ევროკავშირმა სანქციების მეოთხე პაკეტი დაუწესა რუსეთს უკრაინაში ომის გამო.
ევროკავშირი ახალ პერსონალურ სანქციებს აწესებს რუსი ოლიგარქების, კრემლის ლობისტებისა და პროპაგანდისტების, ასევე, საავიაციო, მანქანათმშენებელი და შეიარაღების მწარმოებელი კომპანიების წინააღმდეგ.
სანქციების მეოთხე პაკეტი შეეხება შემდეგ კომპანიებსა და პირებს:
- ოლიგარქ რომან აბრამოვიჩს
- რუსეთის პირველი არხის გენერალურ დირექტორს, კონსტანტინ ერნსტს
- Альфа-Групп-ის მსხვილ აქციონერებს, ჰერმან ჰანსა და ალექსეი კუზმიჩევს
- Роснефти-ის ხელმძღვანელის, იგორ სეჩინის ყოფილ ცოლს, მარინა სეჩინას
- Нафта Москва-ს მფლობელ სულეიმან კერიმოვს
- Рособоронэкспорта-ს გენდირექტორ ალექსანდრ მიხეევს
სანქციების ახალ სიაში სულ 15 ადამიანია. მათი აქტივები ევროკავშირში გაყინულია და ყველა მათგანს ეკრძალება ევროკავშირის ქვეყნებში შესვლა.
სანქცირებულ კომპანიებს შორის აღსანიშნავია Роснефть-ი და Рособоронэкспорт-ი, ასევე, საბრძოლო რაკეტების, ბომბდამშენი ვერტმფრენების, ტანკებისა და თვითმფრინავების მწარმოებლები, რომელთა რესურსსაც იყენებენ რუსეთის ფედერაციის შეიარაღებული ძალები უკრაინის წინააღმდეგ ომში.
ასევე, ევროკავშირიდან აიკრძალება რუსეთში ავტომანქანებისა და სხვა სატრანსპორტო საშუალებების ექსპორტი, რომელთა ღირებულებაც 50 000 ევროს აღემატება. ევროკავშირი უარს ამბობს, ასევე, რუსული ფოლადისა და რკინის იმპორტზე.
რუსეთის ფედერაციას ევროკავშირის ქვეყნებისგან აღარ მიეწოდება ფუფუნების საგნები და ენერგეტიკის სფეროში საჭირო ტექნოლოგიები.
ფუფუნების ნივთების აკრძალვა ეხება 300 ევროზე მეტი ღირებულების პროდუქციას, მათ შორის: ტანსაცმელს, ფეხსაცმელს, მოდის აქსესუარებს, სამკაულებს, ჩანთებს, სუნამოებსა და კანის მოვლის საშუალებებს, ანტიკვარიატს, ფაიფურს და ა.შ.
ასევე, ტრუფელს, შამპანურს, ღვინოს, ვერმუტს და 300 ევროზე მეტი ღირებულების სიგარას.
ევროკომისიის პრეზიდენტმა ურსულა ფონ დერ ლაიენმა სანქციების პაკეტს უწოდა „პირდაპირი დარტყმა რუსულ ელიტაზე“.
„ვინც მხარს უჭერს პუტინის საომარ მანქანას, ვერ უნდა დატკბეს მდიდრული ცხოვრების წესით, სანამ ბომბები უდანაშაულო ადამიანებს ეცემა უკრაინაში,“ – განაცხადა მან.
სანქციების მეოთხე პაკეტი ერთხმად შეადგინა ევროკავშირის წევრმა ყველა ქვეყანამ, დოკუმენტი 15 მარტს დამტკიცდა და დამტკიცებისთანავე ძალაშია.
________________
ფოტო: ევროპის პრესფოტო სააგენტო. EPA/ANDY RAIN
