უკრაინის პრეზიდენტის ოფისში პირველი კომენტარი გააკეთეს პუტინის გამოსვლაზე, რა დროსაც მან ხერსონის, ზაპოროჟიეს, დონეცკისა და ლუგანსკის ოლქების ანექსიის შესახებ გამოაცხადა.
ვოლოდიმირ ზელენსკის ოფისის ხელმძღვანელი ანდრეი ერმაკი ამბობს, რომ უკრაინა გააგრძელებს დროებით ოკუპირებული ტერიტორიების გათავისუფლებას იმის მიუხედავად, თუ რას გამოაცხადებს რუსეთის დიქტატორი.
„ჩვენ ვმუშაობთ, რომ უკრაინის ტერიტორიები გავათავისუფლოთ. და არ ვაქცევთ ყურადღებას მათ, ვინც ის დროა, წამლების სმა დაიწყოს. არმია მუშაობს, უკრაინა – ერთიანია. მხოლოდ წინ“, – წერს ერმაკი.
„რუსეთში ოთხი ახალი რეგიონია“, – ამ სიტყვებით რუსეთის პრეზიდენტმა, ვლადიმერ პუტინმა, უკრაინის რეგიონების – ხერსონის, ზაპოროჟიეს, დონეცკისა და ლუგანსკის ოლქების ოფიციალური ანექსია კრემლში სიტყვით გამოსვლისას გამოაცხადა.
პუტინის თქმით, ამ ოთხი რეგიონის რუსეთთან მიერთება „მილიონობით ადამიანის ნება“ და „განუყოფელი უფლებაა“.
ანექსიის დოკუმენტი დღესვე ხელმოსაწერად დუმას გადაეცა.
ე.წ. რეფერენდუმებს, რომლებიც აღნიშნულ რეგიონებში რუსეთის მხარდაჭერილმა სეპარატისტულმა ძალებმა ჩაატარეს, არ ცნობს ოფიციალური კიევი და საერთაშორისო საზოგადოება.
უკრაინის პრეზიდენტმა ვოლოდიმირ ზელენსკიმ არაერთი განცხადება გააკეთა იმის შესახებ, რომ ე.წ. რეფერენდუმების ჩატარება რუსეთთან მოლაპარაკების ყველა შესაძლებლობას წერტილს დაუსვამდა.
