ოცნების ქალაქის მცხოვრებლები აჭარის მთავრობასთან საპროტესტო აქციას გამართავენ

„ოცნების ქალაქის“ მცხოვრებლები 2 ნოემბერს აჭარის მთავრობის სახლის წინ საპროტესტო აქციას გამართავენ, რადგან, მათი განცხადებით, მთავრობა „ოცნების ქალაქში“ საცხოვრებელი კორპუსების მშენებლობას აგვიანებს. გარდა ამისა, აქ მცხოვრები მოსახლეობა ითხოვს, რომ მშენებლობის დაწყებამდე მთავრობამ „ოცნების ქალაქში“ აუცილებელი ინფრასტრუქტურული პრობლემები მოაგვაროს.

„ხელისუფლების გადადებულმა საქმეებმა ეჭვი გაუჩინა მოსახლეობას, რადგან გაჭიანურდა როგორც აღწერის პროცესი, ასევე მშენებლობის დაწყებაც. პროექტი მოიტანეს, სადაც არც ვადებია მითითებული და არც იმაზე გვაქვს ინფორმაცია, მშენებლობა სამივე დასახლებას შეეხება თუ არა“, – ამბობს აქ მცხოვრები მარინა ბერიძე.

მისი თქმით, მოსახლეობა კორპუსების მშენებლობის დაწყებამდე „ოცნების ქალაქში“ აუცილებელი პრობლემების მოგვარებას ითხოვს.

„სამანქანე გზებზე საშინელი მდგომარეობაა, ოთახებში შეუვიდა მოსახლეობას წყალი, ელექტროსადენები ძალიან ცუდ მდგომარეობაშია და არ გამოიცვალა, 12 ქოხი დაიწვა უკვე და ალბათ  22 კიდევ დაიწვება. საჭიროა გარეგანათება, რომელსაც შვიდი წელია ვითხოვთ, რადგან ვიძახებთ სასწრაფო დახმარებას, სიბნელის გამო ექიმი ვერ მოდის პაციენტამდე“, – ამბობს მარინა ბერიძე.

მისი თქმით, მოსახლეობა ითხოვს ინფორმაციას კატეგორიებთან დაკავშირებით, რის საფუძველზეც შეასახლებენ მათ კორპუსებში.

„ასევე გვინდა ხელშეუხებლობის გარანტია, რადგან 580 ბინა რომ აშენდება, შესაძლოა მშენებლობა გააჩერონ. ამიტომ ზუსტად უნდა ვიცოდეთ, რომელი კატეგორია შევა პირველ ეტაპზე აშენებულ ბინებში, ხოლო ვინც დარჩება, მათ სჭირდებათ  ხელშეუხებლობის გარანტიები“, – ამბობს ბერიძე.

საპროტესტო აქცია მთავრობის სახლთან ხვალ, 16:00 საათზე გაიმართება.