2019 წელს 19 შემაკავებელი ორდერი გამოსცეს 16 წლამდე მოზარდების წინააღმდეგ. შემაკავებელ ორდერს ოჯახში ძალადობის შემთხვევაში პოლიციის თანამშრომლები გამოსცემენ იმისთვის, რომ ძალადობის შემთხვევა აღარ განმეორდეს. ოჯახში ძალადობის შესახებ სტატისტიკური მონაცემები შინაგან საქმეთა სამინისტრომ გამოაქვეყნა.
შემაკავებელი ორდერი 16 წლამდე 11 ბიჭის და 8 გოგოს წინააღმდეგ გამოსცეს.
ასაკობრივი მონაცემების მიხედვით, ოჯახში ყველაზე ხშირად 25-დან 44 წლამდე ადამიანები ძალადობენ [4340 კაცი, 746 – ქალი].
ოჯახში ძალადობისთვის ყველაზე მეტი შემაკავებელი ორდერი გასულ წელს თბილისში გამოსცეს 3265 კაცისა და 763 ქალის წინააღმდეგ. აჭარაში 699 კაცისა და 129 ქალის წინააღმდეგ გამოსცეს შემაკავებელი ორდერი 2019 წელს. ჯამში, ქვეყნის მასშტაბით, გასულ წელს, 7030 კაცისა და 1524 ქალის წინააღმდეგ გამოსცეს პოლიციელებმა შემაკავებელი ორდერი.
შინაგან საქმეთა სამინმისტრო აქვეყნებს სტატისტიკურ მონაცემებს ოჯახში ძალადობის სახეების შესახებ: ყველაზე გავრცელებული სახე ისევ ფსიქოლოგიური ძალადობაა – 9445 შემთხვევა, მეორე ადგილზეა ფიზიკური ძალადობა – 2582 შემთხვევა, ეკონომიკური – 255, სექსუალური – 33.
