„მაქვს ეჭვი, რომ ის ზეწოლის ქვეშაა,“ – ამბობს აჭარის ტელევიზიის მთავარი საინფორმაციო გამოშვების წამყვანი თეონა ბაკურიძე გიორგი აბაზაძის შესახებ, რომელიც 4 მარტს საინფორმაციო სამსახურის უფროსის მოვალეობის შემსრულებლად დანიშნეს. გიორგი აბაზაძე ამ დროისთვის კლინიკა „მედცენტრში“ იმყოფება.
ჟურნალისტების თქმით, გიორგი აბაზაძესთან კამათი დილით ჰქონდათ, დაახლოებით 40 წუთში, მას შემდეგ, რაც ის რადიოს შენობაში გადავიდა, საინფორმაციო სამსახურის უფროსის მოვალეობის შემსრულებელი სასწრაფო დახმარების სამსახურმა კლინიკაში გადაიყვანა. მისი ჯანმრთელობის მდგომარეობა ამ დროისთვის სტაბილურია.
„ნიუსრუმში იყო ხმამაღალი კამათი და ჩვენ ვკითხეთ აბაზაძეს, რატომ აიღო მან ეს პასუხისმგებლობა თავზე, როცა არ აქვს გამოცდილება. ამის შემდეგ აბაზაძე გაიყვანეს ოთახიდან… ის იყო ზედა სართულზე, შემდეგ – რადიოში, სადაც იმყოფება მრჩეველთა საბჭო და მენეჯმენტი. ჩვენ არ ვიცით, რა მოხდა იქ, მაგრამ ჩვენგან გასვლის შემდეგ, დაახლოებით 40 წუთის შემდეგ, გახდა შეუძლოდ,“ – გვიყვება თეონა ბაკურიძე.
ჟურნალისტი ეჭვობს, რომ გიორგი აბაზაძე ზეწოლის ქვეშაა და მას რეალურად თანამდებობის დატოვება სურდა.
„მე მაქვს ინფორმაცია, რომ მას ჰქონდა მცდელობა, დაეწერა განცხადება. ნიუსრუმის რამდენიმე თანამშრომელს უთხრა – დავწერე და დავხიეო. ჩვენ მას დღეს დახმარებაც შევთავაზეთ, იმ შემთხვევაში, თუ დაადასტურებდა ასეთ ფაქტებს. არ ვიცი, როგორ შეაფასებს იგი არსებულ პროცესს და როგორი იქნება მისი პასუხები მას შემდეგ, რაც გააკეთებს კომენტარს, მაგრამ მე მაქვს ეჭვი, რომ იგი ზეწოლის ქვეშაა“, – ამბობს თეონა ბაკურიძე.
____
მაუწყებლის თანამშრომლების განცხადება
აბაზაძის დისკრიმინაციული განცხადებები ეწინააღმდეგება მაუწყებლის სტანდარტს – ჟურნალისტები
აჭარის მაუწყებელში საინფორმაციო სამსახურის უფროსის მოვალეობის შემსრულებლად გიორგი აბაზაძე 4 მარტს დანიშნეს.
გიორგი აბაზაძე: ახლა გახდა საინტერესო ჩემი შარშანდელი პოსტები?
აჭარის ტელევიზიაში ყოფილი დირექტორის იმპიჩმენტის შემდეგ ქართული ოცნების კვოტით არჩეულმა მრჩეველთა საბჭოს წევრებმა დირექტორად გიორგი კოხრეიძე აირჩიეს. მაუწყებელში მის მიერ გატარებულმა საკადრო [სამი რედაქტორი გაათავისუფლა] თუ სხვა სახის ცვლილებებმა, მაუწყებელი კრიზისში შეიყვანა.
