გაეროს ცნობით, უკრაინაში ომის დაწყებიდან დღემდე 691 მშვიდობიანი მოქალაქე დაიღუპა, დაშავდა – 1143.
2022 წლის 24 თებერვლის დილის 4 საათიდან, როდესაც დაიწყო რუსეთის ფედერაციის შეიარაღებული თავდასხმა უკრაინაზე, 2022 წლის 14 მარტის შუაღამის 24:00 საათამდე, გაეროს ადამიანის უფლებათა უმაღლესი კომისრის ოფისმა დააფიქსირა 691 მშვიდობიანი მოქალაქის გარდაცვალება და 1143 დაშავებული.
გაეროს მონაცემებით, 691 დაღუპულ მოქალაქეთაგან 135 კაცია, 99 – ქალი, 7 – გოგონა და 11- ბიჭი, ასევე, 30 – ბავშვი და 409 – ზრდასრული, რომელთა სქესი ჯერ უცნობია.
1143 დაშავებული მოქალაქიდან 105 კაცია, 73 – ქალი, 15 – გოგონა და 4 – ბიჭი, ასევე, დაშავებულია 43 ბავშვი და 903 ზრდასრული, რომელთა სქესი ჯერ უცნობია.
გაეროს ადამიანის უფლებათა უმაღლესი კომისრის ოფისი მიიჩნევს, რომ რეალური მაჩვენებლები მნიშვნელოვნად მაღალია, „განსაკუთრებით მთავრობის მიერ კონტროლირებად ტერიტორიაზე და განსაკუთრებით ბოლო დღეებში, რადგან ინფორმაციის მიღება ზოგიერთი ადგილიდან, სადაც ინტენსიური საომარი მოქმედებები მიმდინარეობდა, შეფერხებულია და ბევრი ცნობა ჯერ კიდევ ელოდება დადასტურებას.
ეს ეხება, მაგალითად, იზიუმს [ხარკოვის ოლქი], მარიუპოლსა და ვოლნოვახას [დონეცკის ოლქი], საიდანაც არის ცნობები ასობით მშვიდობიანი მოქალაქის მსხვერპლის შესახებ. ეს მაჩვენებლები ჯერ კიდევ ზუსტდება და არ შედის ზემოთ მოცემულ სტატისტიკაში,“ – წერს გაეროს ადამიანის უფლებათა უმაღლესი კომისრის ოფისი სპეციალურ ანგარიშში.
ანგარიშში ხაზგასმით ნახსენებია უკრაინის პარლამენტის ადამიანის უფლებათა კომისრის მოხსენება, რომლის თანახმად, 15 მარტის დილის 10 საათისთვის უკრაინაში დაიღუპა 97 ბავშვი, 100-ზე მეტი კი დაშავდა.
გაეროს ცნობით:
- დონეცკისა და ლუგანსკის რეგიონებში დაიღუპა 173 და დაშავდა 578 მშვიდობიანი მოქალაქე, მათ შორის, უკრაინის მთავრობის მიერ კონტროლირებად ტერიტორიაზე დაიღუპა 134 და დაშავდა 448 მშვიდობიანი მოქალაქე; თვითგამოცხადებული „რესპუბლიკების“ მიერ კონტროლირებად ტერიტორიაზე დაღუპულია 39 და დაშავებულია 130 მშვიდობიანი მოქალაქე
- უკრაინის სხვა რეგიონებში [ქალაქი კიევი და ჩერკასი, ჩერნიგოვი, ხარკოვი, ხერსონი, მიკოლაევი, ოდესა, სუმი, ზაპორიჟია, დნეპროპეტროვსკი და ჟიტომირის რაიონები], რომლებიც მთავრობის კონტროლს ექვემდებარებოდა, დაიღუპა 518 და დაშავდა 565 მშვიდობიანი მოქალაქე
გაეროს ცნობით, სამოქალაქო მსხვერპლის მიზეზი უმეტეს შემთხვევაში იყო ზემოქმედების ფართო არეალის მქონე ასაფეთქებელი იარაღის გამოყენება, მათ შორის, მძიმე არტილერიითა და მრავალჯერადი სარაკეტო სისტემებით დაბომბვა, ასევე, სარაკეტო და საჰაერო თავდასხმები.
____________________________
ფოტოზე: სამოქალაქო მსხვერპლი ბროვარის მორგში, კიევის რეგიონი, 2022 წლის 11 მარტი. ფოტო: ევროპის პრესფოტო სააგენტო. EPA/ROMAN PILIPEY
