დღეს, 30 ნოემბერს, საკოორდინაციო საბჭოს სხდომის შემდეგ, ეკონომიკისა და მდგრადი განვითარების მინისტრმა ნათია თურნავამ განაცხადა, რომ სამედიცინო ჟანგბადის მოხმარება ქვეყანაში გაიზარდა. „პანდემიის პირობებში დღეში 80 ტონამდეა ჟანგბადის მოხმარება“, – ამბობს ის.
თურნავას განცხადებით, სამედიცინო ჟანგბადის პრობლემა ქვეყანაში აღარ იქნება, რადგან სახელმწიფომ თურქეთში 10 ცალი ჟანგბადის გენერატორი შეიძინა. „თურქეთში, ქარხანაში შევიძინეთ 10 ახალი დიდი სიმძლავრის გენერატორი თავისი კომპრესორით, თითო დანადგარი დღეში 1 ტონა ჟანგბადს აწარმოებს.
გარდა ამისა, „აწარმოე საქართველოს“ ფარგლებში დავეხმარეთ პირებს, რომლებიც სამედიცინო ჟანგბადის საკმარის მარაგს აწარმოებენ. ამით ჟანგბადდამოკიდებული პაციენტებისთვის ჟანგბადის მიწოდების პრობლემა სრულად იქნება გადაწყვეტილი“, – აცხადებს ნათია თურნავა.
მისი თქმით, თურქეთში შეძენილი ჟანგბადის დანადგარებიდან ორი უკვე დამონტაჟდა რუხის კლინიკაში, „17 დეკემბრისთვის კიდევ 15 დანადგარს ველოდებით, აქედან სამი ბათუმის რესპუბლიკურ საავადმყოფოში დამონტაჟდება და სამიც თბილისის რესპუბლიკურ საავადმყოფოში“, – ამბობს თურნავა.
ამ თემაზე:
„მოხმარება 5-ჯერ გაიზარდა“ – ქვეყანა სამედიცინო ჟანგბადის მწარმოებელ გენერატორებს ყიდულობს
