„დაფიონის“ ლიდერი ზვიად ცეცხლაძე დააკავეს. ამის შესახებ „ბათუმელებს“ ზვიადის მამამ დაუდასტურა: „მეგობრები დამიკავშირდნენ და მითხრეს, რომ ქუჩაში აიყვანეს“. ზვიად ცეცხლაძის დაკავების შესახებ ინფორმაცია „დაფიონის“ ფეისბუქის გვერდზე გავრცელდა.
მანამდე კოალიცია „ცვლილებებისთვის“ ოფისთან დააკავეს ნიკა გვარამია, რომელიც პოლიციამ ოფისში არ შეუშვა.
„ახალის“ ლიდერი, ნიკა გვარამია პოლიციელებს სთხოვდა, შეეჩერებინათ ჩხრეკა და მიეცათ ოფისში შესვლისა და პროცესზე დასწრების უფლება, თუმცა მათ ამის შესაძლებლობა არ მისცეს. სიტყვიერი შელაპარაკების შემდეგ, პოლიციამ ძალის გამოყენებით სცადა გვარამიას ტერიტორიიდან გაყვანა. ფიზიკური დაპირისპირების დროს გვარამიამ, სავარაუდოდ, გონება დაკარგა.
პოლიციამ პარტია „ახალის“ ოფისთან დააკავა ასევე „გირჩი მეტი თავისუფლებას“ წევრი გელა ხასიაია.
დღეს, 4 დეკემბერს, ოპოზიციური პარტიების ოფისებსა და აქტივისტების საცხოვრებელ სახლებში პოლიცია ჩხრეკის ჩასატარებლად შევიდა.
ოპოზიციური პარტიების წარმომადგენლები და აქტივისტები ადგილზე მისულ პოლიციელებს სთხოვენ განუმარტონ, რის საფუძველზე ატარებენ საგამოძიებო მოქმედებებს, თუმცა ისინი პროცესის დასრულებამდე დეტალურ განმარტებას არ აკეთებენ.
