Batumelebi

„მტკიცება, რომ ჩინეთმა წინასწარ იცოდა, დაეთანხმა ან ჩუმად დაუჭირა მხარი ამ ომს, არის წმინდა დეზინფორმაცია”, – წერს ჩინეთის ელჩი ამერიკის შეერთებულ შტატებში ჩინ განგი.

მან აშშ-ის ეროვნული უსაფრთხოების მრჩევლის, ჯეიკ სალივანისა და ჩინეთის კომუნისტური პარტიის პოლიტბიუროს წევრის იან ჯიეჩის რომში შეხვედრიდან ორ დღეში The Washington Post-ში გამოაქვეყნა მოსაზრება, სახელწოდებით – „რა პოზიცია გვაქვს უკრაინის საკითხთან დაკავშირებით“.

„იყო ბრალდებები, რომ ჩინეთმა წინასწარ იცოდა რუსეთის სამხედრო მოქმედებების შესახებ და ზამთრის ოლიმპიური თამაშების დასრულებამდე გადადება მოსთხოვა რუსეთს. ბოლო ჭორები დამატებით ამტკიცებს, რომ რუსეთი ჩინეთისგან სამხედრო დახმარებას ითხოვდა. ნება მომეცით სრული პასუხისმგებლობით გითხრათ: მტკიცება, რომ ჩინეთმა წინასწარ იცოდა, დაეთანხმა ან ჩუმად დაუჭირა მხარი ამ ომს, არის წმინდა დეზინფორმაცია.

ყველა ეს ბრალდება ემსახურება მხოლოდ ერთ – ბრალის გადატანისა და ჩინეთისთვის ტალახის სროლის მიზანს. უკრაინაში იმყოფებოდა ჩინეთის 6 ათასზე მეტი მოქალაქე. ჩინეთი არის ორივეს – რუსეთისა და უკრაინის უდიდესი სავაჭრო პარტნიორი და ნავთობისა და ბუნებრივი აირის უმსხვილესი იმპორტიორი მსოფლიოში.

რუსეთსა და უკრაინას შორის კონფლიქტს ჩინეთისთვის კარგი არაფერი მოაქვს. ჩინეთს რომ სცოდნოდა ამ გარდაუვალი კრიზისის შესახებ, ჩვენ ყველაფერს ვიღონებდით მის თავიდან ასაცილებლად“, – წერს ჩინ განგი, ჩინეთის ელჩი აშშ-ში.

ჩინეთის ელჩი ასევე გამოეხმაურა თეთრი სახლის ეროვნული უსაფრთხოების მრჩევლის, ჯეიკ სალივანის განცხადებას, რომ თუ ჩინეთი რუსეთს სანქციებისთვის თავის არიდებაში დაეხმარება, „შედეგებისთვის თვალის გასწორება მოუწევს“. ელჩმა მოუწოდა ვაშინგტონს, არ დაემუქროს ჩინურ კომპანიებს სანქციებით, როცა ჩინეთთან თანამშრომლობა და მისი მხარდაჭერა სჭირდება.

მას შემდეგ, რაც აშშ-ჩინეთის მაღალი რანგის შეხვედრის წინ მედიაში კონფიდენციალური წყაროს მიერ გავრცელდა ინფორმაცია, რომ ჩინეთს რუსეთმა შეიარაღება სთხოვა, ხოლო ჩინეთს პოზიტიური სიგნალი ჰქონდა აღნიშნულ საკითხზე, ვაშინგტონმა არაერთხელ გააჟღერა, რომ მსგავს შემთხვევაში სანქციები შეეხებოდა ჩინეთსაც.

16 მარტს ყოველდღიურ ბრიფინგზე ამავე საკითხს გამოეხმაურა ჩინეთის საგარეო საქმეთა სამინისტროს პრესსპიკერი ჟაო ლიჯიანი: „ნუ მოიღერებთ სანქციების ჯოხს, როცა ჩინეთის მხარდაჭერას ეძებთ“, – თქვა მან. 

ჟაო ლიჯიანმა და ჩინ განგმა გაიმეორეს ევროპელ ლიდერებთან სი ძინპინის მიერ გერმანელ და ფრანგ კოლეგებთან შეხვედრის დროს დასმული „ოთხი აუცილებელი“ საკითხიც, რომელთა შესრულებასაც ჩინეთი მოითხოვს:

• ყველა ქვეყნის სუვერენიტეტისა და ტერიტორიული მთლიანობის პატივისცემა
• გაეროს წესდების მიზნებისა და პრინციპების სრულად დაცვა
• უსაფრთხოების საკითხებზე ყველა ქვეყნის ლეგიტიმური წუხილის სერიოზულად აღქმა
• კრიზისის მშვიდობიანი გადაწყვეტისკენ მიმართული ყველა ძალისხმევის მხარდაჭერა

ჩინელი ოფიციალური პირები ბოლო დღეებში განსაკუთრებულ აქცენტს სწორედ ქვეყნის ლეგიტიმაციისა და ტერიტორიული მთლიანობის საკითხზე აკეთებენ და ცდილობენ, უკრაინის ტაივანთან შედარების საწინააღმდეგო არგუმენტები მოიყვანონ:

„უკრაინა სუვერენული სახელმწიფოა. მაშინ, როცა ტაივანი ჩინეთის ტერიტორიის განუყოფელი ნაწილია, სრულიად გაუგებარია, როდესაც ხაზს უსვამენ სუვერენიტეტის პრინციპს უკრაინასთან მიმართებაში, როცა ზიანს აყენებენ ჩინეთის სუვერენიტეტსა და ტერიტორიულ მთლიანობას ტაივანთან მიმართებაში,“-  მოჰყავს ჩინ განგის ციტატა  CGTN-ს, ჩინურ სამთავრობო მედიას.

ჩინური მედია სალივანი-იანის შეხვედრის დასრულების შემდეგაც მთავარ აქცენტებს სწორედ ტაივანის საკითხზე სვამდა. ჩინური მედიის ცნობით, იან ჯიეჩმა კოლეგას შეახსენა ამერიკის მიერ აღებული პასუხისმგებლობების შესრულების აუცილებლობაზე, რათა ამერიკამ შეწყვიტოს „ტაივანის დამოუკიდებლობის“ მხარდაჭერა და დაუბრუნდეს „ერთი ჩინეთის“ პოლიტიკაზე შეთანხმებას.

ტაივანი [ოფიციალურად – ჩინეთის რესპუბლიკა] სამხრეთ-აღმოსავლეთ ჩინეთის სანაპიროდან დაახლოებით 160 კმ-ით მდებარეობს და ე.წ.  „პირველი კუნძულის ჯაჭვში“ შედის. ეს ჯაჭვი მოიცავს აშშ-სადმი მეგობრულად განწყობილ ტერიტორიებს, რომლებიც აშშ-ის საგარეო პოლიტიკისთვის გადამწყვეტი მნიშვნელობის მქონეა. 

როგორც BBC-ი წერს, თუ ჩინეთი ტაივანის ხელში ჩაგდებას დააპირებს, ზოგიერთი დასავლელი ექსპერტი ვარაუდით, მას წყნარი ოკეანის დასავლეთ რეგიონში ძალაუფლება მიეცემა და შესაძლოა დაემუქროს აშშ-ს სამხედრო ბაზებს გუამსა და ჰავაიმდე, თუმცა ჩინეთი ამტკიცებს, რომ მისი განზრახვები ტაივანთან მიმართებაში წმინდად მშვიდობიანია.

_____________________

ფოტო: ევროპის პრესფოტო სააგენტო. EPA-EFE/FILIP SINGER

„იმის მიუხედავად, რომ ჯოჯოხეთური დღეები გამოიარეს, ბუნკერში მყოფი ლტოლვილები იცინიან, მღერიან კიდეც და მუდმივად საუბრობენ აშენებაზე. ლაპარაკობენ იმაზე, ეს ომი რომ დამთავრდება, ვინ რას იზამს, რას ააშენებს,“ – უყვება „ბათუმელებს“ ირაკლი ბერიძე. ის რვა წელია დასავლეთ უკრაინაში ცხოვრობს მეუღლესთან და შვილთან ერთად.

ირაკლი და მისი უკრაინელი მეუღლე მზარეულები არიან. ომის დაწყებიდან მალევე მათ შესთავაზეს უკრაინის დატოვება და უსაფრთხო ქვეყანაში გაყვანა, თუმცა ოჯახმა დარჩენა და უკრაინისთვის დახმარება გადაწყვიტა.

• მოგვიყევით, სად იმყოფებით ახლა, თუ შესაძლებელია ადგილის დასახელება, ვისთან ერთად და როგორ სიტუაციაში ხართ?

სამწუხაროდ იმ ადგილის დაკონკრეტება, სადაც ჩვენ ვართ ამჟამად, არ შემიძლია. მხოლოდ იმას გეტყვით, რომ ივანო-ფრანკივსკის ოლქში ვმუშაობთ რესტორანში მე და ჩემი მეუღლე.

რაც შეეხება სიტუაციას, შეიძლება ითქვას, რომ აქ სიმშვიდეა. საომარი მოქმედებები აქ არ ყოფილა. ერთადერთი ფაქტი, რისი აღნიშვნაც შეიძლება, ივანო-ფრანკივსკის სამხედრო აეროდრომის მიმდებარე ტერიტორიაზე ბომბები ჩამოყარეს.

იმდენად უსაფრთხო გარემოში ვართ, რამდენადაც ამის საშუალებას იძლევა გარემოება. აღმოსავლეთ უკრაინასთან შედარებით, სადაც ყოველდღიურად იბომბება ქალაქები, აქ შეიძლება ითქვას, რომ სიმშვიდეა. უსაფრთხოების მეტი დონეა. შესაბამისად სხვადასხვა ქალაქიდან ლტოლვილების გამოდინება ხდება აქ.

• როგორი გახდა ომის დროს თქვენი ყოველდღიურობა? რა შეიცვალა? რამდენად რთულია ამ ცვლილებებთან შეგუება?

უკრაინაში ჩამოვედი 2014 წლის ნოემბერში. მას შემდეგ მე და ჩემი მეუღლე ვმუშაობთ კულინარიაში. ის რამდენიმე ათეული რესტორნის ბრენდშეფია, უკრაინის სხვადასხვა ქალაქში. ჩემი მეუღლე უძღვება ოპერატიულ მხარეს, მე კიდევ – ტექნიკურ მხარეს. ერთად ვმუშაობთ.

რვა წლის განმავლობაში ჩვენ ასე ვცხოვრობთ. ვიყავით საქართველოში, გვქონდა საინტერესო პროექტი, შევასრულეთ და წამოვედით. ომამდე ივანო-ფრანკივსკის ოლქში დაგვპატიჟეს უკრაინული რესტორნის გახსნაზე. დავიწყეთ მუშაობა ჩვეულ რეჟიმში, როგორც ხდება. ჩამოვედით აქ ოჯახით – მე, მეუღლე და ჩვენი ოთხი წლის ქალიშვილი ნიკოლი.

რაც შეეხება იმ ცვლილებებს, რაც მოიტანა ომმა, ვფიქრობ, ჯერ ბოლომდე არც კი გვაქვს გათვითცნობიერებული, რა არის ეს, რა მოხდა.

ისეთი გიჟური რიტმი გვაქვს მუშაობის, რაიმეზე სერიოზულად დაფიქრების დროც კი აღარ გვრჩება.

ერთადერთი, რაც დარწმუნებით ვიცით, ისაა, რომ აღარაფერი არ იქნება ისე, როგორც ადრე იყო. ახლა ყველაფერი სხვანაირადაა. ამას რა დაერქმევა, უკვე ალბათ ომი რომ დასრულდება, მაშინ გავიგებთ. გვჯერა, რომ ყველაფერი ისე დასრულდება, როგორც ამ ერს სურს, როგორც ჩვენ გვსურს.

• როგორი განწყობაა თქვენს ნაცნობ უკრაინელებში?

ყოველი უკრაინელი, არ აქვს მნიშვნელობა დიდი, პატარა, ბავშვი, მოხუცი, ქალი, კაცი, მწოლიარე, მდგომარე, დღესდღეობით არის გაასმაგებული ენერგიით დამუხტული. ყველა ასეა – ისინიც, ვინც ახლა ტოვებს უკრაინას, ისინიც, ვინც დიდი ხანია დატოვა უკრაინა და ისინიც, ვინც ოდესღაც იძახდა, რომ უკრაინა არ შედგებოდა.

არ არსებობს ემოცია, რომელიც ამაზე ძლიერი იქნება. არის რაღაც რაღაცები, რაც თვალნათლივ ჩანს. ვფიქრობ, რომ ეს არის ერის გამოწრთობის პროცესი. საბოლოო ჯამში, ყველას ერთი აზრი აქვს, იმის მიუხედავად, რომ შიში და სიფრთხილეა ახლა უკრაინაში გამეფებული.

• ვიცი, რომ შემოგთავაზეს პოლონეთის საზღვრამდე მიყვანა. თქვენ უარი თქვით? თუ შეგიძლიათ, იმ დღის და თქვენი გადაწყვეტილების შესახებ მოგვიყევით.

ომის დაწყებიდან პირველივე დღეებში ოჯახში ვთქვით, რომ არსად წასვლას არ ვაპირებთ. ჩვენ ლვოვში გვაქვს ბინა, თუმცა გადავწყვიტეთ არსად წავსულიყავით. დავინახეთ, რომ აქ უფრო საჭირო ვიქნებოდით, ვიდრე დიდ ქალაქში.

ომის დაწყებიდან მესამე ღამეს ადგილობრივები შეიკრიბნენ. დაახლოებით 500 ადამიანი. დაგვიძახეს ჩვენც, რესტორნის პერსონალს, ვინც ვმუშაობდით და გაგვაცნეს გეგმა, სამომავლოდ რა უნდა გაგვეკეთებინა, რომ ყველა ადამიანი უსაფრთხოდ ყოფილიყო. იქიდან გამომდინარე, რომ პირველ დღეებში რუსული არმია უფრო უტევდა უკრაინის აღმოსავლეთ ნაწილს, მოსალოდნელი იყო, რომ ლტოლვილების ნაკადი მოაწყდებოდა უკრაინის დასავლეთ ნაწილს.

იმ ღამესვე, რესტორნის მეპატრონემ, რომელიც მოხალისეა ომის დაწყების დღიდან [ვგულისხმობ 2014 წელს], გადაწყვიტა რესტორანი დაუთმოს ლტოლვილებისა და სამხედროების მომსახურებას. გვკითხეს, ჩვენ თუ ვიყავით თანახმა ასეთ პირობებში გვემუშავა, რაზეც თანხმობა მიიღეს.

იყო საშიშროება დაბომბვის სერია გადმონაცვლებულიყო დასავლეთ უკრაინამდე და მოეღწია ჩვენამდე. ადგილობრივმა მუნიციპალიტეტმა გადაწყვიტა, რომ ადგილობრივი მოსახლეობა მინიმალურად მაინც უნდა შეიარაღებულიყო.

ჯერ უნდა მოეტანათ იარაღი, შემდეგ ესწავლებინათ მოსახლეობისთვის იარაღის მოხმარება. პარალელურად დაიწყო ექსტრემალურ სიტუაციაში მოქცევის და პირველადი დახმარების გაწევის სწავლება, რაშიც მე პირადად მივიღე მონაწილეობა, რადგან მქონდა გამოცდილება. 5 წლის განმავლობაში საზღვაო აკადემიაში ვისწავლე პირველადი დახმარება და ხანძართან ბრძოლის წესები.

დღის განმავლობაში მზარეული ბიჭები ვმუშაობთ რესტორანში. დღეში დაახლოებით 500-700 ადამიანს ვემსახურებით. რაც შეეხება სამხედროებს, საკვებს ადგილზე ვამზადებთ და მერე უკვე თავისი ტრანსპორტით მიაქვთ, ნაწილებში ანაწილებენ.

დავინახე, რომ ხალხი არის ერთიანი, ერთ აზრზე დგას, შეიარაღდა, უმოკლეს დროში ისწავლა როგორ უნდა გადაარჩინოს სხვადასხვა სიტუაციაში ადამიანის სიცოცხლე. დავინახე, რომ რესტორანში მოდიან ბიზნესმენები დასავლეთ უკრაინიდან. მოდიან განწყობით, რომ დაეხმარონ არმიას და რესტორნის მეპატრონის საშუალებით სხვადასხვა დახმარებას უგზავნიან უკრაინის ჯარს. აი, ამ ყველაფერს რომ უყურებ, ხვდები, რომ შენი ადგილი არის აქ.

რადგან მე ვარ უცხო ქვეყნის მოქალაქე და მყავს პატარა ბავშვი, შემომთავაზეს, ხომ არ გადავიდოდი პოლონეთში. შემოთავაზებაზე უარი ვთქვი. იმიტომ, რომ მივხვდი, აქ არის ჩემი ადგილი, ამ ხალხს ვჭირდები, ეს ხალხი მჭირდება, ეს ჩემი შვილის სამშობლოა. აქ დაიბადა, აქ იზრდება და უკრაინულ ენაზე ლაპარაკობს. 

ერთ საღამოს, როდესაც რესტორანი დაიხურა, შესვენების შემდეგ გადავნაწილდით საგუშაგოებზე, იქ შეიკრიბნენ ადგილობრივები. ვადგენდით სიას, ვინ სად უნდა წასულიყო მომდევნო დღეებში. მაშინ მითხრეს, რომ სჯობდა გავცლოდი აქაურობას, რადგან რუსებს განსაკუთრებით აღიზიანებთ აქაური მოსახლეობა, აქაური ეთნოსი.

წარმოიდგინეთ, 25 ადამიანი შენს პასუხს ელოდება. აი, რას იტყვი, ნებისმიერ სიტყვას აქვს სხვანაირი დატვირთვა. დაახლოებით იციან, რომ იტყვი – თქვენი მესმის, მაგრამ ოჯახი უნდა გადავარჩინო, წავიდე, წავიყვანო და ა.შ. ეს იკითხებოდა მათ თვალებში. ხვდებოდნენ, რომ უნდა წავიდეთ, მაგრამ მეორე მხრივ, ისიც იკითხებოდა, რომ ამდენი რამე ერთად გავიარეთ, ასე დავახლოვდით ერთმანეთთან და ამის მერე დასანანია, რომ ასე დაშორდე ადამიანებს… ოჯახს. გასაგებია, რომ ომია და უნდა იყოს გასაგები, თითქოს…

მე ვუთხარი მტკიცედ, რომ როცა ომი დასრულდება და არავინ არ იცის როდის დასრულდება და რანაირად, შვილი რომ გაიზრდება და მკითხავს, როცა ჩვენს ერს ანადგურებდნენ, შენ რატომ გაიქეცი, რა ვუპასუხო? პასუხი არ მექნება, შემრცხვება… ამასთანაც, მე აქ ვგრძნობ თავს საჭიროდ და თქვენც თუ თანახმა იქნებით, დავრჩები-მეთქი. მათი გაბრწყინებული თვალები არასდროს არ დამავიწყდება.

ერთი წამითაც კი არ გვინანია ოჯახს ეს გადაწყვეტილება. უკრაინის აღმოსავლეთ ფრონტზე მებრძოლი ბიჭების წყალობით, უკრაინის და ჩვენი ქართველი ბიჭების შეუპოვარი ბრძოლების წყალობით, ჯერ აქეთ ვერ ბედავენ გადმოსვლას და იქნებ ისე მოხდეს, რომ ეს ყველაფერი დასრულდეს მალე და ნაკლები მსხვერპლის ხარჯზე.

• მოგვიყევით უკრაინელი დევნილების შესახებ, რომელთანაც გიწევთ შეხება. ძირითადად ქვეყნის რომელი რეგიონებიდან მიდიან და რომელ ქვეყნებში?

კოტეჯში, სადაც ჩვენ ვცხოვრობთ, სხვადასხვა ქალაქიდან ჩამოსული უკრაინული ოჯახები არიან შემოსახლებული. თავიდან ხალხი რომ მოდიოდა და ივსებოდა, გული მიმძიმდებოდა, ისეთ ისტორიებს ჰყვებოდნენ.

საჰაერო თავდასხმის გამაფრთხილებელი აპლიკაცია გვაქვს ჩართული, ის შეგვახსენებს ხოლმე, რომ ამ რაიონში არის საჰაერო თავდასხმის საშიშროება. როგორც კი გაისმის სიგნალი, წყდება ყველანაირი სამუშაო პროცესი, ჩავდივართ ბუნკერში, პერსონალი, რესტორანში მოსული სტუმარი – ყველა. დაახლოებით 500 კაცზე არის გათვლილი.

ბუნკერი არის მომარაგებული წყლით, პირველადი დახმარების საშუალებებით, სამედიცინო საშუალებებით, საკვებით. უფრო მეტად მშრალი საკვებით. მაგ დროს უფრო გვეძლევა ლტოლვილებთან გასაუბრების საშუალება.

ზოგჯერ ბუნკერში ჩასვლა არ გვინდა. იმიტომ, კი არა, რომ გვეშინია ან სხვა რამე. ყოველ ჩასვლაზე ისეთ გულის განმგმირავ ისტორიებს ვისმენთ, თავს ძლივს ვიკავებთ.

საჰაერო დარტყმის განგაშის სიგნალი დაახლოებით ნახევარ საათს გრძელდება. მომხდარა ისე, რომ საათ-ნახევარი, ორი საათი გაგრძელებულა. ამ დროის განმავლობაში ჩუმად ხომ ვერ იქნება ადამიანი? ერთმანეთს ეკონტაქტება ხალხი.

იმის მიუხედავად, რომ ჯოჯოხეთური დღეები გამოიარეს, იცინიან, მღერიან და მუდმივად არის საუბარი აშენებაზე, ეს ომი რომ დამთავრდება, ვინ რას იზამს, რას ააშენებს.

ძირითადად ლტოლვილები არიან ჟიტომირის ოლქიდან, ვინიცას ოლქიდან, კიევიდან, ირპენიდან. აქ ერთსა და იმავე ხალხს ვერ ნახავთ, ორ-სამ დღეს რჩებიან. მოდიან, აქ ისვენებენ, ჩერდებიან ორი-სამი დღით, შემდეგ გადიან სხვადასხვა ქვეყანაში. აქედან უფრო მოსახერხებელია სლოვაკეთის ან პოლონეთის საზღვრამდე მისვლა.

___________________

ფოტოზე: ირაკლი ბერიძე ოჯახთან ერთად

რუსულ კომპანიებს საქართველოს სახელმწიფო ტენდერებში მონაწილეობა კვლავ თავისუფლად შეუძლიათ და მათთვის რაიმე შეზღუდვა სახელმწიფოს ამ დროისთვის არ დაუწესებია. შეზღუდვები ტენდერებში მონაწილეობაზე დაწესებული არ არის არც იმ რუსული კომპანიების მიმართ, რომლებსაც რუსეთის უკრაინაში შეჭრის გამო სანქციები უკვე დაუწესა სხვადასხვა სახელმწიფომ თუ ევროკავშირმა.

რუსეთ-უკრაინის ომის დაწყების შემდეგ, საქართველოს საჯარო რეესტრს ასობით რუსეთის მოქალაქემ მიმართა. ისინი საქართველოში ახალ შპს-ებს არეგისტრირებენ ან რეგისტრირდებიან როგორც ინდმეწარმეები.

„ბათუმელებმა“ 7  მარტს შემოსავლების სამსახურიდან ოფიციალურად გამოითხოვა, რუსეთ-უკრაინის ომის დაწყებიდან შემდგომ პერიოდში, რამდენი კომპანია დაარეგისტრირეს რუსეთის მოქალაქეებმა საქართველოში. პასუხი ამ დრომდე არ მიგვიღია. შესაბამისად, უცნობია ზუსტი მონაცემი, იმის მიუხედავად, რომ ამ საკითხზე მაღალი საზოგადოებრივი ინტერესი არსებობს და ურთიერთგამომრიცხავი მონაცემებიც ვრცელდება.

რაც შეეხება რუსული კომპანიებისთვის [მათ შორის იმ კომპანიებს, რომლებსაც სხვადასხვა ქვეყანამ სანქციები დაუწესა] სახელმწიფო ტენდერებში მონაწილეობის უფლების ისევ ქონას – ეს დგინდება სახელმწიფო შესყიდვების სააგენტოდან „ბათუმელებისთვის“ გამოგზავნილი წერილობითი განმარტებით.

სააგენტომ 10 სამუშაო დღე მოანდომა ამის მოწერას, რომ: „სახელმწიფო შესყიდვებში მიმწოდებელთა მონაწილეობის საკითხი, ისევე, როგორც სახელმწიფო შესყიდვის განხორციელებასთან დაკავშირებული სხვა საკითხები, რეგულირდება საქართველოს კანონმდებლობით“ და „სააგენტოს ქმედებები განხორციელებულ იქნება იმ მოთხოვნებისა და რეგულაციების შესაბამისად, რაც დადგინდება საქართველოს კანონმდებლობით“.

გადამოწმებით დგინდება, რომ რუსულ კომპანიებთან მიმართებით, სახელმწიფო შესყიდვებში მონაწილეობის კუთხით, რუსეთ-უკრაინის ომის დაწყებიდან დღემდე პერიოდში, საქართველოს კანონმდებლობაში არაფერი შეცვლილა.

[toggle title=”„ბათუმელების“ კითხვების და სააგენტოს პასუხის სანახავად დააწკაპუნეთ აქ“]

„ბათუმელებმა“ სახელმწიფო შესყიდვების სააგენტოს 12 დღის წინ წერილობით შემდეგი კითხვები გაუგზავნა:

• უკრაინაში მიმდინარე ომის გამო შეეზღუდათ ან შეეზღუდებათ თუ არა რუსეთის ფედერაციაში რეგისტრირებულ კომპანიებს [ასევე, მათ ფილიალებს საქართველოში] მონაწილეობა სახელმწიფო ტენდერებში?
• აეკრძალათ თუ არა [ან შეეზღუდათ თუ არა და რა პირობებით] სახელმწიფო ტენდერებში მონაწილეობა იმ რუსულ კომპანიებს, რომლებსაც საქართველოს პარტნიორი ქვეყნებისგან სანქციები აქვთ დაწესებული რუსეთის ფედერაციის მხრიდან უკრაინაზე განხორციელებული აგრესიის გამო? გთხოვთ, მოგვაწოდოთ ამ კომპანიების ჩამონათვალი.

„სახელმწიფო შესყიდვების სააგენტოში 2022 წლის 2 მარტს წარმოდგენილი თქვენი წერილის პასუხად გაცნობებთ, რომ სახელმწიფო შესყიდვებში მიმწოდებელთა მონაწილეობის საკითხი, ისევე, როგორც სახელმწიფო შესყიდვის განხორციელებასთან დაკავშირებული სხვა საკითხები, რეგულირდება საქართველოს კანონმდებლობით (მათ შორის, „სახელმწიფო შესყიდვების შესახებ“ საქართველოს კანონითა და მის შესაბამისად გამოცემული კანონქვემდებარე ნორმატიული აქტებით). აღნიშნულის გათვალისწინებით, სახელმწიფო შესყიდვების სააგენტოს ქმედებები განხორციელებულ იქნება იმ მოთხოვნებისა და რეგულაციების შესაბამისად, რაც დადგინდება საქართველოს კანონმდებლობით“, – მოგვწერეს სააგენტოდან 14 მარტს.

საქართველოს მთავრობის გაცხადებული პოზიციის მიუხედავად, ჩვენ მაინც გადავამოწმეთ საკანონმდებლო მაცნეში და აღმჩნდა, რომ „სახელმწიფო შესყიდვების შესახებ“ კანონში ბოლო ცვლილება 2021 წლის მაისშია შეტანილი. „მაცნეზე“ არც სხვა, კანონქვემდებარე ნორმატიული აქტი იძებნება ჩვენთვის საინტერესო საკითხზე.

შესაბამისად, რუსული კომპანიების მიმართ რაიმე შეზღუდვა სახელმწიფო შესყიდვებში ამ დროისთვის დაწესებული არ არის.

[/toggle]

საქართველოს სახელმწიფო შესყიდვების eProcurement სისტემაში კი 180-ზე მეტი რუსული კომპანიაა დარეგისტრირებული. სახელმწიფო ტენდერებში მონაწილეობს და იმარჯვებს კიდეც, რუსული კომპანიების ასობით ფილიალი, ასევე, კომპანიები, რომელთა ერთი ან მეტი მეწილე მაინც რუსეთის ფედერაციის მოქალაქეა.

[checklist]

• ამ სიაში მყოფი რუსული კომპანიებიდან რამდენიმეს, ჯამში, 20,3 მილიონი ლარის და 972 ათასი აშშ დოლარის ღირებულების ტენდერები აქვს მოგებული.

• 2019 წლიდან დღემდე, ჯამში, 30 მილიონი ლარის ტენდერები აქვთ ასევე მოგებული რუსული კომპანიების ფილიალებს საქართველოში.

[/checklist]

სახელმწიფო ტენდერების გარდა 2021 წელს რუსულმა კომპანიამ [„მეტროვაგონმაში“] გაიმარჯვა თბილისის მეტროპოლიტენის ახალი ვაგონების შესყიდვის ტენდერშიც, რომელიც  EBRD-ის მიერ იყო გამოცხადებული. შესყიდვის ღირებულება 49,19 მილიონი ევროა და ვაგონების მოწოდება 2022 წელს უნდა დაწყებულიყო, თუმცა EBRD-მა თანხის გადარიცხვა კომპანიისთვის შეაჩერა.

ორგანიზაცია „საერთაშორისო გამჭვირვალობა საქართველოს“ რეკომენდაციით, სახელმწიფო შესყიდვებში რუსული კომპანიების მონაწილეობა უნდა დარეგულირდეს:

„უსაფრთხოებიდან გამომდინარე, უნდა გამოიყოს ის საქონელი და მომსახურება, რომლის რუსული კომპანიებისგან შესყიდვა აიკრძალება ან შეიზღუდება. ასევე, უნდა შეიზღუდოს იმ რუსული კომპანიების მონაწილეობა [ტენდერებში], რომლებსაც საქართველოს პარტნიორი ქვეყნებიდან სანქციები აქვთ დაწესებული რუსეთის ფედერაციის მხრიდან უკრაინაზე განხორციელებული აგრესიის გამო“, – აღნიშნულია გამჭვირვალობის კვლევაში, რომელიც საქართველოს რუსეთზე ეკონომიკურ დამოკიდებულებას ეხება.

რუსული კომპანიების სახელმწიფო შესყიდვებში მონაწილეობის საკითხით „ბათუმელები“ 2019 წელს დაინტერესდა და შესყიდვების პორტალზე დარეგისტრირებული რუსული კომპანიების სია შესყიდვების სააგენტოდან გამოითხოვა. სააგენტომ სია მხოლოდ სასამართლოში ორწელიწად-ნახევრიანი დავის შემდეგ, უზენაესი სასამართლოს გადაწყვეტილების საფუძველზე მოგვაწოდა.

წინა წლებში „ბათუმელების“ მიერ საქართველოს სახელმწიფო შესყიდვებში რუსული კომპანიების მონაწილეობის საკითხის შესწავლით აღმოჩნდა, რომ 2012 წლიდან 2019 წლის ივნისამდე პერიოდში რუსული კომპანიების ფილიალებთან სახელმწიფო უწყებებმა [231 ტენდერში] ხელშეკრულებები, ჯამში, 139 024 429 ლარზე გააფორმეს. 

„ბათუმელებმა“ მაშინ სახელმწიფო ტენდერებში უშუალოდ რუსული კომპანიების მონაწილეობის გადამოწმებაც სცადა, თუმცა შესყიდვების სააგენტომ სისტემაში დარეგისტრირებული რუსული კომპანიების ჩამონათვალი არ მოგვაწოდა – მიუთითა, რომ ამ ფორმით ინფორმაცია დამუშავებული არ ჰქონდათ.

საქართველოს მთავრობაში ადმინისტრაციული საჩივრების უშედეგოდ გაგზავნის შემდეგ „ბათუმელები“ იძულებული გახდა სასამართლოსთვის მიემართა.

თბილისის საქალაქო სასამართლომ 2020 წლის აპრილის თვეში დაავალა შესყიდვების სააგენტოს გაეცა ჩვენ მიერ მოთხოვნილი ინფორმაცია. სასამართლო გადაწყვეტილება შესყიდვების სააგენტომ ჯერ სააპელაციო, შემდეგ კი – უზენაეს სასამართლოში გაასაჩივრა.

უზენაესმა სასამართლომ 2021 წლის 21 ოქტომბრის განჩინებით შესყიდვების სააგენტოს სარჩელი დაუშვებლად ცნო და ძალაში დატოვა სასამართლოს მეორე ინსტანციის გადაწყვეტილება.

საბოლოოდ, შესყიდვების სააგენტომ მოთხოვნილი ინფორმაცია – რუსული კომპანიების ჩამონათვალი, რომლებიც შესყიდვების პორტალზე მიმწოდებლებად იყვნენ დარეგისტრირებულნი, 2,5 წლის დაგვიანებით, 2022 წლის თებერვალში მოგვაწოდა.

[toggle title=”რუსული კომპანიისა და მათ მიერ მოგებული ტენდერების სანახავად დააწკაპუნეთ აქ“]

რუსეთის ფედერაციაში რეგისტრირებული კომპანიები, რომლებიც სხვადასხვა დროს ქართულ ტენდერებში გამარჯვებულად გამოავლინეს – არასრული სია

• შპს „ინვესტსტროირეგიონ“ [რუსეთის ფედერაცია, მოსკოვი]

საქართველოს გაერთიანებული სამელიორაციო სისტემების კომპანიას ამ რუსულ კომპანიასთან 2 ხელშეკრულება აქვს გაფორმებული სარწყავი არხების რეაბილიტაციაზე, ხელშეკრულების თანხა – ჯამში, 6 185 465 ლარი [შესყიდვების პორტალის მიხედვით აქედან ერთი ხელშეკრულება შეუსრულებელია].

• АО ППМТС Пермснабсбыт [რუსეთის ფედერაცია, პერმი]

„საქართველოს ნავთობისა და გაზის კორპორაცია” – მაგნიუმის პროტექტორების სახელმწიფო შესყიდვა – ხელშეკრულების თანხა 5 340 ლარი.

• АО НПО Тяжпромарматура [რუსეთის ფედერაცია, მოსკოვი]

„საქართველოს ნავთობისა და გაზის კორპორაციას“ ამ კომპანიასთან გაზსადენის მშენებლობა/რეაბილიტაციისათვის აუცილებელი სახაზო ონკანების შესყიდვაზე სამი ხელშეკრულება აქვს გაფორმებული:

1. ხელშეკრულების თანხა 1 029 177 ლარი, გადახდილი თანხა – 975 377 ლარი;
2. ხელშეკრულების თანხა 1 130 662 ლარი, გადახდილი თანხა – 1 194 453 ლარი;
3. ხელშეკრულების თანხა 1 947 768 ლარი, გადახდილი თანხა – 2 209 751 ლარი;

• JSC PTPA [რუსეთის ფედერაცია, პენზა]

„საქართველოს ნავთობისა და გაზის კორპორაცია“ – გაზსადენის მშენებლობა/რეაბილიტაციისათვის აუცილებელი სახაზო ონკანების შესყიდვა – ხელშეკრულების თანხა: 541 501 ლარი, გადახდილი თანხა – 597 980 ლარი.

• Общество с ограниченной ответственностью „СПЕЦЭНЕРГОЗАЩИТА“[რუსეთის ფედერაცია, მოსკოვი]

„საქართველოს სახელმწიფო ელექტროსისტემისათვის” სპეცტანსაცმლის შესყიდვა, ხელშეკრულების თანხა: 77 798 ლარი, გადახდილი თანხა – 80 869 ლარი.

• ООО СМС-информационные технологии [რუსეთის ფედერაცია, სამარა]

„საქართველოს სახელმწიფო ელექტროსისტემა“ – ენერგეტიკული მოწყობილობების რემონტების მართვის ავტომატიზებული სისტემის და მისი თანმდევი მომსახურების შესყიდვა, ხელშეკრულების თანხა: 109 000 ლარი, გადახდილი თანხა: 109 000 ლარი.

• Общество с ограниченной ответственностью “Медицинская Компания „АНТЕН-СЕРВИСЕ“ [რუსეთის ფედერაცია, მოსკოვი]

გიორგი ელიავას სახელობის ბაქტერიოფაგიის, მიკრობიოლოგიისა და ვირუსოლოგიის ინსტიტუტი – ლაბორატორიული ფართობების რემონტი და აპარატურის შესყიდვა – ხელშეკრულების თანხა: 172 450 ლარი, გადახდილი თანხა: 169 591 ლარი.

• ООО ЦГИ [რუსეთის ფედერაცია, მოსკოვი]

შპს „ენგურჰესი“ – ენგურჰესის თაღოვნი კაშხლის ნაპირებთან შეუღლების მდგომარეობის შეფასება, მარცხენა ფერდის უსაფრთხოების ღონისძიებების უზრუნველყოფა, გეოდეზიური და გეოფიზიკური მონიტორინგის სადამკვირვებლო ქსელების ოპტიმიზაცია, გეოდეზიურ სამუშაოებზე ზედამხედველობა, ხელშეკრულების თანხა: 4 539 999 ლარი, გადახდილი თანხა: 4 085 999 ლარი.

• Общество с ограниченной ответственностью „РД-Транс“ [რუსეთის ფედერაცია, კრასნოდარი]

შპს „ვარდნილჰესების კასკადი“ – არაგაბარიტული ტვირთის – ერთი ერთეული ავტოტრანსფორმატორის წონით 115 ტონა და მისი სათადარიგო ნაწილების საერთო წონით 145 ტონა გადაზიდვის სახელმწიფო შესყიდვა გამარტივებული ელექტრონული ტენდერის საშუალებით – ხელშეკრულების თანხა: 190 000 ლარი, გადახდილი თანხა: 185 671 ლარი.

• Акционерное общество Научно-производственный центр „ПРОМЭЛЕКТРОНИКА“ [რუსეთის ფედერაცია, ეკატერინბურგი]

„საქართველოს რკინიგზა“ – მიკროპროცესორული ნახევრადავტომატური ბლოკირების სისტემის შესყიდვა – ხელშეკრულების თანხა: 290 113 აშშ დოლარი.

• Общество с ограниченной ответственностью „Сибирский завод промышленного машиностроения“ [რუსეთის ფედერაცია, ომსკი]

„საქართველოს რკინიგზა“ – ქუსლების შესაცვლელ-დასამოქლონებელი პნევმოჰიდრავლიკური მოწყობილობის შესყიდვა – ხელშეკრულების თანხა: 39 164 აშშ დოლარი.

• АО „Калугапутьмаш“ [რუსეთის ფედერაცია, კალუგა]

„საქართველოს რკინიგზა“ – ლიანდაგდამგები ამწე (სალიანდაგო რგოლების დაგება-აღებისათვის) – ხელშეკრულების თანხა: 643 149 აშშ დოლარი

• ООО „ЛИТОМ“ [რუსეთის ფედერაცია, მოსკოვი]

„ბათუმის ბულვარი“ – სამუშაოები ძველი ბულვარის ტერიტორიაზე – ხელშეკრულების თანხა: 1 064 152 ლარი, გადახდილი თანხა: 1 008 129 ლარი [აღნიშნულ კომპანიასთან ბულვარის ადმინისტრაციამ ხელშეკრულება შეწყვიტა და დავა სასამართლოში გაგრძელდა. ვრცლად ნახეთ აქ].

ამ კომპანიებთან დადებული ყველა ხელშეკრულების საერთო თანხა 20 321 973 ლარი და 972 426 აშშ დოლარია.

[/toggle]

სახელმწიფო შესყიდვებში მიმწოდებლად დარეგისტრირებული რუსული კომპანიების რაოდენობა 2013 წლიდან ყოველწლიურად იზრდება:

შესყიდვების სააგენტოს 2021 წლის ანგარიში ჯერ გამოქვეყნებული არ აქვს, შესაბამისად არ ვიცით, რამდენი რუსული კომპანია იყო დარეგისტრირებული ამ წელს შესყიდვების პორტალზე მიმწოდებლად [ის, თუ რამდენი რუსული კომპანიაა დღევანდელი მდგომარეობით დარეგისტრირებული – ეს ინფორმაცია სააგენტოდან გამოთხოვილი გვაქვს და ველოდებით].

იმ მონაცემების მიხედვით, რაც ამ დრომდე გვქონდა, კვლავ გადაამოწმა და აღმოჩნდა, რომ რუსული კომპანიების ფილიალები სახელმწიფო ტენდერებში [2019 წლიდან დღემდე პერიოდში] რამდენჯერმე გამოავლინეს გამარჯვებულად.

[toggle title=”ამ ტენდერებისა და რუსული კომპანიების ფილიალების სანახავად დააწკაპუნეთ აქ:“]

სახელმწიფო ტენდერებში გამარჯვებული რუსული კომპანიების ფილიალები,
რომლებთანაც 2019 წლიდან დღემდე, სხვადასხვა სახელმწიფო უწყებამ
ხელშეკრულებები ჯამში 30 088 334 ლარით გააფორმა 

• შპს „რუსული რეგისტრი – ვესტჯეორჯია“ – ეს კომპანია ბათუმშია რეგისტრირებული და მისი მფლობელია რუსეთის ფედერაციის სერტიფიკაციის ასოციაცია „რუსული რეგისტრი“.

ამ კომპანიასთან 2019-2022 წლებში ხელშეკრულებები გაფორმებული აქვს ბათუმის საზღვაო აკადემიას [ჯამში 63 300 ლარზე] და საქართველოს სახელმწიფო ჰიდროგრაფიულ სამსახურს [31 300 ლარზე].

საზღვაო აკადემიამ ამ კომპანიასთან ხელშეკრულება ბოლოს 2022 წლის 14 თებერვალს გააფორმა. მომსახურება სამწლიანია და ხელშეკრულება ჯამში 41 400 ლარზეა გაფორმებული. კომპანიამ უნდა უზრუნველყოს ბათუმის სახელმწიფო საზღვაო აკადემიის მიერ ISO 9001:2015 საერთაშორისო სტანდარტის მოთხოვნების მიხედვით დანერგილი ხარისხის მენეჯმენტის სისტემის რესერტიფიცირება და შემდგომ 2 საზედამხედველო აუდიტი.

• შპს „სამშენებლო-სამონტაჟო სამმართველო სევერო-ზაპადის წარმომადგენლობა საქართველოში“ – ამ კომპანიის 100% წილს ფლობს რუსეთში რეგისტრირებული შპს „სამშენებლო-სამონტაჟო სამმართველო სევეროზაპადი“.

აღნიშნულ კომპანიასთან 2019-2020 წლებში ონის მერიას გზების რეაბილიტაციაზე ჯამში 1 905 431 ლარის ხელშეკრულებები აქვს გაფორმებული.

• შპს „კლასიკ-სტროი“ – ამ კომპანიის მესაკუთრეც ამავე დასახელების რუსული კომპანიაა.

„კლასიკ-სტროისთან“ საგანმანათლებლო და სამეცნიერო ინფრასტრუქტურის განვითარების სააგენტოს 2019 წელს ხელშეკრულება 9 499 951 ლარზე აქვს გაფორმებული. მომსახურება – თბილისში, ვლადიმირ კომაროვის თბილისის ფიზიკა-მათემატიკის N199 საჯარო სკოლის დიდი დიღმის ფილიალის დეტალური პროექტის მომზადება და მის საფუძველზე სამშენებლო სამუშაოები.

ამავე კომპანიასთან ხელშეკრულებები გაფორმებული აქვთ:

თბილისის საბავშვო ბაგა-ბაღების მართვის სააგენტოს – 298 706 ლარით – თბილისში, N150 -ე საბავშვო ბაგა-ბაღის გამაგრება/აღდგენის სამუშაოებზე;

ჭიათურის მუნიციპალიტეტს – 644 995 ლარით – სოფელ მერევის საავტომობილო გზის რეაბილიტაციაზე;

საგარეჯოს მუნიციპალიტეტის მერიას – 1 199 999 ლარით – სოფელ კაკაბეთში სასმელი წყლის ქსელის მოწყობაზე;

თბილისის ვაკის რაიონის გამგეობას – 471 121 ლარით – საყრდენი კედლების მოწყობაზე.

• შპს „ჯორჯია სპეცგიდროენერგომონტაჟი“ [იგივე შპს „ჯორჯია სგემ“] – 100% წილის მფლობელია რუსული სს „იგჰოლდინგ რუს“.

ეს კომპანია გამოვლენილია გამარჯვებულად „საქართველოს რკინიგზის“ მიერ ამწე-დანადგარების შეკეთებაზე გამოცხადებულ ტენდერში. კომპანია რკინიგზას მომსახურებას 885 936 ლარად სთავაზობს. ხელშეკრულება შესყიდვების პორტალზე ჯერ ატვირთული არ არის[15 მარტის მდგომარეობით].

• შპს „ინდივიდ-პარტნიორი“ – მესაკუთრეა ამავე სახელწოდების შპს, რომელიც რეგისტრირებულია რუსეთის ფედერაციაში.

ამ კომპანიასთან 2019 წელს საჩხერის მუნიციპალიტეტს ხელშეკრულება – 632 832 ლარით – აქვს გაფორმებული სოფელ არგვეთის კულტურის სახლის მშენებლობაზე; ხოლო სოფელ ქორეთის ადმინისტრაციულ ერთეულში შემავალი სოფლების სასმელი წყლის სისტემების მოწყობის სამუშაოებზე –  1 272 921 ლარით.

• შპს „სამშენებლო კომპანია ასტონ-ჯორჯია“ – მესაკუთრეა რუსული შპს „ასტონი“.

ამ კომპანიასთან თბილისის სახელმწიფო სამედიცინო უნივერსიტეტს 2020 წელს აქვს გაფორმებული ხელშეკრულება 147 053 ლარით – სხვადასხვა ტიპის სამშენებლო–სარემონტო სამუშაოზე.

• შპს „სტროი-ვეკის ფილიალი საქართველოში“ – მესაკუთრე შპს „სტროი-ვეკი“ / რუსეთის ფედერაცია.

ამ კომპანიათან 2019-2021 წლებში რამდენიმე ხელშეკრულება აქვს გაფორმებული მარნეულის, დმანისისა და თეთრიწყაროს მუნიციპალიტეტებს – ჯამში 823 657 ლარით.

ბორჯომის მუნიციპალიტეტმა ამ კომპანიასთან ორი ხელშეკრულება გააფორმა 2020 წელს, ბორჯომი-ახალქალაქის საზღვრიდან სოფლების – ჭიხარულა და ბალანთის გავლით ასფალტო- ბეტონის საფარის მოწყობაზე – რაშიც ჯამში კომპანიას 1 942 971 ლარი გადაუხადეს.

1 680 039 ლარით გააფორმა ხელშეკრულება „პასაჟი-საქართველოსთან“ ჩხოროწყუს მუნიციპალიტეტის მერიამ – სოფელ ხაბუმეში გზის ასფალტო-ბეტონის საფარის დაგებაზე. ხელშეკრულება 2020 წელს გაფორმდა, თუმცა სამუშაოები ამ დრომდე არ დასრულებულა. შესყიდვების პორტალის მიხედვით გარკვეული თანხა კომპანიას 2022 წლის 24 თებერვალს გადაურიცხა მუნიციპალიტეტმა. 15 მარტის მდგომარეობით სახელშეკრულებო თანხის მხოლოდ 51%-ია გადარიცხული.

„პასაჟი-საქართველოსთან“ ხელშეკრულებები გაფორმებული აქვთ ასევე თბილისის ნაძალადევის რაიონის გამგეობას [1 121 122 ლარი]; ახმეტის მუნიციპალიტეტს [200 962 ლარი]; ჩხოროწყუს მუნიციპალიტეტს [2 909 088 ლარი]; თბილისის ჩუღურეთის რაიონის გამგეობას [73 282 ლარი]; წალენჯიხის მერიას [4 525 548 ლარი].

გარდა იმ კომპანიებისა, რომელთა დამფუძნებლები [მთლიანად ან ნაწილობრივ] რუსეთის ფედერაციაში რეგისტრირებული კომპანიები არიან, საქართველოში 5 ათასზე მეტი ისეთი კომპანიაცაა დარეგისტრირებული, რომელთა ერთი პარტნიორი [მეწილე] მაინც რუსეთის ფედერაციის მოქალაქე ან ორმაგი [აქედან ერთი რუსეთის] მოქალაქეობის მქონე ფიზიკური პირია. ამ კომპანიების სახელმწიფო ტენდერებში მონაწილეობა „ბათუმელებს“ არ გადაუმოწმებია.

[/toggle]

შესყიდვების სააგენტოს 2020 წლის ანგარიშის მიხედვით, რუსეთი არ ფიგურირებს იმ 18 ქვეყანას შორის, რომელთა კომპანიებთანაც ყველაზე მეტი ღირებულების ხელშეკრულებები გაფორმდა ტენდერების შედეგად. ამ მონაცემებით, ყველაზე მეტი ღირებულების ხელშეკრულებები ფრანგულ კომპანიებთან გაფორმდა, შემდეგ მოდის: უნგრეთის, ლიეტუვის, გერმანიის და ა.შ. კომპანიები.

ქვემოთ ცხრილში ნაჩვენებია 2020 წელს არარეზიდენტ მიმწოდებლებთან [უცხოურ კომპანიებთან] გაფორმებული ხელშეკრულებების
ღირებულების გადანაწილება ქვეყნების მიხედვით:

ზოგადად, ომის გამო  რუსეთის მიმართ დაწესებულ სანქციებს რაც შეეხება, პრემიერმა ირაკლი ღარიბაშვილმა უკრაინაში ომის დაწყებიდან მეორე დღეს განაცხადა, რომ საქართველო არ შეუერთდება რუსეთის წინააღმდეგ სანქციებს. იგივე პოზიცია დააფიქსირა 16 მარტს „ქართული ოცნების“ თავმჯდომარე ირაკლი კობახიძემ.

ამავე თემაზე:

სტატია მომზადებულია პროექტის ფარგლებში – „მოქალაქეებისა და ახალგაზრდების ჩართულობის გაძლიერება სამოქალაქო აქტივობებში“. პროექტს ახორციელებს არასამთავრობო ორგანიზაცია „თავისუფალ ჟურნალისტთა სახლი“. პროექტის ფინანსური მხარდამჭერია ამერიკული ფონდი „ეროვნული წვლილი დემოკრატიისთვის“ [NED]. არ არის აუცილებელი სტატიაში გამოთქმული მოსაზრებები გამოხატავდეს დონორი ორგანიზაციის შეხედულებებს.

„პრემიერმა განმარტა“ – გვიპასუხეს აჭარის უმაღლესი საბჭოს დეპუტატებმა, რომლებსაც ვკითხეთ, რამდენად სამართლიანი იყო მათთვის კრიტიკა ამჯერად პრეზიდენტ სალომე ზურაბიშვილისგან. დეპუტატები მიიჩნევენ, რომ სალომე ზურაბიშვილის კრიტიკა ცილისწამებაა სინამდვილეში.

დღეს, 15 მარტს, პარტია „ქართულ ოცნებაში“ განაცხადეს, რომ მთავრობა სალომე ზურაბიშვილს საკონსტიტუციო სასამართლოში უჩივლებს. „პრეზიდენტ ზურაბიშვილს კონსტიტუცია არ დაურღვევია“ – ეს შეფასება უკვე დადო ორგანიზაცია IDFI-მ და თავის განცხადებაში ხაზი გაუსვა იმას, რომ „მთავრობის თანხმობის გარეშე პრეზიდენტი ვერ დადებს საერთაშორისო ხელშეკრულებას, ვერ ისარგებლებს ხმის უფლებით საერთაშორისო ორგანოებში, თუმცა მას, როგორც სახელმწიფო მეთაურს, არ ეკრძალება საგარეო პოლიტიკასთან დაკავშირებით საკუთარი პოზიციების გამოხატვა ქვეყნის შიგნით ან ქვეყნის გარეთ“.

„ხანდახან სალომე ზურაბიშვილის განცხადებები, შეიძლება პირდაპირ ითქვას, არის შეუსაბამო და არაადეკვატური,“ – მიიჩნევს უმაღლესი საბჭოს თავმჯდომარის მოადგილე, ტიტე აროშიძე. უფრო შორს წავიდა დავით ბაციკაძე, კიდევ ერთი დეპუტატი უმაღლეს საბჭოში „ქართული ოცნებიდან“: „სალომე ზურაბიშვილი არც ყოფილა ჩვენი პოლიტიკური გუნდის წევრი,“ – გვითხრა მან.

„ხელისუფლება სცოდავს, როცა ვერ ბედავს გამოხატოს, რასაც ღირსება გვკარნახობს… ამას გამართლება არ აქვს სიფრთხილისა თუ შიშის ვერც ერთი არგუმენტი ამართლებს იმას, რომ ღირსეულად, სიტყვით მაინც დავდგეთ იქ, სადაც სინდისი და ქართველობა მოითხოვს“, – აღნიშნა სალომე ზურაბიშვილმა გუშინ, 14 მარტს, საქართველოს პარლამენტში გამოსვლის დროს.

„ზუსტად ღირსების საქმეა ის, რომ ქვეყანამ აირიდოს ყველა საფრთხე და არ დადგეს ქვეყანაში რამე ისეთი, რაც სავალალო მდგომარეობამდე მიგვიყვანს. მინდა ვუთხრა პრეზიდენტს, რომ ჩვენი პარტნიორი ქვეყნების ელჩებმა აღნიშნეს, რომ საქართველო იქცევა ისე, როგორც შეეფერება ნამდვილ პარტნიორს,“ – მმართველი პოლიტიკური გუნდის გზავნილი გაგვიმეორა დავით ბაციკაძემ, რომელსაც გავახსენეთ, რომ ამ „სიფრთხილის“ ფონზე უკრაინის პრეზიდენტმა, ვოლოდიმირ ზელენსკიმ, პროტესტის ნიშნად გაიწვია უკრაინის ელჩი საქართველოდან.

„ზელენსკი ახლა ეთერში რომ გამოვიდეს და შემაგინოს, ჩემი სოლიდარობა მას. ეს კაცი ებრძვის ახლა მონსტრს,“ – თქვა დავით ბაციკაძემ.

„ეს იყო გარკვეული გაუგებრობა,“ – მიიჩნევს ტიტე აროშიძე და ეჭვი აქვს, რომ ზელენსკის საქართველოდან არასწორ ინფორმაციას აწვდიან.

„პრემიერმა ირაკლი ღარიბაშვილმა განმარტება გააკეთა,“ – გვითხრა ტიტე აროშიძემ, როცა მას ვკითხეთ, რატომ არ იყო სალომე ზურაბიშვილის კრიტიკა თუ საყვედური სამართლიანი, როცა საომარ ვითარებაში ევროპის ქვეყნებში მას სამუშაო ვიზიტები გაუუქმეს.

პრემიერის თქმით, „როცა უკრაინაში ომია, საქართველოს მთავარსარდალი ქვეყანაში უნდა იყოს.“

„პრემიერმა ირაკლი ღარიბაშვილმა გააკეთა განცხადება და აღნიშნა, რომ ქვეყნის მთავარსარდალი, როცა საფრთხის წინაშე დგას ქვეყანა და როდესაც საომარი ვითარებაა მეზობელ ქვეყანაში, უნდა იყოს ადგილზე. მე მას სრულად ვეთანხმები პრინციპში, სამართლებრივ სიღრმეებში ვერ შევალ,“ – დასძინა ტიტე აროშიძემ.

„არ წარმოადგენს პრეზიდენტი საქართველოს საგარეო ურთიერთობებში, თუკი მას შეთანხმება არ მისცა მთავრობამ, საგარეო პოლიტიკას წარმართავს მთავრობა. ამისთვის გვყავს ელჩები და საგარეო საქმეთა მინისტრი,“ – მიიჩნევს დავით ბაციკაძე.

კანონმდებელს მივუთითეთ კონსტიტუციის ჩანაწერზე, რომლის მიხედვითაც, საქართველოს პრეზიდენტი საქართველოს წარმოადგენს საგარეო ურთიერთობებში. ამავე კონსტიტუციის მიხედვით, ევროინტეგრაცია საქართველოს არჩევანია.

„კონსტიტუციურმა ორგანოებმა თავიანთი უფლებამოსილების ფარგლებში მიიღონ ყველა ზომა ევროპის კავშირსა და ჩრდილოატლანტიკური ხელშეკრულების ორგანიზაციაში საქართველოს სრული ინტეგრაციის უზრუნველსაყოფად,“ – წერია საქართველოს კონსტიტუციაში.

ამ მოცემულობის გათვალისწინებით, საქართველოს პრეზიდენტს ხომ არ შეუშალეს ხელი კონსტიტუციური უფლებამოსილების განხორციელებაში და კონსტიტუციით გათვალისწინებული ევროინტეგრაციის პროცესში?

„ამ საკითხებს განმარტავს საკონსტიტუციო სასამართლო, სხვადასხვა ინტერპრეტაცია რომ არ მიეცეს. მე არ ვარ კონსტიტუციონალისტი…

გარკვევით ახსენეს საფრთხეები, რის გამო გააკეთეს [პრეზიდენტის საქმიანი ვიზიტების გაუქმება]. არ ვიცი, რა საფრთხეები იყო, ეს არ არის ჩემი კომპეტენცია. ჩემთვის მთავარია კონსტიტუციის და კანონის დაცვა,“ – აღნიშნა დავით ბაციკაძემ.

კიდევ ერთი საკითხი, რაზეც დეპუტატების მოსაზრებით დავინტერესდით, უსაფრთხოების საბჭოს სხდომაა, რომელიც უკრაინაში ომის მიუხედავად, საქართველოში ამ დრომდე არ გამართულა.

„ვინმე დაიჯერებს, რომ ასეთ მძიმე და საყურადღებო ვითარებაში არც ერთხელ არ შეკრებილა უსაფრთხოების საბჭო, არც ერთხელ არ ყოფილა ერთობლივად განხილული სამხედრო საფრთხეები უმაღლესი მთავარსარდლის დასწრებით,“ – თქვა პარლამენტში 14 მარტს სალომე ზურაბიშვილმა.

„უსაფრთხოების საბჭოს სხდომას აქვს თავისი პროცედურები და იმისთვის, რომ გარკვეულმა ნაწილმა ჩათვალოს, ასე არ ხდება,“ – განმარტავს უმაღლესი საბჭოს თავმჯდომარის მოადგილე, ტიტე აროშიძე.

რატომ არ დაინახა ხელისუფლებამ „საფუძველი“, თუკი ამის საჭიროებას ხედავს პრეზიდენტი და აქამდე ამის შესახებ საუბრობდნენ ექსპერტებიც?

„თუკი ჩათვლის საჭიროდ, აუცილებლად ჩატარდება თქვენ გარეშე და იმის გარეშეც, ვინც თვლის, რომ უნდა ჩატარდეს, თუ არ ჩატარდეს,“ – პარტიულ ვერტიკალს ვერც ამჯერად გასცდა დეპუტატი ტიტე აროშიძე.

კონსტიტუციასთან მიბრუნება არჩია დეპუტატმა დავით ბაციკაძემ, რომელსაც ასევე ვკითხეთ: რატომ არ არის სამართლიანი პრეზიდენტის კრიტიკა, როცა უსაფრთხოების საბჭო ერთხელაც არ შეიკრიბა?

„ამისთვის შედის სარჩელი საკონსტიტუციო სასამართლოში და ის განმარტავს, ვის რა უფლებები აქვს… საპარლამენტო რესპუბლიკა ვართ და ის, რომ მთავრობა წარმართავს საქმიანობას იგივე უსაფრთხოების საბჭოსთან დაკავშირებით, ცალსახა ჩანაწერი არსებობს“, – თქვა დავით ბაციკაძემ.

რატომ ექნება საკონსტიტუციო სასამართლოს შეფასებას სანდოობის მაღალი ხარისხი, როცა მოსამართლეები, მაგალითად, „ლონდა თოლორაის საქმეზე“ მხოლოდ საპროტესტო აქციების შემდეგ, ბოლო დღეს შეიკრიბნენ და არ მიიჩნიეს საჭიროდ მთავრობისთვის კრიტიკული გადაწყვეტილების მიმღები ინსტიტუტის გადარჩენა? დეპუტატს გავახსენეთ, რომ ამ საქმეზე მოსამართლემაც დააფიქსირა ღიად თავისი განსხვავებული აზრი და საქართველოს პარტნიორი ქვეყნებიც ხედავენ, რომ ქვეყნის სასამართლო სისტემაში კლანური მმართველობაა, რომელზეც მმართველ პოლიტიკურ გუნდს აქვს გავლენა.

„მე რა უფლება მაქვს, შევიდე საკონსტიტუციო სასამართლოს საქმის განხილვაში? რატომ განიხილა ან არ განიხილა, ეს ჰკითხეთ საკონსტიტუციო სასამართლოს მოსამართლეებს,“ – გამოსავალი იპოვა დავით ბაციკაძემ.

ღარიბაშვილისა და კობახიძის რიტორიკის შესაბამისად, პრეზიდენტს ფაქტების წარმოდგენას სთხოვს დეპუტატი ტიტე აროშიძე:

„წარმოადგინოს მაშინ ის ფაქტები, რომლითაც დასტურდება, რომ ჩვენ უკრაინას და უკრაინის მოსახლეობას არ ვუდგევართ გვერდით. ეს არის თითიდან გამოწოვილი თემა, როცა სალომე ზურაბიშვილი ადანაშაულებს ხელისუფლებას, რომ თითქოს უფრთხიან და არ დგებიან უკრაინის გვერდით. ეს არის ცილისმწამებლური განცხადება…

ჩვენ ვამბობთ, რომ რუსეთი არის აგრესორი, ისინი შეიჭრნენ უკრაინაში ტერიტორიის ოკუპაციის მიზნით. ჩვენ აუცილებლად შევალთ ევროკავშირის დიდ ოჯახში,“ – ამბობს ტიტე აროშიძე.

როგორ დაუჯეროს საზოგადოებამ დეპუტატს, როცა პრეზიდენტს ევროკავშირის ქვეყნებში სამუშაო ვიზიტებს უუქმებენ, უკრაინა ელჩს იწვევს კონსულტაციებისთვის, თორნიკე რიჟვაძე ვერ ამბობს, ვინ დაიწყო ომი უკრაინაში…

„ირაკლი ღარიბაშვილს აქვს ყოველდღიური კომუნიკაცია ჩვენს პარტნიორებთან… მაგალითად, ბოლოს იყოს აშშ-ის სახელმწიფო დეპარტამენტის ხელმძღვანელობა… ჩვენ ცალსახად ვაფიქსირებთ, რომ ვართ ევროინტეგრაციისკენ მიმავალ გზაზე… თორნიკე რიჟვაძე ყველა სხდომას იწყებს უკრაინის მხარდამჭერი განცხადებებით, ჩართული ვართ აქტიურად დახმარებით,“ – ამბობს უმაღლესი საბჭოს თავმჯდომარის მოადგილე, ტიტე აროშიძე.

დავით ბაციკაძე კი გულდაწყვეტილია, საკონსტიტუციო ცვლილებების დროს კიდევ უფრო მეტად რომ არ შეუკვეცეს პრეზიდენტს უფლებამოსილება.

„…კიდევ მეტი უფლებები აქვს პრეზიდენტს, ვიდრე უნდა ჰქონდეს. არ გამოადგა ამ ქვეყანას არაფერში საპრეზიდენტო მმართველობა, დამაზიანებელი აღმოჩნდა ყველაფერში,“ – მიიჩნევს დავით ბაციკაძემ, რომელიც ასევე არ იზიარებს პრეზიდენტის კრიტიკას კიდევ ერთ ნაწილში:

„ხელისუფლება სცოდავს, როცა ამ გარდამტეხ მომენტში ქვეყნისთვის ისტორიული განაცხადი ერთობლივი ხელმოწერით გამყარებული კი არ წარადგინა ევროპის წინაშე, როგორც სრული სახელმწიფოებრივი კონსოლიდაციის ნიშანი და ეროვნული თანხმობის პირველი ნაბიჯი, არამედ არჩია თავის თავში ჩაკეტვა და ერთპიროვნულად ხელის მოწერა“, – აღნიშნა სალომე ზურაბიშვილმა.

დეპუტატმა აჭარის უმაღლეს საბჭოში, დავით ბაციკაძემ, ამ ნაწილში მიიჩნია, რომ სალომე ზურაბიშვილს გული დაწყდა, თავად რომ არ მოუწია ევროკავშირის წევრობის განაცხადზე ხელის მოწერა. მისი შეფასებით, სულ ესაა პრობლემის არსი და არა ის „ეროვნული თანხმობა“ და კონსოლიდაციის საჭიროება, რაზეც ზურაბიშვილმა გაამახვილა ყურადღება.

„პრემიერს აქვს მხოლოდ უფლება ასეთი ტიპის საკითხებს მოაწეროს ხელი, საპარლამენტო რესპუბლიკებში ასეა, საგარეო პოლიტიკას წარმართავს პარლამენტი და მთავრობა… ჩემთვის მთავარი არის ის, რომ ჩვენ განაცხადი გავაკეთეთ ევროკავშირის წევრობაზე,“ – გვითხრა დავით ბაციკაძემ.

„ბათუმელების“ შეტყობინება უპასუხოდ დატოვა გიორგი მანველიძემ,  ფრაქცია „ქართული ოცნების“ თავმჯდომარემ აჭარის უმაღლეს საბჭოში.

სატელეფონო კომენტარზე უარი გვითხრა „ოცნებიდან“ კიდევ ერთმა დეპუტატმა – დავით თედორაძემ.

იცით თუ არა, ვინ არიან პრეზიდენტ ზელენსკის გუნდის წევრები? მაგალითად, მიხაილო პოდოლიაკი, რომელსაც პრეზიდენტი ზელენსკი ონლაინჩართვების დროს ხშირად ახსენებს ან თან ახლავს, ის წლების განმავლობაში ჟურნალისტად მუშაობდა და ბელარუსიიდან გამოაძევეს. პოდოლიაკი ახლა ზელენსკის ძირითადად საინფორმაციო პოლიტიკის კუთხით აძლევს რჩევებს.

პოდოლიაკი არ არის ერთადერთი, ვინც ზელენსკის გარემოცვაში საინფორმაციო ტექნოლოგიებს კარგად იცნობს.

„ბათუმელებმა“ პრეზიდენტ ვოლოდიმირ ზელენსკის გუნდის ყველაზე აქტიური წევრების ბიოგრაფიებს გადახედა – რა გამოცდილებით მოვიდნენ ისინი პოლიტიკაში და უკრაინის ხელისუფლებაში ჩაიბარეს თანამდებობები მას შემდეგ, რაც უკრაინელებმა პრეზიდენტად ზელენსკი აირჩიეს.

24 თებერვლის  ანუ მას შემდეგ, როცა რუსეთმა უკრაინაში სრულმასშტაბიანი ომი დაიწყო, ყველამ გაიცნო უკრაინის საგარეო საქმეთა მინისტრი დმიტრო კულება. მას შევჩენკოს ეროვნული უნივერსიტეტის საერთაშორისო ურთიერთობები აქვს დამთავრებული და საერთაშორისო სამართლის დოქტორია.

კულება 1981 წელს დაიბადა უკრაინის აღმოსავლეთით, ქალაქ სუმში.

დმიტრო კულებას მამაც დიპლომატი ყოფილა – ივან კულება 2003-2004 წლებში უკრაინის საგარეო საქმეთა მინისტრის მოადგილე იყო, ხოლო შემდეგ უკრაინის ელჩი ეგვიპტეში, ჩეხეთში, ყაზახეთსა და სომხეთში.

კულება 2003 წლიდან მუშაობს უკრაინის საგარეო საქმეთა სამინისტროში. მან საჯარო სამსახური 2013 წელს დატოვა, უკრაინული მედიის ცნობით, „პრეზიდენტ ვიქტორ იანუკოვიჩის კურსთან უთანხმოების გამო.“

კულება ევრომეიდნის აქტივისტი გახდა.

2014 წელს კულება საგარეო საქმეთა სამინისტროში დაბრუნდა. 2016 წლიდან იგი ევროსაბჭოში უკრაინის მუდმივმოქმედ წარმომადგენლად დანიშნეს. დმიტრო კულება უკრაინის საგარეო საქმეთა მინისტრია 2020 წლის 4 მარტიდან.

„უკრაინა ბრუნდება ცენტრალურ ევროპაში“  – ეს ერთ-ერთი ციტატაა კულებას განცხადებებიდან, რომელსაც დღეს „გუგლის“ საძიებო სისტემა აგდებს, როცა კულებას შესახებ ინფორმაციას ეძებ. აქვეა „ინდეპენდეტის“ სტატიაც, რომელიც უკრაინაში ომის დაწყებამდე რამდენიმე თვით ადრე – 2021 წლის 13 სექტემბერსაა გამოქვეყნებული და სადაც კულება დასავლეთს ახსენებს, რომ მილიტარიზაცია სჭირდება ქვეყნის გადარჩენისთვის.

კულებამ 2019 წელს დაწერა წიგნი „ომი რეალობისთვის. როგორ მოვიგოთ ომი ყალბი ამბების და სიმართლის სამყაროში“. წიგნში კულება ძირითადად საინფორმაციო ომის შესახებ წერს.

დმიტრო კულებას ცოლი, ევგენია, კიევის საკრებულოს დეპუტატად 2020 წელს აირჩიეს პარტიიდან – „ხალხის მსახური“ [პრეზიდენტ ვოლოდიმირ ზელენსკის პარტია]. ის გარემოსდაცვითი პოლიტიკის მუდმივი კომიტეტის მდივანია.

ზელენსკის გარემოცვის აქტიური წევრია ასევე ოლექსი არესტოვიჩი, რომელიც ომის დაწყების შემდეგ ყოველდღიურად მართავს ბრიფინგს. ის ზელენსკის მრჩეველია და ბლოგერი პოლიტიკურ და სამხედრო საკითხებზე. ოლექსი არესტოვიჩი 1975 წელს დაბადებულა საქართველოში, დედოფლისწყაროში.

არესტოვიჩის მიმართაც მსოფლიო მედიის ყურადღება მას შემდეგ განსაკუთრებით გაიზარდა, როცა ცნობილი გახდა, რომ არესტოვიჩს 2019 წელს ჰქონდა ნავარაუდევი ომი რუსეთთან. „99 პროცენტით იქნება ომი რუსეთთან 2020 – 2022 წლებში,“ – აღნიშნა არესტოვიჩმა ერთ-ერთ სატელევიზიო გადაცემაში.

1992 წელს არესტოვიჩმა კიევში დაამთავრა სკოლა და თავდაპირველად ბიოლოგობა გადაწყვიტა. იგი შევჩენკოს ეროვნულ უნივერსიტეტში სწავლობდა. სტუდენტობის დროს ოლექსის მსახიობობის სურვილი გასჩენია, შემდეგ კი – ფსიქოლოგიის.

2010 წელს არესტოვიჩმა დაასრულა ფსიქოლოგ პოდვოდნის საავტორო სკოლა „ადამიანი ხალხში“. იგი სწავლობდა თეოლოგიასაც.

არესტოვიჩს ასევე დამთავრებული აქვს ოდესის სამხედრო აკადემია, მას აქვს სამხედრო თარჯიმნის დიპლომი. 1994 წლიდან 2005 წლამდე ის მუშაობდა თავდაცვის სამინისტროს დაზვერვის სამმართველოში.

არესტოვიჩს პირველ ცოლთან ჰყავს შვილი ანასტასია, მეორე ცოლთან – ალექსანდრე.

ოლექსი რეზნიკოვი – უკრაინის თავდაცვის მინისტრი 56 წლისაა. ის ასაკით ყველაზე უფროსია ზელენსკის გარემოცვაში. რეზნიკოვი 2021 წლის ნოემბრიდან იკავებს მინისტრის თანამდებობას. მანამდე კი, რეზნიკოვი უკრაინის მთავრობაში იკავებდა სხვადასხვა პოზიციას, მათ შორის, იყო ვიცე-პრემიერი და უკრაინის ოკუპირებული ტერიტორიების რეინტეგრაციის მინისტრიც.

რეზნიკოვი ლვოვშია დაბადებული. მისი მამა, იური რეზნიკოვი, პროფესორი ყოფილა და ლვოვის სახელმწიფო ინსტიტუტში მუშაობდა, დედა – ოლენა რეზნიკოვა კი ნევროლოგია და ტანვარჯიშის ოსტატი.

რეზნიკოვი პროფესიით იურისტია, მას ლვოვის უნივერსიტეტი აქვს დამთავრებული. 2010 წელს ჟურნალმა The Lawyer-მა იურიდიული კომპანია Magisters-ი დაასახელა საუკეთესო იურიდიულ ფირმად რუსეთსა და პოსტსაბჭოთა ქვეყნებში. ამ იურიდიული ფირმის ერთ-ერთი დამფუძნებელი კი რეზნიკოვია. ის იურიდიულ კომპანიაში დავების დეპარტამენტსაც ხელმძღვანელობდა.

2014 წელს ადგილობრივ არჩევნებში რეზნიკოვი კიევის ქალაქის საბჭოს წევრად აირჩიეს. აქედან იწყება მისი პოლიტიკური კარიერა. შემდეგ წლებში კი, იგი წარმოადგენდა უკრაინის დელეგაციას ევროსაბჭოში.

2019 წელს პრეზიდენტმა ზელენსკიმ რეზნიკოვს უფლება მისცა წარმოედგინა უკრაინა სამუშაო პოლიტიკურ ქვეჯგუფში, სამმხრივ საკონტაქტო ჯგუფში დონბასის საკითხზე.

რეზნიკოვს ჰყვარებია დაივინგი, ჩოგბურთი და თხილამურები. მას ჩატარებული აქვს მყვინთავის 260-ზე მეტი ექსპედიცია და 163 ნახტომი პარაშუტით.

ოლექსი რეზნიკოვის მეუღლე ტელეჟურნალისტია. მას პირველი ქორწინებიდან 2 შვილი ჰყავს.

რუსლან სტეფანჩუკი უკრაინის რადას თავმჯდომარეა. „უკრაინა არასდროს დათმობს ევროპულ პერსპექტივას. ეს ის გზაა, რომელსაც აუცილებლად მივყვებით“, – ასე იწყება რადას გვერდზე გამოქვეყნებულ ბოლო ინფორმაციაში სტეფანჩუკის ციტატა.

სტეფანჩუკი ომის დაწყებამდეც გახდა ცნობილი, მაშინ, როცა გაირკვა, რომ ის პრეზიდენტ ზელენსკის საპრეზიდენტო პროგრამის ერთ-ერთი ავტორი იყო არჩევნების დროს.

რუსლან სტეფანჩუკი 1975 წლის 29 ოქტომბერს დაიბადა. ის უკრაინის რადას თავმჯდომარეა 2021 წლის ოქტომბრიდან. სტეფანჩუკი რადას წევრი გახდა პარტიიდან – „ხალხის მსახური“ [ვოლოდიმირ ზელენსკის პარტია].

სტეფანჩუკიც პროფესიით იურისტია. მას ხმელნიცკის უნივერსიტეტი აქვს დამთავრებული – „მენეჯმენტი და სამართალი“. აქვს დოქტორის ხარისხი სამართალში.

პოლიტიკასთან მისი პირველი კავშირი 2007 წელს დაიწყო, როცა რადას დეპუტატის, ანატოლი მატვიენკოს ასისტენტი გახდა.

უკრაინული მედიის ინფორმაციით, რუსლან სტეფანჩუკი უკრაინაში ერთ-ერთი მდიდარი იურისტი იყო. მისი შემოსავლები 2019 წლისთვის დაახლოებით 1.5 მილიონი ამერიკული დოლარი იყო.

რუსლან სტეფანჩუკის ცოლი მარიანა სტეფანჩუკია. ის კიევის ეროვნული უნივერსიტეტის პროფესორია.

ზელენსკის გუნდის სახეა დავით არახამია. ყველას გეხსომებათ, უკრაინაში ომის დაწყების შემდეგ ბელარუსიაში რუსებთან ცეცხლის შეწყვეტაზე მოსალაპარაკებლად დავით არახამია გაუშვეს. იგი უკრაინის რადაში სახელისუფლებო პარტიის – „ხალხის მსახურის“ ფრაქციის თავმჯდომარეა.

დავით არახამია 1979 წელს დაიბადა სოჭში. ის გაგრაში ცხოვრობდა 1992 წლამდე, ვიდრე აფხაზეთში ომი დაიწყებოდა. დევნილი არახამიების ოჯახი მას შემდეგ უკრაინაში, ქალაქ მიკოლაევში ცხოვრობს.

დავით არახამიას დამთავრებული აქვს უკრაინის ევროპული უნივერსიტეტი და გავლილი აქვს პროფესიული მენეჯმენტის მასტერკურსი ლონდონის ღია უნივერსიტეტში.

2014 წლიდან დავით არახამია მიკოელაევის ოლქის გუბერნატორის მრჩეველი ხდება, მალევე ის თავდაცვის მინისტრის მრჩევლად გადაჰყავთ.

დავით არახამიას 6 შვილი ჰყავს. ის ამჟამად მეორე ქორწინებაშია და ვიქტორია არახამიასთან 5 შვილი ჰყავს, პირველი ქორწინებიდან კი, კიდევ ერთი ვაჟი.

დავით არახამია მილიონერია. 2019 წელს უკრაინულ გამოცემა „ლიგა ნეტთან“ დავით არახამიამ დაადასტურა, რომ მისი ქონება დაახლოებით 20 – 25 მილიონი აშშ დოლარია. უკრაინული მედია 2020 წელს ასევე წერდა, მაგალითად, არახამიას ახალ სახლზე კიევის პრესტიჟულ უბანში, რომელიც დეპუტატს 2020 წელს 983 ათასი გრივნა დაუჯდა.

en.thepage.ua-ს ინფორმაციით, დავით არახამია ერთ-ერთი დამფუძნებელია საერთაშორისო IT კომპანიაში TemplateMonster. ეს კომპანია გაყიდვებში ერთ-ერთ ლიდერად სახელდება. მის ცოლს, ვიქტორიას კი, აქვს ასევე წილები კომპანიაში – global bay venture.

დავით არახამია უკრაინაში ევრომაიდნის აქტივისტი იყო 2014 წელს, როცა მეგობრებთან ერთად შექმნა ინტერნეტგვერდი მოხალისეებისთვის, ვინც 79-ე ბრიგადისთვის სამხედრო აღჭურვილობის შეძენას დააფინანსებდა. მცდელობამ გაამართლა და დავით არახამიამ ინტერნეტტექნოლოგიების მიმართულებით ბიზნესის წამოწყება გადაწყვიტა.

პრეზიდენტ ზელენსკის კიდევ ერთი მრჩეველი მიხაილო პოდოლიაკია. ის დაიბადა 1972 წლის 16 თებერვალს, ბავშვობა მან ლვოვში გაატარა, ნოვოვოლინსკში. 1989 წლიდან პოდოლიაკი ბელარუსში ცხოვრობდა, მას მინსკის სამედიცინო ინსტიტუტი აქვს დამთავრებული.

პოდოლიაკს ჟურნალისტად მუშაობის მრავალწლიანი გამოცდილება აქვს – ის 1990 წელს რადიო „FM ბულვარის“ ჟურნალისტად მუშაობდა. 2004 წელს იყო მთავარი რედაქტორის მოადგილე ბელარუსიაში გამომავალ გაზეთ – „დროში“. მაშინ მის სახლში ბელარუსიის უშიშროების ოფიცრები შევიდნენ და ნახევარი საათი მისცეს საკუთარი ნივთების მოსაგროვებლად.

უკრაინული მედიის და უკვე არამხოლოდ უკრაინული მედიის ცნობით, მაშინ ის დაადანაშაულეს „სახელმწიფო ინტერესების საწინააღმდეგო საქმიანობაში“, ხოლო მისი ჟურნალისტური მასალები ბელარუსიის ხელისუფლების წინააღმდეგ იყო ცილისწამება. მას დეპორტაცია გაუკეთეს უკრაინაში და ხუთი წლის განმავლობაში უკან დაბრუნება აუკრძალეს.

2005 წელს პოდოლიაკი „უკრანული გაზეთის“ მთავარი რედაქტორი ხდება. ამავე წლის ივნისში გამოქვეყნდა მისი სტატია სათაურით – „უკანასკნელი ვახშამი“, რომელიც მაშინდელი საპრეზიდენტო კანდიდატის – ვიქტორ იუშჩენკოს მოწამვლას ეხებოდა. აქ პოდოლიაკი საკუთარ წყაროებზე დაყრდნობით ვარაუდობდა, რომ იუშჩენკოს მოწამვლის უკან პრეზიდენტობის კანდიდატთან დაახლოებული პირები იდგნენ.

2006 წელს პოდოლიაკი უკრაინული ინტერნეტგამოცემა Observer-ში იწყებს მუშაობას.

ზელენსკისთან მუშაობა მიხაილო პოდოლიაკმა 2020 წლის აპრილში დაიწყო. მას შემდეგ ის აკონტროლებს პრეზიდენტის საინფორმაციო პოლიტიკას და უშუალოდ აძლევს რჩევებს ვოლოდიმირ ზელენსკის. უკრაინული მედიის ინფორმაციით, ის ამზადებს ასევე მინისტრებს მედიაში გამოსასვლელად.

____

ამ თემაზე:

„ბათუმის დამოუკიდებელი ცხოვრების ცენტრი“ 15 უკრაინელი შშმ პირის დასახმარებლად თანხას აგროვებს.

ცენტრის თავმჯდომარე, თომა კაკაბაძე ამბობს, რომ უკრაინელი შშმ პირების მხარდასაჭერი კამპანია უკრაინაში ომის დაწყებისთანავე წამოიწყეს და კარგად იციან, როგორი მძიმე მდგომარეობა და სპეციფიკური საჭიროებები შეიძლება ჰქონდეთ უკრაინელ შშმ პირებს მათი შეზღუდვებიდან გამომდინარე ახლა: უჭირდეთ ევაკუაცია, გადაადგილება, საჭმლის მომარაგება და ა.შ.

თომა კაკაბაძე „ბათუმელებთან“ აღნიშნავს, რომ კონტაქტი აქვთ 15 უკრაინელ შშმ პირთან და კამპანიის პირველ ეტაპზე თითოეული მათგანისთვის  100-100 დოლარის შეგროვება სურთ.

„პირველ ეტაპზე 15 უკრაინელი შშმ პირის დასახმარებლად, ვისზეც გვაქვს ინფორმაცია, გვინდა 1500 დოლარის შეგროვება, ჯერ ეს თანხა არ გვაქვს.

ჩვენი მხარდამჭერი კამპანიის მეორე ეტაპი იქნება იგივე და სხვა შშმ პირების მხარდაჭერა. იქამდე ვიქნებით უკრაინელი შშმ პირების გვერდით და გვექნება მათი მხარდასაჭერი კამპანია, სანამ ამის საჭიროება ექნებათ და არ დასრულდება ომი“, – ამბობს თომა.

მისი თქმით, უკრაინელ შშმ პირებსა და მათი ოჯახის წევრებს ბათუმში მცხოვრები უკრაინელების დახმარებით დაუკავშირდნენ, რათა უშუალოდ მათგან გაეგოთ, თუ რა სჭირდებოდათ.

„ზუმით ჩავერთეთ 9 მარტს. განგაშის სიგნალების ფონზე ვესაუბრებოდით. ზუმი გვეთიშებოდა ხოლმე, რადგან სარდაფებში გარბოდნენ, იქ ინტერნეტი არ ჰქონდათ და ა.შ. ზოგიერთი საერთოდ სარდაფებიდან ჩაგვერთო ზუმში, ჩაფუთნული, ქურთუკებით… ზოგ მათგანს  საკვების პრობლემაც კი ჰქონდა, მაგრამ უფრო მეტად  მედიკამენტების უქონლობის პრობლემა აქვთ, სჭირდებათ „ფაუერ ბანკები“, ფარნები, სიბნელეში გადასაადგილებლად. მათ გვითხრეს, რომ ხანდახან ორჯერ ჩადიან სარდაფებში განგაშის სიგნალის ხმაზე“, – ამბობს თომა.

როგორც თომა ამბობს, ამჯობინეს, რომ შეაგროვონ თანხა და გადაურიცხონ უკრაინასთან ახლო მდებარე ქალაქებში მცხოვრებ მოხალისეებს, რომლებიც უფრო სწრაფად შეძლებენ ამ შშმ პირების საჭიროებების დაკმაყოფილებას, ვიდრე ეს საქართველოდან ტვირთის გაგზავნის შემთხვევაში მოხდებოდა.

„ჩემს პირად საბანკო ანგარიშებს ვიყენებთ თანხის შესაგროვებლად, რადგან ორგანიზაციის ანგარიშიდან თანხის შეტანა და გამოტანა რთული და დროში გაწელილია, ბევრი პროცედურა სჭირდება, ამიტომ მარტივ გზას მივმართეთ“, – ამბობს თომა.

„ბათუმის დამოუკიდებელი ცხოვრების ცენტრის“ კამპანიას შეუერთდა ქალისა და ბავშვის სამოსის ქართული ბრენდი „ლილეპოპი“, რომელიც უკრაინის დროშის ფერებში დამზადებული საყელოებისა და ბაფთების გაყიდვიდან შემოსული თანხის 70% ურიცხავს ცენტრს უკრაინელი შშმ პირების დასახმარებლად. თომას თქმით, იმედოვნებენ, რომ მსგავს ინიციატივას სხვა მცირე და დიდი ბიზნესებიც გამოიჩენენ.

უკრაინელი შშმ პირების დასახმარებლად თანხა შეგიძლიათ გადარიცხოთ ამ ანგარიშის ნომრებზე: 

საქართველოს ბანკი

მიმღები: თემურ კაკაბაძე

GE84BG0000000161260925

თიბისი ბანკი

მიმღები: თემურ კაკაბაძე

GE89TB7713345061100088

ლიბერთი ბანკი

მიმღები: თემურ კაკაბაძე

GE33LB0711198508889000

____________________

ფოტოზე: შშმ პირების სოლიდარობის აქცია ბათუმში. ფოტო: „ბათუმის დამოუკიდებელი ცხოვრების ცენტრი“

ამავე თემაზე: