მოქალაქეებს, რომლებიც ამბობენ, რომ უსახლკაროები არიან, ბათუმის მერიაში ისევ არავინ ხვდება.
ეს მოქალაქეები 4 თვის წინ თევზის ბაზრობის მიმდებარედ მიტოვებულ შენობაში შევიდნენ. მოქალაქეების თქმით, ამ დრომდე სამზარეულო და ტუალეტი არ ჰქონდათ, მათი ხარჯებით მოაწყვეს, მაგრამ ახალი შენობა მათ ბათუმის მუნიციპალურმა ინსპექციამ დაუშალა.
მოქალაქეები ითხოვენ, ინსპექციამ მათ სველი წერტილების სამშენებლო მასალები დაუბრუნოს და მისცენ სამზარეულოს და ტუალეტის მოწყობის საშუალება.
გუშინ, 6 თებერვალს, უსახლკაროები ბათუმის მერიის ფოიეში 3 საათი ელოდნენ მერთან, ან მერის წარმომადგენელთან შეხვედრას. სამუშაო საათების ამოწურვის შემდეგ უსახლკაროები დაცვის პოლიციამ ძალის გამოყენებით გამოიყვანა შენობიდან და მათზე იძალადა.
„უკვე მივმართეთ სახალხო დამცველს, დღეს მივმართავთ სპეციალურ საგამოძიებო სამსახურს,“ – ამბობს ნაილე ფერაძე, „ხმა ერისა, გზა ხსნისას“ წარმომადგენელი.
ბათუმის მერიის პრესცენტრში ვერ გვითხრეს, რა პოზიცია აქვს მერს უსახლკაროებთან დაკავშირებით, რომლებსაც ამ დრომდე არავინ უსმენს.
ამ თემაზე:
უსახლკაროებს ბათუმის მერიაში არავინ შეხვდა, ისინი ძალით გამოიყვანეს შენობიდან
