Batumelebi | აჭარის ტელევიზიაში თეონა ბაკურიძეს უფლებამოსილება შეუჩერეს აჭარის ტელევიზიაში თეონა ბაკურიძეს უფლებამოსილება შეუჩერეს – Batumelebi

აჭარის ტელევიზიაში თეონა ბაკურიძეს უფლებამოსილება შეუჩერეს

აჭარის ტელევიზიის მთავარი საინფორმაციო გამოშვების წამყვანს თეონა ბაკურიძეს უფლებამოსილება დროებით შეუჩერეს. ბრძანებაში, რომელსაც რამდენიმე წუთის წინ მოაწერა ხელი მაუწყებლის დირექტორმა გიორგი კოხრეიძემ, წერია, რომ თეონა ბაკურიძეს „დროებით აეკრძალოს შრომითი ხელშეკრულებით გაწერილი კონკრეტული საქმიანობის განხორციელება და ჩამოშორებული იქნას ტელევიზიის ეთერიდან“.

ბრძანების მიხედვით დღეს, 6 მარტს ტელევიზიის ნიუსრუმში მომხდარი კამათის  ფაქტზე მოკვლევა დაიწყო. თეონა ბაკურიძეს ფაქტის მოკვლევის დასრულებამდე შეუჩერეს უფლებამოსილება.

ამ ბრძანების მიხედვით, დირექტორმა მხოლოდ ახლადდანიშნული რედაქტორის ფირუზ ბოლქვაძის და საინფორმაციო სამსახურის უფროსის კონსულტანტის – ლალი ბერძენიშვილის პოზიციები მოისმინა, რომლის მიხედვითაც თეონა ბაკურიძე საინფორმაციო სამსახურის ახალ უფროსზე ფსიქოლოგიურ ზეწოლად ახდენდა.

დღეს თეონა ბაკურიძემ განაცხადა, რომ მისი აზრით, საინფორმაციოს ახალი უფროსი გიორგი აბაზაძე შესაძლოა ზეწოლის ქვეშ იყოს.

„მე მაქვს ინფორმაცია, რომ მას ჰქონდა მცდელობა, დაეწერა განცხადება. ნიუსრუმის რამდენიმე თანამშრომელს უთხრა – დავწერე და დავხიეო. ჩვენ მას დღეს დახმარებაც შევთავაზეთ, იმ შემთხვევაში, თუ დაადასტურებდა ასეთ ფაქტებს. არ ვიცი, როგორ შეაფასებს იგი არსებულ პროცესს და როგორი იქნება მისი პასუხები მას შემდეგ, რაც გააკეთებს კომენტარს, მაგრამ მე მაქვს ეჭვი, რომ იგი ზეწოლის ქვეშაა“, – განაცხადა თეონა ბაკურიძემ.

ტელეწამყვანი გიორგი აბაზაძე 4 მარტს დანიშნეს საინფორმაციო სამსახურის უფროსის მოვალეობის შემსრულებლად.

ჟურნალისტების თქმით, გიორგი აბაზაძესთან კამათი დილით ჰქონდათ, დაახლოებით 40 წუთში, მას შემდეგ, რაც ის რადიოს შენობაში გადავიდა, საინფორმაციო სამსახურის უფროსის მოვალეობის შემსრულებელი სასწრაფო დახმარების სამსახურმა კლინიკაში გადაიყვანა.

თეონა ბაკურიძე სამი წელია აჭარის მაუწყებლის მთავარი საინფორმაციო გამოშვების წამყვანია. ორი კვირის წინ მან განაცხადა, რომ აჭარის ტელევიზიაში ახალი დირექტორი გიორგი კოხრეიძე დევნის მისთვის არასასურველ ადამიანებს.

__________________

ვრცლად ამ თემაზე: 

რა ხდება აჭარის ტელევიზიაში? – 12 კითხვა, 12 პასუხი

 

 

ნეტგაზეთის მასალების სხვა გამოცემებში გადაბეჭდვის წესი
ავტორი