Batumelebi | 4 საგაფიცვო მოთხოვნა – აჭარის მაუწყებლის თანამშრომლები გაფიცვისთვის ემზადებიან   4 საგაფიცვო მოთხოვნა – აჭარის მაუწყებლის თანამშრომლები გაფიცვისთვის ემზადებიან   – Batumelebi
RU | GE  

4 საგაფიცვო მოთხოვნა – აჭარის მაუწყებლის თანამშრომლები გაფიცვისთვის ემზადებიან  

საზოგადოებრივი მაუწყებლის აჭარის ტელევიზიისა და რადიოს თანამშრომლების ნაწილი გაფიცვისთვის ემზადება. აჭარის საზოგადოებრივი მაუწყებლის ალტერნატიული პროფესიული კავშირი დღეს,  2 მარტს, 17 საათზე შეიტანს შესაბამის დოკუმენტს მაუწყებელში.

დოკუმენტის შეტანის შემდეგ მედიაციის პროცესი დაიწყება, რომელშიც ტელევიზიის თანამშრომლების და მენეჯმენტის გარდა, საქართველოს შრომის, ჯანმრთელობის და სოციალური დაცვის სამინისტროც უნდა ჩაერთოს. თუკი მხარეები ვერ შეთანხმდებიან, ამის შემდეგ შეეძლებათ მაუწყებლის თანამშრომლებს სამუშაოზე უარის თქმა.

აჭარის მაუწყებლის ალტერნატიული პროფკავშირის ხელმძღვანელი მალხაზ რეხვიაშვილი ამბობს, რომ მათ ოთხი მოთხოვნა აქვთ:

„პირველი არის სტატუს კვოს აღდგენა [საშტატო ცვლილებებამდე არსებული მდგომარეობის დაბრუნება], მეორე – სარედაქციო დამოუკიდებლობის გარანტიები, მესამე – შრომითი უფლებები, რომელიც სარედაქციო დამოუკიდებლობასთანაა გადაჯაჭვული, რადგან ადამიანებმა, რომლებიც ქმნიან მაუწყებელს, უნდა იგრძნონ თავი დაცულად და მეოთხე არის სტრატეგიული ხედვა იმის შესახებ, თუ როგორ იყოს მაუწყებელი მოწყობილი და როგორ უნდა იმართებოდეს, იმიტომ, რომ ამ ვითარებაში მენეჯმენტსაც კი არა აქვს წარმოდგენა, მაგალითად, მომავალ წელს მაუწყებელი როგორი უნდა იყოს. საით მიდის მაუწყებელი, არავინ იცის.

ჩვენი მოთხოვნები გულისხმობს, რომ ამ პროცესებში პროფესიული კავშირის მონაწილეობა უნდა იყოს გარანტირებული“, – გვითხრა მალხაზ რეხვიაშვილმა.

აჭარის საზოგადოებრივი მაუწყებლის ალტერნატიულ პროფესიულ გაერთიანებაში მაუწყებლის 90-მდე თანამშრომელია გაერთიანებული. მალხაზ რეხვიაშვილი ამბობს, რომ მოთხოვნებს შეუძლია შეუერთდეს მაუწყებლის ნებისმიერი თანამშრომელი. ალტერნატიული პროფესიული გაერთიანება მაუწყებელში 2020 წლის იანვარში შეიქმნა, მას შემდეგ, რაც აჭარის ტელევიზიასა და რადიოში ახალი დირექტორი, გიორგი კოხრეიძის მოსვლის შემდეგ, საკადრო ცვლილებებზე და მოსალოდნელ სარედაქციო დამოუკიდებლობის დაკარგვაზე დაიწყო საუბარი.

მიუხედავად იმისა, რომ მაუწყებლის ალტერნატიული პროფკავშირის მთავარი მოთხოვნების შესახებ რამდენიმე დღეა ცნობილია, დღეს, 2 მარტს, აჭარის საზოგადოებრივი მაუწყებლის დირექტორმა გიორგი კოხრეიძემ ჟურნალისტებთან კომენტარი ამ თემაზე არ გააკეთა და აღნიშნა, რომ დოკუმენტს გაეცნობა.

აღნიშნულ თემაზე ჟურნალისტებმა შეკითხვა დაუსვეს მაუწყებლის მრჩეველთა საბჭოს წევრს, სოსო სტურუასაც, რომელმაც განაცხადა, რომ რაც შეეხება სტატუს-კვოს აღდგენის საკითხს, საშტატო ცვლილებებზე გადაწყვეტილებმა მიიღო მრჩეველთა საბჭომ და ამ გადაწყვეტილების გაუქმებისთვის საბჭოს ხმათა უმრავლესობა იქნება საჭირო – „ამაზე, მე, როგორც ბორდის ერთი წევრი, პასუხს ვერ გაგცემთ“ – აღნიშნა სოსო სტურუამ.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com