Batumelebi | ბათუმის საოლქოსთან აქცია დაშალეს და მონაწილეები დააკავეს ბათუმის საოლქოსთან აქცია დაშალეს და მონაწილეები დააკავეს – Batumelebi
RU | GE  

ბათუმის საოლქოსთან აქცია დაშალეს და მონაწილეები დააკავეს

ბათუმის საოლქო კომისიასთან საპროტესტო აქციის რამდენიმე მონაწილე ადმინისტრაციული წესით დააკავეს, მათ შორის, „ალტერნატივას“ ხელმძღვანელი ხათუნა ბერიძე. საპროტესტო აქცია ბათუმის საოლქო კომისიასთან პოლიციამ დაშალა.

აჭარის პოლიციის დეპარტამენტის უფროსმა, კოტე ანანიაშვილმა ვერ დააკონკრეტა, აქციის რამდენი მონაწილე დააკავეს, ან რა სამართალდარღვევა ჩაიდინეს მათ.

ორგანიზაცია „ალტერნატივამ“ ე.წ. სირცხვილის კორიდორი ბათუმის საოლქო კომისიასთან ამ საღამოს მოაწყო, როცა საუბნო კომისიების წარმომადგენლებს შემაჯამებელი ოქმები საოლქო კომისიაში მიჰქონდათ. ისინი „საუბნო კომისიის წევრებს ხვდებოდნენ შეძახილებით „მონებო“, „მოღალატეებო“, სირცხვილია“.

ბათუმის 79-ე ოლქთან პოლიცია ახლაც მობილიზებულია.

დღეს, 21 ნოემბერს, დასრულდა საპარლამენტო არჩევნების მეორე ტური, თუმცა ამ არჩევნებში ოპოზიცია არ მონაწილეობდა. ოპოზიციას მიაჩნია, რომ 31 ოქტომბრის საპარლამენტო არჩევნების შედეგები გაყალბებულია. შესაბამისად, 8 პარტია უარს აცხადებს საპარლამენტო მანდატებზე.

„ქართული ოცნების“ ლიდერებმა უკვე განაცხადეს, რომ 17-ვე მაჟორიტარულ უბანზე მათი კანდიდატები იმარჯვებენ.

ნეტგაზეთის მასალების სხვა გამოცემებში გადაბეჭდვის წესი
ავტორი