Batumelebi

Human Rights Watch-ის ევროპისა და ცენტრალური აზიის პროგრამის დირექტორის მოადგილე, რეიჩელ დენბერი „ამერიკის ხმასთან“ ინტერვიუში საუბრობს „ბათუმელებისა და ნეტგაზეთის“ დამფუძნებლის, მზია ამაღლობელის შესახებ.

მზია ამაღლობელი უკანონო პატიმარია და ის 28 დღეა უსამართლობაზე პროტესტის ნიშნად, შიმშილობს.

„ამერიკის ხმამ“ რეიჩელ დენბერის ჰკითხა, რისი თქმა შეეძლო იმ ფონზე, როცა მზია ამაღლობელის ჯანმრთელობის შესახებ საზოგადოებას მწირი ინფორმაცია აქვს, „ქართული ოცნების“ მთავრობიდან კი გვესმის განცხადებები, რომ მან „ბოდიში უნდა მოიხადოს“, რომ „უბრალოდ ჭამა უნდა დაიწყოს და ყველაფერი მოგვარდება“.

„ვფიქრობ, ეს არის ხელისუფლების მიერ ყველა ზღვრის გადაკვეთის ერთ-ერთი აშკარა გამოვლინება.

ძალიან ბევრს ამბობს ის, რომ ერთის მხრივ პოლიციის მიერ, უამრავი ნაცემი ადამიანი გყავს და ამის ვიდეო ჩანაწერები თუ მოწმეები არსებობს, როდესაც სპეცრაზმი ხალხს ძვლების დამტვრევამდე სცემს და ამ ყველაფრის გამოძიება არ ხდება; არანაირი ნაბიჯი არ იდგმება, დაგმობა არ ხდება, არაფერი ისეთი, რომ ოფიციალური პირები მიხვდნენ, რომ ეს პრობლემაა.

მეორეს მხრივ კი არსებობს მზია ამაღლობელის საქმე, როდესაც აშკარად იყო შეხლა-შემოხლა, იყო უამრავი ხალხი და როდესაც ის დაკავების ადგილს ტოვებდა, დამაბნეველი სიტუაცია იყო და რაღაც მოხდა. და უეცრად, ყველა სამართალდამცავი უწყების ძალისხმევა იმ ერთი ადამიანის დასასჯელადაა მობილიზებული, რომელიც ჟურნალისტია და ცნობილია თავისი კრიტიკულობით. ამაზე ხარჯავთ საგამოძიებო ძალებს? მართლა? ეს ძალიან სერიოზულ პრობლემებზე მიუთითებს,“ – ამბობს რეიჩელ დენბერი „ამერიკის ხმასთან“.

ჟურნალისტმა რეიჩელ დენბერის ჰკითხა, რას ფიქრობდა იმ საკითხზე, რომ ერთის მხრივ არსებობს სხვა ჟურნალისტების საქმეები, რომლებიც პირდაპირ ეთერში სცემეს, მაგრამ დღემდე არ ვიცით ვინ არიან მათზე თავდამსხმელები, მეორეს მხრივ კი არის მზიას საქმე, როდესაც პოლიციელისთვის სახეში გარტყმის გამო მას ისე ექცევიან.

„ნამდვილად, ეს მათი [ხელისუფლების] შეშფოთების მიზეზების სრულ უთანასწორობაზე და რესურსების სრულიად არასწორად გამოყენებაზე საუბრობს.

მათ მთელი თავისი რესურსი დახარჯეს კრიტიკულად განწყობილი ჟურნალისტის წინააღმდეგ. სრულიად ნათელია, რომ ისინი ასე ენერგიულად მის წინააღმდეგ მესიჯის გასაგზავნად მიდიან. ამ დროს არსებობს უამრავი ვიდეო ჩანაწერი და მტკიცებულება ადამიანებზე ძალადობის, მათი ძვლების დამტვრევის, პოლიციის მიერ ძალის გადაჭარბებისა და ამ მიმართულებით, სრულიად არაფერს აკეთებენ.

მზია არ არის ერთადერთი, ვინც პროტესტის ნიშნად შიმშილობს. ადამიანები საპყრობილეში და მის გარეთ შიმშილობენ, თუმცა ჯანდაცვის მინისტრს, ან ჯანდაცვის სამინისტროს წარმომადგენელს, ან ნებისმიერ სხვას მთავრობიდან მათდამი ინტერესი არ გამოუხატავს. ძალიან ცოტა ვიცით ციხის შიგნით მოშიმშილეებზე.

ვფიქრობ, „ქართული ოცნების“ მთავრობამ ძალიან ნათლად დაგვანახა, რომ მათ არ სურთ იმ ადამიანების მოსმენა, ვინც [არსებულ მდგომარეობას] აპროტესტებს. ხელისუფლებამ უკვე გადაწყვიტა ის, თუ რა გზით სურს ქვეყნის წაყვანა. ისინი რეალობას ამახინჯებენ და საქართველოს მოსახლეობის იმ უდიდესი ნაწილის იმედებს აცრუებენ და ამახინჯებენ, ვისაც ევროპული მომავალი სურს,“ – თქვა რეიჩელ დენბერმა.

„ამერიკის ხმის“ სრული ინტერვიუს ნახვა ამ ლინკზე შეგიძლიათ.

ნინო ელიაური ფეისბუქზე წერს, რომ გაათავისუფლეს რუსთავის იუსტიციის სახლის მენეჯერის პოზიციიდან. მას ხელშეკრულება არ გაუგრძელეს.

„გუშინ მაცნობეს, რომ გუშინწინ სამსახურიდან გამიშვეს…

ვერასოდეს წარმოვიდგენდი რომ იუსტიციის სახლთან ჩემი გამოსამშვიდობებელი ტექსტი იქნებოდა ასეთი!

ვინც მიცნობს ყველამ იცის რას ნიშნავს ჩემთვის იუსტიციის სახლი!

ბედნიერი ვარ რომ ამ ორგანიზაციას მისი დაბადებიდან უკავშირდება ჩემი სახელი და გვარი!

ახლა მთავარი…

საჯარო სამსახურის შესახებ კანონში ბოლოს განხორციელებული ცვლილების საფუძველზე, საშტატო ერთეულით განსაზღვრულ პოზიციაზე, კონკურსის წესით უვადოდ დანიშნული თანამშრომელი, 2024 წლის 30 დეკემბრიდან ადმინისტრაციული ხელშეკრულებით გავხდი დასაქმებული.

და ამის შემდეგ!

7 თებერვალს სატელეფონო კომუნიკაციით მაცნობეს, რომ 6 თებერვლიდან შრომითი ხელშეკრულება აღარ მიგრძელდება.

მიზეზი?

მიზეზი არ არსებობს!

მიზანი?

უკანონობის დაკანონება!

იუსტიციის სახლს ჩემი კარიერა 2012 წლიდან უკავშირდება, მათ შორის ბოლო 6 წელი ვიკავებდი რუსთავის იუსტიციის სახლის მენეჯერის პოზიციას, ეს იყო ჩემი ცხოვრების საუკეთესო გამოცდილება, ეს იყო ადგილი სადაც ჩემი და ჩემი გუნდის პრიორიტეტი ყოველთვის უპირობოდ იყო საკუთარი ქვეყნის და მოსახლეობის ინტერესების დაცვა.

რუსთავის იუსტიციის სახლი არის ფილიალი რომელმაც უდიდესი როლი შეასრულა იუსტიციის სახლის იმიჯის შექმნასა და პროფესიულ განვითარებაში.

ვერასოდეს შეიცვლება ჩემი დამოკიდებულება იუსტიციის სახლის მიმართ რადგან ის იყო და იქნება ჩემი იდენტობის ნაწილი!

მადლობა ყველა იმ ადამიანს ვინც ამდენი წლის მანძილზე ჩემთან ერთად იზიარებდა იუსტიციის სახლის მიზანს და ღირებულებებს, მადლობა თითოეულ თანამშრომელს, ამ ადამიანების შრომაზე დგას სამსახური!

ამაყი და ბედნიერი ვარ, რომ ვმუშაობდი გუნდთან #რუსთავისიუსტიციისსახლი, ადამიანებთან ერთად, რომლებიც არიან კეთილსინდისიერების და პროფესიონალიზმის ნამდვილი მაგალითები, ჩემი მეგობრობა სამუდამოა, გახსოვდეთ, მთავარი ძალა ხართ თქვენ, დაიცავით თქვენი მომავალი!

არაფერი არ დასრულებულა, ყველაფერი ახლა იწყება.

უდიდესი სიამაყით და სიყვარულით,

ნინო ელიაური“ – წერს ნინო ელიაური.

დღეს, 8 თებერვალს ფეისბუქზე დაწერა სამსახურიდან გათავისუფლების შესახებ ბათუმის იუსტიციის სახლის მენეჯერმა, ერეკლე თურმანიძემაც. იგი წერს, რომ სამსახურიდან გაათავისუფლეს ევროინტეგრაციის მხარდამჭერ წერილზე ხელმოწერის გამო, რომელიც იუსტიციის სახლი თანამშრომლებმა გაავრცელეს 2024 წლის ნოემბერში, მას შემდეგ რაც ირაკლი კობახიძემ განაცხადა, რომ „ოცნება“ აჩერებს ევროკავშირთან ინტეგრაციის პროცესს.

ამავე თემაზე: 

ბათუმის იუსტიციის სახლი მენეჯერი ერეკლე თურმანიძე ფეისბუქზე წერს, რომ სამსახურიდან გაათავისუფლეს ევროინტეგრაციის მხარდამჭერ წერილზე ხელმოწერის გამო, რომელიც იუსტიციის სახლი თანამშრომლებმა გაავრცელეს 2024 წლის ნოემბერში, მას შემდეგ რაც ირაკლი კობახიძემ განაცხადა, რომ „ოცნება“ აჩერებს ევროკავშირთან ინტეგრაციის პროცესს:

„განაჩენი“ გამოტანილია.

გუშინ, სამუშაო საათების შემდეგ, მეცნობა, რომ გუშინწინ ჩემი ბოლო სამუშაო დღე ყოფილა.

ძალიან ბევრია სათქმელი. ძალიან ბევრი ემოცია და სიტყვები ტრიალებს გონებაში, თუმცა, ვცდილობ რამენაირად შევძლო და მოკლედ გადმოვცე სათქმელი.

იუსტიციის სახლი – ეს არის უნიკალური ქართული პროდუქტი, რომელიც დედამიწაზე მხოლოდ საქართველომ შეძლო და რომელმაც ყველაზე დიდი წვლილი შეიტანა საზოგადოების ცნობიერების ამაღლებაში, დემონი სსრკ-ს განდევნაში და ვიზალიბერალიზაციის საქმეში, რომლის შედეგადაც, თითოეულმა ჩვენგანმა შევძელით და ვნახეთ მშვენიერი გარესამყარო.

ჩვენ ვიზრდებოდით იმ გარემოში, სადაც მნიშვნელოვანი იყო კომპეტენცია, პროფესიონალიზმი, პასუხისმგებლობა, თავისუფალი აზრი, სამართლიანობა, ჯანსაღი კამათი და ა.შ. მაგრამ სამწუხაროდ, არავის გავუფრთხილებივართ, რომ ერთ მშვენიერ დღეს ზემოჩამოთვლილი უნარები, ჩემი და ჩემი მეგობრების სამაგალითოდ დასჯის საფუძველი გახდებოდა.

იუსტიციის სახლთან ჩემი კავშირი დაიწყო სტაჟირებით. მისი დაარსების დღიდან, მთელი ჩემი შეგნებული ცხოვრების, 13 წლის განმავლობაში, მუხლჩაუხრელი შრომის შედეგად, შევძელი არაერთ ჩემთვის საინტერესო პოზიციაზე დაწინაურება და ბოლოს დავინიშნე ბათუმის იუსტიციის სახლის მენეჯერად.

ამ დროის განმავლობაში, სხვადასხვა ხელმძღვანელისგან მიღებული მაქვს არაერთი სიგელი, ჯილდო, საუკეთესო მენეჯერის/ფილიალის წოდება და ყველაზე დიდი საჩუქარი – ძალიან ბევრი ადამიანის პატივისცემა და სიყვარული. ალბათ ყველა ძალიან კარგად ხვდება, რომ ეს ყველაფერი შეუძლებელია პროფესიონალიზმის, თავდაუზოგავი შრომისა და ადამიანურობის გარეშე.

თუმცა, მიუხედავად ყველაფრისა, ერთადერთი რამ, განცხადებაზე ხელის მოწერა გახდა იუსტიციის სახლის კიდევ ერთი, ერთგული თანამშრომლის სისტემიდან მოშორების მიზეზი. განცხადებაზე, რომელიც კონსტიტუციის ერთგულებასა და ევროპულ მომავალზე უარის თქმის შესახებ, მოქალაქეობრივი პოზიციის გამოხატვას ეხებოდა.

რა თქმა უნდა, პირადი ემოციების მიღმა უფრო მტკივნეული იმის ყურებაა, თუ როგორ აცლიან იუსტიციის სახლის სისტემას ყველაზე მნიშვნელოვანს – კომპეტენციას, თავისუფლებასა და წლებით ნაგროვებ თავდაჯერებას; როგორ თესავენ შიშს ყველაზე გაბედულ ორგანიზაციაში, რომელიც არასდროს (მათ შორის, პანდემიის დროსაც) შეშინებია გამოწვევებს და გაუჩერებლად, პირდაპირი მნიშვნელობით, ქვეყნის სადარაჯოს წინა ხაზზე იდგა. მტკივნეულია იმის ყურება, ნელ-ნელა როგორ ანგრევენ ჩვენი ქვეყნის მთავარ სავიზიტო ბარათს დანარჩენ დედამიწაზე.

იუსტიციელებო – თქვენ ხართ გმირები და ძალიან დიდი ძალა, რომელსაც ვერაფერი დაამარცხებს თუ მტკიცეთ დადგებით იუსტიციის სახლისა და ერთმანეთის დასაცავად. დღეს თუ არა ხვალ ყველას მოგაკითხავენ, თქვენ ვეღარასოდეს დააფიქსირებთ პირად აზრსა თუ უკმაყოფილებას, ნუ შეეგუებით უსამართლობას!

ყოფილი იუსტიციელი არ არსებობს!

მე ვარ თავისუფალი.

დიახ, მე ვარ იუსტიციის სახლი“ – წერს ერეკლე თურმანიძე ფეისბუქზე.

იუსტიციის სახლი იყო ერთ-ერთი პირველი ორგანიზაცია, რომლის თანამშრომლების ნაწილმაც 29 ნოემბერს გაავრცელა განცხადება, რომ აპირებენ გააგრძელონ ევროპული მომავლის დაცვა.

__________________

ფოტოზე: ერეკლე თურმანიძე/facebook

ირაკლი კობახიძემ გადათქვა მზაობა, რომ მზია ამაღლობელის შესახებ სასაუბროდ ყველას შეხვდებოდა.

„რაც შეეხება მზია ამაღლობელის კოლეგებთან შეხვედრას, მე ველოდი, რომ გარკვეული სინანული დაედებოდა ფონად იმ ინიციატივას, რომელიც ჩვენ მოვისმინეთ კონკრეტული ადამიანების მხრიდან, თუმცა არავითარი სინანული, მათ უნდათ სამართლებრივი საკითხების გარჩევა, აპირებდნენ ადვოკატთან ერთად მოსვლას. სამართლებრივი საკითხები ჩემთან ვერ გაირჩევა.

თუ ვინმეს უნდა გამოხატოს სინანული, იქნებოდა ძალიან მნიშვნელოვანი, ეს იქნებოდა სახელმწიფოს მიმართ პატივისცემის გამოხატულება და მის შემდეგ შეიძლება, დავიწყოთ საუბარი ნებისმიერ თემაზე, მათ შორის შეხვედრებთან დაკავშირებით და ა.შ. მაგრამ როდესაც ხედავ, რომ არათუ სინანულს არ გამოხატავენ კონკრეტული სამართალდარღვევის გამო, არამედ ცდილობენ, ასეთი სამართალდარღვევების წახალისებას, ეს არის უკიდურესად მიუღებელი და ამის მიმართ ჩვენ ვერ ვიქნებით ლოიალური. კიდევ ერთხელ სინანული არის მთავარი, რაც ახლა არის გამოსახატი“, — თქვა ირაკლი კობახიძემ დღეს, 8 თებერვალს.

სხვა რამეს ამბობდა კობახიძე 29 იანვარს. მაშინ ირაკლი კობახიძემ განაცხადა, რომ თუ ვინმეს უნდოდა მზია ამაღლობელის შესახებ მასთან საუბარი, ის მზად იყო ყველას შეხვედროდა.

„ყოველ ჯერზე ვაფიქსირებთ მზაობას დიალოგისთვის.

თუ მოვლენ ადამიანები, ახლაც შემიძლია დავაფიქსირო, რომ მზად ვართ. თუ ვინმეს უნდა საჯაროდ იქნება თუ არასაჯაროდ, ნებისმიერ ფორმატში, თუ ვინმეს უნდა რაიმე საკითხის განხილვა, კონკრეტულად მზია ამაღლობელის საკითხის განხილვა, მობრძანდნენ, აი, ხვალვე მზად ვარ, რომ შემხვდნენ და განვიხილო ეს საკითხი,“ – თქვა 29 იანვარს ტელეკომპანია „იმედზე“ სტუმრობისას ირაკლი კობახიძემ.

გუშინ, 7 თებერვალს, თბილისში, მთავრობის ადმინისტრაციასთან, მზია ამაღლობელის მხარდასაჭერად შეკრებისას, „ბათუმელების“ მთავარმა რედაქტორმა ეთერ თურაძემ კიდევ ერთხელ მიმართა ირაკლი კობახიძეს, რომ ის მზად იყო შეხვედრისთვის, რასაც უკვე დღეს კობახიძემ უარით უპასუხა.

„მინდა მივმართო ამ შენობაში მყოფ გადაწყვეტილების მიმღებ პირებს, ირაკლი კობახიძეს. ბატონო ირაკლი, მე აქ ვარ იმისთვის, რომ შეგხვდეთ. თქვენ თქვით, რომ შეგიძლიათ შეხვდეთ ნებისმიერ ადამიანს მზიას საკითხზე. მე ვარ მზად შეგხვდეთ თქვენ მზიას საკითხზე, თუ იქნებით თანახმა,“ – ასე მიმართა „ბათუმელების“ მთავარმა რედაქტორმა, ეთერ თურაძემ ირაკლი კობახიძეს.

„მინდა მივმართო ამ შენობაში მყოფ გადაწყვეტილების მიმღებ პირებს, ირაკლი კობახიძეს. ბატონო ირაკლი, მე აქ ვარ იმისთვის, რომ შეგხვდეთ. თქვენ თქვით, რომ შეგიძლიათ შეხვდეთ ნებისმიერ ადამიანს მზიას საკითხზე. მე ვარ მზად შეგხვდეთ თქვენ მზიას საკითხზე, თუ იქნებით თანახმა,“ – „ბათუმელების“ მთავარი რედაქტორი ეთერ თურაძე დღეს, 7 თებერვალს, თბილისში, სახელმწიფო კანცელარიასთან გამართულ აქციაზე მივიდა და ირაკლი კობახიძეს მიმართა.

ჯერ კიდევ 29 იანვარს განაცხადა ირაკლი კობახიძემ, რომ თუ ვინმეს უნდოდა მზია ამაღლობელის შესახებ მასთან საუბარი, ის მზად იყო ყველას შეხვედროდა.

„ყოველ ჯერზე ვაფიქსირებთ მზაობას დიალოგისთვის.

თუ მოვლენ ადამიანები, ახლაც შემიძლია დავაფიქსირო, რომ მზად ვართ. თუ ვინმეს უნდა საჯაროდ იქნება თუ არასაჯაროდ, ნებისმიერ ფორმატში, თუ ვინმეს უნდა რაიმე საკითხის განხილვა, კონკრეტულად მზია ამაღლობელის საკითხის განხილვა, მობრძანდნენ, აი, ხვალვე მზად ვარ, რომ შემხვდნენ და განვიხილო ეს საკითხი,“ – თქვა 29 იანვარს ტელეკომპანია „იმედზე“ სტუმრობისას ირაკლი კობახიძემ.

დღეს, 7 თებერვალს, უკანონო პატიმარ მზია ამაღლობელის გათავისუფლების მოთხოვნით სახელმწიფო კანცელარიასთან საპროტესტო აქცია გაიმართა.

„ბათუმელების“ მთავარმა რედაქტორმა აქციაზე მისულ ჟურნალისტებს, რომლებიც 27 დღეა მზია ამაღლობელის გათავისუფლებას ითხოვენ, მადლობა გადაუხადა.

„მადლობა თქვენი მუხლჩაუხრელი შრომისათვის მზიას გამო. მზია 27 დღეა შიმშილობს და როგორც ექიმი ამბობს, მისი მდგომარეობა არის საგანგაშო. შესაბამისად, არ უნდა გავჩერდეთ, თუ გვინდა, რომ გადარჩეს ჩვენი კოლეგა, ჩვენი მეგობარი, რომელიც დღეს განსაცდელშია.

მინდა ვუთხრა თანამდებობის პირებს, რომლებიც მზიას მისამართით საუბრობენ ცინიკურად ან კრიტიკულად – მზია არ შიმშილობს იმიტომ, რომ ის გაათავისუფლონ, არც ერთხელ არ უთქვამს მას ეს და მეორე – ჩვენ არ ვითხოვთ მზიას გათავისუფლებას იმიტომ, რომ ის არის ჟურნალისტი, ჩვენ ვითხოვთ მის გათავისუფლებას იმიტომ, რომ ის არის უკანონო პატიმარი. ვამბობთ, რომ მზია ამაღლობელის მიმართ წაყენებული სისხლის სამართლის კოდექსის 353 პრიმა მუხლი არის არაადეკვატური.

საქართველოს უზენაესი სასამართლოს პრეცედენტული გადაწყვეტილებით, 6 საქმე შევისწავლეთ ჩვენ და შეიძლება თქვენც გაქვთ შესწავლილი, თავდასხმა არის აქტი, როდესაც არის დაგეგმილი და ქცევა აფექტის პირობებში არცერთ შემთხვევაში არ შეიძლება იყოს თავდასხმა. ამას წერენ უზენაესი სასამართლოს მოსამართლეები, მათ შორის ძირითად მსგავს ქეისებზე ხელმომწერია შოთაძე.

ჩვენ ვიცით მზია ამაღლობელის ქეისის მსგავსი შემთხვევები, იდენტურ ბრალზე პირები გამოუშვეს 2000 ლარიანი გირაოთი. შევხვდი ასეთ ადამიანს, რომელიც 353-ე პრიმა მუხლით იყო დაკავებული და 2000-ლარიანი გირაოთი გაათავისუფლა ბათუმის საქალაქო სასამართლომ.

თუ მზია ამაღლობელის მიმართ არ არის შერჩევითი სამართალი, გეკითხებით საჯაროდ, მაშინ ეს რა არის?

ანუ მზია ამაღლობელს შეუფარდეთ აღკვეთის ღონისძიება, ჩვენ ხომ არ ვითხოვთ, რომ ის უდანაშაულოდ ცნოთ (თუმცა მე ვფიქრობ, რომ უდანაშაულოა),  ჩვენ ვამბობთ, რომ სასამართლომ შეისწავლოს არსებითად და აღკვეთის ღონისძიება შეიცვალოს.

თუ შეიძლება ამის გაკეთება არაერთი ადამიანისათვის, რატომ არ შეიძლება მზია ამაღლობელისათვის? არსებობს ამის მაგალითები.

მე ვაპირებ, რომ მოგაწოდოთ ამის მაგალითები თქვენ პირადად. თუ სხვაზე შეიძლება 353-ე პრიმა მუხლის დროს გამოყენებული იყოს არასაპატიმრო ღონისძიება, რატომ არ ვიყენებთ მზია ამაღლობელთან დაკავშირებით იგივე ღონისძიებას?

თუმცა კიდევ ერთხელ ვიმეორებ, არავითარი თავდასხმა, არც ქართული ეტიმოლოგიით და არც სისხლის სამართლის კოდექსით, არ არის ის ქმედება, რასაც მზიას ედავებიან. მან სილა მარცხენა ხელით გააწნა პოლიციელს და ეს არის ფაქტი. ამას ვერავინ ვერ უარყოფს, ამაზე მეტი მძიმე ბრალი მზიას არ აქვს და გადახედეთ ამ კადრსაც,“ – თქვა ეთერ თურაძემ აქციაზე სიტყვით გამოსვლისას.

27-ე დღეა „ბათუმელებისა“ და „ნეტგაზეთის“ დამფუძნებელი მზია ამაღლობელი ციხეში პროტესტის ნიშნად შიმშილობს. ის მხოლოდ წყალს იღებს. შიმშილობის 24 დღე მზია ამაღლობელმა ციხეში გაატარა.  4 თებერვალს კი, კლინიკაში გადაიყვანეს კვლევებისათვის, სადაც ამ დრომდე რჩება. ის აგრძელებს შიმშილობას.

მზია ამაღლობელი 11 იანვარს ორჯერ დააკავეს. პირველად დამხმარე ნაგებობაზე საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა. 14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება სისხლის სამართალში კვალიფიკაციის არმქონე მოსამართლე ნინო სახელაშვილმა გამოაცხადა.

მზია ამაღლობელისთვის შეფარდებული აღკვეთის ღონისძიება მისმა ადვოკატებმა ქუთაისის სააპელაციო სასამართლოში გაასაჩივრეს, თუმცა ქუთაისის სააპელაციო სასამართლომ საჩივარი არც კი განიხილა.

ადვოკატ მაია მწარიაშვილის თქმით, მზია ამაღლობელი კვლავ ითხოვს სასჯელაღსრულების დაწესებულებაში დაბრუნებას და აგრძელებს შიმშილობას.

„ნეტგაზეთისა“ და „ბათუმელების“ დამფუძნებელი მისმა ადვოკატმა დღეს, 7 თებერვალს, კლინიკა „ვივამედში“ მოინახულა.

„მზია წევს, უტარდება იმ ტიპის გადასხმები, რომ სიცოცხლე შენარჩუნებული იქნას. ითხოვს უკან დაბრუნებას სასჯელაღსრულების დაწესებულებაში. მისი ამოცანაა, რომ პროცესამდე გაძლოს.

მას აქვს სურვილი, რომ პროცესზე თავად იყოს.

პროცესი დანიშნულია 4 მარტს.

არ ვიცი, რამდენად იქნება ეს შესაძლებელი მისი ჯანმრთელობის მდგომარეობის გათვალისწინებით, მაგრამ ამბობს, რომ კლინიკაში ჩატარებული კვლევები და აუცილებელი გადასხმები კიდევ გააძლებინებს რაღაც პერიოდი მის ორგანიზმს იმისთვის, რომ პროცესისთვის ფეხზე დგომა შეძლოს.

მეტყველება არ უჭირს. ბოლოს როდესაც ვნახე, იმასთან შედარებით, ცხადია, უფრო სუსტადაა, მაგრამ ეს გადასხმები ალბათ ემსახურება იმას, რომ შენარჩუნებულ იქნას ჯანმრთელობის და სიცოცხლის ხარისხი, რომ შეძლოს პროცესებში მონაწილეობა“, — განაცხადა მაია მწარიაშვილმა.

მისი თქმით, უფრო დეტალურად მზია ამაღლობელის ჯანმრთელობაზე ისაუბრებს სახალხო დამცველის ექიმთა ჯგუფი, რომელიც მას დღეს მოინახულებს.

მზია ამაღლობელი დაკავების დღიდან, უკვე 27 დღეა შიმშილობს. ის კვლევებისთვის „ვივამედში“ 4 თებერვალს გადაიყვანეს.

მზია ამაღლობელი აცხადებს, რომ შიმშილობს პროტესტის ნიშნად და არა შეღავათების მისაღებად.

„მრცხვენოდა, მაგრამ ვერ ვბედავდი სამსახურის დატოვებას, რაც მეტხანს მუშაობ, უფრო და უფრო რთულია, მსგავსი გადაწყვეტილების მიღება, თუმცა როცა ყველაფერი სცდება ადამიანობას და მორალს და რაც მთვარია ირღევა ყველა ის კანონი, რაზეც ხელი გაქვს მოწერილი, მანდ უკვე ბევრი ფიქრი აღარ არის საჭირო, რომელ მხარეს უნდა იდგეს ადამიანი“-წერს ნინი გოგინაშვილი, ყოფილი პოლიციელი, რომელმაც სამსახური ქვეყანაში არსებული უსამართლოს გამო მიატოვა.

მან ამის შესახებ ფეისბუქში პოსტი დღეს, 7 თებერვალს გამოაქვეყნა.

„ყოველთვის თავს ვიკავებდი  პოლიტიკურ საკითხებზე ჩემი შეხედულებების საჯაროდ და მკაფიოდ დაფიქსირებაზე. თავიდან სამსახური მაიძულებდა. მაიძულებდა რა, ასე პირდაპირ არავის არასოდეს უთქვამს, რომ არ უნდა გამომეხატა ჩემი შეხედულება, მაგრამ სხვა პასუხისმგებლობას ვგრძნობდი  თითქოს  და ამ პასუხისმგებლობას ფორმის ჩაცმამდეც კი ვაცნობიერებდი… ვაცნობიერებდი, რომ ბევრ რამეში შევიზღუდებოდი, პოლიციაში მუშაობის დაწყებისთანავე, მაგრამ რა თქმა უნდა მზად ვიყავი და დიდი ბრძოლის შემდეგ, სიამაყით დავიწყე მუშაობა.

ახალი დაწყებული მქონდა მუშაობა, ბასიანის თემები იყო აქტუალური იმ პერიოდში და ერთ-ერთ თათბირზე  გაჟღერდა ფრაზა „სამსახურის გარეთ, არავინ არაფრის კეთებას არ გიშლით, მაგრამ არასოდეს დაგავიწყდეთ, რომ პოლიციელები ხართ“ – ამით ყველაფერი ნათქვამი იყო, მის შემდეგ ბევრი წელი გავიდა, მაგრამ ეს ფრაზა სულ მახსოვს.

სიმართლე რომ გითხრათ, როგორც პოლიციელის, ჩემი აქტიური ჩართულობა აქციების პროცესში არასოდეს ყოფილა, პირველი მიზეზი იყო სქესი და მეორე ის, რომ აეროპორტში ვმუშაობდი და აეროპორტის თანამშრომლები, მსგავს პროცესებში უკიდურეს სიტუაციებში ერთვებოდნენ.

იყო პერიოდი მეამაყებოდა ფორმა რომ მეცვა… იყო პერიოდი მრცხვენოდა…

მრცხვენოდა მაშინ, როცა იმ უმრავლესობაში ვითვლებოდი (მიუხედავად პირადად ჩემი არანაირი ჩართულობისა), რომელიც ხალხს გაფრთხილების გარეშე არბევდა, რომელიც ადამიანებს დამიზნებით ესროდა რეზინის ტყვიებს, მხედველობას აკარგვინებდა მშვიდობიან პროტესტანტებს, რომელებსაც არაკანონიერი დავალებების შესრულება უწევდათ.

მრცხვენოდა, მაგრამ ვერ ვბედავდი სამსახურის დატოვებას, რაც მეტხანს მუშაობ, უფრო და უფრო რთულია, მსგავსი გადაწყვეტილების მიღება, თუმცა როცა ყველაფერი სცდება ადამიანობას და მორალს და რაც მთვარია ირღევა ყველა ის კანონი, რაზეც ხელი გაქვს მოწერილი, მანდ უკვე ბევრი ფიქრი აღარ არის საჭირო, რომელ მხარეს უნდა იდგეს ადამიანი.

სახელმწიფომ დაიწყო კანონებით ბრძოლა, ადამიანების მიმართ და სადაც ადამიანებს ამდენი რამ ეზღუდებათ, იქ ადამიანების უფლებების დაცვაზე ხომ ზედმეტია საუბარი.

ეს ის სახელმწიფოა, სადაც  თანამოქალაქეებს  გამეტებით სახეში წიხლს ურტყამენ, გონების დაკარგვამდე სცემენ, მხოლოდ იმიტომ რომ მონობაში ცხოვრება არ სურთ.

ეს ის სახელმწიფოა, სადაც ადამიანებს უკანონოდ უსჯიან პატიმრობას, ეს ის სახელმწიფოა, სადაც ადამიანებს ჯგუფურად ესხმიან თავს და მეორე დღეს, ჯგუფური ძალადობა მოქალაქისთვის დამამძიმებელი გარემოება ხდება.

ეს ის სახელმწიფოა, რომელსაც მთელი მსოფლიო  ეუბნება, რომ არასწორია მათი ქმედებები, მაგრამ მაინც სწორი ჰგონიათ.

ეს ის სახელმწიფოა, სადაც სახლში უვარდებიან ადამიანებს, სადაც აღარ არსებობს არანაირი სამართალი, აღარ არსებობს არანაირი  თავდაცვის მექანიზმები.

ეს ის სახელმწიფოა, სადაც ბევრ საჯარო მოხელეს და თანამდებობის პირს უნდა, წასვლა სამსახურიდან, რადგან ისინიც დაიღალნენ და მათთვისაც ყელშია ერთპიროვნული მმართველობა, მაგრამ იმდენად დასვრილნი  და იმდენად გამილიონერებულნი  არიან, რომ იძულებულები არიან დარჩნენ იქ სადაც არიან.

და ამ ყველაფრის  შემდეგ რომელი სახელმწიფოს არსებობაზე უნდა ვისაუბროთ?

ყველაზე სამწუხარო ის არის რომ, ყველაფერი ტყდება დაბალ საფეხურზე მყოფ სახელმწიფო მოხელეებზე, დანარჩენნი კი რესტორნებში სხედან და ბრძანებებს გასცემენ…

დროა გააცნობიეროთ, რომ არ უნდა იყოთ უკანონო ბრძანებების შემსრულებელნი, (თუმცა სადღა არსებობს საერთოდ რამე კანონი), რომ ის მბრძანებლები თქვენს გარეშე ვერაფერს გახდებიან.

დროა გააცნობიეროთ, რომ მოვიდა დრო სწორ მხარეს დგომის.

თქვენ გგონიათ სახელმწიფოს ემსახურებით? დაფიქრდით, სახელმწიფო თავზე გვენგრევა, სახელმწიფოს მსხვერპლი ვარ მეც და თქვენც, თითოეული აგრესორი…

ამხელა აგრესია, ამხელა უსამართლობა და ძალადობა ნუთუ ღირს იმ 2000 ლარად, რასაც გიხდიან? იქნებ ყოველ ერთ დაკავებულზე და ყოველ ერთ ნაცემ ადამიაზე დამატებითი პრემიები გაქვთ, მაგრამ თქვენი ადამიანობის დაკარგვა ღირს ამ ყველაფრად?

და  გგონიათ, ეგ აღებული 500 ლარები რამეში წაგადგებათ? როგორ გძინავთ მშვიდად? როგორ არ ჩაგესმით ამდენი გამწარებული ადამიანის ხმა, როგორ ხართ მშვიდ მართლა ვერ ვხვდები, ან იქნებ არც ხართ.

ყველამ საკუთარ გულში ჩაიხედეთ და მას მიენდეთ, ეს იქნება ყველაზე სწორი და გახსოვდეთ, რომ ყოველი არასწორი ნაბიჯი, თქვენს  ცხოვრებაში, ისეთ დროს მოგიბრუნდებათ, როცა ყველაზე ნაკლებად ელოდებით. მე მჯერა, რომ ამ უსამართლო ხელისუფლების ხელში, სამყარო მაინც სამართლიანია და ყველა ჩვენი გადაგმული ნაბიჯი, ცუდიც და კარგიც ასმაგად დაგვიბრუნდება უკან…

იყო დრო, როცა ვამაყობდი, რომ ფორმა მეცვა, ახლა არის დრო, როცა ვამაყობ, რომ ფორმა აღარ მაცვია და სწორ მხარეს ვდგევარ“-წერს ნინი გოგინაშვილი.

თიბისის ყველა წარმატებისა და ისტორიის უკან, თითოეული თიბისელი დგას.

2024 წელს, თიბისის არაერთი საჭირო და სასარგებლო შიდა აქტივობა ჰქონდა:

• თიბისის 1000-მდე ახალი თანამშრომელი შემოუერთდა;
• ლოკალურ და საერთაშორისო კონფერენციებს დაესწრო, საზღვარგარეთ სწავლა დაუფინანსდა და ლიდერშიპის პროგრამაში ჩაერთო თიბისის 400-მდე მენეჯერი;
• ტრენინგებით კვალიფიკაცია აიმაღლა 2100-ზე მეტმა თიბისელმა;
• თიბისი აკადემიაში შიდა სასწავლო კურსები გაიარა 1270-მდე თიბისელმა;
• თიბისელების მენტალური ჯანმრთელობის პროგრამის აქტივობებში ჩაერთო 500-მდე თანამშრომელი;
• ფონდი „თიბისელების“ დახმარებით, 688 თიბისელი ბენეფიციარის ჯანმრთელობისთვის 3 001 159 ლარი გამოიყო;
• ქვეყანაში მიმდინარე მოვლენების პარალელურად, შეიქმნა ცხელი ხაზი და თიბისიმ აიღო პასუხისმგებლობა თანამშრომლებისა და მათი ოჯახის წევრების სამედიცინო/იურიდიულ დახმარებაზე;

„2024 წელს, ბევრი გამოწვევის წინაშე დავდექით. კიდევ უფრო კარგად გავაცნობიერეთ და ერთად დავამტკიცეთ თუ რამდენად გვეხმარება გუნდურობა დიდი შედეგების მიღწევაში, რაც დადებითად აისახება ქვეყანასა და საზოგადოებაზე.

თიბისი 2025 წელსაც განსაკუთრებული პასუხისმგებლობით იდგება თითოეული მომხმარებლის, თანამშრომლისა და ქვეყნის გვერდით. გვჯერა, ერთად შევქმნით ახალ შესაძლებლობებს და წარმატების ახალ ისტორიებს“ – გვანცა მურღვლიანი, ადამიანური კაპიტალის მართვის დეპარტამენტის უფროსი.

თუ გსურს გახდე ისეთი გუნდის წევრი, სადაც ერთმანეთის მხარდაჭერა კულტურის ერთ-ერთი მთავარი ნაწილია, შემოუერთდი თიბისის – გახდი თიბისელი.

სამოქალაქო აქტივისტი, ფეისბუქჯგუფ „დაიტოვეს“ დამფუძნებელი და ერთ-ერთი ლიდერი, ნენსი ვოლანდი [ქრისტინა ბოტკოველი] იხსენებს მისი პირადი და სახლის ჩხრეკის დეტალებს. მან ამის შესახებ ფეისბუქზე დაწერა 6 თებერვალს.

„ძალიან დიდხანს ვიკავებდი თავს ამ თემაზე, მაგრამ ამ პოსტს დავწერ და მერე ვაპირებ, რომ ცოტა ხანი მოვწყდე პროცესებს და დავისვენო. ეს იმისთვის, რომ გონზე მოვიდე ისევ. არავითარ შემთხვევაში არ ეგონოს ვინმეს, რომ გავჩერდები, უბრალოდ სადღაც ვხვდები, რომ უკვე იმაზე მეტ პასუხისმგებლობას მაკისრებს ბევრი ადამიანი, ვიდრე შემიძლია და დარწმუნებული ვარ, რომ ვერ გავუმართლებ მოლოდინებს.

როგორც იცით, უკვე მეორედ გაჩხრიკეს ჩემი სახლი და მინდა მოგიყვეთ ისეთი დეტალები, რაც არ მითქვამს.

პირველ რიგში, ჩემს სახლში შემოვიდა ორი ქალი პოლიციელი, ვინც პირადი ჩხრეკა ჩაატარა და ეს იყო პირველი ფსიქოლოგიური ძალადობა ჩემზე, როცა მითხრეს, რომ ტანსაცმელი სრულიად უნდა გავიხადო. კი, ექიმთან ვარ ნამყოფი, მაგრამ სისტემის უსამართლობა როცა გაშიშვლებს, ბევრად უხერხულია და უსამართლობისგან ყველაფერი გეწვის.

სახლში მქონდა ბაბუაჩემის ნაქონი ორი 60-იანი წლების ძველებური კამერა, რომელშიც ფირიც კი არ იყო. როცა მკითხეს რა არის, ვუთხარი და ალბათ ჩემს თვალებში ან ხმაში განსაკუთრებული სიყვარული დაინახეს და ეგრევე სტაცეს ხელი, რომ უფრო გავეტეხე ფსიქოლოგიურად.

წაიღეს სახლის კამერა, რომლითაც პაწიკოებს ვუყურებდი, როცა სამსახურში ან აქციაზე ვიყავი, შესაბამისად ეს კამერა ჩემს პირად კადრებს შეიცავს.

ბოლოს რაც მოხდა, ეგ ყველამ იცით, დედაჩემზე იძალადა ვიღაც მოქალაქემ. დიახ, ბატონო გიორგი, მოქალაქე ხართ, იმიტომ, რომ პოლიციელი არ ეუბნება ადამიანს, „წამომყევი განყოფილებაში, არ მინდა უშნო რაღაცები ვაკეთო“.

ბატონო ზურა, თქვენ კი ძალიან განიცადეთ, როცა დაინახეთ როგორ ცუდად გავხდი, მჯერა, რომ იმ წამს შეიძლება რამემ გაგკრათ, მაგრამ ისიც ვიცი, რომ ჩემი სახლიდან როგორც კი გახვედით, იმწამსვე დაგავიწყდათ რა დღეში გამატარეთ.

გოგონა, შენი სახელი არ მახსოვს, მაგრამ როცა მეუბნები, რომ ჩემი ნახატები იცი და მოგწონს და მეორე ხელით ამ ჯოჯოხეთში იღებ მონაწილეობას, სხვანაირად მანიშნე, რომ „ჩემიანი“ ხარ და იქნებ რამე შეიცვალოს კიდეც.

ამ ამბის მერე რა პროპაგანდის მანქანა ამუშავდა ჩემ წინააღმდეგ, მაგას არც აღვნიშნავ, მართლა ყველა ხედავდით მაგას და მეც ვხედავდი ყველაფერს.

მეორე წრეზე წამართვეს ტექნიკა, რომელიც სასიცოცხლოდ მნიშვნელოვანია ჩემი ფინანსური მდგომარეობისთვის და ზუსტად იციან ეს. ამჯერად ჩემი კომპიუტერიც, რომელშიც ყველა ჩემი ნახატი ინახება და ის პროექტი, რომელზეც ვმუშაობდი. საბედნიეროდ, სასწაული ადამიანები მყავს გარშემო და მადლობა, რომ ამ ასპექტში ჩემზე იზრუნებთ, ამას აუცილებლად დაგიბრუნებთ, შეიძლება არამატერიალურად, მაგრამ აუცილებლად.

საბოლოო ჯამში ვთვლი და ამას ყოველთვის ვამბობდი, რომ პასუხისმგებლობა უნდა გადავინაწილოთ ყველამ, ყველას უნდა ჰქონდეს როლი ამ პროცესებში და ისეთი, რასაც გასწვდება და მე საკმარისი და მაქსიმუმი გავაკეთე ყველა ეტაპზე.

ეხლა ჩემზე სისხლის სამართლის საქმეა აღძრული და ეს უსამართლობა მაგიჟებს.

მესამედ თუ მოხვალთ კიდევ, წინასწარ ყველაფერს ამოყრილს დაგახვედრებთ, ზუსტად ისე, როგორც ტოვებთ ხოლმე ჩემს სახლს ყოველ ჯერზე.

აქვე ბოდიშს ვიხდი ამ ეგოცენტრული პოსტისთვის, ჩემზე ბევრად უარეს მდგომარეობაშია ხალხი, მაგრამ ვთვლი, რომ ყველა ისტორია მნიშვნელოვანია და ყველას მსხვერპლი მისი მასშტაბების მიუხედავად საჭირო და ერთ აგურს დებს ბრძოლაში.

მე მინდა, რომ ყველა ერთად ვიყოთ, აპრილში როგორც ვიყავით, ზუსტად ისე, მაგრამ ყველაზე დიდი გამარჯვება სისტემის ის არის, რომ გარკვეულწილად ერთმანეთს დაგვაპირისპირა და თვეების მანძილზე ვიყავი ჩემი თანამებრძოლებისგან არნახული ცილისწამების მსხვერპლი. უბრალოდ გამიმართლა, რომ საოცარი მეგობრები და ოჯახის წევრები მყავს.

დავბრუნდები მალე და იმაზე ბევრად ძლიერი, ვიდრე აქამდე ვიყავი. ბევრი რამე გადამიგორებია ცხოვრებაში და არც ეს იქნება გამონაკლისი. თქვენ კი გთხოვთ, რომ ცოტა ხანი ჩამანაცვლოთ“ – წერს ნენსი ვოლანდი.

პოლიცია ნენსი ვოლანდის სახლში 1-ელ თებერვალს მეორედ შევიდა. იურისტების შეფასებით, საგამოძიებო მოქმედება პროცედურების დარღვევით ჩატარდა.

ამავე თემაზე: 

პოლიტიკოსმა თამარ კორძაიამ ფეისბუქზე დაწერა, რომ ის პოლიტიკიდან მიდის.

„მინდა საჯაროდ გავაკეთო განმარტება ჩემ მიერ მიღებული გადაწყვეტილების შესახებ – მივდივარ პოლიტიკიდან.

2013 წელს დავიწყე პოლიტიკური საქმიანობა და ეს იყო ჩემი ცხოვრების ძალიან საინტერესო პერიოდი. მუდმივად ვცდილობდი ვყოფილიყავი ქვეყნის ინტერესების, საქართველოს კონსტიტუციისა და ადამიანის უფლებების დამცველი. ზოგჯერ გამომდიოდა, ზოგჯერ – არა. მაგრამ ერთი რამე ნამდვილად შემიძლია დაბეჯითებით ვთქვა, ყველა გადაწყვეტილება ამ სამი მთავარი ღირებულებით იყო ნაკარნახევი. ბევრი კრიტიკა მიმიღია, მაგრამ ყველაზე მეტად მაინც თანადგომა და მხარდაჭერა მახსოვს და მადლობა ყველა იმ ადამიანს, რომელიც ამას მაგრძნობინებდა.

მადლობა ყველა იმ ადამიანს, ვისთან ერთადაც ვიბრძოდი. ცხოვრება ღირს ამ გამოცდილებად. საკმაოდ ბევრი ფიქრის შემდეგ მივედი გადაწყვეტილებამდე, რომ შევწყვიტო პოლიტიკური საქმიანობა. რთულია, ვიცი ამასაც არაერთგვაროვანი შეფასება მოჰყვება, ესეც გასაგებია.

ვრჩები აქტიურ მოქალაქედ და ქვეყნის ევროპული მომავლისთვის მებრძოლ ადამიანად“ – წერს თამარ კორძაია.

პროფესიით იურისტი თამარ კორძაია ორი მოწვევის პარლამენტის წევრი იყო. 2013 წელს იგი პარლამენტში  „ქართული ოცნების“ მაჟორიტარი დეპუტატი იყო, 2020 წელს კი თამარ კორძაია გაერთიანებული ოპოზიციის სიით გახდა პარლამენტის წევრი. 2021 წელს მან დატოვა „რესპუბლიკური პარტია“ ექვსწლიანი თანამშრომლობის შემდეგ და პარლამენტში მუშაობა გააგრძელა როგორც უპარტიო პარლამენტარმა.

დღეს, 6 თებერვალს, სტუდენტურმა მოძრაობა „დაფიონმა“ გაავრცელა დაკავებული სტუდენტის, ზვიად ცეცხლაძის წერილი მზია ამაღლობელისადმი, რომელშიც სტუდენტი მზიას შიმშილობის შეწყვეტას სთხოვს:

„მოგესალმებით, ქალბატონო მზია.

გამძლეობას, მხნეობას და თავისუფლებას გისურვებთ პირველ რიგში!

მე მესმის თქვენი ბრძოლის და თავგანწირვის, მესმის და ვაფასებ! თუმცა არ ესმით ქოცებს. მათთვის ადამიანის სიცოცხლეს ფასი არ აქვს, არც იდეისთვის თუ სამშობლოსთვის თავგანწირვას.

ქალბატონო მზია, თქვენი ჯანმრთელობის მდგომარეობა ძალიან მძიმეა, სიკვდილ-სიცოცხლის საკითხია.

საქმე იმაშია, რომ ამ ქვეყანას საკმარისად ჰყავს დაღუპული გმირები… ცოცხალი გმირები გვჭირდება!

მესმის თქვენი პრინციპულობა და ვაფასებ. თქვენმა შიმშილმა მიაღწია მიზანს. თქვენი სიცოცხლის სასწორზე დადებამ მსოფლიოს ყურადღება მიიპყრო და თქვენი სიცოცხლე საქართველოს სიცოცხლის სინონიმად იქცა, ჰოდა გთხოვთ, ნუ მოკლავთ მას…

ამიერიდან შიმშილს მხოლოდ ფატალური შედეგი მოჰყვება, ალბათ ფიქრობთ „ზვარაკად ყოფილა ეს მსხვერპლი“.

მაგრამ დღეს ცოცხალი მზია ამაღლობელი უფრო მეტ კეთილდღეობას მოუტანს სამშობლოს, ვიდრე ზვარაკად შეწირული.

ჩვენი სამშობლოს ინტერესებიდან გამომდინარე, გთხოვთ, შეწყვიტოთ შიმშილობა, სადაც საჭირო იქნება ზვარაკი, ვართ საამისო შვილებიც.

მესმის, რომ გაცილებით რთულია იცოცხლო სამშობლოსთვის, ვიდრე სიცოცხლე შესწირო მას, მაგრამ მე თავგანწირვაზე და ზვარაკზე უფრო რთულ გზას გთხოვთ… იცოცხლეთ საქართველოსთვის!

პატივისცემით, თქვენი თანამებრძოლი

ზვიად ცეცხლაძე“ – წერს ზვიად ცეცხლაძე მზია ამაღლობელს.

წერილი 2 თებერვლით თარიღდება.

ზვიად ცეცხლაძე, 19 წლის სტუდენტია, მოძრაობა „დაფიონის“ ლიდერი. მას ივანიშვილის პროკურატურა ჯგუფური ძალადობის ორგანიზებასა და ხელმძღვანელობაში ადანაშაულებს.

ამავე თემაზე:

19 წლის სტუდენტის, ზვიად ცეცხლაძის მამა, ზურაბ ცეცხლაძე ფეისბუქზე აქვეყნებს შვილის, ზვიადის ციხიდან მოწერილ წერილს.

„მამიკო!

ძალიან მიხარია, რომ მიუხედავად შვილის ფაქტორისა, არ ხარ მიკერძოებული და გესმის, რომ მზია ამაღლობელის პოლიტიკური (და ჯანმრთელობის) მდგომარეობა ჩვენზე მწვავეა და მძიმეა.

რომ ის არის ნომერ პირველი პოლიტპატიმარი (როგორც შენ იტყოდი). ძალიან მიხარია რომ საერთო საქმეში საკუთარ შვილს განკერძოებულად არ აყენებ.

გახსოვს რომ გეხუმრებოდი? ისე გიყვარვარ, რომ შენგან გიორგი სააკაძე არ გამოვა-თქო, არ ყოფილა ეგრე (სააკაძეობა ყველაზე კარგი გაგებით).

მიყვარხარ მამი, ჩემი გმირი ხარ.

დედა ჩამიხუტე და ჩამიკოცნე.

29.01.2025 წ“.

ზვიად ცეცხლაძის მამამ, ზურაბ ცეცხლაძემ, „ბათუმელებისა“ და „ნეტგაზეთის“ დამფუძნებლის, ჟურნალისტ მზია ამაღლობელის დაკავების შემდეგ განაცხადა, რომ მიუხედავად იმისა, რომ მისი შვილი სინდისის პატიმარია, დღეს ნომერ პირველი სინდისის პატიმარი არის მზია ამაღლობელი. სწორედ ამაზე წერს ზვიად ცეცხლაძე მამას.

დღეს, 6 თებერვალს, სტუდენტურმა მოძრაობა „დაფიონმა“ ასევე გაავრცელა ზვიად ცეცხლაძის წერილი მზია ამაღლობელისადმი, რომელშიც სტუდენტი მზიას შიმშილობის შეწყვეტას სთხოვს:

„დღეს ცოცხალი მზია ამაღლობელი უფრო მეტ კეთილდღეობას მოუტანს სამშობლოს, ვიდრე ზვარაკად შეწირული.

ჩვენი სამშობლოს ინტერესებიდან გამომდინარე, გთხოვთ, შეწყვიტოთ შიმშილობა, სადაც საჭირო იქნება ზვარაკი, ვართ საამისო შვილებიც.

მესმის, რომ გაცილებით რთულია იცოცხლო სამშობლოსთვის, ვიდრე სიცოცხლე შესწირო მას, მაგრამ მე თავგანწირვაზე და ზვარაკზე უფრო რთულ გზას გთხოვთ… იცოცხლეთ საქართველოსთვის!“ – წერს ზვიად ცეცხლაძე მზია ამაღლობელს.

ზვიად ცეცხლაძე თბილისში 4 დეკემბერს დააკავეს. მას ივანიშვილის პროკურატურა საპროტესტო აქციების ორგანიზებას ედავება.

ბათუმში, 7 თებერვალს, 15:00 საათზე, აჭარის პროკურატურასთან გაიმართება საპროტესტო აქცია უკანონო პატიმრის,  მზია ამაღლობელის გათავისუფლების მოთხოვნით.

„მზია ამაღლობელი, რომელიც 26 დღეა შიმშილობს უსამართლობაზე პროტესტის ნიშნად, არის უკანონო პატიმარი და ის დაუყოვნებლივ უნდა გათავისუფლდეს“, – ასეთია აქციის მოთხოვნა.

ნახეთ ვრცლად:

ადვოკატი მაია მწარიაშვილი, მზია ამაღლობლის ინტერესების ერთ-ერთი დამცველი, ზედმიწევნით ხსნის, თუ რატომ არის მზია ამაღლობელი უკანონო პატიმარი.

„წარმოდგენილი რეპრესიული წესები არის არალეგიტიმური ხელისუფლების მცდელობა, ფაქტობრივად გააუქმოს გამოხატვის და შეკრების თავისუფლება.

არაპროპორციულად მკაცრი სასჯელების დაწესებით, პროტესტების ადგილებისა და ფორმების შეზღუდვით, თანამდებობის პირების პრივილეგირებულ მდგომარეობაში ჩაყენებითა და დემონსტრაციებზე შინაგან საქმეთა სამინისტროს კონტროლის გაზრდით, რეჟიმი ცდილობს შექმნას მისთვის კომფორტული შიშის ატმოსფერო და გაამკაცროს რეპრესიები საზოგადოების აქტიური წევრების მიმართ,“ – აღნიშნულია „საერთაშორისო გამჭვირვალობა საქართველოს“ მიერ დღეს, 6 თებერვალს გავრცელებულ განცხადებაში.

ორგანიზაცია შეკრების და გამოხატვის თავისუფლების გაუქმებისკენ მიმართულ რეპრესიულ წესებს აფასებს.

„ქართული ოცნების“ ანტიკონსტიტუციური პარლამენტი დაჩქარებული წესით განიხილავს საკანონმდებლო ცვლილებების პაკეტს, სადაც ადმინისტრაციულ და სისხლის სამართლის კოდექსებში მთელი რიგი რეპრესიული ცვლილებები შედის.

„აქციების მონაწილეთა დარბევის, უკანონო დაკავებების, წამებისა და უკანონოდ გასამართლების ფონზე, „ქართულმა ოცნებამ“ რამდენჯერმე შეცვალა კანონი, რითაც აქციების მონაწილეების რეპრესიები გაამკაცრა. აღნიშნული ცვლილებების მთავარი მიზანი მიმდინარე აქციების ჩახშობა და ადამიანების დაშინებაა.

რეპრესიული წესები წარმოადგენს პირდაპირ თავდასხმას იმ უფლებებზე, რომლებიც გარანტირებულია ადამიანის უფლებათა საყოველთაო დეკლარაციით, ადამიანის უფლებათა ევროპული კონვენციითა და საქართველოს კონსტიტუციით. ისინი ასახავენ ავტოკრატიული, დიქტატორული რეჟიმების სტრატეგიას, რომელიც მიზნად ისახავს განსხვავებული აზრის ჩახშობას, ძალაუფლების კონსოლიდაციასა და რეჟიმისათვის არასასურველი პირების დასჯას,“ – აღნიშნულია „საერთაშორისო გამჭვირვალობა საქართველოს“ მიერ გავრცელებულ განცხადებაში.

TI ყურადღებას ამახვილებს ხულიგნობის დეფინიციის შეცვლაზე – ხულიგნობა სოციალურ ქსელებშიც დასჯადი გახდება.

„სოციალურ ქსელებში მთავრობის წევრების და საჯარო მოხელეების კრიტიკისთვის 60 დღიანი-პატიმრობა დაგემუქრებათ.

• ხულიგნობა საჯარო სივრცეში დასჯადი ხდება. არსებული პრაქტიკით საჯარო სივრცედ სოციალური მედიაც მოიაზრება. შესაბამისად, თუკი სოციალურ ქსელებში საზოგადოებრივი წესრიგი ან მოქალაქეთა სიმშვიდე დაარღვიეთ, პატიმრობა გემუქრებათ. მოქმედი კანონით, ხულიგნობისთვის მხოლოდ მაშინ დაისჯებით, თუ ის საზოგადოებრივ ადგილზე [მაგალითად, ქუჩაში] ჩაიდინეთ;
• მკაცრდება პასუხისმგებლობა ხულიგნობისათვის. მაქსიმალური ჯარიმა 1000 ლარიდან 3000 ლარამდე, ხოლო ადმინისტრაციული პატიმრობის ვადა 15 დღიდან 20 დღემდე იზრდება. ხულიგნობის განმეორებით ჩადენის შემთხვევაში ჯარიმის მაქსიმალური ოდენობა 2000-დან 5000 ლარამდე და პატიმრობის ვადა 15 დღიდან 60 დღემდე იზრდება. 

„ხულიგნობის დეფინიციის შეცვლა მიზნად ისახავს „ქართული ოცნებისთვის“ არასასურველი აზრის გამოხატვის შეზღუდვას და დასჯას, მათ შორის, ინტერნეტ სივრცეში, სადაც ძალადობრივი რეჟიმის კრიტიკა განსაკუთრებით მასშტაბურია. გაუგებარია, რა კრიტერიუმით უნდა შეფასდეს გამოიწვია თუ არა ხულიგნობამ [მაგ. სოციალურ ქსელში გაკეთებულმა კომენტარმა] საზოგადოებრივი წესრიგის ან მოქალაქეთა სიმშვიდის დარღვევა. არსებობს რისკი, რომ ნებისმიერი კრიტიკული მოსაზრება, რომელიც თანამდებობის პირების „სიმშვიდეს დაარღვევს“ ხულიგნობად შეფასდება,“- აღნიშნულია TI-ის შეფასებაში.

„ოცნების“ რეპრესიული კანონების შემდეგი წესი: „კრიტიკისთვის, რომელსაც შეურაცხყოფად მიიჩნევენ, შესაძლოა დაგაპატიმრონ – სასჯელი გამოხატვის თავისუფლებისთვის“ 

• პოლიტიკური თანამდებობის პირის და საჯარო მოსამსახურის სიტყვიერი შეურაცხყოფა, ლანძღვა-გინება ან შეურაცხმყოფელი გადაკიდება ადმინისტრაციული სამართალდარღვევათა კოდექსით 6000 ლარიანი ჯარიმით ან 60-დღიანი პატიმრობით დაისჯება. შეურაცხყოფა თანამდებობის პირის და საჯარო მოხელის სამსახურებრივ საქმიანობას უნდა უკავშირდებოდეს.
• სამართალდამცავის „ლანძღვა-გინებისათვის” პატიმრობა 15-დან 60 დღემდე, ხოლო მაქსიმალური ჯარიმა 4500 ლარიდან 6000 ლარამდე იზრდება. მოქმედი კანონით, დასჯადია პოლიციელის შეურაცხყოფა მხოლოდ მის მიერ უშუალოდ სამსახურებრივი მოვალეობის შესრულების პროცესში. ცვლილებებით კი ნებისმიერი შეურაცხყოფა და „ლანძღვა-გინება“ სამართალდამცავის მისამართით, რომელიც მის საქმიანობას უკავშირდება, დასჯადი ხდება.

„ადამიანის უფლებების დარღვევის, წამებისა და უკანონო დაპატიმრების გამო მოქალაქეები მწვავედ აკრიტიკებენ რეჟიმს, რაც არალეგიტიმურ ხელისუფლებას დისკომფორტს უქმნის. პოლიტიკური შინაარსის კომენტარი და საჯარო კრიტიკა, რომელიც თანამდებობის პირების საქმიანობას უკავშირდება, შესაძლოა მმართველმა რეჟიმმა შეურაცხყოფად მიიჩნიოს და გამოხატვის თავისუფლებისათვის პატიმრობით დასაჯოს მოქალაქეები. ცვლილების მთავარი მიზანი მოქალაქეების გაჩუმება და დაშინებაა.

ამ ცვლილებით ფაქტობრივად უქმდება გამოხატვის თავისუფლება, რომლის მთავარი არსი სწორედ ისაა, რომ ადამიანებმა საჯარო მნიშვნელობის საკითხებზე, პოლიტიკურ პროცესებსა და ქვეყნის მმართველობასთან დაკავშირებულ საკითხებზე გამოხატონ აზრი,“ – მიიჩნევენ „საერთაშორისო გამჭვირვალობა საქართველოში“.

კიდევ ერთი საკანონმდებლო ცვლილება ძალადობისკენ საჯარო მოწოდებას ეხება:

„ძალადობრივი ქმედებისაკენ საჯაროდ მოწოდება, იმ შემთხვევაშიც თუ მას არანაირი შედეგი არ მოჰყვა, 3 წლამდე პატიმრობით დაისჯება. ამ დანაშაულზე მოქმედი კანონი თავისუფლების აღკვეთას არ ითვალისწინებს.ძალადობრივი ქმედებისკენ საჯაროდ მოწოდების კრიმინალიზება 2015 წელს „ქართული ოცნების” მმართველობის დროს მოხდა, თუმცა ამ ქმედებისთვის ჯარიმა ან საზოგადოებისათვის სასარგებლო შრომა იყო გათვალისწინებული.

შეიცავს თუ არა გამოხატვა ძალადობისკენ მოწოდებას ამას ის რეჟიმი შეაფასებს, რომელიც მოქალაქეებზე ძალადობს და აქციის მონაწილეებს მასობრივად უკანონოდ აკავებს კრიტიკული აზრისთვის. როგორც წესი, ავტოკრატიული რეჟიმები ძალადობრივი ქმედებისათვის საჯარო მოწოდებად მიიჩნევენ მათ წინააღმდეგ გამართულ ნებისმიერ აქციაში მონაწილეობისკენ მოწოდებას.

ამ შემთხვევაში არც ქართული ოცნება იქნება გამონაკლისი. ცხადია, აღნიშნულ ნორმა გამოყენებული იქნება პროტესტის ლიდერების დასასჯელად, აქტივისტების დასაშინებლად და ექნება მსუსხავი ეფექტი გამოხატვის თავისუფლების განხორციელებაზე,“ – აღნიშნულია TI-ის მიერ გავრცელებულ განცხადებაში.

TI-ის შეფასებით, „ქართული ოცნება“ მაქსიმალურად ცდილობს შეზღუდოს სივრცე, სადაც მოქალაქეები პროტესტის გამოხატვას შეძლებენ:

„სასჯელის გამკაცრება მიზნად ისახავს მშვიდობიანი დემონსტრანტების და პროტესტის შეზღუდვას, რასაც მსუსხავი ეფექტი ექნება გამოხატვის თავისუფლებისა და მშვიდობიანი შეკრების უფლების განხორციელებაზე.

არალეგიტიმური ხელისუფლება მტკივნეულად აღიქვამს ნებისმიერი ტიპის კრეატიულ იდეას პროტესტთან დაკავშირებით და ცდილობს პროტესტის ფორმების შეზღუდვას. 2024 წლის დეკემბერში სწორედ აქციების შემდეგ აკრძალეს ლაზერული და მკვეთრი გამოსხივების სხვა საშუალების გამოყენება, რადგან ამ საშუალებებს იყენებდნენ პროტესტის მონაწილეები. ამჟამად, როდესაც აქციის მონაწილეები აქტიურად მიმართავენ პროტესტისათვის საუნივერსიტეტო სივრცეებს რეჟიმის მთავარი მიზანი შეკრების ადგილების შეზღუდვაა,“ – აღნიშნულია „საერთაშორისო გამჭვირვალობა საქართველოს“ შეფასებაში.

გარდა ამისა, აქციებზე ვერც კარავს გაშლით, თუ, მაგალითად, ის „ხელს უშლის პოლიციის მიერ საზოგადოებრივი წესრიგისა და უსაფრთხოების დაცვას“.

TI ყურადღებას ამახვილებს სხვა რეპრესიულ ცვლილებებზეც, მაგალითად:

• აქციის ორგანიზატორად არა მხოლოდ ინიციატორი, არამედ ორგანიზებაში სხვაგვარად ჩართული პირიც ჩაითვლება
• გაფრთხილების გარეშე სპონტანურად შეკრება კანონის დარღვევად ჩაითვლება
• პოლიტიკური თანამდებობის პირზე მუქარისათვის შესაძლოა 6 წლით დაგაპატიმრონ [მოქმედი კანონით თანამდებობის პირებზე და მათ ოჯახის წევრებზე მუქარა სისხლის სამართლის წესით დასჯადი არ არის. აღსანიშნავია, რომ რიგით მოქალაქეზე მუქარა მხოლოდ იმ შემთხვევაში ისჯება, თუ მუქარა სიცოცხლის მოსპობას, ჯანმრთელობის დაზიანებას ან ქონების განადგურებას ეხება]

ამ თემაზე:

ბათუმის შემოსასვლელში დღეს, 6 თებერვალს, ავტომაგისტრალზე 2 ავტოსაგზაო შემთხვევა მოხდა.

როგორც „ბათუმელებს” თვითმხილველებმა უთხრეს, ერთმანეთს შეეჯახა ტრაილერი და მსუბუქი ავტომანქანა. მეორე შემთხვევაში კი გადაბრუნდა ტრაილერის მისაბმელი.

„ბათუმელების“ ინფორმაციით, შემთხვევის შედეგად არავინ დაშავებულა.

თვითმხილველის თქმით, ეს ორი შემთხვევა ერთმანეთთან ახლოს მოხდა, ავტომაგისტრალზე კი [ჩაქვი- მახინჯაურის გვირაბებთან მოსვლამდე], ამ დროისთვის [17:30 სთ] შეფერხებულია ტრანსპორტის გადაადგილება.

სახალხო დამცველმა, მზია ამაღლობელისთვის პენიტენციური სამსახურის (მათ შორის, კონტრაქტორი კლინიკ(ებ)ის) მიერ მიწოდებული სამედიცინო მომსახურების ადეკვატურობისა და დროულობის საკითხის შეფასების მიზნით, ექიმთა ჯგუფი შექმნა.

სახალხო დამცველის აპარატის ინფორმაციით, ექიმთა ჯგუფი განისაზღვრა მზია ამაღლობელის წარმომადგენლების მიერ დასახელებული კანდიდატებიდან, მათთან კონსულტაციითა და მზია ამაღლობელის ჯანმრთელობის პრობლემების მხედველობაში მიღებით.

ექიმთა ჯგუფში შედიან: ელენე გიორგაძე – ენდოკრინოლოგია, ნუტრიციოლოგია, ბავშვთა ენდოკრინოლოგია, საზოგადოებრივი ჯანდაცვა და ჯანდაცვის ორგანიზაცია, გიორგი გვილია – გასტროენტეროლოგია, კარდიოლოგია, შინაგანი სნეულებები, გიორგი ჯავრიშვილი – ოფთალმოლოგია, ალექსანდრე ცისკარიძე – ნევროლოგია.

„ექიმები უახლოეს მომავალში განახორციელებენ ვიზიტს მზია ამაღლობელთან და შეისწავლიან მის სამედიცინო დოკუმენტაციას. ექიმთა ჯგუფი მოამზადებს დასკვნას და რეკომენდაციებს, რომელსაც წარმოუდგენენ სახალხო დამცველს. დასკვნის საფუძველზე სახალხო დამცველი და სახალხო დამცველის აპარატი შემდგომ სამართლებრივ რეაგირებას განახორციელებენ. ასევე, განსაკუთრებული კატეგორიის პერსონალური მონაცემების დაცვის ფარგლებში, ინფორმაციას მივაწოდებთ საზოგადოებას.

კიდევ ერთხელ ხაზგასმით აღვნიშნავთ, რომ სახალხო დამცველის მანდატი არ არის პატიმრების მკურნალობაში მონაწილეობის მიღება და აღნიშნული უფლებამოსილება არც სახალხო დამცველის მიერ მოწვეულ სპეციალისტებს ექნებათ,“ – ნათქვამია სახალხო დამცველის აპარატის მიერ გავრცელებულ განცხადებაში.

„უამრავი მაქ დასაწერი ამ ცირკზე, მაგრამ ეხლა ამის თქმა მინდა: „გავიმარჯვებთ სახელოვნად“ – ზ.ც.

ეს წარწერა დამხვდა, სასამართლოში რომ მივედი, მოსაცდელ საკანში. ალბათ ზვიად ცეცხლაძის დაწერილია. მაგ დროს სულ სხვანაირ ხოდზე ვიყავი, მთელი დღე მზია ამაღლობელზე ვფიქრობდი და ვემზადებოდი შიგნიდან ბრძოლისთვის. ორმაგი გული მომცა ამ წარწერამ.

მერე ზევით ავედი და მითხრეს, რომ გირაოთი გავიდოდი. ძალიან გამიხარდა, რა თქმა უნდა, მაგრამ თან ცოტა დაბნეულიც ვიყავი, იმდენად სხვა რამისთვის ვემზადებოდი.

მალევე ქვევით ჩამაბრუნეს, იმიტომ, რომ სასამართლო დარბაზი იცვლებოდა და ისევ ამ წარწერასთან აღმოვჩნდი, რამაც ძალიან დამასევდიანა.

გამახსენდა, რომ კიდევ ათეულობით ჩემსავით ადამიანი ისევ ციხეში ჰყავს რეჟიმს და კიდევ კაცმა არ იცის, რამდენი ხანი ეყოლება.

ჰოდა, სანამ ეს ყველა ადამიანი არ იქნება თავისუფალი, ვერც მე ვიქნები და გავაგრძელებ მათთვის ბრძოლას ბოლომდე.

თავისუფლება რეჟიმის პატიმრებს!“ – წერს ირაკლი წიგნაძე ფეისბუქზე.

ირაკლი წიგნაძე 2 თებერვალს აღმაშენებლის ხეივანში, „თბილისი მოლის“ მიმდებარე ტერიტორიაზე, გზის გადაკეტვის მცდელობის ბრალდებით, რვა პირთან ერთად დააკავეს.

სასამართლოზე, სადაც ირაკლი წიგნაძეს 5000-ლარიანი გირაო შეუფარდეს, მან თქვა:

„თავს არ ვგრძნობ დამნაშავედ და მართლა გულით მეცოდება ისინი და იმათ ხელში ჩვენ, რომ მთელი პოლიციური სისტემა აგებულია არა იმაზე, რა არის სიმართლე, არამედ იმაზე, რას იტყვის შეფი. ჩემთვის ეს ტრაგედიაა ნამდვილად“.

ირაკლი წიგნაძეს ლეონიძის ქუჩაზე სამართალდამცავები ფიზიკურად გაუსწორდნენ 2024 წლის 11 მაისის ღამესაც.

_________________

მთავარი ფოტო: ირაკლი წიგნაძე/სქრინი „რადიო თავისუფლების“ ვიდეოდან.

ამავე თემაზე: 

„პარტნიორობა ადამიანის უფლებებისთვის“ [PHR] ინფორმაციით, სისტემური ძალადობის მსხვერპლმა ბავშვებმა ზრუნვის სააგენტოს წინააღმდეგ სარჩელით სასამართლოს მიმართეს.

თბილისის საქალაქო სასამართლომ ორი ბავშვის სარჩელი წარმოებაში მიიღო.

ორგანიზაციის განცხადებით, სასამართლო დავის საგანია სახელმწიფო ზრუნვის სააგენტოს მხრიდან ბავშვების უფლებების სისტემური დარღვევა.

„საზოგადოებას ახსოვს 9 წლის შეზღუდული შესაძლებლობის მქონე გოგოს და მისი ძმის უმძიმესი ისტორია.

ჯერ კიდევ სისხლის სამართლის საქმის დაწყებისას, სახელმწიფო ზრუნვის სააგენტომ ბავშვს მის შესახებ მასალების გადაცემაზე უარი უთხრა, იმ მიზნით, რომ PHR-ის ადვოკატებს არ ჰქონოდათ გაცნობის შესაძლებლობა.

ეს არ იყო სახელმწიფოს მხრიდან  ბავშვის უფლებების ერთადერთი დარღვევა.

2022 წლიდან ორგანიზაცია იცავს არასრულწლოვან და-ძმას რამდენიმე ადმინისტრაციულ და სისხლის სამართლის საქმეზე. ბავშვების უფლებების დარღვევა გაგრძელდა მაშინაც, როდესაც ისინი სახელმწიფო ზრუნვაში გადავიდნენ“ – აცხადებს PHR-ი .

მათივე ინფორმაციით, გარდა იმისა, რომ ბავშვი ოჯახში ექვემდებარებოდა ფიზიკურ და სექსუალურ ძალადობას, მას აიძულებდნენ ქუჩაში მოწყალების თხოვნას, მისი შეზღუდული შესაძლებლობის გამო.

„აღსანიშნავია, რომ სააგენტოსთვის მშობლის მხრიდან არასრულწლოვანების უფლებების დარღვევის თაობაზე ცნობილი იყო სამი წლით ადრე. რის საფუძველზეც, ბავშვები ოჯახიდან სახელმწიფო ზრუნვაში გადაიყვანეს.  სააგენტომ რამდენიმე თვეში ბავშვების ოჯახში დაბრუნების გადაწყვეტილება მიიღო. თუმცა, ის საფუძვლები, რის გამოც მოხდა ბავშვების სახელმწიფო ზრუნვაში გადაყვანა, კვლავ სახეზე იყო.

ასევე, რეინტეგრაციიდან რამდენიმე თვეში მათთან საცხოვრებლად გადავიდა დედის მეგობარი მამაკაცი.

რეინტეგრაციის (ოჯახში დაბრუნების) შემდეგ ოჯახთან მუშაობდა სააგენტოს სოციალური მუშაკი. მიუხედავად ამისა, სახელმწიფო ზრუნვის სააგენტომ სამი წლის განმავლობაში ვერ შეძლო არასრულწლოვანების მიმართ  განგრძობითი ძალადობის იდენტიფიცირება.

სააგენტოს შეფასებით, ბავშვებისთვის ოჯახში შექმნილი იყო კეთილსაიმედო გარემო, შესაბამისად, 3 წლის განმავლობაში სააგენტო აგრძელებდა რეინტეგრაციას. გარდა იმისა, რომ სახელმწიფომ ვერ შეასრულა პოზიტიური ვალდებულება დაეცვა ბავშვები ოჯახში უმძიმესი დანაშაულებისგან, სახელმწიფო ზრუნვაში გადაყვანის შემდეგაც ვერ უზრუნველყო მათთვის საჭირო და საკმარისი სერვისების შეთავაზება და მათი უფლებების დარღვევის პრევენცია.

სახელმწიფო ზრუნვაში ყოფნის პერიოდში, სექსუალური ძალადობის მსხვერპლი ბავშვები დაექვემდებარნენ ზეგავლენას, მათი დაზარალებულად ყოფნის გამო“-აცხადებს PHR-ი.

მათი თქმით, სააგენტოს მხრიდან საქმეში ვლინდება სხვა სისტემური ხასიათის დარღვევებიც. კერძოდ,  სახელმწიფო ზრუნვაში  გადაყვანის შემდეგ ბავშვებმა რამდენჯერმე შეიცვალეს ოჯახი. ასევე,  მათ საქმეზე 6-ჯერ შეიცვალა სოციალური მუშაკი.

„ამასთან, მინდობით აღმზრდის სახელმწიფო პროგრამა არ ითვალისწინებს სწავლებას მინდობით აღმზრდელისთვის, სექსუალური ძალადობის მსხვერპლ ბავშვთან კომუნიკაციის თავისებურებების თაობაზე“.

PHR-ის განცხადებით, სააგენტოს მხრიდან ბავშვების უფლებების სისტემურ დარღვევებზე არასრულწლოვანებმა, PHR-ის ადვოკატების დახმარებით, მიმართეს საქალაქო სასამართლოს.

„მართლმსაჯულების უფლებით სარგებლობის დროსაც, ბავშვებს შეექმნათ ბარიერები PHR-ის ადვოკატებზე მინდობილობის გაცემის კუთხით.

მიუხედავად შექმნილი ბარიერებისა,  PHR -ის დახმარებით ბავშვებმა მიმართეს სასამართლოს და ითხოვენ  სასამართლომ იმსჯელოს მათ დარღვეულ უფლებებზე.

ასევე, სახელმწიფოს შეახსენოს თავისი ვალდებულება, თუ როგორ უნდა დაიცვან ბავშვები ნებისმიერ სივრცეში და რა ზომები მიიღონ დაზარალებული ბავშვების მხარდასაჭერად“.

PHR აღნიშნულ საქმეში ბავშვების სასარგებლოდ ზრუნვის სააგენტოსგან სოლიდურ კომპენსაციასაც ითხოვს. „ასევე ვითხოვთ ბავშვების ოჯახში დაბრუნების ბათილად ცნობას, სახელმწიფო პროგრამაში მინდობით აღმზრდელების გადატერნინგებას“ – აცხადებს ადვოკატი.

ბავშვების უფლებებს სასამართლოში ორი ადვოკატი – თამარ გაბოძე და თამარ კაპანაძე დაიცავენ.

ამ საქმეს სამართლებრივად მხარს უჭერს RFSU [შვედური ასოციაცია] .

„სისხლის სამართლის საქმეზე მოწმის სახით გამოკითხულია მზია ამაღლობელთან შემხებლობაში მყოფი პოლიციის 10 თანამშრომელი, მათ შორის, ირაკლი დგებუაძე.

პოლიციის ყველა თანამშრომელი გამოკითხვისას უარყოფს მზია ამაღლობელის მიერ დასახელებული გარემოებების ნამდვილობას,“ – უთხრეს „ბათუმელებს“ სპეციალურ საგამოძიებო სამსახურში დღეს, 6 თებერვალს.

ბათუმის პოლიციის უფროსს, ირაკლი დგებუაძეს გამოცემა „ბათუმელებისა“ და „ნეტგაზეთის“ დამფუძნებელმა და დირექტორმა მზია ამაღლობელმა დაკავების შემდეგ არასათანადო მოპყრობასა და ძალადობაში დასდო ბრალი.

მზია ამაღლობელის თქმით, დაკავების შემდეგ ირაკლი დგებუაძემ მას სახეში შეაფურთხა და მასზე იწევდა ფიზიკური ანგარიშსწორების მიზნით. ბათუმის პოლიციის უფროსი მზია ამაღლობელს არ აძლევდა წყლის დალევის, ასევე ტუალეტით სარგებლობის საშუალებას.

დაკავების შემდეგ არასათანადო მოპყრობის შესახებ პირველი ინფორმაცია მზია ამაღლობელმა სახალხო დამცველის წარმომადგენელს მიაწოდა, რადგან მასთან ადვოკატებს არ უშვებდნენ. მოგვიანებით, როდესაც ადვოკატებს ამაღლობელის ნახვის უფლება მისცეს, არაადამიანურ მოპყრობაზე მათაც უთხრა.

საიას შეფასებით, დაკავებულისადმი ასეთი მოპყრობა – სახეში შეფურთხება, გინება, წყალზე და საპირფარეშოთი სარგებლობაზე უარის თქმა, ფასდება, როგორც დამამცირებელი, ან არაადამიანური მოპყრობა.

დგებუაძე რომ მზია ამაღლობელს დაკავების შემდეგ აგინებდა და სისხლის სამართლის მუხლით დაჭერით ემუქრებოდა, ეს „ბათუმელების“ ვიდეომასალაშიცაა ასახული.

„სისხლით… ბო*იშვილი ვიყო სისხლით დავიჭერ… ამას მოვუ**ნავ დედის მუ*ელს“ – ისმის დგებუაძის გინება მზია ამაღლობელის დაკავების ამსახველ ვიდეოკადრებში.

შსს-ს ცალკეული თანამშრომლების მხრიდან ბათუმში აქციაზე დაკავებული პირების მიმართ განხორციელებული სამსახურებრივი უფლებამოსილების ძალადობით შესაძლო გადამეტების ფაქტზე გამოძიება ბათუმში 13 იანვარს დაიწყო.

სისხლის სამართლის საქმე N199130125002-ს სპეციალური საგამოძიებო სამსახურის აჭარის სამმართველო იძიებს.

არის თუ არა გამოძიება დაწყებული მზია ამაღლობელის მიმართ არაადამიანური მოპყრობისა და დამცირების ფაქტზე, ვკითხეთ სპეციალურ საგამოძიებო სამსახურს.

„გამოძიება დაწყებულია და ტარდება ყველა საგამოძიებო მოქმედება. კვალიფიკაცია შეიძლება შეიცვალოს, როცა ამის საფუძველი არსებობს,“ – მოგვწერეს პასუხად.

ერთ-ერთი მთავარი კითხვა, რაც ამაღლობელის საქმეში არსებობს, არის ის, თუ რატომ არაა ამ დრომდე დაზარალებულად ცნობილი მზია ამაღლობელი. ამ კითხვას სპეციალური საგამოძიებო სამსახური ოსტატურად ისხლეტს.

„სისხლის სამართლის საქმეზე გამოძიების ამ ეტაპზე მზია ამაღლობელი დაზარალებულად ცნობილი არ არის. სისხლის სამართლის საპროცესო კოდექსის თანახმად პირისათვის დაზარალებულის სტატუსის მინიჭებას ახორციელებს პროკურორი, შესაბამისად პირის დაზარალებულად ცნობა სცილდება სპეციალური საგამოძიებო სამსახურის კომპეტენციის ფარგლებს,“ – მოგვწერეს დღეს, 6 თებერვალს.

რა უნდა გააკეთოს სპეციალურმა საგამოძიებო სამსახურმა იმისთვის, რომ მზია ამაღლობელი დროულად ცნოს პროკურატურამ დაზარალებულად?

როგორც საია განმარტავს, ვინაიდან ამ საქმეს იძიებს სპეციალური საგამოძიებო სამსახური, [პოლიციის დანაშაულებრივ ქმედებებთან დაკავშირებულ საქმეებს], ისინი ვალდებულნი არიან, შეაგროვონ მტკიცებულებები.

„მინიმალური სტანდარტით მაინც უნდა შეაგროვონ მათ მტკიცებულებები და გამოკვეთონ ის, რომ ქალბატონი მზია ამაღლობელი დანაშაულებრივი ქმედების შედეგად არის დაზარალებული. ამის შემდეგ პროკურორი ვალდებულია, დაზარალებულად ცნოს პირი, რის შედეგადაც დაცვის მხარესა და დაზარალებულს ექნებათ უფლება იმისა, რომ საქმის მასალებს გაეცნონ.

აქამდეც უნდა მომხდარიყო მზიას დაზარალებულად ცნობა,“ – ამბობს ჯუბა ქათამაძე, საიას იურისტი, რომელიც მზია ამაღლობელის ინტერესებს იცავს.

მისივე თქმით, კონკრეტული ვადები არ არის განსაზღვრული კანონში, თუ რამდენ ხანში უნდა შეაგროვოს საგამოძიებომ მტკიცებულებები დაზარალებულად ცნობის თაობაზე, თუმცა როგორც ჯუბა ქათამაძე განმარტავს, სწრაფად უნდა შეგროვდეს ეს მტკიცებულებები.

„პრაქტიკაში არის ერთი თვე დაახლოებით, მაგრამ ჩვენ უკვე ვაპირებთ მივმართოთ აღნიშნულთან დაკავშირებით პროკურატურას, რადგან გამოძიებაზე ზედამხედველი პროკურატურაა და მათი ვალდებულებაცაა ეს.

თუ, რა თქმა უნდა, არ შეაგროვეს მტკიცებულებები და არ შეასრულეს თავიანთი ვალდებულება, დაზარალებულად ცნობაზე ზედმეტია ლაპარაკი,“ – ამბობს ჯუბა ქათამაძე.

ამავე თემაზე: 

დღეს, 6 თებერვალს, 21-ე დღეა, რაც ბათუმში დაკარგულ მოზარდს ეძებენ.

მეცხრეკლასელი ალექსანდრე მიქელაძე 2025 წლის 16 იანვრის ღამეს, 22:00 საათის შემდეგ გაუჩინარდა.

ამ დროის განმავლობაში, როგორც საგანგებო სიტუაციების მართვის სამსახურში გვითხრეს, სამძებრო სამუშაოები ზღვაში მიმდინარეობს. მათი ინფორმაციით, ძებნა არ შეწყვეტილა, თუმცა დაკარგული მოზარდის კვალს ამ დრომდე ვერ მიაკვლიეს.

ზღვაში სამძებრო სამუშაოები მას შემდეგ დაიწყო, როცა ზღვის სანაპიროზე მოზარდის ჩანთა და ტელეფონი იპოვეს ოჯახის წევრებმა. თუმცა მათივე ინფორმაციით, პოლიცია დაკარგული მოზარდის კვალზე ვერ გავიდა.

___________

ამ თემაზე:

6 თებერვალს, გამთენიისას, თბილისში ადმინისტრაციული წესით, 173-ე მუხლით, რომელიც პოლიციის დაუმორჩილებლობას გულისხმობს, სამი სტუდენტი – აჩი გოჩიტაშვილი, ლუკა ხიზაძე და გიორგი ბარბაქაძე დააკავეს.

ინფორმაცია „ნეტგაზეთს“ შს სამინისტრომ დაუდასტურა.

ადვოკატის, ელგუჯა ავსაჯანაშვილის თქმით, დაკავებულებს კედელზე წარწერის გაკეთებას ედავებიან, თუმცა ერთ-ერთი მათგანი, გიორგი ბარბაქაძე, ადგილზე უბრალოდ იმყოფებოდა.

„მნიშვნელოვანი გარემოება არის ის, რომ ადმინისტრაციულად დასჯადი არ არის ქმედების მომზადება – მხოლოდ დასრულებული ქმედებაა დასჯადი. ამასაც რომ თავი დავანებოთ, გიორგი ბარბაქაძე დაკავებულია უბრალოდ იმის გამო, რომ იმ ტერიტორიაზე იყო. შსს-ს ამ ნაწილში მოვუწოდებ, რომ წარმოადგინონ მტკიცებულებები, რომ გიორგი კედელზე რაიმე წარწერას აკეთებდა.

რაც შეეხება დანარჩენ ორ პირს, მათი თქმით, განსხვავებით 2 თებერვლისგან, დღეს პოლიციას მათზე ფიზიკურად არ უძალადია”, – ამბობს ადვოკატი.

____________

ფოტოზე: დაკავებული სტუდენტები.