ბათუმის ახალი მეჩეთის ტერიტორიაზე სადეზინფექციო სამუშაოები ჩაატარეს. როგორც ახალი მეჩეთის მშენებლობის საინიციატივო ჯგუფის ხელმძღვანელი ტარიელ ნაკაიძე „ბათუმელებთან“ საუბარში ამბობს, დეზინფექცია მუსლიმების ინიციატივით ჩატარდა.
„ჩვენ გამოვიძახეთ სპეციალური სამსახური, თანხა გადავიხადეთ და ჩავატარებინეთ დეზინფექცია. თუ შესაბამისი აუცილებლობა დადგება, იმ შემთხვევაში შევაჩერებთ მსახურებებს, თუმცა, ეს აუცილებლობა არ დგას“ – ამბობს ტარიელ ნაკაიძე.
კითხვაზე, რა პერიოდულობით უნდა ჩატარდეს მსგავს ხალხმრავალ ადგილებში დეზინფექცია და ხომ არ მიუღიათ ამაზე რეკომენდაცია, ტარიელ ნაკაიძე ამბობს, რომ მეჩეთებში ძირითადად პარასკევობით ხდება ხალხის მსახურება: „შესაბამისად, პარასკევის წინ, ყოველთვის ჩავატარებთ დეზინფექციას“.
ნაკაიძე ამბობს, რომ მორწმუნეები ინდივიდუალურად ცდილობენ დაიცვან რეკომენდაციები, „რთულია, მაგრამ მაქსიმალურად ვცდილობთ რეკომენდაციების დაცვას“.
ტარიელ ნაკაიძე ამბობს, რომ სადეზინფექციო სამუშაოების ჩატარება სხვა მეჩეთებშიც იგეგმება.
სადეზინფექციო სამუშაოები ბათუმის ახალ მეჩეთში
