Batumelebi | რა შემთხვევაში გადავა უცხოეთიდან ჩამოსული პირი თვითიზოლაციაში 8-დღიანი კარანტინის ნაცვლად  რა შემთხვევაში გადავა უცხოეთიდან ჩამოსული პირი თვითიზოლაციაში 8-დღიანი კარანტინის ნაცვლად  – Batumelebi
RU | GE  

რა შემთხვევაში გადავა უცხოეთიდან ჩამოსული პირი თვითიზოლაციაში 8-დღიანი კარანტინის ნაცვლად 

საქართველოში უცხოეთიდან ჩამოსული პირი თუ სასაზღვრო პუნქტში წარადგენს ბოლო 72 საათის განმავლობაში ჩატარებული PCR კვლევის საბუთს, ის კარანტინის ნაცვლად დაექვემდებარება თვითიზოლაციაში გადასვლას.

შესაბამისი ცვლილება იზოლაციისა და კარანტინის წესებში დღეს, 21 ოქტომბერს, შევიდა და დღესვე ამოქმედდა.

უცხოეთიდან ჩამოსულ საქართველოს მოქალაქეს თუ PCR კვლევის საბუთი არ ექნება, მას სავალდებულო კარანტინის გავლა მოუწევს.

ახალი ცვლილებით:

  • „უცხო ქვეყნიდან ჩამოსულმა პირმა სასაზღვრო პუნქტებზე უნდა წარადგინოს საქართველოში ვიზიტამდე უკანასკნელი 72 საათის განმავლობაში ჩატარებული PCR კვლევის დამადასტურებელი საბუთი, რის შემდგომაც ექვემდებარება თვითიზოლაციაში გადასვლას;
  • PCR ტესტის არმქონე პირი ექვემდებარება საკარანტინო სივრცეში გადასვლას“.

PCR კვლევის დამადასტურებელი საბუთის მქონე „პირის მიერ ივსება სპეციალური განაცხადი  ვებგვერდზე – www.stopcov.ge  განთავსებული ელექტრონული აპლიკაციის მეშვეობით.“ – აღნიშნულია კანონში.

კანონში არ არის დაზუსტებული, რომ PCR კვლევის დამადასტურებელ საბუთში კვლევის შედეგი უნდა იყოს უარყოფითი, რომ პირი კარანტინის ნაცვლად გადავიდეს თვითიზოლაციაში. ან რა ხდება მაშინ, როცა შედეგი არის დადებითი. „ბათუმელები“ განმარტებისთვის საქართველოს მთავრობას დაუკავშირდა.

„თუ უცხოეთიდან ჩამოსული პირის PCR კვლევის შედეგი იქნება დადებითი, ამ შემთხვევაში ეპიდემიოლოგები და ჯანდაცვის წარმომადგენლები საზღვარზე გადაწყვეტენ – ამ პირმა მკურნალობა კოვიდკლინიკაში გააგრძელოს, კოვიდსასტუმროში თუ თვითიზოლაციაში, ანუ ბინაზე“ – გვითხრეს მთავრობის ცხელ ხაზზე.

ეკონომიკის მინისტრმა ნათია თურნავამ იმის შესახებ, რომ 21 ოქტომბრიდან საქართველოს მოქალაქეებს შესაძლებლობა ექნებათ ქვეყანაში PCR ლაბორატორიაში აღებული ტესტის ნეგატიური პასუხის საფუძველზე შემოვიდნენ და გადაინაცვლონ თვითიზოლაციაში, გუშინ, 20 ოქტომბერს განაცხადა.

აღნიშნული გადაწყვეტილება 15 ოქტომბერს დააანონსა პრემიერ-მინისტრმა გიორგი გახარიამ, თუმცა მან ამ წესის ამოქმედების ვადად ნოემბერი  დაასახელა.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com