Batumelebi

უკრაინის თავდაცვის სამინისტროს მთავარი სადაზვერვო სამმართველოს ხელმძღვანელმა, გენერალ-მაიორმა კირილო ბუდანოვმა, ჟურნალისტების კითხვაზე, ოკუპირებულ ყირიმს უკრაინა იარაღით დაიბრუნებს, თუ მის გარეშე, თქვა – „დიახ, ჩვენ დავბრუნდებით იარაღით. სხვა გზა არ არსებობს“.

მან ამის შესახებ ტელემარათონის ეთერში განაცხადა.

„ის ჩემი მეორე ოჯახია. მე ყირიმში გავიზარდე. ჩვენ იქ ძალიან მალე დავბრუნდებით“, – ხაზგასმით აღნიშნა ბუდანოვმა. მან ასევე დასძინა, რომ რუსეთთან ომი მალე დასრულდება.

„ეს ომი არც ისე დიდხანს გაგრძელდება. ის მალე დასრულდება“, – თქვა მან.

ბუდანოვმა აუდიტორიას შეახსენა მოვლენების ალგორითმის შესახებ, რომელზეც მან ამ წლის მაისში ისაუბრა.

„მე მაშინ პირდაპირ ვთქვი, რომ ივნისის თვე სამწუხაროდ, ჩვენთვის კარგი არ იქნებოდა. გვექნებოდა დანაკარგები. ივლისში იქნებოდა პირობითად სტაგნაცია, აგვისტოში დავიწყებდით მცირე მოძრაობას ჩვენი ტერიტორიების დასაბრუნებლად“, – განაცხადა მან.

ბუდანოვმა ამჯერად ტელემარათონის ეთერში აღნიშნა, რომ „ზამთარში ომი უმეტესწილად მინელდება“.

„ზამთრის შემდეგ კი დაიწყება ამ კონფლიქტის დასასრული – პირველ ეტაპზე გავალთ 1991 წლის მდგომარეობით ადმინისტრაციულ საზღვრებზე“, – განაცხადა სამხედრო დაზვერვის ხელმძღვანელმა.

ბუდანოვის თქმით, მისთვის ცნობილი ფაქტებიდან გამომდინარე, ყირიმის გათავისუფლება გაზაფხულის ბოლომდე დასრულდება.

„შეიძლება ცოტათი ადრეც – დღეებში შეიძლება შეცდე, ალგორითმში – არა“, – დასძინა მან.

___

რუსეთმა,  უკრაინის ოთხი რეგიონის – დონეცკის, ლუგანსკის, ზაპოროჟიესა და ხერსონის ოკუპაციის შესახებ გამოაცხადა.

„რუსეთში ოთხი ახალი რეგიონია“, – გუშინ, 30 სექტემბერს, ამ სიტყვებით რუსეთის პრეზიდენტმა, ვლადიმერ პუტინმა, უკრაინის რეგიონების – ხერსონის, ზაპოროჟიეს, დონეცკისა და ლუგანსკის ოლქების ოფიციალური ანექსია გამოაცხადა.

რუსეთმა „საზღვრების გაფართოება“ საზეიმოდ აღნიშნა.

ვასილი უკრაინის მოტორიზებული ქვეითი ბრიგადის ტანკსაწინააღმდეგო დანაყოფის მეთაურია. მისი საბრძოლო სახელია „ბარადა“.

სამხედრო სამსახურს ჯერ კიდევ 2016 წელს შეუდგა. მსახურობდა უკრაინის ეროვნული გვარდიის მე-9 სპეცდანიშნულების რაზმში „გეპარდი“, მანამდე კი 2 წელი პოლიციაში მუშაობდა.

მეთაურ ბარადას შესახებ მასალას უკრაინის შეიარაღებული ძალების საინფორმაციო გამოცემა Armyinform ავრცელებს.

ვასილი მეშვიდე თვეა უკრაინის შეიარაღებული ძალების ერთ-ერთ ქვედანაყოფს ხელმძღვანელობს.

ჯერ დონეცკში იბრძოდა, ახლა კი ხერსონში ასრულებს მისიას საძმოსთან ერთად რუსი ოკუპანტების წინააღმდეგ.

„ქვედანაყოფის მეთაურისთვის ყველაზე მნიშვნელოვანი ადამიანების სიცოცხლის გადარჩენა და გონივრული გადაწყვეტილებების სწრაფად მიღების უნარია, რითაც პირადი შემადგენლობის უსაფრთხოება უნდა იყოს უზრუნველყოფილი.

ვაცნობიერებ, რომ ჩვენი ყოველი საბრძოლო ოპერაცია სასიკვდილო საფრთხესთანაა დაკავშირებული და შესაძლოა უკანასკნელიც იყოს. ამიტომ მნიშვნელოვანია ჰარმონიულად, ერთი მექანიზმივით მუშაობა, მტრისთვის სწრაფად და ზუსტად დარტყმის უნარი“, – ამბობს სამხედრო პირი.

ერთ-ერთი ბრძოლის დროს ვასილიმ გამჭოლი ჭრილობა მიიღო, მტრის ტყვიამ მას ხერხემალი და მენჯის ძვალი დაუზიანა. ექიმები ეუბნებოდნენ, რომ სიარულიც კი არ შეიძლებოდა, ვასილიმ სამხედრო სამედიცინო დაწესებულებაში იმკურნალა, რეაბილიტაცია გაიარა და თავის საჯარისო ნაწილს შეუერთდა ომში.

„ერთ საღამოს სადემარკაციო ხაზთან ვზვერავდი ტერიტორიას და აღმოვაჩინე, რომ არხზე გამავალი ხიდი დანაღმული იყო. მეორე დღეს შევნიშნე, რომ არხის მეორე მხარეს მობილიზებული იყო სამი ტანკისგან შემდგარი ტაქტიკური ჯგუფი. დიდხანს არ გვიფიქრია. როცა ჩვენი „Stugna“ მუშაობს ტანკებს ან ანადგურებს, ან რაც ვერ ნადგურდება, ისინი გარბიან. (Stugna – კიევის კონსტრუქტორთა ბიუროს მიერ გამოგონილი ტანკსაწინააღმდეგო სარაკეტო კომპლექსია) ახლაც ასე მოხდა, ერთი ტანკი განადგურდა, დანარჩენი ორი გაიქცა.

ჩვენმა ძალებმა მაშინვე დაიკავეს მტრის პოზიციები“, – ჰყვება ვასილი.

იხსენებს ასევე ამბავს, როცა რუსული დაზვერვის მონაცემები ჩაიგდო ხელში:

„21 აპრილი იყო, პოზიციას ვზვერავდით დურბინდით, ვხედავდი სამ ტანკს, რომელიც ცოტა ხნის წინ გავანადგურეთ, ამ ტანკების შორიახლო სამი ადამიანი მიცოცავდა, შორიდან ვერ ვხედავდი ჩვენები იყვნენ თუ არა. როცა მივხვდით, რომ ოკუპანტები იყვნენ, ამ დროს მათაც შეგვნიშნეს.

ძალიან სწრაფად გაიქცნენ, რომ არ დაგვეჭირა. ადვილი იყო მათთვის სირბილი. ზურგჩანთები გადააგდეს. „რუსეთის ფედერაციის გვარდიის მოტომსროლელთა ბრიგადის 138-ე დანაყოფი“, – ეწერა ზურგჩანთებზე. შიგ იყო მეხსიერების ბარათები, ტელეფონები, რუსული რუბლი, სტიკერები წარწერით „ყველა რუსეთისთვის“ და რაც მთავარია დაზვერვის მონაცემები“, – იხსენებს ვასილი.

ამჟამად ის თავის ოცეულთან ერთად აგრძელებს საბრძოლო მისიას სამხრეთ უკრაინაში. ამ დანაყოფის ძირითადი ამოცანა მტრის ჯავშანტექნიკის განადგურებაა.

„წვერა“ ამბობს, რომ უკრაინის გამარჯვების შემდეგ შინ, ცოლ-შვილთან რაც შეიძლება მალე დაბრუნებაზე ოცნებობს.

„მინდა ასევე უკრაინულ ყირიმში დავლიო ღვინო და ჩემი შვილები უკრაინული დროშებით ვასეირნო წითელ მოედანზე მანქანით“, – ამბობს ტანკსაწინააღმდეგო დანაყოფის მეთაური.

მთავარ ფოტოზე: უკრაინის მოტორიზებული ქვეითი ბრიგადის ტანკსაწინააღმდეგო დანაყოფის მეთაური ვასილი „ბარადა“, გამოცემა Armyinform

დიდი ბრიტანეთის დაზვერვის ინფორმაციით, 30 სექტემბერს, რუსეთის არმიამ ჰაერსაწინააღმდეგო რაკეტით დაარტყა ავტოკოლონას ზაპოროჟიეში. უწყება ეყრდნობა ადგილობრივი ხელისუფლების ცნობას, რომლის თანახმადაც, თავდასხმის შედეგად სულ მცირე 25 მშვიდობიანი მოქალაქე დაიღუპა.

„რუსეთისთვის ასეთი რაკეტების მარაგი, სავარაუდოდ, შეზღუდულია და წარმოადგენს ძვირადღირებულ სამხედრო რესურსს. ის განკუთვნილია თანამედროვე თვითმფრინავებისა და მოახლოებული რაკეტების გასანადგურებლად და არა სახმელეთო სამიზნეებზე თავდასხმისთვის.

მისი გამოყენება სახმელეთო შეტევებისთვის, დიდი ალბათობით, გამოწვეულია საბრძოლო მასალების, კერძოდ კი, შორსმოქმედი ზუსტი რაკეტების დეფიციტით,“ – მიუთითებს უწყება 1 ოქტომბრის რელიზში.

დაზვერვა ხაზს უსვამს, რომ იმავე დღეს, რუსეთის პრეზიდენტმა ვლადიმერ პუტინმა ხელი მოაწერა ზაპოროჟიესა და უკრაინის სხვა ოკუპირებული ტერიტორიების ანექსიას.

„რუსები ხარჯავენ სტრატეგიულად ძვირფას სამხედრო რესურსებს, რათა როგორმე მიაღწიონ ტაქტიკურ უპირატესობას და ამ პროცესში ხოცავენ ადგილობრივ მცხოვრებლებს, რომლებსაც ახლა საკუთარ მოქალაქეებს უწოდებენ,“ – წერს დაზვერვა.

უკრაინის ხელისუფლების ცნობით, რუსმა სამხედროებმა, ზაპოროჟიედან მიმავალ ჰუმანიტარულ ავტოკოლონას გუშინ დილით დაარტყეს. როგორც პრეზიდენტმა ვოლოდიმირ ზელენსკიმ საღამოს მიმართვაში განაცხადა, დაღუპულია 30 და დაჭრილია 100-მდე ადამიანი.

_______________________________

ფოტოზე: თავდასხმის ადგილი ზაპოროჟიეში.  ფოტო: EPA-EFE/ATEF

უკრაინის შეიარაღებულმა ძალებმა, შესაძლოა, დონეცკის ქალაქი ლიმანი მომდევნო 3 დღეში სრულად ალყაში მოაქციონ და დაიკავონ – ვარაუდობს აშშ-ის ომის კვლევის ინსტიტუტი (ISW).

უახლეს ანგარიშში ინსტიტუტის ანალიტიკოსები ეყრდნობიან დონეცკის სეპარატისტული რესპუბლიკის წარმომადგენლებსა და რუსეთის სამხედრო კორესპონდენტებს, რომლებიც წერენ, რომ რუსეთი ძალები ჯერ კიდევ აკონტროლებენ ლიმანს, თუმცა უკან დაიხიეს დრობიშევოსა და იამპოლის პოზიციებიდან.

იამპოლის გათავისუფლება უკვე დაადასტურა უკრაინის პრეზიდენტმა ვოლოდიმირ ზელენსკიმ.

რუსული წყაროები, რომლებსაც ISW ეყრდნობა, ამტკიცებდნენ, რომ რუსები ჯერ კიდევ აკონტროლებდნენ ერთ გზას ლიმანიდან ტორსკოესკენ, მაშინ, როდესაც უკრაინის ძალებმა სტავოკის რაიონში დრობიშევო-ტორსკოეს გზა გადაკვეთეს. ეს წყაროები ასევე აღნიშნავდნენ უკრაინის სადაზვერვო-დივერსიული ჯგუფების აქტივობის გაზრდას სვატოვო-ტორსკოეს გზაზე, ლიმანის ჩრდილო-აღმოსავლეთით. გეოლოკაციურ კადრებში ჩანს, როგორ ურტყამს უკრაინის არმია ტორსკოეს რაიონში რუსეთის ძალებს, რომლებიც უკან დახევას ცდილობენ.

ინსტიტუტი ასევე აღნიშნავს, რომ 30 სექტემბერს უკრაინის ძალები განაგრძობდნენ დარტყმებს რუსულ სამხედრო ობიექტებზე ლუგანსკის ოლქში. გეოლოკაციური კადრებით დასტურდება „ჰაიმარსის“ დარტყმის შედეგები სატელევიზიო ანძაზე და სტარობელკაში, ასევე – ასფალტის ქარხანაზე ალჩევში, სადაც ცნობების თანახმად, რუსული ჯარები იმყოფებოდნენ.

ომის კვლევის ინსტიტუტი გუშინდელ ანგარიშში წერდა, რომ 29 სექტემბრის საღამოს, უკრაინის ძალებმა, სავარაუდოდ ალყაში მოაქციეს რუსული დანაყოფები ლიმანთან. ზოგიერთი მონაცემებით, თუ რუსეთის ჯარს დამხმარე ძალა არ დაემატება, უკრაინელი სამხედრობი ქალაქის აღებას შეძლებენ.

დღეს უკრაინამ NATO-ს წევრობაზე განაცხადი გააკეთა. პრეზიდენტმა ვოლოდიმირ ზელენსკიმ ამის შესახებ გამოაცხადა ვიდეომიმართვაში, რომლის თარგმანსაც „ბათუმელები“ გთავაზობთ:

უკრაინელებო!

ჩვენო მეგობრებო და მოკავშირეებო!

დე-ფაქტო მოკავშირეებო. ჩვენ დღეს აქ, კიევში, ჩვენი ქვეყნის გულში ვდგამთ გადამწყვეტ ნაბიჯს თავისუფალი ხალხების მთელი თანამეგობრობის უსაფრთხოებისთვის.

ჩვენ ვხედავთ, ვინ გვემუქრება. ვინაა მზად მოგვკლას და დაგვასახიჩროს. ვინ არ ერიდება არანაირ სიმხეცეს, ოღონდ კი თავისი კონტროლის ზონა გააფართოოს.

24 თებერვალს პირველი სრულმასშტაბიანი დარტყმა მიაყენეს უკრაინას. პირველი! რუსეთი არ გაჩერდებოდა ჩვენს საზღვრებთან, თუ მას ჩვენ არ შევაჩერებდით. სხვა სახელმწიფოებიც დარტყმის ქვეშ აღმოჩნდებოდნენ – ბალტიის ქვეყნები, პოლონეთი, მოლდოვა და საქართველო, ყაზახეთი…

რუსეთს პრეტენზია ჰქონდა ევროპისა და აზიის ხალხების დამორჩილებაზე. პრეტენზია ჰქონდა ჯერ კიდევ ნახევარი წლის წინ. ეს დანაშაულებრივი ამბიცია უკრაინაში ტყდება. ის გატყდა კიევთან და ჩერნიგოვთან. „აზოვსტალში“, სუმისა და ხარკოვის ოლქებში. ზმეინიზე.

ის დაიმსხვრევა დონბასში და უკრაინის სამხრეთში, როდესაც ჩვენ მათ გავათავისუფლებთ. აუცილებლად – ყირიმში, თავისუფალ უკრაინულ ყირიმში.

ჩვენი სახელმწიფოს ყველა ტერიტორია გათავისუფლდება ამ მტრისგან – არამხოლოდ უკრაინის, არამედ თავად სიცოცხლის, კაცობრიობის, კანონისა და სიმართლის მტრისგან.

რუსეთმა ეს უკვე იცის, გრძნობს ამ ძალას. ხედავს, რომ სწორედ აქ, უკრაინაში, ჩვენ ვამტკიცებთ ჩვენი ღირებულებების სიძლიერეს.

სწორედ ამიტომაც ჩქარობს. აწყობს ამ ფარსს ანექსიის მცდელობით. ცდილობს მოიპაროს ის, რაც მას არ ეკუთვნის. სურს მკვლელობით, დამცირებით, შანტაჟითა და სიცრუით გადაწეროს ისტორია და გადახატოს საზღვრები.

უკრაინა ამას არ დაუშვებს.

დღეს მე უმაღლესი მთავარსარდლის შტაბის სხდომა გავმართე. ახლახან დასრულდა ნაციონალური უსაფრთხოებისა და თავდაცვის საბჭოს სხდომაც.

ჩვენ გადაწყვეტილებები გვაქვს.

პირველი – მხოლოდ უკრაინის გაძლიერებისა და ყველა ტერიტორიიდან ოკუპანტების განდევნის გზით დაბრუნდება მშვიდობა. ჩვენ ამ გზას გავივლით.

მეორე – უკრაინა იყო და რჩება ლიდერად, ვინც მოლაპარაკებებს ცდილობს. სწორედ ჩვენი სახელმწიფო სთავაზობდა რუსეთს ყოველთვის შეთანხმებას თანაბარი, პატიოსანი, ღირსეული და სამართლიანი პირობებით. ცხადია, რუსეთის ამ პრეზიდენტის პირობებში ეს შეუძლებელია. მან არ იცის, რა არის ღირსება და პატიოსნება. ამიტომაც ჩვენ მზად ვართ რუსეთთან დიალოგისთვის, ოღონდ უკვე რუსეთის სხვა პრეზიდენტთან.

და მესამე – ჩვენ უნდა დავაფიქსიროთ იურიდიულად ის ყველაფერი, რასაც ფაქტობრივად უკვე მივაღწიეთ.

ტირანიასთან ბრძოლით სწორედ უკრაინაში წყდება დემოკრატიის ბედი.

სწორედ აქ, ჩვენი სახელმწიფო საზღვრების განმტკიცებით, შეგვიძლია გავამყაროთ ყველა ევროპული სახელმწიფოს საზღვარი. ჩვენ შეგვიძლია უზრუნველვყოთ, რომ ვერავინ ვეღარასოდეს გაბედოს ომის დაბრუნება ჩვენს კონტინენტზე.

სწორედ აქ, უკრაინაში შეიძინა ნამდვილად ცოცხალი ენერგია ჩვენი ევროატლანტიკური თანამეგობრობის ღირებულებებმა. ძალა იმ ხალხის, რომელიც იბრძვის თავისუფლებისთვის და ძალა იმ ხალხების, რომლებიც მას ამ ბრძოლაში ეხმარებიან.

ჩვენ დე-ფაქტო მოკავშირეები ვართ. ეს უკვე მიღწეულია. დე-ფაქტო, ჩვენ უკვე გავიარეთ ჩვენი გზა NATO-მდე. დე-ფაქტო, ჩვენ უკვე დავამტკიცეთ ჩვენი თავსებადობა ალიანსის სტანდარტებთან, ისინი რეალურია უკრაინისთვის – რეალურია ბრძოლის ველზე და ჩვენი ურთიერთკავშირის ყველა ასპექტში.

ჩვენ ერთმანეთს ვენდობით, ჩვენ ვეხმარებით და ვიცავთ ერთმანეთს. სწორედ ესაა ალიანსი. დე-ფაქტო.

დღეს უკრაინა გზავნის განაცხადს, რომ ეს დე-იურედ აქციოს. პროცედურით, რომელიც პასუხობს ჩვენი ერთიანი თანამეგობრობის უსაფრთხოების მნიშვნელობას. დაჩქარებული წესით.

ჩვენ ვიცით, რომ ეს შესაძლებელია. ჩვენ ვნახეთ, როგორ დაიწყეს წელს ფინეთმა და შვედეთმა ალიანსთან შეერთება წევრობის სამოქმედო გეგმის გარეშე.

ეს სამართლიანია. სამართლიანია უკრაინისთვისაც. ეს არის შეთანხმების დონეზე იმის გაფორმება, რაც ისედაც მიღწეულია ცხოვრებაში და რაც ჩვენს ღირებულებებს წარმოადგენს.

ჩვენ გვესმის, რომ ეს  ჩრდილოატლანტიკური კავშირის ყველა წევრისგან კონსენსუსს მოითხოვს. გვესმის, რომ საჭიროა ასეთი კონსენსუსის მიღწევა. და ამიტომაც, ვიდრე ეს მოხდება, ჩვენ გთავაზობთ ჩვენი წინადადებების განხორციელებას უკრაინისა და მთელი ევროპის უსაფრთხოების გარანტიისთვის „კიევის უსაფრთხოების შეთანხმების“ თანახმად, რომელიც ჩვენს პარტნიორებს უკვე წარვუდგინეთ.

უსაფრთხოებას ალტერნატივა არ აქვს. თუმცა იმისთვის, რომ ის გარანტირებული იყოს, გამბედაობაა საჭირო.

ჩვენ ვდგამთ ჩვენს გადამწყვეტ ნაბიჯს, ხელს ვაწერთ უკრაინის განაცხადს NATO-ში დაჩქარებული წესით გაერთიანებაზე.

დღეს უკრაინის უსაფრთხოებისა და თავდაცვის ნაციონალურმა საბჭომ მიიღო გადაწყვეტილება გამოიყენოს სანქციები რუსეთის იმ მნიშვნელოვანი ფიზიკური და იურიდიული პირების მიმართ, რომლებმაც ვერ იპოვეს საკუთარი თავში გამბედაობა კაცობრიობისა და საერთაშორისო სამართლის დასაცავად დამდგარიყვნენ ან რომლებიც სხვადასხვა ფორმით დაკავშირებული არიან უკრაინისა და დემოკრატიული ხალხების თანამეგობრობის წინააღმდეგ გადადგმულ აგრესიულ ნაბიჯებთან.

ამავე დროს, მივმართავ უკრაინის სახალხო დეპუტატებს: უმაღლესი რადის მომდევნო სხდომაზე განიხილება რუსული აქტივების ნაციონალიზაციის შესახებ კანონპროექტი, რომელმაც პროცედურა უნდა დააჩქაროს. გთხოვთ, მხარი დაუჭიროთ ამ პროექტს.

ვასრულებთ უკრაინაზე, ევროპასა და მსოფლიოზე რუსეთის გავლენის დემონტაჟს.

დიდება უკრაინას!

წყარო: President.gov.ua

თარგმნა: თამარ რუხაძემ

„ყირიმი, ხერსონი, ზაპოროჟიე, დონეცკი და ლუგანსკი უკრაინაა. მოვუწოდებთ ყველა სახელმწიფოსა და საერთაშორისო ორგანიზაციას, ცალსახად უარყოს ეს უკანონო ანექსია“, – ევროპული საბჭო რუსეთის მიერ უკრაინის კიდევ ოთხი რეგიონის ანექსიას გამოეხმაურა.

„ჩვენ მტკიცედ უარვყოფთ და ცალსახად ვგმობთ რუსეთის მიერ უკრაინის დონეცკის, ლუგანსკის, ზაპოროჟიესა და ხერსონის რეგიონების უკანონო ანექსიას. კანონზე დამყარებული საერთაშორისო წესრიგის განზრახ უგულებელყოფითა და  გაეროს წესდებასა და საერთაშორისო სამართალში ასახული ძირითადი პრინციპების – უკრაინის დამოუკიდებლობის, სუვერენიტეტისა და ტერიტორიული ერთიანობის ფუნდამენტური უფლებების უხეში დარღვევით რუსეთი გლობალურ უსაფრთხოებას რისკის ქვეშ აყენებს.

ჩვენ არ ვცნობთ და არც არასდროს ვცნობთ უკანონო „რეფერენდუმს“ და მის გაყალბებულ და უკანონო შედეგებს, რომელიც რუსეთმა უკრაინის დამოუკიდებლობის, სუვერენიტეტისა და ტერიტორიული მთლიანობის დამატებით დარღვევის საბაბად მოამზადა. ყირიმი, ხერსონი, ზაპოროჟიე, დონეცკი და ლუკანსკი უკრაინაა. მოვუწოდებთ ყველა სახელმწიფოსა და საერთაშორისო ორგანიზაციას ცალსახად უარყოს ეს უკანონო ანექსია.

რუსეთის აგრესიული ომისა და მოსკოვის ბოლო ესკალაციის ფონზე, ევროკავშირი მტკიცედ დგას უკრაინისა და მისი ხალხის გვერდით. ჩვენ ურყევად ვუჭერთ მხარს უკრაინის ტერიტორიულ მთლიანობას და სუვერენიტეტს. უკრაინა იყენებს ლეგიტიმურ უფლებას დაიცვას თავი რუსული აგრესიისგან, რათა აღადგინოს სრული კონტროლი საკუთარ ტერიტორიაზე და აქვს უფლება, გაათავისუფლოს ოკუპირებული ტერიტორიები საერთაშორისოდ აღიარებულ საზღვრებში. კრემლის მიერ გაკეთებული ბირთვული მუქარა, სამხედრო მობილიზაცია და უკრაინის ტერიტორიის რუსეთად მოტყუებით წარმოჩენის მცდელობა იმის მტკიცების სტრატეგია, რომ თითქოს ომი ახლა უკვე რუსეთის ტერიტორიაზე გადმოდის, ვერ შეარყევს ჩვენს გადაწყვეტილებას.

რუსეთის უკანონო ქმედებების საპასუხოდ ჩვენ გავაძლიერებთ შემზღუდავ ზომებს, რომლებიც კიდევ უფრო გააძლიერებს რუსეთზე ზეწოლას მისი აგრესიის, ომის დასასრულებლად.

ვიმეორებთ, რომ ევროკავშირი მტკიცედ დგას უკრაინის გვერდით და გააგრძელებს მისთვის ძლიერ ეკონომიკურ, სამხედრო, სოციალურ და ფინანსურ მხარდაჭერას მანამდე, სანამ საჭირო იქნება“, – ვკითხულობთ განცხადებაში.

ევროპული საბჭოს განცხადებას ევროკომისიის პრეზიდენტი ურსულა ფონ დერ ლაიენი აზიარებს და წერს:

„პუტინის მიერ გამოცხადებული უკანონო ანექსია არაფერს შეცვლის.

რუსი დამპყრობლების მიერ უკანონოდ ოკუპირებული ყველა ტერიტორია უკრაინის მიწაა და ყოველთვის იქნება ამ სუვერენული ერის ნაწილი“.

უკრაინის ქალაქ მარიუპოლში, რომელიც ამჟამად რუსეთის შეიარაღებული ძალების მიერ არის ოკუპირებული, ერთ-ერთი სკოლის ეზოში ოკუპანტებმა უკრაინული სახელმძღვანელოები დაწვეს – ამის შესახებ მარიუპოლის მერის მრჩეველი, პეტრ ანდრიუშენკო წერს ტელეგრამზე.

იგი ფოტოსაც ავრცელებს, რომელზეც ღია ცის ქვეშ დაყრილი წიგნებია გამოსახული.

„მარიუპოლი. 48-ე სკოლის ეზო. სწორედ აქ დაწვეს უკრაინული სახელმძღვანელოები. თანამედროვე ფაშიზმი და რუსეთის ნამდვილი მიზნები ზუსტად ასე გამოიყურება“, – წერს ის.

უკრაინული მედიის ცნობით მარიუპოლში განადგურებულია დაახლოებით 85 ათასი ადამიანის საცხოვრებელი სახლი, დაღუპულთა ზუსტი რაოდენობა უცნობია, წინასწარი გათვლებით მარიუპოლში დაახლოებით 22 ათასი მშვიდობიანი მოსახლე დაიღუპა.

უკრაინის პრეზიდენტის მრჩეველი, მიხაილო პოდოლიაკი რუსეთის მიერ უკრაინის ტერიტორიების ანექსიას ეხმაურება და აცხადებს, რომ „მოსკოვი ცდილობს დემოკრატია დააჩოქოს“.

„არ გინდოდათ ესკალაცია? და მაინც, ის აქ არის. ანექსიით, „ბირთვული“ მუქარით და ტოტალური გაწვევით, რუსეთის ფედერაცია ეუბნება ცივილიზებულ სამყაროს – „და რას მიზამ?“. მოსკოვი ცდილობს დააჩოქოს დემოკრატია. პროვოკაციისა და ომის ესკალაციის თავიდან არიდებაზე კვლავ გავაგრძელებთ საუბარს?“ – წერს მიხაილო პოდოლიაკი.

რუსეთის მხარდაჭერილმა სეპარატისტულმა ძალებმა, უკრაინის ოთხ რეგიონში – ზაპოროჟიეში, ხერსონში, დონეცკში, ლუგანსკში, – უკანონო რეფერენდუმები გამართეს რუსეთთან შეერთების მოთხოვნით. ოფიციალურად, მათ ანექსიას ვლადიმერ პუტინი დღეს, 30 სექტემბერს, მოაწერს ხელს.

გასულ ღამეს რუსეთმა ზაპოროჟიესა და ხერსონის დამოუკიდებლად ცნობის განკარგულებები გაავრცელა.

კრემლის ჩინოვნიკების ურთიერთსაპირისპირო განცხადებები და ბიუროკრატიული ხარვეზები მობილიზაციის პროცესში, შესაძლოა, მიუთითებდეს იმაზე, რომ პუტინმა, როგორც უმაღლესმა მთავარსარდალმა, გვერდი აუარა ქვეყნის თავდაცვის უწყებას და ურთიერთსაწინააღმდეგო ბრძანებები გასცა – მიიჩნევს აშშ-ის ომის კვლევის ინსტიტუტი (ISW).

ინსტიტუტის ანალიტიკოსები ერთ-ერთ მაგალითად იხსენებენ დუმის სპიკერის განცხადებებს. ვიაჩესლავ ვოლოდინმა ჯერ განაცხადა, რომ სამხედრო აღრიცხვაზე მყოფ რუსეთის მოქალაქეებს ქვეყნის დატოვება ეკრძალებოდათ, შემდეგ კი ეს განცხადება უარყო, რადგან თავდაცვის უწყებამ დააზუსტა, რომ ასეთი აკრძალვა კანონით მხოლოდ სრული მობილიზაციის შემთხვევაში მოქმედებს და არა „ნაწილობრივის“.

ISW-ის შეფასებით კრემლი განაგრძობს „ნაწილობრივი მობილიზაციის“ შესახებ მის მიერვე გამოცხადებული პროცედურების დარღვევას და წინააღმდეგობაში მოდის საკუთარ განცხადებებთან. მობილიზაციის გამოცხადებიდან 8 დღეში კრემლმა ამ პროცესში ხარვეზებიც კი აღიარა, თუმცა ეს ბიუროკრატიულ პრობლემებს გადააბრალა.

ინსტიტუტის ინფორმაციით, გაწვევას დაუქვემდებარეს შეუსაბამო ასაკისა და სუსტი ჯანმრთელობის მქონე ხალხი.

„ბიუროკრატიული ხარვეზები რუსეთის ნაწილობრივ მობილიზაციაში, შესაძლოა, მიუთითებდეს იმაზე, რომ პუტინმა კვლავაც გვერდი აუარა რუსეთის უმაღლეს სამხედრო სარდლობას, თავდაცვის უწყებას. ახალმობილიზებულების განთავსება პირდაპირ ხარკოვისა და ხერსონის მიმართულებებზე, შესაძლოა, ასევე მეტყველებდეს იმაზე, რომ პუტინი პირდაპირ მუშაობს ადგილზე მყოფ მეთაურებთან, რომლებიც სავარაუდოდ დაუყოვნებლივ დახმარებას ითხოვენ და არ მიჰყვებიან სტანდარტულ სამხედრო პრაქტიკას, რაც წინა ხაზზე სამხედროების გაგზავნამდე მათ მომზადებას ითვალისწინებს,“ – წერენ ინსტიტუტის ანალიტიკოსები.

ISW-ი მანამდეც წერდა, რომ არსებობს არაერთი მაგალითი, როდესაც უშუალოდ „სპეციალურ სამხედრო ოპერაციასთან“ დაკავშირებული გადაწყვეტილებების მიღებისას პუტინმა ინსტანციათა ჯაჭვს გვერდი აუარა და ეს სავარაუდოდ, თავდაცვის უწყებისადმი უნდობლობის გამო გააკეთა.

ISW-ის ანგარიშის სხვა მთავარი მიგნებები:

• ბრძოლები გრძელდება უკრაინის სამხრეთსა და ჩრდილო-აღმოსავლეთში. უკრაინის ძალებმა, სავარაუდოდ, ალყაში მოაქციეს რუსული ჯარები ლიმანთან და მათ კომუნიკაციის კრიტიკულად მნიშვნელოვანი გზები გადაუჭრეს.
• რუსები ცდილობენ ხერსონის მიმართულების ახალმობილიზებული რეზერვისტებით გაძლიერებას.
• უკრაინის ძალები განაგრძობენ დარტყმებს რუსეთის ლოგისტიკური სატრანსპორტო და სამხედრო პუნქტებზე ხერსონში.
• რუსეთის ჯარები განაგრძობდნენ სახმელეთო შეტევებს დონეცკის ოლქში.
• რუსეთმა, სავარაუდოდ, გაზარდა ირანული დრონების Shahed 136-ების გამოყენება უკრაინის სამხრეთში.

დიდი ბრიტანეთის დაზვერვის ყურადღების ცენტრში რუსეთის არმიის სამედიცინო უზრუნველყოფის საკითხია, რომელიც უწყების დასკვნით, ომის მეშვიდე თვეს კიდევ უფრო უარესდება.

„ზოგიერთ ახალმობილიზებულ რეზერვისტს უბრძანეს, პირველადი დახმარების აუცილებელი საჭიროებები თავად შეეძინათ, პრობლემის ეკონომიკურად ეფექტიან გადაწყვეტად კი ქალის ჰიგიენური საფენები ურჩიეს,“ – წერს დაზვერვა 30 სექტემბრის რელიზში.

დაზვერვის შეფასებით, ძალიან დაბალია რუსი სამხედროების სამედიცინო მომზადების დონე, მათ არც ის იციან, როგორ უნდა გაუწიონ დაჭრილს ბრძოლის ველზე პირველადი სამედიცინო დახმარება. ამის დასტურად უწყებას ის ფაქტი მოჰყავს, რომ ზოგიერთმა რუსმა სამხედრომ თანამედროვე, დასავლური ტიპის საბრძოლო ტურნიკეტის მოპოვება მოახერხა, თუმცა ეს ტურნიკეტი აღჭურვილობაზე არა მისივე ასაფხრეწი დასაკრავით, არამედ ალუმინის კაბელით მიიმაგრეს.

„სავარაუდოდ, იმიტომ, რომ ასეთი აღჭურვილობა დეფიციტურია, სამაგიეროდ მისი მოპარვაა შესაძლებელი,“ – აღნიშნავს დაზვერვა.

უწყების დასკვნით, სამხედროებში სამედიცინო მომზადების ნაკლებობა ძალიან გაართულებს და თითქმის შეუძლებელს გახდის მათი მხრიდან სათანადო პირველადი დახმარების გაწევას, მაგალითად, ძლიერი სისხლდენის შეჩერებას.

„სამედიცინო უზრუნველყოფის არქონა ხელს შუწყობს სამხედროების მორალური განწყობის დაქვეითებას და შეამცირებს მათ სურვილს, მონაწილეობა მიიღონ შეტევით ოპერაციებში,“ – წერს დაზვერვა.

გაერთიანებული სამეფოს თავდაცვის უწყების გუშინდელი სადაზვერვო ცნობარის თემაც მობილიზაცია იყო. რელიზის თანახმად, იმ ადამიანების რიცხვი, ვინც მობილიზაციისგან თავის არიდების მიზნით რუსეთი დატოვა, სავარაუდოდ, უკვე აღემატება რუსეთის ძალების იმ რაოდენობას, რომელიც კრემლმა 2022 წლის თებერვალში უკრაინაში სამხედრო აგრესიის დასაწყებად გადაისროლა.

რუსეთში მობილიზაციის გამოცხადების შემდეგ, რუსული თუ სხვა წყაროებით უკვე არაერთი ინფორმაცია გავრცელდა იმის შესახებ, რომ მობილიზებულ რეზერვისტებს ფრონტზე ყოველგვარი მომზადების გარეშე გზავნიან.

კერძო სამხედრო დაჯგუფება „ვაგნერის“ მოიერიშე დანაყოფის მეთაური, 41 წლის ალექსეი ნაგინი, მეტსახელად „ტერეკი“, ბახმუტთან 20 სექტემბერს მოკლეს.

ნაგინი რუსეთში რამდენიმე ორდენით იყო დაჯილდოებული – „სიმამაცისთვის“, „ყირიმის დაცვისთვის“. მას სიკვდილის შემდეგ გადასცეს რუსეთის, ასევე დონეცკისა და ლუგანსკის სეპარატისტული რესპუბლიკების გმირის წოდება.

როგორც ინტერნეტრესურსი InformNapalm-ი წერს, „ტერეკი“ უკრაინაში დონბასშიც იბრძოდა, ასევე მონაწილეობდა ბრძოლებში ჩეჩნეთში, საქართველოში, სირიასა და ლიბიაში.

Кавказский Узел-ის ცნობით, ნაგინი დიდი პატივით დაკრძალეს მშობლიურ ვოლგოგრადში, სადაც დაკრძალვის ცერემონიას ოლქის გუბერნატორი და „ვაგნერის“ დამფუძნებელი ოლიგარქი, ევგენი პრიგოჟინი ესწრებოდნენ.

მედიის ინფორმაციით, ალექსეი ნაგინი ევგენი პრიგოჟინთან ერთად არის ავტორი ფილმისა „საუკეთესოები ჯოჯოხეთში“, რომელიც რუსეთმა უკრაინაში „სპეციალურ სამხედრო ოპერაციას“ მიუძღვნა და რომლის ტრეილერიც ტელეკომპანია „კონკორდის“ საიტზე და სოციალურ ქსელებეშია გამოქვეყნებული.

სამხედრო დაჯგუფება „ვაგნერი“, რომელიც დაქირავებული სამხედროებისგან შედგება, უკრაინაში ჯერ კიდევ 2014 წელს გამოჩნდა, როდესაც ის პრორუს სეპარატისტებს ეხმარებოდა.

დაჯგუფება 2015 წლიდან მონაწილეობს სირიის ომში, აქტიურობდნენ მოზამბიკში, სუდანსა და ცენტრალური აფრიკის რესპუბლიკაშიც. 2021 წელს მომზადებულ ჟურნალისტურ გამოძიებაში  BBC აღნიშნავდა, რომ დაჯგუფება ლიბიაში სამხედრო დანაშაულებთან და რუსეთის არმიასთანაა დაკავშირებული. BBC-ის მიხედვით, „ვაგნერი“ ლიბიაში 2019 წელს გამოჩნდა და 2019-2020 წლებში იქ მისი 1 000-მდე წევრი იბრძოდა.

BBC-ის ინფორმაციით, ეს დაჯგუფება ოფიციალურად არ არსებობს, თუმცა 2014 წლამდე დაახლოებით 10 ათას ადამიანს მაინც ჰქონია ერთჯერადი კონტრაქტი „ვაგნერთან”.

უკრაინაში ომის 7 თვის განმავლობაში არაერთი ინფორმაცია გავრცელდა ბრძოლებში დაჯგუფების დანაყოფების ლიკვიდაციისა და მათი სამხედრო შტაბების აფეთქების შესახებ.

ევგენი პრიგოჟინი, რომელიც „ვაგნერის” დამფუძნებელი და ამავე დროს ვლადიმერ პუტინთან დაახლოებული ოლიგარქია, უკრაინაში რუსეთის შეჭრის შემდეგ კრემლის „სამხედრო ოპერაციის“ სახედ იქცა.

მთავარ ფოტოზე: ალექსეი ნაგინი, ფოტო: InformNapalm

რუსეთს ტყვეობიდან გათავისუფლებული „აზოვსტალის“ დამცველების ექსტრადირება სურს. ამის შესახებ დღეს, 29 სექტემბერს, რუსეთის სახელმწიფო სათათბიროს ხელმძღვანელმა, ვიაჩესლავ ვოლოდინმა ისაუბრა.

ვოლოდინის განაცხადებით, აზოვსტალის დამცველებმა, რომლებიც რუსეთის ტყვეობაში იყვნენ და გათავისუფლების შემდეგ თურქეთში იმყოფებიან, პასუხი უნდა აგონ თავიანთ „დანაშაულებზე“.

მოლოდინს რუსული მედია ციტირებს.

აქამდე არსებული ინფორმაციით, „აზოვსტალის“ დამცველები პუტინის ნათლია, მილიარდერ ვიქტორ მედვედჩუკში გაცვალეს. თუმცა, ვოლოდინი ამტკიცებს, რომ ისინი გაათავისუფლეს, როგორც სამხედრო ტყვეები.

ვოლოდინმა დღეს პლენარულ სხდომაზე განაცხადა, რომ „ტერორისტული ორგანიზაციის წევრებმა პასუხი უნდა აგონ თავიანთ დანაშაულებზე“. შეგახსენებთ, რომ „აზოვის პოლკი“, რომელსაც დენის პროკოპენკო მეთაურობს, რუსეთში „ტერორისტულ“ ორგანიზაციად გამოაცხადეს.

„ის, რომ ისინი გაცვალეს და მესამე ქვეყნების ტერიტორიაზე იმყოფებიან, ეს მათ არ ათავისუფლებს პასუხისმგებლობისგან. ახლა საჭიროა იმაზე მუშაობა, ვინ იქნება პასუხისმგებელი მათ ექსტრადირებაზე“, – განაცხადა რუსეთის დუმის თავმჯდომარემ.

მან ასევე განაცხადა, რომ რუსეთს გაცილებით მეტი უკრაინელი ტყვე ჰყავს, ვიდრე რუსები არიან უკრაინის ტყვეობაში. მოლოდინმა თქვა, რომ მათი რაოდენობა ათჯერ მეტია.

ახლახან უკრაინის პრეზიდენტმა, ვოლოდიმირ ზელენსკიმაც განაცხადა, რომ რუსებს მართლაც უფრო მეტი სამხედრო ტყვე ჰყავთ, ვიდრე უკრაინას. თუმცა, უკრაინის შეიარაღებული ძალების კონტრშეტევის დაწყების შემდეგ, მათი რაოდენობა მნიშვნელოვნად გაიზარდა.

___

„აზოვსტალის“ დამცველები რუსეთს ტყვედ 2022 წლის მაისში ჩაბარდნენ. 200-ზე მეტი „აზოვსტალელი“ 21 სექტემბერს გვიან საღამოს გაათავისუფლა რუსეთმა ტყვეობიდან, მათ შორის იყო 5 საბრძოლო მეთაური:

• „აზოვის პოლკის“ მეთაური დენის [რედისი] პროკოპენკო
• „აზოვის პოლკის“ მეთაურის მოადგილე სვიატოსლავ [კალინა] პონომარი
• „აზოვის პოლკის“ უფროსი ოფიცერი ოლეგ ხომენკო
• საზღვაო ქვეითი ჯარის 36-ე ცალკეული ბრიგადის მეთაური სერგეი [ვოლინა] ვოლინსკი
• მე-12 ნაციონალური გვარდიის ბრიგადის მეთაური დენის შლეგა

მეთაურები ომის დასრულებამდე თურქეთში იქნებიან პრეზიდენტ ერდოღანის პირადი მფარველობის ქვეშ.

უკრაინის სამხედრო დაზვერვის ხელმძღვანელმა, კირილ ბუდანოვმა დააზუსტა, რომ ისინი იცხოვრებენ კერძო სახლში. მან ხაზგასმით აღნიშნა, რომ ეს არის არა დაკავების ადგილი, არამედ საცხოვრებელი.