Batumelebi

ფოთის საქალაქო სასამართლომ სამართალდამრღვევად ცნო კამერუნის დროშის ქვეშ მცურავი ტანკერი LIDER PRESTIJ და 100 000 ლარის ოდენობის ჯარიმა დააკისრა.

LIDER PRESTIJ არის Ro-Ro სამგზავრო ტიპის გემი, რომლითაც გადაჰყავთ სატვირთო ავტომობილები, ტრაილერები და მსუბუქი მანქანები.

ბრალდების თანახმად, კამერუნის დროშის ქვეშ მცურავმა LIDER PRESTIJ-მა შავი ზღვა სამეურნეო წყლებით დააბინძურა.

შავი ზღვის დაბინძურების ფაქტი გარემოსდაცვითი ზედამხედველობის დეპარტამენტის შავი ზღვის დაცვის კონვენციური სამმართველოს თანამშრომლებმა, სასაზღვრო პოლიციის თანამშრომლებთან ერთად გამოავლინეს.

მათ მიერ შედგენილი ადმინისტრაციული სამართალდარღვევის ოქმის საფუძველზე, ფოთის სასამართლომ გემი სამართალდამრღვევად ცნო და 100 000 ლარის ოდენობის ჯარიმა დააკისრა.

„კამერუნის დროშის ქვეშ მცურავ გემს საქართველოს ტერიტორიული წყლების დატოვებისა და თავისუფალი ნაოსნობის უფლება დაკისრებული საჯარიმო სანქციისა და გარემოსთვის მიყენებული ზიანის თანხის გადახდის შემდეგ მიეცა,“ – ნათქვამია გარემოსდაცვითი ზედამხედველობის დეპარტამენტის განცხადებაში.

Marinetraffic-ის მონაცემებით LIDER PRESTIJ, რომელიც რეგულარულ საბორნე გადაზიდვებშია ჩართული, 2026 წლის ორ თვეში ფოთის პორტში სამჯერ იმყოფებოდა – 16 იანვარს, 29 იანვარს და 8 თებერვალს.

დეპარტამენტს არ განუმარტავს, როდის დააბინძურა შავი ზღვა გემმა.

გზდ-ს ინფორმაციით, გასულ 2025 წელს, შავი ზღვის კონვენციური სამმართველოს მიერ ჩატარდა საქართველოს ნავსადგურებში შემოსული 259 გემის ინსპექტირება. გამოვლინდა გემებიდან ზღვის დაბინძურების 14 შემთხვევა. გარემოსთვის მიყენებული ზიანის ჯამურმა ოდენობამ 49 539 ლარი შეადგინა.

სურსათის ეროვნული სააგენტოს ცნობით, ქვემო ქართლში, სამეგრელოსა და იმერეთში რძის გადამამუშავებელი არარეგისტრირებული საწარმოები გამოავლინეს.

ქვემო ქართლის დეპარტამენტის ინსპექტორებმა ფიზიკური პირი ლ. ა.-ს (მის: გრიგოლ ხანძთელის ქ. N11, ბოლნისი) რძის გადამამუშავებელ საწარმოში ჩატარებული სახელმწიფო კონტროლის შედეგად კრიტიკული შეუსაბამობები აღმოაჩინეს. ბიზნესოპერატორი საქმიანობდა სააგენტოსაგან მინიჭებული სავალდებულო აღიარების გარეშე და არ იყო რეგისტრირებული ეკონომიკურ საქმიანობათა რეესტრში;

პროდუქტები იწარმოებოდა ტექნოლოგიური პროცესისა და სანიტარიულ-ჰიგიენური ნორმების უხეში დარღვევით, პასტერიზაციისა და სათანადო დეზინფექციის გარეშე. სააგენტოს უფლებამოსილი პირების მიერ დაილუქა რძის შემცველი პროდუქტები, ეგრეთ წოდებული „ერბო“, „ნადუღი“, „კარაქი“, ასევე გამოვლინდა საეჭვო წარმომავლობის რძე და აღდგენილი რძე (რძის ფხვნილი).

ბაღდათის მუნიციპალიტეტის სოფელ ვარციხეში, ფიზიკური პირი ლ. ჯ. ყველს ამზადებდა არალეგალურ საწარმოში, რომელსაც არ ჰქონდა სააგენტოსაგან მინიჭებული სავალდებულო აღიარება, ასევე არ იყო რეგისტრირებული ეკონომიკურ საქმიანობათა რეესტრში. ბიზნესოპერატორმა ვერ წარმოადგინა მიკვლევადობის დამადასტურებელი დოკუმენტაცია და არ იცავდა ეტიკეტირების მოთხოვნებს.

აღიარებისა და ეკონომიკურ საქმიანობათა რეესტრში რეგისტრაციის გარეშე საქმიანობდა შპს ,,თეთრი დათვიც“ სენაკის მუნიციპალიტეტის სოფელ ნოსირში. ობიექტში გამოვლინდა კრიტიკული და არაკრიტიკული შეუსაბამობები – სანიტარიულ-ჰიგიენური ნორმებისა და ეტიკეტირების წესის დარღვევა.

გამოვლენილი დარღვევების გამო ბიზნესოპერატორები დაჯარიმდნენ და შეუსაბამობების აღმოფხვრამდე შეუჩერდათ საწარმოო პროცესი“ – წერს სააგენტო.

თეთრიწყაროს მოსამართლის, ვლადიმერ ხუჭუას წარდგინება, რომელიც მიიჩნევს, რომ „ოცნების“ მმართველობის დროს შეცვლილი კანონი ანტიკონსტიტუციურია, საკონსტიტუციო სასამართლომ განხილვის გარეშე დატოვა.

საუბარია საქმეზე, რომელიც ეხება ჯარიმის გადაუხდელობის შემთხვევაში ადმინისტრაციული პასუხისგებაში მიცემული პირის დაპატიმრებას – თუ პირი ჯარიმას ვერ იხდის, ის მოსამართლემ უნდა დააპატიმროს. წარდგინება შეეხებოდა ასკ-ის 166-ე [წვრილმანი ხულიგნობა] და 173-ე [პოლიციელის კანონიერი მოთხოვნის დაუმორჩილებლობა] მუხლს. ყველაზე ხშირად ზუსტად ამ მუხლებით აკავებენ და შემდეგ უკვე აპატიმრებენ პროევროპული საპროტესტო აქციის მონაწილეებს.

მოსამართლე ვლადიმერ ხუჭუამ საკონსტიტუციო სასამართლოს კიდევ ერთი სამართლებრივი ნორმის კონსტიტუციურობის დადგენის მოთხოვნითაც მიმართა, რომელიც არ უკავშირდება პროტესტს და წინააღმდეგობას – წარდგინება მარიხუანას მოხმარების, ან შენახვის გამო ავტომანქანის მართვის უფლების კონკრეტული ვადით ჩამორთმევას ეხება. მოსამართლის ეს წარდგინება საკონსტიტუციო სასამართლომ არსებითად განსახილველად მიიღო.

თუ რომელიმე მოსამართლე მიიჩნევს, რომ კონკრეტული სამართლებრივი ნორმა ბუნდოვანია, ან უსამართლოა და ეწინააღმდეგება საქართველოს კონსტიტუციას, მას შეუძლია საქმის განხილვა შეაჩეროს და საკონსტიტუციო სასამართლოს მიმართოს. საქმისწარმოების განახლება ამ შემთხვევაში საკონსტიტუციო სასამართლოს გადაწყვეტილებაზეა დამოკიდებული.

მოსამართლე ვლადიმერ ხუჭუა 2021 წლის ივნისიდან არის თეთრიწყაროს რაიონული სასამართლოს მაგისტრატი მოსამართლე წალკის მუნიციპალიტეტში. ეს ის ერთადერთი მოსამართლეა, რომელმაც 2024 წლის საპარლამენტო არჩევნების შემდეგ დააკმაყოფილა სარჩელი საარჩევნო უბნების ბათილად ცნობაზე. საქმე გაჟონილ ბიულეტენებს და ხმების ფარულობის დარღვევას ეხებოდა.

„საკონსტიტუციო სასამართლოს არსებობის ისტორიაში, საკონსტიტუციო სასამართლოს მიერ პირველად არ იქნა არსებითად განსახილველად მიღებული მოსამართლის წარდგინებები იმ საფუძვლით, რომ „სადავო დანაწესი არ წარმოადგენს საქმეზე გამოსაყენებელ კანონს, რომელსაც უნდა დააფუძნოს საქმის განმხილველმა მოსამართლემ დავის სამართლებრივი გადაწყვეტა“.

კონსტიტუციური წარდგინებები წარმოადგენს კონსტიტუციისადმი, ადამიანის უფლებებისადმი და სამოსამართლეო ფიცისადმი ერთგულების აქტს

მე კვლავ გავაგრძელებ სამართლიან, მიუკერძოებელ და კანონის საფუძველზე დამყარებულ ჯეროვანი მართლმსაჯულების განხორციელებას,“ – ამბობს მოსამართლე ვლადიმერ ხუჭუა.

ამ შემთხვევაში მოსამართლე ვალდებულია შეჩერებული საქმისწარმოება განაახლოს.

ამ თემაზე:

დღეს, 16 თებერვალს, საიამ გენერალურ პროკურატურას მიმართა 2024 წლის ნოემბერ-დეკემბერში, საპროტესტო აქციის მონაწილეების წინააღმდეგ შესაძლო ქიმიური ნივთიერებებით მოწამვლის საკითხზე.

საია მოითხოვს გამოძიების შესახებ სრულ ინფორმაციას, დაზარალებული პირების გამოკითხვების ჩატარებას, წყლის ჭავლში ქიმიური ნივთიერების შერევის პრაქტიკის შეფასებას შესაძლო სისხლის სამართლებრივ დანაშაულებთან მიმართებით, პასუხისმგებელ პირთა იდენტიფიცირებას და ასევე, იმ 7 პირის დაზარალებულად ცნობას, რომელთა ინტერესებსაც საია იცავს.

„ვიწყებთ სამართალწარმოებას იმ მოქალაქეების სახელით, რომლებიც 2024 წლის ნოემბერ-დეკემბრის აქციებზე წყლის ჭავლში შერეული ქიმიური ნივთიერებების  შედეგად დაზიანდნენ და შესაბამისი კომუნიკაციით მივმართავთ გენერალურ პროკურატურას.

როგორც ცნობილია, 2024 წელს შსს-მ დემონსტრაციების დასაშლელად გამოიყენა სხვადასხვა სპეციალური საშუალება, მათ შორის წყლის ჭავლი.

გამოყენებული საშუალებების კანონიერებას და პროპორციულობას მივყავართ იქამდე, რომ ეს უტოლდება სისხლის სამართლებრივად დასჯად ქმედებებს, ამასთან დაკავშირებით ხაზგასმით გვინდა აღვნიშნოთ შემდეგი:

წყლის ჭავლში ქიმიური გამაღიზიანებლების შერევის პრაქტიკა საქართველოში მკაფიოდ არ არის რეგულირებული, პოლიციის შესახებ კანონი და შსს-ს ინსტრუქციები არ შეიცავს ნორმებს, რომლებიც დაასაბუთებდა ასეთ გამოყენებას.

მაშინ, როდესაც 2015 წლის #1002-ე ბრძანების ძველი რედაქციიდან ამოღებულია წყლის ჭავლის, რეზინის ტყვიებისა და ცრემლსადენი გაზის ერთდროული გამოყენების პირდაპირი აკრძალვა, დამატებითი კანონიერი სტანდარტების გარეშე.

ამ პირობებში, ქიმიური გამაღიზიანებლების თუ სხვა ტიპის გამაღიზიანებლებით გაჯერებული წყლის ჭავლი ვერ ჩაითვლება კანონით განსაზღვრულ შეკრების მართვის საშუალებად და ეწინააღმდეგება როგორც ეროვნულ კანონმდებლობას, ისე კონვენციურ სტანდარტს, რომ ძალის გამოყენება უნდა იყოს კანონიერი, აუცილებელი და პროპორციული.

საია არაერთხელ მიუთითებდა ჯანმრთელობის მძიმე და ხანგრძლივ შედეგებზე, რაზეც დემონსტრანტები საუბრობენ.

ესენია: კანის დამწვრობა, მხედველობის გაუარსება, სუნთქვის უკმარისობა, ნევროლოგიური და ალერგიული დარღვევები, სმენის პრობლემები, სახსრების ტკივილი და სხვა.

მიუხედავად მრავალგვარი მოწოდებებისა, ხელისუფლებამ 2025 წლის დეკემბრამდე არ გაასაჯაროვა ინფორმაცია იმის შესახებ, თუ რა ქიმიური ნივთიერებები გამოიყენებოდა 2024 წლის აქციებზე. ხოლო შსს-მ საიას მიერ მოთხოვნილ ინფორმაციას მანამდე პასუხი საერთოდ არ გასცა.

2025 წლის 10 დეკემბერს ევროპის საბჭოს ადამიანის უფლებათა კომისარმა წერილით მიმართა საქართველოს გენერალურ პროკურორს და მიუთითა, რომ წყლის ჭავლში ქიმიური გამაღიზიანებლების შერევა სერიოზულ კითხვებს აჩენს კანონიერების, აუცილებლობისა და პროპორციულობის შესახებ და ეს უნდა გახდეს გამოძიების ნაწილი,“- აცხადებს საია.

საიას შეფასებით, სუს-ის მიერ წარმოებული გამოძიება ვერ აკმაყოფილებს ეფექტიანი და დამოუკიდებელი გამოძიების კონვენციურ სტანდარტს, რადგან ერთი და იგივე ორგანო პარალელურად იძიებს როგორც შესაძლო უფლებადარღვევას, სპეციალური საშულებების არაპროპორციულ უკანონო გამოყენებას, ასევე თავადვე აყენებს ამ უფლებების დარღვევას ეჭვის ქვეშ.

„ასეთ კონფიგურაციაში გამოძიება ძირს უთხრის როგორც ინსტიტუციურ, იერარქიულ, ასევე პრაქტიკულ დამოუკიდებლობას.

ამ ეტაპზე საია იცავს 7 დაზარალებულს, რომლებიც ჯანმრთელობის მძიმე დაზიანებას უკავშირებენ 2024 წლის ნოემბერ-დეკემბერში მათ წინააღმდეგ გამოყენებულ წყლის ჭავლს და სხვა სპეციალურ საშუალებებს.

ჩვენ მივმართავთ გენერალურ პროკურატურას და ვითხოვთ, გამოძიების შესახებ სრულ ინფორმაციას, დაზარალებული პირების გამოკითხვების ჩატარებას, წყლის ჭავლში ქიმიური ნივთიერების შერევის პრაქტიკის შეფასებას შესაძლო სისხლის სამართლებრივ დანაშაულებთან მიმართებით, პასუხისმგებელ პირთა იდენტიფიცირებას ასევე იმ 7 პირის დაზარალებულად ცნობას, რომელთა ინტერესებსაც ჩვენ წარმოვადგენთ,“ – აცხადებს საია.

საიას განცხადებით, ორგანიზაცია განაგრძობს ამ საკითხზე სამართლებრივ ადვოკატირებას როგორც საქართველოში, ასევე საერთაშორისო უფლებადაცვით პლატფორმებზე.

ბათუმში ინტერპოლის წითელი ცირკულარით ძებნილი, 1985 წელს დაბადებული პირი დააკავეს.

შსს-ს ინფორმაციით, დაკავებული პირი თურქეთის რესპუბლიკის მოქალაქეა, რომელიც „სხვადასხვა მძიმე დანაშაულის ჩადენისთვის ინტერპოლის წითელი ცირკულარით იძებნებოდა.

ამჟამად, დაკავებულის მიმართ კანონით გათვალისწინებული საექსტრადიციო პროცედურები მიმდინარეობს“- ამბობს შსს.

აჭარაში ოთხი ხის ჯამესთვის ელექტროგაყვანილობის პროექტების შესყიდვაზე ტენდერია გამოცხადებული. ტენდერში აღნიშნულია, რომ ოთხივე ჯამე, რომლებიც კულტურული მემკვიდრეობის ძეგლებია, ავარიულ მდგომარეობაშია.

„ავარიულ მდგომარეობაში მყოფი კულტურული მემკვიდრეობის ძეგლების – ქობულეთის მუნიციპალიტეტის სოფლებში: დაგვა, ხალა, კვირიკე და ქედის მუნიციპალიტეტის სოფელ ბზუბზუში ელექტროსამუშაოების საპროექტო დოკუმენტაციის შედგენაზე“ ტენდერი აჭარის კულტურული მემკვიდრეობის დაცვის სააგენტომ [კმდს] გამოაცხადა.

შესყიდვის სავარაუდო ღირებულება 9 ათასი ლარია. წინადადებების მიღება კი 2026 წლის 18 თებერვალს დაიწყება და 20 თებერვალს დასრულდება.

ტენდერში გამარჯვებულმა პროექტები 50 დღეში უნდა მოამზადოს.

კმდს-ს სატენდერო კომისიის ოქმში აღნიშნულია, რომ „სააგენტოს მიერ 2026 წელს დაგეგმილია ავარიულ მდგომარეობაში მყოფი კულტურული მემკვიდრების ძეგლების რეაბილიტაციის მიზნით საპროექტო დოკუმენტაციის შესყიდვა…

სააგენტოს წარმომადგენლების მიერ განხორციელდა აჭარის ტერიტორიაზე არსებული ხის ჯამეების შემოწმება უსაფრთხოების მიმართულებით.

შემოწმების შედეგად გამოვლინდა ხის ჯამეებში ელექტროგაყვანილობის მოწყობის აუცილებლობა. საწყის ეტაპზე შერჩეული იქნა 4 ხის ჯამე, სადაც საჭიროა სამუშაოების ჩატარება. სამუშაოების განხორციელებამდე კი აუცილებელია შესაბამისი საპროექტო დოკუმენტაციის შედგენის მომსახურების შესყიდვა.“

ამავე თემაზე:

სტატისტიკის ეროვნული სამსახურის ინფორმაციით, 2026 წლის იანვარში წინა წლის იანვრის თვესთან შედარებით საქართველოს საგარეო ვაჭრობა შემცირდა.

„2026 წლის იანვარში საქართველოში საქონლით საგარეო სავაჭრო ბრუნვამ (არადეკლარირებული ვაჭრობის გარეშე) 1 მილიარდ 597 მილიონი აშშ დოლარი შეადგინა, რაც წინა წლის შესაბამისი პერიოდის მაჩვენებელზე 24.2 პროცენტით ნაკლებია.

აქედან, ექსპორტი 480.4 მილიონი აშშ დოლარი იყო (გაიზარდა 19 პროცენტით), ხოლო იმპორტი 1 მილიარდ 117 მილიონი აშშ დოლარი (შემცირდა 34.5 პროცენტით),“ – ნათქვამია ანგარიშში, რომელიც საქსტატმა გამოაქვეყნა.

უარყოფითმა სავაჭრო ბალანსმა 2026 წლის იანვარში 636.6 მილიონი აშშ დოლარი შეადგინა, რაც საგარეო სავაჭრო ბრუნვის 39.9 პროცენტია.

საქართველოში არასრულწლოვანთა მიერ ჩადენილი დანაშაულის მაჩვენებელი ბოლო წლებში იზრდება. ამ ფონზე, სახელმწიფო აუდიტის ბოლო ანგარიშის მიხედვით, სერიოზული პრობლემებია განრიდება-მედიაციის პროგრამაში – მექანიზმში, რომელიც ახალგაზრდებს ნასამართლეობის გარეშე ცხოვრების გაგრძელების შანსს აძლევს.

განრიდებისა და მედიაციის პროგრამა განკუთვნილია არასრულწლოვნებისა და 18–21 წლის ახალგაზრდებისთვის. მისი მიზანია, მათ სასჯელისა და ნასამართლეობის გარეშე გააგრძელონ ცხოვრება და დაუბრუნდნენ კანონმორჩილ გზას.

აუდიტის ანგარიშის მიხედვით, პროგრამის ეფექტიანობის ერთ-ერთი მთავარი მაჩვენებელია რეციდივი – რამდენი ბენეფიციარი ჩაიდენს განმეორებით დანაშაულს. საქართველოს პროკურატურის განმარტებით, საერთაშორისო სტანდარტის მიხედვით, რეციდივად ითვლება შემთხვევა, როდესაც პირი ხელშეკრულების დასრულებიდან სამი წლის განმავლობაში კვლავ ჩაიდენს დანაშაულს. ასეთი კვლევა ყოველ სამ წელიწადში ერთხელ ტარდება. ბოლო კვლევა 2025 წელს ჩატარდა და 2019–2021 წლებში განრიდებულ პირებს შეეხებოდა.

ამასთან, იზრდება იმ პირთა წილი, ვინც ხელშეკრულების დასრულებიდან სამი წლის განმავლობაში კვლავ ჩაიდენს დანაშაულს.

აუდიტის ჯგუფმა დამატებით გააანალიზა 2022 წელს პროგრამაში ჩართული 585 არასრულწლოვნის მონაცემები და შეადარა ისინი 2022–2025 წლების [1 მაისამდე] პირობით მსჯავრდებულთა და პატიმართა მონაცემებს. აღმოჩნდა, რომ 110 პირმა – ანუ დაახლოებით 19%-მა – განმეორებით ჩაიდინა დანაშაული.

აუდიტი აღნიშნავს, რომ ამ პირებისთვის ხელშეკრულების დასრულებიდან ჯერ სრულად არ არის გასული სამი წელი, რაც ნიშნავს, რომ მაჩვენებელი შესაძლოა კიდევ გაიზარდოს.

გამოვლენილი ტენდენცია სისტემურ პრობლემებზე მიუთითებს და საჭიროებს მიზანმიმართულ რეაგირებას – ასკვნის აუდიტი.

რა პრობლემები გამოავლინა აუდიტმა?

• ერთიანი პოლიტიკის არქონა

დღემდე არ არსებობს ერთიანი პოლიტიკის დოკუმენტი, რომელიც განრიდება-მედიაციის პროცესს სრულად და მკაფიო ხედვით განსაზღვრავს. სხვადასხვა აქტივობა გაწერილია ცალკეულ სტრატეგიებსა და დოკუმენტებში, თუმცა ისინი ფრაგმენტულია და ერთმანეთთან სათანადოდ კოორდინირებული არ არის.

არსებული დოკუმენტები ვერ ფარავს ისეთ მნიშვნელოვან საკითხებს, როგორიცაა სოციალური მუშაკების ჩართულობა, სარეაბილიტაციო პროგრამების ხელმისაწვდომობა და საზოგადოების ინფორმირებულობის ზრდა.

• მონაცემთა მართვის სერიოზული ხარვეზები

2025 წლის ნოემბრის მდგომარეობით, ელექტრონული საქმისწარმოების სისტემა არ არის დანერგილი. მონაცემები თანამშრომლებს Ms Excel-ის ფაილებში [2010 წლიდან] შეჰყავთ.

აუდიტის მიხედვით, არსებული ბაზა არასრული და ზოგ შემთხვევაში არაზუსტია. ამასთან, სენსიტიური ინფორმაციის ამ ფორმით შენახვა ზრდის მონაცემების დაკარგვის ან არასწორი გამოყენების რისკს.

• დაზარალებულთა ჩართულობის პრობლემა

ევროსაბჭოს რეკომენდაციით, აღდგენითი მართლმსაჯულება შეიძლება გამოყენებულ იქნას სისხლის სამართლის პროცესის ნებისმიერ ეტაპზე. თუმცა საქართველოში პრაქტიკაში პრობლემებია.

თუ დაზარალებული თავიდან უარს ამბობს მედიაციაში მონაწილეობაზე, მედიატორი მასთან კომუნიკაციას წყვეტს. თუ მოგვიანებით აზრს შეიცვლის, მისი ხელახალი ჩართვის მექანიზმი კანონით განსაზღვრული არ არის. ასევე, დაზარალებულებს არ მიეწოდებათ ინფორმაცია მხარდამჭერი პროგრამების შესახებ.

• რეგიონებში სერვისების დეფიციტი

ბენეფიციარებისთვის განკუთვნილი სერვისები – ფსიქო-სოციალური, საგანმანათლებლო, სპორტულ-კულტურული და მოხალისეობრივი აქტივობები – ქვეყნის მასშტაბით თანაბრად ხელმისაწვდომი არ არის.

ზოგიერთ რეგიონში სოციალური მუშაკი საერთოდ არ არის და მათ ფუნქციას პრობაციის ოფიცრები ასრულებენ. თუმცა ისინი ვერ უზრუნველყოფენ სრულფასოვან სარეაბილიტაციო პროგრამებს და ბენეფიციარებს ძირითადად მხოლოდ ზოგად კონსულტაციებს სთავაზობენ.

• პროფესიულ განათლებაზე დაბალი ხელმისაწვდომობა

პროფესიულ განათლებაში ჩართვა კიდევ ერთი პრობლემაა. 2021–2024 წლებში პროგრამაში ჩართვის მიზნით 184 ბენეფიციარის მონაცემი გადაიგზავნა, თუმცა სერვისით რეალურად მხოლოდ ხუთმა პირმა ისარგებლა.

მიზეზად სახელდება ის, რომ კოლეჯების პროგრამები ვერ გადის აკრედიტაციას ან ვერ ხერხდება ჯგუფების დაკომპლექტება.

ოფიციალური მონაცემებით, პროფესიულ პროგრამაში ჩართული იყო მხოლოდ 10 ბენეფიციარი, თუმცა მათი კურსის დასრულების დამადასტურებელი დოკუმენტები ვერ იქნა წარმოდგენილი და უცნობია, რა სპეციალობებში გადამზადდნენ ისინი.

ანგარიშის მიხედვით „განრიდება-მედიაციის პროცესის წარმატებისთვის მნიშვნელოვანია, რომ საკმარისი რაოდენობის კვალიფიციური სოციალური მუშაკები და მედიატორები იყვნენ ჩართული. თუმცა, აღრიცხვის სისტემაში არსებული ხარვეზების გამო [ზოგჯერ ინფორმაცია სრულად არ ივსება და საქმეების სტატუსები დროულად არ ახლდება], აუდიტის ჯგუფმა ვერ შეძლო 2023-2024 წლებში ბენეფიციართა მიერ მიღებული სერვისებისა და პროგრამების, ასევე თითოეული სოციალური მუშაკის დატვირთვის სრულყოფილი შეფასება“.

აუდიტი ასევე წერს, რომ „2023-2024 წლებში განრიდება-მედიაციის პროცესი ფინანსდებოდა სსიპ – დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს როგორც საბიუჯეტო ასიგნებებიდან, ასევე საკუთარი სახსრებიდან.

ხარჯები ასახულია „სააგენტოს ადმინისტრაციული მართვისა და კონტროლის“ ქვეპროგრამის ფარგლებში. ამ ქვეპროგრამაში გაწეული სახსრები მოიცავს როგორც განრიდება-მედიაციის პროცესისთვის საჭირო რესურსებს [მაგალითად, სოციალური მუშაკებისა და პრობაციის ოფიცრების შრომის ანაზღაურებას, სხვადასხვა სახის კულტურული/შემეცნებითი აქტივობების ორგანიზების ხარჯებს], ასევე სააგენტოს სხვა ადმინისტრაციული და საოპერაციო ხასიათის ღონისძიებების დაფინანსებას.

შესაბამისად, არსებული პროგრამული სტრუქტურის გათვალისწინებით, შეუძლებელია ზუსტი გამიჯვნა, რა მოცულობის სახსრები დაიხარჯა უშუალოდ განრიდება-მედიაციის პროგრამის განხორციელებაზე.“ – წერს აუდიტი.

აუდიტის ანგარიშის მიხედვით აღნიშნული სააგენტოს მთლიანი ხარჯი კი 17 მილიონ ლარზე მეტი იყო, როგორც 2023, ასევე 2024 წელს.

აუდიტის რეკომენდაციები:

განრიდება-მედიაციის პროცესის გასაუმჯობესებლად საჭიროა შეიქმნას ერთიანი პოლიტიკის დოკუმენტი, სადაც დეტალურად იქნება გაწერილი რა უნდა გაკეთდეს, რა ვადებში და როგორ შეფასდება შედეგები. ეს დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულ სააგენტოს მისცემს შესაძლებლობას, რეგულარულად გააკონტროლოს შესრულებული სამუშაო.

საჭიროა დაინერგოს ელექტრონული საქმისწარმოების სისტემა, რომელიც გააერთიანებს პროცესში ჩართული ყველა უწყების მონაცემებს, დაიცავს კონფიდენციალურობას და შესაძლებელს გახდის ინფორმაციის ანალიზს. ეს გაამარტივებს პროცესების მართვას და მონიტორინგს.

იმისთვის, რომ მედიაციით დასრულებული საქმეების რაოდენობა გაიზარდოს: სააგენტომ იუსტიციის სამინისტროსა და პროკურატურასთან ერთად უნდა შეიმუშაოს მექანიზმი, რომელიც დაავალდებულებს მედიატორს, რეგულარულად ჰქონდეს კომუნიკაცია დაზარალებულთან;

გაიზარდოს დაზარალებულთა ინფორმირებულობა მათთვის ხელმისაწვდომი სერვისების შესახებ, რათა მათ აქტიურად ჩაერთონ შერიგების პროცესში.

სერვისების ხელმისაწვდომობისა და მრავალფეროვნების გასაზრდელად საჭიროა: გაიზარდოს კვალიფიციური კადრების რაოდენობა და მოტივაცია რეგიონებში; კერძო და საჯარო სექტორის თანამშრომლობით გაფართოვდეს მოხალისეობრივი აქტივობები; გაფართოვდეს პროფესიულ განათლებაზე ხელმისაწვდომობა, რაც ხელს შეუწყობს ბენეფიციართა რეაბილიტაციას და საზოგადოებაში ინტეგრაციას.

საქართველოს პროკურატურის მონაცემებით, 2024 წელს განრიდებულ და ბრალდებულ არასრულწლოვანთა საერთო რაოდენობა 1164 იყო, რაც 2023 წელთან შედარებით გაზრდილია [2023 წელს იყო – 1010].

პროკურატურის კვლევის მიხედვით 2024 წელს განრიდებული 674 არასრულწლოვნიდან:

130 მოზარდის [19%] მშობლები განქორწინებულები იყვნენ.

ხოლო 138 არასრულწლოვნს [20.5%] ორივე ან ერთ-ერთი მშობელი ემიგრაციაში ჰყავდა. მათ შორის:

19 შემთხვევაში – ორივე მშობელი იყო საზღვარგარეთ;
70 შემთხვევაში – დედა;
49 შემთხვევაში – მამა.

ამავე თემაზე „ბათუმელების“ არქივიდან

საერთაშორისო მნიშვნელობის საავტომობილო გზებსა და გზისპირა ზონებში – გზის ღერძიდან 200 მეტრის ფარგლებში ორივე მხარეს – გზების მფლობელთან შეუთანხმებლად აკრძალული იქნება მშენებლობა. ასეთ შეზღუდვას ითვალისწინებს „ოცნების“ მთავრობის დადგენილების პროექტი, რის შესახებაც ინფორმაციას საავტომობილო გზების დეპარტამენტი ავრცელებს.

დეპარტამენტის ინფორმაციით ახალი „რეგულაცია შეეხება იმ მონაკვეთებს, რომლებიც უკვე ექსპლუატაციაშია ან სადაც მიმდინარეობს ან დაგეგმილია მაგისტრალური გზების მშენებლობა და მოდერნიზაცია. მათ შორისაა თბილისი–სენაკი–ლესელიძე, სენაკი–ფოთი–სარფი, თბილისი–წითელი ხიდი, თბილისი–ბაკურციხე–ლაგოდეხი, მარნეული–სადახლო, თბილისის შემოსავლელი და სამტრედია–ლანჩხუთი–გრიგოლეთი.“

„ახალი რეგულაცია მომზადებულია „საავტომობილო გზების შესახებ“ საქართველოს კანონში შეტანილი ცვლილებების საფუძველზე და მიზნად ისახავს ინფრასტრუქტურის გამართული ფუნქციონირების დაცვასა და საერთაშორისო სტანდარტებთან შესაბამისი სატრანსპორტო სისტემის განვითარებას…

მნიშვნელოვანია, რომ გზების მიმდებარე ტერიტორიებზე ქაოტურმა და უნებართვო საქმიანობამ არ შეაფერხოს მიმდინარე და დაგეგმილი ინფრასტრუქტურული პროექტები, არ შექმნას უსაფრთხოების დამატებითი რისკები და არ დააზიანოს გრძელვადიანი განვითარების სტრატეგია.

გზისპირა ზონაში დაუკითხავი საქმიანობის შეზღუდვა უზრუნველყოფს გზების გამართულ და შეუფერხებელ ფუნქციონირებას“ – წერს გზების დეპარტამენტი.

„ოცნების“ მთავრობამ 2026 წლის 12 თებერვალს გამოსცა დადგენილება – „საერთაშორისო მნიშვნელობის საავტომობილო გზებზე/საავტომობილო გზების მონაკვეთებზე და გზისპირა ზონებში (გზის ღერძიდან 200 მეტრი ორივე მხარეს) გზების მფლობელთან შეუთანხმებლად აკრძალული საქმიანობების ჩამონათვალის დამტკიცების შესახებ“ – რომელიც 2026 წლის 19 თებერვლიდან ამოქმედდება.

ამ დადგენილების მიხედვით გზების მფლობელთან შეუთანხმებლად სამშენებლო საქმიანობა (გზის ღერძიდან 200 მეტრი ორივე მხარეს) აკრძალულია შემდეგი გზების გასწვრივ:

მთავარი ფოტო: გრიგოლეთი-ქობულეთის ავტობანი / „ბათუმელების“ არქივიდან

„ევროპამ დაასრულა ხანგრძლივი შვებულება მსოფლიო ისტორიიდან“ – განაცხადა დღეს, 13 თებერვალს, გერმანიის კანცლერმა, ფრიდრიხ მერცმა მიუნხენის 62-ე უსაფრთხოების კონფერენციაზე სიტყვით გამოსვლისას. „დოიჩე ველეს“ ცნობით, მერცმა გამოიყენა გერმანელი ფილოსოფოსის, პეტერ სლოტერდაიკის ციტატა.

გერმანიის კაცლერმა განაცხადა, რომ წესებზე დაფუძნებული მსოფლიო წესრიგი წარსულს ჩაბარდა და დიდი სახელმწიფოების მიერ მართულ მსოფლიოში თავისუფლება საფრთხის ქვეშაა. მან ამის მაგალითად რუსეთის უკრაინის წინააღმდეგ დაწყებული ომი დაასახელა.

„დიდი სახელმწიფოების ეპოქაში ჩვენი თავისუფლება აღარ იგულისხმება თავისთავად. ის საფრთხის ქვეშაა. ამ თავისუფლების დაცვა მოითხოვს სიმტკიცეს და ნებისყოფას. ეს მოითხოვს, რომ მზად ვიყოთ ცვლილებებისთვის, ადაპტაციისთვის და, დიახ, მსხვერპლისთვისაც კი. და არა ოდესმე, არამედ ახლავე“, – ციტირებს „დოიჩე ველე“ გერმანიის კანცლერს.

„დოიჩე ველეს“ ცნობით, მერცმა ხაზი გაუსვა, რომ ნატოს წევრობა კონკურენტული უპირატესობაა არა მხოლოდ ევროპისთვის, არამედ ეს უპირატესობაა ამერიკის შეერთებული შტატებისთვისაც და აშშ-ის მუშაობა შესთავაზა ნდობის აღსადგენად.

მერცი თავისი გამოსვლის იმ ნაწილში, რომელიც პირდაპირ ვაშინგტონისადმი იყო მიმართული,  ინგლისურ ენაზე გადაერთო და თქვა, რომ „დიდი სახელმწიფოების მეტოქეობის ეპოქაში, შეერთებული შტატებიც კი არ იქნება საკმარისად ძლიერი, რომ მარტომ იმოქმედოს“.

„ჩვენი მეგობრები შეერთებულ შტატებში ტემპს აჩქარებენ. ისინი მიხვდნენ, რომ ჩინეთს ჩამორჩებიან…  ჩვენ, ევროპელები, ასევე ვიღებთ ზომებს ამ ახალ დროში, თუმცა, ჩვენ მივდივართ აშშ-ის ადმინისტრაციისგან განსხვავებულ შედეგებსა და დასკვნებამდე“, – განაცხადა გერმანიის კანცლერმა.

თავისი გამოსვლისას გერმანიის კანცლერმა კიდევ ერთხელ დაუჭირა მხარი კიევს. მან თქვა, რომ მხარს უჭერენ უკრაინას რუსული იმპერიალიზმის წინააღმდეგ ბრძოლაში და იყენებენ ფინანასურ, დიპლომატიურ და სამხედრო გზებს ამისათვის.

მიუნხენის 62-ე უსაფრთხოების კონფერენცია დღეს, 13 თებერვალს დაიწყო და 15 თებერვალს დასრულდება.

„საქართველო გახდება ძველი მანქანების სასაფლაო. დაიწყება იმპორტი დამტვრეული მანქანებისა, რომელიც იქნება მოძველებული – 15 და 20-წლიანი მანქანების ნაწილების მომმარაგებელი. და უცბად დავინახავთ, მანქანების პარკის გამოცოცხლების ნაცვლად საქართველოში, სინამდვილეში, ივლის 6 წლის მანქანები მცირე რაოდენობით და ჩარჩება ბაზარზე, ტრასაზე ივლის 15-20 წლის ევროპული მანქანები. ეს კიდევ უფრო გააუარესებს ეკოლოგიას,“ – ეს მოლოდინი აქვს პოლიტიკოსსა და ეკონომისტს, რომან გოცირიძეს „ოცნების“ ახალ გადაწყვეტილებაზე – „ქართული ოცნების“ მთავრობა აპირებს აკრძალოს 6 წელზე მეტი ხნის ავტომანქანების იმპორტი საქართველოში.

რა ეფექტი ექნება ამას და ვინ იხეირებს აკრძალვით? – „ბათუმელებმა“ რომან გოცირიძესთან ინტერვიუ ჩაწერა.

• ბატონო რომან, თქვენი აზრით, რა შედეგზეა გათვლილი „ოცნების“ ახალი ინიციატივა? 6 წელზე მეტი ხნის ავტომობილების იმპორტი იკრძალება. 

როდესაც „ქართული ოცნება“ რაიმე გადაწყვეტილებას იღებს, პირველი კითხვა უნდა დაისვას ასე: ვის ინტერესებს ემსახურება ეს? პრიორიტეტები ასეა: საკუთარი გამორჩენა და კლანის ინტერესები ნებისმიერ გადაწყვეტილებაში, თუნდაც იგივე უნივერსიტეტების შეერთება-არ შეერთების საკითხზე.

ამის შემდეგია უკვე პოლიტიკური ეფექტი. შეიძლება, შეფუთონ პროპაგანდისტულად, თითქოს მოსახლეობისთვის სარგებელი მოაქვთ.

• გვითხრეს უკვე, რომ ეს გადაწყვეტილება საგზაო მოძრაობის გადატვირთულობის პრობლემას მოაგვარებს, ანუ საცობებსო. ასევე, მიზანია ეკოლოგიური მდგომარეობის გაუმჯობესება. 

აცხადებენ, რომ ეს გადაწყვეტილება არის ქალაქის განტვირთვის მექანიზმი, რომ ადამიანებმა ნაკლები მანქანა იყიდონ – ანუ ქალაქის განტვირთვა, ნაკლები გამონაბოლქვი იქნება მანქანებისგან და ვითომ ბუნებაზე ზრუნვა, მაგრამ რატომ ხდება ასე, რომ თბილისი გაუვალია? ხუთ წელიწადში საერთოდ რა მოხდება, არავინ იცის.

ჩემი აზრით, არც ეს გადაწყვეტილება არაფერს არ უშველის გადატვირთულობას.

თბილისში, „ქართული ოცნების“ კლანმა, სადაც კი რაიმე სადგომის მოწყობა შეიძლებოდა, ცათამბჯენები ჩადგა. წარმოიდგინეთ, ფიზკულტურის ინსტიტუტი, „ლოკომოტივის“ სტადიონის წინ – ამაზე ეკოლოგიური და უკეთესი ადგილი თბილისში არ არსებობდა და რა უყვეს? – დაანგრიეს ფიზკულტურის ინსტიტუტი და დეპუტატმა კორპუსები წამოჭიმა, რომელიც ახლა პარლამენტში ზის.

ქალაქის ცენტრი გადაივსო „ოცნებასთან“ დაკავშირებული ბიზნესმენების მიერ აშენებული კორპუსებით: დაწყებული წყნეთიდან და ბაგებიდან, დამთავრებული ორთაჭალამდე.

იგეგმება ცათამბჯენების აშენება ვაკე-საბურთალოს გზაზე, გვერდით ივანიშვილმა გაყიდა იპოდრომის ტერიტორია. ნავთობმპორტიორი კლანის ნაწილი აშენებს ცათამბჯენებს. სამედიცინო უნივერსიტეტთანაც კი, ცათამბჯენებს აშენებენ. ცათამბჯენებს აშენებს საზოგადოებრივი მაუწყებლის ადგილას – ანგრევენ იქაურობას და საცხოვრებელი კორპუსები იქნება…

ზოოპარკთან 200 მეტრში უკვე ივანიშვილის კორპუსია, რომელიც ახლა ნაკაშიძეს და ვიღაც რუს ბიზნესმენებს მიჰყიდა. აბრეშუმის ქარხნის ტერიტორიაზეც შენდება ცათამბჯენები, ანუ იმდენი რამ შენდება ქალაქის ცენტრში, თანაც, ეს არის ელიტური ბინები და თითოეულ ოჯახში მხოლოდ ერთი მანქანა არ იქნება. ამ კორპუსებში ერთ ოჯახში ერთიც იქნება და სამი ავტომანქანაც.

ამას ემატება ტრანსპორტის ქსელის არასწორი დაგეგმარება.

ხელისუფლებამ ფული რომ იშოვოს, ქალაქებს უზღუდავს სასუნთქ სივრცეს. თბილისი გადაიქცა თავკომბალად – საქართველოში მოსახლეობა 3,7 მილიონია და მილიონ-ნახევარზე მეტი უკვე თბილისშია თავმოყრილი. მანქანების უდიდესი ნაწილიც თბილისშია.

• ამ აკრძალვით „ოცნებას“ რა ეკონომიკური სარგებელი ექნება? 

ეს ახალი გადაწყვეტილება იმას ნიშნავს, რომ ახალ და ახალთან მიახლოებულ ავტომობილების იმპორტიორებს გაუჩნდება ფული. ასეულობით მილიონები, რომლებიც 10 წლამდე მანქანის შემოტანაში იხარჯებოდა, გადაინაცვლებს ახალ მანქანებში. ადამიანი იძულებული გახდება, რომ დაიკლოს საჭმელი, სასმელი, ოჯახს დააკლოს ფული და იყიდოს ძვირიანი ავტომანქანა, იყიდოს იმ ბიზნესიდან, რომელიც „ქართულ ოცნებასთან“ არის დაკავშირებული.

ასევე, არაა გამორიცხული დაბალფასიანი ჩინური ავტომობილების იმპორტიც მოიაზრებოდეს ხელისუფლების ინტერესებში.

როდესაც ადამიანს არ შეუძლია 10-წლიანი მანქანის გამოცვლა, ის 10-წლიანი მანქანა ხვალ 11-წლიანი გახდება და 4 წლის შემდეგ – 15-წლიანი. ეს უკვე იმას ნიშნავს, რომ საქართველო აივსება ამორტიზებული, კატალიზატორებგამოცლილი, ძველი მანქანებით.

საქართველო გახდება ძველი მანქანების სასაფლაო. დაიწყება იმპორტი დამტვრეული მანქანებისა, რომელიც იქნება მოძველებული – 15 და 20-წლიანი მანქანების ნაწილების მომმარაგებელი.

და უცბად დავინახავთ, მანქანების პარკის გამოცოცხლების ნაცვლად საქართველოში, სინამდვილეში, ივლის 6 წლის მანქანები მცირე რაოდენობით და ჩარჩება ბაზარზე, ტრასაზე ივლის 15-20 წლის ევროპული მანქანები. ეს კიდევ უფრო გააუარესებს ეკოლოგიას.

• ტექნიკურ შემოწმებას თუ ვერ გაივლის და აეკრძალებათ ძველი ავტომანქანების გამოყენება? 

ეს უკვე სოციალურ აფეთქებას გამოიწვევს. ადამიანები ამ მანქანებით არსებობენ, შოულობენ ფულს. საუბარია არა მარტო ტაქსისტებზე, არამედ ამ მანქანებით გადაადგილებასა და მცირე ბიზნესზე, საშუალო ბიზნესზე, რაც ავტომანქანის გარეშე წარმოუდგენელია.

„ოცნება“ მიიღებს განბაჟებისას მეტ შემოსავალსაც, ვინაიდან ბიუჯეტს უჭირს, იმიტომ, რომ 6-წლიანი მანქანის განბაჟება სხვა არის, ვიდრე 10-წლიანის. მეორეს მხრივ კი, ეს იქნება ზეწოლის მოხდენის ინსტრუმენტი იგივე ტექნიკური შემოწმებით მოქალაქეებზე. ეს იქნება მოქალაქეებზე გავლენის მოპოვების კიდევ ერთი დამატებითი ბერკეტი.

• როგორ, თუ არ მოსწონხარ „ოცნებას“, ვერ გაივლი შემოწმებას და ავტომანქანის გარეშე დარჩები? 

დიახ. ამიტომაც ხან სტანდარტს დაგიწერენ, ხან – დაგიბლოკავენ. ეს იქნება პოლიტიკური მანიპულაციის შედეგი.

კიდევ ერთი გვერდითი მოვლენა: ელემენტარულად მოხდება ის, რაც ხდება რუსეთში ახლა: იყიდიან ავტომანქანას, გადაიტანენ სომხეთში, სომხეთში განაბაჟებენ, აიღებენ სომხურ ნომრებს და სომხურნომრიანი მანქანებით გაივსება თბილისი… როგორც კი რუსეთში დაიწყება და თუ გახსნილი იქნება აზერბაიჯანთან საზღვარი, უამრავი რუსულნომრიანი მანქანით გაივსება ქვეყანა.

ჩვენი მოქალაქე იძულებული გახდება ეს გააკეთოს, რადგან ის ვერ იყიდის 6 წლის მანქანას და შემოიტანს ისევ 10 წლის მანქანას და სომხურად გააფორმებს.

სხვადასხვა სქემა შეიძლება აქ აეწყოს და იძულებული ხდები, რომ ამაში ჩაერთო.

• არ უშვებთ, რომ შესაძლოა, მართლა საცობებისგან დიდი ქალაქების განტვირთვა გადაწყვიტა „ოცნებამ“? 

მოსახლეობა გაბრაზებულია. ყოველ საცობში კალაძეს აგინებენ. ბათუმში მერი ვინაა, კაცმა არ იცის და ვის შეაგინონ, მაგრამ ამ გადაწყვეტილებით საცობების შემცირების შანსი არის ნული. რა გადაწყვეტილებაც არ უნდა მიიღონ, ქალაქგანვითარების დღევანდელი მდგომარეობით, როდესაც ქალაქის ცენტრში უზარმაზარი ცათამბჯენები შენდება, ავტომობილების რაოდენობა ნებისმიერი პირდაპირი, თუ შემოვლითი გზით მაინც გაიზრდება.

1994 წელს ვიყავი საბერძნეთში. მაშინ შემოიღეს ასეთი წესი ათენში, რომ ერთ დღეს უნდა ევლო ქალაქში ლუწ მანქანებს, მეორე დღეს – კენტ მანქანებს. თავიდან ამან უშველა, მაგრამ მერე დაიწყო ის, რომ ვისაც შესაძლებლობა ჰქონდა, ყიდულობდა ორ მანქანას. პირიქით, ამან გამოიწვია სამანქანო პარკის ზრდა. გარდა ამისა, საბერძნეთში მაღალი კორუფციაა: საშვები გაიცა ვითომ ექიმებზე, ვითომ სასწრაფო პროფესიებზე და ფაქტობრივად, ზუსტად ერთ-ორ წელიწადში იმდენად გაიზარდა მანქანების პარკი, რომ საერთოდ შეწყვიტეს ეს.

ლონდონმა როგორ მოუარა გადატვირთულობის პრობლემას, ყველამ ვიცით: ქალაქის ცენტრში თუ შეხვალ, უზარმაზარი ფული უნდა გადაიხადო. ჩვენთან, თბილისში კი, ტროტუარებზეც კი კორპუსებს აშენებენ, უკვე შანსი აღარ არსებობს ქუჩების გაფართოებისა. თბილისის ცენტრი ხდება საცობი.

„ქართული ოცნების“ შინაგან საქმეთა მინისტრის მოადგილე,  ალექსანდრე დარახველიძე ამბობს, რომ მიმდინარე წლის პირველი აპრილიდან ქვეყანაში 6 წელზე მეტი ხნის ავტომანქანების შემოტანა აიკრძალება.

„ცვლილება ძალაში შედის პირველი აპრილიდან. თუმცა, იმ მძღოლებს და ავტომფლობელებს, რომლებიც შეიძენენ ავტომობილებს 2026 წლის პირველ აპრილამდე და ამ ავტომობილების ტრანსპორტირება დაიწყება პირველ აპრილამდე, ამ შემთხვევაში, ეს ცვლილება არ შეეხება.

ასევე, ეს ცვლილება არ ეხება რეექსპორტზე გასატან მანქანებს და იმ ავტომობილებს, რომლებიც უკვე საქართველოშია და რეგისტრირებულია,“ – თქვა ალექსანდრე დარახველიძემ.

ალექსანდრე დარახველიძემ ცვლილების შესახებ  დღეს, 13 თებერვალს, განაცხადა.

გუშინ, 12 თებერვალს, „ქართული ოცნების“ პრემიერმა ირაკლი კობახიძემ თქვა, რომ   პარლამენტში წარადგინეს ახალი კანონპროექტი, რომელიც ითვალისწინებს 6 წელზე მეტი წლოვანების ავტომობილების საქართველოში შემოტანის აკრძალვას.

„რა თქმა უნდა, მცირე გამონაკლისები იქნება გათვალისწინებული. თუმცა ვფიქრობ, რომ არსებითად მნიშვნელოვანია, 6 წელზე მეტი წლოვანების ავტომობილები არ იყოს ქვეყანაში შემოყვანილი“, – განაცხადა ირაკლი კობახიძემ.

სურსათის ეროვნული სააგენტოს ცნობით, აბაშასა და სამტრედიაში ვეტერინარული ზედამხედველობის გარეშე ცხოველის დაკვლის ფაქტები გამოავლინეს.

„სამეგრელოს დეპარტამენტის მიერ ჩატარებული სახელმწიფო კონტროლის შედეგად დადგინდა, რომ ფიზიკური პირი ჯ. ხ. (მის: გამსახურდიას ქ. N116, აბაშა), შემდგომი რეალიზაციის მიზნით, თვითნებურად, სასაკლაოს გვერდის ავლით, სანიტარიულ-ჰიგიენური ნორმების უხეში დარღვევითა და სურსათის უვნებლობისადმი არსებული მოთხოვნების უგულებელყოფით კლავდა ცხოველს; ადგილზე აღმოჩენილი საეჭვო წარმომავლობის ხორცი დაილუქა, ფიზიკური პირი დაჯარიმდა კანონმდებლობის შესაბამისად.

იმერეთის დეპარტამენტის ინსპექტორებმა კრიტიკული და არაკრიტიკული შეუსაბამობები გამოავლინეს ფიზიკური პირის ნ. თ.-ს არალეგალურ სასაკლაოზე (მის: დიდგორის მე-3 შეს #17, სამტრედია). ობიექტი საქმიანობდა სააგენტოს მიერ მინიჭებული სავალდებულო აღიარებისა და ეკონომიკურ საქმიანობათა რეესტრში რეგისტრაციის გარეშე, რის გამოც დაჯარიმდა და შეუჩერდა საწარმოო პროცესი“ – წერს სააგენტო.

სააგენტო მოსახლეობას აფრთხილებს, რომ ვეტერინარული ზედამხედველობის გარეშე ცხოველის დაკვლა საფრთხეს უქმნის ადამიანის ჯანმრთელობასა და სიცოცხლეს და ზრდის ზოონოზური დაავადებების (ჯილეხი, ბრუცელოზი და სხვა) გავრცელებისა და მოწამვლის რისკებს.

_______________

ფოტო: სურსათის ეროვნული სააგენტო

საქართველოს ეროვნული  ბანკის [სებ] ინფორმაციით, მიმდინარე წლის თებერვალში საქართველოს ეროვნული ბანკისთვის გაიხსნა ანგარიშები, როგორც ჩინეთის ცენტრალურ ბანკში, ისე CIBM ბაზრის სადეპოზიტორო ინფრასტრუქტურებში.

„წავიდა ჩვენი რეზერვები ჩინეთში, ეს ნიშნავს რუსეთის ნაბიჯების გამეორებას“ – ასე ეხმაურება გადაწყვეტილებას სებ- ის ყოფილი პრეზიდენტი რომან გოცირიძე.

„რუსეთმა მთელი რეზერვები ოქროსა და ჩინურ იუანში გადაიტანა. დასავლურ ვალუტუბში რაც ჰქონდა გაეყინა და იმ ქვეყნებში არც სურვილი ექნება განთავსების, არც ამის უფლებას მისცემს ვინმე. ყველა ნაბიჯი, რაც „ოცნებამ“ გადადადგა ბოლო წლებში, არის რუსული კანონებისა და ქმედებების პირდაპირი კოპირება. ჩინეთში რეზერვების გადატანის სურვილი დასავლეთზე კიდევ უფრო ჩამოშორების გეგმის ნაწილია“ – მიიჩნევს რომან გოცირიძე. 

სებ-ის პრეზიდენტის, ნათია თურნავას განმარტებით, აღნიშნულ ბაზარზე წვდომამ  საქართველოს ეროვნული ბანკის საინვესტიციო შესაძლებლობები უნდა გააუმჯობესოს და ხელი შეუწყოს საერთაშორისო რეზერვების პორტფელის დივერსიფიკაციას, რისკების მართვის პროცესის ეფექტურობის ზრდას.

სებ-ი განმარტავს, რომ საქართველოს ეროვნული ბანკი შეუერთდა ცენტრალური ბანკების იმ მცირე ჩამონათვალს, რომელთაც ჩინეთის ბანკთაშორის ობლიგაციების ბაზარზე ოპერირების საშუალება ეძლევათ:

„შეთანხმების მიხედვით, სებ-მა აქტიური მოლაპარაკებები დაიწყო  ჩინეთის ბანკთაშორის ობლიგაციების ბაზარზე წვდომის მოპოვებისა და შესაბამისი ხელშეკრულებების გაფორმების მიზნით ჩინეთის ცენტრალურ ბანკთან.

2025 წლის 23 დეკემბერს კი ხელი მოეწერა CIBM ბაზარზე ინვესტირებასთან დაკავშირებულ ხელშეკრულებას, რომლის საფუძველზეც ჩინეთის ცენტრალური ბანკი საქართველოს ეროვნულ ბანკს  აღნიშნულ ბაზარზე ოპერაციების განხორციელებისთვის საჭირო ძირითადი მომსახურებებით უზრუნველყოფს. მათ შორის, ვაჭრობის, ანგარიშსწორებისა და ობლიგაციების კასტოდიური მომსახურების მხარდაჭერით“ – ვკითხულობთ სებ-ის გვერდზე გამოქმვეყნებულ ნათია თურნავას კომენტარში.

სებ-ის ინფორმაციით, CIBM-ზე დაშვების შესახებ შეთანხმება საქართველოს ეროვნული ბანკის დელეგაციის ჩინეთში ოფიციალური ვიზიტისას, ჩინეთის ცენტრალურ ბანკთან გაფორმებული მემორანდუმის ფარგლებში შედგა.

სამსახურებრივი უფლებამოსილების გადამატების ფაქტზე პროკურატურამ შსს-ს თანამშრომელი დააკავა. ინფორმაცია პროკურატურამ გაავრცელა დღეს, 13 თებერვალს.

დაკავებული პოლიციელი გლდანი-ნაძალადევის რაიონის სამმართველოს უფროსის მოადგილეა. პროკურატურის ცნობით, ის 16 წლის ბიჭს აიძულებდა მობილურ ტელეფონში ფოტოები ეჩვენებინა. პოლიციელი არასრულწლოვანს აგინებდა და ემუქრებოდა.

გამოძიების ვერსიით, „10 თებერვალს არასრულწლოვანი გადაადგილდებოდა ნაძალადევის მეტროს მიმდებარე ტერიტორიაზე, რა დროსაც გადამოწმების მიზნით, იგი გლდანი-ნაძალადევის რაიონის სამმართველოს თანამშრომლებმა შეაჩერეს. პოლიციის თანამშრომლებმა განახორციელეს პოლიციის შესახებ საქართველოს კანონით გათვალისწინებული საპოლიციო ღონისძიებები, არასრულწლოვანი პირის გამოკითხვა, მისი იდენტიფიცირების მიზნით.

პოლიციელებს არასრულწლოვანმა სრულად მოახსენა მისი ვინაობის თაობაზე. ადგილზე მყოფმა სამმართველოს უფროსის მოადგილე ლ.ხ.-მ, იცოდა, რომ პოლიციის თანამშრომლების მიერ შეჩერებული პირი იყო არასრულწლოვანი და შესაბამისად, მის მიმართ ნებისმიერ საგამოძიებო/საპროცესო მოქმედებას სჭირდებოდა კანონიერი წარმომადგენლის დასწრება, ასევე საქართველოს სისხლის სამართლის საპროცესო კოდექსით გათვალისწინებული საფუძვლები.

აღნიშნულის მიუხედავად, ლ.ხ.-მ გადაამეტა სამსახურებრივ უფლებამოსილებას და ყოველგვარი სამართლებრივი საფუძვლების გარეშე გადაწყვიტა განეხორციელებინა არასრულწლოვანი პირის მობილური ტელეფონის დათვალიერება, მასში ნარკოტიკის განთავსების დამადასტურებელი ე.წ. ლოკაციის ფოტოსურათის აღმოჩენის მიზნით.

რისთვისაც, ლ.ხ.-მ მოსთხოვა არასრულწლოვანს მობილური ტელეფონის განბლოკვა და მისთვის გადაცემა, რაზეც არასრულწლოვანმა განაცხადა უარი. აღნიშნულით გაღიზიანებულმა ლ.ხ.-მ არასრულწლოვანს მიაყენა სიტყვიერი შეურაცხყოფა, დაემუქრა მას, რომ დააკავებდა და სცადა იძულების გზით მოეხდინა მობილური ტელეფონის განბლოკვა, რაც ვერ მოახერხა.

მთელი ამ პროცესის განმავლობაში არასრულწლოვანი ითხოვდა მისი კანონიერი წარმომადგენლის მოწვევას და ამ შემთხვევაში გამოთქვამდა მზაობას ლ.ხ-ისთვის მიეცა მობილური ტელეფონის დათვალიერების შესაძლებლობა,“ – აღნიშნულია პროკურატურის მიერ გავრცელებულ ინფორმაციაში.

პროკურატურის ცნობით, პოლიციის მაღალჩინოსანმა აღიარა მის მიერ სამსახურებრივი უფლებამოსილების გადამეტების ჩადენის ფაქტი, რის შემდეგაც იგი დააკავეს ბრალდებულის სახით.

ბრალის დადასტურების შემთხვევაში პოლიციელს 3 წლამდე თავისუფლების აღკვეთა ელის.

______________

ფოტო „ბათუმელების“ არქივიდან

2021 წელს მოკლული, 22 წლის ნიკო კვარაცხელიას დედა, იზა ომაძე ფეისბუქზე წერს, რომ იძულებულია ქუჩაში გამოვიდეს, რადგან „სამართალი ამ ქვეყანაში ქუჩაში დადის“.

„პირველ რიგში ბოდიშს გიხდით მეგობრებო!!!!

ცოტახანს უნდა გაგვიძლოთ შვილმოკლულ მშობლებს!!!

შვილის გარდაცვალება მშობლისთვის ხომ გაუსაძლისი ტკივილია, მაგრამ შვილმოკლული მშობლის მდგომარეობა, რომელმაც სამართალი ვერ იპოვა, იცით როგორია???

მიწაში რომ უნდა ჩადონ შენი შვილი მაშინ ძვლებში იმტვრევი და გულის ცემა ცას წვდება!!!! აი, ამ მდგომარეობაში ვართ მეხუთე წელია ყოველი დღე!!!! თანაც ისე, რომ არც არავინ შეგვიწუხებია ჩვენი ტკივილით!!!

ვეღარ ვუძლებ, ვერა!!!!

ყოველივეს თავის დრო აქვს და ყველაფერს თავისი ჟამი ამ ცისქვეშეთში!!!!

ჟამი ქვათა მიმოფანტვისა და ჟამი მათი შეგროვებისა!

ჟამი დარღვევისა და ჟამი შეკერვისა; ჟამი დუმილისა და ჟამი უბნობისა!!! – ეკლესიასტე

ბევრს ვთხოვდი ღმერთს, რომ ჟამი ქუჩაში გამოსვლისა არ დამდგომოდა!!!

მაგრამ დამიდგა!!!!

კი ბატონო, ვიღებ გამოწვევას!!!

მეგობრებო, რამდენიმე დღე მაქვს ძალიან მნიშვნელოვანი!!! და თარიღს ამიტომ ვერ ვწერ!!!

ამ ქვეყანაში სამართალი ქუჩაში დადის, ამიტომ გამოვდივარ ქუჩაში!!!

ღმერთს ვთხოვ, რომ შემახვედროს მეც სამართალი!!!!“ – წერს იზა ომაძე ფეისბუქზე [სტილი დაცულია].

ონლაინ-პლატფორმა Feedc-ის დამფუძნებელი, 22 წლის ნიკო კვარაცხელია 2021 წლის 15 სექტემბერს, თბილისში, ვერაზე მოკლეს. მას 9 ტყვია ესროლეს. ნიკო კვარაცხელია დაჭრიდან მეორე დღეს, კლინიკაში გარდაიცვალა.

ამ საქმეზე ორი ადამიანს მიუსაჯეს პატიმრობა – აკო ჭელიძეს, რომელმაც განზრახ მკვლელობა აღიარა, 17 წელი მიუსაჯეს, ხოლო გიორგი კირვალიძეს – 16 წლით. კვარაცხელიას ოჯახი მიიჩნევს, რომ მკვლელობა შეკვეთილი იყო და მოითხოვენ, გამოძიება ამ მიმართულებით გაგრძელდეს.

რა იცვლება კვერცხის 2 თეთრით გაიაფებით? – ნახეთ „ბათუმელების“ ქუჩის გამოკითხვა ბათუმში

2025 წლის 24 დეკემბერს, „ოცნების“ პრემიერმა ირაკლი კობახიძემ განაცხადა, რომ ფასებთან დაკავშირებულ საკითხზე იმუშავებდნენ სამართალდამცველები, ასევე შეიქმნა საპარლამენტო კომისია.

რა შეიცვალა ამ დაპირების შემდეგ? გაქვთ მოლოდინი, რომ სურსათი გაიაფდება?

„ოცნების“ პარლამენტარი გელა სამხარაული ე.წ. სურსათის ფასების დროებითი საპარლამენტო კომისიის წევრია. მან ამ კომისიასთან ერთად პროდუქტის გაძვირების მიზეზები და მისი შემცირების შესაძლებლობები უნდა შეისწავლოს.

„პროდუქტების, მედიკამენტებისა და საწვავის ფასწარმოქმნის მიზეზების შემსწავლელი“ საპარლამენტო დროებითი კომისია „ოცნების“ პრემიერის ინიციატივით შექმნეს. მანამდე ირაკლი კობახიძემ სასურსათო პროდუქტებზე მაღალი ფასნამატი მოგების მაღალ მარჟას დაუკავშირა. საპარლამენტო კიმისიის გარდა სასურსათო ფასებთან დაკავშირებული საკითხის შესწავლა დაიწყო სახელმწიფო უსაფრთხოების სამსახურმაც.

სურსათის ფასები პარლამენტარ გელა სამხარაულის ინტერესის სფერო მანამდეც უნდა ყოფილიყო. ორი მოწვევის პარლამენტში ის აგრარულ კომიტეტს ხელმძღვანელობდა და თავადაც არის მწარმოებელი.

დეპუტატის ქონებრივი დეკლარაციის მიხედვით, მისი ყოველი წლის შემოსავლებში სოფლის მეურნეობის პროდუქტებიდან მიღებული შემოსავალი 180 000 ლარიდან 200 000 ლარამდეა.

იგი ამჟამად „ოცნების“ პარლამენტის სოფლის მეურნეობის კომიტეტის თავმჯდომარეა.

გელა სამხარაული საპარლამენტო საქმიანობაში 2012 წლიდან არის ჩართული. 2012 -2020 წლებში, VIII – IX მოწვევის პარლამენტში, ის თელავისა და ახმეტის მაჟორიტარი იყო „ოცნებიდან“, X-XI მოწვევის პარლამენტში კი „ოცნების“ პარტიული სიით შევიდა. დამთავრებული აქვს თბილისის სახელმწიფო უნივერსიტეტი, სპეციალობით – ეკონომიკა და მართვა მშენებლობაში.

ქონებრივი დეკლარაციის მიხედვით, დეპუტატი გელა სამხარაული ფლობს 11 მიწის ნაკვეთს, ჯამში 6.717 ჰექტარს, თელავის მუნიციპალიტეტის სოფლებში, იყალთოსა და რუისპირში. ეს ნაკვეთები დეპუტატს 2012-2023 წლებში, სხვადასხვა დროს შეუძენია და ჯამში 70 820 ლარი და 2 000 დოლარი აქვს გადახდილი. 

ამავე დროს, მან დეკლარაციაში 2 ნაკვეთთან დაკავშირებით ფასი არ მიუთითა და ჩაწერა, რომ ეს ნაკვეთები მიღება-ჩაბარების აქტით აქვს დარეგისტრირებული, კიდევ ერთ მიწის ნაკვეთთან დაკავშირებით კი დეკლარაციაში განმარტა, რომ ის მემკვიდრეობით მიიღო.

ასევე, მისივე დეკლარაციის მიხედვით, გელა სამხარაულს თეთრიწყაროს მუნიციპალიტეტის სოფელი პანტიანში შეუძენია მიწის ნაკვეთი, 1000 კვ.მეტრი 200 დოლარად.

დეპუტატი ფლობს ასევე 50 006 კვ. მეტრ ფართობს ყვარელში, რომელიც გაცვლის ხელშეკრულების საფუძველზე დაურეგისტრირებია. გაცვლის ხელშეკრულებით დაურეგისტრირებია ასევე 17 455 კვ.მეტრი მიწის ნაკვეთი ახმეტის მუნიციპალიტეტის სოფელ ალავერდში. საერთო ჯამში ალავერდში მას მიწის სამი ნაკვეთი აქვს, რომელთა ფართობიც ჯამში 55 170 კვ.მეტრია.

 „ოცნების“ დეპუტატ სამხარაულის მიწის ნაკვეთები ჯამში 17 ჰექტარზე მეტ ფართობს მოიცავს, უფრო ზუსტად – 173 346 კვადრატულ მეტრს. 

დეპუტატი სამხარაული ფლობს ასევე სახლს დიდი ეზოთი და საცურაო აუზით სოფელ იყალთოში. საჯარო რეესტრის მონაცემებით ამ სახლის ფართობი 498 კვ.მეტრია, საკარმიდამო ნაკვეთის ფართობი კი – 2564 კვ.მეტრი.

დეპუტატის მეუღლე, ნატალია თხლაშიძე ფლობს 140,19 კვ.მეტრ ბინას თბილისში, ნუცუბიძის ფერდობზე. დეკლარაციის მიხედვით, ეს ბინა მას 2006 წელს, 23 000 დოლარად შეუძენია. 2024 წელს კი ნატალია თხლაშიძეს შეუძენია ასევე ბინა ქობულეთში, 35,4 კვ.მეტრი 37 140 დოლარად. საჯარო რეესტრის ამონაწერის მიხედვით ეს ბინა ზღვის სანაპიროზე, „რედ-კო ციხისძირის“ პროექტში მდებარეობს, ამიტომაც ცოტა გასაკვირია, რომ ერთი კვ.მეტრში 1049 დოლარი გადაუხდიათ – ეს ამ პროექტისთვის საკმაოდ დაბალი ფასია.

ნატალია თხლაშიძის ძმა, არჩილ თხლაშიძე, 2017 წელს თელავის მუნიციპალიტეტის საკრებულოს თავმჯდომარედ აირჩიეს. მის არჩევას სწორედ დეპუტატი სიძის საქმიანობას და გავლენებს უკავშირებდნენ.

დეპუტატი გელა სამხარაული ფლობს 2023 წელს შეძენილ ავტომანქანას Land Rover -ს, რაშიც 20 000 ევრო გადაუხდია. მას აქვს ასევე 2016 წელს შეძენილი Toyota და 2014 წელს შეძენილი Lexus-ი.

2025 წელს შევსებული დეკლარაციის მიხედვით დეპუტატ სამხარაულს და მის მეუღლეს დანაზოგის სახით ჰქონდათ 70 000 დოლარი, 80 000 ევრო, 50 000 ლარი. 

რაც შეეხება შემოსავლებს, დეკლარაციის მიხედვით, დეპუტატის მეუღლის წლიური შემოსავალი ბევრად აღემატება დეპუტატის შემოსავალს. ნატალია თხლაშიძის ხელფასმა 2024 წელს 194 104 ლარი შეადგინა, ეს თვეში 16 ათას ლარზე მეტია. დეკლარაციაში მითითებულია მეუღლის დასაქმების ადგილიც – „ბიპი“, იგივე „ბრიტიშ პეტროლიუმი“, სადაც დეპუტატის მეუღლე სოციალური საკითხების ჯგუფის ხელმძღვანელია.

თავად დეპუტატ გელა სამხარაულის ხელფასმა 2024 წელს 52 458 ლარი შეადგინა, ანუ თვეში 4 371 ლარი. ეს თანხა 2025 წელს თითქმის გაორმაგდა, მისმა, როგორც კომიტეტის თავმჯდომარის ხელფასმა კი 12 000 ლარს მიაღწია, ახლა კიდევ უფრო გაზრდილია.

გელა სამხარაული ოჯახის შემოსავლებში ასევე უთითებს სოფლის მეურნეობის პროდუქტების რეალიზაციით მიღებული თანხის შესახებ, რაც 185 000 ლარია.

მიუხედავად იმისა, რომ დეპტატი სამხარაული არაერთ კომპანიაში ფლობს წილებს, დეკლარაციაში სამეწარმეო საქმიანობიდან მიღებული შემოსავალის შესახებ გრაფაში 0 თეთრია მითითებული. ეს იმას ნიშნავს, რომ დეპუტატი, ოფიციალურად, ამ კომპანიებიდან შემოსავალს არ იღებს. 

რაც შეეხება გასული წლის ხარჯებს, დეპუტატმა დეკლარაციაში მიუთითა 6200 ლარი, როგორც მეუღლის სწავლის ხარჯი და 20 000 ლარი, როგორც რემონტის ხარჯი. გარდა ამისა ოჯახმა 62 ათას ლარზე მეტი დახარჯა სესხების მომსახურებისთვის.

• „ოცნების“ დეპუტატის კომპანიები

დეკლარაციის მიხედვით გელა სამხარაული წილებს ფლობს კომპანიებში – შპს „ვერა-2011“, შპს „დია გრუპ“, შპს „დია ალავერდი“, შპს „დუტა & F“, ხოლო მისი მეუღლე ფლობს შპს „იმოგზაურე საქართველოში“-ს 25 პროცენტს.

შპს „დუტა & F“ 2010 წელს დაფუძნებული კომპანიაა და სამუშაო მიმართულებად რესტორნები და ბარები აქვს მითითებული, გელა სამხარაული ამ კომპანიის 22 პროცენტის მფლობელია, თუმც მას წილები მართვაში აქვს გადაცემული გიორგი ხელაშვილისთვის, რომელიც კომპანიაში 23 პროცენტს ფლობს. ამ კომპანიაში წილებს ფლობს ასევე მსახიობი დუტა სხირტლაძე.

• რაც დეკლარაციაში არ წერია – დეპუტატის შვილის ბიზნესი

2022 წლის მარტში გელა სამხარაულმა გაცვლის ხელშეკრულების საფუძველზე სოფელ ოჟიოში 99 765 კვ. მეტრი ფართობი, თითქმის 10 ჰექტარი დაირეგისტრირა. იმავე წლის აპრილში ეს ნაკვეთი ჩუქების ხელშეკრულების საფუძველზე დაირეგისტრირა დეპუტატის შვილმა, ბექა სამხარაულმა.

ახლა ეს ქონება შპს „სავანის ველს“ ეკუთვნის. კომპანიის 33.33% დეპუტატის შვილის, ბექა სამხარაულის საკუთრებაა.

ეს კომპანია სოფელ ოჟიოში კიდევ ორ მიწის ნაკვეთს, ჯამში 20 ჰექტარს ფლობს ასევე, შპს „სავანის ველი“ კიდევ 6 მიწის ნაკვეთს ფლობს სოფელ იყალთოში, ჯამში 3 ჰექტარზე მეტს.

დოკუმენტების მიხედვით, ეს კომპანია დაფინანსებას იღებდა სოფლის მეურნეობის პროექტის – „დანერგე მომავალის“ ფარგლებში. პროგრამის ფარგლებში სამინისტრო ფერმერებს სოფლის მეურნეობის სხვადასხვა კულტურის განვითარების მიზნით სუბსიდიით ეხმარებოდა.

ბექა სამხარაული კომპანიის 33.33 პროცენტის მფლობელად 2022 წლიდან ფიქსირდება, მან კომპანიის საწესდებო კაპიტალში შეიტანა საკუთრებაში არსებული მიწის ნაკვეთი სოფელ ოჟიოში, 10 ჰექტრამდე ფართობი. 2023 წელს კომპანიამ ამ ნაკვეთზე სარეკრეაციო დანიშნულების ტბორის მოწყობის პროექტის სკრინინგის ანგარიშით გარემოს სააგენტოს მიმართა.

დეპუტატ გელა სამხარაულს უფროსი შვილები ბექა და ნინი სამხარაულები დეკლარაციაში აღარ ჩაუწერია, მას შემდეგ რაც ისინი სრულწლოვნები გახდნენ.

27 წლის ბექა სამხარაული რამდენიმე კომპანიის თანამესაკუთრე და თანახელმძღვანელია. 2023 წლიდან ის ასევე ფლობს შპს „ჯილიექსის“ 50 პროცენტს და კომპანიის ერთ-ერთი დირექტორია.

საჯარო რეესტრის მონაცემებით ბექა სამხარაულმა 2024 წელს დააფუძნა და ერთპიროვნულად ფლობს შპს „ს+ჰ ნიუ ენერჯი დეველოფმენთ ქომფანის“ 100 პროცენტს და ხელმძღვანელიც თავად არის. კომპანიის კრედიტორად ჩინეთის მოქალაქე ჰუა იუ ფიქსირდება.

შპს „ს+ჰ ნიუ ენერჯი დეველოფმენთ ქომფანი“ ბექა სამხარაულმა ჩინეთის მოქალაქესთან ჰუა იუ – სთან ერთად დააფუძნა, თავად კომპანიის 70 პროცენტს ფლობდა, ჰუა იუ კი 30 პროცენტის მფლობელი იყო. 2025 წელს ამონაწერში ცვლილება შეიტანეს და კომპანიის ასივე პროცენტის მფლობელად ბექა სამხარაული დარეგისტრირდა, ჰუა იუ კი – კრედიტორად.

ბექა სამხარაული ფლობს ასევე 2023 წელს დაფუძნებული კომპანიის, შპს „კროსოვერის“ 33 პროცენტს და ერთპიროვნულად ფლობს შპს „ჯორჯია გრიინ ენერჯი დეველოპმენტ ქომფანის“.

ამავე თემაზე:

11 თებერვალს, ირანის ისლამური რევოლუციის გამარჯვების დღესთან დაკავშირებით, თბილისის ანძა ირანის დროშის ფერებში განათდა. ამასთან, ბიძინა ივანიშვილის სასტუმრო „პარაგრაფში“ გაიმართა ირანის ისლამური რესპუბლიკის ეროვნული დღისადმი (რევოლუციის წლისთავისადმი) მიძღვნილ მიღება, სადაც სიტყვით გამოვიდა „ქართული ოცნების“ საგარეო საქმეთა მინისტრის მოადგილე ლაშა დარსალია.

ფაქტს კრიტიკულად გამოეხმაურა ისრაელის საელჩო საქართველოში.

„მაშინ, როდესაც ირანის მკვლელი, ტერორის მხარდამჭერი რეჟიმი ათასობით ადამიანს ხოცავს თავისი ქალაქების ქუჩებში, ჩაგრავს საკუთარ მოქალაქეებს და აქტიურად არის ჩართული ტერორისტულ საქმიანობაში როგორც რეგიონში, ისე მთელ მსოფლიოში, თბილისში გადაწყვიტეს ამავე რეჟიმთან ერთად ირანში ისლამური რევოლუციის წლისთავი იზეიმონ მთაწმინდის ანძის ირანის დროშის ფერებში განათებით. რა გზავნილია ეს თბილისისგან რეგიონისთვის, მსოფლიოსა და ირანის იმ მოქალაქეებისთვის, რომლებიც ამდენი ხანია თავისუფლებისა და დემოკრატიისთვის იბრძვიან?“ – ეს ტექსტი ისრაელის საელჩოს გვერდზე გამოქვეყნდა, ფეისბუქზე.

რას ნიშნავს ანძის ირანის დროშის ფერებით განათება? – ამ თემაზე „ბათუმელები“ პოლიტიკის ანალიტიკოსს, კახა გოგოლაშვილს ესაუბრა.

• ბატონო კახა, მართლაც, რა გზავნილია ეს, თუ ხედავთ ამაში საფრთხეებს?

პატარა ქვეყანას ვერ დაუშლი იმას, რომ ნებისმიერ სხვა ქვეყანასთან ეცადოს ურთიერთობების ნორმალიზებას და არგამწვავებას, მაგრამ საქართველო, როგორც ევროკავშირის კანდიდატი სახელმწიფო, მაინც და მაინც დიდ ხოტბას არ უნდა ასხამდეს ირანს და რაც არ უნდა მეზობელი იყოს, ის, რაც ჩაიდინა ირანის რეჟიმმა სულ ახლახან – რამდენიმე ათეული ათასი ადამიანი დახოცეს უბრალოდ ქუჩაში და კიდევ რამდენიმე ასეული დახვრიტეს ციხეებში, ამ ფონზე შეიძლებოდა, ირანის დროში ფერებში არ გაენათებინათ ანძა.

ერთი ფრაზითაც კი არ აღუნიშნავთ, რომ დავუშვათ ეწინააღმდეგებიან ან არ მოსწონთ ძალადობა, რომ მხარს უჭერენ დემოკრატიის განვითარებას და ასე შემდეგ. პრაქტიკულად ეს არის მთლიანად დაყვავების და სრული ჰარმონიის პოლიტიკა, რა თქმა უნდა.

• ეს ხდება იმის ფონზე, როცა აშშ-ი და ირანი ლამის ომის ზღვარზე არიან. რამდენად სახიფათოა „ოცნების“ პოლიტიკური თამაშები ქვეყნის უსაფრთხოებისთვის, როგორ ფიქრობთ?

დასამალი არ არის, რომ საქართველოს დღევანდელი ხელისუფლება ავტორიტარულ ბანაკშია უფრო მეტად, ვიდრე დემოკრატიულ ბანაკში. თუმცა მაინც ვერ ვიტყვით, რომ ირანის ან რუსეთის პირდაპირი მოკავშირეა, აი, ამ, პრაქტიკულად მესამე მსოფლიო ომში, რომელიც უკვე მიმდინარეობს.

ბოლოს და ბოლოს არსებობს რამშტაინის ფორმატი, სადაც გაერთიანებული არიან სახელმწიფოები, რომლებიც მხარს უჭერენ უკრაინას. თუმცა, ასეთი ბრუტალური დამოკიდებულება დემოკრატიული ძალების ჩახშობა და საერთოდ არანაირი რეფორმის გატარების სურვილი, მისაღებია „ქართული ოცნებისთვის“ იმიტომ, რომ ირანის ფონზე მისი ავტორიტარული მისწრაფებები მათ ხელისუფლებას მეტად სიმპათიურად წარმოაჩენს ირანთან შედარებით.

რაც მეტად ბრუტალური იქნება ირანი და მეტად ცუდ რაღაცებს გააკეთებს, „ქართულ ოცნებას“ მეტი შესაძლებლობა ექნება ავტორიტარიზმისკენ კიდევ უფრო გადაიხაროს.

• თუ აშშ-სა და ირანს შორის უფრო გამწვავდება სიტუაცია, „ოცნების“ პოლიტიკა ირანთან არ დააზარალებს ჩვენს ქვეყანას? რა ფორმით შეიძლება შეგვიქმნას ხიფათი?

ყველაფერი დამოკიდებულია იმაზე თუ როგორ განვითარდება ეს კონფლიქტი. ქვეყნის საფრთხეზე ესენი არ ფიქრობენ, იმაზე ფიქრობენ, თავად „ქართულ ოცნებას“ შეექმნება თუ არა რაიმე პრობლემა. ამის მიხედვით მოქმედებს „ქართული ოცნება“. ამ კონტექსტში კი მათ მორალური შეზღუდვები არ აქვთ.

პირველ რიგში ეს არის ყველაზე უფრო ნეგატიური ან მიუღებელი „ქართული ოცნების“ პოლიტიკაში, რომ მათ არ გააჩნიათ მკაფიო პოზიციონირება და ყველა სიტუაციაში ფიქრობენ საკუთარ გადარჩენაზე.

თუ, ვთქვათ, ომი დაიწყო ირანსა და ამერიკას შორის, მათ დაუყენებენ ძალიან კონკრეტულად საკითხს – ვის მხარეს ხარ? რა თქმა უნდა, ესენი ეტყვიან, რომ ვინც ძლიერი იქნება, იმის მხარეს იქნებიან. ჯერჯერობით ასე ჩანს, რომ ძლიერი მაინც ამერიკაა. ამიტომ იქნებიან ამერიკის მხარეს. მაგრამ ეს სულაც არ ნიშნავს, რომ ისინი მიატოვებენ თავიანთ ავტორიტარულ მისწრაფებებს და დემოკრატიას დაუყვებიან. ეტყვიან, რომ კი, საგარეო ასპარეზზე ვართ თქვენს მხარეს, მაგრამ ირანი მეზობელია და ამით ახსნიან თავიანთ ქმედებებს.

• საკმაოდ ხისტი პოლიტიკა აქვს ტრამპს, ამიტომ რამდენად დამაჯერებელია „ქართული ოცნების“ გათვლები, ყველა რისკს დააზღვევენ?

„ქართული ოცნება”, ერთადერთი, რასაც თვლის კარგად, ეს არის რისკები საკუთარი ძალაუფლების შენარჩუნებისთვის, თორემ ამდენი ხანი ვერ შეინარჩუნებდნენ ხელისუფლებას. ისინი არ თვლიან რისკებს არც ქვეყნისთვის, არც ეკონომიკისთვის, არც მოქალაქის კეთილდღეობისთვის – ამაზე თავს არ იწუხებენ. ერთადერთი, რაზეც მუშაობენ 24 საათი, ეს არის იმ რისკების გათვლა, რაც მათ ერთპიროვნულ ძალაუფლებას არ შეუქმნის საფრთხეს.

რა თქმა უნდა, ისინი უყურებენ სიტუაციას, ამიტომ ხან ამერიკას ელაქუცებიან, ხან ირანს. ხან ამერიკელებს უგზავნიან მესიჯებს, რომ აი, თქვენი ვართ და თქვენთან ვართ და ახალი ფურცლიდან დავიწყოთ ყველაფერი, გავაკეთებთ რასაც გვეტყვით, ოღონდ შიდა საქმეებში არ ჩაერიოთ და ირანს ეუბნებიან, რომ „მეზობლები ვართ და არავითარ შემთხვევაში არ გიღალატებთ“.

• ასეთი დამაჯერებლები არიან, რომ ორივე მხარის დარწმუნებას შეძლებენ?

ცხადია, ეს ვერცერთი მხარისთვის ვერ იქნება დამაჯერებელი, იმიტომ, რომ არც ამერიკაში და არც ირანში სულელი არავინაა. ძალიან კარგად ხვდებიან ყველაფერს. მაგრამ ამ ეტაპზე შეიძლება ორივეს აწყობდეს ეს მოცემულობა.

თუმცა, მოვა მომენტი, როცა ირანიც და აშშ-იც უფრო მეტს მოინდომებენ. მაგალითად, თუ ომი დაიწყო, ამერიკა მოინდომებს, ვთქვათ, საქართველოს პორტების და ინფრასტრუქტურის გამოყენებას ლოჯისტიკური მიზნებისთვის. ირანი, თავის მხრივ, რა თქმა უნდა, რაღაც ულტიმატუმებს გაუგზავნის „ოცნების“ მთავრობას, არ გაბედოთ ამერიკული სამხედრო ტვირთების გადმოზიდვა და ასე შემდეგ.

შესაძლოა სამხედრო ტვირთების გადაფრენა დასჭირდეთ და ამ შემთხვევაში ძალიან რთულ სიტუაციაში აღმოჩნდებიან.

• ეს ალბათ მარტო „ქართული ოცნების“ გადასაწყვეტი აღარ იქნება, თუ „ოცნება“ ანგარიშს რუსეთს უწევს, რუსეთი ირანის პოზიციებს დაიჭერს და როგორ ფიქრობთ, მაშინ ვის გაუწევს ანგარიშს „ოცნება“ – რუსეთს თუ აშშ-ს?

ვინც უფრო ძლიერი იქნება, იმას გაუწევს ანგარიშს.

მაგრამ აქ ბევრი რამეა გასათვალისწინებელი. ჯერ ერთი რუსეთის ფაქტორი აქ არ არის მარტო “ქართული ოცნების” ძალაუფლების ფაქტორი. რუსეთი არის ასევე საფრთხე თავად ივანიშვილისთვის და მისი ასე ვთქვათ, კეთილდღეობისთვის. მათ ეშინიათ რუსეთის. ამიტომ არ ვიცით, რომელი მხარე გადაწონის. ჩვენ უბრალოდ ფაქტორები შეგვიძლია დავასახელოთ, რამაც შეიძლება გავლენა იქონიოს „ოცნების“ გადაწყვეტილებებზე.

ახლა „ოცნებას“ იმხელა ძალა არ აქვს, რომ მაგალითად თურქებივით უარი უთხრას აშშ-ს რაღაცაზე. მაშინ მკვეთრად უნდა გადაწყვიტოს, რომ რუსეთის მხარესაა და მთლიანად ბელარუსივით გახდეს. ვფიქრობ, ამას არ გააკეთებს, რადგან თუ ბელარუსივით გახდება, შეინარჩუნებს კი „ქართული ოცნება“ ძალაუფლებას? შეიძლება გიორგაძე ჩამოიყვანონ საერთოდ და „ოცნება“ მთლიანად ჩაანაცვლონ წმინდა რუსული მმართველობით.

ამიტომ ცდილობენ ბალანსს, ამ შემთხვევაში. ყველაფერი მაინც დამოკიდებული იქნება იმაზე, ვინ უფრო მეტი ძალისმიერი პოლიტიკით გამოვა და ამის წინასწარმეტყველება ცოტა რთულია.

• როგორ ფიქრობთ, ამ ბალანსისთვის გაუშვეს მამუკა მდინარაძე აშშ-ში?

ჩემთვის რთულია ამის თქმა. შესაძლოა, უსაფრთხოების სხვა, ნებისმიერი საკითხები ყოფილიყო. ისიც არ ვიცი, გაუშვეს თუ დაუძახეს. ყველაზე დიდი მიზანი რაც ახლა აშშ-ს გააჩნია, ყველა მხრიდან ირანის ბლოკადაში მოქცევა. ამიტომ არ არის გამორიცხული, რომ დაუძახეს და ესაუბრეს, მაგალითად, ირანის თემაზე. ვთქვათ ირანის მოქალაქეების საქართველოში შემოსვლაზე, მათი დაზვერვის მოქმედებაზე და ასე შემდეგ.

ამ კონსულტაციისთვისაც შეიძლება დაებარებინათ და მოესმინათ განმარტებები, ხომ არ თანამშრომლობენ მაგალითად ირანის დაზვერვასთან და ხომ არ არის რაიმე ინფორმაციული გაცვლა-გამოცვლა სპეცსამსახურებს შორის.

შესაძლოა ეს ყოფილიყო მართლაც ლოჯისტიკური საკითხები, რომ კონტროლის რაღაც მექანიზმები შექმნან ირანთან მიმართებაში. თუმცა ეს ჩემი ვარაუდებია, რა თქმა უნდა.

რაც შეეხება თავად საქართველოს საკითხს დემოკრატიიდან გადახრას და ასე შემდეგ, არა მგონია ასეთი საკითხები უსაფრთხოების სამსახურის ხელმძღვანელთან განეხილათ.

• რამდენად არსებობს იმის ალბათობა, რომ ამ ლავირებების ფონზე მათ მიაღწიონ აშშ-გან აღიარებას?

„ქართულ ოცნებას” ალბათ აქვს ეს გათვლაც, მაგრამ მთლიანად აღიარება ძალიან გაუჭირდებათ, იმიტომ რომ არსებობს კონგრესი, სადაც ძალიან უარყოფითი დამოკიდებულებებია „ოცნების“ მიმართ დემოკრატიულ უკუსვლასთან მიმართებაში.

შეიძლება ადმინისტრაცია იყოს კმაყოფილი და მადლიერი რაღაც საკითხებში და რაღაც გარკვეული კონტაქტებიც გაღრმავდეს საქართველო-აშშ-ს შორის, მაგრამ მთლიანობაში, რა თქმა უნდა, იქნება ეს მასშტაბური ფინანსური მხარდაჭერა თუ სხვა საკითხები, დასჭირდებათ კონგრესის თანხმობა, რაც ძნელი მოსაპოვებელი იქნება. განსაკუთრებით მას შემდეგ, რაც რამდენჯერმე უკვე ჰელსინკის კომისიაზე მოხდა ამ საკითხების განხილვა და მათ აქვთ სრული ინფორმაცია იმასთან დაკავშირებით, როგორ და რა დონეზე ირღვევა ადამიანის უფლებები საქართველოში, „ქართული ოცნების“ ხელისუფლების მიერ.