Batumelebi

10 ნოემბერს ავსტრიის დედაქალაქში, ვენაში, პაულ ვაიზის პრემიით დააჯილდოვეს ამჟამად პატიმრობაში მყოფი ჟურნალისტი და მედიამენეჯერი მზია ამაღლობელი .

აღნიშნული პრემია გაიცემა სამოქალაქო საზოგადოების ინიციატივის, Courage2030-ის მიერ. პრემია სიმამაცისთვის გადაეცემათ იმ პირებსა და ორგანიზაციებს, რომლებმაც განსაკუთრებული წვლილი შეიტანეს ადამიანის უფლებების დაცვაში, სხვადასხვა მიმართულებით.

მზია ამაღლობელს სიმამაცისთვის პრიზი გადაეცა ჟურნალისტიკის კატეგორიაში.

დაჯილდოების ცერემონიას ვენაში „ნეტგაზეთის“ მთავარი რედაქტორი ნესტან ცეცხლაძე და „ბათუმელების“ მთავარი რედაქტორი, ეთერ თურაძე ესწრებოდნენ.

პაულ ვაიზის ჯილდო დაარსდა რამდენიმე წლის წინ, ავსტრიელი, ჰოლოკოსტსგადარჩენილი იურისტის, პაულ ვაიზის პატივსაცემად.

პაულ ვაიზის ოჯახი 1938 წელს ვენიდან დახაუს ფაშისტურ საკონცენტრაციო ბანაკში იყო გადასახლებული, სადაც დაიღუპნენ მისი დედა და და. მან გადაწყვიტა მთელი ცხოვრება მიეძღვნა ლტოლვილების დაცვისათვის.  იგი გახდა საერთაშორისო სამართლის ექსპერტი, რომლის მთავარი მიზანი იყო ლტოლვილთა დახმარება. იყო ჟენევის ლტოლვილთა კონვენციის თანაავტორი, მნიშვნელოვანი საფუძველი ჩაუყარა საერთაშორისო სამართალს თავშესაფრის მოთხოვნასთან დაკავშირებით. თავისი მოღვაწეობით მან მილიონობით ლტოლვილს საშუალება მისცა, აეშენებინათ უსაფრთხო ახალი ცხოვრება ახალ სამშობლოში.

„ჩვენ მისია დავისახეთ, გვახსოვდეს ეს დიდი ავსტრიელი. ამიტომ, დავაარსეთ პაულ ვაიზის პრემია, რომელიც პატივს მიაგებს ადამიანის უფლებების დაცვის საქმეში შეტანილ გამორჩეულ წვლილს. ამით ჩვენ გვსურს ვაჩვენოთ, რომ ამ სამყაროში ჯერ კიდევ ბევრია გამბედაობის, ადამიანობის და თანაგრძნობის მაგალითი. და უამრავი ადამიანია, ვინც მთელი გულით უძღვნის თავს სხვების დახმარებას – ისევე, როგორც პაულ ვაიზი აკეთებდა ამას“ – ვკითხულობთ ვებგვერდზე.

„კორუფციის მხილების ნაცვლად, ანტიკორუფციული ბიურო სამოქალაქო საზოგადოებას დევნის“ – ნათქვამია სამოქალაქო ორგანიზაციების ერთობლივ განცხადებაში, რომელიც დღეს, 10 ნოემბერს გავრცელდა და მას ხელს საქართველოში მოქმედი 53 ორგანიზაცია აწერს.

„ბათუმელები“ სრულად აქვეყნებს განცხადებას.

განცხადებაში ვკითხულობთ:

„სანამ „ქართული ოცნება“ აგრძელებს საქართველოს საჯარო ინსტიტუტებისა და სახელმწიფო რესურსების მიტაცებას, ქვეყნის ანტიკორუფციული მექანიზმები გამოიყენება არა იმისთვის, რომ ამხილოს და პასუხი აგებინოს კორუფციაში მონაწილე მაღალჩინოსნებს, არამედ იმისთვის, რომ კიდევ ერთი დარტყმა მიაყენონ დამოუკიდებელ, ქართულ  სამოქალაქო საზოგადოების ორგანიზაციებს.

დამოუკიდებელი მონიტორინგის თანახმად, 2013 წლიდან მოყოლებული, კომპანიებმა, რომლებიც დაკავშირებულნი არიან „ქართული ოცნების” მაღალჩინოსნებთან და პარტიის დამფუძნებელთან, ბიძინა ივანიშვილთან, სახელმწიფო ტენდერებში გამარჯვების შედეგად 3.28 მილიარდ ლარზე მეტი მიიღეს. მათ შორის, 2020–2024 წლებში სახელმწიფო ტენდერებით 1.028 მილიარდი ლარი მიენიჭათ კომპანიებს, რომლებიც დაკავშირებულნი არიან მმართველი პარტიის დონორებთან, ხოლო მათივე შემოწირულებების ოდენობამ 7.7 მილიონი ლარი შეადგინა.

სახელმწიფო ტენდერებთან დაკავშირებული კორუფციული ქმედებები მრავალმხრივია და მოიცავს არაკონკურენტულ შესყიდვებსა და გამარტივებულ ტენდერებს, რომლებიც მიკერძოებულია მმართველ პარტიასთან დაახლოებული კომპანიების სასარგებლოდ, ასევე დასაქმების პროგრამებს, რომლებიც ფორმალურად მიზნად ისახავს მოწყვლადი მოქალაქეების მხარდაჭერას, მაგრამ რეალურად საჯარო სახსრებს მმართველი პარტიის ვიწრო-პარტიული ინტერესების მიღწევისკენ მიმართავს, პარტიული კადრების არაფორმალურ ქსელების დაფინანსების გზით. ასევე  ნიშანდობლივია, საჯარო მოხელეთა არაპირდაპირი, გაუმჭვირვალე ქონებრივი გარიგებები, მათ შორის არაერთი დადასტურებული შემთხვევა დაუფიქსირებელი ქონების შესახებ.

2024–2025 წლებში მხოლოდ ამ ფორმით დაფიქსირდა 34 მილიონ ლარზე მეტი ღირებულების ქონების, მათ შორის, ნაღდი ფულის და უძრავი ქონების გადაცემა თანამდებობის პირებზე. ფორმალურად ეს ტრანზაქციები რეგისტრირდება როგორც საჩუქარი, თუმცა ფაქტობრივად წარმოადგენს ალტერნატიულ კორუფციულ მექანიზმს, რომელიც მიზნად ისახავს პოლიტიკური ლოიალობის შენარჩუნებას და გავლენების სისტემურ განაწილებას. ეს საკითხები არ არის ასახული ანტიკორუფციული ბიუროს 2023–2024 წლების ანგარიშებში, მიუხედავად იმისა, რომ ბიუროს კანონით ევალება თანამდებობის პირების ქონებრივი დეკლარაციების კონტროლი და საეჭვო გარიგებებზე რეაგირება.

ბიუროს მიერ წარდგენილი ანგარიშები ფორმალური ხასიათისაა, მათში არ ფიქსირდება არც ერთი ელიტური კორუფციის შემთხვევა, არც ინტერესთა შეუთავსებლობის ფაქტი და არც კონკრეტული ქონებრივი გარიგებების შეფასება. ასეთი  მიდგომა ცხადყოფს, რომ ბიურო რეალურად არ ახორციელებს პრევენციულ ან მაკონტროლებელ ფუნქციას, არამედ ემსახურება პოლიტიკური ანგარიშსწორების მიზნებს.

შედეგად, მიუხედავად იმისა, რომ „ქართული ოცნება” საჯაროდ საუბრობს კორუფციასთან ბრძოლაზე, პრაქტიკაში, სახელმწიფო რესურსები მიტაცებულია პოლიტიკური ელიტის და მასთან დაახლოებული ბიზნესის მიერ, რომლებიც მდიდრდებიან გამჭვირვალობის, სამართლიანი კონკურენციისა და საჯარო ანგარიშვალდებულების იგნორირების  ხარჯზე.

ამავდროულად, სახელმწიფო ანტიკორუფციული ბიურო გამოიყენება დამოუკიდებელი სამოქალაქო საზოგადოების ორგანიზაციების დევნის ინსტრუმენტად. დამოუკიდებელ სამოქალაქო საზოგადოების ორგანიზაციებს ავალებენ  ბიუროს მიაწოდონ მოცულობითი ინფორმაცია, მათ შორის,  პირადი მონაცემები, 2024 წლიდან დღემდე შესრულებულ საქმიანობაზე, რაც უპრეცედენტო ჩარევაა სამოქალაქო სექტორის დამოუკიდებლობაში.

2025 წლის 4 სექტემბერს, ბიურომ დაიწყო 80-ზე მეტი არასამთავრობო ორგანიზაციის „მონიტორინგი“,  „გრანტების შესახებ კანონში“ ამა წლის აპრილში მიღებული ცვლილებების ფარგლებში. აღნიშნული ცვლილებები ეწინააღმდეგება საქართველოს კონსტიტუციით გარანტირებულ გაერთიანების თავისუფლებას და არათანაბრად აზარალებს ადამიანის უფლებებსა და დემოკრატიულ ანგარიშვალდებულებზე მომუშავე ორგანიზაციებს.

ეს ქმედებები ასახავს მზარდ ტენდენციას, რომლის პირობებშიც მიტაცებული სახელმწიფო აპარატი მიმართულია სამოქალაქო სექტორის საქმიანობის შეზღუდვაზე, ხოლო ხელისუფლების კორუმპირებული წარმომადგენლები ხელშეუხებლები რჩებიან. კონტროლი გარდაიქმნება რეპრესიად, რომელიც ნიღბად იყენებს სამართლიანობას.

ასეთი შერჩევითი ქმედება ზღუდავს სამოქალაქო თავისუფლებებს, სპობს სამოქალაქო ორგანიზაციების შესაძლებლობას, გამოთქვან დამოუკიდებელი აზრი ან ხელისუფლებას პასუხი  მოსთხოვონ კორუფციაზე ან სხვა სახის დანაშაულებზე, რაც პირდაპირ საფრთხეს უქმნის საქართველოს დემოკრატიულ მომავალს.

ყველასთვის ნათელია „ქართული ოცნების“ ორმაგი სტანდარტი. მაშინ როდესაც „ქართულ ოცნების“ მაღალჩინოსნები და მათთან ასოცირებული ბიზნესები კორუფციაშია გახვეული, “ქართული ოცნებისვე” შექმნილი ზედამხედველობის მექანიზმები მიმართულია მხოლოდ მათ წინააღმდეგ, ვინც კორუფციას ამხელს. ეს არ არის  ანტიკორუფციული პოლიტიკა — ეს კორუფციის და კორუფციული მექანიზმების დაცვის სქემაა, რომლითაც იდევნება კორუფციის მამხილებელი დამოუკიდებელი სამოქალაქო სექტორი“.

ხელმომწერი ორგანიზაციები:

1. ევროპის ფონდი

2. საქართველოს ახალგაზრდა იურისტთა ასოციაცია

3. საერთაშორისო გამჭვირვალობა – საქართველო

4. ადამიანის უფლებების განვითარების ფონდი

5. ქალები საქართველოდან

6. სამოქალაქო იდეა

7. თანასწორობის მოძრაობა

8. პრევენცია პროგრესისთვის

9. ქალთა ინიციატივების მხარდამჭერი ჯგუფი

10. ადამიანის უფლებათა ცენტრი (HRC)

11. ტოლერანტობის და მრავალფეროვნების ინსტიტუტი (TDI)

12. საქართველოს მომავლის აკადემია

13. თავისუფალ ჟურნალისტთა სახლი

14. მხარდაჭერის და შესაძლებლობების განვითარების ცენტრი

15. დემოკრატ მესხთა კავშირი

16. საქართველოს რეგიონული გაძლიერების ფონდი

17. ქართული მედია ჯგუფი

18. მწვანე სექტორი

19. სამოქალაქო მოძრაობა თავისუფლებისთვის

20. დემოკრატიის კვლევის ინსტიტუტი

21. უფლებები საქართველო

22. საქართველოს ფსიქოსოციალური დახმარების ასოციაცია ნდობა

23. პარტნიორობა ადამიანის უფლებებისთვის

24. გრლზვეივ

25.  ცენტრი კახეთი

26. ასოციაცია “სოციალური ქოლგა”

27. მწვანე ალტერნატივა

28. ჩართულობის და განვითარების ცენტრი

29. ბათუმის დამოუკიდებელი ცხოვრების ცენტრი

30. წამების მსხვერპლთა ფსიქოსოციალური და სამედიცინო რეაბილიტაციის ცენტრი – GCRT

31. ა(ა)იპ – ,,შეხვედრის ადგილი – დმანისი”

32. ა(ა)იპ – ახალგაზრდა ფემინისტები

33. მედიის ინსტიტუტი

34. ა(ა)იპ რაჭის სათემო ორგანიზაცია

35. საქართველოს დემოკრატიული ინიციატივა (GDI)

36. ა(ა)იპ გორელ ფოტოგრაფთა კლუბი / ხელოვნების სახლი

37. საქართველოს ევროპული ორბიტა

38. სამოქალაქო ინტეგრაციის ფონდი

39. მხარდაჭერის და შესაძლებლობის განვითარების ცენტრი

40. ყვარლის ევროკლუბი

41. პროფესიო – პიროვნული და პროფესიული განვითარების ცენტრი

42. ლომეკი

43. ეკონომიკური პოლიტიკის კვლევის ცენტრი

44. მედიის განვითარების ფონდი (MDF)

45. ინფორმაციის თავისუფლების განვითარების ინსტიტუტი (IDFI)

46. სათემო ფონდი ლელი

47. ლელიანის ზრდასრულთა განათლების ცენტრი

48. სამოქალაქო საზოგადოების ფონდი

49. საქართველოს სტრატეგიული კვლევებისა და განვითარების ცენტრი (CSRDG)

50. ევროპულ-ქართული ინსტიტუტი (EGI)

51. საჯარო მოსამსახურეთა დამოუკიდებელი პროფესიული კავშირი -კონსტიტუციის 78-ე მუხლი

52. თეთრიწყაროს ახალგაზრდული ცენტრი

53. ღია სივრცე კავკასია

______________

ფოტოზე: „არა რუსულ ოცნებას”, – წარწერა ბათუმში, ქვაფენილზე.

მეორე სამსახურზე შეზღუდვა საზოგადოებრივი მაუწყებლის, მათ შორის „აჭარის ტელევიზიის“ თანამშრომლებს აღარ შეეხებათ – „შეთავსებით“ მეორე სამსახურს საზოგადოებრივი მაუწყებლისთვის „ოცნების“ პარლამენტი დაუშვებს. ცვლილებას დაჩქარებული წესით განიხილავენ.

კანონში „კორუფციის წინააღმდეგ ბრძოლის შესახებ“ 2025 წლის პირველი ნოემბრიდან საჯარო სამსახურებში დასაქმებულ პირებს მეორე სამსახურში დასაქმება ეზღუდებათ.

„მიზანშეწონილია, კანონპროექტი განხილულ იქნეს დაჩქარებული წესით, ვინაიდან, მნიშვნელოვანია, მაქსიმალურად შემჭიდროებულ ვადებში დასრულდეს შესაბამისი ცვლილებების ასახვა კანონმდებლობაში და ქალაქ თბილისის მუნიციპალიტეტის მერთან არსებული თვითნებურად დაკავებულ მიწაზე საკუთრების უფლების აღიარების კომისიის წევრებსა და საჯარო სამართლის იურიდიული პირების — საზოგადოებრივი მაუწყებლისა და საზოგადოებრივი მაუწყებლის აჭარის ტელევიზიისა და რადიოს თანამშრომლებს დროულად მიეცეთ შეთავსებითი სამუშაოს შესაძლებლობა,“ – აღნიშნულია კანონპროექტების განმარტებით ბარათში.

„კანონპროექტის მიღებით, შესაბამისობაში მოვა ორი საკანონმდებლო აქტი და ამასთანავე, ქალაქ თბილისის მუნიციპალიტეტის მერთან არსებული თვითნებურად დაკავებულ მიწაზე საკუთრების უფლების აღიარების კომისიის წევრებსა და საჯარო სამართლის იურიდიული პირების — საზოგადოებრივი მაუწყებლისა და საზოგადოებრივი მაუწყებლის აჭარის ტელევიზიისა და რადიოს თანამშრომლებს მიეცემათ შესაძლებლობა განახორციელონ შეთავსებითი სამუშაო,“ – ვკითხულობთ კანონპროექტში.

რატომ დაუშვა არალეგიტიმურმა და ანტიკონსტიტუციურმა პარლამენტმა გამონაკლისი საზოგადოებრივი მაუწყებლისთვის?

„კორუფციის წინააღმდეგ ბრძოლის შესახებ“ საქართველოს კანონით დადგენილი შეთავსების შეზღუდვა არ ითვალისწინებდა გამონაკლისად იმ პირებს, რომლებიც საქმიანობენ საჯარო სამართლის იურიდიულ პირებში – საზოგადოებრივ მაუწყებელში და საზოგადოებრივი მაუწყებლის აჭარის ტელევიზიასა და რადიოში, მიუხედავად მათი საქმიანობის სპეციფიკისა. შესაბამისად, კანონპროექტის მიზანია… გამონაკლისის დაზუსტება ისე, რომ იგი მოიცავდეს როგორც თბილისის მერთან არსებულ საკუთრების უფლების აღიარების კომისიის წევრებს, ისე საზოგადოებრივი მაუწყებლისა და აჭარის ტელევიზიისა და რადიოს თანამშრომლებს, რათა მათ შეეძლოთ თავიანთი საქმიანობის განხორციელება.“ – აღნიშნულია განმარტებით ბარათში.

ფინანსთა სამინისტროს ინფორმაციით, გრანტის სახით გამოყოფილი დიდი ოდენობით თანხის ჯგუფურად თაღლითურად დაუფლების ფაქტზე 4 პირი პასუხისგებაში მისცეს.

ამავე წყაროს ცნობით, დაკავებულნი არიან შპს „ელიტმშენისს“  და კოოპერატივი „რკ ქართული ბოსტნეულის“  ხელმძღვანელი პირები.

დანაშაულებრივი ჯგუფის ერთ წევრს  ბრალი დაუსწრებლად წარედგინა.

„დადასტურებულია ბრალდებულების მხრიდან ბიუჯეტის კუთვნილი 430 200 ლარის თაღლითურად დაუფლების, 167 918 ლარის ფიქტიური დღგ-ს აქტივის შექმნისა და 2 000 ლარის ბიუჯეტიდან მოტყუებით დაუფლების ფაქტები.

გამოძიებით დგინდება, რომ კოოპერატივი და დაქირავებული კომპანია ერთმანეთთან შევიდნენ გარიგებაში, კერძოდ: ,,სოფლისა და სოფლის მეურნეობის განვითარების სააგენტოდან” თანადაფინანსებისათვის გამოყოფილი ბიუჯეტის კუთვნილი ფულადი თანხის 430 200 ლარის თაღლითურად დაუფლების მიზნით შპს „ელიტმშენმა“, კოოპერატივ „რკ ქართული ბოსტნეულს“ გამოუწერა ყალბი ელექტრონული საგადასახადო ანგარიშ-ფაქტურა 1 100 800 ლარის ღირებულების სამუშაოების შესრულებაზე და შესაბამისი ყალბი სასაქონლო ზედნადები სასათბურე მეურნეობის მოსაწყობად საჭირო სხვადასხვა დასახელების საქონელის მიწოდების შესახებ, თუმცა არანაირი სამუშაო არ შესრულებულა.

თავის მხრივ, ყალბი საგადასახადო ანგარიშფაქტურის გამოწერის გზით, კოოპერატივმა მიიღო დღგ-ს ფიქტიური ჩათვლა 167 918 ლარის ოდენობით, საიდანაც დირექტორმა და გამგეობის თავმჯდომარემ მოტყუებით სახელმწიფო ბიუჯეტიდან დაიბრუნეს დღგ-ს თანხა 2 000 ლარი და დამატებით ცდილობდნენ  სახელმწიფო ბიუჯეტიდან დღგ-ის ზედმეტობის თანხის ფიქტიური აქტივის 100 000 ლარის დაბრუნებას, რაც საგამოძიებო სამსახურის დროული ჩართულობით ვერ განახორციელეს“ – აცხადებს საგამოძიებო სამსახური.

ამავე სამსახურის ინფორმაციით, დანაშაული ითვალისწინებს თავისუფლების აღკვეთას 6-დან 9 წლამდე  ვადით.

2025 წლის  9 თვეში ბათუმის ბიუჯეტში მშენებლობის ნებართვის მოსაკრებლის სახით 4 მილიონ 974 000 ლარი შევიდა.  ეს თანხა ბიუჯეტის შემოსულობების ნაწილში, „სხვა შემოსავლებშია“ ასახული და მშენებლობის ნებართვისა და კოეფიციენტის გაზრდის მოსაკრებელს მოიცავს, გარდა განსაკუთრებული მშენებლობის, რადიაციული ან ბირთვული ობიექტებისა.

ეს მონაცემი ნიშნავს, რომ ბათუმის განაშენიანება გენგეგმის გარეშე გაცილებით სწრაფი ტემპით გრძელდება.

ზოგადად, ადმინისტრაციული მოსაკრებლებისა და გადასახდელების სახით ქალაქის ბიუჯეტში 9 თვეში 65 მილიონ 398 900 ლარი შევიდა, მათ შორის არის მშენებლობის მოსაკრებელიც.

„სხვა შემოსავლების“ 9 თვის საპროგნოზო მოცულობა მთლიანობაში 2025 წლის ბიუჯეტში 75,3 მილიონი ლარით იყო განსაზღვრული, ფაქტობრივმა შესრულებამ კი 96,5 მილიონი ლარი შეადგინა.

საერთო ჯამში, სხვა შემოსავლების წილი ადგილობრივი ბიუჯეტის მთლიან შემოსულობებში 28,2%-ს შეადგენს.

საანგარიშო პერიოდში სხვა შემოსავლების მაჩვენებლები ცალკეული სახეების მიხედვით შემდეგია:

• საკუთრებიდან მიღებული შემოსავლების სახით ბიუჯეტში მობილიზებულია 13 მილიონ 071 200 ლარი, რაც საპროგნოზო მაჩვენებლის, 8 მილიონ 197 ათასი ლარის 159,5%-ია.
• პროცენტებიდან მობილიზებულია 10 მილიონ 840 ათასი ლარი, რაც სამი კვარტლის გეგმის – 6 მილიონ 317 ათასი ლარის 171,6%-ს შეადგენს.
• რენტის სახით  მიღებულია 2 მილიონ  231 ათასი ლარი, რაც სამი კვარტლის გეგმის 118,7 პროცენტია. აქედან, ბუნებრივი რესურსებით სარგებლობისათვის მოსაკრებელზე მოდის 198 400 ლარი, მიწის იჯარიდან და მართვაში [უზუფრუქტი, ქირავნობა და სხვა)] გადაცემიდან შემოსავალზე – 2 მილიონ 032 700 ლარი.
• საქონლისა და მომსახურების რეალიზაციიდან მობილიზებულია 65 მილიონ 921 ათასი ლარი.

ბათუმის მუნიციპალიტეტის 2025 წლის 9 თვის ბიუჯეტის ფაქტობრივმა შემოსულობებმა შეადგინა 342,1 მილიონი ლარი. რაც შემოსულობების 2025 წლის მთლიანი გეგმური მაჩვენებლის 72,5%, ხოლო კვარტალთან მიმართებაში – 101,3 პროცენტია.

დღეს, 9 ნოემბერს, „ქართული ოცნების“ განათლების მინისტრის მოადგილემ, ზვიად გაბისონიამ კომენტარი გააკეთა საჯარო სკოლის მასწავლებლების რეპეტიტორობასთან დაკავშირებით და თქვა, რომ კორუფციის წინააღმდეგ კანონში შეტანილი ცვლილებები მასწავლებლებს რეპეტიტორობას არ უკრძალავს.

„კორუფციის წინააღმდეგ ბრძოლის“ კანონმდებლობით განისაზღვრა გარკვეული ტიპის სფეროები, სადაც დაშვებულია დამატებითი საქმიანობა, მათ შორის განათლების სფეროში ასეთად განისაზღვრა სამეცნიერო და პედაგოგიური საქმიანობა. ,

დამსაქმებლის თანხმობით პედაგოგებს, აკადემიური და სამეცნიერო წრეების წარმომადგენლებს უფლება აქვთ, დამატებით ეწეოდნენ სამეცნიერო და პედაგოგიურ საქმიანობას.

რაც შეეხება საგამონაკლისო წესებს, მაგალითად, ძალიან ბევრი დეზინფორმაცია ვრცელდება მასწავლებლებთან და ე.წ. კერძო რეპეტიტორის ინსტიტუტთან დაკავშირებით. 

გვინდა განვმარტოთ, რომ საქართველოს საგანმანათლებლო კანონმდებლობის მიხედვით, არ არსებობს დეფინიცია რეპეტიტორობისა და აქედან გამომდინარე, შეუძლებელია, ვისაუბროთ გარკვეული ტიპის შეთავსებებზე ან თანხმობებზე, რადგან ასეთი ტიპის განმარტება კანონმდებლობაში არ არსებობს.

შესაბამისად, თუ ორ ფიზიკურ პირს შორის ხდება რაიმე ტიპის შეთანხმება იმასთან დაკავშირებით, რომ მოხდეს მომსახურების შეთანხმების გაწევა ან გარკვეული ტიპის საგანმანათლებლო ცოდნის გაზიარება, ეს სცილდება განათლების კანონმდებლობას და აქედან გამომდინარე, ის ვერ იქნება განმარტებული, როგორც შეთავსებითი ტიპის საქმიანობა,“-ამბობს ზვიად გაბისონია.

________________

ამ თემაზე:

შპს „კრისტალ ჯგუფის“ მფლობელს ვლადიმერ სტეფანიანს პროკურატურამ ბრალი წაუყენა.

მათი ინფორმაციით, კრისტალ ჯგუფში შემავალი შპს „ბაკურიანი ბიზნეს ჯგუფის“ ძირითად საქმიანობას დაბა ბაკურიანში სასტუმროს ტიპის საცხოვრებელი კომპლექსების მშენებლობა და მისი შემდგომი რეალიზაცია წარმოადგენდა.

ვლადიმერ სტეფანიანი, რომელიც ფაქტობრივად ხელმძღვანელობდა საწარმოს ყოველდღიურ საქმიანობას, უხეშად არღვევდა როგორც დაბა ბაკურიანის განაშენიანების გენერალური გეგმით დადგენილ, ასევე, შესაბამისი სამსახურიდან მიღებულ მშენებლობის სანებართვო პირობებს.

უკანონოდ აშენებულ საცხოვრებელ ფართობებს კი ეტაპობრივად ასხვისებდა.

აღნიშნული გზით, შპს „ბაკურიანი ბიზნეს ჯგუფმა“ დიდი ოდენობით – 1 894 925 ლარი შემოსავალი მიიღო.

მიღებული დიდი ოდენობით თანხისათვის კანონიერი სახის მისაცემად, ბრალდებულმა თანხის ნაწილი შპს „ბაკურიანი ბიზნეს ჯგუფიდ“ საბანკო ანგარიშებზე განათავსა, ხოლო ნაწილი პირად საკუთრებაში გადაიტანა, რის შემდგომაც საწარმოს, თავისი და დაკავშირებული პირების სახელზე უძრავ/მოძრავი ქონებები შეიძინა.

დაკავებულს ბრალდება უკანონო სამეწარმეო საქმიანობისა და უკანონო შემოსავლის ლეგალიზაციის ფაქტებზე, საქართველოს სისხლის სამართლის კოდექსის 192-ე და 194-ე მუხლებით წარედგინა, რაც სასჯელის სახედ და ზომად თორმეტ წლამდე თავისუფლების აღკვეთას ითვალისწინებს“-აცხადებს პროკურატურა.

ვლადიმერ სტეფანიანი გუშინ, 8 ნოემბერს დააკავა პოლიციამ. მას ბაკურიანში, დიდველზე  სასტუმრო ტიპის 5 კოტეჯის უკანონო მშენებლობას ედავებიან.

_______________

ამ თემაზე:

თერჯოლაში 15 წლის მოზარდი ნანგრევებში მოყვა და დაიღუპა.

მომხდარის შესახებ ინფორმაცია დღეს, 9 ნოემბერს გაავრცელა „ინფო იმერეთმა“.

ამავე წყაროს ცნობით, მოზარდები მიტოვებულ შენობაში შევიდნენ, ერთ-ერთს სამშენებლო მასალა დაეცა.

შს სამინისტრომ ფაქტი „ბათუმელებთანაც“ დაადასტურა. გამოძიება დაწყებულია სსკ-ის 116-ე მუხლით, რაც გულისხმობს სიცოცხლის მოსპობას გაუფრთხილებლობით.

წალკაში, სოფელ თრიალეთში მეშვიდე დღეა 64 წლის ოთარ მგელაძეს ეძებენ.

ოჯახის წევრების თქმით, ის სახლიდან გასვლის შემდეგ აღარ დაბრუნებულა.

დაკარგულ კაცს ტანზე ნაცრისფერი ქურთუკი აცვია.

ოჯახის წევრების ინფორმაციით, ოთარ მგელაძე დაფიქსირებულია ვიდეოკამერაში სოფლიდან გასვლის დროს, შემდეგ კი მისი კვალი იკარგება.

დაკარგულ კაცს თან არ აქვს მობილური ტელეფონი.

შსს-ს ინფორმაციით, დაკარგული კაცის მოსაძებნად „ინტენსიური, სამძებრო-სამუშაოები მიმდინარეობს“.

სააგენტო “ფრანს პრესი” საქართველოში გერმანიის ელჩის, პეტერ ფიშერის დაბრუნებას ეხმიანება და წერს, რომ გერმანიის საგარეო სამინისტროს ცნობით, ფიშერის გაწვევა საქართველოსთვის გაფრთხილება იყო ელჩისა და დასავლეთის წინააღმდეგ გახშირებულ თავდასხმებთან დაკავშირებით.

სააგენტოს ცნობით, გერმანიის საგარეო საქმეთა სამინისტროს პრესსპიკერმა 7 ნოემბერს განაცხადა, რომ გერმანიის მკაფიო მოლოდინია საქართველოს მთავრობამ “თავი შეიკავოს ელჩზე თავდასხმებისგან” და კიდევ ერთხელ გაუსვა ხაზი, რომ ელჩის ბერლინში კონსულტაციებისთვის გაწვევა რამდენიმე კვირის წინ წამოადგენდა “ძალიან ნათელ დიპლომატიურ სიგნალს” საქართველოს მმართველი ძალისთვის.

“ფრანს პრესის” ინფორმაციით, ბერლინსა და თბილისს შორის საუბრები უკვე შედგა, გერმანიის საგარეოს პრესსპიკერმა კი განაცხადა, რომ ახლა უკვე “ქართველ ლიდერებს მათი ქმედებების მიხედვით” შეაფასებენ და დამატებით დასკვნას ამაზე დაყრდნობით გამოიტანენ.

ელჩი პეტერ ფიშერი გერმანიამ კონსულტაციებისთვის 19 ოქტომბერს გაიწვია. ბერლინში გამართული კონსულტაციების შემდეგ გერმანიის ელჩის საქართველოში დაბრუნების შესახებ ინფორმაცია გერმანიის საგარეო საქმეთა სამინისტრომ 6 ნოემბერს გაავრცელა.

სააგენტო “ფრანს-პრესი” საქართველოში არსებულ მდგომარეობაზე წერს:

“საქართველო უკვე დაახლოებით ერთი წელია ღრმა პოლიტიკურ კრიზისშია. გასული წლის ოქტომბერში გამართული საკამათო საპარლამენტო არჩევნების შემდეგ, სადაც პრო-რუსულმა მმართველმა პარტიამ „ქართული ოცნებამ“ თავი გამარჯვებულად გამოაცხადა, ათასობით ოპოზიციური აქტივისტი თვეების განმავლობაში გამოდიოდა პროტესტზე. თუმცა, ბოლო პერიოდში პროტესტის მოძრაობამ თვალსაჩინოება დაკარგა, ხოლო მრავალი ოპოზიციონერი და ჟურნალისტი დააკავეს.

ოპოზიცია და მომიტინგეები ხელისუფლებას ადანაშაულებენ იმაში, რომ იგი სულ უფრო ავტორიტარული ხდება და თანდათან უახლოვდება რუსეთს. მთავრობა ამ ბრალდებებს უარყოფს”.

ამავე თემაზე:

დღეს 8 ნოემბერს, ფინანსთა სამინისტროს საგამოძიებო სამსახურის ინფორმაციით, დიდი ოდენობით უკანონო შემოსავლის ლეგალიზაციის ფაქტზე „კრისტალ ჯგუფის“ ხელმძღვანელი პირი დააკავეს.

„გამოძიებით დგინდება, რომ „კრისტალ ჯგუფის“ კომერაციული დასახლების ქვეშ გაერთიანებული, შპს „ბაკურიანი ბიზნეს-ჯგუფის“და შპს „ჰოტელს მენეჯმენტ ჯგუფის“ დამფუძნებელმა პირმა, ბორჯომში, დაბა ბაკურიანში, დიდველის ტერიტორიაზე შესაბამისი ნებართვის გარეშე, თვითნებურად ააშენა 5 სასტუმრო აპარტამენტი, მოაწყო კერძო საბაგირო, კერძო სათხილამურო ტრასა და ტობოგანი, რომლის გამოყენების უფლება ჰქონდათ მხოლოდ „კრისტალ ჯგუფის“ მომხმარებლებს.

უნებართვოდ აშენებული სასტუმრო აპარატმენტების რეალიზაციის შედეგად უკანონოდ მიღებულმა შემოსავალმა, რამდენიმე ათეული მილიონი ლარი შეადგინა.

ამ ეტაპისთვის დადგენილია 1 მილიონ 894 925 ლარის ოდენობით, უკანონო შემოსავლის ლეგალიზაციის ფაქტი. გამოძიება გრძელდება მათთან შესაძლო კავშირში მყოფი პირების, მათ შორის დანაშაულში ხელშემწყობი საჯარო მოხელეების დადგენის და მხილების მიზნით“-აცხადებს ფინანსთა სამინისტროს საგამოძიებო სამსახური.

დეველოპერული კომპანია „კრისტალ ჯგუფის“ ხელმძღვანელი ვლადიმერ სტეფანიანი, „ქართული ოცნების“ შემწირველთა სიაშიც გვხვდება.

მან 2021 წელს, „ქართულ ოცნებას“ 50 000 ლარი შესწირა, 2018 წლის არჩევნებზე კი 60 000 ლარი.

შსს-ს ინფორმაციით თბილისში დააკავეს ერთი პირი, რომელსაც ბრალად ედება ოჯახის წევრის მიმართ მუქარა, იძულება და ნარკოტიკული საშუალებისა და ცეცხლსასროლი იარაღის მართლსაწინააღმდეგო შეძენა-შენახვა.

დანაშაული 6 წლამდე ვადით თავისუფლების აღკვეთას ითვალისწინებს.

„ბრალდებულმა მეგობარ ქალს მიაყენა სიტყვიერი შეურაცხყოფა, მასზე ფიზიკურად იძალადა და სიცოცხლის მოსპობით დაემუქრა.

სამართალდამცველებმა ჩატარებული საგამოძიებო მოქმედებების შედეგად ზ.დ. ბრალდებულის სახით დააკავეს.

პოლიციამ დაკავებულის პირადი, საცხოვრებელი სახლისა და ავტოფარეხის ჩხრეკის შედეგად, ნივთმტკიცებად ამოიღო ნარკოტიკული საშუალება „ალფა-პვპ”, ცეცხლსასროლი იარაღი, ხელყუმბარა, მჭიდი და 5 ვაზნა“.

მათივე ინფორმაციით, გამოძიება სისხლის სამართლის კოდექსის 11-პრიმა 150-ე მუხლით, 11-პრიმა 151-ე მუხლით, 260-ე და 236-ე მუხლებით მიმდინარეობს.

დღეს, 7 ნოემბერს, საღამოს ხანძარი იყო მახინჯაურში. ცეცხლი საცხოვრებელი სახლის სასხვენო გადახურვაზე გაჩნდა.

საგანგებო სიტუაციების სამსახურის ცნობით, ხანძრის შედეგად დაიწვა სასხვენო გადახურვა და დაზიანდა სახლის მეორე სართული.

ხანძარი ამ დროისათვის ლიკვიდირებულია.

როგორც “ბათუმელებისთვის” გახდა ცნობილი ხანძრის შედეგად არავინ დაშავებულა.

„მათი ეს მოქმედება, პირველ რიგში, იმპულსური, ნერვული ხასიათის რეაქციაა, ნაცვლად იმისა, რომ კრიტიკაზე ოდნავ მაინც დაფიქრდნენ“ – ამბობს საერთაშორისო გამჭვირვალობა – საქართველოს“ ადამიანის უფლებათა და მართლმსაჯულების პროგრამის მენეჯერი სანდრო ბარამიძე „ოცნების“ პროკურატურის განცხადებაზე, რის მიხედვითაც უკვე პატიმრობაში მყოფ ოპოზიციის ლიდერებს საბოტაჟსა და „უცხო ქვეყნისთვის“ მტრულ საქმიანობაში დახმარებაში დებენ ბრალს.

როგორ აპირებს „ოცნება“ ამტკიცოს საბოტაჟი და რატომ არ ასახელებს იმ „უცხო ქვეყნებს“, რომლებსაც ის მტრად მოიხსენიებს? – „ბათუმელები“ სანდრო ბარამიძეს ამ თემაზე ესაუბრა.

• ბატონო სანდრო, „ქართულმა ოცნებამ“ პატიმრობაში მყოფ ოპოზიციის ლიდერებს ახალი ბრალდებები წაუყენა და მათ საბოტაჟსა და „უცხო ქვეყნისთვის მტრულ საქმიანობაში“ დახმარებას ედავება. შეიძლება თუ არა მსგავსი ბრალდება სხვა ოპონენტების წინააღმდეგაც გამოიყენოს „ოცნებამ“ და გაუჭირდება თუ არა მას ამ ბრალის დამტკიცება?

რამდენიმე მომენტს გამოვყოფ. პირველ რიგში, ყურადღებას იქცევს ის გარემოება, რომ ბრალის წარდგენა მოხდა მეორე დღეს, როცა ევროკომისიამ გამოაქვეყნა თავისი გაფართოების ანგარიში საქართველოსთან მიმართებით, სადაც უკიდურესად ნეგატიურად არის შეფასებული ბოლო წლის განმავლობაში განვითარებული მოვლენები და კაია კალასმა, ევროკავშირის უმაღლესმა წარმომადგენელმა საგარეო და უსაფრთხოების საკითხებში, ისიც კი თქვა, რომ საქართველოსთვის უბრალოდ აღარ არის არანაირი გზა დარჩენილი იმისთვის, რომ ამ ვითარებაში გახდეს ევროკავშირის წევრი და რომ საქართველოს კანდიდატი ქვეყნის სტატუსიდან დარჩა მხოლოდ სახელი.

ასე მოხდა შარშან ნოემბერშიც, როდესაც ევროპარლამენტმა გამოაქვეყნა უკიდურესად ნეგატიური რეზოლუცია საქართველოს შესახებ და მეორე დღეს, 28 ნოემბერს, გამოვიდა კობახიძე და თქვა, რომ ვაჩერებთ ყველანაირ მოლაპარაკებებს ევროკავშირთანო.

აქედან გამომდინარე, მათი ეს მოქმედება, პირველ რიგში, იმპულსური, კონვულსიური, ნერვული ხასიათის რეაქციაა. ნაცვლად იმისა, რომ კრიტიკაზე ოდნავ მაინც დაფიქრდნენ, – არა, უბრალოდ, ახორციელებენ ისეთ მოქმედებას, რომელიც მიანიშნებს, რომ სჯიან საქართველოს მოქალაქეებს იმისთვის, რომ თვითონ ჩააგდეს ყველაფერი ევროკავშირთან და საერთოდ ჩვენ დასავლურ პარტნიორებთან ურთიერთობაში.

მეორე საკითხი: ივანიშვილის მიზანია ჩაახშოს, დახუროს დემოკრატია საქართველოში, დახუროს წარმომადგენლობითი დემოკრატია, პოლიტიკური პლურალიზმი და ასეთ ვითარებაში ქვეყანაში დარჩეს ვითომ პარტიები რომ არსებობენ, უცნაური, მართლა თითო-ოროლა კაციანი, ნაყიდი რომ აქვთ მათი ლოიალობა და სხვა აღარავინ.

თუ არჩევანი არ გვექნება, მაშინ, ბუნებრივია, არჩევნებიც, როგორც ასეთი, არ იქნება.

ასეთი არჩევნები საბჭოთა კავშირშიც ტარდებოდა, მაგრამ არჩევნებს არავინ არ უწოდებდა და ეს უნდა, რომ გააკეთოს ივანიშვილმა დღეს.

ფაქტობრივად, ეს ახალი ბრალი, მურუსიძე-ჩინჩალაძის სასამართლოს სტილში გამოტანილი განაჩენით უნდათ, რომ გახადონ პრეიუდიციად, რადგან იმ სარჩელში რაიმე დასაბუთებული მტკიცებულება არ არის წარმოდგენილი და საკონსტიტუციო სასამართლომ თქვას, რომ ფაქტების დადგენის, ასე ვთქვათ, მოვალეობა მე არ გამაჩნია, იმიტომ, რომ ფაქტები აგერ დაადგინა ვთქვათ თბილისის საქალაქო სასამართლომ ამ ბრალის საქმეში.

• „ოცნება“ პატიმრობაში მყოფ პოლიტიკოსებზე ამბობს, რომ ისინი ყველაფერს აკეთებდნენ ჩვენთვის საერთაშორისო სანქციების დასაწესებლადო. რა ტიპის „ბრალია“ ეს. ან რა ფორმით უნდა ამტკიცოს ეს ბრალდების მხარემ?

არცერთ ბრალში ეს არ ჯდება. მოგეხსენებათ, რომ სამი მუხლით მიმდინარეობდა აქამდე გამოძიება, ამ გამოძიების ფარგლებში იყო, რომ ჯერ ნანუკას ფონდი და სხვა ფონდების წარმომადგენლები დაკითხეს მაგისტრანტ მოსამართლესთან და მერე სექტემბერში, უკვე არასამთავრობო ორგანიზაციების ხელმძღვანელები, მათ შორის, ჩვენი ორგანიზაციის ხელმძღვანელი, ეკა გიგაურიც დაკითხეს. ეს იგივე გამოძიებაა, ეგრეთ წოდებული საბოტაჟის, ეგრეთ წოდებული უცხო ქვეყნისთვის დივერსიულ საქმიანობაში დახმარების გაწევის ბრალდებით.

სანქციების საკითხი არცერთი მუხლის კვალიფიკაციაში არ ჯდება. ჯერ ერთი, როცა ამბობ, რომ „მტრულ სახელმწიფოს“, მტრულ ორგანიზაციას დაეხმარე, იქვე უნდა მიუთითო, ვინ არის ეს მტრული სახელმწიფო, რომელია ეს უცხო სახელმწიფო, რომელიც მტრულ საქმიანობას ეწევა და იყენებს ამ ადამიანების დახმარებას.

• როგორ ფიქრობთ, შეძლებენ იმას, რომ სასამართლოში ხელი დაადონ ვთქვათ ევროკავშირის რომელიმე წევრ ქვეყანას, როცა მოუწევთ „მტრულ სახელმწიფოს“ განმარტება?

არ ვიცი, თუმცა, თუმცა რაღაც ალუზიები და მინიშნებები ამ კუთხით არის დაფიქსირებული წულუკიანის კომისიის დასკვნაში, რომელიც საფუძვლად უდევს ვთქვათ, საკონსტიტუციო სარჩელს [ოპოზიციური პარტიების აკრძალვაზე].

ერთი-ორ ადგილას ამერიკის ყოფილი ელჩის გამონათქვამია მითითებული, ევროკავშირის ყოფილი, საგარეო და უსაფრთხოების საკითხებში უმაღლესი წარმომადგენლის, ბორელის სიტყვებია მითითებული, თუმცა პირდაპირ იმის თქმა, რომ ვიღაცას ხელს ადებენ, ასე არ არის, რა თქმა უნდა.

• თუ პირდაპირ ვერ დაასახელებენ „მტრულ ქვეყნებს“, მაშინ როგორ დაამტკიცებენ ბრალს. ვისთვის მუშაობდნენო, რას იტყვიან?

მარტო ეს არ არის, რასაც ვერ დაამტკიცებენ. საერთოდ, ვერცერთ მუხლთან მიმართებით ვერ დაამტკიცებენ ბრალს. მათ შორის საბოტაჟის მუხლთან მიმართებით, ასე ვთქვათ, არანაირი საფუძველი არ არსებობს, არათუ მტკიცებულებები.

ისინი არც აღწერენ ქმედებებს, რაში გამოიხატა ეს ყველაფერი. უნდა აღწერო რაღაც მოქმედება, რომ თქვა, ეს ქმედება შეესაბამება სისხლის სამართლის კოდექსის ამა და ამ მუხლით დადგენილი დანაშაულის შემადგენლობას. ასეთი რამე უბრალოდ არც არის აღწერილი.

საბოტაჟს აბრალებენ ფაქტობრივად ყველას. ზოგის შემთხვევაში მარტო საბოტაჟია ბრალად წაყენებული. იგივე გვარამია, მელია, ხაზარაძე, ჯაფარიძეს მარტო საბოტაჟში აქვთ ბრალი წაყენებული და რაში გამოიხატა საბოტაჟი? ეს აღწერილი არ არის.

თუ ლაპარაკია იმაზე, რომ რუსთაველზე მიმდინარეობდა პერმანენტული აქციები, აქ საბოტაჟი რაში ვლინდება?

საბოტაჟი არის ის, როდესაც, ხელს უშლი ვთქვათ პარლამენტის მუშაობას ისე, რომ ის მუშაობას ვერ ახერხებს. ასეთი რამ არ ყოფილა.

მოგეხსენებათ, იგივე რუსული კანონის მიღების პერიოდში, მიუხედავად იმისა, რომ მართლა მასობრივი აქციები იმართებოდა ყოველდღიურად პარლამენტის წინ, ერთი წამით არ შეუჩერებია პარლამენტს მუშაობა და ერთმანეთის მიყოლებით იღებდნენ კანონებს, მათ შორის ეს რუსული კანონიც მიიღეს თვე-ნახევარში. ამიტომ, საბოტაჟი რაში ვლინდება, თუ ხელი რეალურად ამ აქციებმა ვერ შეუშალა პარლამენტის მუშაობას?!

პროკურორმა უნდა იფიქროს ამაზე, მაგრამ სად აქვს მაგათ ან ფიქრის უნარი ან ფიქრის ვალდებულება. მათი ერთადერთი ვალდებულებაა, რასაც ეტყვიან, ის გააკეთონ.

• ბრალდებაში საუბარია ცრუ ინფორმაციის გავრცელებაზე [„აწვდიდნენ ინფორმაციას საქართველოში ნავთობპროდუქტების იმპორტის, ასევე საქართველოს სამხედრო სფეროში მათ ხელთ არსებული თუ გამოგონილი ვითარების შესახებ, ავრცელებდნენ ცრუ ინფორმაციას, რომ თითქოს საქართველოს საჰაერო სივრცე გამოიყენებოდა ირანული საბრძოლო დრონების რუსეთის ფედერაციისათვის მისაწოდებლად…“]. მსგავსი ბრალდება შესაძლოა ყველა ოპონენტის წინააღმდეგ გამოიყენონ, მით უმეტეს, თუ არც ბრალდების დასაბუთება დასჭირდებათ. ამ ნაწილზე რა შეგიძლიათ გვითხრათ?  

მე ჯერ ეს წაყენებული ბრალდებები და მით უმეტეს მტკიცებულებები არ წამიკითხავს, ამიტომ არ ვიცი რას ეყრდნობა ბრალდება. მაგრამ ეჭვი მაქვს, რომ ამისთანა მტკიცებულება ბუნებაში არ არსებობს.

• ასევე, თქვეს, რომ რუსული ნავთობპროდუქტების იმპორტზე აწვდიდნენ ინფორმაციასო. არადა ამაზე უცხოური მედიები ავრცელებდნენ ინფორმაციას და ეს ვერ იქნებოდა დამალული.

არ ვიცი რას ეყრდნობა მათი ბრალდებები, მაგრამ მე ერთი რამ შემიძლია გითხრათ, რომ ევროკავშირის, ევროპარლამენტის დონეზე იქნება ეს, ევროკომისიის თუ მათი ხელმძღვანელების გამონათქვამების დონეზე, მთავარი საყვედურები „ქართული ოცნებისკენ“ არის მიმართული, სადაც საუბარია ადამიანის უფლებების დარღვევებზე. იმიტომ, რომ ქუჩაში ადამიანებს სცემდნენ, აწამებდნენ, უსამართლოდ ასამართლებდნენ, უსამართლოდ აპატიმრებდნენ, აკავებდნენ და ამის გამო აკისრებენ მათ სანქციებს.

ამის გამოა, რომ დასავლეთი აღარ გვიდგას გვერდით და ამას უკვე დემოკრატიული უკუსვლა კი არა, უკვე დიქტატორის დამყარება ჰქვია.

რა შუაშია აქ ირანი, ნავთობი ან სანქციები.

• ადამიანებს რომ სცემდნენ ეს იყო ფაქტი, რადგან ამ ყველაფერს აშუქებდა როგორც ადგილობრივი, ასევე საერთაშორისო მედია. რის საფუძველზე იტყვიან, რომ უცხო ქვეყნებს აწვდიდნენ ინფორმაციას პოლიტიკოსები? ეს ხომ ისედაც ფაქტი იყო.

ვერაფერს ვერ დაამტკიცებენ.

ეს სანქციებიც სინამდვილეში არის შესვლაზე აკრძალვები ანუ მგზავრობის აკრძალვები უცხო ქვეყნებში და ესეც ცალკეულ ქვეყნებში, ხომ? ზოგ შემთხვევაში გერმანია, ჩეხეთი და ასე შემდეგ და ეს ყველაფერი განპირობებულია „ქართული ოცნების“ მხრიდან ადამიანის უფლებების დარღვევით და არა იმის გამო, რომ საქართველოა რაღაცაში მხილებული.

აქ ლაპარაკია ადამიანის უფლებების ფეხქვეშ გათელვაზე, ლაპარაკია ხელისუფლების მიტაცებაზე, ლაპარაკია სამართლის უზენაესობის მოშლაზე და დემოკრატიის დამარცხებაზე. ამიტომ არის, რომ მთელი დასავლეთი, „ქართულ ოცნებას“ განიხილავს როგორც ავტორიტარულ რეჟიმს.

• სააკაშვილის ფაქტორის შემოტანა რაში დასჭირდათ და იმის თქმა, რომ თურმე პატიმრობაში მყოფი პირი სოციალური ქსელებით ამხობდა „ოცნების“ ხელისუფლებას?

პროპაგანდისტული ტრიუკია ესეც და ამით უნდათ რაღაცნაირად „გაამყარონ“ მათი ფუყე, ვითომ სარჩელი, რომელიც შეიტანეს საკონსტიტუციო სასამართლოში.

საზოგადოებაზე მათი ცარიელი ფრაზები გავლენას ვერ მოახდენს, რადგან რაიმე დასაყრდენი არ აქვთ. მხოლოდ ადმინისტრაციული რესურსი უჭირავთ და ისიც ზოგი მოსყიდვით, ზოგი დაშინებით, ეს არის სულ მათი რესურსი.

საზოგადოებაში რა დასაყრდენიც აქვთ, ეს აჩვენა თუნდაც ამ თვითმმართველობის არჩევნებმა, სადაც უამრავმა ადამიანმა საერთოდ არც მიიღო მონაწილეობა და რომელიღაც კალაძემ სულ რაღაც 20%-ი მიიღო თბილისის საარჩევნო ოლქის.

ამ 20%-საც ვერ აიღებდა, რომ არ ყოფილიყო შიშის ფაქტორი, რომ არ ყოფილიყო ადმინისტრაციული ზეწოლის და პენსიაზე, ხელფასზე დამოკიდებული ადამიანების ფაქტორი.

• არასამთავრობოებიც იყო ნახსენები, რომ თითქოს მათთან ერთად მოქმედებდნენ ოპოზიციის ლიდერები. ფიქრობთ, რომ ეს სპეციალურად ჩაწერეს, რომ შემდეგი ისრები მათზე გადაიტანონ?

რა თქმა უნდა. ტყუილად არ არის ეს ფრაზა გამოყენებული. გადავლენ თუ არა არასამთავრობო ორგანიზაციების წინააღმდეგ პირდაპირ ნადირობაზე, ამას ვნახავთ გარკვეულ დროში.

• მთავარი მაინც იკითხება პირადი შურისძიება ივანიშვილის ან მისი პარტიის იმ წარმომადგენლების, რომლებიც დაასანქცირა დასავლეთმა? რადგან აქცენტი სწორედ ამაზე და ძალაუფლების შენარჩუნებაზეა გაკეთებული. თქვენ როგორ ფიქრობთ?

ყველაზე მთავარი რაც იკითხება არის ის, რომ ივანიშვილს, რასაკვირველია, ძალიან არ უნდა ძალაუფლების დაკარგვა და ის იმდენად შორს წავიდა ამ თავის ავტორიტარულ და რეპრესიულ პოლიტიკაში, სახელმწიფოს მიტაცებაში და ასე შემდეგ, რომ მისთვის უბრალოდ სხვა გამოსავალი არ არის, გარდა იმისა, რომ ამ ჭაობში კიდევ უფრო ღრმად შეტოპოს.

თუმცა, არცერთ დიქტატორს ბოლომდე, გრძელვადიან პერსპექტივაში ეს არ გასვლია. საბოლოო ჯამში დაინგრა ისეთი ძლევამოსილი დიქტატორები, დიქტატურები, როგორიც იყო იგივე საბჭოთა კავშირი, ნაცისტური გერმანია და უფრო უახლესი მაგალითებიც გვაქვს სირიის და ლიბიის სახით.

• თუმცა, გვაქვს სხვა მაგალითებიც თუნდაც აზერბაიჯანის ან იგივე თურქეთის სახით, სადაც დღემდე ავტორიტარული რეჟიმები მართავენ. ალბათ იმავეს იმედი აქვს ივანიშვილსაც?

თურქეთი და აზერბაიჯანი ორი სხვადასხვა რამ არის მაინც. მაგრამ საბოლოო ჯამში, რით დამთავრდება ეს ამბავი, როდესაც ერდოღანს აღარ ექნება უკვე არჩევნებში მონაწილეობის საკონსტიტუციო უფლება, მერე ვნახავთ.

ალიევს რაც შეეხება, იქ ცოტა სხვაგვარი ვითარებაა იმ კუთხით, რომ ალიევი, რა თქმა უნდა, ავტორიტარული მმართველია, მაგრამ, მეორე მხრივ, ალიევს აქვს ძალიან მყარი საფუძველი ნავთობის და გაზის სახით, რაც, ასე ვთქვათ, ეკონომიკურ საფუძველს უქმნის მის რეჟიმს.

გარდა ამისა, ალიევის წარმატებები, იგივე ყარაბაღთან მიმართებით და ასე შემდეგ, განაპირობებს აზერბაიჯანული საზოგადოების ლოიალობას მის მიმართ. ამისთანა ფაქტორები ამ ქვეყანაში არ არის, არც ნავთობი და გაზი აქვს ივანიშვილს და მით უმეტეს, არც რაიმე წარმატება.

• მაგრამ აქვს რუსეთის მხარდაჭერა.

კი ბატონო, რუსეთის მხარდაჭერა აქვს და ამაზე დგას სინამდვილეში, მისი რეჟიმის განგრძობითობის ფაქტორი, რომ რუსეთის ემისარია და რუსულ რეჟიმს მიტმასნილი ფიგურა.

მაგრამ როდესაც რუსულ რეჟიმს დაემართება რაღაც განსხვავებული, მაგალითად, უკრაინაში მარცხის მერე, რაშიც დარწმუნებული ვარ, ეს ჯაჭვური რეაქციით გამოიწვევს რაღაც შედეგებს ივანიშვილის რეჟიმისთვის.

___________

ფოტოზე: სანდრო ბარამიძე. კადრი „ფორმულას“ ვიდეომასალიდან.

ამავე თემაზე: