მთავარი,სიახლეები

აჭარის მაუწყებლის საინფორმაციოს პროდიუსერს სამსახური დაატოვებინეს

10.01.2020 • 3347
აჭარის მაუწყებლის საინფორმაციოს პროდიუსერს სამსახური დაატოვებინეს

აჭარის მაუწყებელთან 4 დეკემბერს ჟურნალისტების მიერ გამართულ საპროტესტო აქციაზე მაუწყებლის საინფორმაციო სამსახურის პროდიუსერს, ნათია შავაძეს ხელში ეჭირა ფურცელი წარწერით: „გვისმინეთ რადიოში და არა ტელეფონზე“. 2019 წლის 31 დეკემბერს მაუწყებლის დირექტორმა, გიორგი კოხრეიძემ გამოსცა ბრძანება, რომლითაც ნათია შავაძე ჩამოშორდა მაუწყებელს. „ვადის გასვლის გამო 2020 წლის 01 იანვრიდან შრომის სამართლებრივი ურთიერთობა შეწყდეს ნ. შავაძესთან“, – წერია ბრძანებაში.

ნათია შავაძისთვის გაგზავნილ შრომითი ურთიერთობის შეწყვეტის ბრძანებაში გიორგი კოხრეიძე ასე ხსნის პროდიუსერის გათავისუფლების საკითხს: ”ფაქტობრივი და სამართლებრივი გარემოებების გათვალისწინებით, შეუძლებელია ნ. შავაძესთან შრომის სამართლებრივი ურთიერთობის გაგრძელება ამ ეტაპისთვის. მიუხედავად იმისა, რომ მაუწყებლის ახალი ამბების სამსახურში ნ. შავაძის მიერ დაკავებულ პოზიციის არსებობას განსაკუთრებული მნიშვნელობა აქვს“.

გიორგი კოხრეიძე ნათია შავაძისთვის გაგზავნილ დოკუმენტში წუხს იმის გამო, რომ „იძულებულია შეწყვიტოს ხელშეკრულება“ და იქვე მიუთითებს: „დამატებით გაცნობებთ, რომ უახლეს მომავალში მაუწყებელი უზრუნველჰყოფს არაერთი კონკურსის გამოცხადებას სხვადასხვა პოზიციაზე. ამდენად, იმედს ვიტოვებთ სამომავლო სახელშეკრულებო ურთიერთობის გაგრძელებასთან დაკავშირებით თქვენი პროფესიული გამოცდილებისა და შრომისმოყვარეობის გათვალისიწინებით“.

ნათია შავაძესთან შრომითი ხელშეკრულების შეწყვეტის ბრძანება

ნათია შავაძე დღეს ამბობს, რომ მოულოდნელი არ ყოფილა ახალი დირექტორის მიერ მასთან დაკავშირებით მიღებული გადაწყვეტილება:

„31-ში დამიკავშირდა ადმინისტრაციის თანამშრომელი და მითხრა, რომ უნდა მაცნობოს სამწუხარო ამბავი. მერე დამიკავშირდა დირექტორის თანაშემწე და იგივე მითხრა და მთხოვა, რომ ბრძანება ჩამებარებინა. ფოსტით მომაწოდეს ბრძანება. ის ფაქტი, რომ ვინმე რამეს მთავაზობდა არ არის სწორი, რადგან წესით, თუ ვინმე რამეს მთავაზობდა, თანაშემწეს იქვე უნდა ეთქვა, რომ ჩვენ ახლა სხვა გამოსავალი არ გვაქვს, მაგრამ ჩვენ არ გვინდა თქვენთან თანამშრომლობის შეწყვეტა და იქნებ სხვა რამეზე ვიფიქროთ. ზრდილობის ამბავში მაინც უნდა ეთქვა. ასე დამატოვებინეს სამსახური – ამომეწურა ხელშეკრულების ვადა და აღარ გამიგრძელეს“.

ნათია შავაძეს აქვე ვკითხეთ, ხომ არ არის ცნობილი სხვა ჟურნალისტებთან დაკავშირებით რა გეგმები აქვს მაუწყებლის ახალ მენეჯმენტს. ჟურნალისტი ამბობს, რომ სხვებთან მიმართებაში ცოტა რთული გადაწყვეტილების მიღება მოუწევს მაუწყებლის ამჟამინდელ ხელმძღვანელობას: „იმ ადამიანებს [სხვა ჟურნალისტებს] გაუმართლათ იმით, რომ აქვთ მუდმივი ხელშეკრულება და ცოტა უჭირთ [მათი გაშვება]. როგორც კი რეორგანიზაცია დაიგეგმა, მაშინაც ვფიქრობდი და ახლაც, რომ როგორც თავის დროზე სოსო სტურუამ დანიშნა კონკურსი არასასურველი ადამიანებისგან გასათავისუფლებლად, ესეც [რეორგანიზაცია] მაგისთვის არის“.

ნათია შავაძე ის ჟურნალისტია, რომელიც  გასული წლის ბოლოს აქტიურად მონაწილეობდა მაუწყებლის ჟურნალისტების მიერ გამართულ საპროტესტო აქციებში, სადაც ჟურნალისტები აცხადებდნენ, რომ გიორგი კოხრეიძის მიერ მაუწყებლის დირექტორის რანგში გაკეთებული განცხადებები, ასევე დირექტორის მოადგილის, ნათია ზოიძისთვის შრომითი ხელშეკრულების პირობების შეცვლა, საფრთხეს უქმნიდა მაუწყებლის მიუკერძოებლობას.

ნათია შავაძე მაუწყებელში 6 თვის წინ ნათია ზოიძემ მიიწვია პროდიუსერად.

სოციალრ ქსელებში მაუწყებლის დირექტორის მოადგილე ნათია ზოიძე ნათია შავაძის ტელევიზიიდან გაშვებას ასე გამოეხმაურა:

 

მთავარი ფოტო: ნათია შავაძე საპროტესტო აქციაზე, სადაც ჟურნალისტები აცხადებდნენ, რომ ახალი დირექტორი მაუწყებლის მიუკერძოებლობას საფრთხეს უქმნის.

გადაბეჭდვის წესი


ასევე: