16 მარტს აშშ-ის სენატმა ერთხმად მიიღო რეზოლუცია, რომელშიც პუტინი სამხედრო დამნაშავედაა შეფასებული.
რეზოლუციაში დაგმობილია რუსეთის ქმედებები უკრაინის მიმართ.
დოკუმენტში სენატი მოუწოდებს რუსეთის ფედერაციის ხელმძღვანელებს, აიღონ პასუხისმგებლობა უკრაინის ტერიტორიაზე ჩადენილი სამხედრო დანაშაულებისთვის.
რეზოლუციის ინიციატორი რესპუბლიკელი სენატორი ლინდსი გრეჰემია. რეზოლუციას მხარი დაუჭირეს ორივე პარტიის კანონმდებლებმა. დოკუმენტი ასახავს კონგრესის ზედა პალატის შეხედულებებს რუსეთის მიერ უკრაინაში გამოვლენილ აგრესიაზე.
„ვგმობთ რუსეთის ფედერაციის, პრეზიდენტ ვლადიმერ პუტინის, რუსეთის უშიშროების საბჭოს წევრების, რუსეთის შეიარაღებული ძალების, რუსეთის სამხედრო ლიდერების მიერ გამოვლენილ აგრესიას. ჩადენილი სისასტიკე აღმაშფოთებელია და კაცობრიობის წინააღმდეგ ჩადენილი დანაშაულის ტოლფასია, ეს არის ომის დანაშაულები მიმართული უკრაინელი და სხვა ხალხის წინააღმდეგ,“ – წერია სენატის რეზოლუციაში.
აშშ-ის საკანონმდებლო ორგანოს ზედა პალატა წევრ ქვეყნებს მოუწოდებს, მოსთხოვონ საერთაშორისო სასამართლოს დროული გამოძიება რუსეთის მიერ ომით კაცობრიობის წინააღმდეგ ჩადენილი დანაშაულების გამო.
______________
ფოტოზე: ვლადიმერ პუტინი „ჰარი პოტერის“ რომანების სერიის მთავარი ბოროტმოქმედის, ლორდ ვოლდემორდის როლში. გრაფიტი პოლონეთში, ქალაქ პოზნანში, მხატვარმა KAWU-მ შექმნა. ფოტო: ევროპის პრესფოტო სააგენტო. EPA-EFE/Jakub Kaczmarczyk
