.

პირველი ეტაპი სრულად კონცენტრირებული იყო ქრაუდფანდინგზე, ანუ კამპანიაზე, რომელიც ორ მთავარ განაცხადს გააკეთებდა. პირველი და მნიშვნელოვანი განაცხადი ეს იყო, რომ ჩვენ ერთად ვდგავართ და რომ უნდა გადავარჩინოთ არა რომელიმე კონკრეტული მედია, არამედ დამოუკიდებელი მედიები საქართველოში. 22 მედიისთვის დავიწყეთ მუშაობა.

ივნისში დავაარსეთ ორგანიზაცია „ხალხის წყარო“, რომელიც შეძლებდა მედიისთვის შემოწირულებების მიღებას. ცხადია, საჭირო იყო პლატფორმა, რომ ადამიანები შესულიყვნენ ვებგვერდზე და მარტივად მოეხერხებინათ თანხის გადმორიცხვა. ამიტომ, პარალელურად ვებდეველოპერებთან ერთად ამ სისტემის გამართვაზეც ვმუშაობდით.

პირველი კამპანია, რომელიც დავიწყეთ, იყო ის, რომ გავთიშეთ ყველა ვებგვერდი იმისთვის, რომ გვეჩვენებინა საზოგადოებისთვის, რამდენად რეალურია მედიის გაქრობის საფრთხე. ამას ძალიან დიდი გამოხმაურება მოჰყვა. სამი საათის განმავლობაში გათიშული იყო ყველა თავისუფალი ონლაინმედია, ადამიანებმა უცებ აღმოაჩინეს, რომ 22 მედიის ვებგვერდი იყო გათიშული.

სამი საათის შემდეგ, ყველა მედიის მუშაობა საერთო ვიდეოთი განახლდა, სადაც ნათქვამი იყო ორი მთავარი რამ. ერთი, რომ თავისუფალ მედიას ომი გამოუცხადა რეჟიმმა, მაგრამ ჩვენ ერთად ვდგავართ ამ ბრძოლაში და მეორე – ხალხის მხარდაჭერა, საზოგადოების გვერდში დგომა ამ ბრძოლაში ძალიან მნიშვნელოვანია.

ამ კამპანიას მოჰყვა მედიის მხარდამჭერი მარში, რომელიც 21 აგვისტოს გაიმართა. შვებულებების პერიოდი იყო, ცხელოდა, თუმცა რამდენიმე ათასი ადამიანი მაინც გამოვიდა მედიის მხარდასაჭერად ქუჩაში. ამ მარშს სიმბოლურად ერქვა „ფანრების მარში“. მარშის მონაწილეებმა აანთეს ფანრები და ასე გაიარეს მთელი გზა, რესპუბლიკის მოედნიდან პარლამენტამდე.

• თავისუფალი მედია აქამდე თავად ეხმარებოდა ადამიანებს, არა მარტო იმით, რომ აშუქებდა ვთქვათ საზოგადოების პრობლემებს, ამხელდა უსამართლობას, იცავდა მოწყვლადი ჯგუფების ინტერესებს. არაერთი ისტორია გაგვიშუქებია და შეგვიცლია ძალადობის მსხვერპლი ქალის თუ ბავშვის ცხოვრება ჟურნალისტებს. რა აჩვენა ამ კამპანიებმა, რამდენად გააზრებული აქვს საზოგადოებას, რომ დღეს, თუნდაც 1 ლარის გადარიცხვით, არ ჩაქრება თავისუფალი სიტყვა ამ ქვეყანაში?

დღეს ძალიან მაღალია თავისუფალი მედიის მიმართ საზოგადოების ნდობა – ადამიანები, რომლებიც არიან ბრძოლაში, განსაკუთრებით ბოლო ერთი წელია, ყველაზე მეტად გრძნობენ მედიის როლს ამ პროცესებში.

მე მჯერა იმის, რომ სასამართლოში ონლაინ მედიამ მოუგო პროპაგანდას ბრძოლა, რადგან მედიამ შეძლო და აჩვენა, რა ხდებოდა სასამართლო სხდომებზე: რეალურად, სიმართლე იყო სინდისის პატიმრების მხარეს და სწორედ მედიამ მოიტანა მათი პერსონალური ისტორიები ჩვენამდე.

ამას ხედავს ყველა, ვინც დგას პროტესტის მხარეს და ყველა, ვინც არის თავისუფალი მედიის მკითხველი.

რაც შეეხება ფინანსურ ნაწილს, აქამდე მკითხველს არასდროს თანხა არ გადაუხდია ინფორმაციაში. შესაბამისად, იმის კულტურა, რომ მედიას შეიძლება შესწიროს თუნდაც 1 ლარი, ნაკლებად იყო ქვეყანაში. ზოგადად, „სინათლე მედიას“ აქვს აღებული პასუხისმგებლობა იმაზე, რომ ბევრი ისაუბროს, რას ნიშნავს დამოუკიდებელი მედია.

ნებისმიერმა შემომწირველმა, ორგანიზაცია იქნება ეს თუ კონკრეტული ადამიანი, კარგად უნდა იცოდეს, რომ თავისუფალი მედია მუშაობს მათი უფლებებისთვის და არა დამფინანსებლების ინტერესებისთვის.

დღეს ძალიან მძიმე მდგომარეობაშია არა მარტო მედია, ასევე სამოქალაქო სექტორი, ოპოზიციური პარტიები და აქტივისტები. ყველა ითხოვს დახმარებას იმისთვის, რომ გადარჩეს.

ჩვენ გვიწევს დავაფინანსოთ სინდისის პატიმრების ყოველთვიური ხარჯები ციხეში, უსამართლო ჯარიმები, რომელსაც აკისრებენ აქტივისტებს, პროდასავლურ მოძრაობებს, ყველას, ვინც ჩართულია რეჟიმის წინააღმდეგ ბრძოლაში.

დღეს, ისევ საზოგადოება ეხმარება ერთმანეთს გადარჩენაში.

ვცდილობთ თითოეული თეთრი გადავანაწილოთ. 100 ლარიც რომ გვქონდეს, ამ 100 ლარსაც ვანაწილებთ.

რაც კამპანია დავიწყეთ, ოთხ თვეში მედიის გადასარჩენად 200 ათას ლარამდე შევაგროვეთ. ამ ბოლო კამპანიის დროს კი – 100 ათასი ლარი.

გარდა ფინანსური შემოწირულებებისა, ძალიან მნიშვნელოვანია ადამიანების არმია, რომლებიც თავიანთი პროფესიული გამოცდილებით, მოხალისეობრივად ეხმარებიან „სინათლე მედიას”. იქნება ეს კრეატიული დირექტორი, რომელმაც უნდა განსაზღვროს, როგორი იქნება ღონისძიების ვიზუალური მხარე, ფლიმარკეტის დირექტორი, რომელიც უკავშირდება არტისტებს, გალერისტებს, კოლექციონერებს, სხვა ადამიანები, რომლებიც ლოჯისტიკურ საკითხებში არიან ჩართული, დიზაინერები, დეველოპერები, სტამბა… და ასე შემდეგ.

ბევრი ცდილობს თავისი გამოცდილება და ცოდნა მოახმაროს „სინათლე მედიას”.

• დღეს „ოცნება“ ცდილობს დათესოს შიში და ტერორი. აშინებენ საჯარო მოხელეებს, ცდილობენ დააშინონ ბიზნესიც, რომელიც აქამდეც ნაკლებად იყო ჩართული სამოქალაქო საზოგადოების გაძლიერებაში. რა სურათი გვაქვს, დარჩა რომელიმე ბიზნესი თავისუფალი სიტყვის მხარეს, თუ აღარ?

სამწუხარო რეალობაა ის, რომ მსხვილი ბიზნესის ძალიან დიდი ნაწილი რეჟიმის ხელშია. შესაბამისად, ჩვენ მათ ვერ დაველაპარაკებით. თუმცა, რამდენიმე მსხვილ ბიზნესთან ვართ მოლაპარაკების პროცესში.

„სინათლე მედია” ახლა ყველაფერს აკეთებს იმისთვის, რომ კრიტიკულ სიტუაციაში ადამიანები დადგნენ ჟურნალისტების გვერდით, არა მარტო ფინანსურად, არამედ ფიზიკურად,

ღმერთმა დაგვიფაროს, მაგრამ რაღაც უფრო სერიოზული რომ დაგვემუქროს ხვალ, ქვეყანა უნდა დადგეს ფეხზე თავისუფალი მედიის დასაცავად.

• როგორ იმუშავებს 2026 წელს „სინათლე მედია“ – უფრო მხარდაჭერას ელოდებით თუ სირთულეს?

ერთი, რასაც 2026 წელს დავიწყებთ, არის ის, რომ საზოგადოებას უკეთ ვაჩვენებთ თავისუფალი მედიების შრომას, რა ძალისხმევა და გამოწვევები დგას იმ ინფორმაციის უკან, რასაც ჟურნალისტები საზოგადოებას აწვდიან, რომ ადამიანებისთვის ცხადი გახდეს, როგორ შრომობს დღეს ეთიკური მედია იმისთვის, რომ საზოგადოება იყოს ინფორმირებული და რა რისკებთანაა დაკავშირებული ეთიკური მედიის არსებობა ამ ქვეყანაში.

რა თქმა უნდა, გავაგრძელებთ ქრაუდფანდინგის მიმართულებით მუშაობას, ყოველთვიური დონაცია არის ჩვენი ერთ-ერთი მნიშვნელოვანი მიმართულება.

ასევე, გვაქვს პროექტი, რომელიც ითვალისწინებს ემიგრანტებთან მუშაობას, კიდევ უფრო მეტად რომ გავაძლიეროთ „სინათლე მედია“.

„სინათლე მედია” დაიბადა რეჟიმთან ბრძოლაში, რომელიც აუცილებლად მოიტანს დიდ სიკეთეებსაც და მშვიდობასაც. ოღონდ არა ისეთს, რომელსაც „ქართული ოცნება“ სთავაზობს თავის ამომრჩეველს, არამედ მოიტანს ნამდვილი მშვიდობის დაბრუნებას ჩვენს ოჯახში, ამ ქვეყნის კონსტიტუციურ ფარგლებში და ევროპაში დაბრუნებას.

ფინანსთა სამინისტროს შემოსავლების სამსახურის ინფორმაციით, აზარტულ და მომგებიან თამაშობებზე დამოკიდებულ პირთა სიაში 2022 წლის 1-ლი მარტიდან დღემდე, რეგისტრირებულია 36 115  ფიზიკური პირი, აქედან მოსამართლის ბრძანების საფუძველზე 62 პირი, ხოლო თავად პირის მომართვის საფუძველზე – 36 053 პირი.

„ლატარიების, აზარტული და მომგებიანი თამაშობების მოწყობის შესახებ“ საქართველოს კანონის თანახმად, აკრძალულ პირთა სიაში დღეის მდგომარეობით ავტომატურ რეჟიმში სულ შეტანილია 1 577 247 პირის შესახებ ინფორმაცია.

დამოკიდებულ პირთა და აკრძალულ პირთა რეესტრს [დამოკიდებულ პირთა სიასა და აკრძალულ პირთა სიაში დასაშვებია მხოლოდ საქართველოს მოქალაქის შესახებ მონაცემების შეტანა] აწარმოებს შემოსავლების სამსახური.

დამოკიდებულ პირთა სიაში 2025 წლის 5 მაისიდან საქართველოს მოქალაქის შესახებ მონაცემების შეტანასთან ერთად, დასაშვებია ასევე საქართველოს იმ მოქალაქის მონაცემების შეტანაც, რომელსაც იმავდროულად გააჩნია სხვა ქვეყნის მოქალაქეობაც.

„ლატარიების, აზარტული და მომგებიანი თამაშობების მოწყობის შესახებ“ საქართველოს კანონში ცვლილება 2022 წლის 1 მარტიდან განხორციელდა.

2022 წლის პირველი მარტიდან საჯარო მოხელეებს, მათ შორის პოლიტიკური თანამდებობის პირებს, ეროვნულ ბანკში მომუშავეებსა და მარეგულირებელ ორგანოებში დასაქმებულებს, აზარტულ თამაშობებში მონაწილეობა, მათ შორის, ელექტრონულადაც, ეკრძალებათ.

თამაში ეკრძალებათ ასევე სოციალურად დაუცველი ოჯახის წევრებსაც.

ქუთაისის საერთაშორისო აეროპორტი განცხადებას ავრცელებს და წერს, რომ “დიდთოვლობის მიუხედავად ქუთაისის საერთაშორისო აეროპორტი ჩვეულ რეჟიმში მუშაობს”.

“დღეისთვის დაგეგმილი ყველა რეისის მიღება და გაშვება ჩვეულ რეჟიმში სრულდება. გამთენიისას არ შესრულდა მხოლოდ ათენის მიმართულებით დაგეგმილი რეისი და საპირისპირო მიმართულებით ფრენა,” – ნათქვამია ქუთაისის აეროპორტის მიერ გავრცელებულ განცხადებაში.

აეროპორტის ინფორმაციითვე, იმის გამო რომ დღეს, 29 დეკემბერს, თბილისიდან ბათუმის მიმართულებით მოძრავი მატარებელი ბროწეულას სადგურში გაჩერდა, მატარებელში მყოფი 12 მგზავრის ტრანსპორტირებას, რომლებსაც ფრენა ჰქონდათ, აეროპორტმა გაუწია უზრუნველყოფა.

“აეროპორტის შესაბამისი სამსახურები დროულად ახორციელებენ საჰაერო ხომალდების მოყინვის საწინააღმდეგო პროცედურებს, ხოლო ასაფრენ-დასაფრენი ზოლი და სამიმოსვლო ბილიკები ინტენსიურად იწმინდება.

უამინდობა ქუთაისის საერთაშორისო აეროპორტის ტერიტორიაზე 2 იანვრის დღის პირველი ნახევრის ჩათვლით შენარჩუნდება,” – ნათქვამია ქუთაისის აეროპორტის განცხადებაში.

თბილისი-ბათუმის სამგზავრო მატარებელი ქუთაისთან ახლოს, ბროწეულას რკინიგზის სადგურშია გაჩერებული.

როგორც “ბათუმელებს” რკინიგზის ცხელ ხაზზე უთხრეს, მატარებელი ძაბვის ვარდნის გამო გაჩერდა.

ამ ეტაპისთვის [14:20 წუთი] უცნობია როდის განაგრძობს გზას მატარებელი.

“ველოდებით ჩვენც განახლებულ ინფორმაციას,” – უთხრეს “ბათუმელებს” ცხელ ხაზზე.

განახლება:

დღეს, 29 დეკემბერს, ენერგეტიკისა და წყალმომარაგების მარეგულირებელი კომისია [სემეკი] დენის ტარიფის გაზრდაზე მსჯელობს, თუმცა სემეკის თავმჯდომარემ, დავით ნარმანიამ დღეს ჟურნალისტებთან განაცხადა, რომ დენის ტარიფის გაზრდა, სავარაუდოდ, გადავადდება სამი თვით.

„ბოლო დღეების განმავლობაში კომისია ინტენსიურად მუშაობდა სატარიფო საკითხებზე, ცალკეული თემების დაზუსტებაზე. გარდა ამისა, გვქონდა კონსულტაციები საქართველოს პრემიერ-მინისტრთან.

ელექტროენერგიის გამანაწილებელმა კომპანიებმა გამოგვიგზავნეს წერილობით თხოვნა ამ პროცესის 3 თვით გადავადებასთან დაკავშირებით, ვინაიდან, არ არის დაზუსტებული ელექტროენერგიის ბალანსები, ის, თუ როგორი იქნება მოსალოდნელი გენერაცია მომდევნო წელს.

აქედან გამომდინარე, კომისია დღეს იმსჯელებს და ვფიქრობთ, დავადგინოთ დროებითი ტარიფები, რაც ნიშნავს იმას, რომ დღეს არსებული დადგენილი ტარიფები შევინარჩუნოთ მომდევნო 3 თვის განმავლობაში ელექტროენერგიის სექტორში.

ხოლო რაც შეეხება ბუნებრივ აირს, ბუნებრივ აირზე ისედაც არ იყო მოსალოდნელი ტარიფების ზრდა. ამაზე გავაკეთე განცხადება, რომ მცირედი კორექტირებები ხდებოდა ამ ნაწილში“, – განაცხადა დავით ნარმანიამ.

მარეგულირებელმა კომისიამ ტარიფები ბოლოს 5 წლის წინ დაადგინა. ტარიფების გადათვლა გეგმიური პროცესია.

ადიგენში, სოფელ ბოლაჯურის მკვიდრს, ჯაბა ჩხიტუნიძეს, რომელიც  2012 წელს, ძმასთან ერთად, საკუთარ სოფელში „ქართული ოცნების“ ოფისს ხელმძღვანელობდა (და ოფისიც საკუთარ სახლში ჰქონდათ გახსნილი), სახელმწიფოსგან ჯერ 29 ჰექტრამდე სახნავ-სათესი მიწა პირდაპირი პრივატიზების ფორმით მიიღო, შემდგომ სახელმწიფომ საწყობის ასაშენებლად – 497,961  ლარი, ნარგავებისთვის – 70,000-მდე ლარი და ოთხი შეღავათიანი აგროკრედიტი – 103,551 ლარის ოდენობით დაუფინანსა.

ამის შესახებ წერს „საერთაშორისო გამჭვირვალობა-საქართველო“.

მასალებში, რომელიც დღეს, 29 დეკემბერს გამოაქვეყნა ორგანიზაციამ, ნათქვამია, რომ ჩხიტუნიძეზე გადაცემულ მიწებზე მოყვანილი ხილ-ბოსტნეულით ძალოვანი სტრუქტურები მარაგდებიან.

ჯაბა ჩხიტუნიძემ „ბოლო ორწელიწადნახევარში, ჯამში, 15,033,529 ლარის სახელმწიფო შესყიდვებიც მიიღო“.

„გამჭვირვალობა-საქართველოს“ ინფორმაციით, ბესიკ ჩხიტუნიძე „ქართული ოცნების“ ხელისუფლებაში მოსვლიდან მალევე, შსს დაცვის პოლიციის სამცხე-ჯავახეთის რეგიონული სამმართველოს უფროსი გახდა. თუმცა აქ დიდხანს არ დარჩენილა. „2016 წლიდან, ძმები, ჯაბა და ბესიკ ჩხიტუნიძეები ბიზნესში გააქტიურდნენ. მათ 2023 წლამდე 5 სხვადასხვა კომპანია დააფუძნეს.

2019 წლის აპრილში ჯაბა ჩხიტუნიძემ ბოლაჯურში სახელმწიფოს საკუთრებაში არსებული სასოფლო-სამეურნეო (სახნავი) 288,351 კვ.მ. მიწა იჯარით აიღო. 2020 წელს, ამავე სოფელში შპს „აგრო ქართული ნატურალური“ დააფუძნა და ამ შპს-მ მალევე სახელმწიფოსგან ორი შეღავათიანი აგროკრედიტი მიიღო. ხელშეკრულებებით განსაზღვრული თანადაფინანსების  ჯამი 62,601 ლარს შეადგენდა. 2022 წლის ივლისში კი აქ სახელმწიფო აგროპროგრამის ფარგლებში მიღებული 497,961 ლარით სასაწყობე მეურნეობაც მოაწყო.

ამ ნახევარმილიონიანი აგროსესხის მიღებამდე ორი თვით ადრე, 2022 წლის მაისში, ჯაბა ჩხიტუნიძემ სახელმწიფოსგან იჯარით აღებული 29 ჰა-მდე ფართობი, პირდაპირი პრივატიზების წესით, 461,360 ლარად იყიდა, რასაც სოფელში ადგილობრივი მოსახლეობის საპროტესტო გამოსვლები მოჰყვა.

სოფლის მცხოვრებები ნაკვეთის კერძო პირზე გადაცემას აპროტესტებდნენ და აცხადებდნენ, რომ სოფელში საკმარისი სახნავ-სათესი ფართობი არავის ჰქონდა, ამიტომ აღნიშნული ნაკვეთი ხალხზე უნდა განაწილებულიყო. თუმცა, მათ პროტესტს შედეგი არ მოჰყოლია.

2023 წელს ჯაბა ჩხიტუნიძემ, როგორც ინდივიდუალურმა მეწარმემ,  ახლადშეძენილი ნაკვეთისთვის სახელმწიფოსგან 7 ჰექტარზე,  ხეხილის გასაშენებლად 69,999 ლარის დაფინანსება მიიღო. სოფლის განვითარების სააგენტოს პროგრამა „დანერგე მომავლის“ ბაღის კომპონენტის ფარგლებში 4 ჰექტარზე ვაშლის გასაშენებლად 47,332 ლარი გადაეცა, 1 ჰექტარზე ბლისთვის – 19,082 ლარი და 2 ჰექტარზე ჟოლოს მოსაყვანად – 3,585 ლარი. გარდა ამისა, ამავე წელს მისმა კომპანიამ „აგრო ქართული ნატურალურმა“ კიდევ ორი შეღავათიანი აგროკრედიტი მიიღო. ხელშეკრულებებით განსაზღვრული თანადაფინანსების  ჯამი 40,950 ლარს შეადგენდა.

ამ მიწაზე მოყვანილი ხილითა და ბოსტნეულით, ამავე, 2023 წლიდან, ჯაბა ჩხიტუნიძემ ძალოვანი სტრუქტურების მომარაგება დაიწყო“ – წერს „გამჭვირვალობა-საქართველო“.

მათივე ინფორმაციით, „აგრო ქართული ნატურალურმა“ 2024-2025 წლებში სახელმწიფო შესყიდვების სააგენტოს 2 კონსოლიდირებული 7 058 223 ლარის ტენდერი უკონკურენტოდ მოიგო.

„როგორც აღნიშნულ ტენდერებში ჯაბა ჩხიტუნიძის მიერ ატვირთული გამოცდილების დამადასტურებელი დოკუმენტებიდან ირკვევა, 2023-2024 წლებში საქართველოს თავდაცვის სამინისტროს შპს „სახელმწიფო კვებით უზრუნველყოფას“ ჯაბა ჩხიტუნიძის კუთვნილ შპს „აგრო ქართული ნატურალურთან“, ხილსა და ბოსტნეულზე, სპეციალური წესით,  3 ხელშეკრულება აქვს გაფორმებული, ჯამში, 7,926,880 ლარზე.

2023-2024 წლებში, ჯაბა ჩხიტუნიძის კომპანიამ შპს „სახელმწიფო კვებით უზრუნველყოფისგან”  48,429 ლარის 3 პირდაპირი შესყიდვაც მიიღო.

ჯამში, ჯაბა ჩხიტუნიძემ, 2023-2025 წლებში, 8 სახელმწიფო შესყიდვით ძალოვანი სტრუქტურების ხილითა და ბოსტნეულით მომარაგებისთვის 15,033,529 ლარი მიიღო. 2020-2023 წლებში აგროპროგრამის ფარგლებში 8 პროექტიდან კი სულ 671,511 ლარი დაერიცხა. 2020-2025 წლებში, სახელმწიფოსგან ჯაბა ჩხიტუნიძემ ჯამურად 15,705,040 ლარი მიიღო“- წერს, „საერთაშორისო გამჭვირვალობა-საქართველო“.

„ოცნების“ მთავრობამ სარეზერვო ფონდიდან 2 მილიონ 600 ათასი ლარი გამოუყო აჭარას არასტანდარტული მანდარინის სუბსიდირებისთვის.  განკარგულებას ხელი „ოცნების“ პრემიერმა, ირაკლი კობახიძემ 26 დეკემბერს მოაწერა.

„2025 წლის მანდარინის (არასტანდარტული) მოსავლის რეალიზაციის ხელშეწყობის მიზნით, აჭარის ავტონომიური რესპუბლიკის ტერიტორიაზე მოქმედი ციტრუსის გადამამუშავებელი კომპანიებისათვის, რომლებიც 2025 წელს ციტრუსის სეზონზე ფიზიკური პირებისაგან შეისყიდიან 1 (ერთი) კილოგრამ არასტანდარტულ მანდარინს არანაკლებ 0,40 ლარად, სუბსიდირებისათვის გათვალისწინებული იქნეს 0,35 ლარი, ციტრუსის გადამამუშავებელ საწარმოში ჩაბარებულ ყოველ 1 კილოგრამზე“ – ვკითხულობთ დოკუმენტში.

არასტანდარტული მანდარინის სუბსიდირება აჭარაში წლებია ხდება, თუმცა, ფაქტობრივად, ყოველ წელს მეციტრუსეები ჩივიან, რომ ციტრუსის რეალიზაცია უჭირთ. ამის პარალელურად, მთავრობა ყოველ წელს ირწმუნება, რომ ამ ბაზარზე პრობლემა არ არსებობს.

წელს ციტრუსის ბაღების მფლობელების მთავარი პრობლემა მანდარინის დაბალი ფასი და მყიდველების ნაკლებობა იყო.

ამავე თემაზე: 

დღეს, 28 დეკემბერს, აშშ-ში, ფლორიდის შტატის ქალაქ პალმ-ბიჩში აშშ-ისა და უკრაინის პრეზიდენტებს შორის შეხვედრა გაიმართება – მთავარი თემა უკრაინაში ომის დასრულების სამშვიდობო გეგმის  შემუშავებაა.

მედიის ცნობით, უკრაინის დელეგაცია უკვე შეერთებულ შტატებში იმყოფება.

უკრაინის დელეგაციაში არიან: ქვეყნის ეროვნული უსაფრთხოებისა და თავდაცვის საბჭოს მდივანი რუსტემ უმეროვი, ეკონომიკის მინისტრი ალექსეი სობოლევი, უკრაინის შეიარაღებული ძალების გენერალური შტაბის უფროსი ანდრეი ჰნატოვი, პრეზიდენტის ადმინისტრაციის ხელმძღვანელის მრჩეველი ალექსანდრ ბევზი და საგარეო საქმეთა მინისტრის პირველი მოადგილე სერგეი კისლიცია.

შეხვედრა ფლორიდაში 13:00 საათზე დაიწყება.

27 დეკემბერს უკრაინის პრეზიდენტმა ვოლოდიმირ ზელენსკიმ „ტელეგრამზე“ დაასახელა ხუთი თემატური სფერო, რომლებიც განხილული იქნება სამშვიდობო გეგმაზე მოლაპარაკებებისას და რომელთა განხილვაც მას ტრამპთან სურს. მათ შორისაა უკრაინის უსაფრთხოების გარანტიები.

„საჭიროა ძლიერი პოზიციები როგორც ფრონტზე, ასევე დიპლომატიაში, რათა პუტინმა ვერ შეძლოს მანიპულირება და თავიდან ვერ აიცილოს ომის რეალური და სამართლიანი დასრულება. მსოფლიოს საკმარისი ძალა აქვს უსაფრთხოებისა და მშვიდობის უზრუნველსაყოფად“ – დაწერა ზელენსკიმ „ტელეგრამზე“.

ტრამპთან შეხვედრამდე ზელენსკი ევროპელ ლიდერებს ესაუბრა: გერმანიის კანცლერს, ფრიდრიხ მერცს; ფინეთის პრეზიდენტს ალექსანდრ სტუბს, საფრანგეთის პრეზიდენტს – ემანუელ მაკრონს, იტალიის პრემიერ ჯორჯა მელონის და სხვა ევროპული ქვეყნების ლიდერებს. ასევე, მედიის ცნობით, ონლაინ დიალოგს შეუერთდნენ: კანადის პრემიერ-მინისტრი მარკ კარნი, ნატოს გენერალური მდივანი მარკ რუტე, ევროპული საბჭოს პრეზიდენტი ანტონიო კოსტა და ევროკომისიის პრეზიდენტი ურსულა ფონ დერ ლაიენი.

_____________

ფოტო: ევროპის პრესფოტო სააგენტო.

ბათუმის პლაჟის ხელოვნური კვების სამუშაოებზე აჭარის გარემოს დაცვისა და ბუნებრივი რესურსების სამმართველომ ტენდერი გამოაცხადა.

სანაპირო ზოლის დასაცავად უნდა მოეწყოს ხელოვნური პლაჟი, რისთვისაც ხრეშს ამჯერადაც მდინარე ჭოროხის კალაპოტიდან ამოიღებენ და ახალი ბულვარის მიმდებარედ შეიტანენ.

ტენდერის ფარგლებში, 2026 წელს, 110 ათასი კუბური მეტრი პლაჟწარმომქმნელი მასალა, ხრეში, უნდა შეიტანონ პლაჟზე.

ხრეშის შეტანა, პროექტის მიხედვით, ორ ადგილზეა დაგეგმილი: აეროპორტის ასაფრენი ბილიკის მოპირდაპირედ – აქ შესატანია 40 ათასი კუბური მეტრი ხრეში, ხოლო მეორე ადგილია ახალი ბულვარის გასწვრივ – ზღვისგან დანგრეული პირსის მიმდებარედ – აქ შეიტანენ 70 ათას კუბურ მეტრ ხრეშს.

ტენდერში წინადადებების მიღება 2026 წლის 7 იანვარს დაიწყება და ხუთ დღეში – 12 იანვარს დასრულდება.

ტენდერში გამარჯვებული ვალდებული იქნება, სამუშაოები დაასრულოს – სამუშაოების დაწყების შესახებ შემსყიდველის წერილობითი დავალების გაცემიდან 61 დღეში.

„ბათუმში ზღვის სანაპირო ზოლის ე.წ. ახალი ბულვარის მიმდებარე მონაკვეთზე პლაჟის ხელოვნური კვების სამუშაოების, არსებული რეცხვადი ბერმის რეკონსტრუქციის [პლაჟის გასამაგრებელი სამუშაოების]“ შესყიდვაზე ტენდერი 2 472 349 ლარითაა გამოცხადებული.

აჭარის 2026 წლის ბიუჯეტში კი პლაჟის ხელოვნური კვებისთვის მთლიანობაში 2 650 000 ლარია გაწერილი.

2 მილიონი ლარი იყო გაწერილი 2025 წლის ბიუჯეტშიც, თუმცა, ეს თანხა ხრეშის შესატანად არ გამოიყენეს და როგორც აჭარის სოფლის მეურნეობის სამინისტროში გვითხრეს, მხოლოდ პროექტი შეისყიდეს.

ამ თემაზე ვრცლად: რატომ არ შეიტანეს ხრეში ბათუმის სანაპიროზე – პლაჟის აღსადგენად 2 მილიონი იყო გამოყოფილი

პროექტში, რომლის მიხედვითაც უნდა შესრულდეს სამუშაოები, აღნიშნულია, რომ „2023-2024 წლებში სანაპირო ზოლის კვების მიზნით, ახალი ბულვარის ტერიტორიაზე რეცხვადი ბერმის სახით შემოტანილი იქნა პლაჟწარმომქმნელი მასალა. აღნიშნულმა ღონისძიებამ დადებითი შედეგი გამოიღო. კერძოდ, შტორმული სეზონის დროს არ მოხდა ბულვარის ტერიტორიის წარეცხვა. შექმნილი პლაჟი გაუმკლავდა ტალღის ზემოქმედებას.

დღეისათვის რეცხვადი ბერმის ტანი, ნაწილობრივ წაირეცხა, რაც იმას ნიშნავს, რომ შემოტანილი მასალა გამოყენებულ იქნა ნაპირფორმირების პროცესში. ამდენად
საჭიროდ მიგვაჩნია რეცხვადი ბერმის რეკონსტრუქცია და შესაბამისი მასალით შევსება“.

ამავე პროექტის მიხედვით: „აჭარაში შტორმული სეზონი ზამთარში დგება, როდესაც 2 მეტრი და მეტი სიმაღლის ტალღების განმეორებადობა აღწევს 30 პროცენტს, ზაფხულში ეს მონაცემი მცირდება 5-13 პროცენტამდე, ხოლო გაზაფხულსა და შემოდგომაზე 15-17 პროცენტს შეადგენს. დაფიქსირებულია ძლიერი შტორმების ერთეული შემთხვევები ზაფხულში და გაზაფხულზე, როდესაც ტალღის სიმაღლე ღია ზღვაში აღწევდა 7-8 მეტრს.“

აჭარის 2026 წლის ბიუჯეტში კი აღნიშნულია, რომ „პლაჟის ხელოვნური კვების სამუშაოების მიზანი შავი ზღვის ქალაქ ბათუმის სანაპირო ზოლის შენარჩუნებაა“.

„ახლო მომავალში აუცილებლად უნდა შემუშავდეს [ბათუმის] სანაპიროს ექსპლოატაციის და ზღვისგან დაცვის ახალი სტრატეგია. წინააღმდეგ შემთხვევაში კატასტროფული მოვლენები გარდაუვალია, ვინაიდან ამოწურულია ზღვის სანაპიროს ბუნებრივი დინამიკის აღდგენის ყველა შესაძლებლობა“, – ეს კი იმ დოკუმენტშია აღნიშნული, რომელიც სამი წლის წინ აჭარის მთავრობის დაკვეთით მომზადდა.

აჭარის მთავრობიდან, ასევე, აჭარის სოფლის მეურნეობის სამინისტროდან და ბათუმის მერიიდან „ბათუმელებს“ დღემდე არ აქვს პასუხი კითხვაზე – დაწყებულია თუ არა მუშაობა ზღვისგან დაცვის ახალ სტრატეგიაზე.

ამ თემაზე: