ნეტგაზეთი • RU

“ფორბსი”: რუსეთიდან წასული კომპანიები 200 000-ზე მეტ ადამიანს უზრუნველჰყოფენ სამსახურით

საერთაშორისო კომპანიებში, რომლებიც ნაწილობრივ ან მთლიანად ტოვებენ რუსეთს, 200 000-ზე მეტი ადამიანია დასაქმეული, ინფორმაციას ამის შესახებ ამერიკული ბიზნეს ჟურნალი Forbes აქვეყნებს.

გამოცემის ცნობით, მაკდონალდსი არის უმსხვილესი დამსაქმებელი იმ კომპანიებიდან, რომლებმაც გამოაცხადეს ქვეყნიდან გასვლა. რუსეთში სწრაფი კვების რესტორნების ქსელში 62 000 ადამიანია დასაქმებული.

ამ სიაში “პეპსიკო” თანამშრომლების რაოდენობით სიდიდით მეორე კომპანიაა. იქ საერთო ჯამში 19 ათასი ადამიანია დასაქმებული, აქედან 8000-ზე მეტი ადამიანი მუშაობს უალკოჰოლო სასმელების წარმოების ქარხანაში სოლნეჩნოგორსკში, 1500-ზე მეტი ადამიანი “პეპსიკოს” ჩიფსების მწარმოებელ კომპანია Frito-Lay-ში კაშირში და 8.6 ათასიადამიანი Wimm-Bill-Dann-ში, რომელიც აწარმოებს რძის პროდუქტებსა და ბავშვთა საკვებს. ასევე “პეპსიკოს” ლებედიანსკის წვენების მწარმოებელ საწარმოში კიდევ 462 ადამიანია დასაქმებული.

შვედურმა IKEA-მ სამი თვით დახურა ყველა რუსული მაღაზია, გარდა Mega-ს 14 სავაჭრო ცენტრისა (ორივე კომპანია Ingka ჯგუფის ნაწილია), ასევე შეწყვიტა ადგილობრივი წარმოება და შესყიდვები ადგილობრივი კონტრაქტორებისგან. IKEA-ს ჯერ არ დაუწყია 15000 თანამშრომლის გათავისუფლება – ისინი სამივე თვის განმავლობაში ანაზღაურებით იმუშავებენ. „ეს არ არის [განთავისუფლების] შემწეობა“, განუცხადა Forbes-ს IKEA რუსეთის სპიკერმა კონსტანტინე ტიუტრინმა.

Yum! Brands, რომელიც ფლობს KFC და Pizza Hut ბრენდებს, არის სიდიდით მესამე კომპანია თანამშრომლების რაოდენობთ, რომელმაც ასევე შეაჩერა საქმიანობა რუსეთში. კომპანიის რუსულ საწარმოებს 14,5 ათასზე მეტი თანამშრომელი ჰყავს დასაქმებული.

კიდევ 502-მა რუსულმა მაღაზიამ შეაჩერა მუშაობა ესპანური კომპანია Inditex-ის გადაწყვეტილებით, რომელიც ფლობს ბრენდებს Zara, Pull & Bear, Massimo Dutti, Bershka, Stradivarius, Oysho და სხვა. მაღაზიების დროებითი დახურვის შემდეგ, Inditex აგრძელებს თითქმის 9000 თანამშრომლის ფინანსურ მხარდაჭერას, წერს”ფორბსი”

ავტომწარმოებლებს შორის, რომლებმაც შეაჩერეს საქმიანობა რუსეთში, ყველაზე დიდი დამსაქმებელია Volkswagen-ის კონცერნი, რომელშიც დასაქმებულია თითქმის 5,8 ათასი ადამიანი. “ფორბსი” განმარტავს, რომ კომპანიის ცნობით, რუსეთში თანამშრომლები მოკლევადიან სამუშაო შემწეობებს მიიღებენ.

ასევე, EPAM Systems-მა, რომელშიც 6000-ზე მეტი ადამიანია დასაქმებული, გამოაცხადა რუსეთში საქმიანობის შეწყვეტის შესახებ.

იმ უცხოური კომპანიების რიცხვი, რომლებმაც უკრაინაზე რუსეთის მიერ შეიარაღებული თავდასხმის შემდეგ, განაცხადეს რუსეთიდან ნაწილობრივი ან სრული გასვლის შესახებ კვლავ იზრდება.


მაკდონალდსის რესტორანი მოსკოვში, 2022 წლის 10 მარტი. ფოტო: EPA-EFE/MAXIM

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან