Batumelebi

ბათუმში მოხუცთა თავშესაფარს მოხალისეები სჭირდება. თავშესაფრის ხელმძღვანელის, იოანე ბარამიძის თქმით, მოხალისეობის მსურველებს აჭარის ჯანდაცვის სამინისტრო გადაამზადებს და მხოლოდ ამის შემდეგ დაიწყებენ მუშაობას.

„ჩვენ გვჭირდება სრულწლოვანი ახალგაზრდები, უფრო მეტად ქალები, რომლებიც დაეხმარებიან მოხუცებს კვების პერიოდში. დაგვპირდა ჯანდაცვის სამინისტრო, რომ დაგვეხმარება მსურველების გადამზადებაში. გვაქვს სათანადო ეკიპირება, რომ მოხალისეებმა უსაფრთხოდ შეძლონ მუშაობა თავშესაფარში,“ – ამბობს იოანე ბარამიძე.

მოხალისეებს კარანტინის რეჟიმში მოუწევთ ცხოვრება სასტუმროში, სათნოების სახლ „სავანეში“ კი სხვადასხვა ცვლაში იმუშავებენ.

მოხალისეების საჭიროება მოხუცთა თავშესაფარში მას შემდეგ გაჩნდა, რაც თავშესაფრის ბინადრებისა და პერსონალს კორონავირუსი დაუფიქსირდა. დღემდე ამ თავშესაფარში 30 პირს დაუდასტურდა კორონავირუსი.

ბათუმის წმიდა მოწამე ეკატერინეს სახელობის სათნოების სავანე ბათუმისა და ლაზეთის ეპარქიის პატრონაჟის ქვეშ იმყოფება.

29 სექტემბრის მონაცემებით, აჭარაში ბინაზე 600-ზე მეტი კოვიდინფიცირებული მკურნალობს. ბინაზე მკურნალობა საქართველოს ჯანდაცვის სამინისტრომ შესაბამისი პროტოკოლით დაუშვა.

„ბათუმელები“ გთავაზობთ მოკლე მიმოხილვას, რას ითვალისწინებს ბინაზე მკურნალობის პროტოკოლი, როგორ უნდა მოიქცეს ინფიცირებული და როგორ უნდა დაეხმარონ მას სხვა პირები.

საქართველოს ჯანდაცვის სამინისტროს მიერ შემუშავებული პროტოკოლით, ბინაზე დასაშვებია კორონავირუსული ინფექციის მსუბუქი შემთხვევების მართვა.

რას ნიშნავს კორონავირუსის მსუბუქი შემთხვევა?

ჯანდაცვის  სამინისტროს მიერ დამტკიცებული პროტოკოლის თანახმად, კორონავირუსის ინფექციის მსუბუქ შემთხვევად ითვლება გაურთულებელი ზემო სასუნთქი გზების რესპირაციული ვირუსული ინფექცია.

მსუბუქი დაავადების დროს პაციენტებს შესაძლოა აღენიშნებოდეთ არასპეციფიკური სიმპტომები, როგორიცაა ცხელება, მოთენთილობა, ხველა (ნახველით ან მის გარეშე), ანორექსია, სისუსტე, კუნთების ტკივილი, ყელის ტკივილი, ქოშინი, ცხვირის გაჭედვა ან თავის ტკივილი, ყნოსვისა და გემოს დაქვეითება. იშვიათად, სიმპტომები შესაძლოა წარმოდგენილი იყოს დიარეით, გულისრევით ან პირღებინებით.

პროტოკოლის თანახმად, მსუბუქ პნევმონიად განიხილება შემთხვევა, თუკი პაციენტს არ აღენიშნება მომატებული რისკი. არ არის  სამოც წელზე მეტი ასაკის, აქვს სისხლის ნორმალური წნევა და პულსი, ბოლო სამი თვის განმავლობაში არ ყოფილა ჰოსპიტალში და არ მიუღია ანტიბიოტიკები. ასევე არ აქვს სხვა მწვავე სამედიცინო მდგომარეობა.

როგორ  უნდა იმართოს ბინაზე კორონავირუსის მსუბუქი შემთხვევა?

პროტოკოლში გაწერილია კოვიდპაციენტებთან როგორ უნდა იმართოს ისეთი სიმპტომები, როგორიცაა ხველა, ცხელება და სუნთქვის გაძნელება.

ხველების მართვისთვის რეკომენდებულია კოვიდინფიცირებული არ იწვეს ზურგზე, რადგან ამ პოზიციაში ამოხველება არაეფექტურია.

ერთ წელზე მეტი ასაკის ინფიცირებულებში რეკომენდებულია მკურნალობის მარტივი მეთოდები, მაგალითად, თაფლის ან სხვა არამედიკამენტური საშუალებების მიღება.

COVID19-ით დაავადებულ პირებში, შესაძლებელია, ხანმოკლე პერიოდით კოდეინის შემცველი ხველის სიროფების გამოყენება, შემაწუხებელი ხველის დათრგუნვის მიზნით.

კოვიდისთვის ერთ-ერთი დამახასიათებელი სიმპტომია ცხელება, რომელიც ინფიცირებულს ყველაზე ხშირად მეხუთე დღიდან აღენიშნება.

ცხელების მართვისთვის პროტოკოლში გაწერილია, რომ პაციენტმა რეგულარულად უნდა მიიღოს სითხე (არაუმეტეს 2 ლიტრი დღეში), დეჰიდრატაციის თავიდან ასარიდებლად.

თუ პაციენტს აქვს ცხელება, რეკომენდებულია პარაცეტამოლის ან იბუპროფენის მიღება. თუ პაციენტს აღენიშნება ცხელება და სხვა სიმპტომები, რომელთა შემსუბუქებაც შესაძლებელია ანთების საწინააღმდეგო არასტეროიდის მიღებისას, პაციენტმა უნდა გამოიყენოს მისი უმდაბლესი ეფექტური დოზა, სიმპტომების კონტროლისთვის საჭირო უმოკლესი დროით.

ცალკეა გამოყოფილი სუნთქვის გაძნელების მართვა.

სუნთქვის გაძნელებამ შესაძლოა გამოიწვიოს შფოთვა, რაც უფრო მეტად აუარესებს სუნთქვას.  პროტოკოლის თანახმად, მხარდამჭერი მკურნალობის სახით, სუნთქვის გაძნელების მართვის მიზნით, რეკომენდებულია ოთახში სიგრილის შენარჩუნება, რელაქსაციისა და სუნთქვითი ტექნიკის გამოყენება და სხეულის პოზიციის ცვლილება. პაციენტებმა, რომლებიც იმყოფებიან თვითიზოლაციაში მარტო, ხშირად უნდა გაანიავონ ოთახი. არ უნდა გამოიყენონ ვენტილატორი, რადგანაც ამან შეიძლება ხელი შეუწყოს ინფექციის გავრცელებას.

პნევმონიის მართვა

პროტოკოლის თანახმად, პირისპირ გასინჯვის და სხვა ობიექტური მეთოდების გამოყენების შეუძლებლობის პირობებში, პნევმონიის დიაგნოზი მოზრდილებში შესაძლებელია დაისვას შემდეგი სიმპტომებისა და ნიშნების საფუძველზე:

სხეულის ტემპერატურა 38°C-ზე მეტი, სუნთქვის სიხშირე აღემატება წუთში 20-ს, ხოლო  გულისცემის სიხშირე აღემატება წუთში 100-ს და პაციენტს აღენიშნება მწვავედ დაწყებული აბნეულობა.

პროტოკოლის თანახმად, არ არის აუცილებელი საშუალო სიმძიმის პნევმონიის ჰოსპიტალიზაცია, თუ სახეზე არ გვაქვს სუნთქვის გაძნელება და დეჰიდრატაციის ნიშნები, რაც მოიცავს გაძლიერებულ წყურვილს, პირის სიმშრალეს, შარდის გამოყოფის შემცირებას, მშრალ კანს, თავის ტკივილსა და თავბრუსხვევას.

პროტოკოლში  ხაზგასმულია, რომ ანტიბიოტიკები არ უნდა დაინიშნოს სავარაუდო COVID-19 პნევმონიის შემთხვევაში, როდესაც პაციენტს მსუბუქი სიმპტომები აქვს.

ანტიბიოტიკოთერაპიის დაწყებისას, რეკომენდებულია, გადაწყვეტილება მიღებული იქნეს ინფექციონისტისა და ოჯახის ექიმის ერთობლივი შეთანხმებით.

პაციენტმა, შეიძლება, დაასრულოს თვითიზოლაცია და ჩაითვალოს განკურნებულად, თუ მას აღარ აღენიშნება სიმპტომები და აქვს ტესტირების ორი უარყოფითი შედეგი (სულ მცირე, 24 საათის ინტერვალით აღებულ ნიმუშებზე). თუ ტესტირება შესაძლებელი არ არის, პაციენტი იზოლაციაში უნდა დარჩეს სიმპტომების ალაგებიდან ორი კვირის განმავლობაში.

წესები, რომლებიც ბინაზე მყოფმა კოვიდპაციენტმა უნდა დაიცვას

ვინაიდან COVID 19-ის სპეციფიკური ეფექტური მკურნალობა ჯერჯერობით არ არსებობს, კოვიდპაციენტის ბინაზე მართვა მოიცავს დამხმარე სიმპტომურ თერაპიას. პროტოკოლში ხაზგასმითაა აღნიშნული, რომ  სახლში კონკრეტული პაციენტების მოვლა შეიძლება დაშვებული იყოს მსუბუქი ავადმყოფობის შემთხვევაში.

პაციენტთა ბინაზე მკურნალობის გადაწყვეტილების შემთხვევაში, პაციენტის მდგომარეობის მართვა რეკომენდებულია ინფექციონისტებთან და საზოგადოებრივი ჯანდაცვის სპეციალისტებთან კონსულტაციით. თუ COVID 19-ის სიმპტომები გაუარესდა, მდგომარეობა შეიძლება ძალიან სწრაფად დამძიმდეს, ამიტომ საჭიროა სასწრაფო ჰოსპიტალიზაცია.

ბინაზე მკურნალობის პერიოდში, მანამ, სანამ პაციენტის სიმპტომები სრულად არ ალაგდება, რეკომენდებულია უწყვეტი კომუნიკაცია პაციენტს, სამედიცინო პერსონალსა და საზოგადოებრივი ჯანდაცვის წარმომადგენლებს შორის.

როგორ  უნდა მოვუაროთ ბინაზე კოვიდინფიცირებულს

პროტოკოლში გაწერილია რჩევები კოვიდინფიცირებულების მომვლელთათვის. პირველი, რაც უნდა გაითვალისწინოთ, აუცილებელია დაიცვათ საკუთარი თავი ინფიცირებისგან.

COVID19 ვრცელდება რესპირაციული წვეთების მეშვეობით, როდესაც ინფიცირებული საუბრობს, ახველებს ან აცემინებს, მჭიდრო კონტაქტში (დაახლოებით 2 მეტრზე ახლოს) მყოფ პირებს შორის.

ის, ვინც კოვიდინფიცირებულს უვლის, სასურველია არ იყოს COVID 19-ის მძიმე ფორმის განვითარების მაღალი რისკის ჯგუფში.

კოვიდინფიცირებულის მომვლელმა უნდა გამოიყენოს იზოლირებული საძინებელი და საპირფარეშო.

თუ შესაძლებელია, შეეცადეთ, რომ დაავადებული პირი დარჩეს მისთვის გამოყოფილ ოთახში, სხვებისგან მოშორებით. ასევე შესაძლებლობის შემთხვევაში, ინფიცირებული უნდა სარგებლობდეს განცალკევებული სააბაზანოთი.

იმ შემთხვევაში, თუ გიწევთ საზიარო ფართობის გამოყენება, აუცილებელია ოთახი კარგად ნიავდებოდეს. მოერიდეთ სტუმრების მიღებას. საკვები მიირთვით განცალკევებულ ოთახში ან სივრცეში.

სასურველია ინფიცირებული პირი იკვებებოდეს თავის ოთახში. ჭურჭლისა და სხვა საყოფაცხოვრებო ნივთების გარეცხვისას კი იხმარეთ ხელთათმანები და ცხელი წყალი.

ინფიცირებული პირის მიერ გამოყენებულ ნებისმიერ ჭურჭელს, ჭიქას ან ვერცხლის ნივთებს არ უნდა შეეხოთ ხელთათმანის გარეშე. გარეცხეთ ჭურჭელი საპნისა და ცხელი წყლის გამოყენებით, ან ჭურჭლის სარეცხ მანქანაში. ხელთათმანების მოხსნის ან ნახმარი ჭურჭლის შეხების შემდეგ დაიბანეთ ხელები.

მოერიდეთ ინფიცირებულთან პირადი ნივთების გაზიარებას. არ გამოიყენოთ ინფიცირებულის ჭურჭელი, თეთრეული ან ელექტრონული მოწყობილობები – ტელეფონი ან პლანშეტი.

ინფიცირებულმა პირმა სახის ნიღაბი უნდა ატაროს სხვა პირების გარემოცვაში როგორც გარეთ, ისე შინ (მათ შორის, სამედიცინო დაწესებულებაში). სახის ნიღაბი ხელს უშლის ინფიცირებულ პირის მიერ ვირუსის გავრცელებას. ნიღაბი აგროვებს რესპირაციულ წვეთებს და ხელს უშლის მათ გადაცემას ირგვლივ მყოფ პირებზე.

დაავადების თავიდან აცილების მიზნით ყოველდღიურად ჩაატარეთ პრევენციული ზომები: ხშირად დაიბანეთ ხელები, მოერიდეთ თვალების, პირის და ცხვირის შეხებას დაუბანელი ხელებით. ხშირად ჩაატარეთ ზედაპირების დეზინფექცია.

ყოველდღიურად უნდა დამუშავდეს მაგიდები, კარების სახელურები, სინათლის ჩამრთველები, საწერი მაგიდები, ტუალეტები, ონკანები, ნიჟარები და ელექტროხელსაწყოები.

ინფიცირებული პირის მომვლელმა და მჭიდრო კონტაქტში მყოფმა პირებმა თვალყური უნდა ადევნონ საკუთარ ჯანმრთელობის მდგომარეობას COVID19-ზე საეჭვო სიმპტომების თვალსაზრისით.

კორონავირუსზე უფასო ტესტირება ბათუმში მხოლოდ პირველ პოლიკლინიკაშია შესაძლებელი. ეს პოლიკლინიკა ბათუმის რესპუბლიკურ საავადმყოფოსთან მდებარეობს. დღეიდან, 29 სექტემბრიდან, უფასო ტესტირება სხვა პოლიკლინიკებში აღარ ჩატარდება.

გუშინ, 28 სექტემბერს, აჭარის ჯანდაცვის მინისტრმა თქვა, რომ „არ არის საჭირო კოვიდინფიცირებულთან კონტაქტში მყოფმა ყველა პირმა ჩაიტაროს ტესტირება.“ ჯანდაცვის სამინისტროში განმარტავენ, რომ მიზნობრივი ტესტირების რაოდენობას გაზრდიან.

„…არ უნდა დაიტესტონ, პირდაპირ უნდა წავიდნენ იზოლაციაში. ვინაიდან კონტაქტში მყოფი პირი თავისით არ უნდა მოძრაობდეს ქუჩაში, ის უნდა იყოს იზოლაციაში 12 დღის განმავლობაში“, – განაცხადა ნინო ნიჟარაძემ.

აჭარის ჯანდაცვის სამინისტროს ინფორმაციით, ბათუმის პირველ პოლიკლინიკაში უფასო ტესტირება 11-დან 14:00 საათამდეა შესაძლებელი.

ქვეყნის მასშტაბით დღეს, 29 სექტემბერს, კორონავირუსის 314 შემთხვევა დაფიქსირდა, მათ შორის, აჭარაში – 225. დღესვე ბათუმში კოვიდით გარდაიცვალა 55 წლის ქალი. მთლიანობაში ქვეყანაში უკვე 33 პირი გარდაიცვალა კორნავირუსით.

ბათუმის მოხუცთა თავშესაფარში კორონავირუსი 20 ადამიანს დაუდასტურდა. აქედან 13 თავშესაფრის ბინადარია, 7 კი ადმინისტრაციის თანამშრომელი.

კიდევ ხუთი ადამიანი კორონავირუსზე ტესტის პასუხს ელოდება.

თავშესაფრის ხელმძღვანელი იოანე ბარამიძე ამბობს, რომ ინფიცირებულთა ნაწილი საავადმყოფოებშია გადაყვანილი, ნაწილი კი – საკარანტინო სივრცეებში.

ბოლო 24 საათის განმავლობაში აჭარაში კორონავირუსის 225 ახალი შემთხვევა დაფიქსირდა.

აჭარის ჯანდაცვის სამინისტროს ინფორმაციით, ამ დროისთვის ბათუმში კოვიდკლინიკებში მკურნალობს 463 პაციენტი, აქედან – 32 არასრულწლოვანი და 10 ორსული. რეანიმაციაშია 24 პაციენტი.

შენიშვნა: თავდაპირველად სტატიის სახელწოდება იყო „ბათუმის მოხუცთა თავშესაფარში 35 პირს დაუდასტურდა კორონავირუსი“

ტექსტში ეწერა რომ ვირუსი დაუდასტურდა თავშესაფრის 25 ბინადარს და ადმინისტრაციის ათ თანამშრომელს. მოგვიანებით აჭარის ჯანდაცვის სამინისტრომ ინფორმაცია დააზუსტა და თქვა რომ დღეს, 29  სექტემბერს მოხუცთა თავშესაფარში მხოლოდ 20 პირს დაუდასტურდა კორონავირუსი.

ბათუმში გუშინ, ღამით, კორონავირუსით ინფიცირებული 55 წლის ქალი გარდაიცვალა. აჭარის ჯანდაცვის სამინისტროს ინფორმაციით, მისი დიაგნოზი იყო: COVID 19, სუნთქვის მწვავე უკმარისობა, თირკმლის ქრონიკული უკმარისობა, შაქრიანი დიაბეტი. ის 26 სექტემბრიდან მკურნალობდა ბათუმის რესპუბლიკურ საავადმყოფოში.

„პაციენტის მდგომარეობა კლინიკაში შეყვანისთანავე შეფასდა რთულად. პაციენტს ანამნეზში აღენიშნებოდა გადატანილი მიოკარდიუმის ინფარქტი, აორტოკორონარული შუნტის არსებობა, მიტრალური და სამკარიანი სარქველების ერთდროული დაზიანება, გულის უკმარისობა, არტერიული ჰიპერტენზია, წითელი ქარი“, – აღნიშნულია სამინისტროს მიერ გავრცელებულ ინფორმაციაში.

აჭარის ჯანდაცვის სამინისტროს ცნობით, კლინიკაში გატარდა ყველა შესაბამისი ღონისძიება, თუმცა თანმდევი დაავადებების სირთულიდან გამომდინარე პაციენტის გადარჩენა ვერ მოხერხდა.

ქვეყნის მასშტაბით დღეს, 29 სექტემბერს, კორონავირუსის 314 შემთხვევა დაფიქსირდა, მათ შორის, აჭარაში – 225.

ბოლო 24 საათის განმავლობაში აჭარაში კორონავირუსის 225 ახალი შემთხვევა დაფიქსირდა.

აჭარის ჯანდაცვის სამინისტროს ინფორმაციით, ამ დროისთვის ბათუმში კოვიდკლინიკებში მკურნალობს 463 პაციენტი, აქედან – 32  არასრულწლოვანი და 10 ორსული. რეანიმაციაშია 24 პაციენტი.

დღეის მონაცემებით, საკარანტინო სივრცეებში მკურნალობს 957 ადამიანი, ხოლო ბინაზე – 600-ზე მეტი ადამიანი.

აჭარის ჯანდაცვის სამინისტროს მონაცემებით, გუშინ ამოქმედებული ახალი პროტოკოლის თანახმად სტაციონარი და საკარანტინო სივრცე დატოვა 400-მდე პაციენტმა. დაახლოებით 300 პაციენტი გაეწერა კოვიდსასტუმროდან, 100-მდე პაციენტი კი – კლინიკებიდან.

სამინისტროს ინფორმაციით, ონლაინკლინიკების მეშვეობით კონსულტაცია გაეწია 553 პირს; კორონავირუსით ინფიცირებული პაციენტების მართვაში ჩართულია 8 სამედიცინო დაწესებულება.

ამ დროისთვის, აჭარის ჯანდაცვის სამინისტროს ცნობით, რეგიონში მობილიზებულია 600 საწოლი და კოვიდდადებითი პაციენტებისთვის გამოყოფილია 7 საკარანტინო სივრცე.

stopcov.gov.ge-ს მონაცემებით, ბოლო 24 საათში საქართველოში კორონავირუსის 314 ახალი შემთხვევა დადასტურდა. ეს პირველი შემთხვევაა საქართველოში, როცა ინფიცირების ახალი შემთხვევების რაოდენობა 300-ზე მეტია.

დღევანდელი მონაცემებით, საქართველოში კორონავირუსის სულ 5866 შემთხვევაა დადასტურებული, რომელთაგან 2324 პაციენტი გამოჯანმრთელდა. კორონავირუსის დიაგნოზით 33 ადამიანი გარდაიცვალა, მათგან ერთი – ბოლო 24 საათში.

ამჟამად კარანტინში იმყოფება 5637  ადამიანი, სტაციონარში მეთვალყურეობის ქვეშ კი – 836. კოვიდსასტუმროში იმყოფება 800 პირი. 

ჯონ ჰოპკინსის უნივერსიტეტის მონაცემებით, 29 სექტემბერის მდგომარეობით, მსოფლიოში კორონავირუსის პანდემიის შედეგად 1 001 644 ადამიანი გარდაიცვალა. ყველაზე მეტი – 205 070 ადამიანი Covid19-ის დიაგნოზით გარდაიცვალა ამერიკის შეერთებულ შტატებში, 142 058 – ბრაზილიაში, 96 318 კი – ინდოეთში.

29 სექტემბრის მონაცემებით, მსოფლიოში სულ დადასტურებულია კორონავირუსის 33 353 614 შემთხვევა. კორონავირუსის პანდემიის აფეთქების ეპიცენტრია აშშ, ინდოეთი, ბრაზილია, რუსეთი და კოლუმბია.

პანდემიის დაწყებიდან, 2020 წლის იანვრიდან დღემდე, კორონავირუსისგან განიკურნა 23 151 117 ადამიანი.

______________

ფოტოზე: ბრაზილია, კოპაკაბანას სანაპირო, აქციაზე აქტივისტი ასობით ჯვარით მიანიშნებს იმ შეცდომაზე, რაც ბრაზილიის ხელისუფლებამ დაუშვა კორონავირუსთან ბრძოლაში. ქვეყნის პრეზიდენტი ბოლსონარუ პანდემიის დასაწყისში აცხადებდა, რომ კორონავირუსი უბრალოდ გრიპი იყო. ფოტო: ევროპის პრესპოტო სააგენტო. EPA/ANTONIO LACERDA

დღეს, 28 სექტემბერს, ბათუმში რიგები გაჩნდა იმ პოლიკლინიკებთან, სადაც მოქალაქეებს კორონავირუსზე უფასო ტესტირება შეეძლოთ. აქამდე ბათუმში მოქალაქეებს 5 პოლიკლინიკაში შეეძლოთ უფასო ტესტირება, თუმცა, დღეის მდგომარეობით, ტესტირება უფასოდ მხოლოდ ორ პოლიკლინიკაშია შესაძლებელი: ბარათაშვილის ქუჩაზე მდებარე საოჯახო მედიცინის ცენტრსა და ბათუმის #1 პოლიკლინიკაში, რომელიც რესპუბლიკურ საავადმყოფოსთან ახლოს მდებარეობს.

„ბათუმელები“ რამდენიმე მოქალაქეს ესაუბრა, ვინც დღეს უფასო ტესტირება გაიარა. ისინი ამბობენ, რომ რიგი პოლიკლინიკებთან არაორგანიზებული იყო, არ იყო დაცული დისტანცია მოქალაქეებს შორის, იყო „ნაცნობების“ ურიგოდ შეყვანის ფაქტები და ა.შ. მოქალაქეების უკმაყოფილებას კიდევ უფრო ზრდის ის ფაქტი, რომ ტესტირების საათები შემცირდა, ახლა უფასო ტესტირება მხოლოდ დილის 11 საათიდან 14 საათამდეა შესაძლებელი.

პოლიკლინიკებთან რომ რიგები შეიქმნა, ამას სამედიცინო დაწესებულებებში ადასტურებენ. ბათუმის #1 პოლიკლინიკის დირექტორმა, თენგიზ შერვაშიძემ გვითხრა, რომ უფასო ტესტირება ხვალ და შემდეგ დილის 11-დან 14 საათამდე გაგრძელდება, „თუ რაიმე განკარგულება არ მოვიდა“.

ბათუმში, ბარათაშვილის ქუჩაზე მდებარე საოჯახო მედიცინის რეგიონულ ცენტრთან ხალხმრავალი რიგის მოსაწესრიგებლად დღეს პოლიციის დახმარებაც დასჭირდათ.

„ორზე უნდა დაგვესრულებინა მიღება, მაგრამ ხალხი არ წავიდა, პოლიცია დაგვეხმარა, საშინელი უსიამოვნება იყო. პოლიცია კი გვეხმარება, მაგრამ შეჯგუფული ხალხი ეპიდსაშიშია. სადღაც ორის ნახევარზე შევწყვიტე ცოცხალ რიგში ჩაწერა, მეტი აღარ ჩაეწეროთ და ვინც ჩაეწერა, ყველას მოგემსახურები-მეთქი და რეალურად იმდენი ყოფილა ჩაწერილი, ნახევარი საათი არ აღმოჩნდა საკმარისი. სიტყვა უკვე ნათქვამი მქონდა და ეს ხალხი ვეღარ გავაბრუნე“, – გვითხრა ბარათაშვილის ქუჩაზე მდებარე საოჯახო მედიცინის რეგიონული ცენტრის დირექტორმა ბექა იოსელიანმა.

მისივე თქმით, ტესტირებისათვის განკუთვნილი დროის შესახებ გუშინ მიიღეს ინფორმაცია სამინისტროდან და ეს უკავშირდება ტესტირების მიზნობრიობას:

„მიზეზი არის შემდეგი, 80 პროცენტი ვინც იკეთებს ტესტირებას, არიან ადამიანები, რომლებსაც კონტაქტი არ ჰქონიათ ინფიცირებულ პირებთან და არც სიმპტომები აქვთ. შესაბამისად, როგორც ამიხსნეს, ცდილობენ მაქსიმალურად მიზნობრივ ჯგუფებამდე დაიყვანონ სკრინინგი და საათებიც შეამცირეს, რომ სერვისი გადავიდეს ძირითადად დადასტურებული შემთხვევების კონტაქტებისა და სიმპტომების მქონე პაციენტების ტესტირებაზე“.

ბექა იოსელიანი ასევე აღნიშნავს, რომ დიდი რიგები საშიშია ვირუსის გავრცელების თვალსაზრისით: „300 ადამიანი რომ მოდის, აქედან 200-ს არანაირი სიმპტომი არა აქვს, მაგრამ 50-ს აქვს სიმპტომები და ამ რიგში ის 200 ადამიანიც დარტყმის ქვეშ დგას“, – ამბობს ბექა იოსელიანი.

რატომ შემცირდა ბათუმში იმ კლინიკების ჩამონათვალი, სადაც უფასო ტესტირება იყო შესაძლებელი, რატომ შემცირდა ტესტირებისთვის განკუთვნილი დრო და ეს როგორ უზრუნველყოფს ტესტირების მიზნობრიობას? – ამის შესახებ გვინდოდა აჭარის ჯანდაცვის მინისტრისთვის, ნინო ნიჟარაძისთვის გვეკითხა, თუმცა მან, ჯერჯერობით, ჩვენს სატელეფონო ზარებს არ უპასუხა. ამ ინფორმაციის მიღება ვერც აჭარის ჯანდაცვის სამინისტროში შევძელით.

_______________

რიგი PCR ტესტირებაზე. ფოტო: „ბათუმელები“

საქართველოს დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, საქართველოში მოსალოდნელია კორონავირუსის ყოველდღიური შემთხვევების ზრდა.

„სწავლა იწყება, ეს დაკავშირებულია მობილობის ზრდასთან, ამიტომ მეტი სიფრთხილე გვმართებს, მეტი დაცვა იმ რეკომენდაციებისა, რაზეც ვსაუბრობთ – პირბადე, დისტანცია, ხელების დამუშავება.

ყოველდღიური შემთხვევების ზრდა გვექნება, მთავარია, რომ სისტემა მართავს ამ ეტაპზე და ეპიდსიტუაცია ქვეყანაში რჩება სრულად მართვადი. შემთხვევათა რაოდენობა დაახლოებით იმერყევებს 200-400, 500- შორისაც შეიძლება ყოველდღიურად მთელს ქვეყანაში, მაგრამ 70 პროცენტი ჯერჯერობით მოდის აჭარაზე. ამიტომ ჩვენი ყურადღება მიმართულია აჭარაზე. ვფიქრობთ, ჩვენ დავასტაბილიზირებთ ამ მდგომარეობას აჭარაში და მთლიანად ქვეყანაში“, – განაცხადა ამირან გამყრელიძემ დღეს, 28 სექტემბერს, ბრიფინგზე.

მან ასევე აღნიშნა, რომ აჭარაში არსებული ტესტების 4 პროცენტი დადებითია.

„ანუ ასი სინჯიდან ოთხია ხოლმე დადებითი, დანარჩენი – უარყოფითი. მაგრამ ის ოთხი დადებითი თუ არ დარჩა სახლში, ის ინფექციის გამავრცელებელია. ამიტომ პასუხამდე ვიყოთ თვითიზოლაციაში და როცა პასუხი მოვა, ვიმოქმედოთ ექიმის დანიშნულების მიხედვით“, – განაცხადა მან.

გამყრელიძემ ასევე აღნიშნა, რომ ეს არ არის კორონავირუსის ახალი შემთხვევების დრამატული ზრდა და პანიკის საფუძველი არ არსებობს. „ზრდა გვექნება სხვა რეგიონებშიც, მაგრამ თავიდან უნდა ავირიდოთ ისეთი ზრდა, როგორიც გვქონდა აჭარაში“, – აღნიშნა ამირან გამყრელიძემ.

მთავრობის დღეს მიღებული გადაწყვეტილების თანახმად, საქართველოში 12 ოქტომბერს მუშაობას გაანახლებენ საბავშვო ბაღები და უმაღლესი და პროფესიული სასწავლებლები, თუმცა არა აჭარაში. აჭარაში კვლავ დისტანციურა წარიმართება სწავლება სკოლებში.

საკონდიტრო “დონა”, რომელიც კორონავისურის გამო ერთი თვეა დახურულია, მუშაობას 5 ოქტომბრიდან განაახლებს.

„ძვირფასო და ერთგულო მომხმარებლებო, 5 ოქტომბრიდან ჩვენი კარები კვლავ იხსნება თქვენთვის. ეს განსაცდელიც გადავლახეთ – თქვენი უდიდესი თანადგომით, მხარდაჭერით, აურაცხელი გამამხნევებელი შეტყობინებით, თბილი სიტყვით და ზღვა სიყვარულით,“ – ნათქვამია განცხადებაში, რომელიც საკონდიტრომ ფეისბუქის ოფიციალურ გვერდზე გამოაქვეყნა.

საკონდიტრო „დონასთან“ დაკავშირებული კლასტერი ბათუმში სექტემბრის დასაწყისში გაჩნდა. კორონავირუსი საკონდიტროს 22 თანამშრომელს დაუდასტურდა. მოგვიანებით ვირუსი დაუდასტურდა “დონას” თანამშრომლებთან დაკავშირებულ სხვა პირებს და საკონდიტროს სტუმრებს.

დღეს, 27 სექტემბერს, „ბათუმელებმა“ გამოაქვეყნა სტატია სათაურით „ინფიცირებული ღამეს ქუჩაში ათევდა, სასწრაფოში კი ეუბნებოდნენ, სადაც ხარ, იქ იყავიო“ – კოვიდდადებითი“.

სტატიის გამოქვეყნების შემდეგ „ბათუმელებს“ დაუკავშირდა სასწრაფო სამედიცინო დახმარების პრესსამსახური და  კატეგორიულად უარყო ინფორმაცია, რომ სასწრაფო დახმარების მანქანები კოვიდპაციენტებთან მისვლას აგვიანებენ.

პრესსამსახურის ცნობით, მსგავსი შემთხვევა, როდესაც კოვიდპაციენტი სასწრაფო დახმარებამ რეაგირების გარეშე დატოვა, არ დაფიქსირებულა.

„ბათუმელებმა“ სასწრაფო სამედიცინო დახმარების სამსახურს მიაწოდა სტატიაში მოყვანილ პირთა მონაცემები, ამ პირებისვე თანხმობით. ინფორმაციის გადამოწმების შემდეგ, სასწრაფო სამედიცინო სამსახურის პრესსამსახურმა მომხდარი ფაქტი შემდეგნაირად განმარტა:

„სამივე პირი ჩვენთვის უკვე ცნობილია. არც ერთი მათგანის შესახებ, სასწრაფო დახმარების სამსახურს არ მიუღია შეტყობინება. შესაბამისად, შეტყობინებას თუ ვერ მიიღებდნენ, რეაგირებაც ვერ მოხდებოდა.

პროცედურა არის შემდეგი, 112-ში ზარი რომ ფიქსირდება, ზარი გადის ფილტრაციას 112-შივე, მისამართდება ან ოჯახის ექიმთან, ან მისამართდება სასწრაფოსთან. ჩვენ ასეთი შეტყობინება არც ერთ მათგანზე არ მიგვიღია. მოქალაქემ თუ ჩათვალა, 112-ში რომ დარეკა, ამით უკვე სასწრაფო გამოიძახა, რა თქმა უნდა, არ არის სწორი. თუმცა გასაგებია, რომ ვიღაცას შეიძლება ასე ეგონოს. სასწრაფოს მსგავსი გამოძახება არ მიუღია არც ერთი მათგანისგან. დამატებით დავაზუსტე, რომ ერთ-ერთმა პაციენტმა ოჯახის ექიმის კონსულტაცია მიიღო,“ – განაცხადეს სასწრაფო სამედიცინო დახმარების სამსახურის პრესსამსახურში.

„ბათუმელების“ კითხვაზე, მაშინ როცა კოვიდინფიცირებულები 112-ში რეკავდნენ, სად მისამართდებოდა ზარი და რატომ ვერ ხვდებოდა ის სასწრაფო სამედიცინო სამსახურში, პრესსამსახურში განმარტავენ:

„პროტოკოლი არის შემდეგი:  ზარი ფიქსირდება საერთო ცენტრში, რომელიც ეკუთვნის შინაგან საქმეთა სამინისტროს 112-ის საინფორმაციო ცენტრს. ზარის დაფიქსირების შემდეგ კოვიდ-19-თან დაკავშირებული მოქალაქის ზარი გადადის ოჯახის ექიმთან. მოქალაქეს უკავშირდება ოჯახის ექიმი, რომელიც დისტანციურად აფასებს პირის ჯანმრთელობის მდგომარეობას. ოჯახის ექიმი სხვადასხვა კრიტერიუმებითა და გაიდლაინებით ასევე აფასებს – რამდენად ესაჭიროება პირს გადაუდებელი დახმარება/სასწრაფო. ხდება პაციენტთა ჯანმრთელობის მდგომარეობის ხანრგძლივი, დისტანციური მონიტორინგი. საჭიროების შემთხვევაში, პირის მონაცემები მიეწოდება სასწრაფო სამედიცინო დახმარებას, რომელიც ახდენს რეაგირებას თითოეულ შემთხვევაზე”.

პრესსამსახურისვე თქმით, ოჯახის ექიმთან კონსულტაცია არ ნიშნავს, რომ სასწრაფო დახმარება ესაუბრება პაციენტს.

„ბათუმელების“ კითხვაზე, თუ სასწრაფოში არ ხვდებოდა, მაშინ სად მისამართდებოდა 112-ში შესული მოქალაქის ზარები, სასწრაფო სამედიცინო დახმარების პრესსამსახურში გვითხრეს, რომ ეს ინფორმაცია  უშუალოდ 112-ში უნდა გავარკვიოთ.

„შემიძლიათ გითხრათ, რომ 112-ში შესული ზარი არ იკარგება. 112 ინფორმაციას გადასცემს ოჯახის ექიმებს. ოჯახის ექიმები შემდეგ ესაუბრებიან პაციენტს. თუ ეს არ მომხდარა მათთან, უკვე შეგიძლიათ დააზუსტოთ 112-თან. თუმცა მე როგორც მოგახსენეთ, სასწრაფო დახმარებაში მსგავსი ინფორმაცია არ არის გადმოცემული,” – გვითხრა სასწრაფო სამედიცინო დახმარების სამსახურის პრესსამსახურმა.

24 წლის გიო ჩავლეიშვილი კოვიდინფიცირებულია. ის თავის ისტორიას „ბათუმელებს“ უყვება და საზოგადოებას მოუწოდებს, დაიჯერონ ვირუსის არსებობა.

„14 სექტემბერს, გამომდინარე იქიდან, რომ რაღაც სიმპტომები მქონდა (ყელი მქონდა გაღიზიანებული, სიცხეც მომცა) გადავწყვიტე წავსულიყავი ტესტის ჩასაბარებლად. ტესტი ჩავაბარე რურუას ქუჩაზე, კარავში. 16-ში ღამე დამირეკეს და მითხრეს, რომ დადებითი იყო ჩემი ტესტის პასუხი. კერძო სახლში ვცხოვრობ და ორი დღე სახლში ვიყავი, სახლიდან არ გავდიოდი, ოჯახის წევრებისგანაც იზოლირებული ვიყავი. შიშის ფაქტორი იყო. მერე ჩემმა მშობლებმაც ჩააბარეს ტესტი, მაგრამ მათი პასუხი უარყოფითი იყო.

17-ში ზარები აღარ წყდებოდა, მოვიდა სასწრაფო დახმარების მანქანა და წამიყვანეს „მედალფაში“ ფილტვების ტომოგრაფიაზე. ფილტვებზე რომ გადამიღეს, მცირე პნევმონია იყო და მაშინვე დამაწვინეს. 24 წლის ისე გავხდი, ექიმთან არ ვყოფილვარ. რატომღაც უარყოფითი დამოკიდებულება მქონდა, მაგრამ ამ ექვსი დღის მანძილზე, რასაც ვუყურე, მთლიანად შემეცვალა წარმოდგენა ექიმებსა და ექთნებზე. ყოველ ნახევარ საათში მოდიოდნენ. ჩემი ტოლა გოგო-ბიჭები იყვნენ. რაც შეეძლოთ იმაზე მეტს აკეთებდნენ. ყოველ დილას ათ საათზე იცვლებოდა მორიგეობა, ფანჯრიდან ვუყურებდი, ცოცხალი გვამებივით იყვნენ, ისე დაღლილები ჩანდნენ დილას, შეცვლის შემდეგ.

სანამ საავადმყოფოში მივიდოდი, სიმართლე გითხრათ, მეტ-ნაკლებად მჯეროდა ვირუსის არსებობა. მაგრამ საავადმყოფოში რაც დავინახე, მერე დავიჯერე. ჩემთან ერთად იყო ბიჭი, რომელსაც ექვსი დღის განმავლობაში სიცხე ვერ ჩაუქრეს. ეს ბიჭი კლინიკაში მოყვანამდე სასტუმროში იყო, კარანტინში. საერთოდ უსიმპტომო. უცებ სიცხემ დაარტყა ღამე. ოჯახის წევრები ტელეფონზე ურეკავდნენ, რომ ვერ გავიდნენ, მერე სასტუმროს ადმინისტრაციას დაუკავშირდნენ. ადმინისტრაციიდან ავიდნენ ამ ბიჭის ნომერში, მაღალი სიცხით დახვდათ, ვერ ლაპარაკობდა, ისეთ დღეში იყო. კლინიკაში ყოფნისას მკურნალობდნენ, მაგრამ სიცხე ქვემოთ არ იწევდა. ერთ ქალს საერთოდ ფილტვის 50% დახურული ჰქონდა.

„არ არსებობს ვირუსი“ – არ არის სიმართლე. აქედან რომ გავალ, ყველას ვეტყვი, რომ ფრთხილად იყვნენ, რომ ეს ვირუსი მართლა არსებობს და საშიშია.

მეც ისე ვიყავი თავიდან განწყობილი – არავის არ ჭირს, რაღაცა მოგონილია, მაგრამ ნამდვილად არაა მოგონილი. იმიტომ გავასაჯაროვე ჩემი ინფიცირების ამბავი, რომ ვფიქრობ, ყველამ უნდა დავწეროთ, ყველა კონტაქტს უნდა გავაგებინოთ, რომ მათი ახლობლები დავიცვათ. ვინმე ავადმყოფი რომ ჰყავდეთ სახლში, ის ხომ ვერ გადაიტანს.

ამჟამად კოვიდსასტუმროში ვარ და თავს კარგად ვგრძნობ“.