ნეტგაზეთი • RU

საზღვაო აკადემიის რექტორის მოადგილეებმა თანამდებობები დატოვეს

ბათუმის საზღვაო აკადემიის დირექტორის მოადგილეებმა ირაკლი კაცაძემ, აბდულ კახიძემ და მანუჩარ ლორიამ, თანამდებობები დატოვეს.

აკადემიის რექტორის, მურთაზ დევაძის თქმით, მოადგილეების გათავისუფლების მიზეზი, რეორგანიზაციაა.

„რეორგანიზაცია გაკეთდა მთლიანად საზღვაო აკადემიაში, გაუქმდა მოადგილეების შტატი და დაემატა მხოლოდ ვიცე რექტორის შტატი, რომელსაც ქრისტინა ზგოევა უხელმძღვანელებს“-ამბობს „ბათუმელებთან“ საუბარში მურთაზ დევაძე.

თუმცა აბდულ კახიძე ამბობს, რომ მან თანამდებობა უფრო ადრე, საკუთარი განცხადების საფუძველზე დატოვა.

რექტორის თქმით, რეორგანიზაციის მიზანი იყო როგორც საბიუჯეტო თანხების დაზოგვა, ასევე ფაკულტეტებისთვის უფლებების გაზრდა. „უფრო მეტი დამოუკიდებლობა მიეცათ მათ გადაწყვეტილებებში, რომ უფრო მობილურად იმუშაონ“-ამბობს რექტორი.

მისი თქმით, რეორგანიზაციის შედეგად აკადემიაში წელს პირველად შეიქმნა სენატი, რომელიც მხოლოდ არჩეული პროფესორებით დაკომპლექტდება და იმუშავებს სასწავლო მიმართულებით, ხოლო რექტორატი, ფინანსური მიმართულებით იმუშავებს.

„ასევე, აკადემიაში წელს პირველად გაიხსნა მაგისტრატურა ბიზნესის მიმართულებაზე“-გვეუბნება რექტორი.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com