სოფელ ირემაძეებში გზაზე მეწყერი ჩამოწვა

დღეს, 16 მარტს, დღის პირველ ნახევარში, ხულოს მუნიციპალიტეტის სოფელ ირემაძეების ცენტრალურ გზაზე მეწყერი ჩამოწვა, რომელიც სოფელს მუნიციპალიტეტთან და მეზობელ სოფლებთან აკავშირებს.

მეწყრის ჩამოწოლის შედეგად არავინ დაშავებულა.

„ბათუმელებთან“ საუბრისას ხულოს მერიის სპეციალისტმა დიდაჭარის ადმინისტრაციული ერთეულის სოფელ ირემაძეებში, თამაზ გობაძემ, აღნიშნა, რომ ცენტრალურ გზაზე თოვლის საფართან ერთად ჩამოწვა მიწა და ჩამოიტანა ხეები.

„მხოლოდ თოვლი არ არის ჩამოსული, ჩამოშვავდა მიწა, რასაც ჩამოჰყვა ხშირი ტყეც.

ამ ეტაპზე მოძრაობა შეფერხებულია და გზის გახსნის სამუშაოები დღეს ინტენსიურად მიმდინარეობდა, ამ წუთებშიც იწმინდება გზა. აღნიშნული გზის ქვედა მხარეს, მოშორებით, დასახლებული ტერიტორიაა, ამიტომ მეწყრული მასის ადგილიდან გატანა ხდება“, – ამბობს თამაზ გობაძე.

აჭარის საავტომობილო გზების დეპარტამენტის პრესსამსახურის ინფორმაციით, სოფელ ირემაძეებში გზის ნაწილობრივ გაწმენდა მოხერხდა და ცალმხრივი მოძრაობა უკვე აღდგენილია. ადგილზე მუშაობდა 2 სპეციალური ტექნიკა.

„აჭარის საავტომობილო გზების დეპარტამენტის ინტენსიური მუშაობის შედეგად დიდაჭარა-ღორჯომის დამაკავშირებელ გზაზე საავტომობილო მოძრაობა ნაწილობრივ აღდგენილია. სამუშაო პროცესები აქტიურ რეჟიმში გრძელდება, ხვალ დილიდან საავტომობილო მოძრაობა სრულად აღდგება,“ – გვითხრეს აჭარის საავტომობილო გზების დეპარტამენტში.