მთავარი,სიახლეები

ავარია ავტობანზე – როგორია დაშავებულების მდგომარეობა

16.03.2022 •
ავარია ავტობანზე – როგორია დაშავებულების მდგომარეობა

„პაციენტების მდგომარეობა სტაბილურია,“ – გვითხრეს ბათუმის სამედიცინო კლინიკებში, სადაც ქობულეთის შემოვლით გზაზე გუშინ, 15 მარტს, მომხდარი ავარიის შედეგად დაშავებული სამი ადამიანი მოათავსეს. ავარიის დროს დაიღუპა აჭარის განათლების სამინისტროს პრესსამსახურის უფროსი, თეა ვადაჭკორია.

ავარიის შედეგად დაშავდა მაია ხაჯიშვილი, აჭარის განათლების მინისტრი. ის „მედცენტრშია“ მოთავსებული. კლინიკაში გვითხრეს, რომ მას საშუალო სიმძიმის დაზიანებები აღენიშნება.

რეანიმაციულ განყოფილებაში რჩება განათლების სამინისტროს მძღოლი, რომელიც ავტომანქანას მართავდა. კლინიკა BAU-ში აღნიშნეს, რომ დაშავებულს დაზიანებები აქვს, თუმცა ის კონტაქტურია.

ავარიის შედეგად კიდევ ერთი კაცი დაშავდა,  რომელიც სხვა ავტომანქანაში იჯდა. მას ხერხემლის მეხუთე მალა აქვს დაზიანებული და ის „ბათუმის სამედიცინო ცენტრში“ მოათავსეს. კლინიკის პრესცენტრის ინფორმაციით, დაშავებულის მდგომარეობა სტაბილურია და მას საოპერაციოდ ამზადებენ.

გადაბეჭდვის წესი


ასევე: