Batumelebi

თენგიზ ცერცვაძე, თბილისის ინფექციური საავადმყოფოს დირექტორი: 

„ბევრი ელის, რომ დათბობასთან ერთად ეპიდემია შესაძლოა გახდეს მილევადი, როგორც გრიპის შემთხვევაში ხდება. ჩვენ არ ვიცით ახალი კორონავირუსის ბუნება როგორია, ის მოიქცევა ისე, როგორც გრიპის ვირუსი, თუ არა. თუ ეს არ მოხდა, ველოდებით მატებას, იმ უბრალო მიზეზების გამო, რომ ჩინეთის გარდა, მთელ მსოფლიოში ძალიან სწრაფად იზრდება [ინფიცირებულების] რაოდენობა.

შემთხვევების მატება აუცილებლად იქნება, მაგრამ ჩვენი ამოცანაა არ გაცდეს ინფიცირებულთა რაოდენობა რაღაც კრიტიკულ ზღვარს.

…ჯერჯერობით, ვირუსი არსად გამქრალა. როგორც ითვლება, მსუბუქი შემთხვევების დროსაც გამოჯანმრთელება იწყება ორი კვირის შემდეგ. მათ ორი კვირა ჯერ არ გასვლიათ. ველოდებით, რომ დაახლოებით ერთ კვირაში დაიწყება გამოჯანმრთელება“.

ბოლო მონაცემებით, საქართველოში 13 ადამიანი ინფიცირებული კორონავირუსით. კარანტინის რეჟიმში იმყოფება 128 პირი, ხოლო სტაციონარში მეთვალყურეობის ქვეშ – 59. 

_________________

ფოტოზე: თენგიზ ცერცვაძე 

 

საქართველოს პროკურატურის ცნობით, გორის რაიონულმა სასამართლომ სრულად გაიზიარა პროკურატურის შუამდგომლობა და ხაშურში ყოფილი მეუღლის მკვლელობის მცდელობისთვის ბრალდებულ მ.ლ. – ს აღკვეთის ღონისძიების სახით პატიმრობა შეუფარდა.

2020 წლის 5 მარტს, მ.ლ-მ განზრახ მოკვლის მიზნით, გულმკერდისა და მუცლის არეში, ასევე სხეულის სხვადასხვა ადგილებში, დანა არაერთხელ დაარტყა ყოფილ მეუღლეს ს.ჩ-ს, რომელმაც გაქცევა შეძლო.

პროკურატურის ცნობით. მ.ლ., ვინაიდან გადაწყვეტილი ჰქონდა ყოფილი ცოლის მოკვლა, დაეწია მას და კვლავ მიაყენა დანით მრავლობითი დაზიანება. შემთხვევის ადგილზე მყოფმა პირებმა მ.ლ.-ს გააგდებინეს დანა, დაზარალებული კი  გადაყვანილი იქნა საავადმყოფოში, სადაც მას დროული სამედიცინო ჩარევით შეუნარჩუნდა სიცოცხლე.

მ.ლ-ს წარედგინა ბრალდება ყოფილი მეუღლის მიმართ, გენდერის ნიშნით, განზრახ მკვლელობის მცდელობის ფაქტზე, დანაშაული გათვალისწინებული საქართველოს სისხლის სამართლის კოდექსის 11 პრიმა 19,109 მუხლის მეორე ნაწილის “დ” პრიმა და “ვ” ქვეპუნქტებით, რაც სასჯელის სახით 13-დან 17 წლამდე თავისუფლების აღკვეთას ითვალისწინებს.

დღეს, 7 მარტს, ავარია მოხდა ბათუმში, ჩაქვის გვირაბთან. ერთმანეთს სამი ავტომობილი შეეჯახა. ავტოსაგზაო შემთხვევის შედეგად ოთხი ადამიანი დაშავდა. საგანგებო სიტუაციების კოორდინაციისა და გადაუდებელი დახმარების ცენტრის პრესსამსახურის ცნობით, ოთხი დაშავებულიდან სამი სხვადასხვა კლინიკში გადაჰყავთ, ხოლო ერთმა პირმა უარი განაცხადა ჰოსპიტალიზაციაზე.

შსს-ს პრესსამსახურის ინფორმაციით, მომხდარ ფაქტზე გამოძიება სსსკ-ის 276-ე მუხლის მეორე ნაწილითაა დაწყებული, რაც გულისხმობს სატრანსპორტო საშუალების მოძრაობის უსაფრთხოების  წესის დარღვევა იმის მიერ, ვინც სატრანსპორტო საშუალებას მართავს, რამაც ჯანმრთელობის ნაკლებად მძიმე დაზიანება გამოიწვია. ისჯება ჯარიმით ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით, ვადით სამ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.

საზოგადოებრივი მაუწყებლის აჭარის ტელევიზიისა და რადიოს დირექტორმა, გიორგი კოხრეიძემ „ბათუმელებს“ უთხრა, რომ ჯერ არ იცის, ვინ წაიყვანს არხზე მთავარ საინფორმაციო გამოშვებას.

„იქნება ყველაფერი ისე, როგორც  საჭიროა. გადავწყვიტავთ. პრობლემა არ იქნება,“ –  ამბობს გიორგი კოხრეიძე.

რვასაათიანი საინფორმაციო გამოშვება „მთავარს“ წამყვანი 6 მარტის შემდეგ აღარ ჰყავს – გიორგი კოხრეიძემ გუშინ შეუჩერა თეონა ბაკურიძეს უფლებამოსილება დროებით.

„ბათუმელებმა“ გიორგი კოხრეიძეს ჰკითხა, არხის გამოშვების ახალი წამყვანი ხომ არ იქნება ნინო გორჯელაძე. ამის შესახებ არაოფიციალურ ინფორმაციას ფლობენ თავად მაუწყებლის ჟურნალისტები.

„გეფიცებით, ნინო გორჯელაძე არის ჩემი მეგობარი, მაგრამ მსგავსი რამ, ჯერჯერობით, ამ მომენტამდე თავში არც გამივლია. გინდ დაიჯერეთ, გინდ არა. მიუხედავად იმისა, რომ ნინო გორჯელაძე არის ჩემი მეგობარი და კარგად ვიცნობ მას. ახლა თქვენ მეუბნებით ამას. სხვამაც ცოტა ხნის წინ მითხრა და საიდან გორდება ეს ჭორები ვგიჟდები,“ –  ამბობს გიორგი კოხრეიძე „ბათუმელებთან“.

„ბათუმელების“ კითხვაზე, როდის გახდება ცნობილი საინფორმაციოს ახალი წამყვანის ვინაობა, გიორგი კოხრეიძე პასუხობს:

„ახლა ხომ დასვენების დღეა. დავისვენოთ ყველამ. ორშაბათი გათენდება და იმედია ყველაფერი კარგად იქნება“.

ნინო გორჯელაძე 2019 წელს აჭარის მთავრობაში მედიასთან ურთიერთობის სამსახურში მუშაობდა. მანამდე კი აჭარის საზოგადოებრივი მაუწყებლის ჟურნალისტი და გადაცემა „ჰეშთეგის“ წამყვანი იყო.

რაც შეეხება თეონა ბაკურიძეს, ტელეწამყვანი ორშაბათს სასამართლოში იმ ბრძანებას გაასაჩივრებს, რის საფუძველზეც დროებით უფლებამოსილება შეუჩერდა. მის უფლებებს საქართველოს ახალგაზრდა იურისტთა ასოციაცია და EMC დაიცავენ.

„გიორგი კოხრეიძეს ეს გადაწყვეტილება ცალსახად უკანონოა,“ –  მიიჩნევენ საიაში.

საქართველოს ახალგაზრდა იურისტთა ასოციაციის აჭარის ფილიალის ახალი თავმჯდომარე პაატა დიასამიძე გახდა.

პაატა დიასამიძე 6 მარტს, საიას აჭარის ფილიალის გამგეობამ ხუთკაციანი შემადგენლობით, ერთხმად აირჩია.

“ვფიქრობ რთული წლები იქნება. 2020 წლის არჩევნები გვაქვს წინ. ამასთან, აჭარის ტელევიზიის ირგვლივ განვითარებულ მოვლენებს თუ გავითვალისწინებთ, ყველაზე აქტიური რეგიონი ამ წუთისთვის აჭარაა. ჩვენს ორგანიზაციას ყველა გამოწვევაზე ექნება ექნება შესაბამისი რეაგირება და აქტიურად ჩვერთვებით ყველა საკითხში,” –  ამბობს საიას აჭარის ფილიალის ახლადარჩეული თავმჯდომარე “ბათუმელებთან” საუბარში.

პაატა დიასამიძე საიას აჭარის ფილიალში სხვადასხვა პროექტებში  2013 წლიდან იყო  ჩართული. 2015 წლიდან კი სისხლის სამართლის ადვოკატის პოზიციაზე იყო და ამ მიმართულებას ხელმძღვანელობდა.

საიას აჭარის ფილიალს 2018 წლის 17 მარტიდან ანნა მდინარაძე ხელმძღვანელობდა, რომელიც ზედიზედ ორჯერ აირჩიეს. მას უფლებამოსილების ვადა მიმდინარე წელს ამოეწურა. საიას აჭარის ფილიალის წესდება კრძალავს ერთი და იგივე პირის მესამე ვადით არჩევას. ანნა მდინარაძის თქმით, ის კერძო საადვოკატო საქმიანობის დაწყებას გეგმავს.

სამედიცინო კორპორაცია “ევექსის” გენდირექტორს ნიკოლოზ გამყრელიძეს ახალი კორონავირუსი დაუდგინდა. ნიკა გამყრელიძემ ვირუსის დადასტურების  შესახებ, თავის ფეისბუქ გვერდზე დაწერა.

“მეგობრებო, როგორც გუშინ უკვე გახდა ცნობილი, იქიდან გამომდინარე, რომ მე მქონდა კონტაქტი ჩემს თანამშრომელთან რომელსაც ოთხშაბათს დაუდგინდა კორონა ვირუსი, თავისთავად მეც და ყველა ის ადამიანი ვისთანაც ჰქონდა მას კონტაქტი გადავედით თვით იზოლაციის რეჟიმში. კონტაქტიდან გამომდინარე და იქიდან გამომდინარე, რომ გუშინ დამეწყო ამ ვირუსის დამახასიათებელი სიმპტომატიკა, ჩავითვალე მომატებულ რისკის მქონე პაციენტად და გამიკეთდა ანალიზი, რომელმაც დაადასტურა რომ ვარ დაინფიცირებული კორონა ვირუსით.

შესაბამისად გადმოვედი თბილისის ინფექციურ ჰოსპიტალში და აქ დავიწყე მკურნალობა. საბედნიეროდ საკმაოდ ვიწროა ჩემი კონტაქტების სია, ( მხოლოდ ხუთშაბათს 05/03 ვისთანაც მქონდა ახლო და შედარებით ხანგრძლივი კონტაქტი) რა თქმა უნდა ყველა ამჟამად იდენტიფიცირებულია და იმყოფებიან უკვე იზოლაციაში. თავს ვგრძნობ კარგად:) მიუხედავად იმისა რომ ეს ინფორმაცია კონფიდენციალურია (ისევე როგორც ყველა პაციენტის პერსონალური სამედიცინო ინფორმაცია), გადავწყვიტე რომ გავხადო საჯარო (გამჟღავნების უფლება ოფიციალურად ასევე მივეცი დაავადებათა კონტროლის ცენტრს) რამოდენიმე მიზეზით:

1. მიმაჩნია რომ ავადმყოფობა სირცხვილი არ არის.

2. არ მინდა ეს საკითხი რომ გახდეს სხვადასხვა ინტერპრეტაციის საგანი

3. და რაც მთავარია არ გახდეს ეს დამატებითი პანიკის წყარო.
დარწმუნებული ვარ რომ თუ ვიქნებით მეტად სოლიდარულები და ყველა გავითავისებთ მეტად ჩვენს სამოქალაქო პასუხისმგებლობას, ძალიან მალე დავძლევთ ჩვენს ქვეყანაში ამ გამოწვევას,” –  წერს ნიკოლოზ გამყრელიძე თავის ფეისბუქ გვერდზე.

ნიკოლოზ გამყრელიძე დაავადებათა კონტროლის ცენტრის დირექტორის ამირან გამყრელიძის შვილია.

See more

დღეს, 6 მარტს, მაშინ, როცა აჭარის მაუწყებლის ახალი ამბების გუნდი და თანამშრომლების ნაწილი ევროპის მოედანზე შეიკრიბა მაუწყებელში არსებული კრიზისული სიტუაციის და მთავარი საინფორმაციო სამსახურის წამყვანის, თეონა ბაკურიძის მხარდასაჭერად, აჭარის ტელევიზიის შენობის წინ მაუწყებლის ის თანამშრომლები შეიკრიბნენ, რომლებიც თვლიან, რომ დღეს აჭარის ტელევიზიაში საინფორმაციო სამსახურის მოვალეობის შემსრულებელზე, გიორგი აბაზაძეზე სამსახურეობრივი ბულინგი განხორციელდა.

მათ ტელევიზიის დირექტორს, გიორგი კოხრეიძეს მიმართეს სასწრაფოდ გატარდეს შესაბამისი ღონისძიებები დისკრიმინაციის ჩამდენი თანამშრომლების მიმართ.

„6 მარტს რამდენიმე თანამშრომლის მხრიდან, საინფორმაციო სამსახურის უფროსის მოვალეობის შემსრულებლის, გიორგი აბაზაძის მიმართ ბულინგი და მობინგი განხორციელდა. რამდენიმე თანამშრომელი მას დამამცირებელი, შეურაცხმყოფელი და  დისკრიმინაციული სიტყვებით მიმართავდა. აიძულებდნენ დაეწერა განცხადება გადადგომის შესახებ. საჭირო გახდა სასწრაფო-სამედიცინო დახმარების ბრიგადის გამოძახება. გიორგი აბაზაძე საავადმყოფოში გადაიყვანეს, სადაც მას წინასაინფაქტო მდგომარეობა დაუდგინდა. აქვე აღვნიშნავთ, რომ საინფორმაციო გამოშვებებში დამახინჯებულად გაშუქდა თანამშრომლის დისკრიმინაციის ფაქტი. მაყურებელს მიეწოდა მცდარი ინფორმაცია.

ეს ვითარება წააგავს ერთი წლის წინანდელ მოვლენებს, როცა წინა მენეჯმენტის დროს, ტელევიზიის ოპერატორები გაიფიცნენ, მათი პოზიცია კი ეთერში სათანადოდ არ შუქდებოდა. ასევე ეთერში ვერ ხვდებოდა მაუწყებლიდან უკანონოდ დათხოვნილთა პრეტენზიები.

სამსახურის უფროსის მითითების შესრულება ყველა თანამშრომლის ვალდებულებაა, რაც ხელშეკრულებაში გაწერილი. დღეს მომხდარი ინციდენტი დროს კი რამდენიმე თანამშრომელმა უხეშად დაარღვია არა მარტო ხელშეკრულება, არამედ ორგანიზაციის შინაგანაწესი და ეთიკური ნორმები. მოახდინა ადამიანის დისკრიმინაცია.

მივმართავთ დირექტორს სასწრაფოდ გატარდეს შესაბამისი ღონისძიებები დისკრიმინაციის ჩამდენი თანამშრომლების მიმართ“, – განაცხადეს მაუწყებლის თანამშრომლებმა. მათ შორის იყვნენ მაუწყებლის სხვადასხვა სამსახურის უფროსები.

საზოგადოებრივი მაუწყებლის აჭარის ტელევიზიასა და რადიოში ერთმანეთს უპირისპირდებიან აჭარის მაუწყებლის დირექტორი გიორგი კოხრეიძე, მაუწყებლის მრჩეველთა საბჭოს უმრავლესობა და ტელევიზიის ჟურნალისტებისა და თანამშრომლების ნაწილი, დაახლოებით 90 ადამიანი, რომლებიც მიიჩნევენ, რომ დირექტორს უნდა აჭარის მაუწყებლის მიერ მომზადებული ახალი ამბები აკონტროლოს, შეცვალოს აჭარის მაუწყებლის სარედაქციო პოლიტიკა და თავიდან მოიშოროს ყველა, ვინც ამაში ხელს უშლის.

დღეს მაუწყებლის დირექტორმა აჭარის ტელევიზიის მთავარი საინფორმაციო გამოშვების წამყვანს, თეონა ბაკურიძეს უფლებამოსილება დროებით შეუჩერა, რაც, იურისტების განმარტებით, „ცალსახად უკანონო გადაწყვეტილებაა.“

თეონა ბაკურიძემ დღეს განაცხადა, რომ საინფორმაციო სამსახურის უფროსის მოვალეობის შემსრულებელი, დღეს, მათთან შეხვედრის შემდეგ, შეხვდა მენეჯმენტის წარმომადგენლებს და სწორედ მას შემდეგ გახდა შეუძლოდ. მისივე თქმით, გიორგი აბაზაძემ თანაშრომლებს უთხრა, რომ გადადგომაზე განცხადება დაწერა და შემდეგ დახია.

„ბათუმელებმა“ გიორგი აბაზაძეს საინფორმაციო სამსახურის უფროსად დანიშვნის შემდეგ ჰკითხა მის მიერ ფეისბუქში დაწერილი და გაზიარებული ჰომოფობიური და ქალების დამაცირებელი პოსტების შესახებ.

ვრცლად ამავე თემაზე: 

რა ხდება აჭარის ტელევიზიაში? – 12 კითხვა, 12 პასუხი

See more

 

 

ამ წუთებში [20:18] აჭარის ტელევიზიის თანამშრომლები ევროპის მოედანზე აქციას მართავენ. საპროტესტო აქცია აჭარის ტელევიზიაში მიმდინარე მოვლენებს და საინფორმაციო გამოშვების წამყვანის, თეონა ბაკურიძის ეთერიდან მოხსნას უკავშირდება, მას უფლებამოსილება შეუჩერეს.

ბრძანებაში, რომელსაც  მაუწყებლის დირექტორმა გიორგი კოხრეიძემ დღეს მოაწერა ხელი, წერია, რომ თეონა ბაკურიძეს დროებით აეკრძალოს შრომითი ხელშეკრულებით გაწერილი კონკრეტული საქმიანობის განხორციელება და ჩამოშორებული იქნას ტელევიზიის ეთერიდან“.

ბრძანების მიხედვით დღეს, 6 მარტს ტელევიზიის ნიუსრუმში მომხდარი კამათის  ფაქტზე მოკვლევა დაიწყო. თეონა ბაკურიძეს ფაქტის მოკვლევის დასრულებამდე შეუჩერეს უფლებამოსილება.

ამ ბრძანების მიხედვით, დირექტორმა მხოლოდ ახლადდანიშნული რედაქტორის ფირუზ ბოლქვაძის და საინფორმაციო სამსახურის უფროსის კონსულტანტის – ლალი ბერძენიშვილის პოზიციები მოისმინა, რომლის მიხედვითაც თეონა ბაკურიძე საინფორმაციო სამსახურის ახალ უფროსზე ფსიქოლოგიურ ზეწოლად ახდენდა

რა ხდება აჭარის ტელევიზიაში? – 12 კითხვა, 12 პასუხი

See more

 

იტალიაში ალკოჰოლური სასმელების ქარხნის ტექნიკური ხარვეზით ხსნიან იმ უცნაურ ფაქტს, რომ მოდენასა და ბოლონიას შორის  მდებარე პატარა სოფელ სეტეკანში 4 მარტს, ოთხშაბათს, იტალიური გამოცემის La Repubblica– ს მიერ გავრცელებული ინფორმაციის მიხედვით, სოფლის მცხოვრებლების ონკანებიდან წყლის ნაცვლად წითელი სითხე წამოვიდა.

სოფელ სეტეკანის მცხოვრებლებმა სოცქსელში გაავრცელეს ვიდეოკადრები, სადაც ჩანს, როგორ რეცხავენ ჭურჭელს ონკანიდან წამოსული უცნაური სითხით.

See more

Questo è il sogno di ognuno di noi appassionati di #lambrusco: vino che sgorga dal rubinetto… i magici scorci di #castelvetro, non a caso tra i borghi più belli d’Italia pic.twitter.com/ERtxhUYWtZ

— Francesco Dondi (@FrancescoDondi) March 4, 2020

See more

Cose accadute oggi qui, a #castelvetrodimodena. Perché per un attimo dai nostri lavandini è uscito il #lambruscograsparossa. Ci sarà tempo per capire ma intanto un sorriso oggi, anche in questi momenti difficili, forse lo abbiamo donato.https://t.co/yXeUVR1Hrc pic.twitter.com/QmitLTX8He

— Giorgia Mezzacqui (@GMezzacqui) March 4, 2020

სინამდვილეში ეს კომპანია Lambrusco Grasparossa di Castelvetro-ს გაზიანი ალკოჰოლური სასმელი – ლამბრუსკო იყო.

ქარხნის მეპატრონემ ფეისბუქგვერდზე დაწერა, რომ ღვინის ჩამომსხმელი სისტემის სარქველი მწყობრიდან გამოვიდა, სითხე წყლის მილებს შეერია და რახან ღვინის წნევა წყალთან შედარებით მაღალია, ცირკულირება დაიწყო. შედეგად ქარხანასთან ახლომდებარე დასახლებაში ონკანებიდან წყლის ნაცვლად ღვინო წამოვიდა.

კომპანიისვე განცხადებით, პრობლემა სწრაფად აღმოიფხვრა.

აჭარის საზოგადოებრივი მაუწყებლის ალტერნატიული პროფკავშირი კიდევ ერთ განცხადებას ავრცელებს მაუწყებელში დღეს განვითარებულ პროცესებთან დაკავშირებით. საქმე იმაშია, რომ რედაქტორების გათავისუფლების შემდეგ, 4 მარტს, საინფორმაციო სამსახურის უფროსის მოვალეობის შემსრულებლად დირექტორმა გოგა კოხრეიძემ გიორგი აბაზაძე დანიშნა. დღეს გიორგი აბაზაძე შეუძლოდ გახდა და სამედიცინო დაწესებულებაში გადაიყვანეს. არხის მთავარი გამოშვების წამყვანის, თეონა ბაკურიძის თქმით, გიორგი აბაზაძე ზეწოლის ქვეშაა.

გთავაზობთ ალტერნატიული პროფკავშირის განცხადებას:

„აჭარის საზოგადოებრივ მაუწყებელში ვითარება უკიდურესად დაძაბულია. მდგომარეობას ვაფასებთ როგორც – საგანგაშოს. განსაკუთრებით ბოლო კვირის განმავლობაში, ყოველდღიური ხასიათი მიიღო ხელმძღვანელობის ნდობით აღჭურვილ პირებსა და ახალი ამბების სამსახურის თანამშრომლებს შორის კონფლიქტმა, რომელზეც სრულ პასუხისმგებლობას ვაკისრებთ მაუწყებლის ხელმძღვანელობას.

მმართველთა საბჭოზე მიღებულმა გადაწყვეტილებამ, რომლის მიხედვით, ახალი ამბების სამსახურის ხელმძღვანელის მოვალეობის შემსრულებლად გიორგი აბაზაძე დაინიშნა, მაუწყებელში არსებული კრიზისი კიდევ უფრო გააღრმავა [განმუხტვის ნაცვლად].

ამ მომენტში, აუცილებლობად მიგვაჩნია ორგანიზაციის ხელმძღვანელობის მხრიდან შესაბამისი ნაბიჯების გადადგმა, რათა მაქსიმალურად ავირიდოთ კონფლიქტური სიტუაციების გაღვივება. წინააღმდეგ შემთხვევაში, არსებობს გონივრული ვარაუდი იმისა, რომ სიტყვიერი და სხვა სახის შეურაცხყოფა, შესაძლოა, გადაიზარდოს უმართავ და უკონტროლო პროცესებში.
ჩვენ ნათლად ვხედავთ და ყოველდღიურად საკუთარ თავზე ვცდით, თუ როგორ ნეგატიურად აისახება აჭარის მაუწყებელში არსებული ვითარება თანამშრომელთა ფიზიკურ და მორალურ მდგომარეობაზე. ვითარება ხელს უწყობს და ახალისებს ჩვენს დემორალიზებას და, ფაქტობრივად, აფერხებს პროფესიული საქმიანობის ჯეროვნად შესრულებას.

კიდევ ერთხელ მოვუწოდებთ ხელმძღვანელობას და პროცესში ჩართულ პირებს – გამონახონ მათ ხელთ არსებული ყველა რესურსი სიტუაციის განმუხტვისთვის და მოამზადონ ნიადაგი მედიაციისთვის.
იმედს ვიტოვებთ, რომ მაუწყებლის არც ერთი თანამშრომლის ჯანმრთელობას არ დაემუქრება საფრთხე და მენეჯმენტი უზრუნველყოფს მშვიდი სამუშაო გარემოს შექმნას.

საზოგადოებრივი მაუწყებლის აჭარის ტელევიზიისა და რადიოს ალტერნატიულ პროფესიულ გაერთიანებას, ვითარების დროებით დასტაბილურების საუკეთესო გზად მიგვაჩნია სახალხო დამცველის აპარატის წარმომადგენლის ჩართულობა მიმდინარე პროცესში“.

სადარბაზოს დიდი ხის კარი, ზუსტად ისეთი, როგორსაც ბათუმში სახლები სხვადასხვა ფერში იმეორებდნენ, ხის ჩარჩოებიანი ფანჯრები, დარაბები, ხის იატაკი, კედელში ჩაშენებული ღუმელი, რომელიც მთელი სახლის გათბობას უზრუნველყოფდა, ეზოზე გამავალი შუშაბანდი და რკინის გისოსებიანი აივნები, რომლებიც ქუჩას გადაჰყურებენ – XX საუკუნის დასაწყისში აშენებული ეს სახლი სამშენებლო კომპანიას და, შესაბამისად, დანგრევას გადაურჩა. სახლმა ახალი სიცოცხლე შეიძინა. შიდა ინტერიერის რესტავრაციის შემდეგ, ამ სახლში ხელოსნები ფასადის რესტავრირების ბოლო დეტალებზე მუშაობენ.

ორსართულიან სახლს ორი კერძო მესაკუთრე ჰყავს.

 

სახლი კულტურული მემკვიდრეობის ძეგლია

სპეციალისტის შეფასებით, XX საუკუნის დასაწყისში აგებული L-ფორმის ორსართულიანი სახლი მთავარი ფასადით ქუჩაზე გამოდის. საფასადო სიბრტყე ეკლექტურად არის გადაწყვეტილი. ეკლექტიკური რენესანსის არქიტექტურიდან ნასესხებ დეტალებთან  ერთად გამოყენებულია მოდერნისთვის სახასიათო დეკორი. ცუდი ფიზიკური მდგომარეობის მიუხედავად, ნაგებობა თავდაპირველი გეგმარებითი სტრუქტურისა თუ საფასადო და ინტერიერის დეკორის დაცულობის მხრივ, ერთ-ერთი გამორჩეული შენობაა ბათუმში. ის მნიშვნელოვან როლს ასრულებს ქუჩის მასშტაბისა და არქიტექტურული სახის განსაზღვრაში.

ძეგლიდან 150 მეტრის რადიუსში არსებული შენობები, კულტურული მემკვიდრეობის შესახებ კანონის თანახმად, ფონური ნაგებობაა. შესაბამისად, ამ არეალში აკრძალულია ისეთი მშენებლობები, რომლებიც ძეგლის აღქმას შეუშლის ხელს. მიუხედავად ამისა, ბათუმში ბოლო ათი წლის განმავლობაში ბევრი მსგავსი სახლი დაანგრიეს და მათ ნაცვლად ახალი მრავალბინიანი სახლები ააშენეს.

სახლის რეაბილიტაციის პროექტი და  სამუშაოები აჭარის კულტურული მემკვიდრეობის სააგენტომ შეისყიდა. სარეაბილიტაციო სამუშაოები ტენდერში გამარჯვებულმა კომპანიამ ,,შპს იბექსმა’’ შეასრულა. პროექტის ღირებულება 337 000 ლარია. შენობა პირვანდელი სახით აღდგება და ყველა ავთენტურ დეტალს შეინარჩუნებს.

 

 

დღეს, 6 მარტს, ბათუმში მტვრის ნაწილაკებით [PM10 მკგ/მ³] ჰაერის დაბინძურების მაჩვენებელი არის 116.76, რაც ძალიან ცუდია.

აღნიშნული მაჩვენებელი 35-დან-50-მდე არის „საშუალო“; 50-დან 100-მდე კი -„ცუდი“.

ამ მონაცემებს ბათუმში ატმოსფერული ჰაერის დაბინძურების მონიტორინგის ავტომატური სადგური აფიქსირებს.

„ცუდია“ ჰაერში PM2.5 მკგ/მ³ მყარი ნაწილაკების შემცველობაც.

„მიმდინარე წლის 5 მარტიდან საქართველოს ტერიტორიაზე ატმოსფერული ჰაერის დაბინძურების მონიტორინგის ავტომატურ სადგურებზე ფიქსირდება მყარი ნაწილაკების (PM10, PM2.5) კონცენტრაციების მატება. არსებული სინოპტიკური სიტუაციის ანალიზი უჩვენებს, რომ ატმოსფეროს მაღალ ფენებში ადგილი აქვს სამხრეთის ქვეყნებიდან საქართველოს ტერიტორიაზე ჰაერის მასების გავრცელებას. საქართველოში მყარი ნაწილაკების (PM10, PM2.5) კონცენტრაციების მატება ტრანსასაზღვრო ხასიათისაა და  აღნიშნული მოვლენა საჰარის უდაბნოს მტვრის მასების შემოჭრით არის განპირობებული,“ – აცხადებს გარემოს ეროვნული სააგენტო.

გარემოს ეროვნული სააგენტოს ინფორმაციით:

ჰაერში მტვრის მყარი ნაწილაკების წყაროებია: სამშენებლო პროცესები, ღია გრუნტი, შეშის ღუმელები, დიზელის ძრავები, ქვანახშირზე მომუშავე თბოელექტროსადგურები, მრეწველობის სექტორი, ქარის მიერ მიმოფანტული მტვერი. ასევე, ე.წ. მეორადი მყარი ნაწილაკები წარმოიქმნება სხვადასხვა დამბინძურებლების ფოტოქიმიური რეაქციის შედეგად.

ჯანმრთელობაზე ზეგავლენა: თვალის გაღიზიანება, ასთმა, ბრონქიტი, ფილტვის დაზიანება, სიმსივნე, მძიმე ლითონებით მოწამვლა, უარყოფითი ზემოქმედება გულსისხლძარღვთა სისტემაზე.

ბათუმში ატმოსფერული ჰაერის დაბინძურების მონიტორინგის ავტომატური სადგური ტბელ აბუსერიძის ქუჩაზეა [რესპუბლიკურ საავადმყოფოსთან] განთავსებული. ეს სადგური მოქმედებს 2017 წლის დეკემბრიდან და აქ ჰაერის დამბინძურებლებზე დაკვირვება საათობრივად მიმდინარეობს. ბათუმში განლაგებულ დანარჩენ სადგურზე კი – გარკვეული პერიოდულობით.

„ბათუმის წყლის“ ინფორმაციით, ახალი დაერთების გამო, 7 მარტს 23:00 საათიდან 8 მარტის 08:00 საათამდე წყალმომარაგება შეუწყდება:

გუდიაშვილის ქუჩას, მალაზონიას ქუჩას, გორდეზიანის ქუჩას, კაჭარავას ქუჩას, გენერალ ასლან აბაშიძის I შესახვევს, გენერალ ასლან აბაშიძის ქუჩას აბუსერიძის ქუჩიდან ბაგრატიონის ქუჩამდე და ბაგრატიონის ქუჩას – ჯავახიშვილის ქუჩიდან აღმაშენებლის ქუჩამდე.

თითქმის ერთი წელია საუბარია იმაზე, რომ საზოგადოებრივი მაუწყებლის აჭარის ტელევიზიასა და რადიოს სარედაქციო დამოუკიდებლობას საფრთხე ემუქრება. ტელევიზიებში და ონლაინ მედიაში ამ თემაზე არაერთ სიუჟეტსა და სტატიას ნახავდით, თუმცა ბევრისთვის მაინც გაუგებარია, რა ხდება აჭარის ტელევიზიაში: ესაა ცალკეული პირების დაპირისპირება ფულისა და გავლენების გამო, თუ ბრძოლა საზოგადოებრივი მაუწყებლის იდეის გადასარჩენად. ამჯერად შევეცადეთ მოკლედ გვეპასუხა ყველა იმ კითხვაზე, რაც აჭარის ტელევიზიასა და რადიოში მიმდინარე მოვლენებს უკავშირდება. 

• ჩემთვის, მაყურებლისთვის, რატომაა მნიშვნელოვანი რა ხდება აჭარის ტელევიზიაში?

საზოგადოებრივი მაუწყებლი არის ხალხის ფულით დაფინანსებული ორგანიზაცია. შესაბამისად, მან უნდა გააშუქოს ყველა პოლიტიკური და საზოგადოებრივი პროცესი, ისე, რომ მაყურებელმა მიიღოს ზუსტი და არა მთავრობის ინტერესებს მორგებული ინფორმაცია.

საქართველოს მოსახლეობა მიუკერძოებელი ინფორმაციის მიღებისთვის იხდის ფულს. შეგახსენებთ, რომ აჭარის საზოგადოებრივი მაუწყებლის ბიუჯეტი 11 მილიონი ლარია და ამ ფულს იხდით თქვენ, თქვენს მიერ გადახდილი გადასახადებიდან.

• როგორ და როდის დაიწყო დაპირისპირება?

პრობლემები ტელევიზიაში დაიწყო თითქმის 1 წლის წინ, 2019 წლის აპრილში, როცა აჭარის მაუწყებლის მრჩეველთა საბჭოს ორმა წევრმა დააყენა ტელევიზიის დირექტორის, ნათია კაპანაძის იმპიჩმენტის საკითხი. იმპიჩმენტი შედგა და ნათია კაპანაძე გადააყენეს დირექტორის თანამდებობიდან. მაშინვე გაჩნდა ეჭვი, რომ ეს უკავშირდებოდა ხელისუფლებას, რომ მმართველ პარტიას, „ქართულ ოცნებას“ არ მოსწონდა აჭარის ტელევიზიის კრიტიკული სიუჟეტები და დირექტორის მოხსნით აპირებდა ტელევიზიის „მოთვინიერებას“.

• ვინ ვის უპირისპრდება ახლა აჭარის ტელევიზიაში?

ახლა ამ დაპირისპირებაში ორი მხარეა. ერთ მხარეს არის აჭარის მაუწყებლის დირექტორი გიორგი კოხრეიძე და მაუწყებლის მრჩეველთა საბჭოს უმრავლესობა და მეორე მხარეს – ტელევიზიის ჟურნალისტებისა და თანამშრომლების ნაწილი, დაახლოებით 90 ადამიანი, რომლებიც მიიჩნევენ, რომ დირექტორს უნდა აჭარის მაუწყებელის მიერ მომზადებული ახალი ამბები აკონტროლოს, შეცვალოს აჭარის მაუწყებლის სარედაქციო პოლიტიკა და თავიდან მოიშოროს ყველა, ვინც ამაში ხელს უშლის.

• რა ვერ გაიყვეს? თანამდებობები და ხელფასები უნდათ?

არა. აჭარის ტელევიზიისა და რადიოს თანამშრომლები, რომლებიც აპროტესტებენ მაუწყებელში ახალი დირექტორის პოლიტიკას, არ ითხოვენ არც ხელფასების მომატებას და არც თანამდებობებს. ისინი ითხოვენ  მათ საქმიანობა თავისუფალი იყოს პოლიტიკური და სხვა ტიპის გავლენებისგან.

• რატომ არ მოსწონთ ჟურნალისტებს დირექტორი?

ჟურნალისტები მიიჩნევენ, რომ დირექტორი, გიორგი კოხრეიძე არის მმართველი პარტიის, „ქართული ოცნების“ მიერ დანიშნული კადრი, რომელიც მიზანმიმართულად ცდილობს აჭარის საზოგადოებრივი მაუწყებელი იყოს მთავრობის მიერ მართული ტელევიზია. დანიშვის პირველივე დღეს გიორგი კოხრეიძემ ჟურნალისტიკა სტუმარ-მასპინძლობას შეადარა და განაცხადა, რომ რესპოდენტები უნდა გააკრიტიკო, მაგრამ ისე, როგორც ძმას ან შვილს აკრიტიკებ. მართალია, გიორგი კოხრეიძე მოსვლის დღიდანვე ამბობდა, რომ საფრთხე არავის ემუქრებოდა, რეალურად კი მისი მოსვლის შემდეგ 3 რედაქტორი გადააყენეს თანამდებობიდან, დირექტორის მოადგილე სარედაქციო პოლიტიკის მიმართულებით კი იძულებული გადა სამსახური დაეტოვებინა.

• საიდან იციან, რომ ტელევიზიის დირექტორი მთავრობის მიერაა დანიშნული?

აჭარის მაუწყებლის დირექტორს ირჩევს მაუწყებლის მრჩეველთა საბჭო, რომელშიც 5 წევრია. მათგან 3 წევრი, უმრავლესობა, „ქართულ ოცნებასთან“ დაკავშირებული პირია.

გარდა ამისა, ჟურნალისტების ამ მოსაზრებას ამყარებს ის ფაქტი, რომ გიორგი კოხრეიძის საჩივრის საფუძველზე სასამართლომ შეაჩერა მაუწყებლის დირექტორის კონკურსი, რაც, იურისტების განცხადებით, არასწორი, უსაფუძვლო გადაწყვეტილება იყო სასამართლოს მხრიდან და ამით სარედაქციო დამოუკიდებლობის საფრთხის რეალურობას აჭარის ტელევიზიაში კიდევ უფრო ცხადი გახდა.  როცა სასამართლომ დირექტორის კონკურსი შეაჩერა, აჭარის ტელევიზიის ჟურნალისტებმა განაცხადეს, რომ სასამართლო ინსტრუმენტად იქნა გამოყენებული ხელისუფლების მხრიდან.

• მაუწყებლის მრჩეველთა საბჭო რა არის და რა როლი აქვს მას ამ პროცესებში?

მრჩეველთა საბჭო განსაზღვრავს მაუწყებლის პროგრამულ პრიორიტეტებს, ირჩევს დირექტორს და ა.შ. აჭარის ტელევიზიაში მიმდინარე პროცესებზე მრჩეველთა საბჭო უშუალოდაა პასუხისმგებელი, რადგან მრჩეველთა საბჭოს ძველმა შემადგენლობამ მხარი დაუჭირა წინა დირექტორის იმპიჩმენს და შემდეგ სამ მცდელობაზე ვერ აირჩია ახალი დირექტორი; ახალი მრჩეველთა საბჭო მხარს უჭერს დირექტორის თითქმის ყველა გადაწყვეტილებას ჟურნალისტების პროტესტის მიუხედავად, რაც კიდევ უფრო აღრმავებს კრიზისს აჭარის ტელევიზიაში.

სხვათა შორის, აჭარის მაუწყებლის მრჩეველთა საბჭოს თავმჯდომარე ახლა სწორედ ის პირია, რომელმაც ერთი წლის წინ ყოფილი დირექტორის იმპიჩმენტის საკითხი დააყენა. გიგა ჩხარტიშვილი იმპიჩმენტის და ახალი საბჭოს არჩევის შემდეგ აირჩიეს საბჭოს თავმჯდომარედ. ახალი საბჭოს წევრებმა ხელფასები გაიზარდეს და საახალწლოდ 2 000-ლარიანი პრემიებიც მიიღეს.

• რა ცვლილებები მოჰყვა ახალი დირექტორის მოსვლას ტელევიზიაში?

ყველა მნიშვნელოვანი ცვლილება ახალი დირექტორის მოსვლის შემდეგ შეეხო ტელევიზიის საინფორმაციო სამსახურს, რომელიც ახალ ამბებს ამზადებს.

ახალი დირექტორის დანიშვნისთანავე აჭარის ტელევიზია და რადიო დატოვეს წინა დირექტორის მიერ მოწვეულმა კონსულტანტებმა: ზვიად ქორიძემ და მარინა ვაშაყმაძემ.

დირექტორმა ხელშეკრულება აღარ გაუგრძელა საინფორმაციო სამსახურის პროდიუსერსა და რედაქტორს ნათია შავაძეს.

დირექტორმა, თავის მოადგილეს, ნათია ზოიძეს, რომელსაც სარედაქციო პოლიტიკის მართვა ევალებოდა, შეუცვალა ხელშეკრულება და მას მხოლოდ ანგარიშების შედგენა დაავალა. ნათია ზოიძე იძულებული გახდა ჩამოშორებოდა საინფორმაციო სამსახურს. მან ტელევიზია დატოვა.

დირექტორმა, მრჩეველთა საბჭოს მხარდაჭერით, გააუქმა საინფორმაციო სამსახურის უფროსის მოადგილის შტატი და მაია მერკვილაძე, რომელიც მუშაობდა ამ თანამდებობაზე, იძულებული გახდა ჩამოშორებოდა საინფორმაციო სამსახურს.

დირექტორმა გაათავისუფლა საინფორმაციო სამსახურის უფროსი, შორენა ღლონტი სამსახურეობრივი გადაცდომის მიზეზით.

დირექტორმა საინფორმაციო სამსახურის ხელმძღვანელის მოვალეობის შემსრულებლად დანიშნა  ტელეწამყვანი, 22 წლის გიორგი აბაზაძე, რომელსაც ამ დრომდე არ ჰქონია მენეჯმენტში მუშაობის გამოცდილება, მის კონსულტანტად კი დანიშნა ტელევიზიის თანამშრომელი ლალი ბერძენიშვილი., დირექტორს აქამდე მისი დანიშვნა საინფორმაციო სამსახურის უფროსად სურდა.

• ვინ დაასაქმა დირექტორმა მაუწყებელში?

ამ დრომდე ყველაზე გახმაურებული ორი ახალი კადრის დანიშვნაა.

დირექტორის მოადგილედ, დახურულ კონკურსში აირჩიეს ვახო ხუზმიაშვილი, იგი „იბერიის“, „იმედის“, „მეცხრე არხის“ პროდიუსერად მუშაობდა. ბოლო პერიოდში კი Prime Time-ის დირექტორი იყო. დირექტორის მოადგილის კონკურსის გამოცხადებისთანავე ითქვა, რომ დირექტორმა საგანგებოდ ხუზმიაშვილისთვის გამოაცხადა კონკურსი, რადგან კონკურსის პირობებში ეწერა, რომ დირექტორის მოადგილედ არჩევისათვის საკმარისი იყო ბაკალავრის დიპლომი, ხუზმიაშვილი კი ამ კონკურსში ერთადერთი კანდიდატი იყო, რომელსაც მხოლოდ ბაკალავრის დიპლომი ჰქონდა და არა მაგისტირის ან მასთან გათანაბრებული.

მეორე, კიდევ უფრო გახმაურებული ამბავი საინფორმაციო სამსახურის რედაქტორად ნინო ხაჟომიას დანიშვნა იყო. ნინო ხაჟომიას კარიერა თავის დროზე გადაცემა „60 წუთში“ დაიწყო,  2012 წელს კი მუშაობდა „რეალ ტვ“- ში, რომელიც სახელდებოდა, როგორც მიკერძოებული, მკვეთრად პროსახელისუფლებო ტელევიზია. აჭარის საინფორმაციო სამსახურში ხაჟომიას ცივად შეხვდნენ, მან დანიშვნიდან ოთხ დღეში დატოვა რედაქტორის თანამდებობა.

•  რას აპროტესტებენ ჟურნალისტები?

ჟურნალისტები და მაუწყებლის სხვა თანამშრომლები აპროტესტებენ დირექტორის პოლიტიკას, რომელიც, თავიდან იშორებს ყველა იმ კადრს, რომელსაც საინფორმაციო სამსახურის თანამშრომლები ენდობიან. მაუწყებლის თანამშრომლები თვლიან, რომ დირექტორი ცდილობს აჭარის მაუწყებელს წაართვას სარედაქციო დამოუკიდებლობა.

დირექტორად გიორგი კოხრეიძის დანიშვნიდან დღემდე აჭარის ტელევიზიის ჟურნალისტებმა გამართეს რამდენიმე აქცია. მათი მოთხოვნა და გზავნილები უცვლელია – „ვმუშაობთ საზოგადოებისთვის და არა – დირექტორისთვის“, მოგვეცით მუშაობის საშუალება, ნუ ჩაერევით სარედაქციო დამოუკიდებლობაში.

• მთავრობა რას ამბობს ამაზე?

მთავრობა ამბობს, რომ აჭარის ტელევიზიის მიმდინარე მოვლენებში არ ერევა, თუმცა ასე არ ფიქრობენ ადგილობრივი და საერთაშორისო ორგანიზაციები.

საქართველოში თითქმის ყველა ცნობილი არასამთავრობო ორგანიზაცია მიიჩნევს, რომ აჭარის ტელევიზიის სარედაქციო დამოუკიდებლობა საფრთხის ქვეშაა.

საქართველოს სახალხო დამცველმა აჭარის საზოგადოებრივ მაუწყებელში მიმდინარე პროცესებს უწოდა „საგანგაშო“, ტელევიზიაში მიმდინარე პროცესებს სამჯერ გამოეხმაურა გავლენიანი საერთაშორისო ჟურნალისტური ორგანიზაცია „რეპორტიორები საზღვრებს გარეშე“ და საქართველოს მთავრობას მოუწოდა „პატივი სცეს აჭარის ტელევიზიის ახალი ამბების ჯგუფის სარედაქციო დამოუკიდებლობას“.

• ახლა რა მოხდება?

ახლა აჭარის საზოგადოებრივი მაუწყებლის ის თანამშრომლები, რომლებიც სარედაქციო დამოუკიდებლობის შესანარჩუნებლად იბრძვიან, აპირებენ გაფიცვას, თუ არ დაკმაყოფილდება მათი მოთხოვნები. მათ უკვე შეიტანეს მაუწყებელში ოთხპუქტიანი მოთხოვნა, რომლის შესრულების შემთხვევაში სარედაქციო დამოუკიდებლობა გარანტირებული უნდა იყოს. ამჟამად მიმდინარეობს მედიაციის პროცესი, რომელშიც ტელევიზიის თანამშრომლების და მენეჯმენტის გარდა, საქართველოს შრომის, ჯანმრთელობის და სოციალური დაცვის სამინისტროც უნდა ჩაერთოს. თუკი მხარეები ვერ შეთანხმდებიან, ამის შემდეგ შეეძლებათ მაუწყებლის თანამშრომლებს გაფიცვა.

___________

მარიამ მუთიძის ილუსტრაცია 

დღეს, 6 მარტს, ბათუმში, თურქეთის საკონსულოსთან, მინდია ლავასოღლის ახლობლები საპროტესტო აქციას მართავენ. ისინი ლავასოღლის საემიგრაციო ციხეში გადმოყვანას ითხოვენ და ამბობენ, რომ არ დაიშლებიან, ვიდრე თურქეთის კონსულისგან დაპირებას არ მიიღებენ.

“არც შემახვედრეს მინდიას, ორი დღის წინ ჩამოვედი…  იზმირის ციხეშია ისევ. გამოუშვეს და მერე ისევ მომპარეს,” – ამბობს ირინა ლავასოღლი, მინდია ლავასოღლის და.

ადვოკატი ლექსო კობაიძის თქმით, ლავასოღლი განსაკუთრებით მძიმე პირობებში იმყოფება, სარდაფში ჰყავთ, საემიგრაციო ციხეში კი, ის შედარებით უკეთესად იქნება.

“ეს ჰგავს იმ ამბავს, როცა ნარკოტიკებზე აკავებდნენ პირს, ის არ აძლევდა ბიოლოგიურ მასალას, უშვებდნენ თუ არა, მერე ისევ აკავებენ.

თურქეთის საექსტრადაციო სასამართლოში საქართველო ვერ ადასტურებს იმას, რომ ლავასოღლი უნდა გადასცენ, ოფიციალურად ასეა.

გამოდის, საქართველო ოფიციალურად ლავასოღლის ექსტრადაციას ითხოვს, არაფორმალურად კი ეუბნება, რომ მოიცათ, ჯერ არ გამოუშვათ,” – აცხადებს ადვოკატი ლექსო კობაიძე.

საკონსულოსთან შეკრებილებმა გვითხრეს, რომ ისინი “ლავასოღლის შინაურები” არიან.

“ვიცით, რომ დედა ძალიან განიცდის… მისი ჯანმრთელობის მდგომარეობა ძალიან რთულია. სანათესაო ბევრი ჰყავს მინდიას, აქ კიდევ ზღვაში წვეთი ვართ,” – ამბობს ზაირა ძნელაძე.

საპროტესტო აქცია გრძელდება.

____

მინდია ლავასოღლის საექსტრადაციო პატიმრობის ვადა 28 თებერვალს ამოეწურა, თუმცა 29 თებერვალს მას ხელახლა შეუფარდეს საექსტრადაციო პატიმრობა. ადვოკატი გელა ნიკოლაიშვილი ამბობს, რომ გაურკვეველია პატიმრობის სამართლებრივი საფუძველი და ლავასოღლი უახლოეს დღეებში საქართველოს და თურქეთის წინააღმდეგ დავას სტრასბურგის სასამართლოში აპირებს.

„28 თებერვალს ის გადაიყვანეს სადეპორტო განყოფილებაში, სადაც შედარებით თავისუფლებაა, მაგრამ ნახევარ დღეში ის ისევ დააპატიმრეს… თურქი ადვოკატები არკვევენ, რა არის ხელახალი საექსტრადაციო პატიმრობის საფუძველი. საქართველო ამბობს, რომ ითხოვს მის გადმოცემას, თურქეთის პოზიციაა, წაიყვანეთო, ამიტომ ორივეს უჩივის ლავასოღლი სტრასბურგის სასამართლოში,“ – გვითხრა ადვოკატმა გელა ნიკოლაიშვილმა. მისივე ინფორმაციით, მინდია ლავასოღლის ჯანმრთელობის მდგომარეობა ისევ მძიმეა.

ბათუმში, მით უფრო მის ცენტრალურ ნაწილში, ახალაშენებულ კორპუსებში ბინები ძირითადად დაკეტილია და იქ არავინ ცხოვრობს, ვიდრე საკურორტო სეზონი არ დაიწყება. ამ ბინების უმეტესობა მესაკუთრემ გასაქირავებლად შეიძინა.

იგივე ვითარებაა ქალაქის გარეუბნებშიც. ეს განსაკუთრებით თვალსაჩინო ხდება ღამით, როცა მრავალბინიანი კორპუსების ფანჯრები თითქმის სრულად ჩაბნელებულია.

ახალ მრავალბინიან საცხოვრებელ სახლებში ბინები ვინც იყიდა, ამბობენ, რომ გასაქირავებელი, დაკეტილი ბინები მათ ბევრ პრობლემას უქმნის.

„ეს ნიშნავს უწესრიგობას, მოუვლელ სადარბაზოს, ლიფტს, გადაუხდელ გადასახადებს და ჩამოუყალიბებელ ამხანაგობას“, – ასე აღწერს ბათუმში, 26-სართულიან, მრავალბინიან სახლში მცხოვრები ინგა აბუსელიძე საკუთარ სადარბაზოში არსებულ ვითარებას.

ინგა ორ წელზე მეტია, რაც ფიროსმანის ქუჩაზე, 26-სართულიან სახლში ოჯახთან ერთად გადავიდა საცხოვრებლად. ის ამბობს, რომ ზამთარში მათ სადარბაზოში ბინების 80% დაკეტილია:

„ვიცოდი, რომ ერთ ჭერქვეშ რამდენიმე ათეული ბინა იქნებოდა. ეს პასუხისმგებლობების გაზიარებას გულისხმობს, თუმცა მეზობლები ზაფხულამდე არ ჩანან, მათგან ბევრს არ ვიცნობ, შეიძლება სეზონი ისე დასრულდეს, რომ მათ ვერც კი შეხვდე. შესაბამისად, არც სადარბაზოს, სადარბაზოს კოდირებული კარის, ლიფტის მომსახურებასთან დაკავშირებული გადასახადების დაფარვაში იღებენ მონაწილეობას.“

პრობლემას ქმნის ისიც, რომ ასეთი სახლების უმეტესობას ბათუმში არ აქვს პარკინგი, ან იმდენად მცირე ადგილი აქვს დატოვებული ავტომანქანების გასაჩერებლად, რომ ეს აქ მცხოვრებლებს თუ დამსვენებლებს ზაფხულობით სერიოზულ პრობლემებს უქმნის.

სტატისტიკის ეროვნული სამსახურის მონაცემებით, 2019 წელს, ქვეყნის მასშტაბით,  მშენებლობის ყველაზე მეტი ნებართვა თბილისის შემდეგ აჭარაში გაიცა. ამავე მონაცემებით, აჭარა მეორე ადგილზეა [ფართობის მიხედვით] დასრულებული ობიექტების კუთხითაც.

საქსტატის მონაცემებით, გასულ წელს აჭარაში 130 ობიექტის მშენებლობა დასრულდა და 1 261 ობიექტის მშენებლობის ნებართვა გაიცა… აჭარაში 2019 წელს დასრულდა 451 839 კვ.მ ფართობის მშენებლობა, ხოლო ნებართვა გაიცა 3 045 775 კვ.მ-ის მშენებლობაზე. ამ კუთხით აჭარა პირველ ადგილზეა ქვეყნის მასშტაბით, ანუ 2019 წელს გაცემული ნებართვების მიხედვით, ყველაზე მეტი ფართობი აჭარაში აშენდა.

პრობლემების განხილვისას გადაწყვეტილების მიმღები პირები მშენებლობების მასშტაბს პოზიტიურად აფასებენ და ამბობენ, რომ ეს ქმნის სამუშაო ადგილებს და აძლიერებს ეკონომიკას.

ქაოტური მშენებლობებით ეკონომიკის გაძლიერებაზე განსხვავებული მოსაზრება აქვს არქიტექტორ ირაკლი ჟვანიას. მისი განმარტებით, ეკონომიკა თავისთავად მოიაზრებს ქალაქის დაგეგმვას, ტურიზმს, ტრანსპორტს, ასევე სხვა მიმართულებებს და ვერც მშენებლობებზე მიბმული დასაქმების ადგილი იქნება გრძელვადიანი:

„ეს სახლები უახლოეს მომავალში იქცევა არასასურველ სახლებად და მესაკუთრეები მოინდომებენ მათ გაყიდვას, რადგან მათ შეექმნებათ გაქირავების პრობლემა“, – ამბობს არქიტექტორი ირაკლი ჟვანია. ის არ გამორიცხავს, რომ ქალაქის შეცვლილი ინფრასტრუქტურის გამო შესაძლოა ეს სახლები ზაფხულშიც დაკეტილი დარჩეს.

„ის, რომ ქალაქის განვითარება არ იგეგმება მრავალი კუთხით, უკარგავს ბათუმს თავის იდენტობას, ასეთი ქალაქი ნამდვილად არ არის მიმზიდველი ხანგრძლივ პერსპექტივაში. ჩამომსვლელი რომ  დაინტერესდეს, ურბანული ხარისხის დონე უნდა იყოს უფრო მაღალი და არა დეგრადირებული ჯუნგლებით. ეს ვიზუალური მხარე პირდაპირ ურტყამს ტურიზმს პერსპექტივაში: მაღალი სახლები ერთმანეთთან ახლოს, პარკინგის არ არსებობა, გზების გადაჭედვა, კომუნიკაციების პრობლემა, თანაც ეს სახლები ცხრა თვე ცარიელია – ეს ყველაფერი აუარესებს ქალაქში ცხოვრების ხარისხს. როდესაც დეგრადირდება გარემო და ის აღარ არის მიმზიდველი, რა თქმა უნდა, ამ ბინებსაც შეექმნება გაქირავების პრობლემა.

შემდეგ მფლობელები დააპირებენ მათ გაყიდვას. დარჩება ეს სახლები რაღაც პერიოდის შემდეგ არასასურველ სახლებად, ეს იქცევა ეკონომიკურად არამიმზიდველ, არააქტიურ გარემოდ და როცა გარემო პასიურია, ეკონომიკურადაც კვდება. ქალაქს წართმეული აქვს შანსი, განვითარებულიყო საინტერესო და მდგრადი გზით, ყოფილიყო ეკონომიკურად ხანგრძლივ პერსპექტივაში მიმზიდველი“, – ამბობს არქიტექტორი.

______

ამავე თემაზე: მამუკა ხაზარაძის მოსაზრება ტურისტული თვალსაზრისით ბათუმის პერსპექტივაზე

 

10 წელში შეიძლება ბინების ნახევარზე მეტი დაკეტილი იყოს – ხაზარაძე ბათუმის განაშენიანებაზე 

See more