მთავარი,სიახლეები

რა საფრთხეს ქმნის კოვიდის უფასო PCR ტესტირების გაუქმება? – „გვეყოლება მეტი ინფიცირებული“

16.03.2022 • 1669
რა საფრთხეს ქმნის კოვიდის უფასო PCR ტესტირების გაუქმება? – „გვეყოლება მეტი ინფიცირებული“

საქართველოში PCR ტესტი პირველი მარტიდან ფასიანია. კორონავირუსის გავრცელების ყოველდღიურ სტატისტიკას თუ დავაკვირდებით, მცირდება ვირუსით ინფიცირებულთა რიცხვი. თუმცა ასევე მცირდება მოქალაქეების მიერ გაკეთებული PCR ტესტების რაოდენობაც.

მაგალითისთვის:

  • 26 თებერვალს კორონავირუსის 6 236 ახალი შემთხვევა გამოვლინდა, ჩატარდა – 33 926 ტესტი. აქედან 20 408 – ანტიგენტესტი და 13 518 – PCR ტესტი.
  • 2 მარტს, როცა PCR ტესტი უკვე ფასიანი იყო, გამოვლინდა კორონავირუსით ინფიცირების 3 840 შემთხვევა. ჩატარდა სულ 20 075 ტესტი, აქედან 14 438 -ანტიგენტესტი, 5 637 კი – PCR ტესტი.
  • 15 მარტის მონაცემებით, საქართველოში გასული 24 საათის განმავლობაში გამოვლინდა ინფიცირების 1 716  ახალი შემთხვევა. ჩატარდა 19 857 ტესტი, მათ შორის 17 226 კვლევა ანტიგენის ტესტით და 2 631  – PCR ტესტით.

ვირუსის გავრცელება მცირდება, თუ PCR ტესტზე შეზღუდული წვდომა გახდა ოფიციალური სტატისტიკის მიზეზი? – ამ საკითხზე „ბათუმელები“ ჯანდაცვის მენეჯმენტის ექსპერტს, პარტია „ლელოს“ წევრს, ვატო სურგულაძეს ესაუბრა.

  • საქართველოში პირველი მარტიდან PCR ტესტი გახდა ფასიანი. ბოლო 15 დღე ვუყურებთ კორონავირუსის დადებითი შემთხვევების კლებას. თქვენი აზრით, ეს იმით არის გამოწვეული, რომ ვირუსმა უკან დაიხია, თუ იმით, რომ PCR ტესტზე ყველას აღარ მიუწვდება ხელი?

თუ ჩვენ არც ერთ ტესტს არ გავაკეთებთ, არც ერთი ახალი შემთხვევა არ გვექნება. რაც უფრო ნაკლები რაოდენობა კეთდება ტესტების, შესაბამისად, უფრო ნაკლები იქნება გამოვლენა.

რამდენიმე დღის წინ იყო 7 000-ზე მეტი ტესტი გაკეთებული და დადასტურდა 823 შემთხვევა. დღეს გაიზარდა რაოდენობა, გააკეთეს 19 ათასზე მეტი ტესტი და აქვთ 1 716 შემთხვევა.

უნდა აღინიშნოს ისიც, რომ ვირუსულ დაავადებებს ახასიათებს ციკლურობა. ვირუსის გავრცელება, როგორც ტალღა, წავიდა ზევით, მიაღწია რაღაც პიკს და წამოვიდა ახლა ქვემოთ.

ამჟამად ვირუსი იმყოფება დაღმავალ ეტაპზე.

ჩვენ რას ვაკეთებთ? – ვამცირებთ PCR ტესტებს. PCR ტესტს შეცდომის ალბათობა აქვს ყველაზე დაბალი. მაშინ, როცა სწრაფი ტესტის შეცდომის ალბათობა, მით უმეტეს, ამ ახალ შტამზე, ომიკრონზე, ალბათობა იმის, რომ ცრუ უარყოფითი იყოს, არის საკმაოდ მაღალი. დღეს [15 მარტს] გაკეთებული 19 857 ტესტიდან PCR ტესტი იყო მხოლოდ 2 631.

ამიტომ, რა თქმა უნდ,ა ვირუსის შემთხვევების რიცხვიც წამოვიდა ქვემოთ.

ჩვენმა სახელმწიფომ ეს გააკეთა იმისთვის, რომ გვაჩვენოს – პრემიერ-მინისტრის სიტყვები მართალია – „ვირუსს მოვერიეთ, აღარ გვჭირდება არც ნიღბების ტარება, არც არაფერი სხვა“. კოვიდპასპორტებზე აღარაფერს ვამბობ.

  • თქვენი აზრით, რამდენად სწორია ის კოვიდპოლიტიკა, რასაც ახლა მთავრობა ატარებს?

მე რომ ვიყო, ამას არ გავაკეთებდი. ჩვენ, დიდი ალბათობით, აპრილის შუა რიცხვებში გველოდება კიდევ ერთი ტალღა, რამაც შეიძლება იმსხვერპლოს ადამიანები.

ჩვენ და ბულგარეთი ევროპის ქვეყნებში ვართ პირველ ადგილზე კოვიდით გარდაცვლილი ადამიანების მხრივ მილიონ მოსახლეზე.

ახალი შემთხვევების რაოდენობითაც, მილიონ მოსახლეზე, ვართ „ლიდერები“ მსოფლიოში.  ეს იმაზე მიუთითებს, რომ ვერ მართავს ჩვენი ჯანდაცვის სისტემა – გინდა წინა მინისტრი, გინდა ახალი მინისტრი, რომელიც ჯერ ბოლომდე ვერ გაერკვა რისი მინისტრია. სისტემური ცვლილება სჭირდებათ. ამასთან, ვერცერთ ეტაპზე ვერ აღასრულეს ის რეგულაციები, რაც იყო შემოღებული – ნიღბის ტარება, დისტანცია, მასობრივი ღონისძიებები, ვაქცინაციის პროცესის პოპულარიზაცია და ნორმალურად ჩატარება.

ვაქცინაციის გარდა ეს ოთხი უმარტივესი რეგულაცია საქართველოში არ სრულდებოდა, არც სრულდება ახლა და ამიტომაც გვყავს კორონავირუსით გარდაცვლილი ამდენი ადამიანი.

  • შეიძლება კოვიდის ახალი შემთხვევები აღარ აისახოს სტატისტიკაში, მაგრამ ეს არ ნიშნავს, რომ ადამიანები არ იქნებიან ინფიცირებულები. ეს სადამდე მიგვიყვანს?

მიგვიყვანს იქამდე, რომ კიდევ ერთი აფეთქება იქნება აპრილში და მოგვიწევს ყველაფრის თავიდან დაწყება. აცრების რაოდენობითაც ერთ-ერთ ბოლო ადგილზე ვართ – ჩვენ, ბულგარეთი და კიდევ რამდენიმე ქვეყანა. ეს აისახება იმაზეც, რომ გვეყოლება მეტი ინფიცირებული და მეტი გარდაცვლილი.

მაგრამ მარტო გარდაცვალებაზეც არაა. ამოცანაა, რომ კორონავირუსი არ უნდა დაემართოს ადამიანს. ხომ ვნახეთ, ე.წ. პოპულაციურმა იმუნიტეტმა არ იმუშავა. მესამეჯერაც ემართება ადამიანს და მეოთხედაც.

კორონავირუსი ადამიანს უტოვებს ძალიან ბევრ გვერდით მოვლენებს – მეხსიერებიდან დაწყებული, სისხლძარღვებსა და თირკმლებზე დატოვებული დაავადებებით. ბევრ ორგანოს აზიანებს ეს დაავადება. ამიტომ არის ამოცანა, რომ არ დაემართოს, ან მსუბუქი ფორმით დაემართოს ადამიანს.

როცა პრემიერ-მინისტრი იძახის, რომ ვაქცინაცია არ შველის, ქვეყანაში, სადაც მოსახლეობის 41 % ისედაც აცხადებს, რომ არ აიცრება, 25 % აცხადებს, რომ „ფიქრობს“, რა მოჰყვება ამას გესმით, ალბათ.

  • თბილისის ინფექციური საავადმყოფოს სამედიცინო დირექტორმა, თენგიზ ცერცვაძემ, ახალი შტამის – „დელტაკრონის“ შესახებ გაავრცელა ინფორმაცია. მისი თქმით, ამ შტამს სავარაუდოდ აქვს „დელტას“ სიმძიმე და „ომიკრონის“ გავრცელების სისწრაფე. ფასიანი PCR  და ახალი შტამი – თქვენ რა საფრთხეს ხედავთ?

რატომ გვიკვდება ამდენი ადამიანი ჩვენ? გვიანი დიაგნოსტიკა ხდება. პირველადი ჯანდაცვის სისტემა, რომელმაც უნდა მიაქციოს ყურადღება, ცუდად მუშაობს. რა თქმა უნდა, არიან ოჯახის ექიმები, რომლებიც ძალიან კარგად მუშაობენ.

ხდება გვიანი დიაგნოსტირება, შესაბამისად, გვიან იწყება ამ ხალხის გადაყვანა საავადმყოფოში და ამიტომაც გვყავს ამდენი გარდაცვლილი. თუ ახალი შტამი გამოჩნდება და ექნება ის სიმძიმე, რაც ჰქონდა დელტას და გავრცელების სისწრაფე, რაც ჰქონდა ომიკრონს, ეს იქნება კატასტროფა საქართველოსთვის.

რეალურად ძალიან ბევრი ადამიანი დაგვეღუპება – სისტემა არ არის მზად იმისათვის, რომ კიდევ ერთი ტალღა გადაიტანოს.

  • პანდემიის ორმა წელმა გვაჩვენა, რომ სიმპტომების მიუხედავად, სწრაფი ტესტით ხშირად არ დასტურდება კოვიდი.  შესაბამისად, ასეთი ადამიანები ვერ იღებენ სამედიცინო მომსახურებას, უფრო მეტიც, ვალდებულნი არიან წავიდნენ სამსახურში. ეს რა ჯაჭვს შექმნის?

როცა უფასო PCR ტესტი არ კეთდება, ხოლო ანტიგენმა შეიძლება ცრუ უარყოფითი აჩვენოს, ეს აჩენს იმის საფრთხეს, რომ მაგალითად, ავადმყოფი ადამიანი გავა სამსახურში და გახდება ინფექციის გამავრცელებელი [PCR ტესტი შეიძლება ვერ გაიკეთოს, რადგან არც ისე იაფია]. ამიტომაც არ ექნება ოჯახის ექიმთან წვდომა, მერე შეიძლება ეს გართულდეს და მოხვდება საავადმყოფოში გართულებული ფორმით.

იმის გამო, რომ ივლის საჯარო სივრცეებში, დააინფიცირებს ძალიან ბევრ ირგვლივ მყოფ ადამიანს. საბოლოოდ როგორ დამთავრდება ეს ყველაფერი? ისევ სახელმწიფოს კისერზე იქნება, რადგან სახელმწიფო იხდის მკურნალობის ფასს.

შემიძლია ვთქვა, რომ საავადმყოფოები კარგად არის მომარაგებული მედიკამენტებით და ყველა საშუალებებით, ამაზე ცუდს ნამდვილად ვერ ვიტყვი. თუმცა გვიან მიმართვა ხშირად იქნება ლეტალური შედეგის მიზეზი.

გადაბეჭდვის წესი


ასევე: