ნეტგაზეთი • RU

გამაფრთხილებელი აქცია ბათუმში ძველი ბულვარის ახალი კონცეფციისგან დასაცავად

25 დეკემბერს ბათუმის ბულვარში ძველი ბულვარის დასაცავად გამაფრთხილებელი აქცია გაიმართა. აქციის მონაწილეები ქალაქის ისტორიულ ბულვარში ახალი კონცეფციის განხორციელებას ეწინააღმდეგებიან. ახალი კონცეფციის თანახმად, ბულვარში უქმდება ფეხით სავალი ერთი ზოლი, ამ ნაწილს გამწვანება და კაფე-ბარები ემატება, იცვლება სანაპიროს მიმდებარე ტერიტორიაც. სწორედ ამ ცვლილებების წინააღმდეგ გამოვიდნენ დღეს ძველ ბულვარში მოქალაქეები.

დღის პირველ საათზე ბულვარში, სასტუმრო „ინტურისტის“ წინ ხალხი აქციაზე ძველი ბულვარის ახალი კონცეფციისგან დასაცავად მოვიდა. არ ყოფილა ტრასპარანტები, ლოზუნგები და მიმართვები, თუმცა აქცია ერთ საათზე მეტხანს გაგრძელდა. აქ მოსულ მოქალაქეებს ერთი მთავარი კითხვა ჰქონდათ: რატომ გადაწყვიტა მთავრობამ ძველი, ისტორიული ბულვარის გადაკეთება, მაშინ როცა არის ახალი ბულვარი, სადაც ამ კონცეფციის განხორციელებას მოწინააღმდეგეები არ ჰყავს?!

აქცია ბათუმის ბულვარში

აქცია ბათუმის ბულვარში

ბათუმელი მარინა მეგრელიშვილი უკვე მეორედ გამოვიდა ბულვარის დასაცავად. პირველად იგი რამდენიმე წლის წინ, ბულვარის შესასვლელში ე.წ. ტექნოლოგიური უნივერსიტეტის მწვანე საფარზე აშენებას აპროტესტებდა, ამჟამინდელი მთავრობის ზოგიერთ წევრთან ერთად, რომლებიც ახლა ბულვარის გადაკეთების მომხრეები არიან. „მაშინ არ შეიძლებოდა და ახლა შეიძლება?!“ – ეს არის მთავარი კითხვა, რაც მარინა მეგრელიშვილს აწუხებს.

„მირანდა ჩარკვიანი [აჭარის კულტურული მემკვიდრეობის დაცვის სააგენტოს ხელმძღვანელი] მაშინ ჩვენს გვერდით იდგა. მე ვერ გავიგე რა ხდება. მინდა ვკითხო მირანდას, დავით ბაციკაძეს [აჭარის უმაღლესი საბჭოს წევრი], კაკო ძნელაძეს [ბათუმის მაჟორიტარი დეპუტატი უმაღლეს საბჭოში], რა სჭირთ, რა დაემართათ?!

ძალიან მწყდება გული, რომ ის ადამიანები, ვინც დღეს ხელისუფლებაში არიან, წინა ხელისუფლების დროს წინააღმდეგები იყვნენ და ახლა რატომღაც თანახმა არიან ბულვარი შეიცვალოს. დაავიწყდათ ხალხის განწყობა ბულვარის მიმართ? ის, რომ ბათუმი და ბულვარი ერთი და იგივეა და ეს მარტო ტურისტებისთვის არ არის, ჩვენია, ბათუმელების.

ბათუმი ძველი, ისტორიული ბულვარის გარეშე წარმოუდგენელია. შეაკეთონ, რაც შესაკეთებელია და გადავიდნენ ახალ ბულვარში, სადაც უამრავი რამ არის გასაკეთებელი, ფართიცაა, ადგილიცაა და თანხაც ჰქონიათ ამისთვის – ათი მილიონი გამოუყვიათ, რაც ძალიან ამაყად გამოგვიცხადეს და იმ წუთშივე მივხვდი, რომ ცუდადაა საქმე. ვიცი, რომ უნდათ ცენტრალური გზის გაუქმება, რაც წარმოუდგენელია. როგორც წავიდა ის მთავრობა, ისე წავლენ ესენიც, რატომ უნდა დამიმახინჯონ ბულვარი?! ყოველ დილას და საღამოს აქ დავდივარ, ვვარჯიშობ, ზღვაზე გადავდივარ. ახალი კონცეფციით აქ სერიოზული ცვლილებები დაიწყება, რაზეც არ ვარ თანახმა და დარწმუნებული ვარ, ბათუმელების უმრავლესობა ამაზე არ იქნება თანახმა“ – ამბობს მარინა მეგრელიშვილი.

მსგავსი მოსაზრება აქვს ბათუმელ ნინა ოგანეზოვას. მისი აზრით, მთავრობამ უმჯობესია ბათუმის იტორიულ ტერიტორიას თავი დაანებოს და ახალი სივრცეების შექმნაზე იზრუნოს: „ბათუმის ბულვარი ჩვენი ისტორიაა, ჩვენი მოგონებები, ყველაფერი მშვენიერი, რაც უკავშირდება ქალაქ ბათუმს. ვთხოვთ, გააკეთონ ახალი ადგილები, ააშენონ გასართობი ცენტრები, კაფე-ბარები, მაგრამ ახალ ტერიტორიაზე და არა ძველ, ისტორიულ ბულვარში. მე არ ვარ სიაახლეების წინააღმდეგი, მაგრამ ძველის დანგრევა არ შეიძლება – ამის კატეგორიული წინააღმდეგი ვარ. თუ აპირებენ ძველი ალეების მოშლას, ეს უკვე ძალიან ცუდია. ეს არის დასვენების ზონა ჩვენი ბავშვებისათვის, ჩვენი მომავალი თაობისათვის. მე აქ გავიზარდე, ჩემი შვილები აქ გაიზარდნენ, მინდა ჩემმა შვილიშვილებმა და შვილთაშვილებმაც ისეირნონ ძველ ბულვარში.“

მარინა მეგრელიშვილი და ნინა ოგანეზოვა

მარინა მეგრელიშვილი და ნინა ოგანეზოვა

ბათუმელი მხატვარი, თორნიკე აბესაძე ამბობს, რომ კონცეფციას გაეცნო, არ მოეწონა და ამიტომაც გადაწყვიტა აქციაზე მოსვლა: „ახალი ბულვარი, საერთოდ არ არის ათვისებული და რაღაც საოცრებებს გვთავაზობენ აქ, რაშიც უნდა დახარჯონ ფული. კი, მართალია, უნდა აიღონ ეს საშინელი კაფეები და რესტორნები, მაგრამ დანარჩენ არაფერს არ უნდა შეეხონ, ბულვარი უნდა იყოს სარეკრეაციო ადგილი, რომ დაისვენოს ადამიანმა, გამოვიდეს მინდორზე დაჯდეს, ისეირნოს.“

ძველი ბულვარის განვითარების კონცეფცია დაუსაბუთებლად მიაჩნია მალხაზ ნაკაშიძეს, ბათუმის შოთა რუსთაველის უნივერსიტეტის პროფესორს: „კონცეფცია სხვაგვარად წარმომიდგენია, უნდა იყოს დოკუმენტი, დასაბუთება, მიზნები, შედეგები და ა.შ. რაც ვნახე, არ მგონია ეს იყოს კონცეფცია. ბულვარს სჭირდება მიხედვა, მაგრამ ამ ეტაპზე ასეთი რადიკალური ჩარევა არ ვიცი რატომ არის აუცილებელი. შეიძლებოდა სხვაგან დაეხარჯათ ეს თანხა, ბულვარის სხვა ტერიტორიაზე, ქალაქის სხვა ადგილზე, სადაც არის საჭირო ინფრასტრუქტურის მოწესრიგება. ეს კონცეფცია ნაჩქარევი მეჩვენება“ – ამბობს მალხაზ ნაკაშიძე.

25 დეკემბერს ძველი ბულვარის დასაცავად გამართულ აქციას ის თბილისელებიც შემოურთდნენ, რომლებიც ამჟამად ბათუმში იმყოფებიან. თამარ მირიანაშვილი ფოტოგრაფი და ბლოგერია. იგი ამბობს, რომ ნახა ვიდეორგოლი, რომელიც ბათუმის ძველი ბულვარის კონცეფციას ასახავს და ამიტომაც გადაწყვიტა აქციაზე მოსვლა: „მიმაჩნია, რომ ძალიან არასწორად დაიხარჯება თანხა, ძალიან არაპრაქტიკული იქნება საერთო ინფრასტრუქტურისთვის. ცოტა უფრო გამოცდილი ხალხის მოწვევა კარგი იქნებოდა, რომ ადგილობრივებისთვის და არა მხოლოდ ტურისტებზე მორგებული ინფრასტრუქტურა შეიმუშაონ საბოლოოდ. რაც ვნახე, ეს მკვეთრი ცვლილებების მომტანი იქნება, სჯობს განავითარონ ბულვარის ის ნაწილი, სადაც არაფერი არ ხდება, ვიდრე ძველ ბულვარში განახორციელონ ეს ცვლილებები“ – ამბობს თამარი.

„ქალაქი პირველ რიგში არის მოქალაქეების და არა ხელისუფლების“ – ამბობს ანა მარგველაშვილი, „ტფილისის ჰამქარის“ მოხალისე: „შემთხვევით ვარ ბათუმში, გავიგე, რომ იყო ეს აქცია. როგორც ჩანს ძალიან ბევრ შეკითხავს ბადებს პროცესი, რომელიც ძველ ბულვარს უკავშირდება, განსაკუთრებით სავალი ნაწილების გაუქმება. ვფიქრობ, ადგილობრივი ხელისუფლება გაცილებით მეტად უნდა მუშაობდეს მოსახლეობასთან მსგავსი კონცეფციების დამუშავების დროს“.

აქცია ბათუმის ბულვარში

აქცია ბათუმის ბულვარში


ბულვარში აქციის პარალელურად ბულვარის ახალი კონცეფცია მწვავე განხილვისა და დებატების მიზეზი გახდა ბათუმის საკრებულოშიც.

აჭარის მთავრობა რომ ძველი ბულვარის რეკონსტრუქციას აპირებს, ამის შესახებ ერთი კვირის წინ გახდა ცნობილი. ძველი ბულვარის რეკონსტრუქციის აუცილებლობას აჭარის ფინანსთა და ეკონომიკის სამინისტროსა და აჭარის კულტურული მემკვიდრეობის სააგენტოში იმით ხსნიან, რომ ბულვარი განახლებას საჭიროებს.

ძველი ბულვარის რეკონსტრუქციის იდეას მალევე გამოუჩნდნენ მოწინააღმდეგეები. არასამთავრობო ორგანიზაციების უმრავლესობის, კულტურული მემკვიდრეობის დამცველებისა და ბულვარში მდებარე კაფე-ბარების მფლობელების ინტერესები ამ შემთხვევაში ძირითადად ერთმანეთს ემთხვევა. ძველი ბულვარი უნდა მოწესრიგდეს, მაგრამ იერსახე არ უნდა შეიცვალოს, წინააღმდეგ შემთხვევაში კულტურული მემკვიდრეობის ძეგლი აღარ იქნება – ასეთია მათი პოზიცია.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com