Batumelebi

ჩინეთის სახალხო რესპუბლიკაში საქართველოს ელჩი არჩილ კალანდია ჩინეთში მცხოვრებ ქართველებს მიმართავს. ვიდეომიმართვაში ელჩი ამბობს, რომ დღეს ბევრი „დამაიმედებელი გზავნილი“ მიიღო ჩინეთის ხელისუფლებიდან იმის შესახებ, რომ ინფიცირებულების რაოდენობა მალე დასტაბილურდება. თუმცა, ამავე დროს, იგი მიმართვაშივე აღნიშნავს, რომ ვირუსის გავრცელების პიკს თებერვალში ელიან.

„მინდა მივმართო ჩვენს თანამოქალაქეებს ქალაქ უხანში. მე დღეს მქონდა საუბარი ქალაქ უხანის მუნიციპალიტეტთან და ასევე ჩინეთის სხვადასხვა უწყების წარმომადგენლებთან. მინდა დაგარწმუნოთ, რომ ჩინური მხრიდან მიღებული ინფორმაციის თანახმად, ქალაქში არ შეიქმნება არც მედიკამენტების, არც საკვების, არც სასმელი წყლის ან რაიმე სახის დეფიციტი. უხანის მუნიციპალიტეტში გახსნილია შესაბამისი ცხელი ხაზები და ცხადია, ამ ნომრებს მივაწვდით ჩვენს თანამემამულეებს პირად მიმოწერაში და ნებისმიერი პრობლემის ან გართულების შემთხვევაში ოპერატიულად იმოქმედებენ ჩინეთის შესაბამისი სტრუქტურები.

ქალაქ უხანში და მთელი ჩინეთის მასშტაბით ქვეყნის ხელისუფლება ახორციელებს უპრეცედენტო პრევენციის ზომებს. მე დღეს ბევრი დამაიმედებელი გზავნილი მივიღე ჩინეთის ხელისუფლების წარმომადგენლების მხრიდან, რომ უახლოეს პერიოდში დასტაბილურდება ინფიცირებულთა რაოდენობა და ძალიან დიდი იმედი აქვთ იმისი, რომ ძალიან მალე ეს ეპიდემია საბოლოოდ იქნება დამარცხებული. ამისთვის არის საჭირო დრო, სიფრთხილე და მოთმინება“, – განაცხადა ელჩმა.

მისივე თქმით, საქართველოს საელჩოში 24 საათის განმავლობაში ფუნქციონირებს ცხელი ხაზი და საელჩოს თანამშრომლები მუდმივ კონტაქტში არიან ჩინეთში მყოფ საქართველოს მოქალაქეებთან.

„…ყველაფერი ძალიან კარგად იქნება, ამისთვის არის საჭირო სიფრთხილე და მოთმინება. ძალიან გთხოვთ, მაქსიმალურად დაიცვათ თავი ქალაქში გადაადგილების დროს, იარეთ პირბადით, თავი მოარიდეთ საზოგადოებრივი თავშეყრის ადგილებს, ძალიან ხშირად იბანეთ ხელები – ეს არის ის მინიმალური მოთხოვნები, რომელიც არის აუცილებლად შესასრულებელი.

საქართველოდან ბევრი „ფეიქნიუსი“ვრცელდება ჩინეთში მიმდინარე მოვლენებთან დაკავშირებით, შეწუხებული არიან ჩვენი ახლობლები, მეგობრები, ნათესავები  – ეს ბუნებრივია, მაგრამ მთავარია შევინარჩუნოთ სიმშვიდე. საპანიკო ამ ეტაპზე არაფერი არ არის, რთული ვითარებაა, რა თქმა უნდა, ვირუსის გავრცელების პიკს ელოდებიან თებერვალში, მაგრამ ჩვენ თუ შევასრულებთ და დავიცავთ ყველა იმ მოთხოვნებს, ყველაფერი იქნება ძალიან კარგად.

მე მუდმივ კონტაქტში ვარ ყველა სახელმწიფო უწყებასთან როგორც პეკინში, ასევე ქალაქ უხანში. ასე რომ ყველაფერი კარგად იქნება, ვიყოთ ფრთხილად და ვიყოთ თავდაჯერებულები, ამ გამოწვევას ყველანი ერთად გადავლახავთ“, – განაცხადა არჩილ კალანდიამ.

27 იანვრის მონაცემებით, 80 ადამიანი ემსხვერპლა კორონავირუსს, რომელიც ჩინეთიდან, ჰუბეის პროვინციიდან გავრცელდა მსოფლიოს სხვა ქვეყნებში. ჰუბეის პროვინციის ქალაქებში კარანტინია გამოცხადებული, თუმცა ვირუსის შემთხვევები დადასტურდა სხვა ქალაქებშიც.

ამავე თემაზე: 

ყალბი ვებგვერდების შესახებ ინფორმაციას საპენსიო სააგენტო ავრცელებს. სააგენტო მომხმარებელს აფრთხილებს, რომ ეს გვერდები დიზაინით სააგენტოს ოფიციალურ საიტს ჰგავს.

სააგენტოს ინფორმაციით, ყალბ გვერდებზე მომხმარებელს საბანკო ბარათის მონაცემების შეყვანას სთხოვენ, სადაც ასევე აღნიშნულია, რომ ვერიფიკაციისთვის ბარათზე 0,01 თეთრი დაიბლოკება 24 საათით, რომელიც შემდეგ მომხმარებელს უკან დაუბრუნდება.

18 წლის დაქორწინდა, სამი შვილი გააჩინა და ჟურნალისტიკის ფაკულტეტზე სწავლა ვეღარ გააგრძელა. მიუხედავად იმისა, რომ დიპლომი არ აქვს, ორგან მუშაობს: ენების ონლაინშემსწავლელი ერთ-ერთი ყველაზე დიდი ვებპლატფორმის სოციალური მენეჯერია და  საკუთარი ატელიე აქვს, სადაც ძირითადად საბავშვო სამოსს კერავს. იცის ინგლისური, რუსული, ბერძნული, სწავლობს ესპანურს. ამბობს, რომ ენები წიგნებით და სატელევიზიო გადაცემებით ისწავლა. რასაც სწავლობს, შვილებსაც  ასწავლის. ერთადერთი, რასაც ნანობს, არის ის, რომ გიტარაზე დაკვრას ვეღარ ასწავლის მსურველებს და კვარტეტში აღარ მღერის – დრო არ რჩება.

„უნივერსიტეტი ერთადერთი ადგილი არ არის , სადაც განათლების მიღებაა შესაძლებელი”

ია თავდიშვილი 31 წლისაა და როგორც ამბობს, უდიპლომობა მისთვის დაბრკოლებად არასდროს ქცეულა. ამას არც მის თვითშეფასებაზე უმოქმედია.

,,ნაადრევად დავქორწინდი, მაგრამ ძალიან კარგი ოჯახი მყავს, მეუღლე და სამი უსაყვარლესი შვილი. 25 წლამდე დაქორწინება ამ გადმოსახედიდან მაინც დიდი შეცდომა მგონია. თვითრეალიზება არ გამჭირვებია, თუმცა ეს თავისთავად არ მომხდარა. უზომოდ აქტიური ვარ და განვითარება არასდროს შემიწყვეტია, სულ რაღაცას ვსწავლობდი. როცა დავქორწინდით, მე და ჩემი მეუღლე საბერძნეთში გადავედით საცხოვრებლად ორი წლით. რვა თვეში უკვე ისე ვლაპარაკობდი, რომ ბერძნებს იქ დიდი ხნის წინ ჩასული ვეგონე. ეს ცოდნა ძალიან გამომადგა საქართველოში დაბრუნების შემდეგ. ახლა ოზურგეთიდან დისტანციურად ვმუშაობ LINGWING-ის სოციალურ მენეჯერად და ჩვეულებრივ, ანაზღაურებად სამუშაოს ვეწევი. ვფიქრობ, აქტიურობა ძალიან მნიშვნელოვანია ნებისმიერ სიტუაციაში, როგორშიც არ უნდა იყო. მე ასეთი ვარ”.

„მთაშიც რომ ჩამსვან, ჩიტებს და მგლებს დაველაპარაკები”

 „იმიტომ, რომ მიყვარს ადამიანები, სხვებთან ურთიერთობის გარეშე არ შემიძლია. ჩვენი დიდი ოჯახიც ასეთია – ხმაურიანი და მხიარული”, – ამბობს ია. ოზურგეთში ცხოვრობს ოჯახთან ერთად. კერვა რომ კარგად შეეძლო, დედის საკერავ მანქანასთან აღმოაჩინა, მერე პროგრამით – ,,აწარმოე საქართველოში” გრანტი მოიპოვა და ოზურგეთშივე გახსნა ატელიე ბავშვებისთვის. მორიგ კაბას ჭრიდა, როცა დაურეკეს და გაეროს ქალთა ორგანიზაციის სემინარზე მიიწვიეს, არ ელოდა, რომ აარჩევდნენ და უზომოდ გაუხარდა. სემინარი ბიზნესის განვითარებაში დაეხმარა, ახალი სამსახურიც იპოვა და სამომავლოდ სრულიად მოულოდნელი გეგმები დასახა.

            „საჯარო სამსახურში, სადაც დიპლომია საჭირო, არ ვაპირებ დასაქმებას. მირჩევნია, მომავალში კოდები ვწერო HDML-ში და აპლიკაციები შევქმნა IOS და ANDROID სისტემებისთვის”

გაეროს სემინარზე სოციალური მარკეტინგის და ვებპროგრამირების ოთხთთვიანი კურსი გაიარა. საკუთარი ბიზნესგვერდიც გააკეთა, რის შემდეგაც მის ატელიეში შეკერილ საბავშვო სამოსს ახლა მთელ საქართველოში გზავნის, ევროპის რამდენიმე ქვეყნიდანაც იღებს ონლაინშეკვეთებს. იას შეკერილი სამოსის მომხმარებელთა რიცხვი ვებგვერდის დამზადების შემდეგ სამჯერ გაიზარდა.

„ოთხთვიანი ტრენინგის შემდეგ, სხვადასხვა უნარის მიხედვით, სტაჟირების პროგრამაც დაგვიმატეს, ორმოც საუკეთესო სტაჟიორში აღმოვჩნდი და ასე გავიგე  სტარტაპ LINGWING-ის შესახებ, სადაც დისტანციურად შეგიძლია ისწავლო ენა. პლატფორმას უკვე 170 ათასი მომხმარებელი ჰყავს და სწორედ მეც აქ დამასაქმეს . სტაჟირების შემდეგ, გარდა დასაქმებისა, ლისაბონის მსოფლიოს ყველაზე დიდ ვებსემინარზეც გაგვგზავნეს, სადაც უამრავი სტარტაპერი ქალი გავიცანით. ისინი საკუთარი ბიზნესის განვითარების სხვადასხვა ეტაპზე საუბრობდნენ და ამომწურავად გვიზიარებდნენ გამოცდილებას. ეს ბევრისმომცემი იყო ჩემთვის, დავამყარეთ ძალიან მნიშვნელოვანი კავშირები და ბევრი რამ გავიგეთ”, – ამბობს ია. მომავალში გეგმავს, რომ კოდები დაწეროს HDML-ში და IOS და ANDROID სისტემებისთვის აპლიკაციები შექმნას.

„მხოლოდ სურვილი და ენთუზიაზმი არ კმარა, ოჯახში მხარს უნდა გიჭერდნენ”

ფიქრობს, რომ მისი წინსვლა პირდაპირაა ოჯახთან დაკავშირებული. იხსენებს, როგორ გაუფუჭდა გაეროს სემინარის დაწყებამდე რამდენიმე დღით ადრე ლეპტოპი, რის გარეშეც ვერაფერს გააკეთებდა, მეუღლემ კი სემინარის დაწყების დღეს ყველა საჭირო პროგრამით გამართული ახალი მაკბუქი აჩუქა, დავალებების შესრულება რომ შეძლებოდა.

„ჩემი მეუღლე გერმანიაში მუშაობდა, ქარხანაში. ჩადიოდა და ჩამოდიოდა. მე რომ სემინარებზე მევლო, მუშაობას თავი დაანება და ბავშვებს უვლიდა მთელი დღე. ესმოდა, რომ ეს ჩემი ცხოვრების უმნიშვნელოვანესი ეტაპი იყო და იცოდა, რამდენად მნიშვნელოვანი იყო  მესწავლა რაღაც ახალი. საღამოს, როცა 6 საათზე დაღლილი მოვდიოდი და უამრავი დავალების შესრულება მიწევდა, ხანდახან ღამის 4 საათამდეც, ბავშვებს მარიდებდა, დედას აცალეთო. ამას რომ გეუბნებით, ის გოგოც მახსენდება, რომელსაც შეიძლება ჩემზე უკეთესი უნარებიც ჰქონდა, მაგრამ სემინარზე ვერ იარა. ქმარმა აღარ გამოუშვა და ვინ იცის ამით რა შესაძლებლობა დაკარგა, ამ შემთხვევაში მე გამიმართლა, სხვაგვარად არაფერი გამოვიდოდა”, – ამბობს ია.

აჭარის ფინანსთა და ეკონომიკის მინისტრის მოადგილე, არჩილ ვანაძე, მოსამართლე დავით მამისეიშვილმა უდანაშაულოდ მიიჩნია და სასამართლო დარბაზიდან გაათავისუფლა. არჩილ ვანაძე ერთ-ერთი ფიგურანტი იყო ბათუმელი მაღალჩინოსნების საქმეში.

ბათუმის ყოფილი მერი, გიორგი ერმაკოვი და კიდევ 6 მაღალჩინოსანი, მათ შორის, არჩილ ვანაძე, გასული წლის 30 მაისს დააკავეს.

არჩილ ვანაძე აქამდეც იყო დაკავებული. მას 2017 წელს „ჟილინის არხის საქმეზე“ გამოძიება სამსახურებრივ გულგრილობას ედავებოდა. მოსამართლე თამარ ბეჟანიშვილმა 2018 წელს არჩილ ვანაძე უდანაშაულოდ მიიჩნია.

გაეროს ბავშვთა ფონდი საქართველოში [Unicef Georgia] 0-5 წლამდე ასაკის ბავშვების ნუტრიციულ სტატუსს აქვეყნებს.

აღნიშნული ინფორმაციის მიხედვით, საქართველოში 5 წლამდე ბავშვების 6%-ს ჭარბი წონა აქვს, ასევე 6%-ს აქვს ზომიერად ან მკვეთრად გამოხატული ჩამორჩენა სიმაღლეში.

2 პროცენტს აქვს ზომიერად ან მკვეთრად გამოხატული წონის დეფიციტი, ბავშვების 1 პროცენტს კი აღენიშნება წონაში ზომიერად ან მკვეთრად გამოხატული გამოფიტვა.

ბავშვების უმეტესობა (5%), რომლებსაც აქვთ წონის დეფიციტი და გამოფიტვა, არიან 0-5 თვის ასაკის.

ასევე მაღალია (8%) ბავშვების სიმაღლეში ჩამორჩენის მაჩვენებელი 24-35 თვის ბავშვებში.

იხილეთ ინფოგრაფიკა:

ეს აღმოსავლეთკავკასიური ჯიხვი ლაგოდეხის დაცულ ტერიტორიებზე გადაიღო ფოტოხაფანგმა. აღმოსავლეთკავკასიური ჯიხვი „წითელ ნუსხაშია“ შეტანილი, როგორც იშვიათი და გადაშენების პირას მყოფი სახეობა.

დღეს, 26 იანვარს, ბათუმში საპროტესტო აქცია გაიმართა რივიერას გადასარჩენად.

ბათუმში, იახტკლუბისა და ჭაჭის კოშკის მიმდებარედ, შპს „ბათუმი რივიერა“ გეგმავს სამშენებლო პროექტის განხორციელებას, რომელიც 5 მაღალ შენობას მოიცავს. ბათუმელი აქტივისტები ამ მშენებლობას იმ მოტივით ეწინააღმდეგებიან, რომ მაღლივი შენობების აშენების შემთხვევაში შეიცვლება ისტორიული ქალაქის იერსახე. ბათუმში რივიერას დასაცავად არაერთი აქცია გაიმართა.

„დღეს აქციის ორგანიზატორები ვართ სამი მოძრაობა: „მწვანე მომავალი“, „ახალგაზრდა მწვანეები“ და საზოგადოება „ბათომი“. შევიკრიბეთ იმისთვის, რომ ბათუმის ისტორიული მწვანე კონცხი გადავარჩინოთ და გავხადოთ ისევ საჯარო საკუთრებად, მოქალაქეების საკუთრებად, სადაც იქნება ხეები და სიმწვანე და არა საზარელი ცათამბჯენები და კაზინოები,“ – განაცხადა თამარ ჯაყელმა, „ახალგაზრდა მწვანეების“ წევრმა.

აქციაზე რამდენიმე ათეული ადამიანი შეიკრიბა. მათ შორის იყო ბათუმელი თეონა დიასამიძე, რომელმაც აღნიშნა, რომ ამ ბრძოლას აზრი აქვს და სწორედ მსგავსი ბრძოლის შედეგად მოხერხდა ბათუმის ბულვარისა და „რვაფეხას“ გადარჩენა. თეონა აქციაზე შვილებთან ერთად მივიდა:

„მეორე შვილიც თან მახლავს, მაგრამ ის მზეს ეფიცხება, სწორედ იმიტომ, რომ არასწორი გადაწყვეტილების გამო დღეს ჩვენ ეს შენობა მზეს გვიფარავს [ბათუმის ისტორიული ფოსტის ადგილას აგებული სასტუმრო]. იმავე გადაწყვეტილებით, რასაც რივიერას პროექტი ჰქვია, ჩვენ მალე ზღვასაც ვეღარ დავინახავთ. ჩემი მეგობრები მეუბნებოდნენ, აქვს თუ არა ბრძოლას აზრი. ბრძოლას აქვს აზრი, მე ჩემს შვილთან, თქვენთან, ბათუმელებთან ერთად გადავარჩინე რვაფეხა და ბულვარი და ახლა ჩვენ ერთად შევძლებთ გადავარჩინოთ რივიერა“.

აქციას შეუერთდა სამოქალაქო აქტივისტი და იურისტი ირაკლი კუპრაძე, „ლელოს“ წევრი.

„ქალაქში უნდა იყოს ორგანული სივრცეები, მორგებული ბათუმელებზე, პირველ რიგში, ისე იყოს გადაწყვეტილი, როგორც მიაჩნიათ სწორად ეს ბათუმელებს და არა საკრებულოში მოკალათებულ ადამიანებს, რომლებიც ყველა ბოროტებას აწერენ ხელს. რივიერა არის ერთადერთი ფანჯარა და ბოლო შანსი.  ჩვენ გვაქვს დასამტკიცებელი, რომ ამ ქალაქში ყველაფერს წყვეტენ ბათუმელები და არა ადამიანები, რომლებიც ემსახურებიან კერძო ინტერესებს, ემსახურებიან ადამიანებს, რომლებიც ფიქრობენ, რაც შეიძლება მეტი ფული წაიღონ ამ ქალაქიდან,“ – განაცხადა ირაკლი კუპრაძემ.

ევროპის მოედანზე აქციის შემდეგ აქტივისტები რივიერას შემოსაზღვრული ტერიტორიისკენ გაეშურნენ მსვლელობით.

„ვისია ეს ქალაქი?“ – სკანდირებდნენ აქციის მონაწილეები.

რივიერას თუნუქით შემოსაზღვრულ კედელზე აქციის მონაწილეებმა წარწერები დატოვეს, თუნუქზე „ხორუმი“ „დაუკრეს“ და ასე გააპროტესტეს პროექტი, რომლის ფარგლებშიც ამ ტერიტორიაზე ხუთი ცათამბჯენის აგება იგეგმება.

„ისინი, ვინც აქ აშენებენ შენობებს, არ აპირებენ ამ ქალაქში ცხოვრებას. ჩვენ ვრჩებით ამ ქალაქში“ – განაცხადა სალომე ცეცხლაძემ, აქციის მონაწილემ.

აქციაზე ასევე ითქვა, რომ 9 თებერვალს რივიერას პროექტს ბათუმში მთავრობის სახლთან გააპროტესტებენ.

პროექტი „ბათუმი რივიერა“ დაახლოებით ცხრა ჰექტრამდე ტერიტორიას მოიცავს. საჯარო რეესტრის მონაცემებით, აქედან  59 042 კვ/მ ტერიტორია უშუალოდ „სილქ როუდის“ საკუთრებაშია, 923 კვ/მ ნავსაყუდელის ნაგებობა და იქვე არსებული 8 533 კვ/მ მიწის ნაკვეთი 20-წლიანი იჯარით აქვს აღებული კომპანიას, 10 226 კვ/მ ტერიტორია აჭარის საკუთრებაშია, ხოლო 8 631 კვ/მ ბათუმის მუნიციპალიტეტის [ჭაჭის თაუერი] საკუთრებაა.

XXI საუკუნის ბათუმში ყველაზე უხვთოვლიანი დღე 2016 წლის 26 იანვარს იყო, როცა ბათუმში ბოლო 30 წლის მანძილზე ყველაზე დიდი თოვლი მოვიდა და თოვლის საფარის სიმაღლემ 60-80 სანტიმეტრს მიაღწია.

დიდთოვლობის შედეგად ბათუმი პარალიზებული იყო. ქალაქში მუნიციპალური ტრანსპორტი მხოლოდ რამდენიმე ხაზზე მუშაობდა, ისიც შეზღუდვებით. უგზოობის გამო სასწრაფო სამედიცინო დახმარების სამსახური ყველა გამოძახებაზე რეაგირებას ვერ ახერხებდა.

მაღაზიებში ვერ მოხერხდა პურის შეტანა, ამიტომაც ზოგიერთ მაღაზიასთან და პურის საცხობებთან რიგები გაჩნდა. შეწყდა სასწავლო პროცესი სკოლებსა და საბავშვო ბაღებში. ქალაქში გადაადგილება, ძირითადად, მხოლოდ ფეხით იყო შესაძლებელი. აჭარის სამაშველო სამსახურში ამ დღეს 150-მდე ზარი შევიდა.

თუ გაინტერესებთ, კიდევ რომელ წლებში იყო ბათუმის ისტორიაში დიდთოვლობა, ნახეთ სტატია:

ძველი საახალწლო ამბები არასაახალწლო ფინალებით

See more

ბათუმში, ბესიკისა და ლუკა ასათიანის ქუჩების კვეთაში მდებარე მირქმის ტაძარი გაქურდეს, კერძოდ გატეხეს სასანთლე, რომელიც ტაძრის შესასვლელში მდებარეობს.

„ბათუმელების“ ინფორმაციით, სასანთლიდან წაღებულია ასამდე ლარი.

შს სამინისტროს ინფორმაციით, გამოძიება დაწყებულია სისხლის სამართლის კოდექსის 177-ე მუხლით, რაც ქურდობას გულისხმობს.

ბათუმში, ჯავახიშვილის ქუჩა, გორგილაძისა და აბუსერიძის ქუჩებს შორის მონაკვეთში მთლიანად გადაკეტილია. დღეს, 25 იანვარს, გადაიკეტა ჯავახიშვილის ქუჩა ფიროსმანისა და გორგასლის ქუჩებს შორის.

შესაბამისად, ფიროსმანის ქუჩით მოძრავი ავტომობილები ჯავახიშვილის ქუჩიდან ვერც გორგილაძის და ვერც გორგასლის ქუჩაზე გავლენ. ჯავახიშვილის ქუჩაზე ვერ გამოვლენ ავტომობილები გორგასლის ქუჩის ბოლოდანაც.

ადგილზე მომუშავეთა თქმით, ეს მონაკვეთი 2-3 თვით გადაიკეტა, თუმცა ზუსტი დრო, როდის დასრულდება სამუშაოები, უცნობია.

ბათუმის მერიის მიერ ადრე გავრცელებული ინფორმაციით,  გორგილაძისა და ვახტანგ გორგასლის ქუჩებს შორის არსებულ მონაკვეთში ტრანსპორტის მოძრაობა 45 დღის განმავლობაში შეიზღუდება.

თუმცა ჯავახიშვილის ქუჩის მონაკვეთი – გორგასლისა და აბუსერიძის ქუჩებს შორის 2019 წლის ივნისში გადაიკეტა და სამუშაოები, ბათუმის მერიის მაშინდელი განცხადებით, სამ თვეში ანუ ოქტომბრამდე უნდა დასრულებულიყო, თუმცა აღნიშნული სამუშაოები უკვე მეშვიდე თვეა გრძელდება.

საავტომობილო გზის ჩაკეტვა ჯავახიშვილის სანიაღვრე არხის სარეაბილიტაციო სამუშაოებს უკავშირდება. ეს არხი არდაგანის ტბასთან მშენებარე სატუმბ სადგურს უნდა დაუკავშირდეს.

ჯავახიშვილის ქუჩის ამ მონაკვეთში სამუშაოების დაწყებისას ბათუმის მერიაში ვერ დაგვიკონკრეტეს, სრულად როდის აღდგებოდა საავტომობილო მოძრაობა ჯავახიშვილის ქუჩაზე.

„სამუშაოები ამ ქუჩაზე, არსებული გეგმა-პროექტით, 2020 წლის მარტში უნდა დასრულდეს“, – გვითხრეს მაშინ მერიაში. ამ დროისთვის უნდა დასრულდეს სატუმბი სადგურის მშენებლობაც არდაგანის ტბასთან.

თურქული მედია ქალაქ ელაზიღში მომხდარი 6.8 მაგნიტუდის სიმძლავრის მიწისძვრის მიწისქვეშა ბიძგების ხმის ჩანაწერს ავრცელებს. მედიის ცნობით, მიწისქვეშა ბიძგების ჩაწერა შეძლო ამერიკული უნივერსიტეტის კონსორციუმმა, რომელიც მიწისქვეშა ქანებს იკვლევს. უნივერსიტეტმა ჩანაწერი თავის ვებგვერდზე გამოაქვეყნა.

თურქეთში წუხელ მომხდარი მიწისძვრის შედეგად 22 ადამიანი დაიღუპა და 1000-ზე მეტი დაშავდა. თურქული მედიის ცნობითვე, ქალაქ ელაზიღთან არსებული ერთ-ერთი სოფელი მთლიანად დაინგრა. მიწისძვრის შედეგად ყველაზე დიდი ზიანი სწორედ ამ სოფელმა განიცადა.

„ბათუმელების“ ინფორმაციით, რასაც არაერთი პირი ადასტურებს, ახალი წლიდან ექთნებს ხელფასები შეუმცირეს. ექთნები სხვადასხვა კლინიკიდან ამბობენ, რომ ადმინისტრაცია მათ შეხვდა და მიუთითა ხელფასების შემცირების მიზეზზე – „მთავრობის 520-ე დადგენილებაზე“. სწორედ ამ დადგენილებას უკავშირებენ კლინიკები შემოსავლების შემცირებას, რაც, თავის მხრივ, სამედიცინო სერვისების ფასების შემცირებას უკავშირდება.

რამდენიმე კლინიკის ექთნების თქმით, მათ ადმინისტრაცია უკვე ესაუბრა და ხშირ შემთხვევაში ხელიც მოაწერინეს ახალ ხელშეკრულებას, რომლითაც ხელფასები დააკლდათ.

მაგალითად, ბათუმში არსებულ კლინიკა „ბაუში“ რამდენიმე ექთანთან გასაუბრების შემდეგ გავარკვიეთ, რომ მათ მოაწერეს ხელშეკრულებას ხელი, რომლის მიხედვითაც ხელფასი 12%-ით შეუმცირდათ.

ხელფასის შემცირებაზე გვითხრეს კლინიკა „მედინაშიც“. ამ კლინიკაში ექთნები გააფრთხილეს, რომ ახალ პირობებში მოუწევთ მუშაობა და ეს „ახალი პირობები“ ითვალისწინებს ანაზღაურების შემცირებასაც. ჯერ მათთვის უცნობია, რამდენი პროცენტით შეუცირებენ ხელფასს.

კიდევ ერთი კლინიკის – ბათუმის „ევექსის“ ექთნებისთვის, ჯერჯერობით, ადმინისტრაციას არაფერი უთქვამს ხელფასის შემცირებაზე და ისინი მხოლოდ ხელფასის დაგვიანებით ჩარიცხვაზე გააფრთხილეს. ამ დაწესებულების პრესცენტრში კი  ირწმუნებიან, რომ ექთნების ხელფასების შემცირება არ იგეგმება. „დაბეჯითებით შემიძლია გითხრათ, რომ [ექთნების] ხელფასები არ შემცირებულა, ძველ სახელფასო სარგოზე აგრძელებენ მუშაობას“, – აცხადებენ დაწესებულების პრესცენტრში.

„ბათუმელებმა“ უშუალოდ რამდენიმე კლინიკის ადმინისტრაციას ჰკითხა, რით არის გამოწვეული ექთნებისთვის ხელფასების შემცირება, მაგრამ მათ მიზეზებზე საუბარი არ სურთ.

საერთაშორისო ჰოსპიტალ „ბაუში“ კი ჩვენს კითხვებზე გვიპასუხეს მოკლედ და წერილობით.

„520-ე დადგენილების ამოქმედების შემდეგ, საშუალოდ 20 პროცენტამდე შემცირდა სამედიცინო სერვისების ფასები. შექმნილი სიტუაციიდან გამომდინარე, იმისათვის, რომ გაკოტრების მდგომარეობაში არ აღმოჩნდეს,  საერთაშორისო ჰოსპიტალი ბაუ იძულებულია გაატაროს გარკვეული ღონისძიებები“, – მოგვწერეს „ბაუდან“.

სამედიცინო დაწესებულება „მედინაში“ კითხვებზე პასუხისთვის ვერ მოიცალეს, ბათუმში „მედალფას“ კლინიკის ხელმძღვანელი ლევან ანთაძე კი ამბობს, რომ ეს ცვლილება ნებისმიერი კლინიკის საქმიანობაზე მოახდენს უარყოფით გავლენას და მათ შორის „მედალფაზეც“:

„ჩვენ რაც პირდაპირ შეგვეხო, ეს არის რეანიმაცია, რომლის კოდებიც შემცირდა, რაც აქამდეც არ იყო საკმარისი. ასევე შემცირდა ნევროლოგიის კოდები. საბოლოო ჯამში, რა თქმა უნდა, შემცირდება ხელფასები. ფინანსური წყარო როცა მცირდება, ეს მოსალოდნელია“.

ლევან ანთაძის შეფასებით, 520-ე დადგენილება რეანიმაციული განყოფილების გარდა მნიშვნელოვნად შეეხო ნევროლოგიას და კარდიოლოგიას. „როცა სასიცოცხლო ფუნქცია მოშლილი ჰქონდა ადამიანს [აპარატზე შეერთება], ბათუმში ერთი დღე-ღამე ღირდა 500 ლარი. მაშინ, როცა უფრო მეტი სჭირდებოდა, შეამცირეს და 440 ლარი გახადეს. ერთი დღის ღირებულება რომ შემცირდა, სამედიცინო კუთხით რაც გამოსაყენებელია – კვლევა, მედიკამენტი, ის ხარჯიც შემცირდება. ექიმი იძულებული იქნება, ნაკლები კვლევა ჩაატაროს და კარგხანს იფიქროს, სანამ მედიკამენტს დანიშნავს.

ეს ჩვენ არ გვეხება, მაგრამ განსაკუთრებით კარდიოლოგია შეზღუდეს… რეალურად ის დაავადებები შეამცირეს [დაფინანსება], რასაც დიდი ფინანსური რესურსი სჭირდებოდა. სამინისტროს, მოყოლებული 2014 წლიდან, ყოველდღიური გადახარჯვა ჰქონდა და მარტივი გზა მონახა – ფინანსურად რესურსტევადი დაავადებები [დაფინანსება] შეამცირა“.

ლევან ანთაძის ინფორმაციით, მთავრობის 520-ე დადგენილებაზე, რაც ჯანდაცვის ახალი მინისტრის, ეკატერინე ტიკარაძის პირობებში მიიღეს, კონსულტაციები სამინისტროსა და კლინიკებს შორის ჯერ კიდევ გრძელდება:

„მიდის მოლაპარაკება, რომ ეს გასწორდეს. სამედიცინო სერვისის მიმწოდებლები თავისას ითხოვენ, სამინისტრო    – თავისას. როგორც ვიცი, დათმობებზე აპირებენ წასვლას. იგივე რეანიმაციაში, რთული შემთხვევების ცალკე კვოტად გამოტანას აპირებენ, ცალკე დაფინანსების გამოყოფას.

როგორც ვიცი, დათმობებზე აპირებენ წასვლას კარდიოქირურგიაშიც. მნიშვნელოვანი ისაა, რომ როცა ნაკლებია დაფინანსება, ხარისხი ფუჭდება. გაჭირდება ინოვაციური ოპერაციები, რაც ტარდებოდა კარდიოქირურგიაში“.

ექთნები საქართველოში ერთ-ერთი ყველაზე დაბალანაზღაურებადი ჯგუფია და ზოგ შემთხვევაში, მათი შემოსავალი საარსებო მინიმუმსაც ვერ აღწევს. საქსტატის გაანგარიშებით, საშუალო მომხმარებლის საარსებო მინიმუმი, 2019 წლის მარტის მონაცემებით, 160 ლარი და 50 თეთრია.

___

ამავე თემაზე:

https://netgazeti.ge/news/408446/

„ბალნეოლოგიური ცენტრი“, რომელსაც შპს „ამბასადორი ბათუმი“ ბულვარში აშენებს, მომავალში შესაძლოა სასტუმროდ იქცეს. ძეგლების დამცველები მიიჩნევენ, რომ კომპანია სწორედ სასტუმროს ნომრების შექმნაზეა ორიენტირებული და ნებართვა სამკურნალო დაწესებულებისთვის  მხოლოდ იმიტომ მოითხოვა, რომ ასე მისი მიღება გაუადვილდებოდა. ბულვარში სასტუმროს მშენებლობა კანონით დაუშვებელია. რა ინფორმაცია მიაწოდა კომპანიამ აჭარის კმდ-ს ძეგლების საბჭოს, როცა პროექტის სიმაღლის 15-სართულამდე გაზრდა მოითხოვა? – ამ თემაზე საბჭოს წევრს, ნინო ინაიშვილს ვკითხეთ.

• ქალბატონო ნინო, კომპანია ამტკიცებს, რომ აშენებს ბალნეოლოგიურ ცენტრს. თქვენ ამბობთ, რომ ბულვარში სურთ სასტუმროს აშენება. თქვენ, როგორც საბჭოს წევრს, რა ინფორმაცია გაქვთ?

ეჭვიც არ მეპარება, რომ სასტუმროს აშენება სურთ, რაც არც დაუმალავთ (ეს ცხადზე ცხადია, ამას ვერ დამალავ), კომპანიის მხრიდან საუბარი იყო ნომრებზე, აპარტამენტებზე. მხოლოდ იმით დაგვამშვიდეს, რომ აპარტამენტებს ბინებად არ გაყიდიან (ყოველ შემთხვევაში, დღეს ამას აცხადებენ). სასტუმროს გამო უნდათ 15–სართულიანი შენობა და იგონებენ რაღაცეებს (მაგალითად, შადრევნიანი ნაგებობა ან გოგირდოვანი წყლები, რაც სრული აბსურდია ამ გეოლოგიურ გარემოში) ამ ყველაფრით უნდათ შეფუთონ სასტუმროს იდეა, რომ როგორმე მიიღონ ნებართვა. ჩემთვის სწორედ ეს არის საგანგაშო – სასტუმროს მშენებლობა ისტორიული ბულვარის საზღვრებში, როგორი გენიალური არქიტექტურაც არ უნდა შემოგვთავაზონ. ეს ქანდაკების დადგმა ხომ არ არის, სასტუმროს სხვა ინფრასტრუქტურა სჭირდება, მაგალითად პარკინგი. ამიტომ კულტურული მემკვიდრეობის საბჭოს წევრებს ემსჯელათ არა შემოთავაზებული პროექტის არქიტექტურულ იერ–სახეზე, არამედ იმაზე, თუ რამდენად მიზანშეწონილია ამ ადგილას (ბულვარის ცენტრალურ ნაწილში) სასტუმროს წამოჭიმვა.  ამიტომაც ძალიან სამწუხაროა, რომ კულტურული მემკვიდრეობის საბჭოს წევრთა თითქმის  უმრავლესობა იწონებდა პროექტს, რომელიც ეწინააღმდეგება ბულვარის, როგორც ისტორიული ძეგლის და მისი ღირებულებების დაცვის ელემენტარულ პრინციპებს.

ამ ადგილას სასტუმროს მშენებლობის პროექტი 3–4 წლის წინაც იყო შემოსული საბჭოზე. მაშინ რა მოხდა?

მაშინ უცხოელი მეპატრონე ჰყავდა, მაგრამ რადგან ვერ მიიღო თანხმობა, როგორც ჩანს, გაყიდა და ახლა სხვა მეპატრონე ჰყავს. ბოლო პროექტი, რომელსაც საბჭომ მხარი დაუჭირა ითვალისწინებდა არა სასტუმროს, არამედ საზოგადოებრივი დანიშნულების ნაგებობის (4–სართულიანი) აგებას საცურაო აუზებით და სხვა  გამაჯანსაღებელი სერვისებით, რაც ბულვარში ტრადიციულად არსებობდა და ჩვენ ამ პროექტს მხარი დავუჭირეთ.

მაგრამ ბულვარის ტერიტორიაზე სასტუმროს მშენებლობის ცუდი პრეცენდენტიც ხომ გვაქვს – მერიდიენს ვგულისხმობ. სახელმწიფომ ბულვარის ცენტრალური შესასვლელის ის ნაწილი (ყოფილი ტექნოლოგიურის ტერიტორია) სადაც მერიდიენია განლაგებული, ბულვარის საზღვრებიდან ამოიღო და გასცა მშენებლობის ნებართვა. ახლა ამბასადორმა მოინდომა სასტუმროს მშენებლობა, მერე სხვებიც იტყვიან, ჩვენ ვისზე ნაკლები ვართო და ასე გაგრძელდება, ვიდრე ბულვარიდან აღარაფერი არ დარჩება. ეს ყველაფერი სახელმწიფოს არასწორი პოლიტიკის შედეგია. არ შეიძლება ასეთი პრეცენდენტების დაშვება.

• როგორ გაგრძელებას ელოდებით?

კომპანია გამოიყენებს თავის გავლენებს და დაიწყებს ამ საქმის მოგვარებას უფრო ზემოთ, ცენტრალურ ხელისუფლებაში. დარწმუნებული ვარ, მერიდიენის მაგალითს მიბაძავს და ეროვნულ სააგენტოს მოსთხოვს ამ ტერიტორიის ბულვარის საზღვრებიდან ამოღებას. ვნახოთ, როგორ განვითარდება მოვლენები. ძალიან სწორი იყო თორნიკე რიჟვაძის [აჭარის მთავრობის თავმჯდომარე] პოზიცია, როცა თქვა – უნდა აშენდეს უკვე შეთანხმებული პროექტის შესაბამისად. ვნახოთ, თუ შეძლებს ამ პოზიციის ბოლომდე დაცვას. ასევე, ძალიან სწორი და კარგი ნაბიჯი იყო აჭარის მთავრობის მხრიდან ბულვარის განვითარების კონცეფციაზე  და განაშენიანების რეგულირების გეგმაზე მუშაობის დაწყება, რისთვისაც გამოიყო თანხები სახელმწიფოს მხრიდან. ეს არის ძალიან დადებითი მოვლენა. დიდი იმედი მაქვს, რომ როცა გვექნება (2020–ის სექტემბრისთვის) ბულვარის განვითარების დოკუმენტი (ხედვა იმისა, თუ რა არის დასაცავი ღირებულება და როგორ შეიძლება მისი განვითარება), ბულვარში მსგავსი სამშენებლო პროექტების გამო ვნებათაღელვა აღარ მოგვიწევს. თუმცა ბათუმლებს, ვისთვისაც ძვირფასია ბულვარი, როგორც ბათუმის იდენტობის გამოხატულება, მოვუწოდებ, რომ ძალიან ფხიზლად ვიყოთ.