ქუთაისის შემოვლითი გზა ოთხზოლიან ავტომაგისტრალად გადაკეთდება, რისთვისაც არსებული ორზოლიანი გზის პარალელურად ახალი ორზოლიანი გზა აშენდება. მშენებლობა სახელმწიფო ბიუჯეტიდან დაფინანსდება. 41-კილომეტრიანი გზის სამშენებლო სამუშაოებზე საავტომობილო გზების დეპარტამენტმა ტენდერები ოთხ ლოტად გამოაცხადა. ჯამური სატენდერო თანხა 204 572 062 ლარია. ახალი გზა შესაბამისი ხელშეკრულებების გაფორმებიდან 22 თვეში უნდა აშენდეს.
დეპარტამენტის ინფორმაციით, არსებული ორზოლიანი გზა 2014 წლის ნოემბერში გაიხსნა და ამ მონაკვეთზე მომხდარი ხშირი ავარიების გამო მალევე გახადეს ცალმხრივი. ახალი ორი ზოლის აშენებით კი, ქუთაისის შემოვლითი გზის მონაკვეთზე მოძრაობა ორივე მიმართულებით ცალმხრივი გახდება.
პროექტის მიხედვით, შემოვლით გზაზე საანგარიშო სიჩქარე – 120 კმ/სთ იქნება, გამყოფ ზოლში რეკომენდებულია „ნიუ ჯერსის პარაპეტის“ ტიპის გრძივი არმირებული ბეტონის ზღუდარების მოწყობა შესაბამისი სტანდარტის მიხედვით. გზის მარცხენა და მარჯვენა მხარეს დასაშვებია ზღუდარების მოწყობა ლითონის ძელებით. ორზოლიანი გზა შედგება 3,75 მ სიგანის ორი სავალი ზოლისგან, რომელსაც ემატება ხელოვნური საფარით და ქვიშა-ხრეშოვანი ნარევით დაფარული გვერდულები.
„საქართველოს მთავრობა მთავარ პრიორიტეტს ანიჭებს წითელი ხიდისა და შავი ზღვის სანაპიროს დამაკავშირებელ აღმოსავლეთ-დასავლეთის ავტომაგისტრალის გაუმჯობესებას. ქუთაისის შემოსავლელი გზა – სამტრედიის მონაკვეთის მოდერნიზებული ოთხზოლიანი მაგისტრალი უნდა აკმაყოფილებდეს ევროპული სტანდარტების პარამეტრებს“, – აღნიშნულია პროექტის განმარტებით ბარათში.
ახალი ორზოლიანი გზის პროექტი 4 ლოტად დაიყო / ასაშენებელი გზა ლოტების მიხედვით სხვადასხვა ფერითაა აღნიშნული / წყარო: გზების დეპარტამენტი
„დღევანდელი მდგომარეობით მთლიანად დამთავრებულია ზესტაფონი – ქუთაისის ახალი შემოსავლელი გზის, სიგრძით 15.17 კმ, მშენებლობა ოთხზოლიანი საავტომობილო გზის პარამეტრებით სატრანსპორტო კვანძების და ადგილობრივი გზების ჩათვლით, ხოლო ქუთაისის ახალი შემოსავლელი გზა, სიგრძით 17.3 კმ და ქუთაისის ახალი შემოსავლელი გზა – სამტრედია, სიგრძით 24.045 კმ, მშენებლობა განხორციელდა ორზოლიანი საავტომობილო გზის პერსპექტივის გათვალისწინებით იმდაგვარად, რომ მოდერნიზაცია – მისი ოთხზოლიან ავტომაგისტრალად გაფართოება, შესაძლებელია“, – აღნიშნულია სატენდერო დოკუმენტაციაში.
ტენდერებში წინადადებების მიღება 2018 წლის 14 და 15 ნოემბერს დაიწყება და 19 და 20 ნოემბერს დასრულდება. ოთხივე ელექტრონული ტენდერი აუქციონის გარეშე ჩატარდება.
ქუთაისის შემოვლითი ორზოლიანი გზა, რომელიც ოთხზოლიან ავტომაგისტრალად უნდა გადაკეთდეს / ფოტო: გზების დეპარტამენტი
მთავარი ფოტო: ოთხზოლიანი მაგისტრალის ზესტაფონი-ქუთაისის მონაკვეთი/ ფოტო: გზების დეპარტამენტი
