დღეს, 30 მაისს, პროკურატურამ ბათუმის მერიის მოქმედი და ყოფილი 7 მაღალჩინოსანი ერთდროულად დააკავა. აჭარის მთავარმა პროკურორმა, ნათია სონღულაშვილმა ბრიფინგი მოაწყო და თქვა, რომ მაღალჩინოსნების დაკავება 2015 წელს ჩატარებულ იმ ტენდერს უკავშირდება, რომლითაც ბათუმში „იაფი სახლი“ უნდა აშენებულიყო.
დაკავებულებს ჯერ არ შეხვედრიან ადვოკატები. უცნობია, აღიარებენ თუ არა ისინი წარდგენილ ბრალს. დაკავებული მაღალჩინოსნები ამ დროისთვის წინასწარი დაკავების იზოლატორში იმყოფებიან.
პროკურატურამ 7 მაღალჩინოსანი სისხლის სამართლის კოდექსის 182 მუხლის მეორე და მესამე ნაწილების, ასევე 332-ე მუხლის პირველი ნაწილის მიხედვით, სასამართლოს განჩინების საფუძველზე დააკავა. 182-ე მუხლი მითვისებას, ან გაფლანგვას გულისხმობს. პროკურატურა მაღალჩინოსნებს „მძიმე შედეგის“ დადგომას ედავება, რაც 7-დან 11 წლამდე თავისუფლების აღკვეთას ითვალისწინებს. 332-ე მუხლი კი სამსახურებრივი უფლებამოსილების ბოროტად გამოყენებისთვის ითვალისწინებს ასევე თავისუფლების აღკვეთა სამი წლის ვადით.
პროკურატურის ინფორმააცით, „იაფი სახლის“ ტენდერის შედეგად 1 მილიონ 370 ათასი ლარი გაიფლანგა ბიუჯეტიდან.
დაკავებულები არიან: ბათუმის ყოფილი მერი გიორგი ერმაკოვი, აჭარის განათლებისა და კულტურის მინისტრის მოადგილე ბაგრატ მანველიძე [ის სადავო ტენდერის ჩატარების დროს ბათუმის ვიცე-მერი იყო და სატენდერო კომისიის თავმჯდომარე]; აჭარის ფინანსთა და ეკონომიკის მინისტრის მოადგილე არჩილ ვანაძე [ბათუმის მერიის საფინანსო სამსახურს ხელმძღვანელობდა], ბათუმის ვიცე-მერი თენგიზ პეტრიძე, მერიის მუნიციპალური სერვისების, ქონებისა მართის სამსახურის უფროსი ეგარსლან ლომაძე, საქალაქო ინფრასტრუქტირისა და კეთილმოწყობის სამსახურის უფროსის მოადგილე ვლადიმერ ხინთიბიძე, მერიის შესყიდვის სამსახურის უფროსი ბექა ხალვაში.
დღესვე, ბრიფინგი აჭარის მთავრობის თავმჯდომარე, თორნიკე რიჟვაძემ გამართა. მან თქვა, რომ კორუფციასთან ბრძოლა გრძელდება. თორნიკე რიჟვაძემ აქცენტი ასევე გააკეთა უდანაშაულობის პრეზუმფციის დაცვის აუცილებლობაზე.
პროკურატურის ვერსიით, მერიამ, უსასყიდლოდ შედგენილი საპროექტო სახარჯთაღრიცხვო დოკუმენტაციის საფუძველზე, ისე რომ დოკუმენტაციაში დაფიქსირებულ ფასებზე ბაზრის კვლევა არ ჩაუტარებია, ელექტრონულ ტენდერში მონაწილეობა მიიღო მხოლოდ ერთმა პრეტენდენტმა, უცხოური საწარმოს ფილიალმა „კონვერტ ჯორჯიამ“. ელექტრონული ვაჭრობის მიმდინარეობისას, უცხოური საწარმოს წარმომადგენლობამ და ფილიალმა „კონვერტ ჯორჯიამ“, სახელმწიფო შესყიდვების ერთიან სისტემაში წარადგინა ყალბი დოკუმენტაცია. სატენდერო კომისიის წევრებს წარმოდგენილ საეჭვო დოკუმენტაციაზე საერთოდ არ უმსჯელიათ. ეს მაშინ, როცა ბათუმის მერიის მიერ 2015 წლის პირველ მაისს გამოცხადებუილ სხვა ელექტრონულ ტენდერში, უცხოური საწარმოს ფილიალ „კონვერტ ჯორჯიას“ სახელმწიფო შესყიდვების ერთიან სისტემაში წარდგენილი იგივე დოკუმენტაცია, კომისიის ამავე შემადგენლობის მიერ გახდა „კონვენტ ჯორჯიას“ დისკვალიფიკაციის ერთ-ერთი საფუძველი.
„ბათუმელები“ მერიის ამ პროექტის „იაფის სახლის“ ტენდერთან დაკავშირებით არაერთხელ წერდა. 2018 წელს აუდიტის დასკვნის მიხედვით ბიუჯეტს 1 430 342 ლარის ზიანი მიადგა ამ ტენდერის შედეგად. ამავე წლის იანვარში მიაწოდა პროკურატურას მასალები აუდიტის სამსახურმა.
ბათუმის მერიამ 2019 წელს უჩივლა „ბაზის ბანკს“ – შესაბამის ტენდერში წარდგენილი საბანკო გარანტია ფორმალურად ვიზირებული იყო სს „ბაზისბანკის“ მიერ. მერიის საჩივრის განხილვა ამ დრომდე თბილისის საქალაქო სასამართლოს არ დაუწყია – იგი რამდენჯერმე გადაიდო. ბოლოს სხდომა 28 მაისს უნდა გამართულიყო. ამ დღეს ბათუმის მერიის პრესცენტრში გვითხრეს, რომ სხდომა ისევ გადაიდო, ამჯერად 4 ივნისისთვის.
