რუსეთში მობილიზებული რუსები ყოველგვარი მომზადების გარეშე, დაუყოვნებლივ გადაჰყავთ ფრონტზე. ინფორმაციას ამის შესახებ რუსული უფლებადამცველი ორგანიზაცია „პირველი დეპარტამენტი“ ავრცელებს.
უფლებადამცველების თქმით, მობილიზებულები „არ მონაწილეობენ წვრთნებში, არ გადიან სამედიცინო კომისიას და რაიმე სახის მომზადებას“.
ორგანიზაციის მიერ მოპოვებულ ვიდეოში, რომელიც უფლებადამცველებმა ორგანიზაციის ტელეგრამ არხით გაავრცელეს, მობილიზებული რუსი ახალგაზრდა კაცი საუბრობს ხერსონში მის მოსალოდნელ ტრანსფერზე – კაცი ამბობს, რომ ვარჯიშებსა და წვრთნებზე ოფიციალურად ეთქვათ უარი.
„სალამი ყველას, ხაზზეა პირველი სატანკო პოლკი. ჩვენ ოფიციალურად გვითხრეს, რომ მოსამზადებელი წვრთნები საომარი მოქმედებების ზონაში გაგზავნამდე არ გვექნება. პოლკის ოფიციალურმა მეთაურებმა დაგვიდასტურეს ეს ინფორმაცია. 29-ში ჩვენ უნდა წარვდგეთ ხერსონში. ამიტომ იფიქრეთ თავად, გადაწყვიტეთ თავად, რა ვუყოთ ამას მომავალში… არანაირი წინარე მომზადება არ არის, არც სროლაში, არც თეორიული მომზადება… არაფერი…“ – ამბობს ვიდეოში რუსი ახალგაზრდა კაცი სამხედრო ფორმაში.
რამდენად მასობრივია ასეთი შემთხვევები უცნობია.
მას შემდეგ, რაც 21 სექტემბერს რუსეთში „ნაწილობრივი მობილიზაცია“ გამოცხადდა, მოქალაქეების დიდი ნაწილი – მრავალათასიანი ნაკადი საქართველოსკენ წამოვიდა. უკვე რამდენიმე დღეა ლარსსა და გამშვებ პუნქტ „ყაზბეგს“ შორის რამდენიმეკილომეტრიანი საცობია.
რუსეთის პრეზიდენტის ადმინისტრაციის, 26 სექტემბრის მონაცემებით, „ნაწილობრივი მობილიზაციის“ გამოცხადების შემდეგ რუსეთი 261-მა ათასმა კაცმა დატოვა.
___
მთავარი ფოტო: რუსი მობილიზებული, რომელიც ამბობს, რომ ყოველგვარი წვრთნების გარეშე გადაჰყავთ ფრონტის ხაზზე.
