„ოცნების ქალაქში“ მცხოვრებლებმა დღეს, 6 მარტს, საპროტესტო აქცია გამართეს. ისინი დასახლებულ ტერიტორიაზე ეპიდემიის გავრცელების საფრთხეებზე საუბრობენ. მოქალაქეების თქმით, რადგან დასახლებას არ აქვს საკანალიზაციო სისტემა, ფეკალური მასები მიწის ზედაპირზე ამოედინება, რაც გაუსაძლის პირობებს ქმნის.
„ფეკალური მასებით დაიტბორა დასახლების ნაწილი, სადაც ბევრი ბავშვი ცხოვრობს. სასწრაფოდ უნდა გატარდეს შესაბამისი ზომები, რადგან ეპიდემიის და ვირუსების აფეთქება გარდაუვალი იქნება.
კორონავირუსია, სკოლები დაკეტეს და აქ ბავშვებს ანტისანიტარიაში უხდებათ ცხოვრება. არანაირი უსაფრთხოების ზომები არ მიუღია არავის, არც პირბადეები, არც ხსნარები, რომ რაღაც ზომები მაინც მივიღოთ ჰიგიენის. არაერთხელ დავაყენეთ ეს პრობლემა და დღემდე იგივე სიტუაციაა. მარტო საარჩევნოდ ვახსენდებით“, – ამბობს დასახლების მცხოვრები სოფო ბერიძე.
„გაზაფხული მოდის, დათბება მალე და აქ ცხოვრება გაუსაძლისი გახდება. გარდა იმისა, რომ საშინელი სუნია, დაავადებებიც შეიძლება გავრცელდეს. მერიას მივმართეთ განცხადებითაც, მაგრამ მდგომარეობა არ შეცვლილა“, – ამბობს ნაზი სურმანიძე.
მოქალაქეები დასახლებაში არსებული სანიტარულ-ჰიგიენური პრობლემების გარდა სოციალურ პრობლემაზეც საუბრობენ. მათი ნაწილი „ბათუმელებთან“ ამბობს, რომ სოციალური შემწეობები შეუჩერეს და შემოსავლის გარეშე დარჩნენ.
„მასობრივად დაიწყეს სოციალური შემწეობების შეჩერება. ვფიქრობ, ეს ამ დასახლებაში კორპუსების მშენებლობას უკავშირდება, რადგან კატეგორიები როცა დადგინდება, იქ სოციალურად დაუცველის სტატუსი ვისაც არ ექნება, ის შესაძლოა ვეღარ მოხვდეს. ეს კორპუსები 582 ოჯახზეა გათვლილი და ალბათ ამ ფორმით ცდილობენ რაოდენობის შემცირებას“, – გვეუბნება კახა ხიმშიაშვილი, რომელიც შიშობს, რომ არჩევნების შემდეგ შესაძლოა ბინათმშენებლობები აღარც გააგრძელონ.
კახა ხიმშიაშვილი დასახლებაში არსებულ რთულ სანიტარულ-ჰიგიენურ მდგომარეობაზეც საუბრობს. მისი თქმით, ანტისანიტარიის გამო, საფრთხე ექმნება მოსახლეობის ჯანმრთელობას.
„ამ პრობლემას ორმოების ერთხელ ან ორჯერ ამოტუმბვა ვერ მოაგვარებს, ზედაპირული გაწმენდა არ არის საკმარისი, საკანალიზაციო მილები უნდა გაკეთდეს“, – გვეუბნება ის.
21 თებერვალს „ოცნების ქალაქში“ პრემიერ-მინისტრი გიორგი გახარია და აჭარის მთავრობის თავმჯდომარე თორნიკე რიჟვაძეც იმყოფებოდნენ, მათ დასახლებაში კორპუსების მშენებლობის დაწყება დააანონსეს და მოსახლეობას სკოლისა და ბაღის მშენებლობას დაჰპირდნენ.