საქართველოს ფინანსთა სამინისტროს ინფორმაციით, 2020 წელს სახელმწიფომ სხვადასხვა საერთაშორისო დონორი ორგანიზაციისგან ჯამში 540 მილიონი აშშ დოლარი და 1 მილიარდ 59 მილიონ 790 ათასი ევრო ისესხა. თანხის ნაწილი უკვე გადმორიცხულია.
წელს სახელმწიფო დამატებით 75 მილიონ ევროს ოდენობის გრანტზეც აწარმოებს მოლაპარაკებებს.
ფინანსთა სამინისტროს ინფორმაციით, 2020 წლის 12 ოქტომბრის მდგომარეობით, აღნიშნული სესხიდან საქართველოში უკვე ჩამორიცხულია ჯამში 2 მილიარდ 403 მილიონ 532 ათას 997 ლარი.
„ბათუმელებისთვის“ სამინისტროდან მიღებული წერილის მიხედვით, აღნიშნილი თანხა მოხმარდება როგორც პანდემიასთან ბრძოლას ქვეყანაში, ასევე სხვადასხვა ინფრასტრუქტურულ პროექტს.
ფინანსთა სამინისტროს ინფორმაციით, 2020 წლის აგვისტოს მდგომარებით, სახელმწიფო საგარეო ვალი არის 20,7 მილიარდი ლარი [აქედან 19,4 მილიარდი ლარი არის მთავრობის საგარეო ვალი]; ხოლო მთავრობის საშინაო ვალი ამავე პერიოდისთვის შეადგენდა 5,4 მილიარდ ლარს.
ახალი კორონავირუსის სამართავად და პანდემიის გამო გატარებული სხვადასხვა ღონისძიებისთვის 2020 წელს სახელმწიფო ბიუჯეტიდან, მთავრობის გათვლებით, 2 მილიარდზე მეტი ლარი დაიხარჯება.
ამ თემაზე:
პანდემიის საწინააღმდეგო ღონისძიებებში ბიუჯეტიდან წელს 2 მილიარდი ლარი დაიხარჯება
