აჭარის საზოგადოებრივი მაუწყებლის დირექტორმა გიორგი კოხრეიძემ დღეს ჟურნალისტებს უთხრა, რომ საინფორმაციო სამსახურის ხელმძღვანელის თანამდებობაზე ლალი ბერძენიშვილის კანდიდატურას განიხილავს.
„ვმუშაობთ ჯერჯერობით, გვაქვს მოლაპარაკება (ლალი ბერძენიშვილთან), თავს იკავებს ჯერჯერობით, მაგრამ მე ძალიან მინდა. გარკვეული პერიოდი ზედმეტი პასუხისმგებლობის აკიდება არავისზე არ მინდა, ადამიანი არის შიგნიდან, არის ენერგიული, გამოცდილი, აქედან გამომდინარე, მე კომუნიკაციისთვის მზად ვარ ყველაფერი მოწესრიგებისთვის, დალაგებისთვის. მიმაჩნია, რომ არის (ლალი) ერთ-ერთი საუკეთესო კანდიდატი“, – ამბობს გიორგი კოხრეიძე.
„ბათუმელები“ ლალი ბერძენიშვილსაც დაუკავშირდა. ის ამბობს, რომ დირექტორის შეთავაზებასთან დაკავშირებით ჯერ გადაწყვეტილება არ მიუღია, რადგან ნიუსრუმის გადაწყვეტილებას ელოდება.
„გადაწყვეტილება არ მიმიღია, რადგან ნიუსრუმს აქვს ალტერნატიული აზრი. ჩემთან დაკავშირებით არანაირი წინააღმდეგობა არ იყო და განვიხილეთ თემა, რომ მედიაციის პერიოდში მე ვიყო მოვალეობის შემსრულებელი მხოლოდ და მხოლოდ. ამაზე მათ წინააღმდეგობა არ ჰქონიათ, მაგრამ მათ ურჩევნიათ ნიუსრუმის წიაღიდან წარადგინონ ადამიანი. ამას მოიფიქრებენ, შეჯერდებიან და როგორ წარიმართება სიტუაცია, ხვალ გამოჩნდება“, – ამბობს ლალი ბერძენიშვილი.
რაც შეეხება საინფორმაციო სამსახურის ყოფილ უფროსს, შორენა ღლონტს, რომელიც თანამდებობიდან 28 თებერვალს გაათავისუფლეს, მასთან დაკავშირებით გიორგი კოხრეიძე ამბობს, რომ ის ტელევიზიაში რჩება, ოღონდ სხვა პოზიციაზე.
„ეს საკითხი გადაწყვეტილია, შორენა ღლონტი დარჩება ტელევიზიაში, დამეხმარება რაღაც მიმართულებით. არ ექნება იმის საშუალება, რაც ადრე ჰქონდა, სამწუხაროდ. ის იქნება ჩემი კონსულტანტი ვების მიმართულებით… ეს მისი სურვილიც იყო“, – ამბობს გიორგი კოხრეიძე.
დღეს, 2 მარტს, აჭარის საზოგადოებრივი მაუწყებლის ალტერნატიულმა პროფკავშირებმა კანცელარიაში შეიტანეს განცხადება კოლექტიური დავის თაობაზე, რომლის ძირითადი მიზანია დამსაქმებელს აიძულონ სტატუსკვოს აღდგენა, ანუ გათავისუფლებული რედაქტორების დაბრუნება და სარედაქციო დამოუკიდებლობის გარანტიები. როგორც პროფკავშირების ხელმძღვანელი მალხაზ რეხვიაშვილი ამბობს, თუ ეს მოლაპარაკება 21 დღეში ვერ შედგება, მაშინ „წარმოიშობა გაფიცვის უფლება“.
მისი თქმით, კრიზისზე, რომელიც შესაძლოა შეიქმნას ტელევიზიაში, პასუხისმგებელი იქნება მრჩეველთა საბჭო და ტელევიზიის დირექტორი გიორგი კოხრეიძე.
აჭარის მაუწყებელში რედაქტორად კიდევ ერთი თანამშრომელი ფირუზ ბოლქვაძე დანიშნეს. თუმცა, საინფორმაციო სამსახური აცხადებს, რომ მასთან არ ითანამშრომლებენ.
მთავარი ფოტო: ლალი ბერძენიშვილის ფეისბუქგვერდიდან
ამავე თემაზე:
რა უნდა გააკეთოს საზოგადოებამ აჭარის მაუწყებლის გადასარჩენად – დისკუსია
